Дуалиримизниң сүпитини яхшилайли

1. Йәһва Өзигә ибадәт қилғучиларни немә қилишқа чақириду? (Рәсимгиму қараң.)

БИЗ тәсәлли вә көрсәтмиләргә муһтаҗ болғанда, кимдин ярдәм соралаймиз? Соалниң җавави ениқ, биз Йәһва Худаға дуа қилалаймиз. Йәһва Худа бизни дәл шундақ қилишқа чақириду. Муқәддәс китап бизгә: «Үзлүксиз дуа қилиңлар»,— дәйду (Сал. 1-х. 5:17). Биз дуада бемалал Униңға йеқинлишалаймиз вә һаятимизниң һәр саһасида Униңдин көрсәтмиләрни соралаймиз (Пәнд н. 3:5, 6). Худайимиз Йәһва сехий болғачқа, бизниң қанчә қетим яки қанчә узун вақит дуа қилишимизға чәк қоймайду.

2. Бу мақалидә немиләрни муһакимә қилимиз?

² Биз чин қәлбимиздин Йәһваға миннәтдар, чүнки У бизни дуа қилиш шан-шәрипигә егә қилди. Бирақ қилишқа тегишлик ишлиримиз көп болғачқа, дуа қилиш үчүн вақит чиқириш қийин болуши мүмкин. Бәлким, дуалиримизниң сүпитини яхшилашниң зөрүрлигини һис қилдуқ. Худаға шүкри, биз Муқәддәс китаптин тәсәлли вә көрсәтмиләрни беридиған нурғун айәтләрни тапалаймиз. Бу мақалидә дуа қилишқа вақит чиқириш тоғрисида Әйса Мәсиһниң үлгисидин немиләрни үгинәләйдиғанлиғимизни муһакимә қилимиз. Униңдин башқа, дуалиримизниң сүпитини қандақ яхшилаш вә дуалиримизда тилға елишқа тегишлик бәш муһим мәзмун һәққидә үгинимиз.

ӘЙСА ДУА ҚИЛИШ ҮЧҮН ВАҚИТ ЧИҚАРҒАН

3. Әйса дуа һәққидә немини чүшәнгән?

³ Йәһва дуалиримизни интайин қәдирләйдиғанлиғини Әйса чүшәнгән еди. У йәр йүзигә келиштин узун заман илгири Атисиниң садиқ әр-аял хизмәтчилириниң дуасиға җавап бәргәнлигини көргән. Мәсилән, Һанна, Давут вә Илияс пәйғәмбәрләрниң чин қәлбидин қилған дуалириға Атиси җавап бәргәндә, Әйса Униң йенида еди (Сам. 1-яз. 1:10, 11, 20; Пад. 1-яз. 19:4—6; Зәб. 32:5). Шуңа, Әйса өз шагиртлириға дайим ишәнч билән дуа қилишни үгәткән (Мәт. 7:7—11).

4. Әйсаниң дуалиридин немиләрни үгинимиз?

⁴ Әйса өзи Йәһва Худаға дуа қилиш арқилиқ шагиртлириға үлгә қалдурған. Вәз хизмити җәриянида Әйса дайим дуа қилған. У дуа қилиш үчүн вақит чиқириши керәк еди, чүнки у һәрдайим алдираш болған вә әтрапида нурғун кишиләр униңға әгишип жүрәтти (Марк 6:31, 45, 46). У ялғуз қелип дуа қилалиши үчүн таң сәһәрдә орнидин турған (Марк 1:35). Кам дегәндә бир қетим у муһим қарар чиқириштин авал кечичә дуа қилған (Луқа 6:12, 13). Һәзрити Әйса өлүштин бурунқи кечиси пүтүн диққитини өзиниң йәр йүзидики вәзиписиниң әң қийин қисимини орунлашқа қаратқачқа, қайта-қайта дуа қилған (Мәт. 26:39, 42, 44).

5. Дуа қилғанда Әйсани қандақ үлгә қилалаймиз?

⁵ Биз һәрқанчә алдираш болсақму, Әйсаниң үлгиси дуа қилишқа вақит аҗритишимиз керәклигини үгитиду. Әйсаға охшаш, биз дуа қилиш үчүн вақит аҗритишимиз керәк. Буниң үчүн бәлким бираз әтигән турушқа яки сәл кечирәк йетишқа тоғра келиду. Шундақ қилсақ, Йәһваниң бу алаһидә соғиси үчүн миннәтдар екәнлигимизни көрситимиз. Лин исимлиқ бир қериндаш тунҗа қетим дуа қилиш имтиязи һәққидә үгәнгәндә, у интайин һаяҗанланған вә миннәтдар болған. У әсләп мундақ дәйду: «Мән Йәһва билән халиған вақитта параңлишалайдиғанлиғимни билгәндә, бу маңа Йәһвани йеқин достум дәп қарашқа вә дуалиримни яхшилаш үчүн тиришишқа ярдәм бәрди». Шәк-шүбһисизки, көпинчимиз мошуниңға охшаш һис-туйғуда болимиз. Шуңа, дуалиримизда тилға елиш зөрүр болған бәш муһим мәзмун һәққидә көрүп бақайли.

ДУАДА ТИЛҒА ЕЛИШ ЗӨРҮР БОЛҒАН БӘШ МУҺИМ МӘЗМУН

6. Вәһий 4:10, 11-айәтләр Йәһва Худа немигә лайиқ дәйду?

⁶ Йәһвани мәдһийиләң. Бизни әймәндүридиған әҗайип бир көрүнүштә әлчи Йоһан асманда Йәһваға ибадәт қиливатқан 24 ақсақални көргән. Улар Худани мәдһийиләп шундақ дейишкән: «Сән шан-шөһрәткә, шан-шәрәпкә вә күч-қудрәткә лайиқсән» (Вәһий 4:10, 11ни оқуң). Садиқ пәриштиләрниңму Йәһвани мәдһийиләш вә улуқлаш үчүн нурғун сәвәплири бар. Улар асманда Яратқучи билән биллә болиду вә Уни яхширақ тонуйду. Пәриштиләр Йәһваниң қиливатқан ишлирини көргәндә, Униң пәзиләтлирини үгиниду. Йәһваниң қандақ һәрикәт қилидиғанлиғини күзәткинидә, бу уларни Уни мәдһийиләшкә дәвәт қилиду (Аюп 38:4—7).

7. Биз Йәһвани немә үчүн мәдһийиләймиз?

⁷ Бизму чоқум дуалиримизда Йәһва Худани мәдһийилишимиз керәк. Уни чин қәлбимиздин сөйидиғанлиғимизни вә немә үчүн Уни һөрмәтләйдиғанлиғимизни ейтиш арқилиқ Уни мәдһийиләймиз. Муқәддәс китапни оқуғанда вә тәтқиқ қилғанда, Йәһваниң сизни Өзигә алаһидә җәлип қилидиған пәзиләтлирини байқашқа тиришиң (Аюп 37:23; Рим. 11:33). Андин Йәһваға әшу пәзиләтлири һәққидә қандақ һис-туйғуда болидиғанлиғиңизни ейтиң. Бизгә вә барлиқ етиқатчи қериндашлиримизға ярдәм бериватқанлиғи үчүн Йәһвани мәдһийиләң. У бизгә давамлиқ ғәмхорлуқ қиливатиду вә қоғдаватиду (Сам. 1-яз. 1:27; 2:1, 2).

8. Йәһва Худаға миннәтдарлиғимизни билдүрүшниң қандақ нурғун сәвәплири бар? (Салоникилиқларға 1-хәт 5:18)

⁸ Йәһва Худаға миннәтдарлиқ билдүрүң. Дуалиримизда Йәһваға миннәтдарлиқ билдүрүшимизниң нурғун сәвәплири бар (Салоникилиқларға 1-хәт 5:18ни оқуң). Биз егә болған һәрқандақ яхши нәрсиләр үчүн Униңға рәхмәт ейталаймиз (Яқуп 1:17). Әмәлийәттә, барлиқ яхши һәдийәләр Униңдин кәлгән. Мәсилән, йәрниң гөзәллиги, мәвҗудатларниң әҗайип яритилғанлиғи үчүн миннәтдарлиқ билдүрәләймиз. Йәнә һаятимиз, аилимиз, достлиримиз вә үмүтимиз үчүн рәхмитимизни билдүрәләймиз. Униңдин башқа, Йәһва билән достлуқ орнитиш вә униңдин бәһримән болуш пурсити үчүн рәхмәт ейтишни халаймиз.

9. Немә үчүн Йәһваға миннәтдар болушни үгинишимиз керәк?

⁹ Биз шәхсән Йәһваға миннәтдарлиғимизни билдүрүшниң сәвәплири һәққидә ойлинишқа алаһидә вақит чиқарсақ болиду. Бу дунияда миннәтдарсиз кишиләр көпийип кәтти, биз уларниң арисида яшаватимиз. Кишиләр һемишәм өзидә бар нәрсиләргә миннәтдарлиқ билдүрүшниң орниға, әксичә өзи еһтияҗлиқ нәрсиләргә көңүл бөлиду. Әгәр биз ундақ көзқарашниң тәсиригә үчрисақ, дуалиримизда пәқәт өзүмиз еришмәкчи болған нәрсиләрнила сорап кетишимиз мүмкин. Шундақ иш йүз беришиниң алдини елиш үчүн, Йәһваниң биз үчүн қилған барлиқ ишлириға миннәтдар болушни давамлиқ үгинишимиз лазим (Луқа 6:45).

10. Миннәтдарлиқ һис-туйғуси бир қериндишимизниң бәрдашлиқ беришигә қандақ ярдәм бәргән? (Рәсимгиму қараң.)

¹⁰ Миннәтдарлиқ қийинчилиқларға бәрдашлиқ беришимизгә ярдәм берәләйду. «Күзитиш мунари» 2015-жил, 15-январь санидики Кюнг-Сук исимлиқ қериндашниң мисалини көрүп бақайли. Униңға өпкә ракиниң ахирқи басқучи дегән диагноз қоюлған. У өзиниң һис-туйғулири һәққидә шуни етирап қилған: «Бу саламәтлик мәсилә мени қаттиқ үмүтсизләндүргән. Мән һәммә нәрсини йоқитип қойғандәк һис қилип, интайин қорқуп кәттим». Мошу әһвалда, униң бәрдашлиқ беришигә немә ярдәм қилған? Һәр күни кечиси ухлаштин бурун өйиниң өгүзисигә чиқип, өзи миннәтдар болған бәш нәрсини тилға елип жуқури авазда дуа қилғанлиғини ейтқан. Бу униң ғәм-әндишисини азайтишиға ярдәм бәргән вә уни Йәһваға болған сөйгүсини ипадиләшкә дәвәт қилған. У Йәһваниң садиқ хизмәтчилири синаққа дуч кәлгәндә, уларни қандақ қоллап-қувәтләйдиғанлиғини баштин кәчүргән вә һаятимизда синақларға қариғанда, бәрикәтләрниң көпирәк болидиғанлиғини һис қилған. Қериндишимиз Кюнг-Сукқа охшаш, бир синақни баштин кәчүрүватқан болсақму, Худаға миннәтдар болушимиз үчүн нурғун сәвәплиримиз бар. Униңға дуада миннәтдарлиғимизни билдүрүш бизниң сәвир-тақәт қилишимиз вә хошаллиғимизни йоқатмаслиғимизға ярдәм берәләйду.

11. Әйса асманға қайтип кәткәндин кейин, униң шагиртлири немә үчүн җасарәткә муһтаҗ болған?

¹¹ Вәз хизмитидә Йәһвадин җасарәт беришини сораң. Асманға қайтиштин сәл авал Әйса Мәсиһ шагиртлириға Йерусалимда, пүтүн Йәһудийә, Самарийә вә дунияниң башқа жирақ җайлирида у тоғрилиқ гувалиқ бериш керәклигини әскәрткән (Әлч. 1:8; Луқа 24:46—48). Шуниңдин узақ өтмәй, йәһудий дин рәһбәрлири әлчи Петрус вә Йоһанни йәһудийларниң Алий сотиниң алдиға елип келип, бу садақәтмән кишиләргә вәз ейтишни тохтитишқа буйриған, һәтта уларға тәһдид салған (Әлч. 4:18, 21). Петрус билән Йоһан буниңға қандақ инкас қайтурған?

12. Әлчиләр 4:29, 31-айәтләргә асасән шагиртлар немә иш қилған?

¹² Йәһудий дин рәһбәрлириниң тәһдидигә Петрус вә Йоһан мундақ җавап қайтурған: «Өзәңлар ойлап көрүңлара, Худаниң нәзәридә Униңға әмәс, силәргә қулақ селиш һәққанийлиққа ятамду? Биз болсақ, көргинимизни вә аңлиғинимизни ейтмай туралмаймиз» (Әлч. 4:19, 20). Петрус билән Йоһан қоюп берилгәндин кейин, шагиртлар Йәһваниң ирадисини орунлаш үчүн жуқури авазда дуа қилип, мундақ дегән: «Сениң сөзүңни ейтиш үчүн қуллириңға җасарәт бәргин». Йәһва Худа уларниң бу сәмимий дуасиға җавап қайтурған (Әлчиләр 4:29, 31ни оқуң).

13. Джин-Хукниң мисалидин немиләрни үгинәләймиз?

¹³ Һәтта һөкүмәтләр биздин вәз ейтишни тохтитишни тәләп қилса, биз биринчи әсирдики шагиртларни үлгә қилип, вәз ейтишни давамлаштуримиз. Бетәрәпликни сақлиғини үчүн түрмигә ташланған Джин-Хук исимлиқ бир бурадәрниң мисалини көрүп бақайли. Түрмидә у ялғуз солап қоюлған бир қисим җинайәтчиләргә ғәмхорлуқ қилишқа тәйинләнгән. У улар билән пәқәт бәлгүләнгән вәзиписигә мунасивәтлик ишлар тоғрисида параңлишалатти, амма Муқәддәс китап тоғрисида параңлишишқа болматти. У һәрбир пурсәттә һәқиқәтни сөзләш үчүн җасарәт вә пәм-парасәт сорап дуа қилған (Әлч. 5:29). У мундақ дәйду: «Йәһва дуалиримға җавап берип, камериларниң ишиклири алдидила бәш минутлуқ қисқа Муқәддәс китап үгинишини башлаш үчүн җасарәт вә әқил-парасәт бәрди. Андин кәчтә әтиси мәһбусларға бериш үчүн хәт яздим». Йәһва Худа вәз хизмитимизни орунлашқа ярдәм қилидиғанлиғиға бизму ишинәләймиз. Джин-Хукқа охшаш, җасарәт вә әқил-парасәт сорап дуа қилалаймиз.

14. Қийинчилиқларға бәрдашлиқ бәргәндә бизгә немә ярдәм берәләйду? (Зәбур 37:3, 5)

¹⁴ Қийинчилиқларға бәрдашлиқ беришиңиз үчүн Йәһвадин ярдәм сораң. Нурғунлиримиз тән-саламәтлигимиз начар яки һис-туйғулиримиз турақсиз болуш, йеқинлиримиздин айрилиш, турмуш шараитимиз қийин болуш, зиянкәшлик яки башқа қийинчилиқларға бәрдашлиқ берип келиватимиз. Тарқилишчан кесәлликләр вә урушларға охшаш нурғун ишлар бәрдашлиқ беришимизни техиму қийинлаштуриду. Худаға көңлүңиздикини пүтүнләй төкүп бериңлар. Худди йеқин достуңизға ейтқандәк, өзүңизниң һал-әһвалини, һис-туйғулирини сөзләп бериң. Шуниңға ишиниңки, Йәһва сизгә яр-йөләк болиду (Зәбур 37:3, 5ни оқуң).

15. Қийинчилиқларға бәрдашлиқ беришимизгә дуа қандақ ярдәм берәләйду? Мисал кәлтүрүң.

¹⁵ Давамлиқ дуа қилиш қийинчилиқларға бәрдашлиқ беришимизгә ярдәм бериду (Рим. 12:12). Йәһва Өзигә ибадәт қилғучиларниң немиләрни баштин кәчүридиғанлиғини билиду вә уларниң ярдәм үчүн қилған налә-пәрядлирини аңлайду (Зәб. 145:18, 19). 29 яштики Кристи исимлиқ бир пионер бу сөзниң һәқиқәт екәнлигини баштин өткүзгән. У күтүлмигәндә еғир ағриққа гириптар болған. Нәтиҗидә, у чүшкүнлүккә петип қалған. Кейинирәк аписиға кесилиниң ахирқи басқуч дегән диагноз қоюлғанлиғини билгән. Кристи мундақ дәйду: «Мән һәр күни муһтаҗ болидиған күч-қувәтни беришни сорап, Йәһваға дуа қилдим. Ибадәт жиғилишлириға қатнишиш, шәхсий үгиниш арқилиқ роһий иш-паалийәтләр билән мәшғул болуш адитини қәтъий давамлаштурушқа тириштим. Әшу еғир күнләрдә бәрдашлиқ беришимгә дуа ярдәм бәрди. Йәһваниң һемишә маңа йеқин турғанлиғини билдим. Буни билиш мән үчүн тәсәлли болди. Гәрчә саламәтлигим дәрһалла әслигә келип, қийинчилиқлирим һәл қилинмисиму, Йәһва дуалиримға қулақ селип, маңа тинч-хатирҗәмлик ата қилди». Биз чоқум шуни унтумаслиғимиз керәкки, «Йәһва Пәрвәрдигар Өзигә вападар кишиләрни синақлардин қандақ қутулдурушни... билиду» (Пет. 2-х. 2:9).

16. Немишкә аздурулушқа қарши туруш үчүн биз Йәһваниң ярдимигә муһтаҗ?

¹⁶ Аздурулушқа қарши туруш үчүн Йәһвадин ярдәм сораң. Биз намукәммәл болғачқа, һемишә аздурулушқа қарши давамлиқ күрәш қилишимизға тоғра келиду. Шәйтан пүтүн күчи билән бу күрәшни техиму қийинлаштурушқа тиришиватиду. У әхлақсиз көңүл ечиш усуллири арқилиқ ой-пикримизни чирикләштүрүшкә тиришиду. Шундақ әхлақсиз оюн-тамашилар әқлимизни напак ой-хияллар билән толдуриду. Әшу напак ой-хияллар бизни Йәһваниң алдида напак қилиду, һәтта еғир гуналарни өткүзүшкә башлалайду (Марк 7:21—23; Яқуп 1:14, 15).

17. Аздурулуштин сақлиниш үчүн дуа қилғандин кейин чоқум немә иш қилишимиз керәк? (Рәсимгиму қараң.)

¹⁷ Хата иш қилишқа майил болғанда, езиқтурушни йәңмәкчи болсақ, Йәһваниң ярдимигә муһтаҗ болимиз. Әйсаниң үлгилик дуасида мундақ сөзләр бар: «Бизниң аздурулушимизға йол қоймай, Явуздин қутулдурғайсән» (Мәт. 6:13). Йәһва бизгә ярдәм беришни халайду. Амма биз Униңдин ярдәм соришимиз керәк. Йәнә дуалиримизға мас һәрикәт қилишимиз керәк. Биз бәзи әмәлий қәдәмләрни бассақ, Шәйтанниң бу дуниясида кәң умумлашқан ой-пикир вә идеяләрни оқуш яки аңлаштин өзүмизни елип қечиш үчүн, қолумиздин келишичә тиришчанлиқ көрситәләймиз (Зәб. 97:10). Муқәддәс китапни оқуш вә үгиниш арқилиқ зеһнимизни пайдилиқ, сағлам ой-пикир билән толдуралаймиз. Ибадәт жиғилишлириға қатнишиш вә вәз хизмитигә чиқиш һәм ой-пикримизни қоғдайду. Униңдин башқа, Йәһва биз көтирәлмигидәк синақларға бизни дучар қилмайдиғанлиғи һәққидә вәдә бериду (Кор. 1-х. 10:12, 13).

18. Һәммимиз немә һәққидә дуа қилишимиз керәк?

¹⁸ Ахирқи заманниң бу қийин күнлиридә, Йәһваға садиқ қелиш үчүн һәрбиримиз, болупму һазир, көпирәк дуа қилишимиз керәк. Чин қәлбимиздин дуа қилиш үчүн һәр күни вақит чиқирайли. Йәһва ич бағримизни Униңға төкүшимизни халайду (Зәб. 62:8). Йәһвани мәдһийиләп, Униң қилған барлиқ ишлири үчүн миннәтдарлиқ билдүрүң. Вәз хизмитидә җасарәтлик болуш үчүн, Униңдин ярдәм сораң. Һәрқандақ қийинчилиққа бәрдашлиқ бериш вә дуч кәлгән һәрқандақ аздурулушқа қарши туруш үчүн ярдәм сораң. Һечким яки һечнәрсиниң Йәһваға давамлиқ дуа қилишиңизға тосқунлуқ қилишиға йол бәрмәң. Бирақ Йәһва дуалиримизға қандақ җавап қайтуриду? Бу муһим соалға кейинки мақалидә җавап тапимиз.