Olosamo

37 Ku ka sumue* omo liomanu vakuevĩho,

Ale oku kuatela onya olondingaĩvi.+

 2 Ovo va ka kukuta lonjanga ndowangu,+

Kuenda va kowuka ndowangu utalala.

 3 Kolela Yehova kuenda linga eci ciwa;+

Tunga vofeka yove kuenda kala ukuekolelo kovilinga viove.+

 4 Sanga esanju* koku fendela Yehova,

Kuenje eye o ka tẽlisa olonjongole viutima wove.

 5 Ecelela okuti Yehova o songuila onjila yove;+

Kolela kokuaye kuenda eye muẽle o ka ku kuatisa.+

 6 Eye o ka lingisa okuti omanu va mola esunga liove ndocinyi comẽle,

Kuenda esunga liove li ka kala ndutanya wekumbi pongunji.

 7 Amamako oku kevelela loku ũha kovaso a Yehova+

Kuenda kevelela kokuaye lepandi.

Ku ka sumue omo liomunu

Una o litunda ciwa koku tẽlisa asokiyo aye ãvi.+

 8 Imbapo onyeño kuenda siapo oku tema;+

Ku ka lisakalaise, liwekapo oku linga eci cĩvi.*

 9 Momo olondingaĩvi vi ka kunduiwa,+

Pole, vana va lavoka ku Yehova va ka piñala ilu lieve.+

10 Vokatembo kaño, olondingaĩvi ka vi ka kalako vali;+

Ove o ka vanja apa ovio via kala,

Kuenje ka vi ka kalapo.+

11 Pole, ambombe va ka piñala ilu lieve,+

Kuenda va ka sanjukila ombembua yalua.+

12 Ondingaĩvi yi lingila ukuesunga esokiyo lĩvi;+

Eye o tema* eci o mola.

13 Pole, Yehova o ko yola,

Momo Eye wa kũlĩha okuti, eteke liaye* li keya.+

14 Olondingaĩvi vi pola olosipata viavo kuenda vi lumbilila* olohonji viavo

Oco vi kundule ukuakutala ohali kuenda ohukũi,

Oco vi ponde vana okuti onjila yavo ya suñama.

15 Pole, osipata yavo yi ka toma ovitima viavo muẽle;+

Olohonji viavo vi ka teyiwa.

16 Ca velapo ceci citito cukuesunga,

Okuti ukuasi wolondingaĩvi vialua u sule.+

17 Momo ovoko olondingaĩvi a ka teyiwa,

Pole, Yehova o ka kuatisa ukuesunga.

18 Yehova wa kũlĩha eci ci pita lomanu va pua etondelo,*

Kuenda ocipiñalo cavo ci kala otembo ka yi pui.+

19 Ovo ka va ka kutisiwa osõi kotembo yocilunga;

Kotembo yonjala va ka kuata okulia kualua.

20 Pole, olondingaĩvi vi ka nyõleha;+

Ovanyãli va Yehova va ka takata ndeposo liowangu;

Ovo va ka takata ndowisi.

21 Ondingaĩvi yi levala kuenje ka yi feti,

Pole, ukuesunga ecaeca locali.+

22 Vana va sumũlũisiwa la Suku va ka piñala ilu lieve,

Pole, vana va siñaliwa Laye va ka kunduiwa.+

23 Yehova o songuila* olongenda viomunu+

Eci Eye a sanjukila onjila yomunu waco.+

24 Ndaño eye o kupuka, ka ka kekama,+

Momo Yehova u kuatisa leka Liaye.+

25 Nda kala umalẽhe kuenje cilo nda kuka,

Pole, sia la mola ukuesunga okuti wa yandulukiwa,+

Ndaño omãla vaye oku sanda okulia.+

26 Eye otembo yosi o levalisa lohenda,+

Kuenda omãla vaye va ka sumũlũisiwa la Suku.

27 Tinduka kueci cĩvi kuenda linga eci ciwa,+

Kuenje o ka kala komuenyo otembo ka yi pui.

28 Momo Yehova o sole esunga,

Kuenda eye ka ka yanduluka vana vo kolela.+

Eye o ka va lava olonjanja viosi;+

Pole, ovitumbulukila violondingaĩvi vi ka kunduiwa.+

29 Vakuesunga va ka piñala ilu lieve,+

Kuenda va ka kalamo otembo ka yi pui.+

30 Omẽla wukuesunga weca olondunge,*

Kuenda elimi liaye li vangula eci catiamẽla kesunga.+

31 Ocihandeleko ca Suku yaye ci kasi vutima waye;+

Kuenda eci eye a enda, omãhi yaye ka yi sielũha.+

32 Ondingaĩvi yi lavulula ukuesunga

Locimãho coku u ponda.

33 Pole, Yehova ka ka yanduluka ukuesunga peka liondingaĩvi+

Kuenda eye ka ko tenda okuti o kuete eko eci a sombisiwa.+

34 Talamẽla ku Yehova kuenda kuama onjila yaye,

Eye o ka ku ĩha esumũlũho lioku piñala ilu lieve.

35 Nda mola omunu ondingaĩvi haeye ongangala okuti

O kasi oku lisandula nduti wa pulika okuti lalimue eteke wa sondoluiwile.+

36 Pole, vocipikipiki eye wa pita kuenda ka kasiko vali;+

Ndamamako oku u sandiliya kuenje eye ka sangiwile.+

37 Tala omunu wa pua etondelo,*

Kuenda lavulula omunu wa suñama,+

Momo oviyaneke viomunu waco, vi ka kala viombembua.+

38 Pole, vosi vakuakandu va ka kunduiwa;

Olondingaĩvi vi ka kunduiwa.+

39 Epopelo lia vakuesunga li tunda ku Yehova;+

Eye ombonge yavo kotembo yohali.+

Eye o ka va yovola kolondingaĩvi loku va popela,

Momo va sanda ocitililo vokuaye.+