Dzulani No Takala Zwifhingani Zwi Konḓaho
“Hu ḓo takala vha khudaho nga [Yehova]; vha ḓo U khoḓa nge wa vha lwela.”—PS. 5:11.
1, 2. (a) Ndi zwifhio zwiṅwe zwithu zwine zwa ri tsikeledza vhukuma ṋamusi? (b) Nga nnḓa ha vhuleme vhune vhathu vha sedzana naho, ndi mini zwine Vhakriste vha ngoho vha fanela u zwi konḓelela?
ṰHANZI DZA YEHOVA dzi a sedzana na vhuleme vhune vhathu vhoṱhe vha sedzana naho. Vhathu vha Mudzimu vhanzhi vha sedzana na vhuvemu, dzinndwa na huṅwe u shayea ha khaṱulokwayo. Khombo dza mupo, nḓala, vhulwadze, na lufu zwi ita uri vhathu vha tsikeledzee vhukuma. Muapostola Paulo o ṅwala nga ho teaho uri: “Ri a zwi ḓivha zwauri zwivhumbwa zwoṱhe na zwino zwi tsha ḓi gomela-vho, zwi tsha ḓi songwa-songwa-vho.” (Vha-Roma 8:22) Ri dovha ra sedzana na mvelelo dza u sa fhelela hashu. U fana na Khosi Davida wa tshifhingani tsho fhiraho, ri nga kha ḓi amba uri: “Milandu yanga yo wela kha ṱhóho yanga, i mvunḓa vhunga muhwalo u lemelaho.”—Ps. 38:4.
2 Nga nnḓa ha vhuleme vhune vhathu vhoṱhe vha sedzana naho, Vhakriste vha ngoho vha hwala danda ḽa tshengedzo nga lwa pfanyisedzo. (Luka 14:27) I ngoho, vhafunziwa vha Yesu vha a vhengwa na u tovholwa u fana nae. (Mat. 10:22, 23; Yoh. 15:20; 16:2) Nga zwenezwo, u tevhela Kristo zwi ṱoḓa u ḓiimisela na u konḓelela musi ro lindela phaṱhutshedzo dza shango ḽiswa.—Mat. 7:13, 14; Luka 13:24.
3. Ri zwi ḓivha hani uri Vhakriste a vho ngo fanela u shengela u itela uri vha takadze Mudzimu?
3 Naa zwenezwi zwi amba uri Vhakriste vha ngoho vha dzula vha songo takala? Naa zwenezwi zwi amba uri ri fanela u dzula ro ṱungufhala u swika vhufhelo vhu tshi swika? Zwi tou vha khagala uri Yehova u ṱoḓa ri tshi takala musi ro lindela u ḓadzea ha mafulufhedziso awe. Tshifhinga tshoṱhe, Bivhili i ṱalusa vhagwadameli vha ngoho sa vhathu vho takalaho. (Vhalani Yesaya 65:13, 14.) Psalme ya 5:11 i ri: “Hu ḓo takala vha khudaho nga [Yehova]; vha ḓo U khoḓa nge wa vha lwela.” I ngoho, zwi a konadzea uri ri takale vhukuma, ri vhe na mulalo wa ngelelo, na u fushea naho ri tshi khou shengela. Kha ri ṱolisise nḓila ine Bivhili ya nga ri thusa ngayo u sedzana na milingo yashu na u dzula ro takala.
Yehova Ndi “Mudzimu O Takalaho”
4. Mudzimu u ḓipfa hani musi zwivhumbiwa zwawe zwi tshi vha mashandukwa?
4 Ṱhogomelani tsumbo ya Yehova. Samusi e Mudzimu Ramaanḓaoṱhe, u vhusa fhethu hoṱhe. Ha shayi tshithu nahone ha ṱoḓi tshithu. Naho zwo ralo, hu sa londwi maanḓa awe mahulwane, Yehova u fanela u vha o vhaisala vhukuma musi muṅwe wa vharwa vhawe vha muya a tshi mu shandukela a vha Sathane. Mudzimu u fanela u vha o vhaisala vhukuma musi vhaṅwe vharuṅwa vha tshi vha mashandukwa nga murahu. Dovhani ni humbule nga ha vhuṱungu he Mudzimu a vhu pfa musi Adamu na Eva, zwivhumbiwa zwavhuḓi vhukuma zwa tsiko yawe ya kha ḽifhasi zwi tshi mu shandukela. U bva nga tshifhinga tshenetsho, vhaḓuhulu vhavho vha dzibilioni vho hana u vhuswa nga Yehova.—Vha-Roma 3:23.
5. Ndi mini zwe zwa pfisa Yehova vhuṱungu vhuhulwane?
5 Vhushandukwa ha Sathane vhu kha ḓi vha hone. Lwa miṅwaha i ṱoḓaho u vha 6000, Yehova o vhona vhathu vha tshi gwadamela midzimu i sili, vha tshi ita vhuvemu, vha tshi vhulahana, na u ḓifara luvhi nga zwa vhudzekani. (Gen. 6:5, 6, 11, 12) Zwiṅwe hafhu, o ambelwa mazwifhi madala-dala na u semiwa. Nga zwiṅwe zwifhinga, na vhagwadameli vha ngoho vha Mudzimu vho mu pfisa vhuṱungu. Bivhili i ṱalusa tshiṅwe tsha zwiitea zwenezwo nga maipfi ane a ri: “Ndi ka-nzhi vha tshi mu vutshela henengei sogani, vha tshi mu levhela henengei phangani. Vha ḓi dovha vha linga Mudzimu, vha ṱungufhadza Mukhethwa wa Isiraele.” (Ps. 78:40, 41) Yehova u pfa vhuṱungu vhuhulwane musi vhathu vhawe vha tshi mu shandukela. (Yer. 3:1-10) Zwi tou vha khagala uri musi zwithu zwivhi zwi tshi itea, na Yehova zwi a mu pfisa vhuṱungu.—Vhalani Yesaya 63:9, 10.
6. Mudzimu u sedzana hani na zwiimo zwi mu pfisaho vhuṱungu?
6 Naho zwo ralo, u pfa vhuṱungu ha Yehova a zwi mu iti uri a si dzhie vhukando. Musi hu tshi vha na vhuleme, Yehova o dzhia vhukando nga u ṱavhanya u itela u fhungudza mvelelo mmbi dza zwe zwa bvelela. O dovha a dzhia vhukando ha tshifhinga tshilapfu u itela uri mafheleloni ndivho yawe i ḓadzee. Musi a tshi humbula nga ha vhukando honoho havhuḓi, Yehova o sedza phanḓa kha u lweliwa ha vhuvhusahoṱhe hawe na kha phaṱhutshedzo dzine dza ḓo wanwa nga vhagwadameli vhawe vha fulufhedzeaho. (Ps. 104:31) I ngoho, hu sa londwi nḓila ye Mudzimu a semiwa ngayo, Yehova u dzula e “Mudzimu o takalaho.”—1 Tim. 1:11, NW; Ps. 16:11.
7, 8. Musi zwithu zwi sa tshimbili zwavhuḓi, ri nga edzisa Yehova nga nḓila-ḓe?
7 I ngoho, ri nga si ḓivhambedze na Yehova musi zwi tshi ḓa kha vhukoni hashu ha u piringulula vhuleme. Naho zwo ralo, ri nga edzisa Yehova musi ro sedzana na vhuleme. Ndi lwa nzulele uri ri ṱungufhale musi zwithu zwi sa tshimbili zwavhuḓi, fhedzi a ro ngo fanela u dzula ro ṱungufhala. Nga ṅwambo wa uri ro sikwa nga tshifanyiso tsha Yehova ri na maanḓa a ngelekanyo na vhuṱali, zwine zwa ita uri ri kone u sedzana na vhuleme na u dzhia vhukando ho teaho musi zwi tshi konadzea.
8 Tshiṅwe tshithu tsha ndeme tshine tsha nga ri thusa u sedzana na vhuleme vhutshiloni ndi u ṱhogomela uri hu na zwithu zwine ra sa kone u zwi langa. U vhilaela nga ho kalulaho nga ha zwithu zwenezwo zwi nga kha ḓi ita uri ri hanganee na u ita uri ri sa takadzwe nga zwithu zwi tshimbidzanaho na vhurabeli ha ngoho. Musi ro no ita zwoṱhe zwine ra nga kona u itela u piringulula vhuleme, zwi ḓo vha zwavhuḓi uri ri litshe u humbulesa nga ha vhuleme hashu nahone ri livhise ṱhogomelo kha mishumo i vhuyedzaho vhukuma. Mafhungo a tevhelaho a re Bivhilini a bvisela khagala mbuno yeneyi.
U Linganyisela Ndi Zwa Ndeme
9. Hanna o sumbedza hani u vha na mavhonele a u linganyisela?
9 Ṱhogomelani tsumbo ya Hanna, we a fheleledza o vha mme a muporofita Samuele. O vha o ṱungufhala nga ṅwambo wa uri o vha a sa bebi. O vha a tshi goḓiwa na u holedzwa nga ṅwambo wa u vha hawe muumba. Nga zwiṅwe zwifhinga, Hanna o vha a tshi tsikeledzea lwe a vha a tshi lila nahone a sa ḽi. (1 Sam. 1:2-7) Kha tshiṅwe tshiitea musi e nḓuni khethwa ya Yehova, Hanna o “pfa mbilu yawe yó ṱungufhala, a khotha phanḓa ha Yehova a lila lwa vhuṱungu.” (1 Sam. 1:10) Musi Hanna o no vhudza Yehova maḓipfele awe, tshifhe muhulu Eli o amba nae a ri: “Tshimbila zwau wó rula mbilu; Mudzimu wa Isiraele u ḓo U ṋea zwe wa mu humbela.” (1 Sam. 1:17) I ngoho, nga tshifhinga tshenetsho, Hanna o ṱhogomela uri o vha o ita zwoṱhe zwe a vha a tshi nga kona. Ho vha hu si na zwe a vha a tshi nga zwi ita nga ha u vha hawe muumba. Hanna o sumbedza u vha na mavhonele o linganyiselwaho. O “ṱuwa, a fara nḓila yawe tshifhaṱuwo tshawe tshí sa [tsha] nga zwiḽa kale.”—1 Sam. 1:18.
10. Paulo o vha hani na mavhonele avhuḓi musi o sedzana na vhuleme he a vha a sa koni u vhu piringulula?
10 Muapostola Paulo o sumbedza u vha na mavhonele a fanaho musi o sedzana na vhuleme. O vha e na vhuleme he ha vha vhu tshi mu tsikeledza vhukuma. O vha a tshi vhu vhidza uri ndi “phaṋa” kana mupfa ṋamani. (2 Vha-Kor. 12:7) Hu sa londwi uri ndi vhuleme vhufhio, Paulo o ita zwoṱhe zwe a vha a tshi nga kona u itela u fhelisa vhuleme hawe, nahone a rabela Yehova uri a mu thuse. Paulo o rabela Yehova lungana uri a mu thuse kha vhuleme hawe? Luraru lwoṱhe. Musi o no rabela lwa vhuraru, Mudzimu o vhudza Paulo uri “phaṋa” kana mupfa u re ṋamani wo vha u sa ḓo vangulwa nga lwa vhuṱolo. Paulo o ṱanganedza zwenezwi nahone a livhisa ṱhogomelo kha u shumela Yehova nga vhuḓalo.—Vhalani 2 Vha-Korinta 12:8-10.
11. Thabelo i ri thusa hani musi ro sedzana na vhuleme?
11 Tsumbo dzenedzo a dzi sumbedzi uri ri fanela u litsha u rabela Yehova nga ha mafhungo a ri tsikeledzaho. (Ps. 86:7) U fhambana na zwenezwo, Ipfi ḽa Mudzimu ḽi a ri eletshedza musi ḽi tshi ri: “Ni songo vhilaela tshithu. Zwoṱhe zwiné na zwi tama ni ḓivhadze Mudzimuni nga thabelo na nga u humbela hu re na u livhuha.” Yehova u ḓo aravha hani khumbelo dzashu na thabelo dzashu? Bivhili i dovha ya ri: “Huno mulalo wa Mudzimu, a fhiraho u ṱalukanya hoṱhe, u vhulungele dzimbilu dzaṋu na mihumbulo yaṋu kha Kristo Yesu.” (Vha-Fil. 4:6, 7) I ngoho, zwi nga kha ḓi itea uri Yehova a sa piringulule vhuleme hashu, fhedzi a nga fhindula thabelo dzashu nga u vhulunga mihumbulo yashu. Musi ro no rabela nga ha mafhungo eneo, ri nga kha ḓi ṱhogomela khombo ya u vha na mbilaelo dzo kalulaho.
U Takadzwa Nga U Ita Zwine Mudzimu A Zwi Funa
12. Ndi ngani u ṱungufhala lwa tshifhinga tshilapfu zwi tshi nga vha na khombo?
12 Mirero 24:10 i ri: “Wá nyabwá nga ḓuvha ḽa khombo, maanḓa au ndi maṱuku.” Muṅwe murero u ri: “Ma-ḽa-mbilu a vunḓa nungo.” (Mir. 15:13) Vhaṅwe Vhakriste vha ṱungufhala lune vha litsha u ita muvhalo wavho wa Bivhili na u elekanya nga ha Ipfi ḽa Mudzimu. Vha vho rabela u itela u bva mulanduni nahone vha nga kha ḓi sa ṱoḓa u ṱangana na vhagwadameli ngavho. Zwi tou vha khagala uri u dzula wo ṱungufhala zwi nga vha na khombo.—Mir. 18:1, 14.
13. Ndi ifhio miṅwe mishumo ine ya nga ri thusa u lwisana na u ṱungufhala na u ri ṋea dakalo?
13 Kha ḽiṅwe sia, u vha na mavhonele avhuḓi zwi ḓo ri thusa u livhisa ṱhogomelo kha masia a vhutshilo hashu ane a ri takadza vhukuma. Davida o ṅwala uri: “Zwi ntakadzaho ndi u ita zwiné Iwe Mudzimu wanga wa zwi funa.” (Ps. 40:8) Musi zwithu zwi sa tshimbili zwavhuḓi vhutshiloni hashu, a ro ngo fanela u litsha na luthihi u ita mishumo yavhuḓi ine ya tshimbidzana na vhurabeli hashu. Zwi re zwone ndi uri, u itela u lwisana na u ṱungufhala hashu, ri fanela u ita mishumo ine ya ri ḓisela dakalo. Yehova u ri vhudza uri ri nga takala vhukuma musi ri tshi vhala Ipfi ḽawe na u ḽi guda tshifhinga tshoṱhe. (Ps. 1:1, 2; Yak. 1:25) Ri wana “fhungo ḽó naka[ho]” Maṅwaloni Makhethwa na miṱanganoni ya Vhukriste zwine zwa nga ri ṱuṱuwedza na u ri takadza.—Mir. 12:25; 16:24.
14. Ndi khwaṱhisedzo ifhio i bvaho ha Yehova ine ya ita uri ri takale zwino?
14 Mudzimu u ri ṋea zwiitisi zwinzhi zwa u takala. I ngoho, fulufhedziso ḽawe ḽa u ri tshidza, ḽi ita uri ri takale vhukuma. (Ps. 13:5) Ri a zwi ḓivha uri hu sa londwi zwine zwa khou itea kha riṋe zwino, mafheleloni Mudzimu u ḓo lambedza vhane vha mu ṱoḓa nga u fulufhedzea. (Vhalani Muhuweleli 8:12.) Muporofita Habakuku o amba zwavhuḓi e na khwaṱhisedzo musi a tshi ri: “Hone, nahó muhuyu ú sa aṋwi, naho miṱokola í si ná mitshelo, naho muṱwari wó pfuvha, nahó mirangani zwifuwo zwó fhela, naho madangani kholomo dzi si tsheeho’, Á vha nṋe, ndi ḓo ḓi takalela Yehova, nda pembelela Mudzimu Mulamuleli wanga.”—Hab. 3:17, 18.
“Hu Takala Lushaka Luné Mudzimu Walwo A Vha Yehova”
15, 16. Bulani zwiṅwe zwa zwifhiwa zwa Mudzimu zwine ra nga ḓiphina ngazwo musi ro lindela phaṱhutshedzo dza tshifhingani tshi ḓaho.
15 Musi ri tshee ro lindela vhumatshelo havhuḓi, zwine Yehova a zwi funa ndi uri ri ḓiphine nga zwithu zwavhuḓi zwe a ri ṋea zwone. Bivhili i ri: “Zwine nṋe nda zwi ḓivha ndi uri, a hu na tshi fhirisaho u takala ha muthu, na u ita zwivhuya misi a tshee hone; hone, ndi tshifhiwa tsha Mudzimu muthu a tshi ḽa a tshi nwa, a tshi vhona zwivhuya nga mishumo yawe yoṱhe.” (Muh. 3:12, 13) “U ita zwivhuya” zwi katela u itela vhaṅwe mishumo yavhuḓi. Yesu o ri mashudu a muṋei a fhira a muṋeiwa. Mishumo ya vhulenda ine ra i itela vhafarisi vhashu, vhana vhashu, vhabebi vhashu, na maṅwe mashaka ashu, i ita uri ri fushee nga ho dzikaho. (Mir. 3:27) U vha na vhulenda, u funa vhaeni, na u hangwela vhahashu vha tshinnani na vha tshisadzini vha Vhakriste zwi dovha zwa ri ḓisela dakalo ḽihulwane nahone zwi takadza Yehova. (Vha-Gal. 6:10; Vha-Kol. 3:12-14; 1 Pet. 4:8, 9) Nahone u ḓikumedza musi ri tshi shuma mushumo washu wa u huwelela zwi a ri vhuyedza vhukuma.
16 Maipfi o bulwaho afho nṱha a re kha Muhuweleli a sumbedza nga ha zwithu zwiṱuku zwi takadzaho vhutshiloni, zwi ngaho u ḽa na u nwa. Vhukuma, naho ri tshi khou sedzana na milingo, ri nga takadzwa nga zwifhiwa naho zwi zwifhio zwi vhonalaho zwine ra zwi ṋewa nga Yehova. Zwiṅwe hafhu, u naka ha ḓuvha musi ḽi tshi kovhela, u naka ha shango, nḓila ine zwipuka zwiṱuku zwa seisa ngayo na zwiṅwe zwithu zwine zwa mangadza zwa tsiko a zwi badelwi, fhedzi zwi nga ri mangadza nahone zwa ita uri ri takale. Musi ri tshi elekanya nga zwithu zwo raloho, ri funa Yehova nga ho engedzeaho, nga ṅwambo wa uri ndi Muṋei wa zwithu zwoṱhe zwavhuḓi.
17. Ndi mini zwine zwa ḓo ri vhofholola tshoṱhe kha vhuṱungu, nahone ndi mini zwine zwa ri khuthadza zwino?
17 Mafheleloni, u funa hashu Mudzimu, u thetshelesa milayo yawe, na u vha na lutendo kha tshiṱhavhelo tshi rengululaho, zwi ḓo ita uri ri vhofhololwe tshoṱhe kha vhuṱungu ha u sa fhelela nahone zwa ita uri ri takale nga hu sa fheli. (1 Yoh. 5:3) Zwa zwino, ri khuthadzwa nga u ḓivha uri Yehova u a ḓivha zwavhuḓi zwithu zwoṱhe zwine zwa ri pfisa vhuṱungu. Davida o ṅwala uri: “Ndi ḓo imba ndi tshi takalela tshilidzi tshau; ngauri wo vhona vhusiwana hanga; U ḓivha u khakhelwa ha muya wanga.” (Ps. 31:7) Nga ṅwambo wa uri Yehova u a ri funa, u ḓo ri tshidza kha vhuleme vhune ra khou sedzana naho.—Ps. 34:19.
18. Ndi ngani vhathu vha Mudzimu vha tshi fanela u takala vhukuma?
18 Musi ro lindela u ḓadzea ha mafulufhedziso awe, u nga ri ri nga edzisa Yehova, Mudzimu o takalaho. U nga ri ri nga iledza u vha na maḓipfele a si avhuḓi ane a nga ri ita uri ri sa bvele phanḓa ri tshi shumela Mudzimu. U nga ri vhukoni hashu ha u humbula na vhuṱali zwi nga ri livhisa musi ri tshi sedzana na vhuleme. Yehova u ḓo ri thusa uri ri lange maḓipfele ashu na u dzhia vhukando naho vhu vhufhio vhune ra nga kona u itela u fhungudza mvelelo dzi si dzavhuḓi dza zwiitea zwi ṱungufhadzaho. Kha ri takadzwe nga zwithu zwavhuḓi zwi vhonalaho na zwa lwa muya, zwine zwa bva khae. Nga u dzula ri tsini na Mudzimu, ri ḓo kona u takala nga ṅwambo wa uri “hu takala lushaka luné Mudzimu walwo a vha Yehova.”—Ps. 144:15, vhambedzani NW.
No Guda Mini?
• Musi ri tshi sedzana na vhuleme, ri nga edzisa Yehova nga nḓila-ḓe?
• U linganyisela zwi nga ri thusa hani u sedzana na vhuleme?
• Musi ro tsikeledzea, ri nga takadzwa hani nga u ita zwine Mudzimu a zwi funa?
[Zwifanyiso kha siaṱari 16]
Yehova u a pfa vhuṱungu musi zwithu zwivhi zwi tshi itea
[Ṱhaluso ya Vhubvo ha Tshifanyiso]
© G.M.B. Akash/Panos Pictures
[Zwifanyiso kha siaṱari 18]
Yehova o ri ṋea nḓila dzine ra nga dzula ro takala ngadzo