Te ʼu Fehuʼi ʼa Te Kau Lautohi

He Koʼē ʼe Mole Fakaʼaogaʼi e Te Kau Fakamoʼoni ʼa Sehova Ia Te ʼu Fakatātā ʼi Tanatou Tauhi?

ʼI te mālamanei kātoa, maʼa te kau Inituisi, mo te kau Putisi, mo te kau Katolika, pea mo nātou ʼo te Lotu Orthodoxe, ko te fakaʼaogaʼi ʼo te ʼu taulāʼatua, mo te ʼu fakatātā ʼe maʼuhiga ia ʼi tanatou tauhi. ʼI ʼihi potu fenua ʼo Afelika, ko te hahaʼi ʼe natou ʼatolasio ki te ʼu maka togi peʼe ko te ʼu ʼakau togi ʼo he ʼatua peʼe lau ko he laumālie ʼo te ʼAtua ʼe maʼuli ai.

Kae ko te kau Fakamoʼoni ʼa Sehova ʼe mole natou fakaʼaogaʼi he faʼahiga taulāʼatua peʼe ko he fakatātā ʼi tanatou tauhi. Kapau ʼe kotou mamata ki te ʼu fale ʼaē ʼe fai ai tanatou ʼu fono, ʼaē ʼe fakahigoaʼi ko te ʼu Fale ʼo Te Puleʼaga, ʼe kotou tokagaʼi anai ʼe mole kotou maʼu ai ni fakatātā ʼo he “ ʼu sagato,” peʼe ko he ʼu fakatātā ʼo Sesu peʼe ko Malia.a Koteā tona tupuʼaga? Kotou tokagaʼi age muʼa peʼe koteā ʼaē ʼe ʼui ʼi te Tohi-Tapu ʼo ʼuhiga mo te faʼahi ʼaia.

Koteā ʼAē Neʼe Fakamaʼua e Te ʼAtua Ki Te Kau Iselaele?

ʼI tana ʼosi fakaʼāteaina ia te kau Iselaele mai Esipito, neʼe fakahāhā fakalelei age e Sehova ʼAtua kiā nātou ia te faʼahiga ʼatolasio ʼaē neʼe ina loto ke fai age. ʼE ʼui fēnei ʼi te lua folafola ʼo te ʼu Folafola e hogofulu: “ ʼAua naʼa ke faʼu maʼa koe he pāki togi, peʼe ko he meʼa ʼe fakatātā ki he meʼa ʼe ʼi te lagi ʼi ʼoluga, peʼe ʼi te kele ʼi lalo, peʼe ʼi te ʼu vai ʼi te lalo kele. ʼAua naʼa ke punou ʼi ʼonatou muʼa, pea mo tauhi kiā nātou, koteʼuhi ko au ia Sehova, tou ʼAtua, ko au ko te ʼAtua ʼe au fakamaʼua he pipiki ʼāteaina pē kiā te au.”—Ekesote 20:4, 5.

ʼI te temi tonu ʼaē neʼe foaki ai e te ʼAtua ia te ʼu folafola ʼaia kiā Moisese, neʼe lolotoga faʼu e te kau Iselaele ia te ʼuhiʼi pipi ʼaulo. Neʼe mole natou fakahigoaʼi ia te fakatātā ʼaia ki te higoa ʼo he ʼatua Esipito. Kae neʼe natou fakapipiki ki te tauhi ʼaē kiā Sehova. (Ekesote 32:5, 6) Neʼe feafeaʼi ia te ʼAtua ki te faʼahi ʼaia? Neʼe hake ia tona toe ʼita lahi kiā nātou ʼaē neʼe natou tauhi ki te taulāʼatua, pea neʼe maumauʼi e Moisese.—Ekesote 32:9, 10, 19, 20.

Ki muli age, neʼe toe hilifaki e Sehova ʼAtua ia te tahi ʼu fakamahino ʼo ʼuhiga mo te lua folafola. ʼAki ia Moisese, neʼe ina fakamanatuʼi age ki te kau Iselaele ke ʼaua naʼa natou faʼu maʼa nātou ia “he fakatātā togi ʼi hona faʼahiga agaaga pē, ki te fakatātā ʼo te koga tapu ʼo te tagata peʼe ʼo te fafine, peʼe ki te fakatātā ʼo he manu ʼi te kele, peʼe ki te fakatātā ʼo he manulele pē ʼe lele ʼi te lagi, peʼe ki he manu pē ʼe gatolo ʼi te kele, peʼe ki he ika pē ʼaē ʼe maʼuli ʼi te ʼu vai ʼi te lalo kele.” (Teutalonome 4:15-18) ʼE mahino ia, neʼe tonu ki te kau Iselaele ke ʼaua naʼa natou fakaʼaogaʼi he ʼu taulāʼatua ʼi hona faʼahiga agaaga pē ʼi te tauhi ʼaē ki te ʼAtua.

Kae ki muli age, neʼe tō ia Iselaele ki te tauhi taulāʼatua. Moʼo fakatonutonuʼi ʼo nātou, neʼe fekauʼi e Sehova ia te kau polofetā moʼo fakatokaga ʼo nātou ki te tautea ʼaē kā ʼamanaki hoko mai kiā nātou, ʼuhi ko tanatou tauhi taulāʼatua. (Selemia 19:3-5; Amosi 2:8) Kae ko te fenua kātoa ʼo Iselaele neʼe ina meʼa noaʼi ia te ʼu fakatokaga ʼa te ʼAtua. Koia, ʼi te taʼu 607 ʼi muʼa ʼo totatou temi, neʼe fakagafua ai e Sehova ki te kau Papiloni ke natou fakaʼauha ia Selusalemi pea mo natou fakaʼaunofo ia te hahaʼi.—2 Fakamatala 36:20, 21; Selemia 25:11, 12.

Koteā ʼAē Neʼe Tui Kiai Ia Te Kau Kilisitiano ʼo Te ʼUluaki Sēkulō?

ʼI te temi ʼaē neʼe tafoki ai ia te hahaʼi ʼaē neʼe mole ko he kau Sutea ki te lotu Fakakilisitiano ʼi te ʼuluaki sēkulō, neʼe mole kei natou fakaʼaogaʼi ia te ʼu taulāʼatua ʼi tanatou tauhi ʼaē ki te ʼAtua. Kotou tokagaʼi ia te ʼu palalau ʼa te tagata tufuga ukamea ko Temetelio ʼo ʼuhiga mo te gāue fai fakamafola ʼa te ʼapositolo ko Paulo: “ ʼU tagata, ʼe kotou ʼiloʼi lelei pē, ʼe ko te gāue ʼaenī ʼaē ʼe tou maʼu ai ia totatou maʼuli. Pea tahi, ʼe kotou mamata pea mo logo ko te Paulo ʼaenī ʼe ina fakalotoʼi ia te toe hahaʼi tokolahi, ʼo mole gata pē ʼi Efesi, kae teitei pē mo Asia kātoa, pea mo ina fetogi ʼanatou manatu, ʼo ina tala ʼe mole ko he ʼu ʼatua ia te ʼu meʼa ʼaē neʼe faʼu ʼaki te nima ʼo te tagata.”—Gāue 19:25, 26.

Ko te ʼu palalau ʼaē neʼe fai e Paulo ʼe natou fakamoʼoni ia te tukugākovi ʼaē neʼe fai e Temetelio ʼi Efesi. ʼI tana palalau ki te kau Keleka ʼi Ateni, neʼe ʼui fēnei e Paulo: “Ko tātou ia te hako ʼo te ʼAtua, pea ʼe mole tonu ke tou manatu ko te ʼAtua ʼe fakatatau ki te ʼaulo, peʼe ki te siliva, peʼe ki te maka, ʼe tatau mo he meʼa neʼe togi e te gāue tufuga pea mo te fakakaukau ʼa te tagata. ʼE moʼoni, neʼe mole tokagaʼi e te ʼAtua ia te ʼu temi fakapōʼuli ʼaia, kae ʼi te lakaga nei ʼe ina fakahā ki te tagata fuli pē ʼi te potu fuapē ke natou fakahemala.” (Gāue 17:29, 30) ʼO ʼuhiga pē mo te faʼahi fēia, neʼe faitohi ia Paulo kiā nātou ʼaē ʼi Tesalonika pea mo ina vikiʼi nātou ʼaki te ʼu palalau ʼaenī: “[Neʼe kotou] haga ki te ʼAtua, ʼo kotou maliu mai takotou ʼu taulāʼatua.”—1 Tesalonika 1:9.

Neʼe mole gata pē kiā Paulo kae ʼo fēia mo te ʼapositolo ko Soane, neʼe ina fakatokaga ia te kau Kilisitiano ke ʼaua naʼa natou fakaʼaogaʼi ia he ʼu fakatātā ʼi tanatou tauhi. ʼI te fakaʼosiʼosi ʼo te ʼuluaki sēkulō, neʼe ʼui fakahagatonu age e Soane: “ ʼU kiʼi fānau, kotou fakamamaʼo mai te ʼu taulāʼatua.”—1 Soane 5:21.

ʼE fakalogo ia te kau Fakamoʼoni ʼa Sehova ki te fakatotonu ʼa te ʼAtua ʼaē ke ʼaua naʼa fakaʼaogaʼi ni fakatātā ʼi hona faʼahiga agaaga pē mokā natou tauhi age ki ai. ʼE natou tui ki te ʼu palalau ʼaenī ʼa Sehova ʼAtua: “Ko au ia Sehova. Ko toku huafa ʼaia; pea ʼe mole au foaki anai toku kolōlia ki he tahi age, peʼe ko toku fakavikiviki ki he ʼu fakatātā neʼe togi.”—Isaia 42:8.

[Nota]

[Paki ʼo te pasina 31]

“Ko au ia Sehova. Ko toku huafa ʼaia; pea ʼe mole au foaki anai toku kolōlia ki he tahi age, peʼe ko toku fakavikiviki ki he ʼu fakatātā neʼe togi.”—Isaia 42:8