Kua Kotou Nonofo Teuteu Koa Ki Te ʼAho ʼo Sehova?
“Ko te ʼaho lahi ʼo Sehova kua ovi mai. Kua ovi mai, pea ʼe fakavilivili ʼaupitō mai.”—Sofonia 1:14.
1-3. (a) Koteā ʼaē ʼe ʼui ʼi te Tohi-Tapu ʼo ʼuhiga mo te ʼaho ʼo Sehova? (b) Koteā te “ ʼaho ʼo Sehova” ʼaē kā hoko mai?
KO TE ʼaho ʼo Sehova ʼe mole ko ʼona hola e 24. ʼE ko he temi loaloaga ʼe fakahoko ai anai e te ʼAtua ia tana fakamāuʼi ia te hahaʼi agakovi. Ko nātou ʼaē ʼe mole natou tauhi ki te ʼAtua, ʼe tonu ke natou mātataku ʼo ʼuhiga mo te ʼaho fakapōʼuli ʼaia, te ʼaho ʼo te hauhau, mo te ʼita lahi, mo te mamahi, pea mo te maumau. (Isaia 13:9; Amosi 5:18-20; Sofonia 1:15) ʼE ʼui fēnei ʼi te lea faka polofetā ʼa Soele: “Meʼa lā ke feafeaʼi ki te ʼaho ʼaia; heʼe kua ovi mai te ʼaho ʼo Sehova, pea ʼe hoko mai anai ia ohagē ko he fakaʼauha mai te Māfimāfi!” (Soele 1:15) Kae ʼi te ʼaho lahi ʼaia, ko Sehova ʼe ina haofaki anai ia nātou ʼaē ʼe “faitotonu ʼi tonatou loto.”—Pesalemo 7:10.
2 Ko te kupuʼi palalau ʼaē te “ ʼaho ʼo Sehova,” ʼe faka ʼuhiga ki te fakahoko ʼo te fakamāu fakaʼatua ʼi te ʼu temi kehekehe. Ohagē lā, ʼaki ia te kau Papiloni ʼi te taʼu 607 ʼi muʼa ʼo totatou temi, neʼe hoko ai te “ ʼaho ʼo Sehova” kiā nātou ʼaē neʼe māʼuʼuli ʼi Selusalemi. (Sofonia 1:4-7) Ko te tahi fakamāu fēia ʼa te ʼAtua neʼe hoko ʼi te taʼu 70 ʼo totatou temi, ʼi te temi ʼaē neʼe fakaʼaogaʼi ai e te ʼAtua ia te kau Loma ke natou fakahoko tana fakamāu ki te puleʼaga Sutea ʼaē neʼe fakafisi ki tona ʼAlo. (Taniela 9:24-27; Soane 19:15) ʼE toe fakakikite ʼi te Tohi-Tapu te “ ʼaho ʼo Sehova,” ʼi te temi ʼaē kā ina ‘tauʼi ai anai ia te ʼu puleʼaga fuli.’ (Sakalia 14:1-3) ʼAki ia te takitaki ʼa te laumālie, neʼe fakapipiki e te ʼapositolo ko Paulo te ʼaho ʼaia mo te ʼi henī ʼa Kilisito, ʼaē neʼe kamata ʼaki te fakanofo Hau ʼo Sesu ʼi selō ʼi te taʼu 1914. (2 Tesalonika 2:1, 2) ʼI te kua ovi mai ʼo te ʼaho ʼo Sehova, ʼe ʼalutahi lelei mo te vaega Tohi-Tapu ʼa te kau Fakamoʼoni ʼa Sehova ki te taʼu 2007, ʼaē ʼe toʼo mai ia Sofonia 1:14. ʼE tou lau fēnei ai: “Ko te ʼaho lahi ʼo Sehova kua ovi mai.”
3 ʼI te temi ʼaenī ʼe tonu ai ke kotou nonofo teuteu, heʼe kua ovi mai te ʼaho lahi ʼo te ʼAtua. ʼE kotou lava nonofo teuteu feafeaʼi ki te ʼaho ʼaia? ʼE ʼi ai koa he tahi ʼu faʼahi ʼe tonu ke kotou fai ke feala hakotou nonofo teuteu ai ki te ʼaho ʼo Sehova?
Ke Kotou Nonofo Teuteu
4. Ko te ʼahiʼahi lahi fea ʼaē neʼe kua nofo teuteu Sesu kiai?
4 ʼI tana lea faka polofetā ʼo ʼuhiga mo te fakaʼosi ʼo te tuʼu ʼaenī, neʼe fai e Sesu Kilisito ki tana kau tisipulo ia te tokoni ʼaenī: “Ke kotou nonofo teuteu.” (Mateo 24:44) ʼI te temi ʼaē neʼe fai ai e Sesu ia te ʼu palalau ʼaia, neʼe kua nofo teuteu ki te ʼahiʼahi lahi ʼaē kā hoko kiā te ia—ʼaē ko tana foaki ia tona maʼuli ko he sākilifisio faitotogi. (Mateo 20:28) Koteā ʼaē ʼe feala ke tou ako mai te nofo teuteu ʼa Sesu?
5, 6. (a) ʼE tokoni feafeaʼi mai ia te ʼofa ki te ʼAtua pea mo totatou tatau, ke tou nonofo teuteu ki te ʼaho ʼo Sehova? (b) ʼO ʼuhiga mo te ʼofa ʼaē ki tatatou tatau, koteā ia te faʼifaʼitaki ʼaē neʼe tuku mai e Sesu?
5 Neʼe ʼofa ia Sesu ʼaki tona loto kātoa kiā Sehova pea mo Tana ʼu lēkula faitotonu. ʼE ʼui fēnei iā Hepeleo 1:9 ʼo ʼuhiga mo Sesu: “Neʼe ke manako ki te faitotonu kae neʼe ke fehiʼa ki te meʼa noaʼi ʼo te lao. Ko te tupuʼaga lā ʼaia, ko te ʼAtua, tou ʼAtua, neʼe ina tākai ai koe ʼaki te lolo ʼo te fakafiafia ʼo laka age ʼi tou ʼu kaumeʼa.” Neʼe nofo agatonu ia Sesu ki tana Tamai ʼaē ʼe ʼi selō, ʼuhi ko tona ʼofa ʼaē kiā te ia. Kapau ʼe tou ʼoʼofa fēia ki te ʼAtua pea mo tou mulimuli ki tana ʼu fakamaʼua, ʼe ina haoafaki anai tātou. (Pesalemo 31:23) Ko te ʼofa pea mo te fakalogo ʼaia ʼe tokoni mai anai ke tou nonofo teuteu ki te ʼaho lahi ʼo Sehova.
6 Neʼe ʼiloga lelei iā Sesu tona ʼofa ʼaē ki te hahaʼi. ʼEī, “neʼe ʼofa mamahi . . . kiā nātou, he neʼe natou ʼāhua pea mo mavetevete, ohagē he faga ovi ʼe mole honatou tagata tauhi.” (Mateo 9:36) Koia, neʼe faka mafola ai e Sesu ia te logo lelei ki te hahaʼi, ohagē pē ko te uga ʼo tātou e te ʼofa ke tou faka mafola ia te logo ʼo te Puleʼaga ki totatou tatau. ʼUhi ko totatou ʼofa ki te ʼAtua pea mo totatou tatau, ʼe tou haga fai faka mafola ʼi totatou ʼuhiga minisi Kilisitiano, pea ʼe tokoni mai ia te gāue ʼaia ke tou nonofo teuteu ki te ʼaho lahi ʼo Sehova.—Mateo 22:37-39.
7. ʼI tatatou fakatalitali ki te ʼaho ʼo Sehova, he koʼē ʼe tonu ke tou fiafia?
7 Neʼe fiafia ia Sesu ʼi te fai ʼo te finegalo ʼo Sehova. (Pesalemo 40:8) Kapau ʼe tou fēia mo tātou, pea ʼe tou fiafia anai ʼi te fai ʼo he tauhi taputapu ki te ʼAtua. Ohagē ko Sesu, ʼe tou foaki lahi anai, pea ʼe tou fiafia moʼoni ai anai. (Gāue 20:35) ʼEī, “ko te fiafia ʼo Sehova ʼe ko [totatou] kolo tau.” ʼAki ia te fiafia ʼaia, ʼe toe lelei age anai tatatou nonofo teuteu ki te ʼaho lahi ʼo te ʼAtua.—Nehemia 8:10.
8. He koʼē ʼe tonu ke tou fakaovi kiā Sehova ʼi te faikole?
8 Ko te faikole fakamālotoloto ʼaē neʼe fai e Sesu ki te ʼAtua, neʼe tokoni kiā ia ke nofo teuteu ki te ʼu ʼahiʼahi ʼo tana tui. Neʼe faikole ʼi te temi ʼaē neʼe papitemaʼi ai ia ia e Soane. Neʼe faikole Sesu ʼi te pō kātoa ʼi te temi ʼaē neʼe ina filifili ai tana kau ʼapositolo. (Luka 6:12-16) Pea ko te ʼu faikole ʼaē neʼe fai e Sesu ʼaki tona loto kātoa, ʼi te pō fakaʼosi ʼo tona maʼuli ʼi te kele, ʼe mole malave koa lā ki te loto ʼo ia ʼaē ʼe ina lau ia te Tohi-Tapu? (Maleko 14:32-42; Soane 17:1-26) ʼE kotou faikole tuʼumaʼu koa ohagē ko Sesu? Kotou fakaovi tuʼumaʼu kiā Sehova, ʼaua naʼa kotou faikole fakavilivili, kotou kumi te takitaki ʼa te laumālie māʼoniʼoni, pea kotou foimo tali tana takitaki mokā fakahā atu ia te meʼa ʼaē ʼe tonu ke kotou fai. ʼI te temi faigataʼa ʼaenī, ʼe maʼuhiga ke mālohi tatatou felōgoi mo tatatou Tamai ʼaē ʼe ʼi selō, heʼe kua fakaovi pea kua fakavilivili mai ia te ʼaho lahi ʼo te ʼAtua. Kae tāfito, kotou fakaovi tuʼumaʼu pē kiā Sehova ʼi te faikole.—Sake 4:8.
9. He koʼē ʼe maʼuhiga ke tou tōkakaga ʼo ʼuhiga mo te tapuhā ʼo te huafa ʼo Sehova?
9 Ko te tokaga ʼaē ke tapuhā ia te huafa māʼoniʼoni ʼo Sehova, neʼe toe tokoni kiā Sesu ke nofo teuteu ki te ʼu ʼahiʼahi kā hoko kiā te ia. Neʼe ina akoʼi tana kau tisipulo ke natou kolekole ia te faʼahi ʼaenī ʼi tanatou ʼu faikole ʼaē ki te ʼAtua: “Ke tapuhā tou huafa.” (Mateo 6:9) Kapau ʼe tou loto moʼoni ke tapuhā peʼe ke faka māʼoniʼoniʼi ia te huafa ʼo Sehova, pea ʼe tou tōkakaga anai ke ʼaua naʼa tou fai he meʼa ʼe ina ʼulihi anai tona huafa. Kapau ʼe tou fai fēia, pea ʼe toe lelei age anai ia tatatou nonofo teuteu ki te ʼaho lahi ʼo Sehova.
ʼE Tonu Koa Ke Kotou Fai Ni ʼu Fetogi?
10. He koʼē ʼe lelei ke tou sivisivi totatou maʼuli?
10 Kapau ʼe hoko mai te ʼaho ʼo Sehova ʼapogipogi, kua kotou nonofo teuteu moʼoni koa kiai? ʼE lelei anai ke tou tahi sivisivi totatou maʼuli, moʼo vakaʼi peʼe tonu ke tou fetogi ni ʼu aga peʼe ko ni ʼu manatu. ʼI tatatou ʼiloʼi ʼaē ʼe nounou pea mo fetofetogi ia te maʼuli, ʼe ʼaoga kiā tātou fuli ke tou tōkakaga ʼi te ʼaho fuli ke tou mālolohi ʼi te faʼahi fakalaumālie. (Tagata Tānaki 9:11, 12; Sake 4:13-15) Tou vakaʼi he ʼu faʼahi ʼe lagi tonu ke tou mulimuli kiai ʼi totatou maʼuli.
11. Koteā ia te fakatuʼutuʼu ʼaē ʼe feala ke kotou fai ʼo ʼuhiga mo te lau ʼo te Tohi-Tapu?
11 Ko te faʼahi maʼuhiga, ʼe ko te tokoni ʼaē ʼe tuku mai e “te tagata kaugana agatonu” ʼaē ke tou lau ia te Tohi-Tapu ʼi te ʼaho fuli. (Mateo 24:45) ʼE feala ke kotou fakatuʼutuʼu ke kotou lau tuʼa tahi ʼi te taʼu fuli ia te Tohi-Tapu, mai ia Senesi kiā Fakahā, ʼo kotou toʼo he temi moʼo metitāsio. Kapau ʼe kotou lau ni ʼu kāpite e fā ʼi te ʼaho fuli, pea ʼe feala anai ke kotou lau ia te ʼu kāpite e 1 189 ʼo te Tohi-Tapu ʼi te taʼu kātoa. Ko te ʼu hau fuli ʼo Iselaele neʼe tonu ke natou lau ia te Lao ʼa Sehova “ ʼi te ʼu ʼaho fuli ʼo [tonatou] maʼuli.” ʼE mahino mai neʼe fai ia te faʼahi ʼaia e Sosue. (Teutalonome 17:14-20; Sosue 1:7, 8) ʼE maʼuhiga ʼaupitō ki te ʼu tagata tauhi ovi fakalaumālie, ke natou lau ia te Folafola ʼa te ʼAtua ʼi te ʼaho fuli, heʼe tokoni anai kiā nātou ke natou foaki ia “te faiakonaki ki te maʼuli”!—Tito 2:1.
12. ʼI te ovi mai ʼo te ʼaho ʼo Sehova, koteā ʼaē ʼe tonu ke ina uga koutou ke kotou fai?
12 Ko te ovi mai ʼo te ʼaho ʼo Sehova ʼe tonu ke ina uga koutou ke kotou kau tuʼumaʼu ki te ʼu fono faka Kilisitiano pea mo fai ai hakotou ʼu tali, mokā ʼe feala. (Hepeleo 10:24, 25) Kapau ʼe kotou mulimuli ki te ʼu tokoni ʼaia, pea ʼe feala ai anai ke kotou hikihiki takotou ʼu fealagia, ʼi tokotou ʼuhiga kau fai faka mafola ʼo te Puleʼaga ʼaē ʼe natou fia maʼu pea mo tokoni kiā nātou ʼaē ʼe lotolelei ki te maʼuli heʼegata. (Gāue 13:48) ʼE lagi toe feala foki ke kotou lagolago lahi age ki te kōkelekāsio ʼi he tahi age ʼu faʼahi, ohagē ko te tokoni ki te hahaʼi mātutuʼa pea mo fakaloto mālohiʼi te kau tūpulaga. ʼE fakaloto fiafia anai ia takotou ʼu faiga ʼaia!
Takotou ʼu Felōgoi Mo Te Hahaʼi
13. Ko te ʼu fehuʼi fea ʼaē ʼe feala ke tou fai ʼo ʼuhiga mo te kofuʼi ʼo te ʼuluagaaga foʼou?
13 ʼI te kua ovi mai ʼo te ʼaho ʼo Sehova, ʼe tonu koa ke kotou faiga mālohi age ke “kotou kofuʼi [ia] te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni”? (Efesi 4:20-24) ʼI takotou faiga ʼaē ke kotou maʼu ia te ʼu kalitātē fakaʼatua, ʼe tokagaʼi anai e ʼihi ʼe kotou ‘haʼele ʼaki ia te laumālie ʼo te ʼAtua’ pea mo ʼiloga iā koutou ia te fua ʼo te laumālie ʼaia. (Kalate 5:16, 22-25) ʼE ʼi ai koa he ʼu faʼahiga gāue ʼe feala ke kotou fai mo takotou fāmili, moʼo fakahā ai ʼe kotou kofuʼi ia te ʼulugaaga foʼou? (Kolose 3:9, 10) Ohagē lā, ʼe ʼiloʼi koa koutou ʼuhi ko te ʼu gāue lelei ʼaē ʼe kotou fai ki te ʼu tehina pea mo tuagaʼane pea mo ʼihi atu? (Kalate 6:10) Ko te ako tuʼumaʼu ʼo te Tohi-Tapu, ʼe tokoni atu anai ke kotou fakatuputupu ia te ʼu kalitātē fakaʼatua ʼaē kā natou teuteuʼi koutou ki te ʼaho ʼo Sehova.
14. He koʼē ko he tahi ʼe ina gāueʼi ia te loto lolomi, ʼe tonu ke ina kole ia te laumālie māʼoniʼoni?
14 ʼE kotou ʼiloʼi koa ʼe kotou ʼiʼita vave pea mo ʼaoga lahi kiā koutou ia te loto lolomi? Ko te kalitātē ʼaia ʼe kau ki te fua ʼo te laumālie māʼoniʼoni ʼo te ʼAtua ʼaē ʼe feala ke kotou maʼu. Koia, kotou kole ia te laumālie māʼoniʼoni, ohagē ko tona ʼui fēnei e Sesu: “Ke kotou haga kole, pea ʼe foaki atu anai kiā koutou; ke kotou haga kumi, pea ʼe kotou maʼu anai; ke kotou haga fisifisi pea ʼe ʼavahi atu anai kiā koutou. . . . Kapau ko koutou, logopē takotou agakovi, ʼe kotou popoto ʼi te foaki ki ʼakotou ʼu fānau he ʼu meʼa ʼofa ʼe lelei, ʼe feafeaʼi leva lā te lahi ake ia ʼo te foaki e te Tamai ʼaē ʼe ʼi selō te laumālie māʼoniʼoni kiā nātou ʼaē ʼe natou kole kiā te ia!”—Luka 11:9-13.
15. Koteā ʼaē ʼe tonu ke kotou fai mo kapau ʼe kotou tokakovi mo he tehina peʼe ko he tuagaʼane?
15 Kapau lā ʼe kotou tokakovi mo he tehina peʼe ko he tuagaʼane, ʼe tonu anai ke kotou faiga mālohi moʼona fakatokatoka, moʼo lagolago ki te tokolelei pea mo te logotahi ʼo te kōkelekāsio. (Pesalemo 133:1-3) Kotou mulimuli ki te tokoni ʼa Sesu ʼaē ʼe tuʼu iā Mateo 5:23, 24 peʼe iā Mateo 18:15-17. Kapau lā neʼe kotou tuku ke tō ia te laʼā kae ʼe mole heʼeki kotou fakatokatoka ia te tokakovi ʼaia, pea kotou foimo fai ia te faʼahi ʼaia. ʼI te agamāhani, ko te meʼa ʼaē ʼe tonu anai ke kotou fai, ʼe ko takotou tali lelei ʼaē ke kotou loto fakamolemole. Neʼe tohi fēnei e Paulo: “Ke kotou liliu ʼo feagaleleiʼaki, fonu ʼi te manavaʼofa, ʼo kotou fefakamolemoleʼaki, ohagē ko te fakamolemole ʼa te ʼAtua kiā koutou ʼaki ia Kilisito.”—Efesi 4:25, 26, 32.
16. Ko te ʼu ʼaluʼaga fea ʼaē ʼe ʼaoga ai ia te loto manavaʼofa ʼi te maʼuli faka taumātuʼa?
16 ʼI te ʼu felōgoi faka taumātuʼa, ʼe fakamaʼua ke nā fefakahāʼaki ia he loto manavaʼofa, pea ʼi ʼihi temi, ke nā fefakamolemoleʼaki. Kapau ʼe tonu ke lahi age takotou ʼofa pea mo takotou manavaʼofa ki tokotou ʼohoana, kotou faiga ke kotou maʼu ia te ʼu kalitātē ʼaia ʼaki te tokoni ʼa te ʼAtua pea mo tana Folafola. ʼE ʼi ai koa he faʼahi ʼe tonu ke kotou fai ke feala ai hakotou mulimuli ki te koga tohi ʼo 1 Kolonito 7:1-5, moʼo fakamaʼamaʼa takotou maʼuli hoha pea ke mole kotou hala ai ki tuʼa? ʼE mahino ia, ʼi te faʼahi ʼaia ʼo te maʼuli faka taumātuʼa, ʼe tonu ai ki te tagata ʼohoana pea mo te fafine ʼohoana ke nā “fonu ʼi te manavaʼofa.”
17. Ko te ʼu fakatuʼutuʼu fea ʼaē ʼe tonu ke fai e he tahi neʼe agahala mamafa?
17 Koteā ʼaē ʼe tonu ke kotou fai mo kapau neʼe kotou fai he agahala mamafa? Kotou foimo fai he ʼu fakatuʼutuʼu moʼo fakatonutonuʼi ia te faʼahi ʼaia. Kotou kumi tāfito ia te tokoni ʼa te ʼu tagata ʼāfea. Ko tanatou ʼu faikole pea mo tanatou ʼu tokoni, ʼe ʼaoga anai kiā koutou ke kotou toe lelei ʼi te faʼahi fakalaumālie. (Sake 5:13-16) Kotou faikole kiā Sehova ʼo kotou fakahā takotou fakahemala. Kapau ʼe mole kotou fai ia te faʼahi ʼaia, pea ʼe kotou tukugākoviʼi pē anai ia koutou pea mo hoha ai tokotou leʼo ʼo loto. Neʼe hoko kiā Tavite ia te faʼahi ʼaia, kae neʼe ina maʼu he lotofīmālie lahi, ʼi tana tala kiā Sehova tana agahala! Neʼe tohi fēnei e Tavite: “Fiafia ia ia ʼaē ʼe fakamolemole age tana agatuʼu, ia ia ʼaē ʼe ʼuʼufi tana agahala! Fiafia ia te tagata ʼaē ʼe mole lau e Sehova tana hala, pea ʼe mole maʼu he faka kākā ʼi tona ʼatamai!” (Pesalemo 32:1-5) ʼE fakamolemole e Sehova ia nātou ʼaē ʼe agahala kae ʼe natou fakahemala moʼoni.—Pesalemo 103:8-14; Tāʼaga Lea 28:13.
ʼAua Naʼa Kotou Kau ʼi Te Mālama
18. ʼE tonu ke feafeaʼi kiā koutou ia te mālama ʼaenī?
18 ʼE mahino papau ia, ʼe kotou fakaʼamu ki te mālama foʼou pea mo taulekaleka ʼaē neʼe fakapapauʼi mai e totatou Tamai ʼaē ʼe ʼi selō. Koia, ʼe feafeaʼi kiā koutou ia te mālama ʼaenī ʼe mamaʼo ai te hahaʼi heʼe faitotonu mai te ʼAtua? Ko Satana, “te pule ʼo te mālamanei,” neʼe mole feala ke ina puke ia Sesu Kilisito. (Soane 12:31; 14:30) ʼO toe fēia pē, ʼe mole kotou loto ke puke koutou e te Tēvolo pea mo tana mālama. Koia kotou tokagaʼi ia te ʼu palalau ʼaenī neʼe fai e te ʼapositolo ko Soane: “ ʼAua naʼa kotou manako ki te mālamanei peʼe ko te ʼu meʼa ʼaē ʼe ʼi te mālamanei.” ʼE ko he aga fakapotopoto ʼaia, koteʼuhi “ ʼe fakalaka te mālamanei pea mo tona holi, kae ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.”—1 Soane 2:15-17.
19. Ko te ʼu fakatuʼutuʼu fea ʼaē ʼe fakaloto mālohiʼi te kau tūpulaga Kilisitiano ke natou fai?
19 ʼE kotou tokoni koa ki takotou fānau ke ‘ ʼaua naʼa ʼulihi nātou e te mālamanei’? (Sake 1:27) ʼE fia toho ʼe Satana takotou fānau kiā ia ohagē ko he tagata ʼe ina toho ake he ika ʼaki tana kauʼi ivi. Ko te ʼu kūtuga pea mo te tahi ʼu kautahi ʼe natou fai he ʼu fakatuʼuʼu ke fia nonofo te kau tūpulaga ʼi te mālama ʼa Satana. Kae ko te ʼu kaugana ʼa Sehova kua natou kau nātou ki te kautahi pē ʼe tahi ʼaē kā hao ʼi te fakaʼosi ʼo te tuʼu agakoni ʼaenī. Koia ʼe tonu ai ke fakaloto mālohiʼi ia te kau tūpulaga Kilisitiano ke ‘lahi tanatou ʼu gāue ʼi te ʼAliki.’ (1 Kolonito 15:58) ʼE maʼua ki te ʼu mātuʼa ʼaē ʼe pipiki ki te ʼAtua, ke natou tokoni ki tanatou fānau ke natou fai he ʼu fakatuʼutuʼu ke natou maʼu ai ia te fiafia pea mo he ʼu tapuakina, ko he maʼuli ʼe natou fakamaʼuhigaʼi ai te ʼAtua pea mo tokoni kiā nātou ke natou nonofo teuteu ki te ʼaho ʼo Sehova.
Kotou Sisio Mamaʼo Atu ʼi Te ʼAho Lahi ʼo Sehova
20. He koʼē ʼe tonu ke tou manatuʼi tuʼumaʼu ia te maʼuli heʼegata?
20 ʼE feala anai hakotou fakatalitali ki te ʼaho ʼo Sehova ʼaki he loto fakatokatoka, mo kapau ʼe kotou manatuʼi tuʼumaʼu ia te maʼuli heʼegata. (Suta 20, 21) ʼE kotou fakaʼamu ki te maʼuli heʼegata ʼi te Palatiso, pea mo kotou ʼamanaki ke kotou maʼu te mālohi ʼo tokotou temi tūpulaga, pea mo te temi heʼegata ʼaē kā kotou fakahoko ai takotou ʼu fakatuʼutuʼu pea mo ako ai he tahi age ʼu faʼahi ʼo ʼuhiga mo Sehova. ʼE feala anai hakotou haga hoko atu takotou ako ʼaē ke kotou ʼiloʼi ia te ʼAtua ʼo talu ai, heʼe ʼi te temi nei ʼe ʼiloʼi pē e te tagata “te ʼu tafatafa . . . ʼo tona ʼu ala.” (Sopo 26:14) ʼI ʼu ʼamanaki fakatupu fiafia leva!
21, 22. Ko te ʼu manatu fea ʼaē ʼe feala anai ke kotou fevaevaeʼaki iā koutou pea mo te kau fakatuʼuake?
21 ʼI te Palatiso, ʼe feala anai ki te kau fakatuʼuake ke natou fakakātoa tatatou mahino ki te ʼu meʼa ʼaē neʼe hoko ʼi te temi muʼa. Ko Enoke ʼe ina fakamahino mai anai pe neʼe ina maʼu feafeaʼi ia te lototoʼa moʼo tala te logo ʼa Sehova ki he ʼu hahaʼi neʼe mole pipiki ki te ʼAtua. (Suta 14, 15) ʼE mahino ia, ʼe fakamatala mai anai e Noe pe neʼe feafeaʼi tanatou faʼu ia te ʼaleka. Ko Apalahamo pea mo Sala ʼe nā fakahā mai anai pe neʼe feafeaʼi tonā loto ʼi tanā mavae mai te kolo koloaʼia ko Ule pea mo tonā maʼuli ʼi te ʼu falelā. Pea ko Esitele, ʼe ina fakamatalatala mai anai pe neʼe feafeaʼi tana palalau ʼaē moʼo haofaki ʼo tana hahaʼi, pea mo tana tāʼofi ia te fakatuʼutuʼu fakakākā ʼo Amane moʼo matehi ʼo nātou. (Esitele 7:1-6) Kotou fakakaukauʼi age muʼa te fai fakamatala mai ʼa Sonasi, ʼo ʼuhiga mo tana nofo iā ʼaho e tolu ʼi te loto fatu ʼo te foʼi ʼika, peʼe ko te fakahāhā mai anai e Soane Patita pe neʼe feafeaʼi tona loto ʼi te temi ʼaē neʼe ina papitemaʼi ai ia Sesu. (Luka 3:21, 22; 7:28) ʼE mahino ia ʼe tou fia ʼiloʼi anai ia te ʼu faʼahi fuli ʼaia!
22 Lolotoga te ʼAfio ʼa Kilisito iā Taʼu e Afe, ʼe lagi kotou maʼu anai ia te pilivilēsio ʼaē ko te tokoni ki te kau fakatuʼuake ke natou maʼu ia “te ʼatamai mālama ʼo ʼuhiga mo te ʼAtua.” (Tāʼaga Lea 2:1-6) Iā ʼaho nei, ʼe fakafiafia ʼaupitō te sio ʼaē ki te hahaʼi ʼe natou maʼu pea mo natou maʼuliʼi ia te ʼatamai mālama ʼo ʼuhiga mo Sehova ʼAtua! Kae kotou fakakaukauʼi age muʼa takotou fiafia ʼi te temi kā haʼu, mokā tapuakina anai e Sehova takotou ʼu faiga ke kotou akoʼi ia te hahaʼi ʼaē neʼe māʼuʼuli ʼi te ʼu temi muʼa, pea mo tanatou tali ʼaki he loto fakafetaʼi!
23. Koteā ʼaē ʼe tonu ke tou haga fai?
23 Ko te ʼu tapuakina ʼaē ʼe tou maʼu ʼi te temi nei ʼi totatou ʼuhiga hahaʼi ʼa Sehova, ʼe laka age ia ʼi tatatou ʼu faiga ʼi totatou ʼuhiga heʼe haohaoa. (Pesalemo 40:5) ʼE tou loto fakafetaʼi tāfito ki te meʼa kai fakalaumālie ʼaē ʼe foaki mai e te ʼAtua. (Isaia 48:17, 18) Tatau aipē peʼe feafeaʼi totatou ʼaluʼaga, kae tou haga foaki he tauhi taputapu ʼaki totatou loto kātoa, ʼo tou fakatalitali ki te ʼaho lahi ʼo Sehova.
ʼE Kotou Tali Feafeaʼi Anai?
• Koteā “te ʼaho ʼo Sehova”?
• ʼE kotou lava ʼiloʼi feafeaʼi ʼe kotou nonofo teuteu ki te ʼaho ʼo Sehova?
• ʼI te ovi mai ʼo te ʼaho lahi ʼo te ʼAtua, ko te ʼu fetogi fea ʼaē ʼe lagi tonu ke tou fai?
• Koteā ʼaē ʼe kotou fakaʼamu kiai ʼi te hili anai ʼo te ʼaho ʼo Sehova?
[Paki ʼo te pasina 14]
Neʼe fakahā e Sesu neʼe kua nofo teuteu ki te ʼu ʼahiʼahi
[Paki ʼo te pasina 17]
ʼE ko he toe pilivilēsio anai tatatou tokoni ki te kau fakatuʼuake ke natou maʼu ia te ʼatamai mālama ʼo ʼuhiga mo Sehova!