“E Fakaovi Atu Anai Kia Koutou”

“E mole mamao [ia te ʼAtua] maia tatou takitahi.”—Gaue 17:27.

1, 2. (a) ʼI tatatou mamata ki te lagi fetuʼuʼia, koteā te fehuʼi ʼe lava hake ia tatou ʼo ʼuhiga mo te Tupuʼaga? (b) ʼE fakamoʼoni feafeaʼi mai e te Tohi-Tapu ko te tagata ʼe maʼuhiga ʼaupito kia mata ʼo Sehova?

KUA koutou mamata koa ki he lagi fetuʼuʼia ʼi he po ʼe laulelei pea mo taulekaleka ʼaupito? ʼE fakatupu manavahe ia te ʼu tuʼuga fetuʼu pea mo te lahi ʼo te ʼatulaulau. ʼI te ʼatulaulau lahi ʼaupito ʼaia, ʼe ʼi ai te kele kae ʼe veliveli ʼaupito ʼosi ia. Ko tona faka ʼuhiga koa ko te Tupuʼaga, ia “te Māʼoluga ʼAupito ʼo te kele katoa,” ʼe maʼuhiga fau peʼe mamaʼo fau ke mole tokaga ifo ki te hahaʼi, pea ʼe mole feala hona ʼiloʼi e te hahaʼi?—Pesalemo 83:18.

² ʼE fakahā mai e te Tohi-Tapu ʼe maʼuhiga ʼaupito te hahaʼi kia mata ʼo Sehova. ʼI tona fakahagatonu, ʼe fakaloto mālohiʼi tatou e te Folafola ʼa te ʼAtua ke tou kumi ia ia, ʼo ina ʼui fēnei: “E mole mamao ia maia tatou takitahi.” (Gaue 17:27; 1 Fakamatala 28:9) ʼIo, kapau ʼe tou fai te ʼu meʼa ʼaē ʼe totonu moʼo fakaōvi ki te ʼAtua, pea ʼe ina tokagaʼi anai tatatou ʼu faiga. ʼO feafeaʼi? ʼE tou maʼu te tali fakaloto mālohi kiai ʼi te ʼu palalau ʼo tatatou koga tohi ʼo te taʼu 2003: “E fakaovi atu anai kia koutou.” (Sakopo 4:8) Tou talanoa ki te tahi ʼu tapuakina taulekaleka ʼe foaki e Sehova ʼaki he loto manavaʼofa kia nātou ʼaē ʼe nātou fakaōvi age kia te ia.

Ko Te Meʼa ʼOfa ʼĀteaina Pe Mai Ia Sehova

3. Koteā te meʼa ʼofa ʼe foaki e Sehova kia nātou ʼaē ʼe fakaōvi age kia te ia?

³ ʼUluaki, ʼe maʼu e te ʼu kaugana ʼa Sehova te meʼa ʼofa maʼuhiga, ko te meʼa ʼofa ʼaia neʼe ina tuku keheʼi maʼa tana hahaʼi. Ko te meʼa ʼofa ʼaia ʼe mole lava foaki e te mālohi fuli, te ʼu koloā fuli, pea mo te ako ʼaē ʼo te malamanei. Ko te meʼa ʼofa ʼāteaina pe mai ia Sehova, pea ʼe ina foaki pe kia nātou ʼaē ʼe nātou fakaōvi age kia te ia. Koteā te meʼa ʼofa ʼaia? ʼE tali fēnei e te Folafola ʼa te ʼAtua: “Kapau . . . ʼe ke kalaga ʼaki tou leʼo ki te fakasiosio tonu, kapau ʼe ke haga kumi te meʼa ʼaia ohage ko te siliva pea kapau ʼe ke kumi tuʼumaʼu ohage ko he ʼu koloā maʼuhiga neʼe fufū, pea ʼe ke mahino ai anai ki te manavasiʼi kia Sehova pea ʼe ke maʼu ai anai te ʼatamai mālama ʼo ʼuhiga mo te ʼAtua. Heʼe foaki e Sehova totonu ia te poto.” (Tāʼaga Lea 2:​3-6) Koutou fakakaukauʼi age muʼa, ko te hahaʼi heʼe haohaoa ʼe feala ke nātou maʼu “te ʼatamai mālama ʼo ʼuhiga mo te ʼAtua”! Ko te meʼa ʼofa ʼaia—te ʼatamai mālama ʼaē ʼe maʼu ʼi te Folafola ʼa te ʼAtua—ʼe fakatatau ki te “koloā maʼuhiga neʼe fufū.” Koteā tona tupuʼaga?

4, 5. He koʼe ʼe feala ke fakatatau “te ʼatamai mālama ʼo ʼuhiga mo te ʼAtua” ki he “koloā maʼuhiga neʼe fufū”? Koutou tuku mai he faʼifaʼitaki.

⁴ ʼUluaki, ʼe maʼuhiga ʼaupito te ʼatamai mālama ʼo ʼuhiga mo te ʼAtua. ʼI tana ʼu tapuakina ʼaē ʼe maʼuhiga age ʼe ko te ʼamanaki ʼaē ki te maʼuli heʼegata. (Soane 17:3) Kae ko te ʼatamai mālama ʼaia kua ina faka koloaʼia totatou maʼuli ʼi te temi nei. Ohage la, ʼaki tatatou ako fakalelei te Folafola ʼa te ʼAtua, ʼe tou ʼiloʼi ai te ʼu tali ki te ʼu taʼi fehuʼi maʼuhiga ʼaenī: Ko ai te huafa ʼo te ʼAtua? (Pesalemo 83:18) Koteā ʼaē ʼe hoko ki te hahaʼi mokā nātou mamate? (Tagata Tānaki 9:​5, 10) Koteā te fakatuʼutuʼu ʼa te ʼAtua ʼo ʼuhiga mo te kele pea mo te hahaʼi? (Isaia 45:18) ʼE tou toe maʼu te faʼahiga maʼuli ʼe lelei mokā ʼe tou maʼuliʼi te ʼu tokoni poto ʼa te Tohi-Tapu. (Isaia 30:20, 21; 48:17, 18) Koia, ʼe tou maʼu te takitaki lelei, ʼe tokoni mai kia tatou ke tou tauʼi te ʼu tuʼania ʼo te maʼuli pea ke tou maʼu he faʼahiga maʼuli ʼe ina foaki mai te fiafia pea mo te fakafeauga moʼoni. Kae ko te meʼa ʼaē ʼe maʼuhiga age, he neʼe faka fealagia e tatatou ako te Folafola ʼa te ʼAtua ke tou ʼiloʼi te ʼu kalitate taulekaleka ʼo Sehova pea ke tou fakaōvi kia te ia. Koteā la he tahi age meʼa ke maʼuhiga age moʼo felogoi lelei mo Sehova gata pe mo kapau ʼe fakatafito ki “te ʼatamai mālama ʼo ʼuhiga mo te ʼAtua”?

⁵ ʼE ʼi ai te tahi tupuʼaga ʼe feala ai ke fakatatau te ʼatamai mālama ʼo ʼuhiga mo te ʼAtua ki he “koloā maʼuhiga neʼe fufū.” Ohage ko te ʼu koloā, ʼe tahitahiga tonatou maʼu ʼi te malamanei. ʼI te ʼu toko ono miliale hahaʼi ʼaē ʼi te kele, ʼe ko te toko ono miliona hahaʼi pe ʼaē ʼe nātou atolasio kia Sehova, ko tona fakafuafua ʼe ko te toko tahi ki te toko 1 000 neʼe ina maʼu “te ʼatamai mālama ʼo ʼuhiga mo te ʼAtua.” Moʼo fakatātā te pilivilesio makehe ʼaia ʼaē ko te ʼiloʼi ʼo te moʼoni ʼo te Folafola ʼa te ʼAtua, tou fakatokagaʼi te fehuʼi faka Tohi-Tapu ʼaenī: Koteā ʼaē ʼe hoko ki te hahaʼi mokā nātou mamate? ʼE tou ʼiloʼi mai te Tohi-Tapu ʼe ko te nefesi ʼe mate pea ko te kau mate ʼe mole kei nātou ʼiloʼi he meʼa. (Esekiele 18:4) Kae ko te akonaki hala ʼo ʼuhiga mo he meʼa ʼi loto ʼo he tahi ʼe hoko atu tona maʼuli ʼi te hili ʼo te mate neʼe lahi tona tali e te ʼu lotu ʼo te malamanei. ʼE ko he akonaki ʼe fakatafito kiai te ʼu lotu ʼo te Keletiate. ʼE toe fakaʼaogaʼi te akonaki ʼaia ʼi te ʼu lotu Inituisi, Jaïnisme, Mahometa, Putisi, Sikhisme, Shintoïsme, Sutea, pea mo te kau Taoïsme. Koutou fakakaukauʼi age muʼa—neʼe kākāʼi te ʼu toko lauʼi miliale hahaʼi ʼaki te akonaki hala ʼaia!

6, 7. (a) Ko ai ʼapē ʼe ina lava maʼu “te ʼatamai mālama ʼo ʼuhiga mo te ʼAtua”? (b) Koteā te faʼifaʼitaki ʼe ʼasi ai ko Sehova ʼe ina tapuakina tatou ke tou mahino lelei ki te ʼu meʼa ʼaē ʼe mole ʼiloʼi e te ʼu “tagata poto mo atamai”?

⁶ He koʼe ʼe mole lahi te hahaʼi ʼaē ʼe nātou maʼu “te ʼatamai mālama ʼo ʼuhiga mo te ʼAtua”? Koteʼuhi ʼe mole he tahi ia tatou ʼe lava mahino katoa ki te ʼuhiga ʼo te Folafola ʼa te ʼAtua mokā ʼe mole tou maʼu Tana tokoni. Koutou manatuʼi, ko te ʼatamai mālama ʼaia ʼe ko te meʼa ʼofa. ʼE foaki pe e Sehova kia nātou ʼaē ʼe nātou lotolelei ʼo kumi tana Folafola ʼaki te agatonu pea mo te agavaivai. Ko nātou ʼaia ʼe feala ke mole nātou “poto i te sio fakatagata.” (1 Kolonito 1:​26) Pea tokolahi ia nātou ʼaia ʼe lagi ʼi te ʼu lekula ʼa te malamanei “neʼe mole ako pea ʼe ko te ʼu tagata māhani.” (Gaue 4:​13, MN ) Kae ʼe mole ko he fihifihia ia te faʼahi ʼaia. ʼE fakapale tatou e Sehova ʼaki “te ʼatamai mālama ʼo ʼuhiga mo te ʼAtua” ʼuhi ko te ʼu kalitate ʼaē ʼe ina maʼu ʼi totatou loto.

⁷ Tou toʼo he faʼifaʼitaki. Tokolahi te hahaʼi sivi Tohi-Tapu ʼi te Keletiate neʼe nātou fai te ʼu tuʼuga fakamatala ʼo ʼuhiga mo te Tohi-Tapu. ʼE lagi feala ki te ʼu fakamatala ʼaia ke nātou fakamahino te kamataʼaga ʼo te Tohi-Tapu, te faka ʼuhiga ʼo te ʼu kupu faka Hepeleo pea mo faka Keleka, pea mo te tahi age ʼu meʼa. Kae neʼe maʼu moʼoni koa e te ʼu tagata sivi Tohi-Tapu ʼaia “te ʼatamai mālama ʼo ʼuhiga mo te ʼAtua” ʼaki tanatou ʼu kumi fuli ʼaia? ʼE nātou mahino lelei koa ki te kupu tāfito ʼo te Tohi-Tapu—ia te fakatonuhia ʼo te tuʼi pule ʼa Sehova ʼaki tona Puleʼaga ʼi selo? ʼE nātou ʼiloʼi koa ko Sehova ʼAtua ʼe mole ko he ʼipotasi ʼo te Tahitolu? ʼE tou maʼu te ʼatamai mālama totonu ʼo ʼuhiga mo te ʼu meʼa ʼaia. Koteā tona tupuʼaga? ʼE tapuakina tatou e Sehova ke tou mahino lelei ki te ʼu moʼoni fakalaumālie ʼaē ʼe mole ʼiloʼi e te kau “tagata poto mo atamai.” (Mateo 11:25) ʼE fakapale e Sehova ia nātou ʼaē ʼe fakaōvi age kia te ia!

“ ʼE Taupau e Sehova Ia Nātou Fuli ʼAē ʼe ʼOʼofa Kia Te Ia”

8, 9. (a) Neʼe fakahā feafeaʼi e Tavite te tahi tapuakina maʼa nātou ʼaē ʼe fakaōvi kia Sehova? (b) He koʼe ʼe ʼaoga ki te kau Kilisitiano moʼoni te puipui fakaʼatua?

⁸ Ko nātou ʼaē ʼe nātou fakaōvi kia Sehova ʼe nātou maʼu te tahi tapuakina—te puipui fakaʼatua. Ko te tagata fai pesalemo ko Tavite, ʼaē neʼe tau ʼaupito mo te ʼu faigataʼaʼia, neʼe ina tohi fēnei: “ ʼE ōvi ia Sehova kia nātou fuli ʼaē ʼe fetapā kia te ia, ia nātou fuli ʼaē ʼe fetapā kia te ia ʼi te agatonu. ʼE ina fakahoko anai te meʼa ʼaē ʼe loto kiai ia nātou ʼaē ʼe manavasiʼi kia te ia, pea ʼe logo anai ki tanatou pāui ʼaē ke tokoni age, pea ʼe ina hāofaki anai nātou. ʼE taupau e Sehova ia nātou fuli ʼaē ʼe ʼoʼofa kia te ia.” (Pesalemo 145:18-​20) Ei, ʼe ōvi ia Sehova kia nātou ʼaē ʼe nātou ʼoʼofa kia te ia pea koia ʼaē ʼe feala ai ke tali fakavilivili ki tanatou ʼu pāui ke tokoni age.

⁹ He koʼe ʼe ʼaoga kia tatou te puipui fakaʼatua? ʼE mole gata pe ʼi te ʼu mamahi ʼo te ʼu “temi faigataa” ʼaenī, ko te kau Kilisitiano ʼe gaohi koviʼi tāfito nātou e te Fili lahi ʼo Sehova, ia Satana te Tevolo. (2 Timoteo 3:1) Ko te fili kākā ʼaia ʼe ina fia “kai” moʼoni ia tatou. (1 Petelo 5:8) Ko Satana ʼe ina fakatagaʼi, gaohi koviʼi, pea mo ʼahiʼahiʼi tatou. ʼE toe faiga ke ina fakahalaʼi tatou ʼaki te ʼu meʼa ʼaē ʼi totatou ʼatamai pea mo totatou loto. ʼE ʼi ai tana fakatuʼutuʼu: ʼe ina fia fakavaivaiʼi tatatou tui pea mo maumauʼi tatou ʼi te faʼahi fakalaumālie. (Apokalipesi 12:12, 17) ʼUhi heʼe tonu ke tou tauʼi te fili mālohi, ʼe tou lotomālohi ʼi tatatou ʼiloʼi “ ʼe taupau e Sehova ia nātou fuli ʼaē ʼe ʼoʼofa kia te ia.”

10. (a) ʼE taupau feafeaʼi e Sehova tana hahaʼi? (b) Koteā te faʼahiga puipui ʼaē ʼe maʼuhiga age, pea koteā tona tupuʼaga?

¹⁰ Kae e feafeaʼi koa te taupau e Sehova ʼo tana hahaʼi? Ko tana fakapapauʼi mai ʼo tana puipui ʼe mole faka ʼuhiga leva ʼe ina pulihi totatou ʼu fihifihia ʼi te tuʼu ʼaenī; peʼe ke ina fai he ʼu gāue faka milakulo maʼa tatou. Kae ʼe foaki e Sehova te puipui fakasino ki tana hahaʼi ʼi tonatou ʼuhiga kūtuga. Pea logola te ʼu ʼaluʼaga ʼaia, ʼe mole ina tuku anai ke pulihi e te Tevolo te kau atolasio moʼoni ʼi te kele! (2 Petelo 2:9) Kae ʼi te ʼu meʼa fuli ʼaia, ʼe puipui tatou e Sehova ʼi te faʼahi fakalaumālie. ʼE ina teuteuʼi tatou ki te ʼu meʼa ʼaē ʼe ʼaoga kia tatou moʼo kātakiʼi te ʼu ʼahiʼahi pea mo hāofaki tatatou felogoi mo ia. Pea ʼe ko te puipui fakalaumālie ʼaē ʼe maʼuhiga age. Koteā tona tupuʼaga? Ka tou felogoi tuʼumaʼu mo Sehova, ʼe mole ʼi ai anai he meʼa—māʼiape la mo te mate—ʼe ina lava fakamamahiʼi tatou ʼo talu ai.—Mateo 10:28.

11. Koteā te ʼu fakatuʼutuʼu neʼe fai e Sehova moʼo puipui fakalaumālie tana hahaʼi?

¹¹ Neʼe fai e Sehova te ʼu tuʼuga fakatuʼutuʼu moʼo puipui fakalaumālie ia nātou ʼaē ʼe fakaōvi age kia te ia. ʼI tana Folafola, te Tohi-Tapu, ʼe ina fakapapauʼi mai te poto moʼo tauʼi totatou ʼu ʼahiʼahi. (Sakopo 1:​2-5) Ko te maʼuliʼi ʼo te tokoni ʼaoga mai te Tohi-Tapu ʼe ko he puipui ʼaia. ʼO mole gata aipe, ʼe foaki e Sehova te “laumālie maʼoniʼoni kia nātou ʼaē ʼe nātou kole [age] kia te ia.” (Luka 11:13, MN ) Ko te laumālie ʼaia ʼe ko te mālohi lahi ʼaupito ʼaia ʼo te ʼatulaulau, heʼe feala ke ina teuteuʼi moʼoni tatou moʼo tauʼi fakalelei he faʼahiga ʼahiʼahi pe peʼe ko te fakahala ʼaē ʼe lagi hoko mai kia tatou. ʼAki ia Kilisito, ʼe foaki e Sehova “he ʼu meʼa ʼofa ko he ʼu tagata.” (Efeso 4:8, MN ) Ko te ʼu tagata faʼafai ʼaia ʼi te faʼahi fakalaumālie ʼe nātou faiga ke nātou fakahā te manavaʼofa lahi ʼo Sehova ʼi tanatou tokoni ki tonatou ʼu kaugā fagona ʼi te tui.—Sakopo 5:​14, 15.

12, 13. (a) Koteā te ʼu meʼa ʼaē ʼe foaki mai ai e Sehova te meʼa kai fakalaumālie ʼi tona temi tonu? (b) ʼE koutou feafeaʼi ki te ʼu fakatuʼutuʼu ʼa Sehova ʼo ʼuhiga mo totatou fīmālie fakalaumālie?

¹² ʼE foaki e Sehova te tahi age meʼa moʼo hāofaki ʼo tatou: ko te meʼa kai fakalaumālie ʼi tona temi tonu. (Mateo 24:45) ʼAki te ʼu tohi faka Tohi-Tapu ʼaē neʼe tā, pea mo te ʼu nusipepa Te Tule Leʼo pea mo te Réveillez-vous !, ʼo feiā mo te ʼu fono, mo te ʼu fakatahi, ʼe foaki mai e Sehova te meʼa ʼaē ʼe ʼaoga kia tatou ʼi tona temi tonu pe. ʼE koutou lava faka manamanatu koa he ʼaluʼaga neʼe koutou logo ai ki he meʼa ʼi he fono, peʼe ʼi he fakatahi neʼe malave ki tokotou loto pea mo fakamālohiʼi koutou peʼe mo fakafimālie koutou? Neʼe kua koutou lau koa he alatike ʼi te ʼu nusipepa ʼaenī neʼe fakahā atu pea mo ʼui neʼe tohi tonu te alatike ʼaia maʼa koutou?

¹³ ʼI te ʼu mahafu mālohi ʼaē ʼe fakaʼaogaʼi e Satana ʼe kau ai te lotovaivai, pea ʼe feala pe ke tou tau mo te faʼahi ʼaia. ʼE ina ʼiloʼi lelei ko he lotovaivai loaloaga ʼe feala ke ina toʼo totatou mālohi, ʼo feala ke ʼaua naʼa tou toe mālolohi. (Tāʼaga Lea 24:10) ʼE ʼaoga kia tatou he tokoni heʼe faigaʼi e Satana ke ina fakaʼaogaʼi tatatou ʼu manatu ʼaē ʼe mole lelei. ʼE tautau tā e Te Tule Leʼo pea mo te Réveillez-vous ! te ʼu alatike ʼe tokoni mai kia tatou moʼo tauʼi te lotovaivai. ʼI tana lau te taʼi alatike ʼaia, neʼe tohi fēnei e te tuagaʼane Kilisitiano: “ ʼE teitei pe ʼi te ʼaho fuli ke ʼau lau te alatike, pea ʼau tagi. ʼE ʼau nofo mo te alatike ʼi toku moeʼaga ke feala haku lau mokā ʼe ʼau lotovaivai. ʼAki te ʼu taʼi alatike feiā, ʼe ʼau logoʼi ʼe fāʼufua ʼau e te ʼu nima puipui ʼo Sehova.”a ʼE tou loto fakafetaʼi koa kia Sehova ʼi tana foaki mai te meʼa kai fakalaumālie ʼi tona temi tonu? Koutou manatuʼi, ʼe ōvi mai Sehova kia tatou pea mo puipui tatou heʼe ina fai te ʼu fakatuʼutuʼu ke tou fīmālie fakalaumālie.

Te Fealagia Ke Tou Fakaōvi Kia “Ia ʼAē ʼe Fagono Ki Te Faikole”

14, 15. (a) Koteā te tapuakina ʼe ʼāteaina pe kia Sehova ʼe ina foaki kia nātou ʼaē ʼe fakaōvi age kia te ia? (b) He koʼe ʼe ko he pilivilesio makehe ʼaupito hatatou fakaōvi ʼāteaina pe kia “Ia ʼaē ʼe fagono ki te faikole?”

¹⁴ Neʼe kua koutou fakatokagaʼi koa ko te hahaʼi ka nātou maʼu te mālohi pea mo te pule, kua faigataʼa te fakaōvi age ʼa te hahaʼi ʼaē ʼe nātou puleʼi? E feafeaʼi kia Sehova ʼAtua? ʼE mamaʼo fau koa ia ke mole tokaga mai ki te ʼu faikole ʼaē ʼe fai age e te hahaʼi ʼi te kele? Kailoa! Ko te faikole ʼe ko he tahi ʼaia tapuakina ʼe foaki e Sehova maʼa nātou ʼaē ʼe fakaōvi age kia te ia. ʼE ko he pilivilesio makehe ʼaupito hatatou fakaōvi ʼāteaina kia “Ia ʼaē ʼe fagono ki te faikole.” (Pesalemo 65:2) Koteā tona tupuʼaga?

¹⁵ Tou toʼo he faʼifaʼitaki: Ko te pule ʼo te sosiete lahi ʼe lahi tona ʼu maʼua. ʼE ina vakavakaʼi pe koteā te ʼu meʼa ʼaē ka ina fai anai e ia totonu pea koteā ʼaē ka ina tuku anai ke fai e niʼihi. ʼO toe feiā pe, ʼe fakalogo ki te Tuʼi Pule ʼo te ʼatulaulau ia te vakavakaʼi pe koteā te ʼu meʼa ʼaē ka ina fai anai e ia totonu pea koteā ʼaē ka ina tuku anai ke fai e he tahi. Koutou fakatokagaʼi te ʼu meʼa fuli ʼaē neʼe tuku e Sehova ki tona ʼAlo ʼofaina ko Sesu. Neʼe foaki ki te ʼAlo “te pule ki te fai o te fakamau.” (Soane 5:​27) Ko te kau ʼaselo kua “tuku [ke] fakalogo kia te ia.” (1 Petelo 3:​22) Neʼe foaki kia Sesu te laumālie maʼoniʼoni mālohi ʼo Sehova moʼo tokoni ki ai ke ina takitaki tana kau tisipulo ʼi te kele. (Soane 15:26; 16:7) Koia neʼe feala ai ke ʼui fēnei e Sesu: “Ko te pule katoa i Selo mo te kelekele kua foaki mai kia te au.” (Mateo 28:18) Kae ʼo ʼuhiga mo tatatou ʼu faikole, neʼe fakatuʼutuʼu e Sehova ko ia totonu pe ʼaē ka tokaga ki ai. Koia la ʼaē ko te Tohi-Tapu ʼe ina ʼui mai ke fai pe tatatou ʼu faikole kia Sehova, ʼaki te huafa ʼo Sesu.—Pesalemo 69:13; Soane 14:​6, 13.

16. He koʼe ʼe tou lava falala ko Sehova ʼe fakalogo moʼoni ki tatatou ʼu faikole?

¹⁶ ʼE fakalogo moʼoni koa ia Sehova ki tatatou ʼu faikole? Kanapaula neʼe ina meʼa noaʼi ia tatou peʼe mole tokaga mai, kanaʼauala ʼe mole ina uga tatou ke tou “kātaki tuʼumaʼu ʼi te faikole” peʼe ke tou tuku age kia te ia tatatou ʼu kavega pea mo tatatou ʼu tuʼania. (Loma 12:12, MN; Pesalemo 55:22; 1 Petelo 5:7) Neʼe falala katoa te ʼu kaugana agatonu ʼo te temi faka Tohi-Tapu ko Sehova ʼe fakalogo ki te ʼu faikole. (1 Soane 5:​14) Koia neʼe ʼui fēnei ai e te tagata fai pesalemo ko Tavite: “[Ko Sehova] ʼe logo ki toku leʼo.” (Pesalemo 55:17) Mo tatou foki ʼe tonu ke tou falala ko Sehova ʼe ōvi mai, ʼe fagono ki tatatou ʼu manatu pea mo tatatou ʼu tuʼania.

ʼE Fakapale e Sehova Tana ʼu Kaugana

17, 18. (a) E feafeaʼi te loto ʼo Sehova ʼo ʼuhiga mo te gāue agatonu ʼo tana ʼu hahaʼi ʼi te kele? (b) Koutou fakamahino peʼe fakahā feafeaʼi ia Tāʼaga Lea 19:17 ko tatatou ʼu gāue manavaʼofa ʼe tokagaʼi e Sehova.

¹⁷ ʼE tuʼu maʼu pe te tuʼulaga ʼo Sehova ʼi tona ʼuhiga Pule ʼo te ʼAtulaulau logola te ʼu faʼahiga meʼa ʼe feala ke fai peʼe mole fai e te hahaʼi. Kae ko Sehova ʼe ko te ʼAtua ʼe loto fakafetaʼi ki te ʼu meʼa ʼaē ʼe tou fai. ʼE ina leleiʼia—peʼe ina faka maʼuhigaʼi—te gāue agatonu ʼo tana ʼu hahaʼi ʼi te kele. (Pesalemo 147:11) Pea ko te tahi tapuakina ʼe maʼu e nātou ʼaē ʼe fakaōvi kia Sehova: ʼE ina fakapale tana ʼu kaugana.—Hepeleo 11:6.

¹⁸ ʼE fakahā lelei e te Tohi-Tapu ko Sehova ʼe ina leleiʼia te ʼu meʼa ʼaē ʼe fai e tana kau atolasio. Ohage la, ʼe tou lau fēnei: “Ko ia ʼaē ʼe ina fakahā te ʼofa kia ia ʼe veliveli, ʼe ina tokagaʼi ia Sehova, pea ko Ia ʼe ina liufaki anai kia te ia ʼo mulimuli ki tana aga ki ai.” (Tāʼaga Lea 19:17) Ko te tokaga manavaʼofa ʼa Sehova ki ʼaē ʼe veliveli neʼe hā lelei ʼi te Lao ʼaē neʼe foaki age kia Moisese. (Levitike 14:21; 19:15) E feafeaʼi te loto ʼo Sehova mokā ʼe tou faʼifaʼitakiʼi tona manavaʼofa ʼi totatou ʼu vāhaʼa mo nātou ʼaē ʼe veliveli? Ka tou foaki ki ʼaē ʼe veliveli, kae mole tou fakatalitali ke ina liufaki mai, ʼe hage pe kia Sehova neʼe tou foaki age kia te Ia pea ʼe ko ia ʼaē ka ina liufaki mai anai. ʼE fakapapauʼi mai e Sehova ʼe ina totogi te maʼua ʼaia ʼaki te ʼofa pea mo te ʼu tapuakina. (Tāʼaga Lea 10:22; Mateo 6:3, 4; Luka 14:​12-14) Ei, ka tou fakahā te manavaʼofa ki he tēhina peʼe ko he tuagaʼane ʼe ʼaoga kiai, ʼe malave te faʼahi ʼaia ki te loto ʼo Sehova. ʼE tou fakafetaʼi ʼi tatatou ʼiloʼi ko tatatou ʼu gāue manavaʼofa ʼe tokagaʼi e tatatou Tāmai ʼaē ʼe ʼi selo!—Mateo 5:7.

19. (a) He koʼe ʼe feala ke tou tui moʼoni ko Sehova ʼe ina leleiʼia te ʼu meʼa ʼaē ʼe tou fai ʼi te gāue fai faka mafola pea mo te fai ʼo ni ʼu tisipulo? (b) ʼE fakapale feafeaʼi e Sehova te ʼu gāue agatonu ʼaē neʼe fai moʼo lagolago ki tona Puleʼaga?

¹⁹ ʼE leleiʼia tāfito e Sehova te meʼa ʼaē ʼe tou fai maʼa tona Puleʼaga. Ka tou fakaōvi kia Sehova, ʼe mole tou lau ia te fakaʼaogaʼi ʼo totatou temi, totatou mālohi, pea mo totatou ʼu lelei moʼo kau ʼaupito ki te faka mafola ʼo te Puleʼaga pea mo te fai ʼo ni ʼu tisipulo. (Mateo 28:19, 20) ʼI ʼihi temi, ʼe lagi tou logoʼi ʼe veliveli te ʼu meʼa ʼaē ʼe tou lolotoga fai. ʼE feala pe ki totatou loto agahala ke ina uga tatou ke tou feʼekeʼaki peʼe leleiʼia koa e Sehova tatatou ʼu faiga. (1 Soane 3:​19, 20) Kae ko Sehova ʼe ina faka maʼuhigaʼi te ʼu meʼa ʼofa fuli—tatau aipe peʼe veliveli—ʼaē ʼe fai ʼaki te ʼofa. (Maleko 12:41-44) ʼE fakapapauʼi fēnei mai e te Tohi-Tapu: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.” (Hepeleo 6:​10, MN ) ʼIo ko Sehova ʼe ina manatuʼi pea mo fakapale he gāue ʼe veliveli neʼe fai moʼo lagolago ki tona Puleʼaga. ʼO mole gata pe ʼi te ʼu tapuakina fakalaumālie ʼi te temi nei, ʼe feala ke tou fakaʼamu ki te ʼu fiafia ʼo te maʼuli ʼi te mālama foʼou ka haʼu, ʼaē ʼe avahi lahi ai anai e Sehova tona nima pea mo fakafimālieʼi anai te ʼu fakaʼamu faitotonu ʼo nātou fuli ʼaē ʼe nātou fakaōvi age kia te ia!—Pesalemo 145:16; 2 Petelo 3:​13.

20. Lolotoga te taʼu 2003, ʼe tou lava taupau feafeaʼi ʼi totatou ʼatamai te ʼu palalau ʼo te koga tohi, pea koteā anai tona fua?

²⁰ Lolotoga te taʼu 2003, tou fakakaukauʼi pe kei tou haga faiga ke tou fakaōvi ki tatatou Tāmai ʼaē ʼe ʼi selo. Kapau kei tou haga fai te faʼahi ʼaia, ʼe feala ke tou ʼiloʼi papau ʼe tokaga mai anai ohage ko tana fakapapauʼi mai. Tahi ʼaē meʼa, ko “te Atua . . . e mole lohi.” (Tito 1:2) Kapau ʼe koutou fakaōvi kia te ia, ʼe fakaōvi atu anai kia koutou. (Sakopo 4:8) Pea koteā anai tona fua? ʼE tou mahu anai ʼi te ʼu tapuakina pea mo tou maʼu ia te ʼamanaki ʼaē ke lahi age tatatou fakaōvi kia Sehova ʼi te ʼu temi heʼegata!

[Kiʼi nota]

Kei Koutou Manatuʼi Koa?

• Koteā te meʼa ʼe foaki e Sehova kia nātou ʼaē ʼe fakaōvi age kia te ia?

• Koteā te ʼu fakatuʼutuʼu ʼe fai e Sehova moʼo puipui fakalaumālie tana hahaʼi?

• He koʼe ʼe ko he pilivilesio makehe ʼaupito hatatou fakaōvi ʼāteaina kia “Ia ʼaē ʼe fagono ki te faikole?”

• ʼE fakahā feafeaʼi e te Tohi-Tapu ko Sehova ʼe ina leleiʼia te gāue agatonu ʼo tana ʼu hahaʼi ʼi te kele?

[Paki ʼo te pasina 15]

Neʼe tapuakina tatou e Sehova ke tou mahino lelei ki te ʼu moʼoni fakalaumālie

[Paki ʼo te pasina 16, 17]

ʼE foaki e Sehova te puipui fakalaumālie

[Paki ʼo te pasina 18]

ʼE ōvi mai Sehova, ʼe fagono ki tatatou ʼu faikole fuli