Ngaba UThixo Uthabatha Icala Kwezemidlalo?
IMBALEKI ephumeleleyo iyaguqa ize yenze isimbo somzimba esibonisa ukuba iyathandaza, ibulela kuba iphumelele. Kanti, simele sicinge ukuba ezinye zeembaleki ezikolo khuphiswano nazo zikuthandazele ukuphumelela kuThixo—zaza azaphumelela.
Iimbethi-manqindi ezimbini ziguqa kwiikona zazo zeqonga lamanqindi ngaphambi komjikelo wokuqala womlo wazo. Zombini zenza uphawu lomnqamlezo, uhlobo oluthile lokuthandaza uthe cwaka kuThixo ufuna impumelelo. Yandula ke enye yayibetha yayilalisa ngophotho enye. Kweminye imilo, kusenokuba yimbethi-manqindi enye kuphela ethandazela impumelelo kuThixo, kodwa isenokungaphumeleli okanye iphumelele.
Kwimidlalo yamaqela, amaqela abadlali asenokuthandaza ngaphambi, ebudeni, okanye kwanasemva komdlalo. Ngokomzekelo, ebudeni bemizuzwana yokugqibela yomdlalo webhola ekhatywayo weAmerican Super Bowl, umdlali wayeza kukhaba eyona bhola yayiza kwenza iqela labo liphumelele kumdlalo okanye lingaphumeleli ukuba wayengayifakanga. Kamva lo mdlali wathi: “Ndandikuthandazela oko.” Kodwa abanye beqela ababedlala nalo nabo babethandaza—bethandazela ukuba angayifaki.
Nangona amaqela esenokuthandaza omabini, likho elimele lingaphumeleli. Nkqu neqela eliphumelelayo abadlali balo abebethandazele ukuphumelela linokungaphumeleli kumdlalo olandelayo. Eneneni, ekugqibeleni, xa liphelile ixesha lokudlalwa kwaloo mdlalo, onke amanye amaqela amele angaphumeleli, kuba inye kuphela intshatsheli kukhuphiswano lwamaqela awahlukeneyo. Kanti ke, inkoliso yaloo maqela angaphumeleliyo ibinabadlali abebekuthandazele ukuphumelela.
Kwinqaku elinomxholo othi “Nceda, Londoloza Imithandazo Yakho,” umbhali wemihlathi yezemidlalo wabhala: “Into yokuba uzingomb’ isifuba ngelokuba wena usondele kakhulu kuThixo, ayithethi ukuba kunjalo ngokwenene. . . . KwiMfazwe Yehlabathi II, amajoni aseJamani ayenebinzana elibhalwe kumakhonkco eebhanti zawo elalisithi: Gott mit uns. Xa liguqulelwa lithetha ukuthi: ‘UThixo unathi.’” Omnye umbhali wemihlathi yezemidlalo wathi: “UThixo akathabath’ icala kwimidlalo yebhola ekhatywayo. Imicimbi yokwexeshana enjengale ilawulwa ngamadoda namabhinqa, kungekhona nguSomandla.”
Umpostile uPetros wathi: “UThixo akamkhethi wabuso bamntu; kwiintlanga zonke, lowo umoyikayo asebenze ubulungisa, wamkelekile kuye.” Ukubandakanyeka kwezemidlalo ezinogonyamelo asikuko ‘ukusebenza ubulungisa.’ (IZenzo 10:34, 35; Roma 14:19) Ukuba uThixo ebeye wayiphulaphula loo mithandazo yabo bacela ukuphumelela aze ke omnye okolo khuphiswano enzakale okanye ade abulawe, ngaba uThixo ebengayi kubekek’ ityala?
ILizwi likaThixo lithi: “Ukuba sithi sicele into ngokokuthanda kwakhe, uyasiva.” (1 Yohane 5:14) Ukuze imithandazo iphendulwe, ubani umele azi ukuthanda neenjongo zikaThixo, ibe izenzo zikabani zimele zivisisane nezo zinto.—Thelekisa uMateyu 6:9, 10.
Ewe, ukuthanda neenjongo zikaThixo azidibananga nokhuphiswano lwezemidlalo. Ngaloo ndlela, xa kuthandazelwa impumelelo kukhuphiswano lwezemidlalo, ngaba uThixo uyaphulaphula? Unotshe.
[Inkcazelo Ngomfanekiso okwiphepha 31]
UPI/Bettmann