Julayi

Yindu yosope yaŵaŵechetaga soni kuyitenda Yesu kupwatikapo yakusimonjesya ŵajigalilaga mwakusatendela yindu Atati ŵakwe. (Yoh. 14:9) Ana mpaka tulijiganye chichi kutyochela ku yakusimonjesya yaŵatesile Yesu. Yesu ni Atati ŵakwe akusatunonyela mnope. Paŵaliji pachilambo chapasipa, Yesu jwalosisye kuti akusiŵanonyela mnope ŵandu mwakamulichisya masengo machili gakwe gakutendela yakusimonjesya pakwakamuchisya ŵandu ŵaŵasimanaga ni yakusawusya. Paulendo wine, ŵandu ŵaŵili ŵangalola ŵamŵendile Yesu kuti ŵakamuchisye. (Mat. 20:​30-34) Yesu “chamkamwile mnope chanasa” mwamti kaneko ŵaposisye ŵanduwo. Maloŵe ga Chigiliki gaŵagagopolele kuti “chamkamwile mnope chanasa” gakusagopolela kuti ŵatendele chanasa mnope mumtima mwakwe. Chanasa chelechi chalosisye kuti Yesu akwete chinonyelo, mwamti ni chachamtendekasisye jwalakwe kwalisya ŵandu ŵasala soni kwaposya ŵamatana. (Mat. 15:32; Maliko 1:41) Tuli ŵakusimichisya kuti Yehofa jwali Mlungu jwa “chanasa chekulungwa” soni Mwanache jwakwe akusatunonyela mnope, mwamti jemanjaji yikusiyapweteka patukusimana ni yakusawusya. (Luk. 1:78; 1 Pet. 5:7) Kusala yisyene, jemanjaji ali ŵakusachilila mnope kumasya yakusawusya yakusasimana nayo ŵandu. w23.04 3 ¶4-5

Mpaka tutendeje yakomboleka kuti tuŵambaleje kuŵalanga soni kupikanila ngani syakusakala syasiwandile m’chilambo cha Satanachi. Mpaka tugumbasye munganisyo mwetu ni yindu yambone mwakuŵalanga soni kulijiganya Baibulo. Nambosoni kusimanikwa pamisongano jampingo soni kulalichila mpaka kuchenjele nganisyo syetu. Mwamti Yehofa akutusalila kuti ngasakunda kuti tulinjidwe mpaka kwika pakulepela kupilila. (1 Akoli. 10:​12, 13) Myoyo jwalijose akusosekwa kupopelaga kwa Yehofa mwakuwilisyawilisya ni chakulinga chakuti apitilisye kuŵa jwakulupichika m’masiku gakusawusyaga. Yehofa akusasaka kuti ‘tumsalileje jwalakwe yakusawusya yetu yosope’ kupitila mwipopelo. (Sal. 62:8) Amchimbichisyeje soni kumyamichila Yehofa pa yindu yosope yakwatendela. Amŵendeje Yehofa kuti ŵakamuchisyeje kuŵa ŵakulimba mtima pali mu utumiki. Amŵendejesoni kuti ŵakamuchisyeje kumalana ni yakusawusya soni yakulingwa yampaka asimane nayo. Akakundaga kuti chindu chilichose chalepelekasyeje kupopela kwa Yehofa. w23.05 7 ¶17-18

Ana ligongo chichi tukusatendaga misongano ja mpingo? Chakulinga chetu chekulungwa chikusaŵa kumchimbichisya Yehofa. (Sal. 26:12; 111:1) Chakulinga chine chikusaŵa kuti twalimbikasye ŵandu ŵane patukutama mundaŵi jakusawusyaji. (1 Ates. 5:11) Myoyo patukwanga pamisongano ja mpingo tukusaŵa tuli mkukwanilisya mbali syosopesi. Nambo ndaŵi sine patukupeleka ndemanga pamisongano jampingo mpaka tusimane ni yakusawusya. Mpaka tutendeje woga kuti tujanje pamisongano ja mpingo, kapenasoni mpaka tusachilileje kuti tujanjeje mwakuwilisyawilisya nambo nikusimanikwa kuti ngakutulanjila. Ana mpaka tumalane chamtuli ni yakusawusya yosopeyi? Ndumetume Paulo jwasasile yakusosekwa kwa ‘kulimbikasyana.’ Myoyo, patumanyilile kuti ŵandu ŵayiche pamisongano jampingojo mpaka apindule mnope papikene ndemanga atamose jili jakata mpaka tutende chenene kupeleka ndemanga jetu. Nambosoni naga ngakutulanjila mwakuwilisyawilisya kuti tupeleche ndemanga mpaka tuŵe ŵakusangalala kumanyilila kuti ŵandu ŵane apatile upile wakwanga.—1 Pet. 3:8. w23.04 20 ¶1-3

Papelechedwe chimanyisyo chakuti Ayuda ŵaŵaliji ku ukapolo ku Babulo kwa yaka 70 ŵaliji ŵagopoka kuwujila kumangwawo. (Esa. 1:​2-4.) Yeleyitu yakomboleche ligongo lya Yehofa. Ligongo chichi tukuŵecheta myoyo? Ligongo lyakuti Ababulo nganakundaga kwagopola achikapolo. (Yes. 14:​4, 17) Nambo msinda wa Babulo uli ugomechedwe, mwenye jwine jwatandite kulamulila ni jwasalile Ayuda kuti awujileje ku chilambo chakumangwawo. Yakuyichisya yakwe yaliji yakuti Myuda jwalijose, mnopemnope mitwe ja maŵasa ŵasosekwaga kusagula kutyoka m’chilambomo kapena kutama mmomo. Nambotu kuti mundu asagule kutyoka m’chilambochi jaliji ngani jekulungwa. Ŵajinji mwa jemanjaji ŵaliji ŵakalambale mwamti yaliji yakusawusya kuti ajende ulendo wekulungwa mnopewu. Nambosoni Ayuda ŵajinji ŵapagwile ku Babulo, mwamti ŵakuwonaga kuti ni kwakuli kumangwawo. Kwa jemanjaji, ku Isalayeli ŵakuwonaga kuŵa kumangwawo achinangolo ŵawo. Nambosoni Ayuda ŵane ŵaŵaliji ku Babulo ŵaliji ŵakusichila mnope. Myoyo jemanjaji ŵayiwonaga kuŵa yakusawusya kuleka nyumba syambone syaŵatamaga soni mabisinesi gawo nikuja kutama m’chilambo chele nganachimanyililaga chenene. w23.05 14 ¶1-2

Maloŵe ga Mlungu gakusatulimbikasya kupitilisya kulosya ndamo ja kupilila, chanasa soni chinonyelo. Pa Luka 21:19 pakusati, “Naga mkupilila chimchikulupusya umi wenu.” Pa Akolose 3:12 pakusati, “m’wale chanasa chekulungwa.” Nambosoni pa 1 Atesalonika 4:9, 10 pakusati, “Mlungu ŵamjiganyisye kala jemanja kuti mnonyelaneje. . . . Nambo sambano achalongo achimjetu, tukumŵenda kuti mpitilisye kutenda yeleyi kupunda pandanda.” Malemba gosopega ŵalembele ŵakulijiganya ŵaŵaliji ali akwete kala ndamo mpela kupilila, chanasa soni chinonyelo. Myoyo, ŵasosekwaga kwamba kupitilisya kulosya ndamosi. M’wejisoni tukusosekwa kutendaga yakulandanayi. Pakusaka kwakamuchisya wawojo, aganichisye yaŵatesile Aklistu ŵa m’yaka 100 yandanda pakulosya ndamosi. Kaneko chachilola yampaka atende pakwasyasya ŵakulijiganyaŵa yampaka yilosye kuti akosechele yakusawusya yekulungwa. Mwamti payichitandaga yisawusyo yekulungwa, yichiŵa kuti alijiganyisye kala yampaka atende kuti akombole kupilila soni chachiŵa ŵakusimichisya kupitilisya kupililako. w23.07 3 ¶4, 8

Chinga tuli ŵasagulwe kapena “ŵangondolo sine” tukusosekwa kupitilisya kwenda pa “Msewu Weswela” yayikutukamuchisya kuŵa mu paladaiso jwausimu nambosoni yayichitukamuchisya kupata yindu yambone msogolo. (Yoh. 10:16) Kutandila mu 1919 C.E., ŵandu mamiliyoni gejinji aŵele ali mkukopoka mu Babulo Jwamkulungwa jwali ulamusi wa pachilambo chosope wa dini jaunami. Jemanjaji ŵatandite kwenda pa msewu wakuwanichisyawu. Ayuda paŵatyosile ku Babulo, Yehofa ŵayiweni kuti akusosekwa kutyosya yakusawusya yosope yayikasokonasisye kwenda pa msewuwo. (Yes. 57:14.) Nambi uli pakwamba ya “Msewu Weswela” wa masiku agano? Kwa yaka ma 100 gejinji mkanichiyiche chaka cha 1919, Yehofa jwatandite kwakamulichisya masengo achalume ŵaŵamchimbichisyaga jwalakwe kuti akamule masengo gakulinganya msewuwu nichakulinga chakuti ŵakamuchisye ŵandu kukopoka mu Babulo Jwamkulungwa. (Alole Yesaya 40:3.) Jemanjaji ŵakamwile chenene masengo gakulinganya msewu wa usimuwu ni chakulinga chakuti ŵandu ŵakwete mtima wambone akopoche mu Babulo Jwamkulungwa ni kwinjila mu paladaiso jwausimu ni kutandilasoni kulambila kweswela. w23.05 15 ¶6-7.

Yehofa akusasaka kuti tumtumichileje mwakusachilila soni mwakusangalala. (2 Akoli. 9:7) Sambano ana tukusosekwa kulimbichilaga kukwanilisya chakulinga chetu chausimu chitamilecho yili mkuti nganitukola mtima wakusachilila kuchikwanilisya? Kwende tulole chisyasyo cha ndumetume Paulo. Jwalakwe jwatite, “Nguchiputa chilu changu ni kuchilongolelaga mpela kapolo.” (1 Akoli. 9:​25-27) Paulo jwalikanganichisyaga kutenda yindu yakuŵajilwa atamose pandaŵi janganakolaga mtima wakusachilila kutenda yinduyo. Ana Yehofa jwasangalalaga ni utumiki wa Paulo? Elo. Mwamti Yehofa jwampele upile jwalakwe ligongo lyakulimbichila kwakwe. (2 Tim. 4:​7, 8) Yehofa akusayamichila mnope pakutuwona tuli mkutenda yakomboleka kuti tukwanilisye chakulinga chetu atamose yili mkuti nganitukola mtima wakusachilila kuchitenda. Jwalakwe akusayamichila mnope ligongo akusamanyilila kuti ngatukutenda chinducho ligongo lyakuti tukuchinonyela, nambo tukuchitenda ligongo lyakumnonyela jwalakwe. Mwamti mpela muŵatendele Yehofa pakumpa upile Paulo, jwalakwe chachitupasoni upile m’weji ligongo lyakulimbichila kwetu. (Sal. 126:5) Soni patuyiweni kuti Yehofa akutupa upile, mpaka tutande kola mtima wakusachilila mnope. w23.05 29 ¶9-10

Paulo jwalandenye ŵandu ŵangasakulupuka pa lisiku lya Yehofa ni ŵandu ŵagonile. Jemanjaji ngakusamanyilila yayikutendekwa soni yakuti ndaŵi jikumala. Mwamti jemanjaji ŵangamanyililaga ndaŵi jayikutendekwa yindu yineyakwe soni nganaŵa ajigele nawo mbali payakutendekwayo. Masiku aganosoni ŵandu akugona mwausimu. (Alo. 11:8) Jemanjaji ngakusakulupilila yakuti tukutama “m’masiku gambesi” soni kuti yakusawusya yekulungwa yiŵandichile. (2 Pet. 3:​3, 4) Nambope tukumanyilila kuti malangiso gakuti tuŵeje mesope gali gakusosekwa lisiku lililyose. (1 Ates. 5:6) Myoyo tukusosekwa kuŵa ŵakuwusimana mtima soni kutamilichika nganisyo. Ligongo chichi tukusosekwa kuwusimana mtima soni kutamilichika nganisyo? Yeleyi ni yampaka yitukamuchisye kuti tukajigalika ni yakutendekwa ya m’chilambochi. Lisiku lya Yehofa palikuŵandichila ni pachitulinjidweje mnope kuti tujigaleje nawo mbali mu yandale soni yakusangalasya ya m’chilambochi. Nambope ngatukusosekwa kudandawulaga ni mwampaka tuyiŵambalile yeleyi. Msimu wa Mlungu mpaka utukamuchisye kuti tukajigalikaga ni yeleyi soni kuti tusaguleje yindu mwalunda.—Luk. 12:​11, 12. w23.06 10 ¶6-7

Ana munganisyo mwawo mukusayika chichi papikene lina lyakuti Samusoni? Mwangakayichila akusaganisya ya mundu juŵakwete machili mnope. Yeleyitu yili yisyene. Nambotu pandaŵi jine Samusoni jwasagwile yindu mwakulemwecheka, yayatendekasisye kuti asimane ni yakupweteka. Atamose kuti yaliji myoyo, Yehofa jwaganichisyaga ya chikulupi chaŵakwete Samusoni, mwamti jwakundile kuti mbili jakwe jilembedwe m’Baibulo kuti jitukamuchisye m’weji. Yehofa jwamkamulichisye masengo Samusoni pakusaka kwakulupusya Ayisalayeli. Pali papite yaka yejinji chiwile Samusoni, Yehofa ŵamsalile ndumetume Paulo kuti apwatiche lina lya Samusoni pa gulu ja ŵandu ŵaŵakwete chikulupi chakulimba. (Aheb. 11:​32-34) Kusala yisyene, chisyasyo cha Samusoni mpaka chitulimbikasye mnope. Jwalakwe jwamdalilaga Yehofa atamose pandaŵi jakusawusya. Mpaka tulijiganye kutyochela kwa Samusoni, soni yampaka chijile chisyasyo chakwe pakutulimbikasya. w23.09 2 ¶1-2

Mpaka tukole ndamo ja kupilila naga ndaŵi syosope tukusapopela kwa Yehofa ni kumsalilaga yayikutulagasya mu mtima mwetu. (1 Ates. 5:17) Komboleka kuti apano ngakusimana ni yakulingwa yakogoya yiliyose. Atamose yili myoyo, ana akusamŵenda Yehofa kuti ŵakamuchsiye patengwiche, pakulagasika nganisyo, soni pasingalilwe? Naga ndaŵi syosope akusamŵenda Yehofa kuti ŵakamuchisye kumalana ni yakusawusya yamwanamwana apano, yichiŵasoni yangasawusya kumŵenda jwalakwe kuti chiŵakamuchisye pachachisimana ni yakusawusya yekulungwa msogolo. Myoyo, chachikola chikulupi chakuti Yehofa akumanyilila ndaŵi jampaka ŵakamuchisye wawojo nambosoni yampaka ajile pakwakamuchisya. (Sal. 27:​1, 3) Naga apano tukukombola kuyipilila yakusawusya yatukusimana nayo, yichiŵa yangasawusya kupilila yakusawusya yekulungwa. (Alo. 5:3) Ligongo chichi tukuŵecheta yeleyi? Abale ni alongo ŵajinji ayiweni kuti kupilila yakusawusya yaŵasimene nayo munyumamo kwakamuchisyesoni kuti akombole kupilila yakusawusya yaŵasimene nayo kusogolo. Kupilila kwakamuchisye kulimbisya chikulupi chawo pa Yehofa soni kuyiwona kuti jwalakwe ali jwakoseka kwakamuchisya pa yakusawusya yawo. Mwamti chikulupi chelechi chakamuchisye jemanjaji kupilila yakusawusya yawo yakuyichisya.—Yak. 1:​2-4. w23.07 3 ¶7-8

Ligongo lyakuti Yehofa ali jwakulinandiya soni jwachanasa, yikusamtendekasya jwalakwe kupikana ya ŵane. Mwachisyasyo, Yehofa jwalosisye kuti ali jwakulinandiya pajwasigele panandi kwajonanga ŵandu ŵakusakala ŵaŵatamaga mumsinda wa Sodomu. Yehofa ŵalitumile lilayika lyakwe kuti likamsalile mundu jwakulupichika Loti kuti atilile kumadela ga kumatumbi. Nambo Loti jwajogopaga kutilila kumatumbiko. Mwamti jwaŵendile kuti amkunde jwalakwejo ni liŵasa lyakwe kutilila ku Sowali kakaliji katawuni kamwana kele Yehofa jwalinganyisyesoni yakukajonanga. Apatu Yehofa akakomboleche kumkanganichisya Loti kuti agambe kutenda yasalilidwe. Nambo Yehofa ŵamkundile Loti kutilila ku Sowali atamose kuti jwasosekwaga kuchenga nganisyo syakwe syakukajonanga katawunika. (Gen. 19:​18-22) Pali papitile yaka yejinji, Yehofa jwatendele chanasa ŵandu ŵa mumsinda wa Ninefe. Jwalakwe ŵamtumisye jwakulochesya Yona kuti akamanyisye ŵandu kuti msindawo yimpepe ni ŵanduwo chajonanjidwe. Nambo ŵandu ŵa ku Ninefe paŵagalawiche mitima jawo, Yehofa ŵakululuchile mwamti nganawujonanga msindawo.—Yon. 3:​1, 10; 4:​10, 11. w23.07 21 ¶5

Ana tukulijiganya chichi kutyochela kwa Yowashi? Jwalakwe jwaliji mpela chitela changali michiga jakwawula pasi chachikusadalila kuchichinga ni chitela chijakwe. Yehoyada juŵajimilaga chitela chakuchingachi pajwawile, mbungo jajikwimila ŵandu ŵakusapuka japujile mwamti Yowashi jwagwile. Yeleyi yikutujiganya kuti ngatukusosekwa kwegamilaga ŵakutumichila achimjetu kupwatikapo ŵandu ŵa m’liŵasa lyetu kuti tumpikanileje Mlungu. Kuti tuŵe ŵakulimba mwausimu tukusosekwa kupitilisya kulipeleka soni kumpikanila Mlungu mwakulijiganya mwakutamilichika, kuganichisya yatukulijiganyayo soni kupopela. (Yel. 17:​7, 8; Akolo. 2:​6, 7) Yehofa ngakusajembecheya kuti tutendeje yejinji kupunda yampaka tukombole. Yakutulamula jwalakwe yikusimanikwa pa Jwakulalichila 12:​13, papakusati, “Mumpikanileje Mlungu, nipo mgasunjeje malamusi gakwe, pakuti ali ni ligongo lyakwe jwalakwejo ŵatupanganyisye.” Patukumpikanila Mlungu, yichitukamuchisya kuti chituyipilile soni kuyipunda yakulingwa yamsogolo. Pangali champaka chijonanje unasi wetu ni Yehofa. w23.06 19 ¶17-19

Maloŵe ga Mlungu gakwasimichisya ŵandu kuti chachitenda yasasile gatandite mwakusala ya msyene maloŵego. Maloŵega gakusati, “Juŵatemi pampando waumwenye jula ŵaŵechete kuti.” (Chiw. 21:5a) Maloŵega gali gakusosekwa mnope ligongo gali gamo mwa maloŵe gajwaŵechete Yehofa msyene m’buku ja Chiwunukuko kwa maulendo gatatu. Pelepa, Yehofa nganakamulichisya masengo lilayika lyamachili kapena Yesu pakuŵecheta maloŵe gakusimichisyaga. Mmalomwakwe, jwalakwe jwaŵechete jika maloŵega. Yeleyi yikulosya kuti mpaka tukulupilile yindu yakuyichisya yajwasasile Yehofa. Yili myoyo ligongo lyakuti Yehofa ‘nganaŵa alambwisye.’ (Tit. 1:2) Mwamti maloŵega gakusatutendekasya kuti tuyikulupilileje mnope yindu yatukusaŵalanga pa Chiwunukuko 21:​5, 6.Kwende tukambilane liloŵe lyakuti “Alole.” Liloŵe lya Chigiliki lyaŵaligopolele kuti “alole” likusasimanikwa maulendo gejinji m’buku ja Chiwunukuko. Ana ni yindu yapi yakusayisala pasogolo pa liloŵeli? Pasogolo pakwe pana maloŵe ga Mlungu gakuti, “Ngupanganya yindu yosope kuti yiŵe yasambano.” Yisyene kuti pelepa Yehofa akuŵecheta yindu yayichitendekwa kusogolo. Nambo kwa jwalakwe yindu yeleyi yili yangakayikasya mwamti jwayisasile mpela kuti yitandite kala kutendekwa.—Yes. 46:10. w23.11 3-4 ¶7-8

Ndumetume Petulo jwayiweni soni kupikana yindu yejinji, jwalakwe jwalagagape ni yakulepela yakwe. Kwende tulole yine mwa yindu yeleyi. Yesu ali alondesisye yachachijila pakulaga kaneko ni kuwulajidwa mwakamulana ni yajikusaŵecheta Baibulo, Petulo ŵamjigalile Yesu pambali nikutanda kumjamuka. (Maliko 8:​31-33) Nambosoni Petulo ni ŵandumetume achimjakwe ŵatamilaga kangana pakwamba ya jwali jwamkulungwa pasikati pawo. (Maliko 9:​33, 34) Pa chilo chakuti malaŵi gakwe Yesu chawulajidwe, Petulo jwakatile liwiwi lya jwamlume jwine. (Yoh. 18:10) Chilo chichocho, Petulo wamkamwile woga, mwamti kwa maulendo gatatu jwakanile kuti ngakummanyilila Yesu. (Maliko 14:​66-72) Yeleyi yatendekasisye kuti Petulo alile mwakulitendela chanasa. Yesu nganamleka Petulo jwele pandaŵijo jwaliji ali atengwiche. Mwamti Yesu ali ajimwiche ku chiwa, jwampele Petulo upile wakuti alosye naga akusamnonyela. Yesu ŵamŵendile Petulo kuti asisamalileje ngondolo syakwe. (Yoh. 21:​15-17) Petulo jwajitichisye kukamula masengo gaŵampele Yesuga. Jwalakwe jwasimanikwe nawo ku Yelusalemu palisiku lya Pentekosite, mwamti jwaliji mu gulu ja ŵandu ŵandanda kusagulidwa ni msimu weswela. w23.09 22 ¶6-7

Ndumetume Petulo jwalimbikasisyesoni achakulungwa achimjakwe kuti, “Mlanjeje ngondolo sya Mlungu.” (1 Pet. 5:​1-4) Naga wawojo ali jwamkulungwa jwa mumpingo, tukusamanyilila kuti akusiŵanonyela abale ni alongo soni akusasaka kwalongolela jemanjaji. Nambope, ndaŵi sine mpaka alipikaneje kuti akwete yakutenda yejinji kapenasoni mpaka alipikaneje kuŵa jwakupela mwamti nganaŵa akombwele kutenda utumikiwu. Naga akulipikana myoyo, ana akusosekwa kutenda chichi? Amsalileje Yehofa mwakupikanila mumtima mwawo. Petulo jwalembile kuti, “Naga jwine akutumichila, jwalakwejo atumichileje mwakamulana ni machili gapochele kutyochela kwa Mlungu.” (1 Pet. 4:11) Kusala yisyene, abale ni alongo pachilambopa akusimana ni yakusawusya yanganaŵa ayikombwele kuyimasya ni machili gawo. Nambope, tukumbuchileje kuti Yesu Klistu jwali “jwakuchinga jwamkulungwa,” mpaka ŵakamuchisye achakulungwaŵa kupunda mwampaka atendele jwalijose. Mpaka atende yeleyi apano nambosoni m’chilambo chasambano. Mlungu akwaŵenda achakulungwa ŵa mumpingo kuti ŵanonyeleje soni kwasamalila abale ni alongo, nambosoni aŵeje “yisyasyo kwa ngondolo sya Mlungu.” w23.09 29-30 ¶13-14

Tukusosekwa tuŵambaleje kujigalila kaganisye ka ŵandu ŵa kuchilamboku. Naga tukujigalila kaganisye ka ŵandu ŵa kuchilamboku, mpaka tutande kumleka Yehofa soni kuleka kukuya malamusi gakwe. (1 Akoli. 3:19) “Yindu yakusayiwona ŵandu kuchilamboku kuŵa yalunda” yikusiyatendekasya ŵandu kuti akampikanilaga Mlungu. Nombe Aklistu ŵane ŵa mu mpingo wa Pegamo soni Tiyatila ŵajigalile ndamo sya ŵandu ŵa mudela jaŵatamaga mwamti ŵatindiŵalilaga milungu jakusepa soni kutenda yachikululu. Mwamti Yesu ŵajijamwiche mwamachili mipingoji ligongo lyakujigalila ndamo syakusakalasi. (Chiw. 2:​14, 20) M’wejisoni masiku agano, ŵandu akusatukanganichisya kuti tujigalileje kaganisye kawo. Ŵandu ŵa mwiŵasa mwetu kapena achimjetu mpaka alinjeje kutunyenjelela kuti tukapikanilaga malamusi ga Yehofa. Mwachisyasyo, jemanjaji mpaka atusalileje kuti kuŵambala kutenda yakusakala kuli kwangakamuchisya, mpaka atusalilejesoni kuti malamusi ga m’Baibulo gakwamba ndamo syambone gali gachikala. Ndaŵi sine mpaka tuganisyeje kuti malangiso gakusatupa Yehofa gali gangakamuchisya. Mwamti mpaka tutendeje yindu mwakupelenganya “yayalembedwe m’Malemba.”—1 Akoli. 4:6. w23.07 16 ¶10-11

Maliya ŵaŵaliji mamagwe Yesu, ŵasosekwaga kumlimbikasya. Maliya nganaŵa peŵasa, nambo yaliji yakuti chakole msigo. Yalijisoni yakuti nganalelejepo mwanache, nambo jwasosekwaga kumlela mwanache juchachiŵa Mesiya. Nambosoni yaliji yakusawusya kwa Maliya kumsalila Yosefe juŵajembecheyaga kulombana najo kuti akwete msigo ligongo pandaŵijo ŵaliji mkanatame malo gamo. (Luk. 1:​26-33) Ana Maliya jwapatile chamtuli machili?Jwalakwe jwadalilaga ŵandu ŵane kuti amkamuchisye. Mwachisyasyo, Maliya jwamwusisye Gabuliyele kuti amsalile yindu yine yakwayana ni utumikiwo. (Luk. 1:34) Maliya jwanyakwichesoni ulendo wakupita “mu chigawo chine cha matumbi” cha ku Yuda kukuwonegana ni Elisabeti juŵaliji jwachinasi jwakwe. Ulendowu waliji wakamuchisya. Mwamti Elisabeti jwamyamichile Maliya soni jwasalilidwe ni Yehofa kuti amlimbikasye mwakumsalila yakulochesya yakwamba mwanache juchachiŵelekajo. (Luk. 1:​39-45) Maliya jwasasile kuti Yehofa jwatesile “yindu yekulungwa ni mkono wakwe.” (Luk. 1:​46-51) Yehofa ŵamlimbikasisye Maliya kupitila mwa Gabuliyele soni Elisabeti. w23.10 14-15 ¶10-12

Ŵakulijiganya ŵa Klistu ŵakuŵalanjikape ni ŵakusasagulidwa ni msimu weswela soni jemanjaji akusakola upile wapajika wakuŵa paunasi ni Yehofa. Jemanjaji apali 144,000 mwamti chakatumichileje mpela ŵakutaga mbopesi kwinani yalumo ni Yesu. (Chiw. 14:1) Uswela wa malo gakupelechela mbopesi ukusajimila kuti jemanjaji ŵapochele msimu wa Mlungu wakwatendekasya kuŵa ŵanache ŵa Mlungu pandaŵi jakutama pachilambo chapasichi. (Alo. 8:​15-17) Malo Geswela Mnope m’chitentichi gakwimila kwinani kwele Yehofa akusatama. “Nguwo” jajalekanganyaga Malo Geswela ni Malo Geswela Mnope jajimilaga chilu chisyesyene cha Yesu changanajinjila nacho kwinani mpela Jwamkulungwa jwa Ŵakutaga Mbopesi mnyumba ja Mlungu jausimu. Mwakupeleka chilu chakwe mpela mbopesi, Yesu jwawugwile litala lyakuti Aklistu ŵasagulwe wosope chakatame ni umi kwinani. Nombe jemanjajisoni akusapeleka yilu yawo ya umundu ni chakulinga chakuti chakapochele mbote jawo kwinani.—Aheb. 10:​19, 20; 1 Akoli. 15:50. w23.10 28 ¶13

Gidiyoni jwakombwele kwajanga mwakuwusimana mtima achalume ŵa ku Efelemu paŵamjimbaga magambo. (Ŵak. 8:​1-3) Jwalakwe nganajanga mwawukali. Jwalakwe jwalosisye kuti jwaliji jwakulinandiya mwakwapikanila chenene jemanjajo paŵasalaga yindu yaŵadandawulaga soni mwakwajanga mwakuwusimana mtima. Yeleyi yakamuchisye kuti mitima ja achalume ŵa ku Efelemuwo jitame mmalo. Nombe achakulungwa ŵa mumpingo ŵalunda akusamsyasya Gidiyoni mwakupikanila soni kwanga mwakuwusimana mtima ŵane pakwajimba magambo. (Yak. 3:13) Pakutenda yeleyi, jemanjaji akusakamuchisya kuti pa mpingo paŵeje mtendele. Ŵandu ŵane paŵamchimbichisyaga mnope Gidiyoni ligongo lyakwagomeka Amidiyani, jwalakwe jwatesile yakuti ŵanduwo amchimbichisyeje Yehofa mmalo mwa jwalakwejo. (Ŵak. 8:​22, 23) Ana achakulungwa ŵa mumpingo mpaka amsyasye chamtuli Gidiyoni? Jemanjaji akusosekwa kutendaga yakuti ulemu wosope ujawuleje kwa Yehofa payindu yakombwele kutenda. (1 Akoli. 4:​6, 7) Tuwanichisye kuti abale ni alongo akusamyamichila jwamkulungwa jwa mumpingo ligongo lyakuti akusajiganya chenene. Pelepa jwamkulungwajo akusosekwa kutenda yakuti ŵanduwo ajichimbichisyeje mnope Baibulo mwatukusapatamo malangiso, kapena majiganyo gatukusapochela mu gulu ja Yehofaji. Achakulungwa ŵa mumpingo mpaka atende chenene kuganichisya naga yakusati pakwiganya yikusiyatendekasya ŵandu kumchimbichisya mnope Yehofa kapena jemanjajo. w23.06 4 ¶7-8

Naga ngatukupata kwanga pa yindu yatukuyipopelela, tukusasosekwa kuliwusya kuti ‘Ana nguŵenda yindu yakuŵajilwa?’ Ndaŵi syejinji tukusaganisya kuti tukumanyilila yayili yambone kwa m’weji. Nambo yindu yine yampaka tuŵende nganiŵa yitukamuchisye. Mwambone naga tukupopelela chakusawusya chinechakwe, mpaka paŵe kuti pana litala lyambone lyakumalana ni chakusawusyacho kulekangana ni yatukuganisyayo. Kombolekasoni yindu yine yatukusaŵenda yikusaŵa yangakamulana ni chakulinga cha Yehofa. (1 Yoh. 5:14) Mwachisyasyo, aganichisye ya achinangolo ŵamŵendile Yehofa kuti mwanache jwawo apitilisyepe kuŵa mu yisyesyene, yayawonekaga kuti lyaliji lipopelo lyakuŵajilwa. Nambo Yehofa jwangamkanganichisya jwalijose kuti amtumichileje. Nambo akusasaka kuti wosopewe kupwatikapo ŵanache ŵetu tusaguleje jika kumtumichila jwalakwe. (Det. 10:​12, 13; 30:​19, 20) Myoyo achinangoloŵa ŵasosekwaga kum’ŵenda Yehofa kuti jwakamuchisyeje kumjiganya mwanache jwawo mwakumyika pamtima yampaka yimtendekasye kuti amnonyeleje mnope Yehofa soni kuŵa mjakwe.—Mis. 22:6; Aef. 6:4. w23.11 21 ¶5; 23 ¶12

Ligongo chichi kwalimbikasya ŵane lili litala lyambone mnope lyakulosya kuti tukwanonyela ŵane? Mwakamulana ni buku jine jakulondesya ya Baibulo, maloŵe gaŵakamulichisye masengo Paulo gakuti “kulimbikasyana” gakusagopolela “kuŵa ni mundu pakusaka kumkamuchisya pandaŵi jakusimana ni yakusawusya.” Myoyo, patukumlimbikasya mundu jwakusimana ni yakusawusya, yikusaŵa kuti tukumkamuchisya kuti apitilisye kumtumichila Yehofa mwakulupichika. Mwamti ndaŵi jilijose patukumlimbikasya Mklistu mjetu tukusalosya kuti tukusamnonyela mnope. (2 Akoli. 7:​6, 7, 13) Kwatendela ŵane chanasa soni kwalimbikasya yili yakamulana. Ana yikusakamulana m’matala gapi? Mundu jwakwatendela chanasa ŵane, akusakola mtima wakusaka kwalimbikasya soni kwakamuchisya. Myoyo, chandanda tukusasosekwa kwatendela ŵane chanasa kaneko ni kwalimbikasya. Paulo jwasasile kuti Yehofa akusiŵatendela chanasa ŵandu yayikusamtendekasyaga kuti ŵalimbikasyeje. Paulo jwasasile kuti Yehofa ali “Mlungu jwakusatutendela chanasa soni jwakusatulimbisya mu yosope.”—2 Akoli. 1:3. w23.11 9-10 ¶8-10

Ŵakumkuya wosope ŵa Klistu mpaka ajembecheye kusimana ni yakusawusya. Aganichisye chisyasyo cha ndumetume Paulo. Jwalakwe jwasalile Aklistu ŵa ku Tesalonika kuti, “Jemanja mkumanyilila chenene kuti patwaliji kweleko, twaliji kumsalila kuti tuchisimana ni yakusawusya, sonitu yeleyi ni yayitendekwe kwene.” (1 Ates. 3:4) Kwa Aklistu ŵa ku Kolinto jwalembele kuti, “Ngatukusaka kuti jemanja achalongo achimjetu mkamanyilila ya yakusawusya yatwasimene nayo . . . Twakayichilaga naga chituŵesoni ni umi.” (2 Akoli. 1:8; 11:​23-27) Nombe masiku agano Aklistu mpaka ajembecheyeje kusimana ni yakusawusya. (2 Tim. 3:12) Pakumkulupilila Yesu soni kuŵa jwakumkuya jwakwe, komboleka achimjawo soni ŵachinasi ŵawo chiŵatendeleje yindu mwangasa. Kombolekasoni ŵasimene ni yakusawusya kumasengo ligongo lyakutenda yindu mwakuwona mtima. (Aheb. 13:18) Mwinesoni pakwete palagasidwe ni ŵaboma ligongo lyakwalalichila ŵane. Chinga tukusimana ni yakusawusya yamtuli, Paulo jwasasile kuti tukusosekwa kusangalala. w23.12 10-11 ¶9-10

Yakobo jwapililagasoni yakusawusya yejinji. Ŵanache ŵaŵili ŵa Yakobo, Simiyoni ni Lefi ŵatesile yakuti liŵasali likakamulanaga nambosoni ŵatendekasisye kuti lina lya Yehofa likachimbichikwa. Konjechesya pelepa Lakelo ŵaŵaliji ŵamkwakwe Yakobo ŵawile pandaŵi jele ŵaŵelekaga mwanache jwaŵili. Nambosoni ligongo lya sala yatendekasisye kuti Yakobo atyoche ku Kanani ni kwawula ku Iguputo ali jwachikulile. (Gen. 35:​16-19; 37:28; 45:​9-11, 28) Atamose kuti Yakobo jwasimene ni yakusawusya yosopeyi, jwalakwe nganaleka kumkulupilila Yehofa pa yosope yiŵamsalile kuti chachimtendela. Nambosoni Yehofa ŵamlosisye Yakobo kuti ŵamnonyelaga mnope. Mwachisyasyo, atamose kuti Labani ŵamtendele Yakobo yindu mwangali chilungamo nambo Yehofa ŵampele Yakobo yindu yejinji. Aganichisyesoni yaŵatite Yakobo pakumyamichila Yehofa paŵasimenesoni ni Yosefe mwanache jwakwe juŵasoŵene najo kwa ndaŵi jelewu soni juŵaganisyaga kuti jwawile. Ligongo lyakuti Yakobo jwaliji pa unasi wambone ni Yehofa jwalakwe ŵamkamuchisye kupilila yakusawusya yaŵasimanaga nayo. (Gen. 30:43; 32:​9, 10; 46:​28-30) M’wejisoni mpaka tukombole kupilila yakusawusya yatukusimana nayo naga tukupitilisya kuŵa pa unasi wambone ni Yehofa. w23.04 15 ¶6-7

Salimo 23 jili nyimbo jajikusalondesya chidalilo chatukusakola chakuti Yehofa chatunonyeleje soni kutusamalila. Daudi juŵalembile salimoji jwalondesisye ya unasi wakulimba wuwapali pasikati pa jwalakwejo ni Mkuchinga jwakwe, Yehofa. Daudi jwamdalilaga mnope Yehofa mwamti jwatendaga yindu mwakulongoleledwa ni jwalakwe. Yeleyi yamkamuchisyaga kulipikana kuti ali pambone. Nambosoni jwalakwe jwamanyililaga kuti Yehofa chapitilisye kumnonyela lisiku lililyose. Ana chichi chachamkamuchisye kukulupilila kuti Yehofa chamnonyeleje lisiku lililyose? Daudi jwayiwonaga kuti Yehofa akumsamalila ligongo nganasoŵaga chilichose chiŵasosechelaga paumi wakwe. Jwalakwe jwamanyililaga kuti Yehofa akumjitichisya soni kuti ali mjakwe. Ni ligongo lyakwe jwakwete chikulupi chakuti mulimose mwampaka yiŵele yindu paumi wakwe, Yehofa chachipitilisya kumsamalila. Mmalo mwakutamila kudandawula ni yakusawusya yajwasimanaga nayo, Daudi jwaliji jwakusangalala soni jwakwikutila ligongo jwakulupililaga kuti Yehofa chapitilisye kumnonyela soni kumsamalila.—Sal. 16:11. w24.01 29 ¶12-13

Kutandila mundaŵi ja Ngondo Jaŵili Japachilambo Chosope, ŵakutumichila ŵa Yehofa m’yilambo yejinji aŵele ali mkulalichila mwa ufulu. Mwamti ŵandu ŵajinji atandite kumtumichila Yehofa, soni ŵakutumichila ŵakwe akombwele kulalichila madela gejinji pachilambopa. Masiku agano, abale ŵa m’Likuga Lyakulongolela akusapitilisya kumdalila Klistu kuti ŵalongoleleje. Jemanjaji akusasaka kuti malangiso gakusapeleka kwa abale ni alongo gaŵeje gakamulana ni nganisyo sya Yehofa. Nombe ŵakulolela madela soni achakulungwa ŵa mumpingo akusajigala malangiso gapeleche kapolo jwakulupichika ni jwalundaga ni kugapeleka ku mpingo. Mwamti achakulungwa ŵa mumpingoŵa akusaŵa kuti ali “kumkono wamlyo” wa Klistu. (Chiw. 2:1) Yisyene kuti achakulungwa ŵa mumpingoŵa ali ŵangali umlama, mwamti ndaŵi sine akusalemwesyaga yindu. Nombe Mose ni Yoswa ŵalemwesyagasoni yindu ndaŵi sine mpela muŵatendelagasoni ŵandumetume. (Num. 20:12; Yos. 9:​14, 15; Alo. 3:23) Nambope, Klistu akupitilisyape kumlongolela kapolo jwakulupichika ni jwalunda soni achakulungwa ŵa mumpingo. Mwamti jwalakwe chapitilisye kutenda yeleyi. Kusala yisyene, tukwete magongo gejinji gakututendekasya kwadalila mnope abale ŵakutulongolelaŵa. w24.02 23-24 ¶13-14

Masiku aganosoni mpaka tumsangalasye Yehofa mwakuŵecheta ya jwalakwe mwakusangalala, soni mwakulosya kuti tukusamnonyela mnope. Patukulalichila tukumbuchileje kuti chakulinga chetu chekulungwa chili kwakamuchisya ŵandu kumŵandichila Yehofa soni kuti amwoneje jwalakwe mpela mwatukusamwonela m’weji. (Yak. 4:8) Tukusaŵa ŵakusangalala kwalosya ŵandu yajikusati Baibulo pakumlondesya Yehofa kuti ali jwachinonyelo, jwachilungamo, jwalunda, jwamachili nambosoni kuti akwete ndamo sine syambone syejinji. Tukusamchimbichisya soni kumsangalasya Yehofa mwakulingalinga kumsyasya jwalakwe. Patukutenda yeleyi ŵane akusayiwona kuti tuli ŵakulekangana mnope ni ŵandu ŵane m’chilambo chakusakalachi. (Mat. 5:​14-16) Patukukunguluka ni jemanjaji mpaka twasalileje ligongo lyakwe tuli ŵakulekangana nawo. Patukutenda yeleyi ŵandu ŵamtima wambone akusatanda kumtumichila Mlungu. Patukumchimbichisya Yehofa m’matala gelega tukusasangalasya mtima wakwe.—1 Tim. 2:​3, 4. w24.02 10 ¶7

Kuti aŵe jwamlume jwa Chiklistu jwakudalilichika, akusosekwa kumanyililaga yindu yineyakwe. Yindu yeleyi yichakamuchisya kuti chakombole kukwanilisya maudindo ga mumpingo, kulisamalila jika kapena liŵasa lyawo. Yichakamuchisyasoni kuŵa paunasi wambone ni ŵane. Mwachisyasyo, alijiganyeje kuŵalanga soni kulemba chenene. Baibulo jikusasala kuti mundu jwakusaŵalanga Maloŵe ga Mlungu soni kuganichisya yaŵalasile akusaŵa jwakusangalala soni yindu yikusiyimjendela chenene. (Sal. 1:​1-3) Kuŵalanga Baibulo lisiku lililyose, kukusamkamuchisya mundu kuti amanyilileje nganisyo sya Yehofa. Yeleyi yichakamuchisya kuti aganisyeje chenene soni kuti akomboleje kukamulichisya masengo chenene malemba. (Mis. 1:​3, 4) Abale ni alongo akusasosekwa achalume ŵakudalilichika ŵampaka ŵakamuchisyeje kukuya mfundo sya m’Baibulo. Naga akusaŵalanga soni kulemba chenene mpaka yakamuchisye kuti aŵecheteje ngani soni kupeleka ndemanga syakulimbikasya. Mpaka akombolejesoni kulemba manosi gakamuchisya. Yeleyi yichakamuchisya kulimbisya chikulupi chawo soni kwalimbikasya ŵane. w23.12 26-27 ¶9-11

Pakutenda woga aganichisyeje mnope yachachitenda Yehofa kusogoloku Satana ali amtyosisye. Pamsongano wa chigawo wa 2014 papali chisyasyo chakulosya mtati ali kukambilana ni liŵasa lyakwe mwakuchenga yayikusimanikwa pa 2 Timoteyo 3:1-5 kuŵa yindu yambone yayichitendekwa m’Paladaiso. Jwalakwe jwaliŵalangaga lilembali chamti myi, “Mchilambo chasambano jichiŵa ndaŵi jakusangalasya. Ŵandu chachiŵa ŵakwanonyela ŵane, ŵakunonyelana yisyesyene, ŵakulinandiya, ŵakulitulusya, ŵakumchimbichisya Mlungu, ŵakwapikanila achinangolo, ŵakuyamichila, ŵakulupichika, ŵakwanonyela ŵandu ŵamwiŵasa mwawo, ŵakamulana ni ŵane, ŵakuŵecheta yindu yambone yakwamba ŵane, ŵakulilekasya, ŵakufasa, ŵakunonyela yambone, ŵakudalilichika, ŵakundilila, ŵanganyada, ŵakumnonyela Mlungu mmalo mwakunonyela yindu yakusangalasya, ŵakulipeleka yisyesyene kwa Mlungu, soni ŵandu ŵeleŵa mŵe nawo paunasi wakulimba mnope.” Ana akusakambilana ni liŵasa lyawo kapena ŵakulupilila achimjawo mwawuchiŵela umi m’chilambo chasambano? w24.01 6 ¶13-14

Kusala yisyene, yili yakusangalasya mnope kumanyilila kuti Yehofa akusasangalala ni ŵakutumichila ŵakwe wosope. Mwamti Baibulo jikusati, “AMBUJE akusasangalala nawo ŵandu ŵakwe.” (Sal. 149:4) Nambope, ndaŵi sine ŵandu ŵane akusakayichila yakuti Yehofa akusasangalala ni jemanjajo. Atamose m’Baibulo, mwana ŵandu ŵajinji ŵaŵamtumichilaga Yehofa mwakulupichika ŵele pandaŵi jine yasawusyaga kulupilila yakuti Yehofa akusasangalala ni jemanjajo. (1 Sam. 1:​6-10; Yob. 29:​2, 4; Sal. 51:11) Baibulo jikusasala mwakupikanika chenene kuti ŵandu ŵangali umlama mpaka akombole kumsangalasya Yehofa. Ana yeleyi mpaka yikomboleche chamtuli? Tukusasosekwa kumkulupilila Yesu Klistu soni kubatisidwa. (Yoh. 3:16) Patutesile yeleyi, tukusalosya kuti tulesile yakulemwa yetu soni tumsalile Mlungu kuti tukusaka kutenda yakusasaka jwalakwe. (Mase. 2:38; 3:19) Yehofa akusasangalala mnope patutesile yeleyi pakusaka kuŵa najo paunasi wambone. Myoyo, patukupitilisya kumtumichila Yehofa mwakulupichika, jwalakwe akusasangalala ni m’weji mwamti akusatuwona kuŵa achimjakwe.—Sal. 25:14.w24.03 26 ¶1-2

Mpaka twasyasye ŵandumetumeŵa mwakupitilisya kulalichila atamose achakulungwakulungwa ŵa boma ali mkutulekasya. M’wejisoni mpaka tupopeleje kwa Yehofa kuti atukamuchisye kuŵa ŵakulimba mtima soni ŵalunda, tuli mkukulupilila kuti Yehofa chatukamuchisye kukwanilisya utumiki wetu. Myoyo, tumŵendeje Yehofa kuti atukamuchisye kumalana ni yakusawusya yetu. Ŵajinji mwa m’weji tukulimbana ni yakusawusya mpela ulwele wekulungwa, chiwa cha ŵachinasi ŵetu, kulagasidwa, yakusawusya ya mwiŵasa soni yakusawusya yine. Tukusalagasoni kuyipilila yakusawusyayi ligongo lya yindu mpela milili soni ngondo. Myoyo, tukusosekwa tumsalileje Yehofa mwatukupikanila mumtima. Tumsalileje mwayiŵelele yindu paumi wetu mpela yatukusatenda patukumsalila mjetu jwa pamtima. Nambosoni tukulupilileje kuti Yehofa ‘chachitusamalila.’ (Sal. 37:​3, 5) Kupopela ndaŵi syosope mpaka kutukamuchisye ‘kupilila patukusimana ni yakusawusya.’ (Alo. 12:12) Yehofa akusamanyilila yindu yakusimana nayo ŵakutumichila ŵakwe, mwamti ‘akusapikana kulila kwawo.’—Sal. 145:​18, 19. w23.05 5-6 ¶12-15

Pandaŵi jatukusaka kusagula yindu yakusosekwa mnope, tukusasosekwa chandanda kumanyilila “yakusaka Yehofa” ni kusagula mwakukamulana ni yeleyo. (Aef. 5:17) Kumanyilila mfundo sya m’Baibulo syakutukamuchisya pa yindu yatukusaka kusagulayo kukusalosya kuti tukumkunda Mlungu kutulongolela pa nganijo. Patukukamulichisya masengo mfundosi ni patukusakombola kusagula yindu mwalunda. Mdani jwetu Satana, jwali “jwakusakalajo” akusasaka kuti tutanganidweje ni kusosasosa yindu ya m’chilambomu ni chakulinga chakuti tulepeleje kupata ndaŵi jakumtumichilila Mlungu. (1 Yoh. 5:19) Mwamti Mklistu mpaka atande kusosasosa chandanda yakusosekwa ya paumi, soni majiganyo mmalo mwakulongosya kumtumichila Yehofa. Yeleyi mpaka yilosye kuti Mklistujo atandite kujigalila kaganisye ka kuchilambo. Yili yisyene kuti yinduyi pajika nganiyiŵa yakulemwecheka, nambo ngayikusosekwa kuŵa pamalo gandanda paumi wetu. w24.03 24 ¶16-17