Bamburu

Yesu awiriki Bako ngba rengberengbe gene ngba gu gene ko anaaberã na—kini bi apai ngbaha—nga gu nakoda gu iiriwoapai dunduko ko amangihe. (Yo. 14:9) Ginipai rengbe ani ka wirikaha ti ga Yesu iiriwoapai? AYesu na Bako ima kpinyemu rani ni bakerehe. Ho Yesu adu ni auru kpotosende, ko ayugu gako dudunguro nyemuse tipa aboro ni mangako sunge na gako ome ka manga iiriwoapai ka undo agu aboro naarungo. Ti kura regbo sa, airavurari ue azungodi ko ko undo yo. (Mt. 20:30-34) Oni tingidi gupai nga “nungayo” amangi Yesu na ko ki husi yo. A wa i namangisunge ane na ni, gu pa-Giriki i nasaha ane nga “nungayo ki mangi” ko, nayugo gupai nga ho Yesu abi gu kumba re ni ko ni rungo, rago aima gberã tiko nikerehe. Ngbatunga gu dudunguro nunga re, nga gu nayugo pa nyemuse, si du nga gu nasa Yesu ko rigi agu aboro naadu na gomoro na ki husi boro ngbataka a. (Mt. 15:32; Mk. 1:41) Ani ima rengba kadu na gu kido nga Yekova nga Mbori “weneringise,” na Wiriko ima kpinyemu rani ni bakerehe gbe na si naimisa yo aimisa ka bi rani ani nirungo. (Rk. 1:78; 1 Pet. 5:7) I na bakere nyemu ka dia agu akpakarapai kusayo aboro agbiatiyo na ni! w23.04 3 ¶4-5

Ani ima rengba ka manga asadatise ni bakerehe ka ne gedapai tipa gu iraira abipai nga gu du ni bakerehe rogo gi ga Satana zegino re na ka ne degaturani kuti ni. Ani ima rengba ka hiiso berãrani na wene apai ni geda ani Baibiri na kini wisigihe. Pa ndu ani tipa adunguratise na kini tungusipai a nika banda gaani aberã. Na Yekova kidohe nga ko aida nga i asadi rani susi gu rengbe ani ka hihe te. (1 Kor. 10:12, 13) Ani dunduko si aida ani mangi kparakpee ni bakerehe susi gu nidu mbata tipa ka nye niruru rani fu Yekova ti gi kpakarakpakara yangara arame re. Yekova naida gupai nga ani ‘úka kpotorani yo’ fuko rogo kparakpee yo. (Tam. 62:8) Oni sambuo Yekova na ki ni tambuako tipa agu apai dunduko ko amangaha. Oni sanako ko undo roni oni du na wingbaduse gene tungusapai yo. Oni sanako ko undo roni oni hi ai agu akpakarapai na ai agu aˈasada rengbe oni kaa gbia tironi na ni. Ka oni mbunga ai pai watadu ai boro ni rugusi roni ti manga oni kparakpee dedede fu Yekova ya. w23.05 7 ¶17-18

Tipagine ani ninaandu ti ni tipa agu adunguratise nga ga dungurati? Bambata ndupai nga, ka sambuo Yekova. (Tam. 26:12; 111:1) Ani nandu a tipa adunguratise tipa wa ka ani ngarasi akuarani ti gi kpakarakpakara aregbo re. (1 Tesa. 5:11) Ho ani afu karagapai ni ti regbo adunguratise, gure nga ani namanga agi apai du ue re. Ono apai kinaho ima rengba ka saha furani ni kpakarakpakaraha tipa ka fu karagapai. Ani ima rengba kadu na gunde ka fu karagapai, watadu ani ima rengba nzunzu kadu na nyemu kaa fu akaragapai ni dunguhe ono ti kura aregbo, gu wirina nanungusaha ima rengba ka zanga tumba berani tipa ani fu karagapai. Waigu rengbe ani ka mangapai kuti agi akpakarapai re? Ko ape gupai nga, si naida ani moiberãrani kuti pa ‘nyakasa akuarani.’ Ka ani tingidi gupai nga, ani ima rengba ka ngarasa akuarani zavura na gu taata akaragapai nayugopa gaani idapase, si ima rengba ka sa rani ka ani dunga na bakere gunde ka tumba berani tipa ka fu karagapai ya. Na ka si vura du nga i atumbanga berani dedede te, ani ima rengba kadu na ngbarago nga gu kura aboro rogo dungurati na momu ka fu karagapai.—1 Pet. 3:8. w23.04 20 ¶1-3

Bakindo amangi tingidapai! I ambu gene fu agu aYudo i aga na yo ni ziziaboro ku Babera yo tipa agarã naima susa 70 i karagatiyo ku rogo gayo ringara nangia Yisaraere. (Eza. 1:2-4) Kina Yekova sa narengbe ka manga gipai re. Aboro aini Babera ti gupai nga i anaambunga gayo ziziaboro te. (Yes. 14:4, 17) Ono gu kura boro aima zio Babera, na gu vovo bazogo re ape gupai fu aYudo nga, i ima rengba ka ga. Si aaida aYudo dunduko, gbe, abariikporo mangi diaberã: singia, i nika mbu Babera watadu i nika nye yo. Gu diaberã re aarengbanga kadu taata ka mangaha te. Si nawira gupai nga badungu aboro aima du ni gbinza yo tipa ka ndu gu gbanga nunguro re. Na wa duhe nga i avungu dungu aYudo kina Babera yo, i aarakanga rogo gu kura ba te. I aabingo ho nga Yisaraere angia kpuyo te, ono i aabihe nga si angia gu ringara atitayo araki rogoho. Si nawiraha wa, gu kura aYudo aima du ni airakumuko Babera yo, sidu, si aima rengba kadu fuyo ni kpakarakpakaraha ka mbu akpuyo watadu gayo sunge bagaahe na ki ndu ka raka rogo gu ringara i aainongo ho ya. w23.05 14 ¶1-2

Fugo Mbori nangarasa rani ani naandu kindi kumbatayo kaa sonosa hipai, nunga, na nyemuse. Ruka 21:19 naya: “Rogo gaoni hipai oni abátasa ungaroni abatasa.” AKorosaio 3:12 naya: “Oni úkadi . . . weneringise.” Na 1 ATesaroniko 4:9, 10 naya: “Bambiko Mbori nayugo pa nyemu akuaroni fu roni tigaoni. . . . Ono ani nazungadi roni, awirina, ya oni susi asusa na ni kindi.” Agi afugo du rogo agi averesi re dunduko, i akehe fu agu abawiriki naima yugo hipai, nunga, na nyemuse. Wa vura duhe wo, si aaida i naandu kindi kumbatayo kaa sonosa agu asino re. Na si naida ani mangi kina gu bangisapai re. Tipa ka undo ro mo mangi gipai re, ani bingo wai agu aKristano nadu mbata ayugu agi asino re ni basasa. Na mo nika bi wai rengbe ani ka wirika agu abawiriki re, na ni sangbanaha, ani nika yugoho nga ani ima mbakada tirani tipa bakere gberãngbi. Na gu regbo bakere gberãngbi nika tona ti ni, mo aima wirika wai ka hipai na mo nika diaberã adia kaa ndu kumbatayo kaa hipai. w23.07 3 ¶4, 8

Ka si vura du nga ani nga mbedimbedi aKristano watadu “kura akandoro,” si naida ani nye ngba “Gene Ziazia Pai” si nika undo rani tipa ani naairiso Yekova kindi awere na kumbatayo ho Kindo nika ye ni na bawene apai ku auru kpotosende. (Yo. 10:16) Naatona rogo 1919 Fuo Batikayo Kristo, amirioni akumba, adee, gbiati agude ima mbu Babera du ni Bakerehe, du nga bariwara ngbii ziree pambori, na ki tona nduge ngba gu gene narukuba kurapai kia. Ho agu aYudo si adu nga i nika mbu Babera ambuhe ni, Yekova aima bi gupai nga ko ima dia agu ambia kota dunduko nadu ngba gayo gene kusayo naadu ho. (Yes. 57:14) Ginipai tigaha du tipa gu “Gene Ziazia Pai” du areme? Tipa gu dungu kama agarã naadu mbata fu 1919, Yekova aima tona ka mangasunge na agu akumba naima du na irisa tipa ko tipa i saha taata fu kura aboro i kuru kusayo rogo Babera du ni Bakerehe. (Oni ringbisinga ha na Yesaya 40:3.) I amangi agu asunge si aaidaha tipa ka saha kusa taata fu agu aboro du na ruru ngbaduyo yo i mbu ziree pambori na kini irisi Yekova wa sa na gako aboro. w23.05 15-16 ¶8-9

Yekova naida ani irisiko na ngbarago na kpotorani yo dunduko. (2 Kor. 9:7) Ya mo si naida ani naamangapai tipa ka da ti gaani sásá ka si du nga nyemuhe tirani te? Oni bingo gu kpiapai nangia ga gu mokedi nangia Pauro. Ko aya: “Mi namanga borore, ka sa ha ni kanga fere.” (1 Kor. 9:25-27) Zavura ho Pauro aadunga ni na nyemu ka manga gupai Yekova aakpinyemu ko mangihe ya, ko anaazio tiko azio ka mangaha. Ya mo Yekova adu na ngbarago na gupai Pauro anaamangaha fuko? Ii! Na Yekova aima fu maku fuko tipa gu ome ko aamangaha. (2 Tim. 4:7, 8) Wakina gure a, Yekova na ngbarago ka bi rani ho ani amangapai ni ka da ti gaani sásá ka si vura du vurũ nga nyemuhe tirani te. Ko na ngbarago bambiko wa vura duhe nga ani namanga agu apai dedede adunga ani na nyemu ka mangaha ya, ko ima ino gupai nga ani namangaha bambiko ani ima kpinyemu ko. Kina wai Yekova afu maku fu Pauro, ko nika fu maku afu furani tipa gu ome ani amangaha. (Tam. 126:5) Na wa ani nikaa gbia ga Yekova amaku, ani nika du na bakere nyemu ka mangaapai. w23.05 29 ¶9-10

Gu mokedi nangia Pauro aringbisipa agu aboro nikaa bata nga rogo ga Yekova uru ya kuti agu aboro nara. I aruganga tiyo na pa agu apai namanga patiyo watadu pa wai regbo asusa te. Sidu, i ainongo gu regbo nyanyakipa pai namangi ti ni na ka i mangingo pai a kuti ni te. Badungu aboro areme wakina agu aboro nara ara rogo toro yo. (Rom. 11:8) I aidanga kuti gu gopai nayugo gupai nga ani naraka rogo “kusa rago” na bakere gberãngbi ima mbeda ka ye te. (2 Pet. 3:3, 4) Ono tie, si ni nyanyakipa pai furani ani naangera angera kindi na aˈuru dunduko. (1 Tesa. 5:6) Sidu, si naida ani nye zezeredi na kidu nyanyaki. Tipagine? Si wo tipa gupai nga ka ani rimisingo tirani kurogo agu apai yo nabipa birĩ-zogarago areme watadu ka berãpa mbakada agu akpakarapai namanga rogo zegino ya. Gu soapai nga ga ngbe na birĩ-zogarago watadu ka songoda agu akpakarapai namanga rogo zegino nikaa kio kina kumbatayo wa ga Yekova uru ambeda. Wa vura duhe wo, si aidanga ani naabaka bangirani tipa wai ani nika mangapai kuti ni te. Ga Mbori toro naundo rani ani du zezeredi ki zanga wo berãrani yo na kini mangi agu adiaberã nga ga tatamana.—Rk. 12:11, 12. w23.06 10 ¶6-7

Ginipai naye ku berãro yo ho mo agia gu rimo ni nga Samusona? Si nawiraha wa, mo naberã pa gu kumba naadu na bakere ome tiko. Kina rengo du. Ono Samusona aima manga agu adiaberã naadu ni gbegberẽhe nga gu naadu na gbegberẽ sangbanaha kuriko. Wa si avura duwo, Yekova amoiberãko tipa agu apai Samusona amangihe tipa ka irisoko, na Yekova amoi pa ga Samusona padu niruruse ku Baibiri yo tipa si undo rani. Yekova amangisunge na Samusona tipa ko undo Gako siasia aboro nangia aYisaraere. Tingbafuo dungu kama agarã fuo kpio Samusona, ga Mbori toro adu kugii Pauro ko rimisi rimo Samusona ku dagba agu akumba naadu na idapase. (Eb. 11:32-34) Gu kpiapai nga ga Samusona ima rengba ka ngarasa rani. Ko akido kuti Yekova zavura ti kpakarakpakara regbo. Ani rengba ka wirikapai be Samusona na wai rengbe gako kpiapai ka ngarasa rani. w23.09 2 ¶1-2

Ani ima rengba ka nyakasa gaani hipai ni manga ani kparakpee fu Yekova dedede na kini pe agu akpakarapai fuko du tipa rani. (1 Tesa. 5:17) Ti kura aregbo, mo agbianga tiro na nyanyaki asada awere te. Wa vura duhe wo, ya mo mo nakpara fu Yekova na kini sanako ko undoro ti agu aregbo du mo na bakere gberãrago ka mo ainongo gupai ka mo mangihe ya? Ka si du nga mo nakpara fu gaani Mbori tipa undo ho mo agbia tiro ni na agu apai du ni rukutu he, mo adunga na ndundu a ho mo ka gbiatiro ni na agu akpakarapai du ni bakerehe kumbatayo te. Na mo nika du na gu kido nga ko ima ino gu regbo si aida ko undoro na ko nika mangaha amanga. (Tam. 27:1, 3) Ka ani nye ni rururani fu Yekova ho ani agbiatirani ni na akpakarapai areme, ani ima rengba ka hi gu asada nga ga bakere gberãngbi. (Rom. 5:3) Tipagine rengbe ani ka pehe ti ni wo? Dungu awirina bi gupai nga agu aregbo dunduko i ahi akpakarapai, si naundo yo i hi kura kpakarapai nga gu nika ye kumbatayo. Ho i ahi akpakarapai ni mbiko gu undo nga ga Yekova, i na bakere idapase nga Yekova naida aida ka undo yo. Bambiko wa du yo na idapase kuti Yekova, i ima rengba ka hi gu kura asada.—Yak. 1:2-4. w23.07 3 ¶7-8

Ga Yekova umbasitise na nunga afõngbadukoyo ko du na ruru bipai. Ni kpiapai, ga Yekova umbasitise adu ni yuguyuguhe ho ko aaida ka gbarasa gu gbegberẽ aboro ni naadu Sodomo yo. Yekova afu rugapai vurube gako amaraika fu gu ruru kumba nangia Roto ko zubo ku rogo gu rago naadu rii bagangara yo. Roto aagunde agunde ka ndu koyo. Sidu, ko azungodi Yekova nga ko gbiati gako aborokporo naida ka zubo ku Soara yo, nangia gu tooni gbata si aima du nga i nika gbarasaha agbarasa. Yekova aima rengba ka kakuti gupai nga si naida Roto peke kina fuo gu rugapai Ko afuhe fuko. Ono tie, ko aima ida gupai Roto apehe fuko, wa si avura du vurũ nga gure aayugo gupai nga si nika ida ka i gbarasingo Soara ya. (Bam. P. 19:18-22) Fuo dungu agarã kusa, Yekova ayugu nunga fu gu rikaaboro nangia aboro Nineve. Ko akedi gu nebi nangia Yona ko ndu ka takapande pa gbarasa gu gbata re gbiati gu gbegberẽ aboro naaraka rogoho. Ono ho aboro Nineve asa gayo berã ni, nunga yo azi Yekova ka ko agbarasanga gu gbata re ya.—Yona 3:1, 10; 4:10, 11. w23.07 21 ¶5

Ginipai rengbe ani ka wirikaha ti gu kpiapai nga ga Yoasa? Ko adu wakina gu ngua tarãha arimongo ku sende yo wenengai ya nga gu nagbia undo kina be gu kura angua i asongodaha na ni. Ho gu boro naaundo ko akpi ni—nangia Yoyada—na Yoasa ki tona ka degatuko fu abasamungu, ko aadunga ni ruruko berewe fu Yekova te. Gi kpiapai re nayugo gupai furani nga, si aidanga ani naagiasangba Mbori mbiko agumerani watadu kura aboro moi wene kpiapai rogo dungurati furani ani mangihe te. Tipa ka nye mbembedi na Yekova, si naida ani nyakasi gaani nyemuse na kini irisiko, vurube wisigopai dedede, berãkuriipai, na kparakpee. (Yere. 17:7, 8; Koro. 2:6, 7) Yekova asananga rani ani mangi badungu apai fuko te. Gupai ko aidaha berani gu du rogo Batungusipai 12:13, nga gu naya: “Oni gúnde ti Mbori, ki ka kuti gako arugute; bambiko gere nga gu pai dunduko nga ga boro.” Ho ani agunde ni ti Mbori, si nika sarani ani nye ni rururani fuko ka kina ginipai vura manga rani vurũ kumbatayo. Pai ho nika gbarasa gaani pagume na Yekova te. w23.06 19 ¶17-19

Ga Mbori kidohe natona na agi afugo re: “Gu ko nasungu auru mbatabakindo, ko ki ya.” (Yugo. 21:5a) Agi afugo re ni kparakparaha mbiko gere nga gu bambata regbo dagba agu aregbo yo biata rogo gu buku nga ga Yugoti Yekova nafura rogoho nitiko. Anga maraika du watadu Yesu nafu gi kidohe re te, ono kina boro Yekova nitiko! Gi rengo pai re nayugo gupai nga ani ima rengba kadu na bakere kido kuti gupai ko apehe fuo gure. Tipagine duhe ti ni wo? Bambiko ka Yekova penga “zire” te. (Tito 1:2) Sidu, agu afugo ani agedaha rogo Yugoti 21:5, 6 nika da ada nzunzu ti rengo. Gu pa-Giriki i nasaha nga “oni ngére!” i ima mangasunge na ni bara dunguhe rogo gu buku yo nga ga Yugoti. Ginipai Mbori apehe fuo gure? Ko aya: “Mi nambakada ahe dunduko ni vovo ho.” Yekova nika manga agi aˈariapai re amanga kumbatayo. Ono mbiko gupai nga ko ima du na gu kido nga ko du wa ka ko digisi gako kidohe, ko nafura tipaha wa ka i ya agu aˈariapai re ima manga.—Yes. 46:10. w23.11 3-4 ¶7-8

Gu mokedi nangia Petero aasota kindi na gako arungbura. Ani bingo bete akpiapai. Ho Yesu asakipa wai ni ko ni ka rungo na ki kpi tipa ka digiso gu sangbaanebi nga ga Baibiri, Petero aza ko. (Mk. 8:31-33) Petero na kura abawiriki anaapaya dagbayo dedede tipa da nangia bakumba ni. (Mk. 9:33, 34) Rogo gu yangara yuru naadu mbata fu Yesu kpi, Petero azubo kumba na ki kati tuko. (Yo. 18:10) Kina rogo gu bangisa yuru re, Petero adu na gunde tipa gupai aboro arengbe ka berãha tipa ko na ko ki oro rimo Yesu nangia bakureako bara biata. (Mk. 14:66-72) Gipai re asa gupai nga Petero kpari ni kerehe. Yesu aambunga gi gako bawiriki naadu na bakere gberãrago re te. Tifuo i zingisi Yesu be kpio, ko afu momu fu Petero tipa ko yuguhe nga ko nakpinyemu ko kindi. Yesu asana Petero tipa ko mangisunge niumbasitise ni babanda gako akandoro. (Yo. 21:15-17) Petero aima du regerege ka manga gupai Yesu apehe fuko. Ko adu kina Yerusarema yo rago Pendekote na ko adu kina dagba gu bambata aboro i ambedi yo na ziazia toro. w23.09 22 ¶6-7

Gu mokedi nangia Petero angarasi akurako abaakumba nga, “Oni mbú ti ga Mbori rimbasa akandoro.” (1 Pet. 5:1-4) Ka singia mo nga bakumba, ani ima ino gupai nga mo ima kpinyemu awirinamo na mo naida aida ka ngarasa yo. Ono ti kura aregbo, mo ima rengba ka bihe nga apai ima nge tiro ni kerehe watadu mo ima du na mbugo tipa ka manga gipai re. Ginipai rengbe mo ka mangaha? Mo pepa gamo abakabangirise dunduko fu Yekova. Petero akepai nga: ‘Ka boro amanga pa aboro, ni mangi he wa ni namanga ha ni gu ome Mbori nafuhe.’ (1 Pet. 4:11) Awirinamo ima rengba kaa gbiatiyo na agu akpakarapai nga gu arengbanga ka nyasa kusayo rogo gi zegino re ya. Ono mo tingidi gupai nga “baira ababanda akandoro,” nga Yesu Kristo ima rengba ka undo yo susi gu rengbe mo ka mangaha. Ko ima rengba ka manga gipai re awere na rogo vovo zegino. Gupai Yekova aida abaakumba mangihe nga ka kpinyemu awirinayo, ka ngarasa yo, na kadu ‘ni kpiapai fu rimbasa akandoro.’ w23.09 29-30 ¶13-14

Si naida ani ne ga aboro berãpai. Ka ani aberã ngba gu gene agu aboro aberãnga pa ga Yekova andiko ya aberã ngbaha, ani ima rengba ka tona ka mbu Yekova gbiati pekafuo gako arugute. (1 Kor. 3:19) Dedede, “gu tatamana nga ga gi zegino re” nandu na aboro sa kina gu nyemu apai nga ga borose. Gu bete aKristano naadu Perugamona yo na Tuatira yo aima dia gu bipai nga ga iriso kpiahe na wasiwasi mangapai nga gu nadu rogo gu gbata re. Yesu afu nyanyaki rugute fu agu adungurati re mbiko i ambu gene fu wasiwasi kodaba si ni mangi. (Yugo. 2:14, 20) Areme, agu aboro du pati rani na asada ka sarani ani idi kuti iraira abipai. Agumerani gbiati abakurearani ima rengba ka ngarasa rani tipa ani kuo ga Yekova andiko. Ni kpiapai, i ima rengba ka ya anga pa nye ani ni ruru rani rogo gaani mangapai yo nga gupai nyakipaha te. Ti kura aregbo, ani ima rengba kadu na gu bipai nga, agu arugapai Yekova afu he furani arengbanga te. Ani ima rengba a ka du ni asadiasadi rani “ka susa ri agu apai du ni keke he.”—1 Kor. 4:6. w23.07 16 ¶10-11

Maria navungu Yesu aaida na ome be kura aboro. Si adunga ri nika du na vuse si ki vura du vurũ nga ri aamanganga rogatise te. Ri aainongo wai ka sonosa agude nitiri te, ono si adu nga ri nika ngerafuo gu gude si adunga ko nika da ni Masiya. Ri aamanganga kodaba rogo gari raka yo te, ono si aaida ri pe gupai fu Yosefa nga ri na vuse, gipai re aima du ni kere kpakarakpakaraha tipa ka mangaha. (Rk. 1:26-33) Waigu Maria agbia ome? Ri agbata undo be kura aboro. Ni kpiapai, ri asana gu maraika nangia Gaburere re ko peke dungu apai tipa gi sunge re. (Rk. 1:34) Ngbutuko tifuo gure, ri andu gbanga nunguro ku “ngbi bagangara yo” naadu Yuda yo tipa ka bi gu gumeri nangia Erizabeta. Erizabeta atambua Maria na ga Yekova toro kidu kugii ri ri pe afugo ngarasaro ni sangbanebi tipa gu gude si adu nga Maria nika vunga ru. (Rk. 1:39-45) Maria ape gupai tipa Yekova nga, “ko yugu ome ni beko.” (Rk. 1:46-51) Yekova anyakasi Maria vurube gu maraika nangia Gaburere gbiati Erizabeta. w23.10 14-15 ¶10-12

Kina bete aboro dagba ga Yesu abawiriki yo i nambediyo na ziazia toro, na i na kparakpara pagume na Yekova. Agi aboro du bange yo nga 144,000 re nika mangasunge ngbangbaturũ yo na Yesu ni aboromotumo. (Yugo. 14:1) Ziazia ba nga ga banye narukuba padu yo ni awiri Mbori ho du yo ni kindi auru kpotosende ane. (Rom. 8:15-17) Kparakpara Ziazia Ba Kisusi narukuba ngbangbaturũ, nga gu ba Yekova araka rogoho. “Gu remu dada rago” nga gu naakpara ziazia ba ti Kparakpara Ziazia Ba Kisusi narukuba gu kpoto Yesu naaká na ko ti rimo ko ku ngbangbaturũ yo ni gu bakere Gbiamotumo nga ga gu yekaru nga ga toro. Ni fu Yesu tiko ni motumo tipa aboro, ko azaki gene fu mbedimbedi aKristano dunduko tipa i ga ku ngbangbaturũ yo. Si naida aida a i mbu gu kpotoyo nga ga borose tipa ka gbia gu gayo mosoro nga ga ngbangbaturũ.—Eb. 10:19, 20; 1 Kor. 15:50. w23.10 28 ¶13

Gidiona anye zezeredi ho aboro Efuraima abisirapa ko ni. (Abasa. 8:1-3) Gidiona aakaraganga pai ni zinga te. Ko ayugu gupai nga ko adu na umbasitise ni dega ko tuko kuti gupai i aagumbaha na ki fura fuyo ngba wene gene, gipai re nasa gupai nga i zeredi ki mbu zinga. Agu abaakumba du na tatamana nawirika Gidiona ni dega yo tuyo wenengai na kini karagapai zezeredi ho i nabisirapa yo ni. (Yak. 3:13) Ni mangayo pai ngba gi gene re, i nafubee kuti zereda rogo dungurati. Ho aboro aasambuo Gidiona ni mbiko gu diabese ko agbiaha rii aMidiano, ko agbeberã aboro dunduko kuti Yekova. (Abasa. 8:22, 23) Waigu rengbe abaakumba ka wirika Gidiona? Si naida i fu taarimo fu Yekova tipa agu apai i amangaha. (1 Kor. 4:6, 7) Ni kpiapai, ka si du nga i tambua bakumba tipa gani birĩ nga ga yugopai, ni ima rengba ka gbeberã aboro ku rogo gu ba ni agbia arugapai rogoho nga Fugo Mbori, watadu kuti gu rabahe ni agbiaha rogo ga Yekova riigbu. Abaakumba ima rengba ka berãkuriipa gayo yugopai singia i nayugopai ngba gu gene nafu taarimo fu Yekova watadu i nagbeberã aboro kina kuti tiyo. w23.06 4 ¶7-8

Ka si du nga ani agbianga guhe ani nasanahe tipaha te, ani ima rengba ka sana tirani nga, ‘Ya mo mi namanga kparakpee tipa gupai ruaru?’ Dedede, ani ninaaberã gupai nga ani ima ino gupai ngba gbe tipa rani. Ono agu ahe ani asanahe tipa ha ima rengba ka zanga undo rani tipa gbanga regbo. Ka si du nga ani namanga kparakpee tipa kpakarapai, wene gene tipa ka mangapai kuti gu kpakarapai re ima rengba kadu ho susi gu ani amanga kparakpee tipaha re. Na gu kura apai ani asanahe tipaha ima rengba ka zanga du na ngbanya dagbaha na gupai Yekova akpinyemuhe. (1 Yo. 5:14) Ni kpiapai, oni bingo gu kpiapai nga ga agu avunguagude nasana Yekova ko banda wiriyo ku rogo rengo yo. Gipai re ima rengba kaa ngera wa gi sanahe re ruaru. Ono Yekova aziongo ai boro ngbaome dagbarani yo ni irisi ko te. Ko naida ani dunduko, kodihe na awirani sia ka irisoko. (Pa Rug. 10:12, 13; 30:19, 20) Sidu, kuba gure, agu avunguagude re ima rengba ka sana Yekova tipa ko undo yo i zi ngbadu wiriyo yo u kpinyemu Yekova na ki da ni bakurea Ko.—Snz. 22:6; Ef. 6:4. w23.11 21 ¶5; 23 ¶12

Tipagine du ngarasa kura aboro ti ni ni nyanyakipa pai tipa ka yugo gupai nga ani nakpinyemuyo? Ringbisihe kuti kura buku sa nafura tipa Baibiri, gu fugo Pauro amangisunge na ni nga “ngarasa” watadu wasa, rogo yo nga “ka ru pati boro ka ngarasa ni ho ni andu ni rogo kere aasada.” Sidu, ho ani afu wasa ni fu gu wirina narungo, ani naundo ni ni naandu kindi kumbatayo kaa iriso Yekova niruru ni. Na ai gu regbo ani afu wasa fu wirina, ani nayugo gupai funi nga ani ima kpinyemu ni. (2 Kor. 7:6, 7, 13) Du na nunga gbiati fu wasa na kina ngbanya dagbaha. Ngba gini gene? Ho du boro ni na nunga gu boro narungo, si nasa ni ni fu wasa fu gu boro re na ki mangi gupai rengbe ka undo ni. Sidu, ho du ani ni na nunga; si naundo rani ani fu wasa fu kura aboro. Pauro ayugu gupai nga ga Yekova nunga tipa aboro nasa ko ko fu wasa fuyo. Pauro asakipai tipa Yekova ya ko nga “Ba inaapai, nga Mbori wasa dunduko.”—2 Kor. 1:3. w23.11 9-10 ¶8-10

Apefuo Kristo dunduko nika gbiatiyo agbia na rungosiro. Ani bingo gu kpiapai nga ga gu mokedi nangia Pauro. Ko ape gupai fu agu awirina naadu Tesaronike yo nga: “Ho ani adu ni na oni, ani agumba ha fu roni mbata ni rengo ya ani ka hi gberãngbi; si ki ye ka du a wo.” (1 Tesa. 3:4) Na ko akepai fu aKorindo nga: “Ani akpi nga nyemu oni zanga inahe te, awirina, tipa gu gaani rungosi . . . Wa ani aberã nga ya ani anye ni ungarani ya.” (2 Kor. 1:8; 11:23-27) AKristano ima rengba areme a ka gbiatiyo na kina ngbatunga gu rungosiro re. (2 Tim. 3:12) Wa mo amoi idapase kuti Yesu na ki tona peka fuoko, abakureamo na agumero ima sawia ro. Ya mo gamo diaberã ka nye niruru ro rogo apai yo dunduko yengo na akpakarapai foro ba gamo sunge yo? (Eb. 13:18) Ya mo mo gbianga tiro na rungosiro be airangbii mbiko gupai nga mo atungusipai fu kura aboro tipa gamo maabangirise? Ono tie, ka ani vura kaa gbiatirani na kina gini ngbatunga arungosiro vurũ, Pauro aya si naida ani ngi angi. w23.12 10-11 ¶9-10

Yakobo aima hi dungu akpakarapai. Awiri Yakobo ue nangia Simona na Revi, aye na pazee kurii gayo aborokporo na ki ye na gbarasarimo kurii Yekova. Kurigure, gu dia Yakobo nangia Raere ko akpinyemuri gbe, akpi ho ri aavunga ue wiiri ni. Na mbiko gu kere ngbongi nati, si asa gupai nga Yakobo ga na gako aborokporo ku Ezipeta yo ngba gbinzako. (Bam. P. 35:16-19; 37:28; 45:9-11, 28) Wa agi akpakarapai re avura du, Yakobo aambunga du na idapase kuti Yekova na Gako akidohe te. Na Yekova aima yugo gupai fu Yakobo nga Ko ima ida na ko. Ni kpiapai, wa Rabana avura kaa biriko Yakobo, Yekova aima fu maku fuko na dungu aũborose. Na ni rengo, Yakobo aima du na bakere tambuahe fu Yekova ho ko abi wiriko ni nangia Yosefa berewe, nga guko ko aberẽ gupai nga ko aima kpi bakuru yo! Ga Yakobo mbembedi pabakure na Yekova aundo ko ko hi gako akpakarapai. (Bam. P. 30:43; 32:9, 10; 46:28-30) Ho ani abanda gaani mbembedi pabakure ni na Yekova, ani ima rengba a kadu na diabese ka hi agu aˈasada du ni tunguotunguoho. w23.04 15 ¶6-7

Atambuahe 23 nga gu bia nafura tipa kido kuti ga Yekova nyemuse. Davide nangia bake gi papara atambuahe re asakipai tipa gu nyanyaki nyemuse naadu dagbako na gako Babanda akandoro nga Yekova. Davide abi tiko nga ba ko gu ngbaangba ho ko ambu tiko ni Yekova naangbe fuko kumbatayo na ko adu na kido kuti Ko. Davide aima ino gupai nga Yekova nikaa yugo gako nyemuse fuko rogo gako raka yo naaˈuru dunduko. Ginipai nasako ko du na gu kido re? Davide abi tiko nga i aangera angerafuo ko bambiko Yekova aafu agu ahe dunduko fuko ko aaida na ni ti aregbo dũ. Davide aima ino gupai a nga Yekova angia bakureako na Yekova aima ida na ko. Si du nga ndu gupai ko adu na gu kido ti ni nga ka kina ginipai vura manga kumbatayo, Yekova nikaa ndu kindi kumbatayo kaa ngerafuo gako azingo. Bambiko Davide adu na gu kido nga Yekova aima kpinyemu ko na ko nikaa ngera angera fuo ko, si aundo ko ka ko naabaka nga bangiriko ya, ono kuba gure, ko adu na ngbarago na rengbabepai.—Tam. 16:11. w24.01 29 ¶12-13

Natona ti regbo gu Ue Vura Nga ga Zegino, ga Yekova aboro aima du na ranirii ka tungusapai rogo dungu aringara. Nirengo, badungu aboro ima ye ka ino Yekova, na gako amoyambu natungusapai rogo zegino dunduko. Areme, agu awirina du rogo Riigbu Bipasunge nandu kindi kumbatayo kaa ngera tipa gu ngbembatayo nga ga Kristo. I naida agu arugapai i afuhe fu awirinayo yugu gu gene Mbori gbiati Kristo abi apai ngbaha. Na i namangasunge na ababi adungurati gbiati abaakumba tipa kaa fu arugapai fu adungurati. Agu abaakumba nga mbedimbedi aKristano kodihe na agu abaakumba du rogo adungurati rogo “kumbabe” Kristo yo. (Yugo. 2:1) Kina rengo ngaha nga, agi abaakumba re nga kpakpa aboro na i namanga aingahe amanga. AMoize na Yosua aima manga aingahe ti kura aregbo kina wai amokedi amangihe. (Geda 20:12; Yos. 9:14, 15; Rom. 3:23) Ono ani ima rengba ka bi gupai ziazia nga, Yesu nangbembatayo fu ruru kangara moyambu na agu abaakumba ga Mbori toro asia yo, na ko nikaa mangaha wo kindi. Sidu tie, ani na nduapai dunduko berani tipa kadu na kido kuti gu ngbembatayo ko afuhe furani vurube agu aboro ko naasia yo i naangbembatayo. w24.02 23-24 ¶13-14

Areme, ani rengbe ka sa ngbarago ti Yekova ni fura ani tipa ko ngba gu gene nayugo gupai nga ani na tambuahe na kini yugu wai ani nakpinyemu ko. Ho ani atungusapai ni, gaani bangua sásá nga ka undo kura aboro i mbedi na Yekova na kidu kina wai ani nidu tipa gu Barani nga boro nyemuse. (Yak. 4:8) Ani na bakere ngbarago ka yugo wai fu aboro Baibiri asakapai tipa Yekova, kini yugupa gako nyemuse, gako rurupai, gako tatamana, gako ome na gu kura wene asinoko. Ani natambua Yekova a na kini sa ngbarago tiko ni asada ani ka mangapai wa gu ko amangaha. Ho ani amangaha ni wo, ani nadu kia rogo gi zegino du ni ba gbegberẽhe re. Aboro ima rengba ka bi gupai nga ani kia na i ima rengba ka bakabangiriyo tipa ndu gupai du ani ti ni kia. (Mt. 5:14-16) Wa ani kaa mangapai na yo rogo auru nibasasa, ani nika du na rengba ka sakapai fuyo tipa ndu gupai ani amangapai ti ni wa gure. Ni sangbana gipai re, agu aboro du na wene ngbaduyo yo nadu mbembedi na gaani Mbori. Ho ani ataasarimo Yekova ni ngba agi agene re, ani nasa ngbarago kpotoko yo.—1 Tim. 2:3, 4. w24.02 10 ¶7

Tipa kada ni gu Kristano nga kumba niima nyaka rogo toro yo, mo sonosi gu birĩ-sunge rengbe ka undo ro. Gipai re nika undo ro mo mangi agu asunge i nika fuhe foro rogo dungurati, mo gbia gu sunge nika undo ro mo ngerefuo gamo azingo na agu azingo nga ga gamo aborokporo, na mo kidu na wene pagume na kura aboro a. Ni kpiapai, mo wiriki wai ka gedapai na kini kepai wenengai. Baibiri nape gupai nga, boro maku nga gu boro nageda Fugo Mbori na aˈuru dunduko na kini berẽkuriihe dudunguro. (Tam. 1:1-3) Nigeda ni Baibiri dedede, ni naye ka ino gu gene Yekova aberã ngbaha, na si ki undo ni ni ini wai ka mangapai kuti gupai du rogo Ziazia Kekeapai. (Snz. 1:3, 4) Awirinarani nga akumba na adee naida na ngbatunga agi akumba re nga aguyo rengbe ka yugopai na kini fu arugute vuru Baibiri yo. Ka si du nga mo na gedapai na kini kepai wenengai, mo nika duadu na rengba ka mbakada gumbapai na kini fu agu akaragapai nika undo ka nyakasa gayo idapase. Mo nika du a na rengba ka keka memeapai nika undo ro mo nyakasi gamo idapase na ki ngarasi kura aboro. w23.12 26-27 ¶9-11

Ho du mo ni na gunde, mo berẽkurii gupai Yekova nika mangaha kumbatayo ho Satana nikaa dunga ni berewe ya. Gu mangimangi kpiapai naadu rogo gu bakere dunguratise nangia ga 2014 ayugu bagude ko ni sakipai na gako aborokporo tipa wai i nikaa geda 2 Timoteo 3:1-5 rogo Paradizo. Ko aya: “Mo ini gere a, ya rogo vovo zegino, weneapai aye. Bambiko aboro akpi kina nyemu akurayo, ki du ni airakpinyemu agu apai nga ga toro, nibayee yo, ni aboro umbasitise zanga gberãngba yo, agi sangba avunguyo, afu tambuahe, ziazia aboro, azanga sakparakpa, abanda ndika, azanga soapai, arugutise napai, azanga erã, akpinyemu wenepai, aira rengo, agipai, azanga abiatise, akpinyemu Mbori susi sangba borose; kini kakuti ndikidi sinombori. Oni koditironi na agiyo re a.” Ya mo mo naasakapai na gamo aborokporo watadu akuaro aidipase tipa wai raka nika du rogo vovo zegino? w24.01 6 ¶13-14

Nairiwo wai duhe nipa ngarasaro ka ino gupai nga Yekova na ngbarago na gako aboro wadu yo ni badona! Baibiri naya: “Rago nangba ti Yekova tipa gako aboro.” (Tam. 149:4) Ono ti kura aregbo, gu kura aboro natona kadu na bakere gberãrago na ki tona kaa bakabangiriyo nga, ‘Ya mo Yekova nzunzu na ngbarago na mi?’ Dungu kura ruru airisi Yekova kinaho du payo rogo Baibiri yo naasota asota na ngbatunga agu aberã re ti kura aregbo. (1 Sam. 1:6-10; Eyo. 29:2, 4; Tam. 51:11) Baibiri nayugo gupai ayugo ziazia nga kpakpa aboro ima rengba ka sa ngbarago ti Yekova. Ngba gini gene? Ani du wa ka ani du na idapase kuti Yesu Kristo na ki zi bapatiza. (Yo. 3:16) Rogo gi gene re, ani nayugoho gbaiga nga ani ima sa berãrani ti gaani aingapai na ki mangi kidohe fu Mbori ka manga gupai ko akpinyemuhe. (Amo. 2:38; 3:19) Yekova na ngbarago ho ani amanga agi adiandue re ni ka sonosa gaani pagume na ko. Ka ani aandu kindi kumbatayo kaa raka ringbisihe kuti gu kidohe nga ga kparatise ani amangihe, rago nangba ti Yekova na ani na ko kini bi rani nga ani nga mbembedi abakureako.—Tam. 25:14. w24.03 26 ¶1-2

Ani ima rengba ka pekafuo ga abawiriki kpiapai ni ndu ani kindi kumbatayo kaa tungusapai ka si vura du vurũ nga irangbii rugusi rani ti ni. Ani ima rengba kadu na gu kido nga Yekova nika undo rani aundo ani mangi gaani sunge tungusapai. Sidu, mo mangi kparakpee fu Yekova tipa wingbaduse gbiati tatamana na tipa ko undo ro mo hi akpakarapai. Badungu rani narungo be kaza kpotose watadu agu akpakarapai nambusa berãrani, pakpio gaani boro, gu kpakarapai nga ga aborokporo, arungosiro watadu gu kura kpakarapai. Na ngbatunga agu apai du wa ririakaza gbiati avura ima sa agi akpakarapai re si du ni kere kpakarakpakaraha tipa ka hihe. Mo kusuko ngbaduro yo fu Yekova. Mo pepa gupai fuko namanga ro kina wai mo narengbe ka pehe fu mbembedi bakureamo. Mo du na gu kido nga Yekova ‘naberã pa ro’ aberã. (Tam. 37:3, 5) Kpatagara rogo kparakpee yo nika undo rani ani “zadi pai azada rogo rungosi. (Rom. 12:12) Yekova ima ino agu akpakarapai airisiko ahihe—“ko nagia gayo kpe ku ari a.”—Tam. 145:18, 19. w23.05 5-6 ¶13-15

Ho si aida ani mangi nyanyakipa adiaberã ni, si naida ani ini gupai “Gbia akpi nyemu he” na ani ki mangipai ringbisihe kuti ni. (Ef. 5: 17) Nibi ani agu abangua rengo nga ga Baibiri nga gu nabipa gupai du tipa rani, gure nga ani nagbata ga Mbori berãpai tipa gupai re. Wa ani nikaa mangapai kuti gako abangua rengo, ani nika du na rengba ka manga wene adiaberã. Gu “gbegberẽ ko,” nga gu vurarani nga Satana, naida gupai nga ani naamanga kina agu apai nga ga zegino si ki sa gupai nga ka regbo dunga berani tipa mangasunge fu Mbori ya. (1 Yo. 5:19) Kristano ima rengba ka tona maaberã ni tipa kina marã, wirikapai, watadu sunge kuba gupai nga kaa maaberã ni tipa gu dungu agene rengbe ni ka iriso Yekova ngbaha. Ka gupai re mangi, si nika yugo gupai nga gu berãpai nga zegino ima du na maapai kurini. Gbegberẽ ahe nga agi ahe re te, ono si aidanga si du ni bambatapai rogo gaani raka yo te. w24.03 24 ¶16-17