“OFakazi BakaJehova Abavela EUSSR—Izinsuku Eziqhakazile Zingaphambili”
LESO kwakuyisihloko esikhulu sephephandaba lesiNgisi iWarsaw Voice lika-August 19, 1990, elakhishwa ePoland. Umlobi, uAnna Dubrawska, wakhuluma ngoMhlangano Wesigodi “Wolimi Oluhlanzekile” WoFakazi BakaJehova owawuseWarsaw ngoAugust 1990. Waxoxa noFakazi abavela eSoviet Union, abanye babo ababechithe iminyaka engu-15 besemajele nasezinkanjini zokuhlushwa ngenxa yezinkolelo zabo ezingokwenkolo. Kodwa manje babegcizelela izinguquko ezinhle ezenzeka ezweni lakubo.
UGrigor Goryachek, isisebenzi esingumakhi saseCrimea esakhula singuFakazi, sadingiselwa eSiberia iminyaka engu-15. Wathi: “Manje silindele ukuba kufike izikhathi ezingcono.” Omunye uFakazi, uAnton Pohanich, wathi: “Izikhathi ezingcono sezikhona. Manje isigijimi sethu sengingasisa ngokukhululekile endlini ngendlu, kuyilapho esikhathini esedlule lokhu kwakungenzeki.”
UDubrawska ucaphuna uIgor Cherny, uFakazi oneminyaka engu-17 ubudala waseCaucasus: “Iminyaka engu-70, abantu ikakhulukazi intsha, babedediselwe kude kakhulu noNkulunkulu kangangokuba manje sebefuna ukuphindela kuYe ngendlela efanayo, noma okungenani baqale nje bezwe ngaYe.”
Incwadi yesiPolish iDziennik Wieczorny (IPhepha Lasebusuku) yabika, ngaphansi kwesihloko esithi Radość braci (Injabulo Yabazalwane), ukuthi isisebenzi sasenkundleni okuthiwa iZawisza edolobheni laseBydgoszcz sathi: “Ngihlabeke umxhwele ngolimi oluhlanzekile olusetshenzisiwe nemikhuba emihle eboniswe yintsha.”
Ebhala ephephandabeni lansuku zonke lesiPolish iTrybuna ngaphansi kwesihloko esithi Głosiciele Królestwa (Abamemezeli BoMbuso), uZofia Uszynska wathi ngokuphathelene nomhlangano: “Esikhathini esiyimizuzu engu-30 nganikezwa izibiliboco kanye nekhofi izikhathi eziyishumi. Izikhathi ezinhlanu othile wayefuna ukungisukumela esihlalweni. Izinsuku ezine zilandelana abantu abangaphezu kuka-30 000 eNkundleni Yemidlalo iDziesieciolecia eWarsaw bahlanganyela emkhosini [ongokwenkolo]. Abesifazane asebezobeletha, imikhaya enezingane ezincane, asebekhulile nentsha. Omncane kunabo bonke owabhapathizwa wayeneminyaka engu-11 ubudala, omdala kunabo bonke enecishe ibe ngu-80.”
Lesihloko saqhubeka: “Abantu baseRussia abayizinkulungwane eziningana [empeleni abangaphezu kuka-16 000] beza emhlanganweni walonyaka. Ngonyaka odlule kwakunabangu-6 000 kubo. Izikhulu zasemngceleni waseRussia zadlulisa wonke amabhasi ngaphandle kwesidingo sokulinda emigqeni engamakhilomitha amaningi ubude ukuze ahlolwe. Izihambeli zomhlangano ezivela kulo lonke elaseSoviet Union zafika: zivela eVladivostok, eKhabarovsk, eVorkuta. Abanye bachitha izinsuku ezine noma ezinhlanu besesitimeleni.”
Lona leliphephandaba licaphuna uIvan M. Grevniak ethi: “Ngabona ukungalungi kulokho opapa nabapristi ababekwenza, futhi ngafuna ukwethembeka.” Ukulandisa kuyaqhubeka: “Waqaphela ukuvumelana phakathi kwamazwi nezenzo ekuziphatheni koFakazi BakaJehova.” Khona-ke uIvan uyenezela: “Ngiyambonga uNkulunkulu ngokuthi wangivumela ukuba ngifunde iqiniso.”
ITrybuna ibika ukuthi uIvan ungumdala ebandleni laseLvov, lapho “kunamabandla angu-13 kanye namakholwa angaphezu kuka-2 000. . . . ‘Kuwo wonke amaqembu enkolo kuzo zonke izindawo kubusa umoya wobuzwe. Nokho, awukho phakathi kwengikholwa nabo,’ kusho uGrevniak.”
Lobu bunye babonakala emhlanganweni wesigodi waseWarsaw woFakazi BakaJehova lapho isimiso sasinikezwa kanye kanye ngesiPolish nangesiRussia ezingxenyeni ezihlukene zenkundla. Wawungekho nhlobo umbango wobuzwe.
UZofia Uszynska wahlabeka umxhwele futhi ngokuhlela okwakudingeka ukuze kulungiselelwe indawo yokulala, ukudla, ngisho nemithi kwabantu abangaphezu kuka-35 000 ababekhona emhlanganweni. Waphetha: “Angikaze ngihlanganyele embuthwaneni womphakathi omuhle kangaka, nonobungane kangaka.”
ISztandar Młodych (Indinganiso Yentsha) yaphawula ngomsebenzi owenziwa ukuze kwenziwe inkundla ifanelekele ukwamukela izivakashi eziningi kangaka: “Njengenkonzo yomphakathi . . . abalandeli bakaJehova bakha kabusha amabhentshi, imihubhe nezindlu zangasese, bahlanza nenkundla yotshani. Banikelela izindleko zomhlangano ngemali yabo siqu. OFakazi BakaJehova balungiselela izivakashi emizini yabo engaphezu kuka-22 000, banakekela izindawo zokulala eziqashiwe zezakhamuzi zaseSoviet, futhi bazinakekela ngokwabo izidingo zezokwelapha.”
Ngokuqinisekile oFakazi BakaJehova kakade sebebona “izinsuku eziqhakazile” eMpumalanga Yurophu futhi bathandazela ukuthi ukuma kwabo abasanda kukuthola okungokomthetho emazweni anjengeRomania, iHungary, nePoland ngokushesha kudlulele eCzechoslovakia, eAlbania, eBulgaria, naseSoviet Union.—2 Thesalonika 3:1; 1 Thimothewu 2:1, 2.
[Izithombe ekhasini 23]
OFakazi baseSoviet eMhlanganweni “Wolimi Oluhlanzekile” eWarsaw, kuhlanganise nabazobhapathizwa (phezulu nasesenezelweni), isikhulumi saseRussia, isimiso, nezihambeli zomhlangano zaseSoviet zimi phambi kwamabhasi azo