Onhighemhị Eten Iiḅereghị Phọ Ayira

1. AZihova rawạ dị abuphẹ rokumu bọ nyodị koḍighi eeghe? (Miịn kẹn afoto phọ.)

ANHIẠN kụ edị nạ kaaghiraan asoman ilọ iidereghị r’iiḅakiọm? Yira olegheri ni ophagharanhaạn aḍipuru phọ aḍiphẹ phọ. Yira kotue ni oteẹny aZihova Enhaạn phọ esi iiḅereghị. AZihova ungọ ni iyira eepoogh oḍighi iduọn phọ. Odị rawạ mọ ogbor ghan ooḅereghị. ABaibul phọ aḅẹm mọ, “ke/soph ghan mem ooḅereghị.” (1 Tẹs. 5:17) Yira kotue ni oteẹny nyodị torobọ amem esi iiḅereghị opuru iiḅakiọm dị egbolhomaam oomo apakirị aghuḍum mọ ayira. (Prov. 3:5, 6) Idiphọ Enhaạn inmo, aZihova o/ghol onhụ amem dị yira kooḅereghị ghan, kuolọ odị rawạ mọ yira ku/soph ghan mem ooḅereghị.

2. Yira kooḅeghiọn eeghe siẹn emhuoghaạph phọ ephẹn phọ?

² Yira okạr kụ rosereghiạn aZihova esi eepoogh phọ odị ungọ bọ iyira oḅaanhaạn ghan odị esi iiḅereghị. Kuolọ ghalhamọ r’iduọn phọ ni bịn, reḍighi ghan ni ipaanhaạn owạ amem ooḅereghị. Kụ eeni kẹn kemoghi ni mọ yira onhighemhị iiḅereghị phọ ayira. Yira okạr rosereghiạn iromhoghiom ḅilhẹ r’iiḅakiọm ilọ iiḅereghị phọ edi bọ siphẹ ikpo onhụ phọ Enhaạn. Siẹn emhuoghaạph phọ ephẹn phọ, yira kooḅeghiọn idị yira kotuughaạny Zizọs omhiịn mọ yira omiteom ghan ni mem ooḅereghị. Yira koḅilhẹ omiịn idị yira kotue onighemhị iiḅereghị phọ ayira esi ooḅeghiọn oogh ikpanhạ arumhuoghaạph iiḅereghị.

AZIZỌS AMITEOM GHAN NI MEM OOḄEREGHỊ

3. Eeghe kụ edị aZizọs alhegheri ilọ iiḅereghị?

³ AZizọs alhegheri ni mọ aZihova amaghamhị ni maạr iiḅereghị. Kụ odị agbi bọ oru isiẹn ade phọ, odị amhiịn ghan ni dị Odẹ phọ odị aphagharanhaạn ghan iiḅereghị arebenhẹ phọ odị okpẹ bọ oḍuom olhoghi phọ. Esi omaạm, aZizọs arọl li oogaạny Odẹ phọ odị mem mọ odị aphagharanhaạn bọ imạ ilọm mọ aHannah, Devid, Ilaija, ḅilhẹ r’abunhọn. (1 Sam. 1:10, 11, 20; 1 Ki. 19:4-6; Ps. 32:5) Pọ kụ iyaạr phọ aZizọs atughemhị bọ butelhedom mọ odị mọ ogbor ghan ooḅereghị r’okuphom owol!—Mat. 7:7-11.

4. Iiḅereghị phọ aZizọs itughemhị iyira eeghe?

⁴ Dị eego esi iiḅereghị phọ odị, aZizọs aphighi ni eḍeenhaan dị abutelhedom mọ odị kodaphạn. Siphẹ oomo arukumuan phọ odị, aZizọs o/gbạ ghan mem ooḅereghị. Odị amiteom ghan ni mem aaḅereghị ghalhamọ r’iduọn awe u/ngọ ghan bọ nyodị eepoogh. (Mạk 6:31, 45, 46) Odị aḅon ghan ni aḅetenhu esoph aḍiroọr pidị ogina odị atue aaḅereghị. (Mạk 1:35) Eniin amem nuụn, odị aaḅereghị ni oomo aḍughul phọ orue osopha osopha dị amhạn maạr iboom. (Luk 6:12, 13) AZizọs aaḅereghị ni ikikamem ḍughul phọ aḍiphẹ eḅaạl kokiigh bọ nyodị, kụ agbon omhadạn eekunha apakirị oḍighi phọ odị akpạr bọ apu.—Mat. 26:39, 42, 44.

5. Ika kụ idị yira kotue otuughaạny Zizọs mem dị yira rooḅereghị?

⁵ Eḍeenhaan phọ aZizọs itughemhị iyira mọ ghalhamọ yira u/moọgh ni eepoogh, omiteom ghan ni mem ooḅereghị. Idiphọ aZizọs, ewạ ni mọ oseenhaan ghan mem dị yira kooḅereghị—eeni eḅon aḍiroọr obobọ ogbo aḍughul. Yira oḍighi iduọn phọ, pọ yira roḍeenhaan ghan aZihova mọ yira osereghiạn ni ookiạ inmo phọ iphẹn phọ. Onyọ umaranhi dị oghol mọ Lin aghaạph ni idị odị alhoghoma eḅẹl amem mọ odị atuughạ bọ ilọ emạ eepoogh iiḅereghị phọ. Odị aḅẹm mọ: “Mem mọ mị atuughạ bọ mọ mị katue ni aaḅereghị aZihova torobọ amem dị iḅeraạn imhị, iḍighi ni idị mị amhiịn nyodị idiphọ ogbogh oyaghirị amhị. Kụ inyu imhị kẹn onhighemhị iiḅereghị phọ amhị.” Dị iikia i/lo, ibadị ayira rologhoma aani ghan ni igina phọ. Ooḅeghiọn oogh ikpanhạ araraạr dị yira kotue oḅarạm siphẹ iiḅereghị phọ ayira.

OOGH IKPANHẠ ARARAẠR OLHOGHỌM GHAN SIPHẸ IIḄEREGHỊ PHỌ AYIRA

6. Odaphạn Ogananami 4:10, 11, aZihova akpeanhaạn osighẹ eeghe?

⁶ Boom aZihova. Esi ookiạ uḍien, otelhedom mọ aJọn amhiịn ni 24 ikumor awe epẹ asikẹ phọ dị rooseeny ghan aZihova. Bidị uboom ghan Enhaạn, kụ oḅẹm ghan mọ odị akpeanhaạn ni osighẹ “eghuan r’igbogh r’iikpọ.” (Bạl Ogananami 4:10, 11.) Aruukpaạny phọ okpẹ bọ oḍuomolhoghi phọ omoọgh kẹn ni ibadị ariphigh otuạn ooseeny r’oghuenhi aZihova. Bidị odi ghan epẹ k’akẹ phọ r’odị kụ mokạr olegheri nyodị agey. Bidị romiịn ghan raagharạ phọ odị esi araraạr phọ odị raḍighi bọ. Renyu ghan ni bidị oboom odị mem dị bidị omhiịn iiḍighi phọ odị.—Job 38:4-7.

7. Eeghe kụ araraạr otuạn oboom aZihova?

⁷ Yira phọ kẹn kowạ ni oboom aZihova siphẹ iiḅereghị phọ ayira, kụ oghaạph ilọ araraạr pho yira ophomhoghiạn bọ oḅilhẹ osereghiạn ilọ odị. Iduọn nạ rabạl bọ kaḅilhẹ atuughạ Baibul phọ, kparaghạ ni olhọgh elhegh imạ araagharạ phọ aZihova raḍeenhaan ghan bọ dị nạ r’aloor akạr asereghiạn. (Job 37:23; Rom. 11:33) Kụ aḅenhị aZihova idị nạ alhoghoma ilọ araagharạ phọ ipẹ phọ. Yira kotue ni oḅilhẹ okol emhụ ipẹ aZihova rulhoghonhaạn ghan bọ iyira r’abumor r’abumaranhi phọ ayira ḍighaạgh oboom nyodị. Odị ra/bilhẹ ghan ophogh r’ooko ayira.—1 Sam. 1:27; 2:1, 2.

8. Eeghe kụ iniin ariphigh dị yira omhoọgh otuạn osẹph aZihova? (1 Tesalonikạ 5:18)

⁸ Sẹph aZihova. Yira omoọgh ni ibadị ariphigh otuạn oḅenhị aZihova mọ maḍighi siphẹ iiḅereghị phọ ayira. (Bạl 1 Tesalonikạ 5:18.) Yira kotue ni osẹph nyodị esi imạ araraạr phọ yira omhoọgh bọ, idị eḍighi bọ torobọ iyaạr dị yira omhoọgh odị kungọ iyira. (Jems. 1:17) Esi omaạm, yira kotue ni okol enhighẹ ade phọ ḅilhẹ r’imạ araraạr phọ odị alhẹm bọ osẹph nyodị. Yira kotue kẹn ni okol emhụ aghuḍum mọ ayira, eghunotu phọ ayira, righirị ayira, ḅilhẹ r’oḍuom olhoghi phọ ayira osẹph nyodị. Ḅilhẹ kẹn yira rosẹph ghan ni aZihova loor asiya arighirị phọ ayira r’odị.

9. Uḍighi ika kụ ewạ bọ mọ osẹph ghan aZihova?

⁹ Kewạ ni dị yira kolọgh ikuph dị egbatanhaạn ootughiạn ilọ ariphigh phọ yira r’aloor omhoọgh bọ osẹph aZihova. Yira odi aḅirinhi dị ibadị u/legheri iiḅi. Awe rogbon ghan ilọ bidị rowạ kparipẹ r’osereghiạn ipẹ bidị momhoọgh bọ. Eḍighi maạr dị yira momhiigh romoọgh eegharạ phọ epẹ phọ, pọ iiḅereghị phọ ayira kedighi ghan ilọm bịn. Omhiịn mọ ipẹ phọ i/mite, pọ kewạ mọ yira oghị ghisigh ozụph kụ oḅilhẹ oḍeenhaan ghan osereghiạn ilọ araraạr phọ aZihova muḍighinhaan bọ iyira.—Luk 6:45.

10. Ika kụ edị oḍeenhaan ghan osereghiạn elhoghonhaạn ḍighaạgh oniin onyọ umaranhi okparạm? (Miịn kẹn afoto phọ.)

¹⁰ Eegharạ osereghiạn rilhoghonhaạn ghan iyira ḍighaạgh okparạm aḍikparamhinheẹn. Oobẹghiọn eḍeenhaan aKyung-sook, emite bọ Watchtower aJanuary 15, 2015. Umhiịn loor phọ odị kansạ dị malhe muupuph phọ odị iboom. Odị aḅẹm mọ: “e/moon phọ ephẹn phọ idughe ni imhị iboom. Mị ulhoghoma mọ oomo ilọ amhị memhunheen, kụ oḅio amhị amhiigh okaph.” Eeghe kụ ilhoghonhaạn nyodị ḍighaạgh okparạm? Odị aḅẹm mọ torobọ aḍughul kụ mị agbi omhinhạ, mị usiịny ghan ni epẹ ophoghoghoony otu anyụ phọ amhị aaḅereghị ghan amiteom ilọ oogh odọ araraạr dị aZihova muḍighinhaan imhị ḍio phọ. Iphẹn phọ ingọ ni nyodị eephọ olhoghi kụ enyu nyodị oghaạph omiteom ilọ ephomhoghiạn phọ odị esi aZihova. Odị akạr amhiịn ipẹ aZihova rapogh ghan bọ rebenhẹ phọ odị okpẹ bọ oḍuom olhoghi mem dị osoman igbagarạ asidọl, kụ odị aḅilhẹ amhiịn mọ aḍisẹph aZihova kụ ipu iiḅaghamhị dị yira romoọgh ghan. Idiphọ aKyung-sook, yira omoọgh ni ibadị araraạr otuạn osẹph aZihova, ghalhamọ yira osoman ni iiḅaghamhị. Osereghiạn ghan odị esi iiḅereghị kilhoghonhaạn iyira ḍighaạgh orue okparạm kụ ophamhanhạm eephọ olhoghi r’ibo.

11. Uḍighi ika kụ abumatuạn phọ aZizọs omhoghi bọ akpọ oḅio mem mọ aZizọs magheel bọ k’akẹ?

¹¹ Lọm aZihova akpọ oḅio oghaaphọm iiḅi iinhaghạn phọ. Kụ aZizọs agbi bọ ogheel k’akẹ, odị aghiọm ni olhoghi bumatuạn phọ odị ilọ oḍighi phọ odị angọ bọ bidị, oghaạph ilọ odị epẹ “JeruseIem r’oomo phọ aJudia r’aSameria, kụ esiemi eekuna aḅirini phọ.” (Iiḍighi 1:8; Luk 24:46-48) Kuolọ i/sighẹ mem bịn abuḍiemiom abuọ aJu phọ osiph butelhedom mọ Pita r’aJọn, osighẹ bidị oghimọm siphẹ otu iiruẹn abuọ aJu phọ. Kụ ophụr bidị rurụ mọ ku/kaạph mun roghaạph ilọ aḍien phọ aZizọs, kụ oḅilhẹ opaarọgh bidị. (Iiḍighi 4:18, 21) APita r’aJọn umhegheron ika?

12. Odaphạn Iiḍighi 4:29, 31, abumatuạn phọ uḍighi eeghe?

¹² Mem mọ abuḍiemhiom abuo aJu phọ opaarọgh bọ bumatuạn phọ, aPita r’aJọn uḅẹm mọ: “Siphẹ onaghanạn anyina r’onaghanạn Enaạn, ighẹn kụ ikpeanaạn oḍighi ghisigh Enaạn. Kụ olọ, yoor ko/biIẹ oghaạph araraạr phọ ipẹ yoor momiịn bọ oḅiIẹ onaghạn.” (Iiḍighi 4:19, 20) Mem mọ owilhẹ bọ Pita r’aJọn, abumatuạn phọ ulhọm ni aZihova olhoghonhaạn abidị ḍighaạgh oḍighi ogbi phọ odị. Bidị uḅereghị mọ: Ngọ “rebenẹ phọ anạ akpọ ologhi oghaaphọm ghan oghaạph phọ anạ.” Kụ aZihova anhaghạn ni imạ iiḅereghị phọ ipẹ phọ.—Bạl Iiḍighi 4:29, 31.

13. Eḍeenhaan phọ aJin-hyuk itughemhị iyira eeghe?

¹³ Yira kotue ni otuughaạny butelhedom mọ eḍighi iyaạr dị yira oghị ghisigh oghaạph ghan ilọ Omhạr phọ ghalhamọ r’amem dị abuọ itooghị phọ oḅẹm mọ ku/kaạph mum. Ooḅeghiọn eḍeenhaan aJin-hyuk onyọ umor dị olhọgh ikoli loor iduọn odị u/meera bọ uḍighi onyọ eghạm. Siphẹ otu ikoli phọ, ungọ nyodị oḍighi odiighi ghan ariiḍien r’inhọn araraạr bunhọn abuọ ikoli phọ, kuolọ u/meera mọ odị aghaạph ghan inhọn araghaạph dị i/gbolhomaam oḍighi phọ odị, ghalhamọ r’ilọ aBaibul phọ kẹn. Kụ odị alhọm aZihova m’angọ nyodị akpọ oḅio r’amagheel osighẹ atorobọ eepoogh oghaaphọm ilọ Omhạr phọ. (Iiḍighi 5:29) Odị aḅẹm mọ: “AZihova aphagharanhaạn ni iiḅereghị phọ amhị esi ongọ amhị akpọ oḅio r’osụ-olhoghi orue osighẹ ghan oogh ikalhạ otughemhiọm abidị Baibul phọ siphẹ onhụ aḍibuo osoph ikoli phọ abidị. Kụ mị asighẹ ghan ḍughul phọ ageọm rinyạ ongọ abuọ ikoli phọ ḍieriphọ aḍio phọ.” Yira kotue ni okuphom owol mọ aZihova kulhoghonhaạn ni iyira ḍighaạgh orue oḍighi oḍighi Omhạr phọ. Idiphọ aJin-hyuk, yira kotue kẹn ni olọm aZihova akpọ oḅio r’osụ-olhoghi.

14. Eeghe kụ kilhoghonhaạn iyira ḍighaạgh mem dị yira osoman iiḅaghamhị? (Psalm 37:3, 5)

¹⁴ Lọm aZihova olhoghonhaạn aḍighaạgh orue okaran iiḅaghamhị. Ibadị ayira rokparaghạm ni e/moon ḅilhẹ r’inhọn araraạr dị reeḅaghamhị ghan dọl eborọph phọ ayira, oroph oye ephomhoghiạn ayira esi aḍuugh, iiḅaghamhị eghunotu, igbiphoghọm, r’inhọn. Igbogh areezẹgh ḅilhẹ r’araaghạm meḍighi idị ekpạr okparạm. Ḅenhị aZihova ipẹ nạ alhoghoma bọ. Ḅenhị nyodị ilọ adọl phọ anạ idiphọ nạ katue bọ aḅenhị ogbogh oyaghirị anạ. Kụ akuphom owol mọ aZihova “kalhoghonhaạn ni nyinhạ ḍighaạgh.”—Bạl Psalm 37:3, 5.

15. Ika kụ edị iiḅereghị ketue ilhoghonhaạn iyira ḍighaạgh ‘okparạm ghan iminimiịn’? Ngọ eḍeenhaan.

¹⁵ Yira ogbor ghan ooḅereghị kilhoghonhaạn iyira ḍighaạgh ‘okparạm ghan iminimiịn.’ (Rom. 12:12) AZihova alegheri ni raraạr dị arebenhẹ phọ odị rokparạm—“odị ranaghanhạn ghan ni emoghi abidị kụ kaphẹl bidị.” (Ps. 145:18, 19) Okọy eten dị mamhạn 29 asiạ dị oghol mọ Kristie, amhiịn ni mọ okạr iduọn phọ ni. Egbogh e/moon imheelhom ni nyodị dị olhoghi u/seere. Iphẹn phọ ikọm ni idị odị aḅonyonhu azuan. Kụ esighẹ rekị, kụ odị aru alhegheri mọ onhiin odị amoọgh ezẹgh dị kekọm ḍuugh odị. AKristie aḅẹm mọ: “Mị uuḅereghị ni egbạ gbạ amem alhọm ghan aZihova inyaạm torobọ aḍio. Mị ukparaghạ ni ophamhanhạm egey edeọm ilọ araraạr aruwaloor idiphọ oghị ghan ituughạ r’omhoọgh ghan ituughạ ogina amhị.” Kụ alhoghọm mọ: “Iiḅereghị ilhoghonhaạn ni imhị ḍighaạgh okparạm. Mị ulhegheri ni mọ odị imhị u/wilhẹ r’amem, kụ ipẹ phọ iphoomhị ni imhị. Kụ ghalhamọ r’iduọn e/moon phọ amhị i/si bọ eekunha eginha amem, aZihova anhaghạn ni iiḅereghị phọ amhị kụ ungọ imhị eephọ olhoghi.” R’amem r’amem ku/bulha mọ aZihova “amaạr ri otophorọn ghan aweye aruukuan omiteom esi odẹgh ophogh kirokirọ.”—2 Pit. 2:9.

16. Uḍighi ika kụ yira omhoghi bọ olhoghonhaạn aḍighaạgh aZihova orue okpạr opu odẹgh ophogh?

¹⁶ Lọm aZihova olhoghonhaạn aḍighaạgh okpạr opụ odẹgh ophogh. Idiphọ awe dị u/munughan, yira omoghi ni eenhaan ghan odẹgh ophogh oḍighi araraạr dị i/nighẹ. Kụ aSetan akị ni ghisigh raḍighi ghan idị iphẹn phọ kikparanhaạn iyira. Eniin eten dị odị rakparaghạ ghan oopụ iitughiạn phọ ayira pọ esi oozaghamiạn aloor dị u/ḅaạl. Odọ oozaghamhiạn aloor phọ opọ phọ katue ni alọgh ikarạph iitughiạn olhoghi ayira—kụ odọ iitughiạn phọ ipẹ phọ reḍighi ghan idị yira ko/ḅaạl ghisigh aZihova ḅilhẹ rekọm ghan idị oye kaḍighi igbogh ikarạph.—Mạk 7:21-23; Jems. 1:14, 15.

17. Ika kụ idị yira kotue oḍighi idị emhoọgh muḅọph r’iiḅereghị phọ ayira orue okpetenhaan odẹgh ophogh? (Miịn kẹn afoto phọ.)

¹⁷ Yira omoghi ni olhoghonhaạn aḍighaạgh aZihova orue okpạr opu odẹgh ophogh oḍighi araraạr dị i/nighẹ. AZizọs aḅarạm ni ilọm mọ iphẹn eḅẹm bọ mọ: “Ka/meera yoor omeel oḍighanaan odẹgh ophogh, uphẹI iyoor asighẹ esi ikarạph” siphẹ iiḅereghị odẹ phọ. (Mat. 6:13) AZihova rawạ ni olhoghonhaạn ayira ḍighaạgh, kuolọ ewạ ni mọ olhọm nyodị. Kụ ewạ ni kẹn dị yira koḍighi idị emhoọgh muḅọph r’iiḅereghị phọ ayira. Kewạ kẹn ni mọ oḍighi ipẹ yira kotue bọ omhiịn mọ yira u/yegherọn loor ayira u/ngọ ikarạph iitughiạn r’aḍiitughiạn kirokirọ phọ eetura bọ siẹn aḅirinhi phọ aSetan. (Ps. 97:10) Yira kotue ni omuzeḍi siphẹ olhoghi phọ ayira imạ iitughiạn, esi aạl ghan kụ oḅilhẹ otuughạ aBaibul phọ. Oghị ghan ituughạ oḅilhẹ ophinhom aani ghan abin oḍighi oghaạph iiḅi iinhaghạn phọ ketue ni ekoph iitughiạn phọ ayira. AZihova uguanhaan iyira mọ odị ka/meera mọ odẹgh ophogh dị yira ko/tue okpạr opu umheelhom iyira.—1 Kọr. 10:12, 13.

18. Dị egbolhomaam iiḅereghị, eeghe kụ edị ewạ mọ oḍighi?

¹⁸ Emoghi dị torobọ onyọ ayira kaḍighi oomo idị odị katue ophamhanhạm aḍimheerạ phọ odị siẹn igbagarạ asiḍio aruukunha phọ. Miteom ghan mem torobọ aḍio aaḅereghị aZihova k’ekpom. AZihova rawạ mọ yira ‘oḅenhị nyodị oomo iiḅaghamhị phọ ayira’ esi iiḅereghị. (Ps. 62:8) Boom aZihova aḅilhẹ asẹph ghan nyodị esi oomo araraạr phọ odị maḍighinhaan bọ nyinhạ. Lọm nyodị olhoghonhaạn aḍighaạgh oghaạph ilọ Omhạr phọ r’akpọ oḅio. Kụ aḅilhẹ alhọm nyodị olhoghonhaạn aḍighaạgh orue okparạm atorobọ iiḅaghamhị r’oghel atorobọ odẹgh ophogh dị yira omhoọgh. Ka/meera mọ oye obobọ iyaạr esophoghom nyinhạ ogbor ghan ooḅereghị aZihova. Ika nuụn kụ edị aZihova rapagharanhaạn ghan bọ iiḅereghị phọ ayira? Yira kooḅeghiọn ḍipuru phọ aḍiẹn phọ emhuoghaạph phọ etum bọ siẹn.