Moọgh Iidereghị Esi Olhegheri Mọ Nạ Aḅeraạn Ni AZihova

1. Eeghe iikia kụ edị arebenhẹ aZihova dị okpẹ oḍuomolhoghi kotue ni omoọgh?

P’EEGHE idị edụgh olhegheri mọ aZihova amoọgh ni ḍiḅeraạn aḍita awe phọ odị! ABaibul phọ aḅẹm mọ: “[AZihova] amoọgh ḍiḅeraạn awe phọ odị.” (Ps. 149:4) Toroboiperolbọ, eeni amem, loor oḅonyonhu ozuan abuniin otue ni ookia mọ, ‘AZihova amoọgh ni ḍiḅeraạn amhị ḍughụm?’ Opol arebenhẹ aZihova dị okpẹ oḍuomolhoghi dị oghaạph ilọ abidị siphẹ aBaibul phọ ulhoghoma ghan ni iniin phọ.—1 Sam. 1:6-10; Job 29:2, 4; Ps. 51:11.

2. AZihova amoọgh ḍiḅeraạn abughẹn awe?

² ABaibul phọ aḍeenhaan ni eten dị eegholhaan mọ awe dị u/munughan kotue ni oḍighi idị keḅeraạn aZihova. Ika? Yira omoọgh oḍeenhaan omheeraam esi aZizọs Kraist kụ oḍiiny amuụm. (Jọn 3:16) Idiphọ kụ edị yira koḍeenhaan esi ogbo mọ yira mokiton esi ikarạph phọ ayira oḅilhẹ oguanhaan Enhaạn oḍighi ogbi phọ odị. (Iiḍ. 2:38; 3:19) Olhoghi aZihova raḅaạl ghan agey mem dị yira ogbariọn radạ phọ ipẹ phọ omhoọgh amasian r’odị. Eḍighi maạr dị yira oghiọm ni ghisigh roḍighi oomo ilọ yira kotue okumu odị, pọ aZihova amoọgh ni ḍiḅeraạn ayira kụ kumhiịn ni iyira idiphọ arighirị odị.—Ps. 25:14.

3. Ighẹn iraạr asipuru kụ edị yira kooḅeghiọn?

³ Kuolọ, eeghe kụ iḍighi kụ eeni amem abuniin rologhoma ghan bọ mọ bunọ u/ḅeraạn Enhaạn? Ika kụ edị aZihova ruḍeenhaan ghan iyira ḍiḅeraạn phọ odị? Ḅilhẹ ika kụ edị onyọ aKristẹn katue akparamhị okuphom owol phọ odị mọ odị aḅeraạn ni Enhaạn?

IYAẠR PHỌ KETUE BỌ EḌIGHI IDỊ ABUNIIN KOLOGHOMA MỌ BUNỌ U/ḄERAẠN ENHAẠN

4-5. Eeghe kụ edị yira kotue okuphom owol ghalhamọ yira ulhoghoma mọ yira u/moọgh maạr oḍighinhom?

⁴ K’eghoroghọr opol ayira ologhoma mọ bunọ u/moọgh maạr oḍighinhom. (Ps. 88:15) Onyọ umor dị oghol mọ Adrián aḅẹm mọ: “Mị k”olhoghoma ghan mọ mị amoọgh ni maạr oḍighinhom. Mị aatughiạn ni mọ idiphọ obumoọny, mị uuḅereghị ghan mọ oomo abuọ eghunotu phọ amhị oḍigh ni Paradais, kuolọ mị u/kuphom owol mọ mị akpeanhaạn ni oḍigh aani.” ATony, onyọ umor dị amite eghunotu dị u/ḍighi Bugbaanhaạn aZihova, aḅẹm mọ: “Odẹ r’onhiin amhị ko”sighẹ ghan onhụ abidị uḅeniọm imhị mọ bidị uphomhoghiạn ni imhị obobọ rubagaam ni imhị. Iphẹn phọ iḍighị idị mị alhoghoma mọ mị ka/tue ni bịn aḍighi idị keḅeraạn bidị.”

⁵ Eḍighi maạr dị yira rologhoma ghan eeni amem mọ yira u/moọgh maạr oḍighinhom, ootughiạn ni mọ aZihova r’aloor kụ uḍur iyira alhoghomạ loor. (Jọn 6:44) Odị amiịn ni imạ araagharạ dị yira omhoọgh dị eeni yira r’aloor ko/mhiịn, ḅilhẹ odị kụ alhegheri ekpom mọ ayira. (1 Sam. 16:7; 2 Chron. 6:30) Esi iduọn phọ, mem dị odị aḅẹm bọ mọ yira omạn ni maạr esi odị yira kotue ni omeeraam nyodị.—1 Jọn 3:19, 20.

6. Otelhedom mọ aPọl alhoghoma ika ilọ ikarạph phọ odị aḍighi bọ igbaany?

⁶ Kụ yira ogbi bọ otuughạ igey phọ, abuniin ayira uḍighi ni raraạr dị eeni k’anyiidiphọ regurọgh ni ilhoghi ayira. (1 Pit. 4:3) Ghalhamọ aKristẹn dị okpẹ oḍuom olhoghi bịn robian ghan ni inyuughiom oḍighi ikarạph. Nạ aloghoma mọ aZihova nyinhạ ka/tue asạr abilhenhaạn ḍughụm? Eḍighi idiphọ, pọ ketue ni eedereghị nyinhạ olhegheri mọ abunhọn arebenhẹ aZihova dị okpẹ oḍuom olhoghi m’eenhan ghan ni odọ iitughiạn phọ ipẹ phọ. Esi omaạm, otelhedom mọ Pọl alhoghoma mọ onọ aḍigh aagiạ mem dị odị aatughiạn ilọ asipiomạn phọ odị. (Rom 7:24) Okạr agey, aPọl makiton ni esi ikarạph phọ odị aḍiiny muụm. Ghalhamọ r’iduọn phọ ni, odị aghaạph ilọ aloor odị mọ “mị kụ uḍigh aagiạ aḅarạm oḅịph siphẹ abutelhedom mọ” ḅilhẹ mọ “mị kụ uloghorị apu oomo” abuḍighinom ikarạph.—1 Kọr. 15:9; 1 Tim. 1:15.

7. Eeghe kụ edị ekpẹ mọ olhọgh elhegh ilọ ikarạph dị yira oḍighi igbaany?

⁷ Odẹ k’akẹ phọ ayira aguanhaan osạr owilhenhaạn ayira eḍighi maạr dị yira okiton. (Ps. 86:5) Esi iduọn phọ, eḍighi maạr dị yira okạr ri olhoghoma mọ ipẹ yira oḍighi bọ i/nighẹ pọ yira kotue ni okuphom owol mọ ipẹ aZihova maghaạph bọ inẹ ni—mọ odị masạr ri uwilhenhaạn iyira.—Kọl. 2:13.

8-9. Ika kụ edị yira kotue okpạr opu olhoghoma ghan mọ yira ko/tue ni bịn oḍighi raraạr osiemhi esi dị keḅeraạn aZihova?

⁸ Oomo ayira rowạ ni oḍighi oomo ilọ yira kotue okumu aZihova. Toroboiperolbọ, abuniin ayira rologhoma ghan mọ bunọ ko/tue ni bịn oḍighi raraạr osiemhi esi dị bidị koḅeraạn aZihova. Onyọ umaranhi dị oghol mọ Amanda aḅẹm mọ: “Siphẹ olhoghi amhị, mị uutughiạn ghan mọ orue ongọ aZihova ipẹ ekạr bọ enhighẹ pọ oomo amem mị kaḍighi ghan iboom araraạr. Esi iduọn phọ, mị ukparaghạ ghan oḍighi araraạr dị ipu imhị. Kụ mem dị mị u/tue, bịn mị masighẹ mọ mị mabi aZihova iduọn mị mabi bọ loor phọ amhị.”

⁹ Ika kụ edị yira kotue okpạr opu olhoghoma ghan mọ yira ko/tue ni bịn oḍighi raraạr osiemhi esi dị keḅeraạn aZihova? Ka/bulha mọ aZihova aḍighi oye dị ayoghoyoghọ. Odị ru/kpạgh ghan iyira oḍighi araraạr dị inyaạm ayira i/si. Odị rasereghiạn ghan oomo ilọ yira oḍighi odaphạn inyaạm mọ ayira. Oḅarạm isiphẹ, gbirima ilọ areḍeenhaan awe siphẹ aBaibul phọ dị okumu aZihova r’oomo ekpom. Tuutughiạn Pọl. Odị akumuan ni r’ikpukpụ esi ibadị asiạ, arelhe simuonịr itobi oghiighị arikpisi kirokirọ ogbạ ikpo onhụ phọ ḅilhẹ r’ophighi ibadị arookpomhoghan. Kuolọ mem mọ adọl phọ odị enmia bọ kụ u/tue mun bọ uḍighi oḍighi iphelhegbeel phọ ipẹ odị aḍighi ghan bọ, aZihova aghel li nyodị ḍughụm? Eeye. Odị aghiọm ni ghisigh aḍighi oomo ilọ odị katue, kụ aZihova asẹph ni nyodị. (Iiḍ. 28:30, 31) Iniin phọ kẹn ni kụ edị arukumuan phọ yira rongọ bọ aZihova ketue ni enmia eeni amem. Kuolọ iyaạr dị emhạn maạr esi odị pọ ariphigh phọ yira otuạn bọ kụ rokumuan. Uguạ, ooḅeghiọn iniin areten dị aZihova raḍeenhaan ghan mọ yira oḅeraạn ni nyodị.

IKA KỤ EDỊ AZIHOVA RAḌEENHAAN GHAN ḌIḄERAẠN PHỌ ODỊ?

10. Ika kụ edị yira kotue “onaghạn” dị aZihova ruḅenhị iyira mọ odị uphomoghiạn ni iyira? (Jọn 16:27)

¹⁰ Ungọ iyira Baibul phọ. Reḅeraạn ghan ni aZihova oḍeenhaan osereghiạn buphẹ odị aphomhoghiạn bọ. Igẹ Iigbia phọ ekaạph ni ilọ iyạl amem dị Odị aḅenhị Zizọs mọ Onọ apomoghiạn nyodị, ḅilhẹ mọ odị Oọny dị aḅeraạn Nyinhọ. (Mat. 3:17; 17:5) Keḅeraạn ni nyinhạ onhaghạn dị aZihova kaḅenhị nyinhạ mọ nạ aḅeraạn ni nyodị ḍughụm? AZihova ra/tọl ghan epẹ k’akẹ kuḅaanhaạn iyira, kuolọ odị ruḅaanhaạn ghan iyira dị eego esi Baibul phọ. Mem dị yira aạl ipẹ aZizọs aghaạph bọ siphẹ igẹ aGospel phọ, yira kotue ni onaghạn dị aZihova raḅẹm ghan mọ odị uphomhoghiạn iyira. (Bạl Jọn 16:27.) AZizọs akạr kụ aaghironhaan eegharạ Odẹ phọ odị. Esi iduọn phọ, mem dị yira aạl idị aZizọs aghaạph mọ abutelhedom mọ odị okpẹ bọ oḍuom olhoghi phọ oḅeraạn ni nyodị ghalhamọ r’iduọn bidị u/munughan bọ, yira kotue ni osighẹ mọ aZihova ruḅenhị ghan iyira ikpo-onhụ phọ ipẹ phọ.—Jọn 15:9, 15.

11. Uḍighi ika kụ osoman odẹgh ophogh re/mạ ghan bọ mọ aZihova o/mhoọgh mun ḍiberaạn ayira? (Jems 1:12)

¹¹ Rungo ghan iyira raraạr phọ yira omhoghi bọ. AZihova rawa ni r’ikpukpụ olhoghonhaạn ayira ḍighaạgh. Esi omaạm, odị rungọ ghan iyira raraạr dị yira omhoghi orolhọm. Kuolọ, eeni amem, aZihova atue ni angọ ogẹl m’osoman ḍikparaminheẹn, idiphọ emitenhaan bọ oye elhiom eḍighinhom iyaạr phọ Job. (Job 1:8-11) Mem dị yira osoman odẹgh ophogh re/mạ ghan mọ yira u/ḅeraạn mun aZihova. Kparipẹ ghụn ringọ ghan iyira eepoogh oḍeenhaan esi dị yira ophomhoghiạn Enhaạn osiemhi ḅilhẹ r’ipẹ yira oḍuom bọ nyodị olhoghi. (Bạl Jems 1:12.) Yira komiịn ni mọ r’ephomhoghiạn odị abakị ni aḅilhẹ rulhoghonhaạn iyira ḍighaạgh okparạm.

12. Eeghe kụ edị yira kotue otuughạ esi ipẹ emitenhaan bọ Dmitrii?

¹² Oobẹghiọn ilọ onyọ umor epẹ Asia dị oghol mọ Dmitrii. Odị o/mhoọgh mun oḍighi kụ o/rue omhiịn onhọn esi ibadị arunwanyụ. Esi iduọn phọ, odị asopha obughẹ arukumuan phọ odị epẹ erugh phọ oḍeenhaan mọ odị akpasị ni oomo emooph odị esi aZihova. Ibadị arunwanyụ iru ni eten, kụ odị oḍighi phọ o/mhoọgh ni. Kụ amheel eboom e/moon dị tutụ u/tue ghan mun uḅetenhu emhinhạ. Odị amhiigh ootughiạn mọ odị o/mhoọgh mun maạr oḍighinhom idiphọ olom ḅilhẹ r’odẹ, kụ amhiigh ookia mughumọ odị aḅeraạn niiniịn aZihova. Kụ dulhe aḍiniin aḍio, onyanhị odị agẹ ni ikpo-onhụ phọ edi bọ Isaiah 30:15 olhoghi aḍinyạ, eḅẹm bọ mọ: “Nyinha kemoọgh inyaạm esi ophoomhị ghan aloor kụ oḍeenhaan oḍuomolhoghi.” Onyanhị phọ asighẹ aruom nyodị pạ emhinạ phọ kụ aḅẹm mọ, “Odẹ, mem lọ olhoghi anạ u/ḅaạl, nạ atue ni aatughiạn ghan esi aBaibul phọ ephẹn phọ.” ADmitrii alhọgh ni elhegh mọ aZihova kụ aḍighi bọ idị eghunotu phọ odị oghiọm bọ ni ghisigh omhoọgh egey eḍien olhe, iinmenian ḅilhẹ r’otu orọl. Odị aḅẹm mọ “iyaạr dị ewạ mọ mị uḍighi pọ ophoomhị aloor kụ oghiọm aghisigh oḍuomolhoghi Enhaạn phọ amhị.” Eḍighi maạr dị nạ asoman aani odọ odẹgh ophogh phọ opọ phọ, pọ nạ katue ni aḍuom olhoghi mọ aZihova amoọgh ni ogbolhomaam anạ kụ kalhoghonhaạn ni nyinhạ ḍighaạgh okparạm.

13. Abuọ anhiạn kụ edị aZihova katue aḍighinhom oḍeenhaan ayira ḍiḅeraạn phọ odị, kụ ika?

¹³ Odị ungọ iyira bumor r’abumaranhi. AZihova rasighẹ ghan bumor r’abumaranhi phọ ayira kụ kaḍighinhom oḍeenhaan ayira mọ odị amoọgh ni ḍiḅeraạn ayira. Esi omaạm, odị atue ni anyu bidị oḅaanhaạn ayira ikpo-onhụ okparamiọm ayira mem dị ekạr ekpẹ. Iphẹn phọ imitenhaan ni onyọ umaranhi epẹ Asia mem dị odị asoman igbogh iiḅaghamhị. Odị o/mhoọgh mun oḍighi kụ aḅilhẹ amheel egbogh e/moon. Opumom ipạ, olom mọ aḍighi igbogh ikarạph kụ oseere idiphọ okumor oye. Odị aḅẹm mọ “Mị u/tue unaghanhạn iyaạr phọ eḍighi bọ kụ iphẹn phọ remite bọ, mị ugbiom mọ eeni siẹn mị mapiomạn kụ mị u/ḅeraạn mun aZihova.” Umaranhi phọ ayira alhọm ni aZihova mọ aḍeenhaan mọ Odị akiọm ni ghisigh apomoghiạn nyinhọ. AZihova aḍighi iphẹn phọ ika? Umaranhi phọ aḅẹm mọ, “Ikumor awe ookpomhoghan phọ ughaaphạn ni imhị kụ ungọ imhị okuphom owol mọ aZihova uphomhoghiạn ni imhị.” Onyebel roten, odị aḅilhẹ ni apuru aZihova olhoghonhaạn aḍighaạgh. Kụ odị aḅẹm mọ, “Ḍio ḍio phọ aḍiphẹ phọ bịn uruom imhị ḍinyạ dị aḍita abumor r’abumaranhi siphẹ ookpomhoghan phọ ogẹ. Kụ iduọn mị rabạl bọ ikpo-onhụ okparamhị phọ abidị, mị ulhoghoma ni mọ aZihova munhaghanhạn imhị.” Ii, ibadị amem aZihova ruḍeenhaan ghan iyira ḍiḅeraạn phọ odị dị eego esi imạ ikpo-onhụ abunhọn.—Ps. 10:17.

14. Eghẹn kụ enhọn eten dị aZihova raḍeenhaan ghan mọ odị amoọgh ni ḍiḅeraạn ayira?

¹⁴ AZihova aḅilhẹ ruḍeenhaan ghan iyira ḍiḅeraạn phọ odị esi osighẹ abuẹn r’ayira oḅọph bọ omheeraam mọ oḍighinhom, ongoọm ayira oromha mem dị yira okạr omhoghi. Esi omaạm, mem oḅẹl okuron asiạ phọ aZihova asighẹ otelhedom mọ Pọl kụ ageọm 14 arinyạ aghiọm buphẹ r’odị oḅọph bọ omheeraam mọ. Arinyạ phọ ipẹ phọ iphamhanhạm oromha dị agbagarạ kuolọ ongọ r’ephomhoghiạn. Uḍighi ika kụ aZihova aphum bọ Pọl ogẹ oromha phọ opọ phọ? AZihova aḍighi ogey Odẹ, kụ odị raliọm ghan nmụny “odị lọ odị raabagaam.” (Prov. 3:11, 12) Esi iduọn phọ, mem lọ osighẹ Baibul ungoọm iyira oromha, i/mạ mọ aZihova ughaghạm iyira olhoghi. Kparipẹ ghụn, eḍeenhaan mọ odị amoọgh ni ḍiḅeraạn ayira. (Hib. 12:6) Ighẹn inhọn araraạr kụ reḍeenhaan ghan mọ aZihova amoọgh ni ḍiḅeraạn ayira?

INHỌN ARARAẠR DỊ REḌEENHAAN GHAN MỌ AZIHOVA AMOỌGH NI ḌIḄERAẠN AYIRA

15. Abuọ anhiạn kụ edị Enhaạn rangọ ghan bọ uwaloor iigbia phọ odị, kụ uḍighi ika kụ iphẹn phọ kingọ bọ iyira okuphom owol?

¹⁵ AZihova rangọ ghan uwaloor iigbia phọ odị buphẹ roḍighi bọ idị eḅeraạn nyodị. (Mat. 12:18) Yira otue ni opuruan loor mọ, ‘Mị marue ni raḍeenhaan ghan iniin araagharạ phọ eḍighi bọ pakirị eemhumha uwaloor iigbia phọ Enhaạn siẹn aghuḍum mọ amhị ḍughụm?’ Nạ raḍeenhaan ni bunhọn okparạm nyiidiphọ kapu mem mọ nạ k”olhegheri bọ aZihova ḍughụm? Okạr oghaạph, iduọn nạ raḍeenhaan bọ raagharạ phọ eḍighi bọ pakirị eemhumha uwaloor iigbia phọ kabughẹ kụ edị keganana esi anạ mọ nạ aḅeraạn ni aZihova!—Miịn igbe phọ ‘Eemuma Uwaloor Iigbia Phọ Pọ . . . ’

16. Abuọ anhiạn kụ edị aZihova asighẹ raḍighinhom ogbeelhom iiḅi iinhaghạn phọ, kụ iphẹn phọ etir nyinhạ ika? (1 Tesalonikạ 2:4)

¹⁶ AZihova aḅọgh iiḅi iinhaghạn phọ angọ buphẹ eḍighinhom iyaạr phọ abidị eḅeraạn bọ nyodị. (Bạl 1 Tesalonikạ 2:4.) Lọgh elhegh idị oniin onyọ umaranhi dị oghol mọ aJocelyn amhooghọm suọ ogbeelhom iiḅi iinhaghạn phọ oḅenhị abunhọn. Ḍiniin aḍio odị asumanhạm r’abeeph olhoghi. Odị aḅẹm mọ “r’inyaạm mị u/moọgh kụ mị alhoghoma mọ mị u/moọgh maạr oḍighinhom. Kuolọ mị rakọy eten, kụ aḍiphẹ phọ aḍio dị mị aseerean omite ghan epẹ erugh phọ. Esi iduọn phọ, mị uuḅereghị ni bịn amite epẹ erugh phọ.” Ḍiroọr phọ aḍiphẹ phọ aJocelyn azuan aMary, imạ anhịr dị amheera otuughạ aBaibul phọ. Iyạl ikpo arunwanyụ reten, aMary aḅenhị aJocelyn mọ eḅẹl aḍio phọ odị akar bọ eghuugh odị m’onọ raaḅereghị ghan mọ Enhaạn alhoghonhaạn nyinhọ ḍighaạgh. Mem dị aJocelyn aatughiạn ilọ iphẹn emite bọ, odị aḅẹm mọ, “Mị ulhoghoma mudị aZihova ruḅenhị ghan imhị mọ, ‘Nạ uḅeraạn ni imhị.’” Okạr agey, k/oomo awe kụ komegheron agey oghaạph iiḅi iinhaghạn phọ. Kuolọ yira otue ni okuphom owol mọ reḅaạl ghan ni olhoghi aZihova mem dị yira oḍighi oomo ilọ yira kotue ogbeelhom iiḅi iinhaghạn phọ oḅenhị abunhọn.

17. Nạ atuughạ eeghe esi ipẹ aVicky aghaạph bọ ilọ ekiạ etagharạn phọ? (Psalm 5:12)

¹⁷ AZihova rangọ ghan suọ ekiạ etagharạn phọ buphẹ roḍighi bọ idị eḅeraạn nyodị. (1 Tim. 2:5, 6) Kuolọ kokaạph ika eḍighi maạr dị yira u/loghoma mọ yira oḅeraạn ni aZihova, ghalhamọ r’iduọn yira omhoọgh bọ ni omheeraam esi ekiạ etagharạn phọ oḅilhẹ oḍiiny muụm? Tuutughiạn mọ yira ko/tue oḍuom olhoghi ipẹ yira olhoghoma bọ, kuolọ yira kotue ni oḍuomolhoghi aZihova. Odị ramiịn ghan buphẹ omhoọgh bọ omheeraam oghị esi ekiạ etagharạn phọ idiphọ awe elhiom eḍighinhom iyaạr kụ aguanhaan osẹph abidị. (Bạl Psalm 5:12; Rom 3:26) Ogbirima ghan ilọ ekiạ etagharạn phọ ilhoghonhaạn ni ḍighaạgh Vicky. Odị rogbirima ilọ ekiạ etagharạn phọ ḍiniin aḍio kụ alhọgh elhegh mọ: “AZihova rakparaghạ ni k’aḍio phọ oḍeenhaan amhị mọ odị uphomhoghiạn ni imhị. Kuolọ, ekịgh mudị mị raḅenhị ghan nyodị mọ: ‘Nạ ka/tue apomoghiạn oye dị arọl iduọn amhị. Ekiạ Oọny phọ anạ i/manhạm ookpereghi ikarạph phọ amhị.’” Iduọn odị agbirima bọ ilọ inmo ekiạ etagharạn phọ, bịn odị amhiigh olhoghoma mọ aZihova apomoghiạn ni nyodị. Mem dị yira ogbirima ghan ilọ ekiạ etagharạn phọ, yira kẹn kotue ni ologhoma aani mọ aZihova uphomhoghiạn ni iyira ḅilhẹ mọ eḍighinhom iyaạr phọ ayira eḅeraạn ni nyodị.

18. Eḍighi maạr dị yira oghiọm ghisigh ophomhoghiạn Odẹ k’akẹ phọ ayira, eeghe kụ edị yira kotue okuphom owol?

¹⁸ Ghalhamọ yira ukparaghạ ni osighẹ oomo iphẹn moghaạph bọ emhuoghaạph phọ ephẹn phọ oḍighinhom, eeni amem yira kotue ni oḅonyonhu ozuan kụ ookia mughumọ eḍighinhom iyaạr phọ ayira eḅeraạn ni aZihova. Eḍighi idiphọ, pọ tuutughiạn mọ aZihova amoọgh ni ḍiḅeraạn akị esi eḍighinhom iyaạr abuphẹ “ophomoghiạn bọ nyodị.” (Jems 1:12) Esi iduọn phọ, kiọm ni ghisigh aḍuraan ghan atuman aZihova kụ alhọgh elhegh mọ nạ aḅeraạn ni nyodị. R’amem r’amem ka/bulha mọ aZihova “o/kạr okelạn torobọ onyọ ayira.”—Iiḍ. 17:27.