25 ይሖዋ ሆይ፣ አንተ አምላኬ ነህ።
ድንቅ ነገሮችን ስላደረግክና+
ከጥንት ዘመን ጀምሮ ያሰብካቸውን ነገሮች+
በታማኝነትና+ እምነት በሚጣልበት መንገድ ስለፈጸምክ
ከፍ ከፍ አደርግሃለሁ፤ ስምህንም አወድሳለሁ።
2 ከተማዋን የድንጋይ ቁልል፣
የተመሸገችውንም ከተማ የፍርስራሽ ክምር አድርገሃልና።
የባዕዳኑ ማማ፣ ከተማ መሆኑ አብቅቶለታል፤
ከተማዋ በምንም ዓይነት ዳግመኛ አትገነባም።
3 ከዚህም የተነሳ ኃያል የሆነ ሕዝብ ያከብርሃል፤
የጨቋኝ ብሔራት ከተማም ትፈራሃለች።+
4 ለችግረኛው ምሽግ ሆነሃልና፤
ለድሃውም ከደረሰበት ጭንቀት መሸሸጊያ፣+
ከውሽንፍርም መጠለያ፣
ከፀሐይ ንዳድም ጥላ ሆነሃል።+
የጨቋኞች ቁጣ ከግንብ ጋር እንደሚላተም ውሽንፍር በሚሆንበት ጊዜ ጥበቃ ታደርጋለህ፤
5 ውኃ በተጠማ ምድር እንዳለ ሙቀት
የባዕዳንን ሁከት ጸጥ ታደርጋለህ።
በደመና ጥላ እንደሚበርድ ሙቀት፣
የጨቋኞችም ዝማሬ ጸጥ ረጭ ይላል።
6 የሠራዊት ጌታ ይሖዋ በዚህ ተራራ+ ላይ ለሕዝቦች ሁሉ
ምርጥ ምግቦች የሚገኙበት ታላቅ ግብዣ ያዘጋጃል፤+
ያረጀ የወይን ጠጅ ግብዣ፣
መቅኒ የሞላባቸው ምርጥ ምግቦች
እንዲሁም የተጣራና ጥሩ የወይን ጠጅ የሚቀርቡበት ታላቅ ግብዣ ያደርጋል።
7 በዚህ ተራራ ላይ ሕዝቦችን ሁሉ የሸፈነውን ከፈን
እንዲሁም ብሔራትን ሁሉ ተብትቦ የያዘውን መሸፈኛ ያስወግዳል።
8 ሞትን ለዘላለም ይውጣል፤+
ሉዓላዊው ጌታ ይሖዋ ከፊት ሁሉ እንባን ያብሳል።+
በሕዝቡ ላይ የደረሰውን ነቀፋ ከመላው ምድር ያስወግዳል፤
ይሖዋ ራሱ ይህን ተናግሯልና።
9 በዚያም ቀን እንዲህ ይላሉ፦
“እነሆ፣ አምላካችን ይህ ነው!+
እሱን ተስፋ አድርገናል፤+
እሱም ያድነናል።+
ይሖዋ ይህ ነው!
እሱን ተስፋ አድርገናል።
በእሱ ማዳን ደስ ይበለን፤ ሐሴትም እናድርግ።”+
10 የይሖዋ እጅ በዚህ ተራራ ላይ ያርፋልና፤+
ጭድ በፍግ ክምር ላይ እንደሚረገጥ
ሞዓብም በስፍራው እንዲሁ ይረገጣል።+
11 አንድ ዋናተኛ በሚዋኝበት ጊዜ በእጆቹ ውኃውን እንደሚመታ
እሱም እጁን ዘርግቶ ሞዓብን ይመታዋል፤
በእጆቹ በጥበብ በመምታት
ትዕቢቱን ያበርድለታል።+
12 የተመሸገውን ከተማ
ከረጃጅም የመከላከያ ግንቦችህ ጋር ያፈርሳል፤
ምድር ላይ ጥሎ ከአፈር ይደባልቀዋል።