ÑAÑGA BÔT

1 Yéhôva a bi pôdôs Môsi i ñoñ Sinai,+ i ndap libadô i likoda,+ hala a bé hilo hi bisu hi sôñ i nyônôs iba, i nwii mi nyônôs ima i mbus manyodi map i loñ Égiptô.+ A kal le: 2 “Soñgol+ bon ba Lôk Israel bobasôna, hiki mut inoñnaga ni lihaa jé, ni ndap yé bikôkôa; soñgol bôlôm bobasôna. 3 We ni Arôn ni nlama soñgol bôt inoñnaga ni mintôñ nwap,* ni soñgol ba bobasôna ikété Israel ba ba nla ke i gwét ibôdôl 20 ma nwii tole iloo ha.+

4 “Pohol munlôm wada ikété hiki litén; hiki wada wap a nlama ba ñéga ndap yé bikôkôa.+ 5 I bôlôm ba ga hôla bé, môl map mana: inyu litén li Ruben, Élizur+ man Sédéur; 6 inyu litén li Siméôn, Sélumiel+ man Zurisadai; 7 inyu litén li Yuda, Naasôn+ man Aminadab; 8 inyu litén li Isakar, Nétanel+ man Zuar; 9 inyu litén li Zébulôn, Éliab+ man Hélôn; 10 bon ba Yôsep: inyu litén li Éfraim,+ Élisama man Amihud; inyu litén li Manasé, Gamaliel man Pédazur; 11 inyu litén li Benyamin, Abidan+ man Gidôni; 12 inyu litén li Dan, Ahiézer+ man Amisadai; 13 inyu litén li Aser, Pagiel+ man Ôkran; 14 inyu litén li Gad, Éliasaf+ man Déuel; 15 inyu litén li Naftali, Ahira+ man Énan. 16 I bôt bana bon ba bi pohlana ikété loñ. Ba yé baane+ ba matén ma basôgôlsôgôl bap, baane ba dikôô di bon ba Israel.”+

17 Ha nyen Môsi bo Arôn ba bi yoñ i bôt ba bi pohlana. 18 Ba kot ntôñ wonsôna i hilo hi bisu hi sôñ i nyônôs iba, inyu boñ le ba tila môl ma bôt bobasôna ba gwé 20 ma nwii tole iloo ha,+ hiki mut inoñnaga ni lihaa jé, ni ndap yé bikôkôa, 19 kiki Yéhôva a bi kal Môsi. Ba bi tila môl map i ngéda ba bé i ñoñ Sinai.+

20 Ba bi soñgol bon ba Ruben, mbôkgwéé+ nu Israel, inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 21 nsoñgi u bôt inyu litén li Ruben u bé 46 500.

22 Ba bi soñgol mbôda Siméôn+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 23 nsoñgi u bôt inyu litén li Siméôn u bé 59 300.

24 Ba bi soñgol mbôda Gad+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 25 nsoñgi u bôt inyu litén li Gad u bé 45 650.

26 Ba bi soñgol mbôda Yuda+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 27 nsoñgi u bôt inyu litén li Yuda u bé 74 600.

28 Ba bi soñgol mbôda Isakar+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 29 nsoñgi u bôt inyu litén li Isakar u bé 54 400.

30 Ba bi soñgol mbôda Zébulôn+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 31 nsoñgi u bôt inyu litén li Zébulôn u bé 57 400.

32 Inyu Yôsep, ba bi soñgol mbôda Éfraim+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 33 nsoñgi u bôt inyu litén li Éfraim u bé 40 500.

34 Ba bi soñgol mbôda Manasé+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 35 nsoñgi u bôt inyu litén li Manasé u bé 32 200.

36 Ba bi soñgol mbôda Benyamin+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 37 nsoñgi u bôt inyu litén li Benyamin u bé 35 400.

38 Ba bi soñgol mbôda Dan+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 39 nsoñgi u bôt inyu litén li Dan u bé 62 700.

40 Ba bi soñgol mbôda Aser+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 41 nsoñgi u bôt inyu litén li Aser u bé 41 500.

42 Ba bi soñgol mbôda Naftali+ inoñnaga ni môl map, ni mahaa map, ni mandap map ma bikôkôa. Ba bi soñgol bôlôm bobasôna ba nla ke i gwét, ibôdôl 20 ma nwii tole iloo ha, 43 nsoñgi u bôt inyu litén li Naftali u bé 53 400.

44 I bôt bana bon Môsi bo Arôn ba bi soñgol, yak ni 12 baane ba Israel, hiki wada a bé pot inyu ndap yé bikôkôa. 45 Ba bi soñgol bon ba Israel bobasôna inoñnaga ni mandap map ma bikôkôa, ibôdôl 20 ma nwii tole iloo ha, bon ba Israel bobasôna ba ba nla ke i gwét, 46 nsoñgi u bôt bobasôna u bé 603 550.+

47 Ndi ba bi soñgol bé mahaa ma litén li Lôk Lévi+ ikété nsoñgi u mana matén mape.+ 48 Inyule Yéhôva a bi kal Môsi le: 49 “Litén li Lôk Lévi jotama jon u nlama bé soñgol, u nlama bé to pôdna nsoñgi wap ni u mana matén ma Israel+ mape. 50 U nlama téé Lôk Lévi inyu tééda lap Mbôgi+ ni bisélél gwobisôna lôñni gwom gwobisôna bi yé mukété.+ Yon i ga begee lap ni bisélél+ gwé gwobisôna, Lôk Lévi yon i ga gwel ki nson mu,+ mandap map ma ga kéña lap.+ 51 Hiki ngéda ni nkahal kena lap, Lôk Lévi yon i nlama noñgol+ yo; i ngéda lap i nlama tééba, Lôk Lévi yon i nlama téé yo; mut nu a gwé bé kunde* a kôli bé tiige yo bebee, tiga le a wo.+

52 “Hiki man Lôk Israel a nlama téé ndap yé libadô i homa ba ga ti nye, hiki mut inoñnaga ni ntôñ+ wé u matén maa. 53 Mandap ma Lôk Lévi ma nlama kéña lap Mbôgi, inyu boñ le me unbene bañ bon ba Israel;+ Lôk Lévi yon i nlama tééda* lap Mbôgi.”+

54 Bon ba Israel ba bi boñ i mam momasôna Yéhôva a bi kal Môsi. Hala yaga nyen ba bi boñ.

2 Ha nyen Yéhôva a bi pôdôs Môsi bo Arôn, a kal bo le: 2 “Bon ba Israel ba nlama téé mandap ma mabadô i homa ntôñ+ wap u matén maa u yéne, hiki mut a bak bebee ni yimbne i ndap yé bikôkôa. Mandap map ma nlama kéña ndap libadô i likoda, ma nunuk ki yo.

3 “Ntôñ u matén maa i het litén li Yuda li yé, u ga yén* i pes likôl, i pes hiañgaa hi mpémél; ñane bon ba Lôk Yuda a yé Naasôn,+ man Aminadab. 4 Ntôñ wé gwét u gwé 74 600+ bôt. 5 Litén li Isakar li ga yén nye pes yada; ñane bon ba Isakar a yé Nétanel,+ man Zuar. 6 Ntôñ wé gwét u gwé 54 400+ bôt. 7 Litén li Zébulôn li ga yén ii pes ipe; ñane bon ba Zébulôn a yé Éliab,+ man Hélôn. 8 Ntôñ wé gwét u gwé 57 400+ bôt.

9 “I bôt bobasôna ba yé i ntôñ gwét lôñni litén li Yuda ba yé 186 400. Bon ba yé ntôñ bisu+ i yoñ njel.

10 “Ntôñ u matén maa i het litén li Ruben+ li yé, u ga yén* i pes nwelmbok; ñane bon ba Ruben a yé Élizur,+ man Sédéur. 11 Ntôñ wé gwét u gwé 46 500+ bôt. 12 Litén li Siméôn li ga yén nye pes yada; ñane bon ba Siméôn a yé Sélémiel,+ man Zurisadai. 13 Ntôñ wé gwét u gwé 59 300+ bôt. 14 Litén li Gad li ga yén ii pes ipe; ñane bon ba Gad a yé Éliasaf,+ man Réuel. 15 Ntôñ wé gwét u gwé 45 650+ bôt.

16 I bôt bobasôna ba yé i ntôñ gwét lôñni litén li Ruben ba yé 151 450. Bon ba yé ntôñ u nyônôs iba+ i yoñ njel.

17 “I ngéda ni nkahal kena+ ndap libadô i likoda, ntôñ u Lôk Lévi u nlama ba i ñemkété u mintôñ mimpe.

“Matén ma nlama ke liké inoñnaga ni oda i ba bi tééne+ mandap map ma mabadô, hiki mut i homa wé inoñnaga ni ntôñ wé u matén maa.

18 “Ntôñ u matén maa i het litén li Éfraim li yé, u ga yén* i pes hiôñg; ñane bon ba Éfraim a yé Élisama,+ man Amihud. 19 Ntôñ wé gwét u gwé 40 500+ bôt. 20 Litén li Manasé li ga yén nye pes yada; ñane bon ba Manasé+ a yé Gamaliel,+ man Pédazur. 21 Ntôñ wé gwét u gwé 32 200+ bôt. 22 Litén li Benyamin li ga yén ii pes ipe; ñane bon ba Benyamin a yé Abidan,+ man Gidéôni. 23 Ntôñ wé gwét u gwé 35 400+ bôt.

24 “I bôt bobasôna ba yé i ntôñ gwét lôñni litén li Éfraim ba yé 108 100. Bon ba yé ntôñ u nyônôs aa+ i yoñ njel.

25 “Ntôñ u matén maa i het litén li Dan li yé, u ga yén* i pes ñombok; ñane bon ba Dan a yé Ahiézer,+ man Amisadai. 26 Ntôñ wé gwét u gwé 62 700+ bôt. 27 Litén li Aser li ga yén nye pes yada; ñane bon ba Aser a yé Pagiel,+ man Ôkran. 28 Ntôñ wé gwét u gwé 41 500+ bôt. 29 Litén li Naftali li ga yén ii pes ipe; ñane bon ba Naftali a yé Ahira,+ man Énan. 30 Ntôñ wé gwét u gwé 53 400+ bôt.

31 “I bôt bobasôna ba yé i ntôñ gwét lôñni litén li Dan ba yé 157 600. Bon ba yé ntôñ u matén maa u nsôk+ i yoñ njel.”

32 I bon ba Israel bana bon ba bi soñglana inoñnaga ni mandap map ma bikôkôa; nsoñgi u bôt bobasôna ba ba bé ke i gwét u bé 603 550.+ 33 Lôk Lévi i bé bé mu nsoñgi+ u mana matén ma Israel+ mape, kiki Yéhôva a bi kal Môsi. 34 Bon ba Israel ba bi boñ mam momasôna kiki Yéhôva a bi kal Môsi. Hala nyen ba bé téé mandap map ma mabadô inoñnaga ni kiki mintôñ+ nwap mi bé nkabak matén maa maa; hala ki nyen ba bé ke,+ hiki mut inoñnaga ni lihaa jé ni ndap yé bikôkôa.

3 Mbôda* Môsi bo Arôn ini, i kel Yéhôva a pôdôs Môsi i hikôa Sinai.+ 2 Môl ma bon bôlôm ba Arôn mana: mbôkgwéé le Nadab, i mbus Abihu,+ Éléazar+ ni Itamar.+ 3 I môl mana mon ma yé môl ma bon ba Arôn, minhook mi biprisi mi ba bi téé* inyu gwel nson u prisi.+ 4 Ndi Nadab bo Abihu ba bi wo i bisu bi Yéhôva inyule ba bi kuye hié ba bééna bé kunde i kuye i bisu bi Yéhôva+ i ngéda ba bé i ñoñ Sinai, ba bi yék bé bon. Ndi Éléazar+ bo Itamar+ ba bi kônde gwel nson prisi lôñni isañ wap Arôn.

5 Yéhôva a bi kal Môsi le: 6 “Lona litén li Lôk Lévi,+ u téé jo i bisu bi prisi le Arôn, li gwélél+ nye. 7 Ba nlama yônôs minson nwap inyu Arôn ni inyu likoda jolisôna i bisu bi ndap libadô i likoda, ba gwel ki minson mi lap. 8 Ba nlama tééda bisélél+ gwobisôna bi ndap libadô i likoda, ba gwel nson wap inyu bon ba Lôk Israel, ba gwel ki minson mi lap.+ 9 U nlama yoñ bon ba Lôk Lévi, u ti bo Arôn ni bon bé. Ba yé mintinak mi bôt, mi mi bi yôña ikété bon ba Israel+ inyu hôla nye. 10 U nlama téé Arôn ni bon bé le ba gwel nson+ wap u prisi, mut nu a gwé bé kunde* a kôli bé tiige bebee, tiga le a wo.”+

11 Yéhôva a bi kônde pôdôs Môsi, a kal nye le: 12 “Me nyoñ Lôk Lévi ikété bon ba Israel inyu héñha babôkgwéé* bobasôna ba bon ba Israel,+ Lôk Lévi i ga yila bôt bem. 13 Inyule hiki mbôkgwéé a yé wem.+ I kel me bi nol babôkgwéé bobasôna ba loñ Égiptô,+ me bi téé babôkgwéé bobasôna ba Israel bapubhaga, babôkgwéé ba mut binam kiki babôkgwéé ba binuga,+ ba yé bem. Men me yé Yéhôva.”

14 Yéhôva a bi kônde pôdôs Môsi i ñoñ Sinai,+ a kal nye le: 15 “Soñgol bon ba Lôk Lévi inoñnaga ni mandap map ma bikôkôa ni mahaa map. U nlama soñgol hiki man munlôm nu a gwé sôñ yada tole iloo ha.”+ 16 Ha nyen Môsi a bi soñgol bo, kiki Yéhôva a bi kal nye. 17 Môl ma bon ba Lévi mana: Gersôn, Kôhat ni Mérari.+

18 Môl ma bon ba Gersôn mana inoñnaga ni mahaa map: Libni ni Siméi.+

19 Bon ba Kôhat inoñnaga ni mahaa map le: Amram, Izhar, Hébrôn ni Uziel.+

20 Bon ba Mérari inoñnaga ni mahaa map le: Mali+ ni Musi.+

Mahaa ma Lôk Lévi ma inoñnaga ni mandap map ma bikôkôa.

21 Lihaa li Lôk Libni+ ni lihaa li Lôk Siméi ma yé mbôda Gersôn. Mahaa ma Lôk Gersôn ma. 22 Nsoñgi u bon bôlôm bobasôna ba ba bééna sôñ yada tole iloo ha, u bé 7 500.+ 23 Mandap ma mabadô ma mahaa ma Lôk Gersôn ma bé i mbus lap,+ i pes hiôñg. 24 Ñéga ndap bikôkôa i Lôk Gersôn a bé Éliasaf, man Lael. 25 Nson u bon ba Gersôn+ inyu ndap libadô i likoda u bé le ba tééda lap ni libadô+ jé, ni mabadô ma ma nhô+ yo, ni libadô+ li lijubul li ndap libadô i likoda, 26 ni lipénd li mabadô,+ ni libadô+ li lijubul li lipénd li li nkéña lap ni juu li bisesema, ni minkôô nwé lôñni minson nwominsôna mi yé inyu gwom bi.

27 Lihaa li Lôk Amram, lihaa li Lôk Izar, lihaa li Lôk Hébrôn ni lihaa li Lôk Uziel ma yé mbôda Kôhat. Mahaa ma Lôk Kôhat+ ma. 28 Nsoñgi u bon bôlôm bobasôna ba ba bééna sôñ yada tole iloo ha, u bé 8 600; nson wap u bé le ba tééda homa+ mpubhaga. 29 Mandap ma mabadô ma mahaa ma Lôk Kôhat ma bé i pes nwelmbok i lap.+ 30 Ñéga ndap bikôkôa i mahaa ma Lôk Kôhat a bé Élizafan, man Uziel.+ 31 Nson wap u bé le ba yoñ ngéda ni nkuu Malômbla,+ téblé,+ tééne bilambe,+ muu+ ma bisesema, bisélél+ ba ngwélél inyu nson i homa mpubhaga, libadô,+ lôñni minson nwominsôna mi yé inyu gwom bi.+

32 Éléazar+ man prisi le Arôn nyen a bé éga baane ba Lôk Lévi, nye ki nyen a bé éga nson u bôt ba nsal i homa mpubhaga.

33 Lihaa li Lôk Mali ni lihaa li Lôk Musi ma yé mbôda Mérari. Mahaa ma Lôk Mérari+ ma. 34 Nsoñgi u bon bôlôm bobasôna ba ba bééna sôñ yada tole iloo ha, u bé 6 200.+ 35 Ñéga ndap bikôkôa i mahaa ma Mérari a bé Zuriel, man Abihail. Mandap map ma mabadô ma bé i pes ñombok i lap.+ 36 Nson u bon ba Mérari u bé le ba tééda mabam+ ma lap, bihimbil+ gwé, mbiñ yé, bitééne+ gwé, bisélél+ gwé gwobisôna ni minson nwominsôna mi mbéñge i gwom bi,+ 37 yak ni mbiñ i i bé kéña kotoo ni bitééne+ gwap, bon bap ba bikék, ni minkôô nwap.

38 Mandap ma mabadô ma Môsi, Arôn ni bon bé ma bé i bisu bi lap i pes likôl, hala wee i bisu bi ndap libadô i likoda, i het hiañgaa hi mpémél. Bon ba bé tééda homa mpubhaga, hala a bé nson ba bé sal inyu bon ba Israel. Mut nu a gwé bé kunde* a kôli bé tiige bebee, tiga le a wo.+

39 Bôlôm bobasôna ba Lôk Lévi ba ba bééna sôñ yada tole iloo ha, ba Môsi bo Arôn ba bi soñgol inoñnaga ni mahaa map, kiki Yéhôva a bi kal, nsoñgi wap u bé 22 000.

40 I mbus, Yéhôva a kal Môsi le: “Soñgol babôkgwéé ba bôlôm bobasôna ikété litén li Israel, ba ba gwé sôñ yada tole iloo ha,+ soñgol bo, u tila ki môl map. 41 U nlama yoñ bon ba Lôk Lévi inyu yem, i héñha babôkgwéé bobasôna ikété litén li Israel;+ men me yé Yéhôva. U nlama ki yoñ bilém bi bon ba Lôk Lévi inyu héñha babôkgwéé bobasôna ba bilém bi bon ba Israel.”+ 42 Ha nyen Môsi a bi soñgol babôkgwéé bobasôna ba bon ba Lôk Israel, kiki Yéhôva a bi kal nye. 43 Nsoñgi u babôkgwéé ba bôlôm bobasôna ba ba bééna sôñ yada tole iloo ha, u bé 22 273.

44 Yéhôva a bi kônde pôdôs Môsi, a kal nye le: 45 “Yoñ Lôk Lévi inyu héñha babôkgwéé bobasôna ikété litén li Israel, u yoñ ki bilém bi bon ba Lôk Lévi inyu héñha bilém bi bon ba Israel, Lôk Lévi i nlama yila bôt bem. Men me yé Yéhôva. 46 Inyu kobol+ 273 i babôkgwéé ba Lôk Israel ba ba nloo nsoñgi u bon ba Lôk Lévi,+ 47 u nlama yoñ sékel* itan inyu hiki mut,+ inoñnaga ni sékel i homa mpubhaga.* Sékel yada i yé 20 ma géra.*+ 48 U nlama ti Arôn ni bon bé bôlôm i moni mi inyu kobol babôkgwéé ba ba nloo nsoñgi u bon ba Lôk Lévi.” 49 Môsi a bi yoñ moni i moo ma bôt ba bé loo nsoñgi u bon ba Lôk Lévi inyu kobol bo. 50 A bi yoñ moni i moo ma babôkgwéé ba Israel, 1 365 sékel, inoñnaga ni sékel i homa mpubhaga. 51 Ha nyen Môsi a bi ti Arôn ni bon bé bôlôm i moni mi inoñnaga ni lipôdôl li* Yéhôva, kiki Yéhôva a bi kal Môsi.

4 Yéhôva a bi pôdôs Môsi bo Arôn, a kal bo le: 2 “Ikété bon ba Lévi, soñglana bon bôlôm ba Kôhat+ inoñnaga ni mahaa map ni mandap map ma bikôkôa, 3 bôlôm bobasôna ba ba gwé ipôla 30+ ni 50 ma nwii,+ ba ba yé ikété ntôñ u bet ba nsal i ndap libadô i likoda.+

4 “Nson unu won bon bôlôm ba Kôhat ba ga gwel i ndap libadô i likoda.+ Hala a yé nson u nlôôha mpubhaga: 5 i ngéda ni nkahal jôp i njel, Arôn ni bon bé bôlôm ba ga ke, ba héya libadô+ li li mbagal bituñ, ba hô nkuu+ u Mbôgi lôñni jo. 6 Ba ga kônde hô wo ni bikôp bi hiel hiobi, ba kôp libadô li li yé mangoñ* mu ngii, ba som ki bikék+ gwé mu.

7 “Ba ga tek libadô li li yé mangoñ i ngii téblé, i het ba mbiine bret+ i bisu bi Nyambe, ba kéhi minleha mu ngii, ni mabôndô, ni biséya, ni dibôi inyu makébla ma wai;+ yak ni likébla li bret+ ba nti hiki ngéda li nlama ba mu. 8 Ba ga kôp kôyôp libadô i ngii gwom bi, ba hô téblé yosôna ni bikôp bi hiel hiobi, ba som ki bikék+ gwé inyu begee yo. 9 I mbus, ba ga yoñ libadô li li yé mangoñ, ba hô tééne+ bilambe bi bi nti mapubi, yak ni bilambe+ gwé, ni biyôñôl* gwé bi nsiñga, ni bibeglene+ gwé bi hié, yak ni bihél gwé bi môô inyu lambe. 10 Ba ga kañ tééne bilambe ni bisélél gwé gwobisôna ikété bikôp bi hiel hiobi, i mbus ba som kék mu bikôp inyu begee gwo. 11 Ba ga kôp libadô li li yé mangoñ i ngii juu+ li gôl, ba hô ki jo ni bikôp bi hiel hiobi, ba som ki bikék+ gwé mu inyu begee jo. 12 I mbus, ba ga yoñ bisélél+ gwobisôna ba mbéna gwélél inyu nson u homa mpubhaga, ba kañ gwo ikété libadô li li yé mangoñ, ba hô gwo ni bikôp bi hiel hiobi, ba som kék mu bikôp inyu begee gwo.

13 “Ba nlama héya libu* munu juu+ li bisesema, ba hô jo ni libadô li mahuu ma ntômba li li yé wedewede.* 14 Bisélél gwobisôna ba ngwélél i ngéda ba nsal i juu li bisesema, ba ga kéhi gwo i ngii juu; gwon bi yé: Bibeglene bi hié, nwas, bisoble, biséya, bisélél gwobisôna bi juu;+ ba nlama hô jo ni bikôp bi hiel hiobi, ba som ki bikék+ gwé inyu begee jo.

15 “Arôn ni bon bé bôlôm ba nlama hô homa+ mpubhaga lôñni gwom bi homa mpubhaga gwobisôna i ngéda ba nkahal jôp i njel. I mbus, bon bôlôm ba Kôhat ba nlama jôp, ba begee gwo;+ ndi ba nlama bé tihba gwom bi homa mpubhaga, tiga le ba wo.+ Minson mini nwon mi yé mbegee i bon bôlôm ba Kôhat inyu ndap libadô i likoda.

16 “Éléazar,+ man prisi le Arôn, nyen a nlama yoñ ngéda ni môô ma bilambe,+ biloñge bi binjinjiñ,+ likébla li bijek ba nti hiki kel, ni môô+ mapubhaga. Nye ki nyen a ñéga minson mi lap nwominsôna ni gwom gwobisôna bi yé mukété, yak homa mpubhaga ni bisélél gwé.”

17 Yéhôva a bi kônde ki pôdôs Môsi bo Arôn, a kal bo le: 18 “Ni nwas bañ le mahaa ma Lôk Kôhat+ ma tjiba ikété Lôk Lévi. 19 Ndi boña jam lini inyu yap, inyu boñ le ba niñ, ba wo bañ i ngéda ba ntiige bebee ni gwom+ bi nlôôha bipubhaga. Arôn ni bon bé bôlôm ba ga jôp, ba unda hiki man Lôk Kôhat nson wé ni yom a nlama begee. 20 Bon ba Lôk Kôhat ba nlama bé jôp le ba tehe gwom bipubhaga, to inyu linut jada, tiga le ba wo.”+

21 I mbus, Yéhôva a bi pôdôs Môsi, a kal nye le: 22 “U nlama soñgol bon bôlôm ba Gersôn+ inoñnaga ni mandap map ma bikôkôa ni mahaa map. 23 U nlama tila môl ma bôlôm bobasôna ba ba gwé ipôla 30 ni 50 ma nwii, ba ba yé ikété ntôñ u bet ba nsal i ndap libadô i likoda. 24 Nson u mahaa ma Lôk Gersôn unu, i gwom bini gwon ba nlama begee:+ 25 Ba ga begee mabadô ma lap,+ ndap libadô i likoda, mabadô ma ma nhô yo, bikôp bi hiel hiobi bi ba ngwélél inyu hô yo,+ libadô li lijubul li ndap libadô i likoda,+ 26 mabadô ma lipénd,+ libadô li lijubul li lipénd+ li li nkéña lap ni juu li bisesema, minkôô nwé, bisélél gwobisôna ni gwom gwobisôna ba ngwélél inyu nson u. Hala a yé nson wap. 27 Arôn ni bon bé bôlôm ba nlama éga nson wonsôna u Lôk Gersôn+ lôñni gwom ba nlama begee; ni nlama unda bo gwom gwobisôna ba nlama begee. 28 Nson u won mahaa ma Lôk Gersôn ma nlama gwel i ndap libadô i likoda;+ Itamar,+ man prisi le Arôn nyen a ñéga nson wap.

29 “Inyu bon ba Mérari,+ u nlama soñgol bo inoñnaga ni mahaa map ni mandap map ma bikôkôa. 30 U nlama tila môl ma bôlôm bobasôna ba ba gwé ipôla 30 ni 50 ma nwii, ba ba yé ikété ntôñ u bet ba nsal i ndap libadô i likoda. 31 I gwom bini gwon ba nlama begee+ i ndap libadô i likoda: mabam+ ma lap, bihimbil+ gwé, mbiñ+ yé, bitééne+ gwé; 32 mbiñ+ i lipénd ni bitééne gwap; bon bap ba bikék+ ni minkôô+ nwap; bisélél gwobisôna lôñni nson wonsôna u u nséla inyu gwom bi. Ni nlama unda hiki wada wap i yom a nlama begee. 33 Nson u won mahaa ma bon ba Mérari+ ma nlama gwel i ndap libadô i likoda; Itamar, man prisi+ le Arôn nyen a ñéga nson wap.”

34 Ha nyen Môsi bo Arôn ni baane+ ba litén ba bi soñgol bon bôlôm ba Lôk Kôhat+ inoñnaga ni mahaa map ni mandap map ma bikôkôa, 35 ba bobasôna ba gwé ipôla 30 ni 50 ma nwii, ba ba yé ikété ntôñ u bet ba nsal i ndap libadô i likoda.+ 36 Nsoñgi wap wonsôna inoñnaga ni mahaa map, u bé 2 750+ bôt. 37 I bôt bana bon ba bi soñglana ikété mahaa ma Lôk Kôhat, ba bobasôna ba bé gwel nson i ndap libadô i likoda. Môsi bo Arôn ba bi soñgol bo kiki Yéhôva a bi kal Môsi.+

38 Ba bi soñgol bon bôlôm ba Gersôn+ inoñnaga ni mahaa map ni mandap map ma bikôkôa, 39 ba bobasôna ba gwé ipôla 30 ni 50 ma nwii, ba ba yé ikété ntôñ u bet ba nsal i ndap libadô i likoda. 40 Nsoñgi wap wonsôna inoñnaga ni mahaa map ni mandap map ma bikôkôa, u bé 2 630+ bôt. 41 I bôt bana bon ba bi soñglana ikété mahaa ma bon bôlôm ba Gersôn, ba bobasôna ba bé gwel nson i ndap libadô i likoda. Môsi bo Arôn ba bi soñgol bo kiki Yéhôva+ a bi kal.

42 Ba bi soñgol bon bôlôm ba Mérari inoñnaga ni mahaa map ni mandap map ma bikôkôa, 43 ba bobasôna ba gwé ipôla 30 ni 50 ma nwii, ba ba yé ikété ntôñ u bet ba nsal i ndap libadô i likoda.+ 44 Nsoñgi wap wonsôna inoñnaga ni mahaa map, u bé 3 200+ bôt. 45 I bôt bana bon ba bi soñglana ikété mahaa ma bon bôlôm ba Mérari, ba bobasôna ba bé gwel nson i ndap libadô i likoda. Môsi bo Arôn ba bi soñgol bo kiki Yéhôva a bi kal Môsi.+

46 Môsi bo Arôn ni baane ba litén li Israel ba bi soñgol bon ba Lôk Lévi inoñnaga ni mahaa map ni mandap map ma bikôkôa; 47 bon ba Lôk Lévi ba ba bééna ipôla 30 ni 50 ma nwii, bobasôna ba bi kôhna nson, bo ki bon ba bé lama begee gwom bi ndap libadô i likoda.+ 48 Nsoñgi wap wonsôna u bé 8 580+ bôt. 49 Ba bi soñgol bo kiki Yéhôva a bi kal Môsi, ba bi ti hiki mut nson wé ni i gwom a nlama begee; ba bi soñgol bo kiki Yéhôva a bi kal Môsi.

5 Yéhôva a bi kônde pôdôs Môsi, a kal nye le: 2 “Ti bon ba Israel oda le i homa ba nyééne, ba héya hiki mut a nkon lô+ ni hiki mut a nyoo,+ yak ni hiki mut a yé nyega inyule a ntihba mim.+ 3 To a yé munlôm, to a yé muda, ni nlama pémés bo. Ni nlama héya bo i homa ni nyééne, tiga le ba lôôhe+ mut kon i het me nyééne.”*+ 4 Hala nyen bon ba Israel ba bi boñ; i homa bon ba Israel ba bé yééne, ba héya i bôt ba ha. Kiki Yéhôva a bi kal Môsi, hala nyen bon ba Israel ba bi boñ.

5 Yéhôva a bi kônde pôdôs Môsi, a kal nye le: 6 “Kal bon ba Israel le: ‘Ibale munlôm tole muda a mboñ béba yada bôt ba binam ba mbéna boñ, a boñ jam libe i mis ma Yéhôva, wee i mut nu a mboñ béba.+ 7 A* nlama pahal+ i béba a* bi boñ, a saa i yom yosôna i mbéda inyu béba yé, a kônde ki jôga jada ikété môga matan;+ a ti i mut nu ba mboñ béba. 8 Ndi ibale mut ba bi boñ béba a gwé bé mut lihaa nu a nla yoñ i gwom ba nti inyu nsaa u béba, ba nlama kena gwo yak Yéhôva, bi yila gwom bi prisi, handugi nlôm ntômba nu prisi i nlama sem i boñ mam ma mbéda inyu hô béba i mut+ nu a bi boñ béba.

9 “‘Hiki likébla+ lipubhaga bon ba Israel ba nlona i bisu bi prisi li nlama yila jé.+ 10 Gwom bipubhaga bi hiki mut bi ga yégle i gwé. Ndi hiki yom mut a nti prisi i ga yila i prisi.’”

11 Yéhôva a bi kônde pôdôs Môsi, a kal nye le: 12 “Pôdôs bon ba Israel, u kal bo le: ‘I jam lini jon ba nlama boñ ibale nwaa ngim mut a mboñ béba, a ke ndéñg; 13 hala wee munlôm numpe a nlalna nye;+ ndi nlôm a yi bé, i jam li li yégle li sôli, kayéle i muda nunu a nhindis nyemede ndi mut a ntehe bé nye, a ngwéla bé to. 14 Ibale nlôm a mbôdôl sôñ nwaa, a kahal hégda le nwaa a nke ndéñg, to i mpam le a yé nyega to a ta bé nyega, 15 munlôm a nlama kena nwaa i bisu bi prisi, a kena yak likébla inyu nwaa: Kilô yada ni jam* i flawa i kôn.* A nlama bé kôp môô, to binunumba mu ngii inyule li yé likébla mut a nti inyule a nsôñ nwaa, likébla li li nhôñlaha jam libe.

16 “‘Prisi i nlama kena muda, i boñ nye le a telep i bisu bi Yéhôva.+ 17 Prisi i ga yoñ malép mapubhaga ikété hibee hi biték, prisi i ga yoñ ki ndék biték ikété lap, i ha gwo ikété malép. 18 Prisi i ga téé muda i bisu bi Yéhôva, i hohol nye tjôñ, i bii ki likébla li bijek li li nhôñlaha jam libe i mabai ma moo ma muda, hala wee likébla li bijek inyu bisôñ;+ prisi i ga ha malép ma nlol i libai jé li woo, ma ma nlona ndiihe.+

19 “‘I mbus, prisi i ga kumha muda soñ, i kal le: “Ibale munlôm numpe a nlalna bé we hala kiki u yé isi énél+ i nlô woñ, ibale u mboñ bé béba, u hindis bé wemede, wee malép ma nlol mana, ma ma nlona ndiihe, ma boñ bañ we béba. 20 Ndi ibale u mboñ béba, u hindis wemede ndi ki le u yé isi énél i nlô woñ, tole munlôm+ numpe a nlalna we handugi nlô woñ...” 21 Ha nyen prisi i ga kumha muda soñ i i nlona ndiihe, prisi i ga kal muda le: “Yéhôva a boñ le bel* woñ u bol,* ni le libum joñ li bet, kayéle Yéhôva a boñ le bôt ba litén joñ ba kahal sima jôl joñ i ngéda ba ntiihe ni i ngéda ba nkum soñ. 22 I malép mana ma nlona ndiihe ma ga jôp we ikété minla, ma boñ le libum joñ li bet ni le bel* woñ u bol.”* I muda nu a ga kal le: “Amen! Amen!”*

23 “‘I mbus, prisi i ga tila ndiihe ini ikété kaat, i sas ki matila ma ikété malép ma nlol. 24 Prisi i ga nyus ki muda malép ma nlol ma ma nlona ndiihe, i malép mana ma nlona ndiihe ma ga jôp nye ikété, ma lona ki lilôli. 25 Prisi i ga yoñ likébla li bijek inyu bisôñ+ i moo ma muda, i ndéñgés jo i bisu bi Yéhôva, i mbus i kena jo bebee ni juu li bisesema. 26 Prisi i ga yoñ woo wada mu likébla li bijek, kiki yimbne i likébla, i ligis jo mu juu+ li bisesema; i mbus, i ga nyus muda malép. 27 I ngéda prisi i mal nyus muda malép, ibale muda a bi hindis nyemede, a ke ndéñg, i malép ma nlona ndiihe ma njôp nye ikété, ma yila lilôli, libum li bet nye, bel* wé u bol,* bôt ba litén jé ba bôdôl sima jôl jé i ngéda ba ntiihe. 28 Ndi ibale muda a bi hindis bé nyemede, a bak mpubhaga, a ga kôhna bé i kogse ini, a ga nembee, a gwal.

29 “‘Mbén ini yon i yé inyu munlôm nu a sôñ+ nwaa, i ngéda muda a mboñ béba, a hindis nyemede ndi ki le a yé isi énél i nlôm, 30 tole ibale munlôm a mbôdôl sôñ nwaa, a kahal hégda le nwaa a nke i ndéñg; a nlama kena nwaa i bisu bi Yéhôva, prisi i nlama boñ muda i mam mbén ini yosôna i nkal. 31 Munlôm a ga bana bé nsohi, ndi nwaa a ga kôhna kogse inyu liboñok jé libe.’”

6 Yéhôva a bi kônde pôdôs Môsi, a kal nye le: 2 “Pôdôs bon ba Israel, u kal bo le: ‘Ibale munlôm tole muda a mboñ mbônga u tôbôtôbô le a ga yila Nazir*+ inyu Yéhôva, 3 a nlama bé nyo wai to maok ma ma nhiuuha. A nlama bé to nyo séñha wai to biséñha bi maok gwo ki gwo bi bi nla boñ le mut a hiôô.+ A nlama bé to nyo binene bi matam ma nkôô wai, to je matam ma yômi ma nkôô wai, to ma ma yé nnumuk. 4 Mu dilo tjodisôna a bi bôn le a yé Nazir, a nlama bé je yom yo ki yo i nlôl i nkôô wai, ibôdôl matam ipam bikoo.

5 “‘Mu dilo tjodisôna a bi bôn le a yé Nazir, a nlama bé homb ño+ wé. A ga ba mpubhaga ibale a nwas le tjôñ di ño wé di nañ letee dilo di Nazir a bi ti inyu Yéhôva di yon. 6 A nlama bé tiige bebee ni mim* i dilo tjodisôna a yé mbaglak inyu Yéhôva. 7 To ibale isañ, to nyañ, to manyañ nu munlôm, to manyañ nu muda a nwo, a nlama bé hindis nyemede+ inyule yimbne i Nazir inyu Nyambe wé i yé nye i ngii ño.

8 “‘A yé mpubhaga inyu Yéhôva ikété dilo tjé di Nazir tjodisôna. 9 Ndi ibale mut a nwo kunda yada ipañ yé,+ ndi a hindis tjôñ tjé di di yé yimbne le a yé mbaglak inyu Nyambe,* a nlama homb ño+ wé i kel a nyila mpubhaga. A nlama homb wo i hilo hi nyônôs isaambok. 10 I hilo hi nyônôs juem, a nlama lona bakukuu iba ni bon ba dibeñ iba yak prisi, i lijubul li ndap libadô i likoda. 11 Prisi i ga kôôba hiada kiki sesema inyu béba, hini hipe kiki sesema i ntul i hié inyu hô béba+ i mut Nazir inyule a bi tihba mim.* I mbus, a nlama yilha ño wé mpubhaga i kel i. 12 Ha nyen a nlama tiimba bagla inyu Yéhôva ikété dilo tjé di Nazir, a nlama lona man nlôm ntômba nu nwii wada kiki sesema inyu hô hihôha hié. Ndi a ga soñgol bé dilo tjé a bi bôk a ba Nazir inyule a bi ôbôs libak jé li Nazir.

13 “‘Mbén inyu mut Nazir ini: i ngéda dilo tjé di Nazir+ di nyon, ba nlama lona nye i lijubul li ndap libadô i likoda. 14 A nlama lona likébla jé i bisu bi Yéhôva: man nlôm ntômba nu a ngi yii i nwii wé bisu, nu a gwé bé lem yo ki yo, nyen a ga ba sesema+ i ntul i hié; ñin man ntômba nu a ngi yii i nwii wé bisu, nu a gwé bé lem yo ki yo, nyen a ga ba sesema+ inyu béba; nlôm ntômba nu a gwé bé lem yo ki yo kiki sesema inyu kôp nsañ;+ 15 sel i bret bi ngi-séñha bi bi yé ngiiña, bi bak mboñok ni flawa ilam mbôôk ni môô; biôlô bi ngi-séñha bi ba nhoo môô; ni makébla+ map ma bijek lôñni makébla+ map ma wai. 16 Prisi i ga kena i gwom bi i bisu bi Yéhôva, i ti sesema inyu béba lôñni sesema i ntul i hié. 17 I ga sémél Yéhôva nlôm ntômba ni sel i bikoga bi ngi-séñha kiki sesema inyu kôp nsañ; i mbus, prisi i ga ti likébla jé*+ li bijek* lôñni likébla jé li wai.

18 “‘Ha nyen i mut a yé Nazir a nlama homb ño+ wé* i lijubul li ndap libadô i likoda, a yoñ tjôñ di di bi nañ nye i ño i ngéda a bak mut Nazir, a leñ tjo i hié hi ba nlighene sesema inyu kôp nsañ. 19 Prisi i nlama yoñ nam i nlôm ntômba i i yé nlambak,+ bret yada i ngi-séñha i i yé ngiiña mukété sel, ni ôlô yada, a bii gwo i mabai ma moo ma mut Nazir, nu a mal homb ño wé.* 20 Prisi i nlama ndéñgés i gwom bi kiki likébla ba ndéñgés i bisu bi Yéhôva.+ Bi yé gwom bipubhaga inyu prisi, yak tôl i nuga i likébla le ba ndéñgés, yak ni bel i nuga ba nti likébla.+ I mbus hala, mut Nazir a nla nyo wai.

21 “‘Mbén inyu mut Nazir+ nu a mboñ mbônga, i yé le: Ibale a mbôn Yéhôva jam, handugi i mam ma mbéda le a yônôs inyu libak jé li Nazir, a nlama yônôs mbônga u, inyu unda le a ndiihe mbônga wé u Nazir.’”

22 I mbus hala, Yéhôva a bi kal Môsi le: 23 “Kal Arôn ni bon bé ba bôlôm le: ‘Haana nyen ni nlama sayap+ bon ba Israel. Kala bo le:

24 “Yéhôva a sayap we,+ a tééda ki we.

25 Yéhôva a boñ le su wé u béyéi we,+ a boñ ki we loñge.

26 Yéhôva a unda we loñgeñem,* a ti ki we nsañ.”’+

27 Ba nlama sima jôl jem ikété litén li Israel+ inyu boñ le me sayap jo.”+

7 I kel Môsi a bi mal oñ lap,+ a bi hoo yo+ môô, a téé ki yo mpubhaga, yak ni bigwélél bi lap gwobisôna, ni juu li bisesema, lôñni bisélél+ gwé gwobisôna. I ngéda a bi mal hoo gwo môô, a téé ki gwom bi bipubhaga,+ 2 baane ba Israel+ ni baéga ba mandap ma bikôkôa ba ti likébla. Baane ba matén ba ba bi soñgol bôt 3 ba lona likébla jap i bisu bi Yéhôva: Bikak bisamal bi bi gwé minyôl, 12 nyaga, kak yada inyu baane iba ni nlôm nyaga* inyu hiki wada wap; ba lona gwo bisu bi lap. 4 Ha nyen Yéhôva a bi kal Môsi le: 5 “Leege i gwom bini ba yé i ti we, inyule bi ga gwéélana i nson u ndap libadô i likoda; u nlama ti gwo Lôk Lévi, hiki wada inoñnaga ni minson nwé.”

6 Ha nyen Môsi a bi leege bikak ni nyaga, a ti gwo Lôk Lévi. 7 A ti bon ba Gersôn bikak biba ni nyaga ina inoñnaga ni yom i bé béda inyu nson+ wap; 8 a ti bon ba Mérari bikak bina ni nyaga juem inoñnaga ni yom i bé béda inyu nson wap, isi oda i Itamar, man prisi+ le Arôn. 9 Ndi a bi ti bé bon ba Kôhat to yom inyule nson wap u bé i homa+ mpubhaga, ba bé begee gwom bipubhaga i bituu.+

10 Baane ba bi lona likébla i kel sai*+ i juu li bisesema, i hilo ba bi hoo jo môô. I ngéda baane ba bi lona likébla jap i bisu bi juu li bisesema, 11 ha nyen Yéhôva a bi kal Môsi le: “Hiki ñane a ga bana kel yada i ti likébla jé inyu sai i juu li bisesema.”

12 I hilo hi bisu, Naasôn+ man Aminadab, nu litén li Yuda, nyen a bi ti likébla. 13 Likébla li bé: Nleha u silba, u yédék 130 sékel;* lidis li silba jada, li yédék 70 ma sékel inoñnaga ni sékel i homa mpubhaga,*+ gwo biba bi bak nyonok ni flawa ilam i i yé mbôôk ni môô, yon i yé likébla li bijek;+ 14 libôndô* li gôl, li yédék 10 li sékel, li bak nyonok ni binjinjiñ; 15 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 16 man kembee wada inyu sesema i béba;+ 17 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Naasôn, man Aminadab+ li.

18 I hilo hi nyônôs iba, Nétanel+ man Zuar, ñane nu litén li Isakar, a bi ti likébla jé. 19 A bi ti nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa+ mpubhaga, gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 20 libôndô li gôl, li yédék 10 li sékel, li bak nyonok ni binjinjiñ; 21 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu kiki sesema i ntul i hié;+ 22 man kembee wada inyu sesema i béba;+ 23 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Nétanel, man Zuar li.

24 I hilo hi nyônôs aa, ñane bon ba Lôk Zébulôn le Éliab,+ man Hélôn, 25 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 26 libôndô li gôl, li yédék 10 li sékel, li bak nyonok ni binjinjiñ; 27 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 28 man kembee wada inyu sesema+ i béba; 29 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Éliab,+ man Hélôn li.

30 I hilo hi nyônôs ina, ñane bon ba Lôk Ruben le Élizur,+ man Sédéur, 31 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 32 libôndô li gôl, li yédék 10 li sékel, li bak nyonok ni binjinjiñ; 33 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 34 man kembee wada inyu sesema i béba;+ 35 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Élizur,+ man Sédéur li.

36 I hilo hi nyônôs itan, ñane bon ba Lôk Siméôn le Sélumiel,+ man Zurisadai, 37 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 38 libôndô li gôl, li yédék 10 li sékel, li bak nyonok ni binjinjiñ; 39 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 40 man kembee wada inyu sesema i béba;+ 41 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Sélumiel,+ man Zurisadai li.

42 I hilo hi nyônôs isamal, ñane bon ba Lôk Gad le Éliasaf,+ man Déuel, 43 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 44 libôndô li gôl, li yédék 10 li sékel, li bak nyonok ni binjinjiñ; 45 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 46 man kembee wada inyu sesema i béba;+ 47 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Éliasaf,+ man Déuel li.

48 I hilo hi nyônôs isaambok, ñane bon ba Lôk Éfraim le Élisama,+ man Amihud, 49 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 50 libôndô li gôl, li yédék 10 li sékel, li bak nyonok ni binjinjiñ; 51 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 52 man kembee wada inyu sesema i béba;+ 53 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Élisama,+ man Amihud li.

54 I hilo hi nyônôs juem, ñane bon ba Lôk Manasé le Gamaliel,+ man Pédazur, 55 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 56 libôndô li gôl, li yédék 10 li sékel, li bak nyonok ni binjinjiñ; 57 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 58 man kembee wada inyu sesema i béba;+ 59 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Gamaliel,+ man Pédazur li.

60 I hilo hi nyônôs bôô, ñane+ bon ba Lôk Benyamin le Abidan,+ man Gidôni, 61 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 62 libôndô li gôl, li yédék 10 li sékel, li bak nyonok ni binjinjiñ; 63 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 64 man kembee wada inyu sesema i béba;+ 65 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Abidan,+ man Gidôni li.

66 I hilo hi nyônôs jôm, ñane bon ba Lôk Dan le Ahiézer,+ man Amisadai, 67 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 68 libôndô li gôl, li yédék 10 li sékel, li bak nyonok ni binjinjiñ; 69 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 70 man kembee wada inyu sesema i béba;+ 71 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Ahiézer,+ man Amisadai li.

72 I hilo hi nyônôs 11, ñane bon ba Lôk Aser le Pagiel,+ man Ôkran, 73 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 74 libôndô li gôl, li yédék 10 li sékel, li bak nyonok ni binjinjiñ; 75 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 76 man kembee wada inyu sesema i béba;+ 77 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Pagiel,+ man Ôkran li.

78 I hilo hi nyônôs 12, ñane bon ba Lôk Naftali le Ahira,+ man Énan, 79 nyen a bi ti likébla jé: Nleha u silba, u yédék 130 sékel; lidis li silba, li yédék 70 ma sékel inoñnaga ni sékel i homa mpubhaga,+ gwo biba bi bé nyonok ni flawa ilam i i yé mbôôk ni môô, yon i yé likébla li bijek;+ 80 libôndô li gôl, li yédék 10 li sékel, li bak nyonok ni binjinjiñ; 81 man nlôm nyaga wada, nlôm ntômba wada, ni man nlôm ntômba wada nu a ngi yii i nwii wé u bisu inyu sesema i ntul i hié;+ 82 man kembee wada inyu sesema i béba;+ 83 inyu sesema i kôp nsañ,+ nyaga iba, balôm ba mintômba batan, balôm ba kembee batan ni bon ba mintômba batan ba ba gwé nwii wada. Likébla li Ahira,+ man Énan li.

84 I likébla lini jon baane ba Lôk Israel ba bi ti inyu sai+ i juu li bisesema i ngéda ba bi hoo jo môô: 12 minleha mi silba, 12 madis ma silba, 12 mabôndô ma gôl;+ 85 hiki nleha u silba u yédék 130 sékel, hiki lidis li yédék 70 ma sékel; silba yosôna i biséya bini i bé 2 400 sékel inoñnaga ni sékel i homa mpubhaga;+ 86 hiki libôndô ikété 12 mabôndô ma gôl li bé nyonok ni binjinjiñ, li yédék 10 li sékel inoñnaga ni sékel i homa mpubhaga, gôl i mabôndô momasôna i bé yét 120 sékel. 87 Bilém gwobisôna inyu sesema i ntul i hié bi bé: 12 nyaga, 12 balôm ba mintômba, 12 bon ma mintômba ba nwii wada lôñni likébla jap li bijek, ni 12 bon ba kembee inyu sesema i béba. 88 Bilém gwobisôna bi sesema inyu kôp nsañ bi bé: 24 nyaga, 60 ma balôm ba mintômba, 60 ma balôm ba kembee, ni 60 ma bon ba mintômba ba ba gwé nwii wada. Likébla li sai+ i juu li bisesema li, i ngéda ba bi hoo+ jo môô.

89 Hiki ngéda Môsi a bé jôp i ndap libadô i likoda inyu pot ni Nyambe,*+ a bé nok kiñ i mpôdôs nye, i lôlak i ngii ngudul+ i nkuu u Mbôgi, ipôla bikérubim+ gwo biba; Nyambe nyen a bé pôdôs nye.

8 Yéhôva a bi pôdôs Môsi, a kal nye le: 2 “Pôdôs Arôn, u kal nye le: ‘I ngéda w’a kuye bilambe, bilambe bisaambok bi ga bai i homa nu a yé i bisu bi tééne bilambe+ i yé.’” 3 Hala nyen Arôn a bi boñ: A bi kuye bilambe inyu boñ le mapubi ma bai i homa nu a yé i bisu bi tééne bilambe+ i yé, kiki Yéhôva a bi kal Môsi. 4 Haana nyen ba bi bañ tééne bilambe: Ba bi bép gôl ni hama inyu bañ yo; ibôdôl i kôô wé letee ni i ngii, i homa bisem bi gôl bi bé, ba bi sal yo ni hama.+ Tééne bilambe i bi bôña inoñnaga ni yiinda+ Yéhôva a bi unda Môsi.

5 Yéhôva a bi kônde ki pôdôs Môsi, a kal nye le: 6 “Yoñ Lôk Lévi ikété bon ba Israel, u pubus bo.+ 7 Haana nyen u nlama pubus bo: nwes bo malép inyu yilha bo bapubhaga,* ba nlama homb tjôñ tjodisôna di nyuu, ba jôwa mambot map, ba pubus ki bomede.+ 8 I mbus, ba ga yoñ man nlôm nyaga,+ ba yoñ ki flawa ilam i i yé mbôôk ni môô, yon i yé likébla jé li kôn,+ w’a yoñ man nlôm nyaga numpe nyen a yé sesema inyu béba.+ 9 U nlama ki lona Lôk Lévi i bisu bi ndap libadô i likoda, u kot ki litén li Israel+ jolisôna. 10 I ngéda w’a lona bon ba Lôk Lévi+ i bisu bi Yéhôva, bon ba Israel ba nlama kéhi bo moo i ngii. 11 Arôn a nlama ti* Yéhôva Lôk Lévi kiki ba nti likébla ba ndéñgés+ inyu bon ba Israel, ha nyen Lôk Lévi i ga gwel nson u Yéhôva.+

12 “I mbus, Lôk Lévi i ga kéhi moo map i ngii miño mi balôm ba nyaga.+ I mbus hala, sem nyaga yada kiki sesema inyu béba; sem ini nyaga ipe kiki sesema i ntul i hié inyu Yéhôva, i sas bibéba+ bi Lôk Lévi. 13 W’a lona Lôk Lévi i bisu bi Arôn ni bon bé bôlôm, u ti* yo Yéhôva kiki ba nti likébla ba ndéñgés. 14 U nlama bagal Lôk Lévi ikété bon ba Israel; Lôk Lévi i nlama yila bôt bem.+ 15 I mbus hala, Lôk Lévi i ga bana kunde i gwel nson wap i ndap libadô i likoda. Hala nyen u nlama pubus yo, u ti* yo kiki likébla ba ndéñgés. 16 Inyule ba yé mintinak mi bôt, bon ba yé mintinak nwem mi bôt ikété Lôk Israel. Me bi yoñ bo inyu yem le ba yiha babôkgwéé* bobasôna ba Lôk Israel.+ 17 Inyule babôkgwéé bobasôna ba Lôk Israel ba yé bem, bôt ba binam ni binuga.+ Me bi téé bo bapubhaga inyu yem i kel me bi nol babôkgwéé bobasôna ba loñ Égiptô.+ 18 M’a yoñ Lôk Lévi inyu yiha babôkgwéé bobasôna ikété bon ba Israel. 19 M’a bagal Lôk Lévi ikété bon ba Israel, me ti yo Arôn ni bon bé bôlôm, le ndi i ba mintinak mi bôt inyu gwel nson i ndap libadô i likoda,+ ni i boñ mam ma mbéda inyu hô bibéba bi bon ba Israel, kayéle himala hio ki hio hi pémél bañ bon ba Israel, inyule bon ba Israel+ ba ntiige bebee ni homa mpubhaga.”

20 Môsi, Arôn ni likoda li bon ba Israel jolisôna ba bi boñ Lôk Lévi i mam mana. Inoñnaga ni mam momasôna Yéhôva a bi kal Môsi inyu Lôk Lévi. Hala nyen bon ba Israel ba bi boñ bo. 21 Hala nyen Lôk Lévi i bi pubus bomede, i jôwa ki mambot map;+ i mbus, Arôn a ti* bo Yéhôva+ kiki ba nti likébla ba ndéñgés. I mbus hala, Arôn a boñ mam ma mbéda inyu boñ le bibéba gwap bi séha, kayéle a pubus bo.+ 22 I mbus mam mana, Lôk Lévi i bi ke i gwel nson wap i ndap libadô i likoda i bisu bi Arôn ni bon bé bôlôm. Kiki Yéhôva a bi kal Môsi le a boñ ni Lôk Lévi, hala yaga nyen ba bi boñ.

23 Yéhôva a bi kônde pôdôs Môsi, a kal nye le: 24 “I jam lini li mbéñge bon ba Lôk Lévi ba ba gwé ibôdôl 25 nwii, munlôm a ga jôp i ntôñ u bôt ba ngwel nson i ndap libadô i likoda. 25 Ndi ibale a ntagbe 50 ma nwii, a ga nyodi mu ntôñ u, a ga gwel ha bé nson. 26 A nla hôla lôkisañ i i ngwel nson i ndap libadô i likoda, ndi nyemede a ga gwel ha bé nson nyoo. Hala nyen u nlama boñ inyu Lôk Lévi ni minson nwap.”+

9 Yéhôva a bi pôdôs Môsi i ñoñ Sinai, i sôñ bisu+ i nwii mi nyônôs ima, i mbus manyodi map i loñ Égiptô, a kal nye le: 2 “Bon ba Israel ba nlama kôôba sesema i Pasa+ i ntéak ngéda.+ 3 Ni nlama lôôs yo i ntéak ngéda, hala wee i hilo hi nyônôs 14 munu sôñ ini i ngéda hiañgaa hi nañal.* Ni nlama lôôs yo+ inoñnaga ni matiñ mé momasôna ni biniigana gwé gwobisôna.”

4 Jon Môsi a bi kal bon ba Israel le ba kôôba sesema i Pasa. 5 Ha nyen ba bi kôôba sesema i Pasa i ñoñ Sinai, i hilo hi nyônôs 14 hi sôñ bisu i ngéda hiañgaa hi bi nañal.* Bon ba Israel ba bi boñ mam momasôna Yéhôva a bi kal Môsi.

6 Ndi ngim bôlôm i bi yila nyega inyule ba bi tihba mim,*+ jon ba bé bé le ba kôôba sesema i Pasa i kel i. Inyu hala nyen ba bi telep Môsi bo Arôn bisu i kel i,+ 7 ba kal Môsi le: “Di yé nyega inyule di bi tihba mim.* Kii di nlama boñ inyu ti Yéhôva likébla i ntéak ngéda lôñni bana bon ba Israel+ bape?” 8 Môsi a kal bo le: “Bema me bat Yéhôva, me nok i jam a ga kal inyu nan.”+

9 Ha nyen Yéhôva a bi kal Môsi le: 10 “Kal Lôk Israel le: ‘Ibale mut ikété nan tole ikété mbôda nan a yé nyega inyule a ntihba mim,*+ tole a yé liké, to hala a nlama kôôba sesema i Pasa inyu Yéhôva. 11 A nlama lôôs yo i sôñ i nyônôs iba,+ i hilo hi nyônôs 14 i ngéda hiañgaa hi nañal.* A nlama je yo ni bret bi ngi-séñha lôñni bikai bi nlol.+ 12 A nlama bé tééda yo ipam kegla,+ a nlama bé to bôk hés yo ki yo mu.+ A nlama kôôba yo inoñnaga ni matiñ momasôna ma Pasa. 13 Ibale mut a yé mpubhaga, tole a nke bé liké ndi a tjél kôôba sesema i Pasa, i mut nu a nlama nôla,*+ inyule a nti bé Yéhôva likébla i ntéak ngéda. I mut nu a ga saa inyu béba a mboñ.

14 “‘Ndi ibale nkén mut a nyééne i weeni, yak nye a nlama kôôba sesema i Pasa inyu Yéhôva.+ A nlama boñ hala inoñnaga ni matiñ ma Pasa lôñni biniigana gwé.+ Nkén mut ni man loñ+ ba ga bana ndigi litiñ jada.’”

15 Ndi i kel ba bi téé+ lap, ond i bi hô lap, hala wee ndap libadô i Mbôgi; ndi kôkôa yom i bé nene wengoñle hié, yon i bé i ngii lap letee ni kegla.+ 16 Haana nyen mam ma bé tagbe: Ond i bé hô lap njamuha, i yom i bé pôna hié i hôk lap juu.+ 17 I ngéda ond i bé nyodi i ngii lap, i bet, bon ba Israel ba bé ba ke;+ i ngéda ond i bé telep homa wada, bon ba Israel ba bé ba yééne ha homa nu.+ 18 Ni oda i Yéhôva nyen bon ba Israel ba bé ba ke, ni oda i Yéhôva ki nyen ba bé yén ngim homa.+ Ntel ond i yé i ngii lap, ba nyén ha homa nu. 19 I ngéda ond i nkida i ngii lap ngandak dilo, bon ba Israel ba nôgôl Yéhôva, ba nke bé to homa.+ 20 Ngim mangéda ond i bé i yégle i ngii lap ndék dilo ndigi. Ni oda Yéhôva ba bé ba yén ngim homa, ni oda Yéhôva ki nyen ba bé ba ke. 21 Ngim mangéda ond i bé i yégle i ngii lap ibôdôl kôkôa ipam kegla, ndi ibale ond i nyodi i ngii lap kegla, ba nkahal ke. To ond i nyodi juu to njamuha, ba nkahal ke.+ 22 To dilo diba, to sôñ yada tole iloo ha, ntel ond i yé ngii lap, bon ba Israel ba nyén ha homa nu, ba nke bé. Ndi ibale ond i nyodi, ba nkahal ke. 23 Ni oda i Yéhôva nyen ba bé yén ngim homa, ni oda i Yéhôva ki nyen ba bé ba ke. Ba bé nôgôl Yéhôva inoñnaga ni oda i Yéhôva a bé a ti Môsi.

10 I mbus, Yéhôva a kal Môsi le: 2 “Bañ sép iba+ inyu yoñ; bañ yo ni silba le ba mbép ni hama, w’a gwélél yo inyu kot litén ni i yis litén le ngéda i nkola le ba jôp i njel. 3 I ngéda ba nhem yo iba, litén jolisôna li nkodba i bisu gwoñ i lijubul li ndap libadô i likoda.+ 4 Ndi ibale ba nhem ndigi sép yada, ndigi baane ba litén botama, hala wee, baane ba dikôô di bon ba Israel bon ba ga kodba i bisu gwoñ.+

5 “I ngéda ni nhem sép le kiñ i bedek, i sôhôk, ntôñ u yé i pes likôl+ won u njôp i njel. 6 I ngéda ni nhem sép inyu ngélé nyônôs iba le kiñ i bedek, i sôhôk, ntôñ u yé i pes ñombok+ won u njôp i njel. Ba nlama hem sép hala hiki ngéda ntôñ wada u njôp i njel.

7 “Ndi i ngéda ni nsômbôl kot litén, ni nlama bé hem sép+ le kiñ i bedek i sôhôk. 8 Bon bôlôm ba Arôn, hala wee biprisi, bon ba nlama hem sép,+ i lihemek li sép lini li ga yila litiñ li li nom tjai ndi tjai inyu nan.

9 “Ibale baoo banan ba ba ntééñga bé ba nlo i jôs bé gwét i loñ nan, ni nlama hem sép+ yo iba inyu sébél bôt i gwét; ha nyen Yéhôva Nyambe nan a’ hoñol bé, a sôñ ki bé i moo ma baoo banan.

10 “I mangéda ma maséé,+ hala wee i mangand manan+ ni i bibôdle bi sôñ, ni nlama hem sép yo iba i ngéda ni nti bisesema bi ntul hié+ ni bisesema inyu kôp nsañ;+ i lihemek li sép lini li ga boñ le Nyambe nan a hoñol bé. Men me yé Yéhôva Nyambe nan.”+

11 I nwii mi nyônôs ima, i sôñ i nyônôs iba, i hilo hi nyônôs 20 mu sôñ+ i, ond i bi nyodi i ngii lap+ Mbôgi. 12 Ha nyen bon ba Israel ba bi bôdôl nyodi i ñoñ Sinai kiki manyodi+ ma mintôñ ma bé ntjegek, ond i bi ke i telep i ñoñ Paran.+ 13 Hala a bé ngélé bisu le ba nyodi ni oda Yéhôva a bi ti Môsi.+

14 Ntôñ u matén maa i het bon ba Yuda ba yé won u bi bôk jôp i njel,* Naasôn+ man Aminadab nyen a bé ñane litén li Yuda. 15 Nétanel+ man Zuar nyen a bé ñane litén li bon ba Isakar. 16 Éliab+ man Hélôn nyen a bé ñane litén li bon ba Zébulôn.

17 I ngéda ba bi noñgol+ lap, bon bôlôm ba Gersôn+ ni bon bôlôm ba Mérari+ bon ba bi begee lap, ba jôp i njel.

18 I mbus, ntôñ u matén maa i het litén li Ruben li yé u bi jôp i njel,* Élizur+ man Sédéur nyen a bé ñane litén li Ruben. 19 Sélumiel+ man Zurisadai nyen a bé ñane litén li bon ba Siméôn. 20 Éliasaf+ man Déuel nyen a bé ñane litén li bon ba Gad.

21 I mbus, Lôk Kôhat i i mbegee gwom bi homa mpubhaga+ yon i bi jôp i njel. Ilole ba mpam i homa ba nke, ba nlama koba le lap i mal tééba.

22 I mbus, ntôñ u matén maa i het bon ba Éfraim ba yé won u bi jôp i njel,* Élisama+ man Amihud nyen a bé ñane litén li Éfraim. 23 Gamaliel+ man Pédazur nyen a bé ñane litén li bon ba Manasé. 24 Abidan+ man Gidôni nyen a bé ñane litén li bon ba Benyamin.

25 I mbus, ntôñ u matén maa i het litén li bon ba Dan li yé won u bi jôp i njel,* won u bi sôk nyodi ikété matén momasôna, Ahiézer+ man Amisadai nyen a bé ñane litén li Dan. 26 Pagiel+ man Ôkran nyen a bé ñane litén li bon ba Aser. 27 Ahira+ man Énan nyen a bé ñane litén li bon ba Naftali. 28 I bitelbene bini gwon mintôñ* mi bon ba Israel mi bé noñ i ngéda mi bé jôp i njel.+

29 Ha nyen Môsi a bi kal Hôbab man Réuel*+ nu a yé man Lôk Madian, nkil Môsi le: “Di yé ke i loñ Yéhôva a bi kal le a ga ti bés.+ Bôk bés di kenek,+ d’a boñ we loñge inyule Yéhôva a bi bôn Israel+ gwom bilam.” 30 Ndi Hôbab a timbhe le: “M’a ke bé lôñni bé, m’a témb i loñ yem ni lihaa jem.” 31 Môsi a kal nye le: “Soho, u yék bañ bés, inyule u nyi hee di nla téé mandap més ma mabadô i ñoñ, wen u mba u ñunda bés njel.* 32 Ibale u nke ni bés,+ hiki loñge jam Yéhôva a ga bôñôl bés, yak bés di ga bôñôl we jo.”

33 Ba bi nyodi hikôa hi Yéhôva,+ ba ke liké li dilo daa; mu dilo di tjo daa, nkuu+ Malômbla u Yéhôva u bé bôk bo bisu inyu yiñil bo liyééne.+ 34 Ond+ i Yéhôva i bé ngii yap njamuha, i ngéda ba nkahal nyodi i homa ba nyééne.

35 Hiki ngéda ba mbegee nkuu Malômbla le ba nkahal ke, Môsi a nkal le: “Telep a Yéhôva,+ baoo boñ ba sanda, i bet ba ñoo we ba ke we ngwéé.” 36 Ndi i ngéda ba nsuha wo, a nkal le: “A Yéhôva, témb ikété môm* ma dikôô ma Israel.”+

11 Ndi litén li bi bôdôl tjelel i bisu bi Yéhôva. I ngéda Yéhôva a bi nok njelel yap, hiun hié hi kala; Yéhôva a om hié, hi ligis ngim bôt i bé mu mapañ, i homa ba bé yééne. 2 Ha nyen litén li bi bôdôl lôndôl Môsi, Môsi a yemhe Yéhôva,+ hié hi lém. 3 Ba o i homa nu jôl le Tabéra,* inyule Yéhôva a bi om hié inyu ligis bôt.+

4 Bakén+ ba bôt* ba ba bé ikété yap, ba bi unda le ba gwé huluk ñem;+ ha nyen yak bon ba Israel ba bi témb ba bôdôl bégél, ba kalak le: “Njee a ga ti bés nuga le di je?+ 5 I ngéda di bé i Égiptô, di bé je tjobi yañga, yak ni ngond i nkana,* mabôk,* puarô, malañ ni ail.+ Kinje loñge ngéda! 6 Ndi nano bés bana ngui i mal. Di gwé ha bé yom ipe i je, ndigi mana ni mana.”+

7 Mana+ nwomede ma bé kiki mbôô kôriañda,+ i nen-ge kiki bedelium. 8 Bôt ba litén ba bé ba tjama inyu bada nwo, ba bé ba kok nwo i ngok kôgôl tole ba bé ba tét nwo i ntjobo. I mbus ba bé ba téé nwo i juu le mi pél, tole ba bé ba boñ ngiiña bret+ ni nwo; i bé ne i nyo kiki koga i môô. 9 Ni juu, i ngéda manwee ma bé ma kwo i homa ba nyééne, yak mana ma bé ma kwo.+

10 Kiki Môsi a nok bôt ba ñee, lihaa jada i mbus jada, hiki mut i lijubul li ndap yé libadô. Ha nyen Yéhôva a bi unup ngandak,+ Môsi nyemede hala a bébél nye. 11 Ndi Môsi a bat Yéhôva le: “Inyuki u ntééñga ngwélél woñ? Inyuki me nene bé loñge i mis moñ i nya i yé le u bi bééga me mbegee i bôt bana bobasôna?+ 12 Baa men me yé isañ litén lini jolisôna? Baa men me bi gwal bo, le u kal me le: ‘Begee bo i tôl yoñ, kiki nléla* a mbegee man,’ inyu kena bo i loñ u bi kum soñ le u ga ti basôgôlsôgôl bap?+ 13 Hee me ga yôñôl nuga inyu ti i bôt bana bobasôna? Inyule ba ñee i bisu gwem ee ni ee, ba kalak le: ‘Ti bés nuga le di je!’ 14 Metama me nla bé nihbe i bôt bana bobasôna; mbegee ini i nloo me.+ 15 Ibale hala nyen u mba u mboñ me, soho, nseñ u nol me nano.+ Ibale u ngwés toi me, u neebe ha bañ le me tehe kuu ipe yo ki yo.”

16 Yéhôva a timbhe Môsi le: “Ikété mimañ mi Israel, kot 70 ma bôt ba u nyi* le ba yé mimañ ni baane ba litén,+ lona bo i ndap libadô i likoda, ba telep ha lôñni we. 17 Me ga sôs,+ me ga pôdôs we,+ me héya ndék mu mbuu u gwé,+ me bii wo i ngii yap. Ba ga hôla we i begee mbegee i litén, le u begee ha bañ yo wetama.+ 18 Haana nyen u ga kal litén: ‘Pubhana+ bébomede inyu yani, inyule ibabé nkaa n’a je nuga. Ni bi ee i maôô ma Yéhôva,+ ni kal le: “Njee a’ ti bés nuga le di je? Nseñ u bé le di yén i Égiptô.”+ Ñ Yéhôva a ga ti bé nuga, n’a je nuga.+ 19 N’a je, ha hilo hiada bé, diba bé to, to ditan, to jôm, to môm ima, 20 ndi ngim sôñ, letee nuga i pémél bé i môl, i tok ki bé+ inyule ni bi tjél Yéhôva nu a yé ni bé, ni bé ee i bisu gwé, ni kalak le: “Kii yo i bi héya bés i Égiptô?”’”+

21 I mbus ha, Môsi a kal le: “I bôt ba yé ni me ba yé 600 000 i bôlôm,*+ ndi wemede u bi kal le: ‘Me ga ti bo nuga, ba ga je yo ngim sôñ’! 22 To ibale ba nôlôl bo bibémba bi mintômba ni bi nyaga gwobisôna, bi ga kola bo? Tole tjobi tjodisôna di tuye tjon ba ga lop ndi di kola bo?”

23 Yéhôva a timbhe Môsi le: “Baa woo u Yéhôva u yé kidik?+ Nano w’a tehe too jam me mpot li ga pémél we tole li ga pémél bé we.”

24 Môsi a pam, a kal litén bibañga Yéhôva a bi kal nye. Ikété mimañ mi litén, a kot 70 ma bôlôm, a téé bo le ba kéña lap.+ 25 Ha nyen Yéhôva a bi lôl ikété ond,+ a pôdôs Môsi,+ mu mbuu+ Môsi a bééna, a héya ndék a ha wo i ngii 70 ma mimañ. Ndik kiki ba bi kôhna mbuu, ba kahal boñ kiki bapôdôl,*+ ndi ba bi boñ bé ki hala ngélé ipe.

26 Ndi bôlôm iba ba bi yégle i homa mandap ma yé. Môl map le Eldad bo Médad. Ba bi ke bé i lap, ndi ba bi kôhna mbuu, môl map ma bé ntilga ni môl ma bana bôt bape. Jon ba bi bôdôl boñ kiki bapôdôl nyoo i mandap. 27 Hiloga hiada hi ke ngwéé i añle Môsi le: “Eldad bo Médad ba yé nyoo i mandap, ba mboñ kiki bapôdôl!” 28 Ha nyen Yôsua,+ man Nun, nu a yé ngwélél Môsi ibôdôl nye mañge, a kal le: “A nwet wem Môsi, gwel bo!”+ 29 Môsi a timbhe nye le: “Inyuki hala a ntééñga we?* Ngo ngôñ yem i yé le litén li Yéhôva jolisôna li yila bapôdôl, ni ki le Yéhôva a ti bo mbuu wé!” 30 Kiki ngéda i ntagbe, Môsi ni mini mimañ mimpe mi Israel mi huu.

31 Yéhôva a bi om mbebi, mbebi i kahal nyodna dikwaa* i tuye, di kahal kwo munu ipañ liyééne jap jolisôna,+ yom kiki bo liké li kel yada ini pes, ni yom kiki bo liké li kel yada ii pes ipe, di kéña liyééne jap jolisôna, nwind u bééna ntel u dikéñéé di moo* diba. 32 Njamuha yosôna ni u wonsôna, yak ni hilo hi hi bé noñ ha, litén li bi yén péé inyu bada dikwaa. I nwet a bi bada ndék a bééna jôm li hômer,* ba bé bii* tjo mu ipañ liyééne jap. 33 Ndi nuga i bé i ngi yii bo masoñ, bo ngi mal nyambaa yo, hiun Yéhôva a bééna inyu litén hi kala, Yéhôva a bôdôl nol bôt ba litén, a nol yaga bo ngandak.+

34 Ba o i homa nu jôl le Kibrôt-Hatava,*+ inyule ha nyen ba bi jul bôt ba bééna huluk ñem ikeñi.+ 35 Litén li nyodi i Kibrôt-Hatava li ke i Hazérôt, li yééne ha i Hazérôt.+

12 Miriam bo Arôn ba bi bôdôl huñbene Môsi inyu ngond Lôk Kus a bi yoñ, inyule a bi bii ngond Lôk Kus.+ 2 Ba bé kal le: “Baa Yéhôva a mpôdhene ndik bés ni njel Môsi? Baa a mpot bé yak ni njel yés?”+ Yéhôva a bé emble.+ 3 Môsi a bééna suhulnyuu iloo bôt bobasôna*+ hana ’isi.

4 Kunda yada, Yéhôva a kal Môsi, Arôn ni Miriam le: “Pama bé bo baa, kena i ndap libadô i likoda.” Bo baa ba pam. 5 Yéhôva a suhul i jél li ond,+ a telep i lijubul li ndap libadô, a sébél Arôn bo Miriam. Bo iba ba tiige. 6 Ha nyen a bi kal le: “Soho, emblana bibañga gwem. Ibale mpôdôl nu Yéhôva a bak ipôla nan, ki me mboñ le a yi me ikété yiinda,+ me pôdhak ki nye ikété eem.+ 7 Ndi hala bé nyen me mboñ ni ngwélél wem Môsi! Me bi téé nye le a ane ndap yem yosôna.*+ 8 Me mpôdôs nye+ mbom ni mbom,* he ni mangén* bé, ndi me ntibil toñle nye mam; Yéhôva a nene yak i bisu gwé. Inyuki ni nkon bé woñi i huñbene ngwélél wem Môsi?”

9 Yéhôva a bi unbene bo, a yék bo, a ke. 10 I ngéda ond i bi nyodi i ngii ndap libadô, lô i kôp Miriam, a pôp le peeñ.*+ Kiki Arôn a nhielba, a béñge Miriam, a tehe le a nkon lô.+ 11 I nlélém ngéda, Arôn a kal Môsi le: “Soho a nwet! Me nsoohe le u éñél bañ bés i béba ini! Di mboñ bijôñ. 12 Soho, u nwas bañ nye hala, wengoñle man nu a nwo ikété libum, nu minsôn nwé mi mbol pes yada!” 13 Ha nyen Môsi a bi bôdôl lôndôl Yéhôva, a kalak le: “A Nyambe, soho mbuubaha nye! Soho ndigi!”+

14 Yéhôva a timbhe Môsi le: “Ibale isañ a ntjôle nye matai i su, baa ki hala a nwéha bé nye nyuu dilo disaambok? Hana nye i kat* inyu dilo disaambok, ni héya nye i homa ni nyééne,+ ndi i mbus ngéda a ntémb a loo.” 15 Hala nyen ba bi ha Miriam i kat inyu dilo disaambok,+ ba héya nye i homa ba bé yééne; litén li bi jôp bé i njel letee Miriam a témb a lo. 16 I mbus ha, litén li nyodi i Hazérôt,+ li ke li yééne i ñoñ Paran.+

13 Yéhôva a bi pôdôs Môsi, a kal nye le: 2 “Om bôt ba mbep i loñ* Kanaan, i me bi ti bon ba Israel. Ikété hiki litén,+ u nlama pohol mut wada, i mut nu a bak ñane.”+

3 Ha nyen Môsi a bi om bôt inoñnaga ni oda i Yéhôva, ba bi nyodi i ñoñ Paran.+ Bobasôna ba bé baane ba Lôk Israel. 4 Môl map mana: Inyu litén li Ruben, Samua man Zakur; 5 inyu litén li Siméôn, Safat man Hôri; 6 inyu litén li Yuda, Kaleb+ man Yéfuné; 7 inyu litén li Isakar, Igal man Yôsep; 8 inyu litén li Éfraim, Hôséa+ man Nun; 9 inyu litén li Benyamin, Palti man Rafu; 10 inyu litén li Zébulôn, Gadiel man Sôdi; 11 inyu litén li Yôsep,+ i litén li Manasé,+ Gadi man Susi; 12 inyu litén li Dan, Amiel man Gémali; 13 inyu litén li Aser, Sétur man Mikael; 14 inyu litén li Naftali, Nabi man Wôfsi; 15 inyu litén li Gad, Guél man Maki. 16 I bôt ba mbep ba bon Môsi a bi om i loñ Kanaan. Môsi a bi o ki Hôséa man Nun jôl le Yôsua.*+

17 I ngéda Môsi a bé om bana bôt ba mbep i loñ Kanaan, a bi kal bo le: “Beda i Négeb; i mbus, ni bet i mbok dikôa.+ 18 Ni nlama yi lelaa loñ i i yé,+ ibale i bôt ba nyééne mu ba gwé ngui tole ba mbomb, ibale ba yé ndék tole ngandak, 19 ibale loñ i yé ilam tole i yé ibe, ibale bitison gwap bi gwé mapénd ma ngui tole bi gwé bé. 20 Ni béñge yak ibale hisi hi nti bijek* tole hi nti bé,*+ ibale bie bi yé tole bi ta bé. I mbéda le ni bana ñem ngui,+ ni lona ki matam ma bibebela bi loñ i.” Hala a bé ngéda libumbul li matam ma bisu ma nkôô wai.+

21 Ha nyen ba bi bet, ba wan loñ ibôdôl ñoñ Zin+ ipam i Réhôb,+ bebee ni Lébô-Hamat.*+ 22 I ngéda ba bi bet i Négeb, ba pam i Hébrôn+ i het Ahiman, Sésai ni Talmai,+ bon ba Lôk Anak+ ba bé yééne. Ndi Hébrôn a bi ôña nwii minsaambok ilole Zôan a ñôña i loñ Égiptô. 23 I ngéda ba bi pam i nsôsôgô* u Eskol,+ ba kit ntjep u u bééna liyuu li matam ma nkôô wai, ba som kék mu, bôt iba ba begee jo; ba bi kit yak ndék matam ma grénad ni matam ma faigé.+ 24 Ba bi o homa nu jôl le nsôsôgô* u Eskol*+ inyu liyuu li matam bon ba Israel ba bi ket ha.

25 I mbus 40 ma dilo,+ ba mal wan loñ, ba huu. 26 Ba témb yak Môsi ni Arôn i homa litén jolisôna li Israel li bé i Kades,+ i ñoñ Paran. Ba añle litén jolisôna liké jap, ba unda yak bo matam ma loñ i. 27 Ba kal Môsi le: “Di bi jôp i loñ u bi ep bés, loñ i i nkuli toi milik ni wéi,+ yak matam+ mana di nlona. 28 Ndi i bôt ba nyééne mu loñ i ba gwé ngui ngandak, bitison bi gwé mapénd ma ngui bi yé bikeñi ngandak. Di ntehe yak bon ba Lôk Anak nyoo.+ 29 Lôk Amalek+ i nyééne i loñ Négeb;+ Lôk Hét, Lôk Yébus+ ni Lôk Amôr+ i nyééne i mbok dikôa; Lôk Kanaan+ i nyééne bebee ni tuye+ ni i ngwañ lom Yordan.”

30 Ndi Kaleb a bi noode mômôs bôt ba litén ba ba bé i bisu bi Môsi, a kal bo le: “Di pala bet, di ga yoñ i loñ i ibabé pééna, inyule di nla yémbél+ bôt ba loñ i.” 31 Ndi i bôt ba mbep ba bé lôñni nye, ba kal le: “Di nla bé jôs bôt ba loñ i inyule ba gwé ngui iloo bés.”+ 32 Ba bi kônde ti bon ba Israel béba ñañ+ inyu loñ ba bi hes, ba kalak le: “I loñ di bi hes i yé loñ manola, ibale di nke nyoo ba ga nol bés, yak bôt bobasôna di ntehe nyoo ba yé mimbôñgô mi bôt.+ 33 Néfilim yon di bi tehe nyoo, bon ba Lôk Anak+ ba yé mbôda i* Néfilim. I mis més, di bé nene kiki bitandi i bisu gwap, yak bomede ba bé tehe bés hala.”

14 Ha nyen litén jolisôna li bi bédés kiñ, li londok, li ee u+ wonsôna. 2 Bon ba Israel bobasôna ba bôdôl huñbene Môsi bo Arôn,+ litén jôlisôna li bé kal le: “Ibale di wo to i Égiptô tole munu ñoñ! 3 Inyuki Yéhôva a nlona bés munu loñ ini le di wo ni pansoñ?+ Ba ga kena baa bés ni bon bés i minkôm.+ Baa i ta bé nseñ le di témb i Égiptô?”+ 4 Ba bé pot bo ni bo le: “Loga di téé ñane, di témb Égiptô!”+

5 Ha nyen Môsi bo Arôn ba bi ôm mbom ’isi i bisu bi bon ba Israel bobasôna ba bé nkodbaga. 6 Yôsua+ man Nun bo Kaleb+ man Yéfuné, ba ba bé i nsoñgi u bôt ba bé i hes loñ, ba pat mambot map, 7 ba kal litén li bon ba Israel jolisôna le: “I loñ di bi hes i yé loñge loñ+ kiyaga. 8 Ibale Yéhôva a nkônôl bés maséé, a ga jôbna bés mu loñ i, a ti ki bés yo, loñ i i nkuli milik ni wéi.+ 9 Ndi ni ndogbene bañ Yéhôva, ni kon bañ to bôt ba loñ+ woñi, inyule di ga tjé bo.* Yéhôva a yé ni bés+ ndi bo ba gwé bé mut a nsôñ bo. Ni kon bañ bo woñi.”

10 Ndi litén jolisôna li bôdôl han le li ñôm bo ngok.+ Ha nyen lipém li Yéhôva li bi nene i ndap libadô i likoda i bisu bi litén li Israel jolisôna.+

11 Yéhôva a kal Môsi le: “Letee ni ngéda mbe bôt bana ba ga yan+ me, letee ni ngéda mbe ba ga hémle bé me, ndi ki le ba mal tehe biyimbne gwem gwobisôna ipôla yap?+ 12 Nwas me leñ bo himala hi kon, me tjé ki bo; me yilha we loñ i i nloo bo ngui ni bikeñi.”+

13 Môsi a timbhe Yéhôva le: “Ibale u mboñ hala, bon ba Égiptô i het u bi nyodna litén lini ni ngui yoñ, ba ga nok+ i jam li, 14 ba añle ki jo i bôt ba nyééne munu loñ ini. A Yéhôva, yak bo ba bi nok le u yé ni litén+ joñ, ni le li ntehe we mbom ni mbom.+ U yé Yéhôva, jél joñ li ond li yé ngii yap, u mbôk ki bo bisu ikété jél li ond njamuha ni ikété jél li hié ni juu.+ 15 Ibale u ntjé litén joñ ngélé yada,* biloñ bi bi nok ngan yoñ bi ga kal le: 16 ‘Yéhôva a bi la bé jôbna bôt bana i loñ a bi bôn le a nti bo, jon a bi nol bo i ñoñ.’+ 17 Nano a Yéhôva, soho unda le ngui yoñ i yé ikeñi, kiki u bi bôn i ngéda u bi kal le: 18 ‘Yéhôva a mpala bé unup, a ntéñbe i unda ngandak gwéha,*+ a nwéhlak hihôha ni liboñok libe, ndi kekikel a ga nwas bé béba mut ngi kogse, a nkogse ki bon, balal ni ndandi+ inyu dihôha di basañ.’ 19 Soho nwéhél liboñok libe li litén lini inyule gwéha yoñ* i mal bé, kiki u bi bôdôl nwéhél jo ibôdôl i Égiptô letee ni nano.”+

20 Ha nyen Yéhôva a bi kal le: “Me ga nwéhél bo kiki u mpot.+ 21 Ndi me nkum soñ ni niñ yem le, hisi hiosôna hi ga yon ni lipém li Yéhôva.+ 22 Inyu bôt ba bi tehe lipém jem ni biyimbne+ gwem i loñ Égiptô ni i ñoñ, ndi to hala ba noode+ me jôm li ngélé, ba tjél ki emble kiñ+ yem; to wada wap 23 a ga tehe bé loñ me bi kum soñ le m’a ti basôgôlsôgôl bap. To wada ikété ba ba nyan me, a ga tehe bé yo.+ 24 Ndi kiki ngwélél wem Kaleb+ a bi hoñol bé kiki bé, ni le a bi kônde nôgôl me ni ñem wé wonsôna, me ga jôbna nye i loñ a bé, yak mbôda yé i ga yoñ i loñ i.+ 25 Kiki Lôk Amalek ni bôt ba Kanaan+ ba nyééne i tegep i mbok,* yani ni nlama témb ni mbus, ni tagbene i ñoñ, ni yoñ njel i nke i tuye Nkôibaga.”+

26 I mbus, Yéhôva a kal Môsi bo Arôn le: 27 “Letee ni ngéda mbe i béba litén ini i ga kônde huñbene me?+ Me nok kiki bon ba Israel ba nhuñbene+ me. 28 Kal bo le: ‘Haana nyen Yéhôva a mpot le: “Me nkum soñ ni niñ yem le, i jam ni mpot, jon me ga boñ le li pémél bé!+ 29 Mim minan mi ga kwo+ munu ñoñ, ñ, bébobasôna ba ni bi soñglana, bé ba ni gwé 20 ma nwii tole iloo ha, bébobasôna ba ni bi huñbene+ me. 30 To wada nan a ga jôp bé i loñ me bi bôn* le n’a yééne+ mu, handugi Kaleb man Yéfuné bo Yôsua man Nun.+

31 “‘“Ndi bon banan ba ni bi kal le ba ga ke minkôm,+ bon me ga jôbna mu; ba ga yi i loñ bé ni ntjél.+ 32 Ndi bé, mim minan mi ga kwo munu ñoñ. 33 Bon banan ba ga yila batééda bémba munu ñoñ 40 ma nwii,+ ba ga begee kogse inyu ndok* nan letee mim u nsôk u kwo i ñoñ.+ 34 Inoñnaga ni nsoñgi u dilo ni bi tégbaha i hes loñ, hala wee 40 ma dilo,+ n’a begee kogse inyu bibéba binan 40 ma nwii,+ hilo hiada inyu ngim nwii, hilo hiada inyu ngim nwii; inyu boñ le ni yi le ba nkolba bé me.*

35 “‘“Me Yéhôva men me mpot. Hala nyen me ga boñ béba litén lini jolisôna li li nkodba inyu bédél me: Ba ga tjiba i ñoñ, mu ki nyen ba ga wél.+ 36 I bôt ba mbep Môsi a bi ep i loñ, ba ba bi tinde litén jolisôna i huñbene nye i ngéda ba bi témbna béba ñañ inyu loñ,+ 37 ñ, i bôt ba bi témbna béba ñañ inyu loñ, Yéhôva+ a ga nol bo. 38 Ndi Yôsua man Nun bo Kaleb man Yéfuné, ba ba bé i nsoñgi u bôt ba bi hes loñ, ba ga yégle i niñ.”’”+

39 I ngéda Môsi a bi añle bon ba Israel i mam mana momasôna, litén li bôdôl ee ngandak. 40 I mbus, ba pule telep kegla, ba noode bet hikôa, ba kal le: “Di yé nkôôbaga i ke i homa Yéhôva a bi kal bés, inyule di mboñ béba.”+ 41 Ndi Môsi a kal le: “Inyuki ni ndogbene oda i Yéhôva? Ni ga la bé yémbél. 42 Ni bet bañ nyoo, inyule Yéhôva a ta bé lôñni bé, ni ga la bé yémbél baoo+ banan. 43 Inyule Lôk Amalek ni bôt ba Kanaan ba yé ha bisu binan,+ n’a nôla ni pansoñ. Kiki ni ntjôô Yéhôva, Yéhôva a’ ba bé ni bé.”+

44 To hala, ngôk wap u bi tinde bo i bet hikôa,+ ndi nkuu Malômbla u Yéhôva u bi yégle i homa ba bé yééne,+ to Môsi a bi ke bé ni bo. 45 Ha ni nyen Lôk Amalek ni bôt ba Kanaan ba ba bé yééne mu hikôa hi, ba bi sôs, ba bép bo gwét, ba noñ bo letee ni Hôrma.+

15 Yéhôva a bi kônde pôdôs Môsi, a kal nye le: 2 “Kal bon ba Israel le: ‘I ngéda ni ga jôp i loñ me nti bé le ni yééne+ 3 ndi ni kahal ti Yéhôva sesema i hié, to ni nyôñôl yo i bémba nyaga tole i bémba i mintômba, to ibale sesema i ntul i hié i,+ to sesema inyu yônôs mbônga u tôbôtôbô, to likébla ñem u ntinde mut i ti+ tole likébla ni nti i ngéda mangand+ inyu boñ le Yéhôva+ a nok loñge njiñ,* 4 i mut a nti likébla a nlama ki ti Yéhôva kilô yada ni jam* i flawa ilam,+ mbôôk ni lita môô yada.* 5 Ni nlama ki ti sesema i ntul hié+ tole sesema i man nlôm ntômba lôñni likébla li wai, li bak lita yada.* 6 Inyu nlôm ntômba, ni nlama ti likébla li flawa ilam, jam kiki bo kilô iba ni pes,* mbôôk ni lita môô yada ni jam.* 7 Ni nlama ki ti likébla li wai, lita yada ni jam* inyu boñ le Yéhôva a nok loñge njiñ.*

8 “‘Ibale ni nsômbôl ti nlôm nyaga kiki sesema i ntul hié,+ tole sesema inyu yônôs mbônga u tôbôtôbô,+ tole sesema inyu kôp nsañ+ ni Yéhôva, 9 ni nlama ti nlôm nyaga ni likébla li bijek,+ jam kiki bo kilô ina,* i flawa ilam mbôôk ni bebee le lita môô iba.* 10 Ni nlama yak ti likébla li wai,+ bebee le lita iba,* kiki sesema i hié inyu boñ le Yéhôva a nok loñge njiñ.* 11 Hala nyen ni nlama boñ inyu hiki nlôm nyaga, hiki nlôm ntômba, hiki man ntômba tole hiki nlôm kembee.* 12 To ibale binuga bi yé gwañen, hala nyen ni nlama boñ inyu hiki nuga, inoñnaga ni nsoñgi wap. 13 Hala nyen i bôt ba bé bon ba Israel i ligwéak bobasôna ba nlama ti sesema i hié, inyu boñ le Yéhôva a nok loñge njiñ.*

14 “‘Ibale nkén mut nu a yé ipôla nan tole nu a niñ ipôla nan ngandak nwii, a nlama ti sesema i hié, inyu boñ le Yéhôva a nok loñge njiñ,* yak nye a nlama boñ nlélém kiki bé.+ 15 Bé bon ba Israel ni bakén ba bôt ba ba yé ipôla nan n’a bana ndigi mbén yada. I mbén i, i ga nom tjai ndi tjai. Maselna ma ta bé ipôla nkén mut lôñni bé i bisu bi Yéhôva.+ 16 Mbén y’a ba ndigi yada, yak mbagi y’a ba ndigi yada inyu nan ni bakén ba bôt ba ba nyééne i bééni.’”

17 Yéhôva a bi kônde ki kal Môsi le: 18 “Kal bon ba Israel le: ‘I ngéda ni njôp i loñ me yé i kena bé, 19 ndi ni je bijek* bi loñ,+ ni nlama ti Yéhôva likébla. 20 N’a yoñ likébla mu libumbul linan li bisu li flawa,* ni boñ bret bi bi yé ngiiña.+ N’a ti gwo nlélém kiki ni nti makébla ma nlôl i litidil. 21 Tjai ndi tjai, ni nlama ti Yéhôva flawa* i libumbul linan li bisu kiki likébla.

22 “‘Ndi ibale ni mboñ hihôha, ndi ni tééda bé mambén mana momasôna Yéhôva a bi ti Môsi, 23 mam momasôna Yéhôva a bi kal Môsi, ibôdôl i kel Yéhôva a bi pot mo letee ni tjai ndi tjai, 24 ibale hihôha hi hi mbôña ibabé le litén li yi, litén jolisôna li nlama ti man nlôm nyaga wada kiki sesema i ntul hié inyu boñ le Yéhôva a nok loñge njiñ,* lôñni likébla jé* li bijek, ni likébla jé li wai kiki mbén+ i nkal, ni nlama ki ti man nlôm kembee wada kiki sesema inyu béba.+ 25 Prisi i ga boñ mam ma mbéda inyu hô bibéba bi bi litén jolisôna li bon ba Israel, le ndi ba kôhna nwéhél+ inyule hihôha hion ba mboñ, ba lona ki Yéhôva sesema i hié ni sesema i béba inyu hihôha ba bi boñ i bisu bi Yéhôva. 26 Litén li Israel jolisôna li ga kôhna nwéhél yak ni bakén ba bôt ba nyééne ipôla yap, inyule hihôha hion litén jolisôna li bi boñ.

27 “‘Ibale mut* a mboñ béba ngi kôôba, a nlama ti ñin kembee u u ngi yii i nwii wé bisu inyu sesema i béba.+ 28 Prisi i ga boñ mam ma mbéda inyu hô bibéba bi mut* a mboñ hihôha i bisu bi Yéhôva, inyule a mboñ béba ngi kôôba. Prisi i ga boñ mam ma mbéda inyu hô bibéba gwé le a kôhna nwéhél.+ 29 Ibale mut a mboñ béba ngi kôôba,+ to a yé man Lôk Israel to a yé nkén mut nu a nyééne ipôla nan, mbén y’a ba ndigi yada inyu nan.

30 “‘Ibale mut* a mboñ béba ni ntjeñ,+ to a yé man Lôk Israel to a yé nkén mut, wee a ñôbôs Yéhôva jôl, a nlama nôla.* 31 Hala kiki a nyan lipôdôl li Yéhôva, a bôk ki mbén yé, i mut* nu a nlama ndigi nôla.+ A nlama saa inyu hihôha hié.’”+

32 I ngéda bon ba Israel ba bé ba ngi yii i ñoñ, ba bi koba mut wada a mbada tjéé i kel sabat.+ 33 I bôt ba bi koba nye a mbada tjéé, ba lona nye yak Môsi ni Arôn ni i bisu bi litén jolisôna. 34 Ba ha nye i mok+ inyule mbén i bé tibil bé toñol i jam ba kôli boñ i nya mut i.

35 Yéhôva a bi kal Môsi le: “I mut nu a nlama ndigi nôla;+ nyodnana nye i homa ni nyééne,+ litén jolisôna li ôm nye ngok.” 36 Ha nyen ba bi nyodna nye i homa ba bé yééne, litén jolisôna li ôm nye ngok letee a wo, kiki Yéhôva a bi kal Môsi.

37 Yéhôva a bi kônde kal Môsi le: 38 “Kal bon ba Israel le ba nlama boñ manjek mu masuk ma mambot map tjai ndi tjai, ba nlama ki mage ni bôñgô i i yé mangoñ* i ngii manjek ma mambot+ map. 39 ‘Ni nlama boñ i linjek lini kayéle i ngéda ni ntehe jo, ni hoñol mambén ma Yéhôva momasôna, ni nôgôl ki mo.+ Ni nlama bé noñ miñem minan ni mis manan ma ma ntinde bé i bégés banyambe bape.*+ 40 Hala a ga hôla bé i hoñol mambén mem momasôna, ni i nôgôl mo, inyu boñ le ni ba bapubhaga inyu Nyambe+ nan. 41 Me yé Yéhôva Nyambe nan, nu a bi nyodna bé i loñ Égiptô inyu boñ le me unda le me yé Nyambe+ nan. Men me yé Yéhôva Nyambe+ nan.’”

16 Kôra+ man Izhar,+ man Kôhat,+ man Lévi,+ a bi jôp i lôñ ni Datan bo Abiram bon ba Éliab,+ yak ni Ôn man Pélet, bo baa ba bé bon ba Ruben.+ 2 Ba kolba Môsi, bo ni 250 bôlôm ba Israel, ba bak baane ba litén, mimpohlak mi bôt mi likoda, mintôô mi bôt. 3 Ha nyen ba bi nôgla inyu kolba+ Môsi bo Arôn, ba kalak le: “Di nwaa bé! Bôt bobasôna ikété litén ba yé bapubhaga,+ Yéhôva a yé ni bo.+ Inyuki ni mbédés bébomede inyu ane likoda li Yéhôva?”

4 I ngéda Môsi a bi nok hala, a ôôp, a ôm mbom ’isi. 5 I mbus, a kal Kôra ni bôt bobasôna ba bé nit nye le: “Yani kegla, Yéhôva a ga unda njee a yé mut wé,+ njee a yé mpubhaga, njee a gwé kunde i kôôge nye bebee; i mut Nyambe a ga pohol,+ nyen a ga bana kunde i kôôge nye+ bebee. 6 A Kôra, we ni bôt bobasôna ba nit+ we, boña haana: Yoña bibeglene bi hié,+ 7 yani ni ha hié mu, ni kôp ki binjinjiñ mu i bisu bi Yéhôva; i mut Yéhôva a ga pohol,+ wee nyen a yé mpubhaga. A bon ba Lôk Lévi,+ ni mpéé!”

8 I mbus, Môsi a kal Kôra le: “Soho emblana, a bon ba Lôk Lévi. 9 Baa hala a yé yañga jam i mis manan le Nyambe nu Israel a bi pohol bé ikété litén li Israel,+ a ti bé kunde i kôôge nye bebee inyu gwel nson i lap i Yéhôva, ni i telep i bisu bi likoda inyu gwélél jo nson,+ 10 a boñ ki le we ni lôkisoñ, bon ba Lôk Lévi, ni kôôge nye bebee? Baa ni nlama ki sôñna tel+ i prisi? 11 Yina le Yéhôva nyen ni yé kolba, we ni bôt bobasôna ba nit we. Arôn nye a yé njee le ni huñbene+ nye?”

12 I mbus ngéda, Môsi a om le ba sébél Datan ni Abiram,+ bon ba Éliab; ndi ba kal le: “Di nlo bé! 13 Baa hala a kôli bé le u bi nyodna bés i loñ i i nkuli milik ni wéi inyu nol bés munu ñoñ?+ Baa u nsômbôl yak yila ñane wés?* 14 I loñ u bi kal le u nkena bés, i i nkuli milik ni wéi+ i yé hee? Nwom mi bijek ni nwom mi minkôô mi wai u bi kal le u nti bés, mi yé hee? Baa u nsômbôl le i bôt bana ba noñ we kiki bôt ba ndim?* Di nlo bé!”

15 Ha nyen Môsi a bi unup ngandak, a kal Yéhôva le: “U neebe bañ likébla jap li bijek. Me bi yoñ bé bo to jagas, me bi boñ bé to wada wap béba.”+

16 I mbus, Môsi a kal Kôra le: “Yani, we ni bôt bobasôna ba nit we, yak ni Arôn, telbana i bisu bi Yéhôva. 17 Hiki wada nan a nlama yoñ beglene yé hié, a kôp binjinjiñ mu, hiki wada nan a lona ki beglene yé hié i bisu bi Yéhôva, 250 bibeglene bi hié, yak we ni Arôn hiki wada nan a lona beglene yé hié.” 18 Ha nyen hiki wada wap a bi yoñ beglene yé hié, a ha hié mu, a kôp ki binjinjiñ mu, ba telep ki i lijubul li ndap libadô i likoda lôñni Môsi bo Arôn. 19 I ngéda Kôra a bi kot bôt bé+ bobasôna i lijubul li ndap libadô i likoda, lipém li Yéhôva li nene i mis ma litén+ jolisôna.

20 Ha nyen Yéhôva a bi kal Môsi bo Arôn le: 21 “Nyodna ipañ bôt ba, inyu boñ le me tjé bo kunda yada.”+ 22 Ha nyen ba bi ôôp, ba ôm mbom ’isi, ba kal le: “A Nyambe, Nyambe nu a nti bôt bobasôna+ niñ,* w’a unbene litén+ jolisôna inyu béba i mut wada?”

23 Yéhôva a kal ki Môsi le: 24 “Kal litén jolisôna le: ‘Kena haa ni mandap ma mabadô ma Kôra, Datan ni Abiram!’”+

25 Ha nyen Môsi a bi telep ni mimañ+ mi litén li Israel, ba ke yak Datan ni Abiram. 26 A kal litén le: “Soho, kena haa ni mandap ma mabadô ma bibéba bi bôt bini, ni tihba bañ to yom yap yo ki yo, tiga le ni tjiba inyu béba yap yosôna.” 27 Ba bi pala nyodi ipañ mandap ma mabadô ma Kôra, Datan ni Abiram; Datan bo Abiram ba telep i majubul ma mandap map ma mabadô lôñni baa bap, bon bap bôlôm ni bon bap batitigi.

28 Ha nyen Môsi a bi kal le: “Nano nyen ni ga yi le ni ñem* wem bé nyen me mboñ hala ndi Yéhôva nyen a ñep me i boñ i mam mana momasôna: 29 Ibale i bôt bana ba nwo kiki bôt ba binam bobasôna, tole ibale kogse yap i yé kiki kogse i bôt ba binam bobasôna, wee Yéhôva bé nyen a ñom me.+ 30 Ndi ibale Yéhôva a mboñ bo jam li tôbôtôbô, ibale hisi hi nyibla,* hi mil i bôt ba ni gwom gwap gwobisôna, ba sôs i Soñ* ba bak ba ngi yii yômi; ha ngéda i nyen n’a yi le bôt bana ba bi ti bé Yéhôva lipém.”

31 Kiki a mal ndigi pot bibuk bini, hisi hi bôô.+ 32 Hisi hi yibla,* hi mil bo tjwat, bo lôñni mahaa map ni bôt bobasôna ba bé lôñni Kôra,+ yak ni nkus wap wonsôna. 33 Hala nyen bomede ni bôt bobasôna ba bé lôñni bo ba bi sôs i Soñ,* ba bak ba ngi yii yômi, hisi hi hô bo, kayéle ba tjiba.*+ 34 Kiki ba nok minlondok nwap, bon ba Israel bobasôna ba ba bé ha ipañ, ba ke ngwéé, ba kalak le: “Yak bés hisi hi nla mil bés!” 35 I mbus, Yéhôva+ a om hié, hi ligis i 250 bôt i bé ligis binjinjiñ.+

36 Ha nyen Yéhôva a bi kal Môsi le: 37 “Kal Éléazar, man prisi Arôn, le a héya bibeglene bi hié+ i homa hié hi nloñ inyule bi yé bipubhaga. Kal ki nye le a saa hié haa. 38 Yoña bibeglene bi hié bi bôt ba mboñ béba kayéle ba nimis biniñ gwap, ni bép gwo ni hama, bi yila kiki bibende bi bikei, ni tômôl gwo mu mapañ ma juu li bisesema,+ inyule kiki ba bi tiigaha gwo bebee ni Yéhôva, bi yila bipubhaga. Bi nlama ba kiki yimbne inyu bon ba Israel.”+ 39 Ha nyen prisi Éléazar a bi yoñ bibeglene bi hié bi mamuna bi bôt hié hi bi nol, a bép gwo ni hama, bi yila kiki bibende, a tômôl gwo mu mapañ ma juu li bisesema, 40 kiki Yéhôva a bi kal nye ni njel Môsi. Hala a bi bôña inyu hôñlaha bon ba Israel le mut nye ki nye nu a gwé bé kunde,* nu a ta bé to mbôda Arôn a nlama bé lo i bisu bi Yéhôva+ inyu ligis binjinjiñ; ni le mut nye ki nye a nlama bé boñ kiki Kôra ni i bôt ba bé nit+ nye.

41 I kel i bé noñ ha, litén jolisôna li bon ba Israel li bôdôl huñbene Môsi bo Arôn,+ li kalak le: “Bé bo iba ni nôlha bôt ba litén li Yéhôva.” 42 I ngéda litén jolisôna li bi kodba inyu kolba Môsi bo Arôn, ba hielba, ba nun ndap libadô i likoda, ba tehe le ond i nhô yo, yak lipém li Yéhôva li kahal nene.+

43 Môsi bo Arôn ba bi ke i bisu bi ndap libadô i likoda,+ 44 Yéhôva a kal Môsi le: 45 “Bé nyodna ikété litén lini, inyu boñ le me tjé jo kunda yada.”+ Ha nyen ba bi ôôp, ba ôm mbom ’isi.+ 46 I mbus, Môsi a kal Arôn le: “Yoñ hié i juu li bisesema,+ u ha hio i beglene i hié, u kôp ki binjinjiñ mu, u pala ki ke nyoo i homa litén li yé, u boñ mam ma mbéda inyu hô bibéba+ gwap, inyule Yéhôva a ñunup. Himala hi mbôdôl!” 47 I nlélém ngéda Arôn a yoñ beglene i hié kiki Môsi a bi kal nye, a ke ngwéé, a jôp i ñemkété litén inyule himala hi bi bôdôl ikété litén. Ha nyen a bi kôp binjinjiñ munu beglene i hié, a bôdôl boñ mam ma mbéda inyu hô bibéba bi litén. 48 A bi kida a téé ipôla bawoga ni bayômi, sôk i nsôk, himala hi telep. 49 I bôt himala hi bi nol ba bé 14 700, handugi ba ba bi wo inyu béba i Kôra. 50 I ngéda Arôn a bi sôk a témb yak Môsi i lijubul li ndap libadô i likoda, himala hi bé hi ma mal.

17 I mbus, Yéhôva a kal Môsi le: 2 “Kal bon ba Israel le hiki ñane a lona we ntoñgo wada inyu litén+ jé, hala a mboñ 12 mintoñgo. Tila jôl li hiki wada wap mu ntoñgo wé. 3 U nlama tila jôl li Arôn mu ntoñgo u Lôk Lévi inyule ntoñgo u yé ndigi wada inyu ñane nu hiki litén. 4 W’a bii mintoñgo mi ikété ndap libadô i likoda, i bisu bi nkuu u Mbôgi,+ i homa me mbéna pémél bé.+ 5 I mut m’a pohol+ ntoñgo wé, w’a pam mbônji; hala nyen m’a mélés minhuñbe bon ba Israel ba nhuñbene me,+ ba huñbenege yak bé.”+

6 Môsi a bi pôdôs bon ba Israel; i mbus, baane bobasôna ba ti nye mintoñgo, ntoñgo wada inyu hiki ñane litén, hala a boñ 12 mintoñgo; yak ntoñgo u Arôn u bé mu nsoñgi u. 7 I mbus, Môsi a bii mintoñgo i bisu bi Yéhôva ikété ndap libadô i Mbôgi.

8 I kel i bé noñ ha, i ngéda Môsi a bi jôp i ndap libadô i Mbôgi, a koba le ntoñgo u Arôn inyu litén li Lévi u ntoo, u ti bisem, u pémés mbônji ni minhôôlak mi matam ma end i nkana.* 9 I mbus, Môsi a yoñ mintoñgo nwominsôna mi bé i bisu bi Yéhôva, a pamna nwo i bisu bi bon ba Israel. Ba béñge nwo, hiki mut a yoñ ntoñgo wé.

10 I mbus, Yéhôva a kal Môsi le: “Timbis ntoñgo u Arôn+ i bisu bi nkuu u Mbôgi, le u ba yimbne+ inyu bon ba ndok,+ kayéle ba waa huñbene me, tiga le ba wo.” 11 Môsi a pala boñ i jam Yéhôva a bi kal nye. Hala nyen a bi boñ.

12 Ha nyen bon ba Israel ba bi kal Môsi le: “Nano di ga wo, di ga pédi, bésbobasôna di ga pédi toi! 13 Tonjee mut a noode kôôge bebee ni lap i Yéhôva a nwo!+ Baa hala nyen di nlama wo?”+

18 I mbus, Yéhôva a kal Arôn le: “We ni bon boñ bôlôm ni ndap nan bikôkôa ni ga begee mbegee ibale mut a mbôk mbén i mbéñge homa mpubhaga;+ we ni bon boñ bôlôm ni ga begee ki mbegee ibale mut a mbôk mbén i mbéñge nson nan u prisi.+ 2 Lona ki lôkisoñ Lôk Lévi, litén li sôgôlsôgôl woñ, i bisu bi ndap libadô i Mbôgi,+ le ba sal lôñni we,+ ba gwélél ki we ni bon boñ bôlôm nson. 3 Ba nlama sélél we, ba gwel ki minson nwominsôna mi ndap libadô i likoda.+ Ndi ba nlama bé tiige bebee ni bisélél bi homa mpubhaga, to ni juu li bisesema, tiga le ba wo, yak bé ni wo.+ 4 Ba ga sal lôñni we, ba gwel ki minson nwap i ndap libadô i likoda ni minson nwominsôna mi ndap libadô, mut nu a gwé bé kunde a kôli bé tiige bebee ni bé.*+ 5 Ni nlama gwel minson minan i homa mpubhaga+ ni i juu li bisesema,+ inyu boñ le me unbene+ ha bañ litén li Israel. 6 Men me bi pohol lôkisoñ nan bon ba Lôk Lévi, ikété litén li Israel, me ti bé bo kiki likébla.+ Ba yé bôt ba Yéhôva, ba nlama sal i ndap libadô i likoda.+ 7 Minson minan mi prisi mi mi mbéñge juu li bisesema ni gwom bi yé i mbus libadô,+ mi yé mbegee yoñ we ni bon boñ bôlôm; ni nlama gwel minson+ mi. Nson prisi u yé likébla me nti bé; mut nu a gwé bé kunde, ndi a tiige bebee,* a nlama nôla.”+

8 Yéhôva a bi kônde kal Arôn le: “Men me ntéé we le u béñge makébla bôt ba nti me.+ Me nti we ni bon boñ bôlôm ngaba mu gwom bipubhaga gwobisôna bon ba Israel ba nti, hala a yé ngaba nan i boga ni boga.+ 9 Hala a ga ba ngaba yoñ ikété makébla ma nlôôha mpubhaga ma ba nti i sesema i hié: hiki likébla ba nti me, makébla map ma bijek,+ bisesema gwap inyu béba,+ makébla map inyu hô hihôha.+ Hala a yé yom i nlôôha mpubhaga inyu we ni bon boñ bôlôm. 10 U nlama je+ mo i homa a nlôôha mpubhaga. Hiki man munlôm a nlama je mo. I yé yom ipubhaga inyu yoñ.+ 11 Me nti yak we makébla mana:+ Makébla ma bon ba Israel lôñni bisesema le ba ndéñgés.+ Me nti we mo, we ni bon boñ bôlôm ni ba bôda, hala a ga ba ngaba+ yoñ i boga ni boga.+ Hiki mut a yé mpubhaga i ndap yoñ a nla je mo.

12 “Gwom bilam gwobisôna ba nti Yéhôva: Môô malam, wai yondo, bijek ni matam ma bisu,+ bi ga ba inyu yoñ.+ 13 Minhôôlak mi matam ma bisu ma loñ yap, ma ba nti Yéhôva, ma ga yila moñ.+ Hiki mut a yé mpubhaga i ndap yoñ a nla je mo.

14 “Hiki yom ba nsémél* Nyambe i loñ Israel i ga ba inyu yoñ.+

15 “Hiki mbôkgwéé+ nu mut binam tole nu nuga* le ba ga lona i bisu bi Yéhôva a ga ba woñ. Ndi u nlama kobol ndigi mbôkgwéé nu mut binam+ ibabé set, w’a kobol+ yak babôkgwéé ba binuga bi yé nyega. 16 U nlama ti moni inyu kobol bo i ngéda ba gwé sôñ yada tole iloo ha; ntéak ndamba u yé sékel*+ itan, inoñnaga ni sékel i homa mpubhaga.* Sékel yada i yé 20 ma géra.* 17 Ndi w’a kobol+ bé nlôm nyaga nu a yé mbôkgwéé, to nlôm ntômba nu a yé mbôkgwéé, to nlôm kembee* nu a yé mbôkgwéé. Bi yé gwom bipubhaga. U nlama nwes matjél map i juu li bisesema,+ u ligis ki mahoñ map kiki sesema i hié, inyu boñ le Yéhôva+ a nok loñge njiñ.* 18 W’a yégla minsôn nwap. Kiki u nyégla tôl i nuga munu likébla ba ndéñgés, yak ni bel walôm, hala nyen w’a yégla minsôn nwap.+ 19 Me nti we ni bon boñ bôlôm ni ba bôda makébla mapubhaga momasôna bon ba Israel ba nti Yéhôva,+ ma yé ngaba nan i boga ni boga.+ Hala a yé malômbla ma bas* le Yéhôva a mboñ lôñni we ni mbôda yoñ inyu ngéda yosôna.”

20 Yéhôva a bi kônde kal Arôn le: “W’a bana bé ngababum mu loñ yap, w’a bana bé to nkoñ ipôla yap.+ Men me yé ngaba yoñ ni ngababum yoñ ikété bon ba Israel.+

21 “Nano, me mal ti bon ba Lôk Lévi jôga jada ikété jôm+ li hiki yom i loñ Israel, hala a yé ngababum me bi ti bo inyu nson ba ngwel i ndap libadô i likoda. 22 Bon ba Israel ba ga tiige ha bé bebee ni ndap libadô i likoda, tiga le ba bôk mbén, ba wo. 23 Lôk Lévi i nlama gwel nson wap i ndap libadô i likoda, i ga begee mbegee inyu bibéba+ bi litén. Hala a yé litéak li li nom ngéda yosôna, le ba nlama bé bana ngababum ipôla bon ba Israel+ tjai ndi tjai. 24 Jôga jada ikété jôm mu gwom bon ba Israel ba nti Yéhôva, jon li yé ngababum me bi ti Lôk Lévi. Inyu hala nyen me bi kal bo le: ‘B’a bana bé ngababum+ ikété bon ba Israel.’”

25 I mbus, Yéhôva a kal Môsi le: 26 “Kal Lôk Lévi le: ‘Ni ga kôhna i moo ma bon ba Lôk Israel jôga jada ikété jôm le me bi ti bé kiki ngababum,+ ndi yina le hiki jôga jada ikété jôm ni nkôhna, ni nlama héya jôga jada ikété jôm mu inyu ti Yéhôva+ likébla. 27 Likébla lini jon ni nlama ti, li ga ba wengoñle likébla li li nlôl i litidil,+ i waa wai tole i litjôl li môô. 28 Hala nyen ni ga ti Yéhôva likébla, n’a yôñôl jo mu jôga jada ikété jôm li hiki yom bon ba Israel ba nti bé; mu ki nyen n’a ti prisi Arôn likébla inyu Yéhôva. 29 Ikété gwom gwobisôna bilam ni ga kôhna, n’a yoñ gwom mu, ni ti+ Yéhôva’ kiki yom ipubhaga.

30 “U nlama kal bo le: ‘I ngéda bé Lôk Lévi n’a pohol gwom bi nlôôha bilam inyu ti likébla, bi bi nyégle, bi ga ba inyu nan wengoñle gwom bi bi nlôl i litidil, i waa wai tole i litjôl li môô. 31 Bé ni mahaa manan n’a je gwo to numbe homa, inyule hala a yé nsaa nan inyu nson ni ngwel i ndap libadô i likoda.+ 32 Ntel wonsôna n’a pohol gwom bilam mu gwom ni nkôhna inyu ti likébla, n’a bôk bé mbén; ni nlama bé hindis gwom bipubhaga bi bon ba Israel, tiga le ni wo.’”+

19 Yéhôva a bi kônde pôdôs Môsi bo Arôn, a kal bo le: 2 “Ini mbén yon Yéhôva a nti: ‘Kal bon ba Israel le ba lona we kôyôp nyaga i i yé mbôô, i ban-ga bé lem+ yo ki yo, i ba yé ngi bééga kop nson. 3 Ni nlama ti yo prisi Éléazar, a kena yo haa ni homa ni nyééne, mut a nol yo i bisu gwé. 4 I mbus, prisi Éléazar i ga yube hinoo hié mu matjél, a nwes mo ngélé isaambok, a nunuk lijubul li ndap libadô i likoda.+ 5 I mbus hala, ba ga ligis nyaga ini i bisu gwé. Ba ga ligis+ koo yé, minsôn nwé, matjél mé lôñni tjibi tjé. 6 Prisi y’a yoñ ki kék i e sidar ni hisôp*+ lôñni kôyôp libadô, a leñ gwo mu hié ba yé i lighene nyaga. 7 Ha nyen prisi y’a jôwa mambot mé, a yoñ ki malép a nogop,* i mbus ha nyen a nla témb i homa mandap ma yé; ndi prisi y’a ba nyega letee ni kôkôa.

8 “‘I mut a nligis nyaga a ga jôwa mambot mé, a yoñ malép a nogop,* yak nye a ga ba nyega letee ni kôkôa.

9 “‘Mut nu a yé mpubhaga a ga kot libu li nyaga,+ a bii jo haa ni homa ni nyééne, i homa a yé mpubhaga; bon ba Israel ba ga tééda jo inyu kôôba malép ma nyilha mpubhaga.+ Hala a yé sesema inyu béba. 10 I mut a nkot libu li nyaga a nlama jôwa mambot mé, a ga ba nyega letee ni kôkôa.

“‘I mbén ini yon bon ba Israel ni nkén mut a yii ni bo ba nlama noñ i boga ni boga.+ 11 Ibale mut a ntihba mim* u mut binam, a ga ba nyega dilo disaambok.+ 12 I mut nu a nlama pubus nyemede ni malép* ma i hilo hi nyônôs aa, i hilo hi nyônôs isaambok, a ga ba mpubhaga. Ndi ibale a mpubus bé nyemede i hilo hi nyônôs aa, i hilo hi nyônôs isaambok, a ga ba bé mpubhaga. 13 Nu ni nu a ntihba mim* u mut binam ndi a pubus bé nyemede, wee a nhindis lap+ i Yéhôva, i mut nu a nlama nôla.*+ Kiki ba nwes bé nye malép ma nyilha mpubhaga, a yé nyega.+ A ga yégle nyega.

14 “‘I mbén ini yon ni nlama noñ i ngéda mut a nwo ikété ndap libadô: Nu ni nu a njôp mu ndap i, ndi to nu a bak mu ndap i, a ga ba nyega dilo disaambok. 15 To imbe ébél i i néhi ndi i bana bé ngudul* i yé nyega.+ 16 Nu ni nu a yé itan ndi a tihba mut ba nol ni pansoñ, tole mim, tole hés i mut tole soñ, a ga ba nyega dilo disaambok.+ 17 Inyu pubus mut a yé nyega, ba nlama yoñ ndék libu li sesema inyu béba le ba nligis, ba ha jo ikété ngim ébél, ba yoñ ki malép i lép,* ba kôp mo mukété. 18 I mbus, mut a yé mpubhaga+ a ga yoñ tjai di hisôp,*+ a yube hio mu malép ma, a nwes mo ndap libadô, i ngii biébél gwobisôna, i ngii bôt ba bé ha i ngéda mut a bi wo, yak ni i ngii mut a bi tihba hés tole a bi tihba mut ba bi nol, tole mim tole soñ. 19 I mut a yé mpubhaga a ga nwes i mut a yé nyega malép ma i hilo hi nyônôs aa ni hilo hi nyônôs isaambok; ndi hilo hi nyônôs isaambok,+ a ga pubus nye kayéle béba yé i mal; i mbus a nlama jôwa mambot mé, a yoñ malép a nogop, ha nyen kôkôa a’ ba mpubhaga.

20 “‘I mut a yé nyega ndi a pubus bé nyemede, i mut nu a nlama nôla*+ inyule a nhindis homa mpubhaga nu Yéhôva. Kiki ba nwes bé nye malép ma nyilha mpubhaga, a yé nyega.

21 “‘Hala a yé mbén ba nlama noñ i boga ni boga: I mut a nwes malép ma nyilha mpubhaga+ a nlama jôwa mambot mé, nu ni nu a ntihba malép ma nyilha mpubhaga a ga ba nyega letee ni kôkôa. 22 Hiki yom mut a yé nyega a ntihba, i ga yila nyega; yak i mut a ntihba yom i, a ga ba nyega letee ni kôkôa.’”+

20 Litén li Israel jolisôna li bi pam i ñoñ Zin i sôñ bisu, li yééne i Kades.+ Ha nyen Miriam+ a bi wél, ba jô nye.

2 Litén+ li bééna ha bé malép, jon ba bi kodba inyu kolba Môsi bo Arôn. 3 Litén li bé nôôma Môsi,+ li kalak le: “I bé loñge le yak bés di wo i ngéda lôktata yés i bi wo i bisu bi Yéhôva! 4 Inyuki ni nlona litén li Yéhôva munu ñoñ unu, inyu boñ le bés ni bilém gwés di wo?+ 5 Inyuki ni bi nyodna bés i loñ Égiptô, ni lona bés munu béba homa+ ini? Mut a nla bé sal wom munu, bie bi faigé bi ta bé, to minkôô mi wai, to grénad, to malép+ ma nyo ma ta bé.” 6 Ha nyen Môsi bo Arôn ba bi nyodi i bisu bi likoda, ba ke lijubul li ndap libadô i likoda, ba ôôp, ba ôm mbom ’isi, lipém li Yéhôva li bôdôl nene.+

7 Yéhôva a kal Môsi le: 8 “Yoñ ntoñgo, we ni manyuñ Arôn ni kot litén, n’a pôdôs liaa i bisu gwap le li pémés malép, hala nyen w’a pémhene litén ni bémba yap malép ma nyo+ mu liaa.”

9 Môsi a bi yoñ ntoñgo i bisu bi Yéhôva,+ kiki a bi kal nye. 10 Ha nyen Môsi bo Arôn ba bi kot likoda i bisu bi liaa, ndi Môsi a kal bo le: “Emblana, a bôt ba ndok! Baa munu liaa lini nyen di ga pémhene bé malép?”+ 11 Môsi a pa ntoñgo u bé nye munu woo, a bép wo liaa ngélé iba, malép ma bôdôl pam ngandak, litén li bôdôl nyo+ yak ni bémba yap.

12 I mbus, Yéhôva a kal Môsi bo Arôn le: “Kiki ni nhémle bé me, ni ñunda bé to le me yé Numpubi i mis ma bon ba Israel, n’a jôbna bé likoda lini i loñ me nsômbôl ti bo.”+ 13 Malép ma Mériba*+ mana, i homa bon ba Israel ba bi nôôma Yéhôva, kayéle a unda bo le a yé Numpubi.

14 I mbus ngéda, Môsi a ep balegelnwin, ba nyodne i Kades ba ke yak kiñe Édôm+ i kal nye le: “Manyuñ Israel+ a nkal le: ‘U nyi mandutu momasôna ma bi pémél bés. 15 Basôgôlsôgôl bés ba bi ke i Égiptô,+ di nyén ki i Égiptô ngandak nwii,*+ ndi bon ba Égiptô ba bi tééñga bés ni basôgôlsôgôl+ bés. 16 Sôk i nsôk, di bi lôndôl Yéhôva,+ a emble bés, a ômle bés añgel+ yé, a nyodna ki bés i loñ Égiptô, nano bés bana di yé i Kades, tison i i yé bebee ni nwaa woñ nkoñ. 17 Soho, nwas bés le di tagbene i loñ yoñ. Di ga lôô bé i nwom mi minkôô mi wai to i nwom nwo ki nwo, di ga nyo bé to malép ma bee yo ki yo. D’a nôñôl i nloñ u Kiñe, ibabé le di hendep i pes walôm to i pes waé letee di mal tagbe nkoñ+ woñ.’”

18 Ndi kiñe Édôm i timbhe nye le: “U tagbene bañ nkoñ wés. Ibale u noode, me mpam lôñni pansoñ i jôs we.” 19 Ha nyen bon ba Israel ba bi kal nye le: “Di ga tagbene ndigi i nlôm njel, ibale bés ni bémba yés di nyo malép moñ, di ga saa+ mo. Di ga boñ bé jam lipe ndik i tagbe ni makôô.”+ 20 Ndi to hala a timbhe le: “W’a tagbe+ bé.” Ha nyen Édôm a bi lo i boma bo ni ngandak bôt, ni ntôñ gwét* u ngui. 21 Hala nyen Édôm a bi tjél le Israel a tagbene nkoñ wé; jon Israel a bi kôm nye+ mbus.

22 Bon ba Israel, hala wee litén jolisôna li bi nyodi i Kades, li ke i hikôa hi Hôr.+ 23 I mbus, Yéhôva a kal Môsi bo Arôn i hikôa hi Hôr, bebee ni nwaa nkoñ u loñ Édôm le: 24 “Arôn a ga wo, a juba ni basôgôlsôgôl+ bé. A ga jôp bé i loñ me nsômbôl ti bon ba Israel inyule bé bo iba ni bi ndogbene me i malép ma Mériba.+ 25 Yoñ Arôn bo man wé Éléazar, u bédna bo i hikôa hi Hôr. 26 Héya Arôn mambot+ mé ma prisi, u ha mo man wé Éléazar,+ ha homa nu nyen Arôn a ga wél.”*

27 Môsi a bi boñ kiki Yéhôva a bi kal nye, a bet i hikôa hi Hôr, litén jolisôna li tehge. 28 Ha nyen Môsi a bi héya Arôn mambot mé ma prisi, a ha mo man wé Éléazar. I mbus, Arôn a wél ha i ngii hikôa.+ Môsi bo Éléazar ba sôs hikôa. 29 I ngéda litén li Israel jolisôna li bi tehe le Arôn a nwo, li ee Arôn 30 ma dilo.+

21 I ngéda man Kanaan, kiñe Arad+ nu a nyééne i Négeb, a bi nok le Israel a ntagbene i njel Atarim, a leñ Israel gwét, a gwel bahogi a kena bo minkôm. 2 Jon Israel a bi bôn Yéhôva le: “Ibale u nti i bôt bana i moo mem, ibabé nkaa me ga tjé bitison gwap.” 3 Yéhôva a bi emble kiñ i Israel, a ti bon ba Kanaan i moo map, ba tjé bo, ba tjé ki bitison gwap. Jon ba bi o i homa nu jôl le Hôrma.*+

4 Ba nyodi i hikôa hi Hôr,+ ba kena liké jap ni bisu, ba nôñôl i njel Tuye Nkôibaga inyu kil i nwaa nkoñ u Édôm,+ ha nyen liké li bi kahal wéés bôt ba litén. 5 Litén li bôdôl huñbene Nyambe bo Môsi,+ li kalak le: “Inyuki ni bi nyodna bés i Égiptô le di loo di wél i ñoñ? Nyono bijek bi ta bé, to malép+ ma ta bé, i yoma bret+ ini, di nkahal oo* yo.” 6 Inyu hala nyen Yéhôva a bi éble litén nyoo i i gwé mbôñ,* nyoo i kahal kogoo bo, ngandak bon ba Israel i wo.+

7 Jon bôt ba bi lo yak Môsi, ba kal nye le: “Di bi boñ béba i ngéda di bi huñbene we ni Yéhôva.+ Soohe Yéhôva le a héya nyoo.” Môsi a bôdôl soohe Nyambe inyu litén.+ 8 Ha nyen Yéhôva a bi kal Môsi le: “Bañ ôñgba i nyoo i i gwé mbôñ,* u péni yo i kék. To numbe mut nyoo i nkogoo, inyu boñ le a wo bañ, a nlama béñge ôñgba i.” 9 Môsi a pala bañ nyoo i mamuna,+ a péni ki yo i kék;+ i ngéda nyoo i bé i kogoo mut ndi a béñge nyoo i mamuna, a nwo bé.+

10 I mbus ha, bon ba Israel ba nyodi ha homa nu, ba ke ba yén i Obôt.+ 11 Kiki ba nyodi i Obôt ba ke ba yén i Iyé-Abarim,+ nu a yé i ñoñ, i mbombom Môab, mu njel i nke likôl. 12 Kiki ba nyodi ha, ba ke ba yén bebee ni nsôsôgô* u Zéred.+ 13 Ba nyodi ha, ba ke ba yén i nkoñ u Arnôn.+ Arnôn a yé ikété ñoñ u u mbôdôl i nwaa nkoñ u bon ba Amôr, inyule Arnôn a yé nwaa nkoñ ipôla Môab ni bon ba Amôr. 14 Inyu hala nyen kaat i Gwét bi Yéhôva i mpôdôl “Vahéb nu a yé i Sufa, yak ni minsôsôgô* mi Arnôn. 15 Lôñni diléléba di di nsôs* i minsôsôgô,* Arnôn a nkuli mu njel i nkena i Ar, a ntihba ki nwaa nkoñ u Môab.”

16 I mbus, ba ke i Béer. I bee malép i yon Yéhôva a bi kal Môsi le: “Kot litén inyu boñ le me ti jo malép.”

17 Ha ngéda i nyen, Israel a bi tôp hini hiémbi:

“A bee malép pémés malép!—Tina nye ndimbhe!*

I mbus, ba nyodi i ñoñ inyu ke i Matana, 19 ba nyodi i Matana ba tagbe i Nahaliel, ba nyodi i Nahaliel ba tagbe i Bamôt.+ 20 Ba nyodi i Bamôt, ba ke i nsôsôgô u u yé i nkoñ* u Môab,+ i ngii hikôa hi Pisga,+ nu a nyôgi iloo Yésimôn.*+

21 Ha nyen Israel a bi om balegelnwin yak Sihôn kiñe bon ba Amôr, i kal+ nye le: 22 “Neebe le di lôô hisi hioñ. D’a hendep bé i nwom, to i nwom mi minkôô mi wai. D’a nyo bé malép ma bee yo ki yo. D’a nôñôl i nloñ u Kiñe letee di mal tagbe nkoñ+ woñ.” 23 Ndi Sihôn a bi top bé le Israel a lôô nkoñ wé. A bi kot bôt bé, ba ke jôs Israel i ñoñ; ba pam i Yahaz, ba bôdôl jôs Israel+ bisañ. 24 Ndi Israel a yémbél nye ni pansoñ,+ a yoñ hisi+ hié ibôdôl i Arnôn+ ikepam i Yabôk,+ bebee ni bon ba Amôn; inyule Yazer+ a yé i nwaa nkoñ u bon ba Amôn.+

25 Jon Israel a bi yoñ bitison bi gwobisôna, ba bôdôl yééne i bitison bi bon ba Amôr+ gwobisôna, i Hesbôn lôñni minkoñ nwé.* 26 Inyule Hesbôn a bé tison i Sihôn, kiñe i bon ba Amôr, nu a bi jôs kiñe Môab, a yoñ hisi hié hiosôna letee ni Arnôn. 27 Inyu hala nyen ba nkéne i ngén i nyumba ini:

“Lona i Hesbôn.

I mbéda le tison i Sihôn i ôña, i telep siñ siñ.

28 Inyule hié hi bi pémél i Hesbôn, lindômbôô li hié i tison i Sihôn.

Li ligis Ar, nu a yé i Môab, bet ba loñ ba ba nyééne i bahoma ba nyôgi ba Arnôn.

29 Ngoo ni we a Môab! A bé bôt ba Kémôs+ ni ga tjiba!

Sihôn kiñe bon ba Amôr a nsand bon boñ bôlôm, a kena ki bon boñ ba bôda i minkôm.

31 Jon Israel a bi bôdôl yééne i hisi hi bon ba Amôr. 32 Môsi a om ngim bôlôm i hes Yazer.+ Ba yoñ minkoñ nwé,* ba luhul yak bon ba Amôr ba ba bé yééne mu. 33 I mbus ha, ba hielba, ba bet mu nloñ u Basan. Yak Og,+ kiñe Basan, a pam ni bôt bé bobasôna i jo gwét i Édréi.+ 34 Yéhôva a kal Môsi le: “U kon bañ nye+ woñi, me ga sem nye ni bôt bé bobasôna lôñni loñ yé i moo+ moñ, u ga boñ nye kiki u bi boñ Sihôn, kiñe bon ba Amôr, nu a bé yééne i Hesbôn.”+ 35 Ba bi tjé nye, ba tjé yak bon bé bôlôm lôñni litén jé, to wada a bi pei+ bé, ba yoñ ki loñ+ yé.

22 Ha nyen bon ba Israel ba bi nyodi, ba ke i yééne i ñoñ u Môab, uu nwii u Yordan, i mbombom Yérikô.+ 2 Ndi Balak,+ man Zipôr, a bi tehe i mam momasôna Israel a bi boñ bon ba Amôr, 3 yak bon ba Môab ba bôdôl sehla i bisu bi litén inyule li bééna ngandak bôt; bon ba Môab ba bé kon bon ba Israel+ woñi kayéle ba bé nôgda kiki bo le ba nkwo kon. 4 Jon bon ba Môab ba bi kal mimañ mi Madian+ le: “Nano limut lini li ga je nkoñ wés, kiki nlôm nyaga a nje bikai i wom.”

Ha ngéda i, Balak man Zipôr nyen a bé kiñe Môab. 5 A ep balegelnwin yak Balam man Béor, nu a bé yééne i tison yé ligwéé le Pétor,+ i yé bebee ni Lom.* A kal nye le: “Béñge ki! Ngim litén i nyodi i Égiptô. Béñge ki! Ba nhô hisi*+ hiosôna, nano bo bana ba yiine me hana i bisu. 6 Nano, soho, lo tiihene+ me litén lini, inyule ba gwé ngui iloo me. Bebek ha ngéda i me ga yémbél bo, me luhul ki bo mu loñ inyule me nyi le i mut u nsayap a nsaibana, i mut u ntiihe a ntiihana.”

7 Inyu hala nyen mimañ mi Môab ni mimañ mi Madian mi bi yoñ moni mi ngambi, mi jôp i njel, mi ke yak Balam,+ mi legel nye nwin Balak a bi ômle nye. 8 A kal bo le: “Ni tégbaha u hana, i jam Yéhôva a ga kal me, me ga añle bé jo.” Jon baane ba Môab ba bi yén yak Balam.

9 I mbus, Nyambe a pémél Balam, a bat+ nye le: “I bôt bana ba yé i weeni, bonjee ba?” 10 Balam a timbhe bañga Nyambe le: “Balak man Zipôr, kiñe Môab, a ñômle me nwin, a kal le: 11 ‘Béñge ki! Litén li nyodi i Égiptô, li yé i hô hisi* hiosôna. Nano, soho lo tiihene me+ bo. Bebek ha ngéda i me ga jôs bo, me luhul ki bo mu loñ.’” 12 Ndi Nyambe a kal Balam le: “U ke bañ ni bo. U nlama bé tiihe i bôt ba, inyule ba yé nsaibak.”+

13 Kiki kel i nye, Balam a telep, a kal baane Balak a bi om le: “Témba i loñ nan inyule Yéhôva a ntjél le me kee ni bé.” 14 Baane ba Môab ba nyodi, ba témb yak Balak, ba kal nye le: “Balam a ntjél lo lôñni bés.”

15 Ndi Balak a ep ki baane bape, ba ba bé ngandak, ba ban-ga ki lipém iloo ba bisu. 16 Ba ke yak Balam, ba kal nye le: “Haana nyen Balak man Zipôr a nkal: ‘Soho, u nwas bañ le jam to jada li kéñ we le u loo i meeni, 17 inyule me ga yôôs we ni lipém, me ga bôñôl ki we hiki jam u ga bat me. Jon soho, lo tiihene me litén lini.’” 18 Ndi Balam a timbhe bagwélél ba Balak le: “To ibale Balak a nyônôs ndap yé ni silba ni gôl, a ti me yo, me ta bé le me boñ ngim jam i i mbôk mbén Yéhôva Nyambe wem, to lititigi, to likeñi.+ 19 Ndi me nsoohe bé le, yak bé ni tégbaha u hana, inyu boñ le me yi kii ipe Yéhôva a ga kal me.”+

20 Ha nyen Nyambe a bi pémél Balam ni juu, a kal nye le: “Ibale i sébél we jon bôt bana ba nlôl, kenek ni bo. Ndi u nlama ndigi pot i mam me ga kal+ we.” 21 Jon kiki kel i nye, Balam a telep, a kôôba ñin jagas wé, a ke ni baane ba Môab.+

22 Ndi Nyambe a bi unbene Balam inyule a bé ke, añgel i Yéhôva i sék* nye njel. Balam a bé a bédi i ngii jagas jé, bagwélél bé bo iba ba bé lôñni nye. 23 I ngéda jagas li bi tehe añgel i Yéhôva i téé njel, i ban-ga pansoñ i woo, jagas li yéñ nyodi njel inyu jôp bikai. Ndi Balam a bôdôl bép jagas inyu boñ le li témb i njel. 24 Ha nyen añgel i Yéhôva i bi telep i hipagda hi njel ipôla nwom mi minkôô mi wai ima, kayéle njel i bééna mabap ma ngok bipes gwo biba. 25 I ngéda jagas li bi tehe añgel i Yéhôva, jagas li bôdôl séñba munu libap, li bamda kôô u Balam, Balam a témb a bôdôl bép jo.

26 Nano añgel i Yéhôva i témb i tagbe bo, i telep i hipogdo homa i het pôla i bé bé inyu ke i waé to i walôm. 27 I ngéda jagas li bi tehe añgel i Yéhôva, li bôdôp, Balam a bak a ngi yii jo i ngii; Balam a unup ngandak, a bép ki jagas ni ntoñgo wé. 28 Sôk i nsôk, Yéhôva a boñ le jagas li pot,*+ li kal Balam le: “Kii me mboñ we inyu boñ le u bép me letee ni ngélé aa?”+ 29 Balam a timbhe jagas le: “A yé inyule u ndegle me. Ibale me bana pansoñ i woo, ki me nol we!” 30 I mbus, jagas li kal Balam le: “Baa me bé nyen me yé jagas joñ li u nkil niñ yoñ yosôna letee ni len? Baa me ma bôk me boñ we hala?” A timbhe le: “To!” 31 Ha nyen Yéhôva a bi yibil mis ma Balam,+ a tehe añgel i Yéhôva i téé i njel ni pansoñ i woo. Kunda yada, Balam a ôôp, a ôm mbom ’isi.

32 Añgel i Yéhôva i kal nye le: “Inyuki u mbép jagas joñ ngélé aa? Memede nyen me nlo inyu kolba we, inyule i jam u nke boñ li nkiha bé ni sômbôl+ yem. 33 Jagas li bak li bagba ngélé aa+ inyule li ntehe me. Hégda le li bagba bé, ki me nol we behee, me nwas jagas i niñ.” 34 Balam a kal añgel i Yéhôva le: “Me mboñ béba inyule me yik bé le wen u téé i njel inyu boma me. Ibale i jam me nke i boñ li yé béba i mis moñ, wee me ga témb ni mbus.” 35 Ndi añgel i Yéhôva i kal Balam le: “Kenek ni bôt bana, ndi w’a pot ndigi i jam me nkal we.” Ha nyen, Balam a bi kena liké jé ni bisu lôñni baane Balak a bi ep.

36 I ngéda Balak a bi nok le Balam a nlo, a pala ke i boma nye i tison Môab yada, i i yé i ngwañ u Arnôn, bebee ni nwaa nkoñ. 37 Balak a kal Balam le: “Baa me bé nyen me ñep i yoñ we? Ndi inyuki u bi lo bé? Baa u bé hoñol le me nla bé ti we lipém?”+ 38 Balam a timbhe Balak le: “Me ni nunu me nlo. Ndi me gwé bé kunde i pot i jam me ngwés. I jam Nyambe a ga ha i nyo+ wem jon me ga pot.”

39 Ha nyen Balam a bi nyodi ni Balak, ba ke i Kiriat-Huzôt. 40 Balak a sem bisesema bi mintômba ni bi nyaga, a ômle yak Balam ni baane ba bé lôñni nye ngaba mu. 41 Kiki kel i nye, Balak a yoñ Balam, a bedna nye i Bamôt-baal; nyoo homa nu, a bé le a tehe litén+ jolisôna.

23 Ha nyen Balam a bi kal Balak le: “Oñ muu ma bisesema+ masaambok, u kôôba ki balôm ba nyaga basaambok ni balôm ba mintômba basaambok inyu yem.” 2 Balak a pala boñ kiki Balam a bi kal nye. Balak bo Balam ba sem nlôm nyaga wada ni nlôm ntômba wada i ngii hiki juu li bisesema.+ 3 I mbus, Balam a kal Balak le: “Yén hana bebee ni sesema i ntul i hié, me me nke ndugi. Bebek Yéhôva a ga pémél me. I jam a ga kal me, jon me ga kal we.” A ke i ngii hikôa.*

4 I mbus, Nyambe a pémél Balam,+ Balam a kal nye le: “Me ntéé muu ma bisesema masaambok, me nsem nlôm nyaga wada ni nlôm ntômba wada i ngii hiki juu li bisesema.” 5 Yéhôva a ha lipôdôl jé i nyo u Balam,+ a kal nye le: “Témb yak Balak, i jam lini jon u nlama pot.” 6 Kiki a ntémb, a koba le Balak a téé bebee ni sesema yé i ntul i hié, baane ba Môab bobasôna ba bak ba téé nye ipañ. 7 Ha nyen a bi pot bibañga+ bini le:

‘Lo tiihene me Yakôb.

Ñ, lo sébél béba i ngii Israel.’+

 8 Ndi lelaa me nla tiihe bôt Nyambe a ntiihe bé?

Lelaa me nla sébél béba i ngii bôt Yéhôva a nséble bé béba?+

11 Ha nyen, Balak a kal Balam le: “Kii u mboñ me? Me nlona we le u tiihe baoo bem, ndi we u nlo, u kahal sayap bo.”+ 12 A timbhe le: “Baa i jam Yéhôva a nha i nyo+ wem, jo bé jon me nlama pot?”

13 Balak a kal nye le: “Soho, loo di kenek homa numpe i het u ga tehe bo. U ga tehe ndik bo pes yada; u ga tehe bé bobasôna. U tiihene me bo ha homa nu.”+ 14 A kena nye i wom u Zôfim, i ngii hikôa Pisga,+ a oñ muu ma bisesema masaambok, a sem nlôm nyaga wada ni nlôm ntômba wada i ngii hiki juu li bisesema.+ 15 Balam a kal Balak le: “Yén hana bebee ni sesema yoñ i ntul hié, me me nke nyoo i boma Nyambe.” 16 Yéhôva a pémél Balam, a ha lipôdôl jé i nyo+ wé, a kal nye le: “Témb yak Balak, i jam lini jon u nlama pot.” 17 Kiki a ntémb yak Balak, a koba nye a mbem bebee ni sesema yé i ntul hié, baane ba Môab ba bak lôñni nye. Balak a bat nye le: “Kii Yéhôva a nkal?” 18 Ha nyen a bi pot bibañga+ bini le:

“Telep a Balak, emble.

Emble me, a man Zipôr.

I ngéda a mpot jam, baa a mboñ bé jo?

I ngéda a mbôn jam, baa a nyônôs bé jo?+

22 Nyambe a nyodna bo i Égiptô.+

A yé kiki bitoñ bi nlôm nyaga bikai inyu yap.+

Hanano, ba nla kal inyu Yakôb bo Israel le:

‘Béñgnana i jam Nyambe a bi boñ!’

25 Ha nyen, Balak a kal Balam le: “Ibale u nla bé tiihe bana bôt, u sayap bañ to bo.” 26 Balam a timbhe Balak le: “Baa me bi kal bé we le: ‘Me nlama ndigi boñ mam momasôna Yéhôva a nkal’?”+

27 I mbus, Balak a kal Balam le: “Soho, nwas le me kena ki we homa numpe. Bebek i ngéda di mba ha homa nu, i ga nene loñge i mis ma bañga Nyambe le u tiihene me bo.”+ 28 Ha nyen, Balak a bi kena Balam i ngii hikôa Péôr, i het ba ntehe ñoñ u Yésimôn.+ 29 Balam a kal Balak le: “Oñ muu ma bisesema hana, u kôôbana ki me balôm ba nyaga basaambok ni balôm ba mintômba basaambok.”+ 30 Balak a bi boñ kiki Balam a bi kal nye, a sem nlôm nyaga wada ni nlôm ntômba wada i ngii hiki juu li bisesema.

24 I ngéda Balam a bi tehe le i yé loñge i mis ma Yéhôva le a sayap Israel, a bi yéñ ha bé boñ makañ+ ndi a bi hiel su, a nun ñoñ. 2 I ngéda Balam a bi pa mis, a tehe le matén+ ma Israel ma ôñi ikété oda,* mbuu u Nyambe u lo i ngii yé.+ 3 Ha nyen, a bi pot bibañga+ bini le:

10 I mbus, Balak a unbene Balam ngandak. Balak a bamb moo ni diyana, a kal Balam le: “Me bi sébél we le u tiihe+ baoo bem, ndi we u nlo u sayap bo ngélé aa. 11 Nano, pala huu i mbai yoñ. Me sômblak ti we ngandak lipém,+ ndi Yéhôva a neebe bé.”

12 Balam a timbhe Balak le: “Baa me bi kal bé balegelnwin u bi ômle me le: 13 ‘To ibale Balak a nyônôs ndap yé lôñni silba ni gôl, ndi a nti me yo, me ta bé le me bôk mbén Yéhôva, le me boñ jam jo ki jo ni sômbôl yem* memede, to lilam to libe. M’a pot ndigi i jam Yéhôva a ga kal me’?+ 14 Nano me yé témb i loñ yem. Loo me kal we i jam litén lini li ga boñ loñ yoñ i dilo di nlo.”* 15 Ha nyen a bi pot bibañga+ le:

20 Kiki a ntehe Amalek, a kônde kal bibañga bini le:

21 Kiki a ntehe Lôk Ken,+ a kônde kal le:

“Liyééne joñ li umi siñ, mbai yoñ i ôñi i ngii liaa.

22 Ndi mut a ga ligis Kain.

Letee ni ngéda mbe ilole Asiria a nkena we mimkôm?”

23 A kônde kal bibañga bini le:

“Wee! Njee a ga pei i ngéda Nyambe a ga boñ i jam lini?

Ndi yak nyemede a ga tjiba hies.”

25 I mbus Balam+ a huu i mbai yé. Yak Balak a yoñ yé njel.

25 I ngéda Israel a bé yééne i Sitim,+ bon ba Israel ba kahal bana malal ma nyega ni bingond bi Môab.+ 2 Bôda ba Môab ba naña bon ba Israel i ti banyambe+ bap bisesema, bôt ba bôdôl je, ba ôôbak i bisu bi banyambe+ bap. 3 Ha nyen bon ba Israel ba bi kahal bégés* Baal nu Péôr,+ jon Yéhôva a bi unbene Israel ngandak. 4 Yéhôva a kal Môsi le: “Yoñ baéga* bobasôna ba litén lini, u péni bo i bisu bi Yéhôva, mapubi ma kel ma bayak,* inyu boñ le Yéhôva a unbene ha bañ litén li Israel.” 5 Ha nyen Môsi a bi kal bakéés ba Israel+ le: “Hiki wada nan a nlama nol bôt bé ba ba bi ke i bégés* Baal nu Péôr.”+

6 Ba bé ba ngi eek i lijubul li ndap libadô i likoda, man Israel wada a lona ngond Lôk Madian,+ a tagbana yo i bisu bi Môsi ni bon ba Israel bobasôna. 7 I ngéda Finéhas+ man Éléazar, man prisi le Arôn, a bi tehe hala, a pala telep i het a bé lôñni bana bon ba Israel bape, a yoñ likoñ i woo wé. 8 I mbus ha, a noñ i mut nu ikété ndap libadô, a tôp bo iba ni likoñ, man Israel ni muda, a tôp yaga muda i hiyindi hié. Ha nyen himala hi bé nol bon ba Israel hi mal.+ 9 Himala hi bi nol 24 000 bôt.+

10 Ha nyen Yéhôva a bi kal Môsi le: 11 “Finéhas+ man Éléazar, man prisi le Arôn, a mboñ le hiun hiem hi sôs+ inyule a neebe bé le ba bégés nyambe numpe handugi me. Jon me ntjé bé bon ba Israel, to hala kiki me ngwés le ba bégés ndigi metama.+ 12 Jon kal nye le: ‘Me mboñ malômbla ma nsañ ni nye. 13 Hala a ga ba malômbla ma boga ni boga inyu nson u prisi inyu yé ni inyu mbôda yé+ inyule a neebe bé le ba bégés nyambe numpe handugi Nyambe+ wé, a mboñ mam ma mbéda inyu boñ le bibéba bi litén bi séha kayéle le litén li Israel kôhna nwéhél.’”

14 I man Israel nu ba bi nol mbôda ni ngond Lôk Madian, jôl jé li bé le Zimri man Salu; Salu a bé ñéga wada i ndap bikôkôa i Lôk Siméôn. 15 I ngond Lôk Madian ba bi nol, jôl jé li bé le Kôzbi, ngond Zur,+ ñane wada i mandap ma bikôkôa i Madian.+

16 I mbus, Yéhôva a kal Môsi le: 17 “Noña bon ba Madian, ni nol+ bo, 18 Inyule ba bi noñ bé ni mandon munu u hop u Péôr+ ni u Kôzbi, ngond ñane wada i Madian, manyañ wap nu muda nu ba bi nol+ i kel himala hi hop u Péôr.”+

26 Kiki himala+ hi ntagbe, Yéhôva a kal Môsi bo Éléazar, man prisi Arôn le: 2 “Soñgol bon ba Israel bobasôna inoñnaga ni mandap map ma bikôkôa; soñgol ba ba gwé 20 ma nwii tole iloo ha, bon ba Israel+ bobasôna ba ba nla ke i gwét.” 3 Môsi bo prisi Éléazar+ ba bi pôdôs bôt ba litén i ñoñ u Môab+ bebee ni Yordan, i mbombom Yérikô,+ ba kal bo le: 4 “Soñglana bôt ba ba gwé 20 ma nwii tole iloo ha, kiki Yéhôva a nkal Môsi.”+

I bon ba Israel ba ba bi nyodi i loñ Égiptô ba bé: 5 Inyu litén li Ruben,+ mbôkgwéé nu Israel; bon bôlôm ba Ruben+ ba bé: Hanok, nyen a bi bot Lôk Hanok; Palu, nyen a bi bot Lôk Palu; 6 Hezrôn, nyen a bi bot Lôk Hezrôn; Karmi, nyen a bi bot Lôk Karmi. 7 Mana mon ma yé mahaa ma litén li Ruben, nsoñgi wap u bé 43 730.+

8 Man munlôm nu Palu a bé le Éliab. 9 Bon bôlôm ba Éliab ba bé Némuel, Datan ni Abiram. Datan bo Abiram ba bé ikété mimpohlak mi bôt mi litén mi mi bi adba ni ntôñ u Kôra+ inyu jôs Môsi+ bo Arôn ni inyu kolba Yéhôva.+

10 Hisi hi bi yibla,* hi mil bo tjwat. Kôra ni bôt bé ba bi wo i ngéda hié hi bi ligis 250 bôt.+ Ba yila ndémbél inyu béhe+ bôt. 11 Ndi bon bôlôm ba Kôra ba bi wo+ bé.

12 Bon bôlôm ba Siméôn+ inoñnaga ni mahaa map, ba bé le: Némuel, nyen a bi bot Lôk Némuel; Yamin, nyen a bi bot Lôk Yamin; Yakin, nyen a bi bot Lôk Yakin; 13 Zéra, nyen a bi bot Lôk Zéra; Saul, nyen a bi bot Lôk Saul. 14 Mana mon ma yé mahaa ma litén li Siméôn, ba bé 22 200.+

15 Bon bôlôm ba Gad+ inoñnaga ni mahaa map, ba bé le: Zéfôn, nyen a bi bot Lôk Zéfôn; Hagi, nyen a bi bot Lôk Hagi; Suni, nyen a bi bot Lôk Suni; 16 Ôzni, nyen a bi bot Lôk Ôzni; Éri, nyen a bi bot Lôk Éri; 17 Arôd, nyen a bi bot Lôk Arôdi; Aréli, nyen a bi bot Lôk Aréli. 18 Mana mon ma yé mahaa ma litén li Gad, nsoñgi wap u bé 40 500.+

19 Bon bôlôm ba Yuda+ ba bé Er bo Ônan.+ Ndi Er bo Ônan ba bi wo i loñ Kanaan.+ 20 Bon bôlôm ba Yuda inoñnaga ni mahaa map, ba bé le: Séla,+ nyen a bi bot Lôk Séla; Péres,+ nyen a bi bot Lôk Péres; Zéra, nyen a bi bot Lôk Zéra.+ 21 Bon bôlôm ba Péres ba bé le: Hezrôn,+ nyen a bi bot Lôk Hezrôn; Hamul,+ nyen a bi bot Lôk Hamul. 22 Mana mon ma yé mahaa ma Lôk Yuda, nsoñgi wap u bé 76 500.+

23 Bon bôlôm ba Isakar+ inoñnaga ni mahaa map, ba bé le: Tôla,+ nyen a bi bot Lôk Tôla; Puva, nyen a bi bot Lôk Puva; 24 Yasub, nyen a bi bot Lôk Yasub; Simrôn, nyen a bi bot Lôk Simrôn. 25 Mana mon ma yé mahaa ma litén li Isakar, nsoñgi wap u bé 64 300.+

26 Bon bôlôm ba Zébulôn+ inoñnaga ni mahaa map, ba bé le: Séred, nyen a bi bot Lôk Séred; Élôn, nyen a bi bot Lôk Élôn; Yaléel, nyen a bi bot Lôk Yaléel. 27 Mana mon ma yé mahaa ma litén li Zébulôn, nsoñgi wap u bé 60 500.+

28 Bon bôlôm ba Yôsep+ inoñnaga ni mahaa map, ba bé Manasé bo Éfraim.+ 29 Bon bôlôm ba Manasé+ ba bé le: Makir,+ nyen a bi bot Lôk Makir; Makir a bi gwal Giléad;+ Giléad, nyen a bi bot Lôk Giléad. 30 Bon bôlôm ba Giléad bana le: Yézer, nyen a bi bot Lôk Yézer; Hélek, nyen a bi bot Lôk Hélek; 31 Asriel, nyen a bi bot Lôk Asriel; Sikem, nyen a bi bot Lôk Sikem; 32 Sémida, nyen a bi bot Lôk Sémida; Héfer, nyen a bi bot Lôk Héfer. 33 Ndi Zélôféhad, man Héfer, a bi gwal bé bon bôlôm, ndik bon bôda;+ môl ma bon bôda ba Zélôféhad+ ma bé le: Mala, Nôa, Hôgla, Milka ni Tirsa. 34 Mana mon ma yé mahaa ma Manasé, nsoñgi wap u bé 52 700.+

35 Bon bôlôm ba Éfraim+ bana inoñnaga ni mahaa map: Sutéla,+ nyen a bi bot Lôk Sutéla; Béker, nyen a bi bot Lôk Béker; Tahan, nyen a bi bot Lôk Tahan. 36 Bon bôlôm ba Sutéla bana: Éran, nyen a bi bot Lôk Éran. 37 Mana mon ma yé mahaa ma litén li Éfraim, nsoñgi wap u bé 32 500.+ Bon bôlôm ba Yôsep ba inoñnaga ni mahaa map.

38 Bon bôlôm ba Benyamin+ inoñnaga ni mahaa map, ba bé le: Béla,+ nyen a bi bot Lôk Béla, Asbel, nyen a bi bot Lôk Asbel; Ahiram, nyen a bi bot Lôk Ahiram; 39 Séfufam, nyen a bi bot Lôk Séfufam; Hufam, nyen a bi bot Lôk Hufam. 40 Bon bôlôm ba Béla ba bé le Ard ni Naaman:+ Ard, nyen a bi bot Lôk Ard; Naaman, nyen a bi bot Lôk Naaman. 41 Bon bôlôm ba Benyamin bana inoñnaga ni mahaa map, nsoñgi wap u bé 45 600.+

42 Bon bôlôm ba Dan+ bana inoñnaga ni mahaa map: Suham, nyen a bi bot Lôk Suham. Mahaa mana mon ma nlôl Dan. 43 Nsoñgi u bôt ba mahaa momasôna ma Suham u bé 64 400.+

44 Bon bôlôm ba Aser+ inoñnaga ni mahaa map, ba bé le: Imna, nyen a bi bot Lôk Imna; Isvi, nyen a bi bot Lôk Isvi; Béria, nyen a bi bot Lôk Béria; 45 bon bôlôm ba Béria ba bé le: Héber, nyen a bi bot Lôk Héber; Malkiel, nyen a bi bot Lôk Malkiel. 46 Jôl li ngond Aser li bé le Séra. 47 Mana mon ma yé mahaa ma bon bôlôm ba Aser, nsoñgi wap u bé 53 400.+

48 Bon bôlôm ba Naftali+ inoñnaga ni mahaa map, ba bé le: Yazéel, nyen a bi bot Lôk Yazéel; Guni, nyen a bi bot Lôk Guni; 49 Yézer, nyen a bi bot Lôk Yézer; Silem, nyen a bi bot Lôk Silem. 50 Mahaa mana mon ma nlôl i mbôda Naftali, nsoñgi wap u bé 45 400.+

51 Nsoñgi u bon ba Israel bobasôna u bé: 601 730.+

52 I mbus hala, Yéhôva a kal Môsi le: 53 “Inoñnaga ni nsoñgi bôt*+ unu won n’a kap loñ, kayéle hiki mut a bana ngababum. 54 Ibale bôt ba yé ngandak, ngababum yap y’a ba ikeñi; ibale bôt ba yé ndék, ngababum yap y’a ba ititigi. Hiki litén li ga kôhna ngababum+ inoñnaga ni nsoñgi wé u bôt. 55 Ndi n’a leñ mbam+ inyu kap loñ. Hiki lihaa li ga kôhna ngababum ikété nkoñ u litén li basôgôlsôgôl bé. 56 Ni ga leñ mbam inyu kap ngababum inoñnaga ni bikeñi bi hiki litén.”

57 Bon ba Lôk Lévi+ bana inoñnaga ni mahaa map: Gersôn, nyen a bi bot Lôk Gersôn; Kôhat,+ nyen a bi bot Lôk Kôhat; Mérari, nyen a bi bot Lôk Mérari. 58 Mahaa ma Lôk Lévi mana: Lôk Libni,+ Lôk Hébrôn,+ Lôk Mali,+ Lôk Musi,+ Lôk Kôra.+

Kôhat a bi gwal Amram.+ 59 Jôl li nwaa Amram li bé le Yôkébed,+ ngond Lévi i nwaa a bi gwélél nye i Égiptô. A bi gwélél Amram man le Arôn, Môsi ni manyañ wap nu muda le Miriam.+ 60 I mbus, Arôn a gwal Nadab, Abihu, Éléazar ni Itamar.+ 61 Ndi Nadab bo Abihu ba bi wo inyule ba bi kuye hié ba bééna bé kunde i kuye i bisu bi Yéhôva.+

62 Nsoñgi u bôlôm bobasôna ba bééna sôñ yada tole iloo ha,+ u bé 23 000. Ba bi pôdna bé bo ni bana bon ba Israel+ bape inyule ba bé lama bé kôhna ngababum ikété bon ba Israel.+

63 I bon ba Israel bana bon Môsi bo prisi Éléazar ba bi soñgol i ngéda ba bé i ñoñ u Môab, bebee ni Yordan, i mbombom Yérikô. 64 Ndi i ngéda Môsi bo Arôn ba bi bôk ba soñgol bon ba Israel i ñoñ Sinai,+ i bôt bana bobasôna, ba bé bé mu nsoñgi u ha ngéda i. 65 Inyule Yéhôva a bi pot inyu yap le: “Ba ga wo i ñoñ+ ibabé set.” Jon to wada wap a bi yégle bé, handugi Kaleb man Yéfuné, ni Yôsua man Nun.+

27 Ha nyen bingond bi Zélôféhad,+ man Héfer, man Giléad, man Makir, man Manasé, mu mahaa ma litén li Manasé, man Yôsep, bi bi kôôge bebee ni Môsi. Môl ma bingond bi ma bé le: Mala, Nôa, Hôgla, Milka ni Tirza. 2 Ba telep i bisu bi Môsi, prisi Éléazar, baéga+ ni litén jolisôna i lijubul li ndap libadô i likoda, ba kal le: 3 “Tata wés a bi wo i ñoñ ngi man munlôm, a bé bé i ntôñ u bôt u u bé nit Kôra+ inyu kolba Yéhôva, ndi a bi wo inyu béba yé nyemede. 4 Inyuki jôl li tata wés li nlama lém ikété lihaa jé inyule a bi gwal bé man munlôm? Ti bés ngababum ipôla lôkisañ i tata wés.” 5 Môsi a bi kena hop wap i bisu bi Yéhôva.+

6 I mbus, Yéhôva a kal Môsi i jam lini: 7 “Bingond bi Zélôféhad bi mpot maliga. Ibabé nkaa, u nlama ti bo ngababum ipôla lôkisañ isañ wap, u ti bo ngababum u lamga ti isañ+ wap. 8 Kal bon ba Israel le: ‘Ibale mut a nwo ndi a yék bé man munlôm, ni nlama ti ngond yé ngababum yé. 9 Ibale a nyék bé man muda, n’a ti lôkisañ ngababum yé. 10 Ibale a ban-ga bé lôkisañ, n’a ti lôkisañ i isañ ngababum yé. 11 Ndi ibale isañ a ban-ga bé lôkisañ, n’a ti ngababum yé yak mut wé lihaa nu a gwé matjél mada lôñni nye, nyen a ga yoñ ngababum i. Mbagi i unu hop i ga yila mbén inyu bon ba Israel, kiki Yéhôva a bi kal Môsi.’”

12 I mbus, Yéhôva a kal Môsi le: “Bet i ngii hikôa hi Abarim,+ u béñge hisi me ga ti bon ba Israel.+ 13 I ngéda w’a mal tehe hio, u nwo, u juba ni basôgôlsôgôl+ boñ kiki manyuñ Arôn,+ 14 inyule i ngéda bôt ba litén ba bé nôôma me i ñoñ u Zin, ni bi ndogbene me, ni ñunda bé to le me yé Numpubi i bisu bi gwap i ngéda me bi ti malép.+ Hala a bi bôña i malép ma Mériba,+ i Kades+ i ñoñ Zin.”+

15 Ha nyen Môsi a bi kal Yéhôva le: 16 “A Yéhôva, Nyambe wen u nti bôt bobasôna niñ,* téé mut le a éga litén, 17 nyen a mba a njôp, a pamak i bisu gwap; a jôbnaga bo, a pamnaga bo; le ndi litén li Yéhôva li yila bañ kiki mintômba mi mi gwé bé ntééda.” 18 Yéhôva a timbhe Môsi le: “Yoñ Yôsua man Nun, a yé mut nu a gwé ngap,* u kéhi moo i ngii yé.+ 19 U téé nye i bisu bi prisi Éléazar ni i bisu bi litén jolisôna, w’a téé nye le a éga bo, mis+ map ma tehge. 20 Mu kunde* u gwé, héya ndék mu u ti nye,+ inyu boñ le litén li Israel jolisôna li nôgôl nye.+ 21 A ga telep i bisu bi prisi Éléazar, nu a ga gwélél Urim+ inyu bat Yéhôva mam inyu yé. Ni oda yé nyen bôt ba ga pam, ni oda yé ki nyen bôt ba ga jôp; nye ni bon ba Israel bobasôna ni litén jolisôna.”

22 Môsi a bi boñ kiki Yéhôva a bi kal nye. A yoñ Yôsua, a téé nye i bisu bi prisi Éléazar ni i bisu bi litén jolisôna, 23 a kéhi nye moo i ngii, a téé+ nye le nyen a ba ñéga, kiki Yéhôva a bi kal Môsi.+

28 I mbus, Yéhôva a kal Môsi le: 2 “Ti bon ba Israel i oda ini: ‘Yoña yihe le likébla jem li hañ bañ, hala wee bret gwem. Ni nlama ti me makébla mem ba nligis i hié, i ntéak ngéda,+ le me nok loñge njiñ.’*

3 “Kal ki bo le: ‘Sesema i hié ni nlama ti Yéhôva, yo ini le: Hiki kel, bon ba mintômba iba ba nwii wada, ba ba gwé bé lem yo ki yo; hala a yé sesema i ntul i hié.+ 4 W’a sem man nlôm ntômba wada kegla, u sem man nlôm ntômba numpe i ngéda hiañgaa hi nañal,*+ 5 w’a sem nye lôñni kilô yada ni jam* i flawa ilam mbôôk lôñni lita yada* i môô ma mintédék mi ôlivé, hala a yé likébla li bijek.+ 6 Hala a yé sesema i ntul i hié hiki kel,+ i i bi tééba i hikôa Sinai, i numbuk loñge njiñ;* hala a yé sesema i hié inyu Yéhôva, 7 li nkiha ni likébla li wai, lita wai yada* inyu hiki man nlôm ntômba.+ W’a kôp binyonyo bi ngui bini i homa mpubhaga, hala a yé likébla li wai inyu Yéhôva. 8 W’a sem man nlôm ntômba numpe i ngéda hiañgaa hi nañal.* W’a sem nye lôñni nlélém likébla li bijek kiki u mboñ kegla, yak ni nlélém likébla li wai; hala a yé sesema i hié inyu boñ le Yéhôva+ a nok loñge njiñ.*

9 “‘Ndi i kel sabat,+ w’a sem bon ba mintômba iba ba nwii wada, ba ba gwé bé lem yo ki yo; u ti ki jam kiki bo kilô iba ni pes* i flawa ilam, mbôôk ni môô, yon i yé likébla li bijek, u ti yak likébla jé li wai. 10 Hala a yé sesema i ntul i hié inyu sabat, ibabé i hôya sesema i ntul i hié hiki kel lôñni likébla jé li wai.+

11 “‘I bibôdle bi hiki sôñ,* n’a ti Yéhôva sesema i ntul i hié i bon ba balôm ba nyaga iba, nlôm ntômba wada, bon ba mintômba basaambok ba nwii wada,+ ba ba gwé bé lem yo ki yo, 12 ni jam kiki bo kilô ina* i flawa ilam, mbôôk ni môô, hala a yé likébla li bijek+ li li nkiha ni hiki nlôm nyaga; n’a ti ki jam kiki bo kilô iba ni pes* i flawa ilam, mbôôk ni môô, hala a yé likébla li bijek li li nkiha ni nlôm ntômba+ wada; 13 ni kônde ki kilô flawa ilam yada ni jam,* mbôôk ni môô, hala a yé likébla li bijek li li nkiha ni hiki man nlôm ntômba. Hala a yé sesema i hié inyu boñ le Yéhôva a nok loñge njiñ.*+ 14 Makébla ma wai ma nlama ba bebee le lita wai iba* inyu nlôm nyaga,+ lita yada ni jam* inyu nlôm ntômba,+ lita yada* inyu man nlôm ntômba.+ Hala a yé sesema i ntul i hié le ni nlama ti hiki sôñ ikété nwii wonsôna. 15 Ni nlama ki ti Yéhôva man kembee wada kiki sesema inyu béba, u héya sesema i ntul i hié hiki kel lôñni likébla jé li wai.

16 “‘Pasa+ i Yéhôva i ga ba i hilo hi nyônôs 14 hi sôñ bisu. 17 I hilo hi nyônôs 15 mu sôñ i, n’a lôôs ngand. N’a je bret bi ngi séñha dilo disaambok.+ 18 Hilo hi bisu n’a bana likoda lipubhaga. Ni nlama bé sal bôlô ngui yo ki yo. 19 N’a ti Yéhôva sesema i ntul i hié i bon ba balôm ba nyaga iba, nlôm ntômba wada, bon ba mintômba basaambok ba nwii wada. Ni nlama sem binuga bi bi gwé bé lem+ yo ki yo. 20 N’a sem gwo lôñni makébla ma bijek ma flawa ilam, mbôôk ni môô;+ jam kiki bo kilô ina* inyu nlôm nyaga, ni jam kiki bo kilô iba ni pes* inyu nlôm ntômba. 21 N’a ti kilô yada ni jam* inyu hiki man nlôm ntômba mu bon ba balôm ba mintômba basaambok, 22 ni nlama ki ti nlôm kembee* wada nu a yé sesema inyu béba le ndi bibéba binan bi séha. 23 N’a sem i gwom bini, ibabé i hôya sesema i ntul i hié ni nlama sem kegla, i i yé sesema i ntul i hié hiki kel. 24 Hiki kel letee ni dilo disaambok, ni nlama sem i gwom bini nya yada, bi yé wengoñle bijek* inyu yem, sesema i hié inyu boñ le Yéhôva a nok loñge njiñ.* Ni nlama sem gwo lôñni sesema i ntul i hié hiki kel lôñni likébla li wai li li nkiha ni gwo. 25 Hilo hi nyônôs isaambok n’a bana likoda lipubhaga.+ Ni nlama bé sal bôlô ngui+ yo ki yo.

26 “‘I kel libumbul li matam ma bisu,+ i ngéda ni nti Yéhôva+ likébla li mondo li bijek, ni nlama bana likoda lipubhaga inyu ngand libumbul+ li matam ma bisu. Ni nlama bé sal bôlô ngui+ yo ki yo. 27 N’a ti sesema i ntul i hié i bon ba balôm ba nyaga iba, nlôm ntômba wada, bon ba mintômba basaambok ba ba gwé nwii wada,+ inyu boñ le Yéhôva a nok loñge njiñ,* 28 n’a sem gwo lôñni makébla map ma kôn, hala wee flawa ilam mbôôk ni môô; jam kiki bo kilô ina* inyu hiki nlôm nyaga ni jam kiki bo kilô iba ni pes* inyu nlôm ntômba, 29 yak ni kilô yada ni jam* inyu hiki man nlôm ntômba ikété bon ba balôm ba mintômba basaambok, 30 yak ni man kembee wada le ndi bibéba binan bi séha.+ 31 N’a sem binuga bi, ibabé i hôya sesema i ntul i hié hiki kel lôñni likébla jé li bijek. Ni nlama sem binuga bi bi gwé bé lem+ yo ki yo lôñni makébla map ma wai.

29 “‘I sôñ i nyônôs isaambok, i hilo hi bisu hi sôñ, n’a bana likoda lipubhaga. Ni nlama bé sal bôlô ngui+ yo ki yo. I kel i, ni nlama hem sép.+ 2 Ni ga ti Yéhôva sesema i ntul i hié, inyu boñ le a nok loñge njiñ:* man nlôm nyaga wada, nlôm ntômba wada, bon ba mintômba ba ba gwé nwii wada basaambok; nuga to yada ngi lem yo ki yo, 3 lôñni makébla map ma bijek, hala wee flawa ilam mbôôk ni môô: jam kiki bo kilô ina* inyu nlôm nyaga, jam kiki bo kilô iba ni pes* inyu nlôm ntômba, 4 ni kilô yada ni jam* inyu hiki man nlôm ntômba mu bon ba balôm ba mintômba basaambok, 5 yak ni man nlôm kembee* wada, nu a yé sesema inyu béba le ndi bibéba binan bi séha. 6 Ni ga ti bisesema bini ibabé i hôya sesema i ntul i hié ni nlama ti hiki sôñ lôñni likébla jé li bijek,+ yak ni sesema i ntul i hié hiki kel lôñni likébla jé li bijek,+ lôñni makébla map ma wai+ kiki mbén i nkal inyu bisesema bi; hala a yé sesema i hié inyu boñ le Yéhôva a nok loñge njiñ.*

7 “‘I hilo hi nyônôs jôm hi sôñ i nyônôs isaambok, n’a bana likoda lipubhaga,+ ni nlama ki modop.* Ni nlama bé sal bôlô+ yo ki yo. 8 Ni ga ti ki Yéhôva sesema i ntul i hié inyu boñ le a nok loñge njiñ:* man nlôm nyaga wada, nlôm ntômba wada, bon ba mintômba ba ba gwé nwii wada basaambok; nuga to yada ngi lem+ yo ki yo. 9 Lôñni makébla map ma bijek, hala wee flawa ilam mbôôk ni môô, jam kiki bo kilô ina* inyu nlôm nyaga, jam kiki bo kilô iba ni pes* inyu nlôm ntômba, 10 ni kilô yada ni jam* inyu hiki man nlôm ntômba mu bon ba balôm ba mintômba basaambok, 11 yak ni man nlôm kembee wada, nu a yé sesema inyu béba, ibabé i hôya sesema inyu béba ni nlama ti i hilo inyu Sañgla*+ ni Nyambe, ni sesema i ntul i hié hiki kel lôñni likébla li bijek, lôñni makébla map ma wai.

12 “‘I hilo hi nyônôs 15 hi sôñ i nyônôs isaambok, n’a bana likoda lipubhaga. Ni nlama bé sal bôlô ngui yo ki yo, ni nlama lôôs ngand inyu Yéhôva dilo disaambok.+ 13 Ni ga ti ki Yéhôva sesema i ntul i hié,+ hala a yé sesema i hié inyu boñ le a nok loñge njiñ;* ni ga ti 13 bon ba balôm ba nyaga, balôm ba mintômba iba, 14 bon ba mintômba ba nwii wada; nuga to yada i nlama bé bana lem+ yo ki yo. 14 Lôñni makébla map ma bijek, hala wee flawa ilam mbôôk ni môô: jam kiki bo kilô ina* inyu hiki nlôm nyaga mu 13 balôm ba nyaga, jam kiki bo kilô iba ni pes* inyu hiki nlôm ntômba mu balôm ba mintômba iba, 15 ni kilô yada ni jam* inyu hiki man nlôm ntômba mu 14 bon ba balôm ba mintômba, 16 yak ni man nlôm kembee wada, nu a yé sesema inyu béba, ibabé i hôya sesema i ntul i hié hiki kel, likébla jé li bijek, ni likébla jé li wai.+

17 “‘I hilo hi nyônôs iba, 12 bon ba balôm ba nyaga, balôm ba mintômba iba, 14 bon ba mintômba ba ba gwé nwii wada; nuga to yada i i gwé bé lem+ yo ki yo; 18 ni ga ti hiki nlôm nyaga, hiki nlôm ntômba, ni hiki man ntômba lôñni likébla jé li bijek, ni likébla jé li wai kiki mbén i nkal, 19 yak ni man nlôm kembee wada, nu a yé sesema inyu béba, ibabé i hôya sesema i ntul i hié hiki kel lôñni likébla jé li bijek, lôñni makébla map ma wai.+

20 “‘I hilo hi nyônôs aa, 11 balôm ba nyaga, balôm ba mintômba iba, 14 bon ba mintômba ba nwii wada; nuga to yada i nlama bé bana lem+ yo ki yo; 21 ni ga ti hiki nlôm nyaga, hiki nlôm ntômba, ni hiki man ntômba lôñni likébla li bijek, ni likébla jé li wai kiki mbén i nkal, 22 yak ni nlôm kembee wada, nu a yé sesema inyu béba, ibabé i hôya sesema i ntul i hié hiki kel lôñni likébla jé li bijek, ni likébla jé li wai.+

23 “‘I hilo hi nyônôs ina, 10 li balôm ba nyaga, balôm ba mintômba iba, 14 bon ba mintômba ba nwii wada; nuga to yada i nlama bé bana lem+ yo ki yo; 24 ni ga ti hiki nlôm nyaga, hiki nlôm ntômba, ni hiki man ntômba lôñni likébla li bijek, ni likébla jé li wai kiki mbén i nkal, 25 yak ni man nlôm kembee wada, nu a yé sesema inyu béba, ibabé i hôya sesema i ntul i hié hiki kel, likébla jé li bijek, ni likébla jé li wai.+

26 “‘I hilo hi nyônôs itan, balôm ba nyaga 9, balôm ba mintômba iba, 14 bon ba mintômba ba ba gwé nwii wada; nuga to yada i i gwé bé lem+ yo ki yo; 27 ni ga ti hiki nlôm nyaga, hiki nlôm ntômba, ni hiki man ntômba lôñni likébla li bijek, ni likébla jé li wai kiki mbén i nkal, 28 yak ni nlôm kembee wada, nu a yé sesema inyu béba, ibabé i hôya sesema i ntul i hié hiki kel lôñni likébla jé li bijek, ni likébla jé li wai.+

29 “‘I hilo hi nyônôs isamal, balôm ba nyaga 8, balôm ba mintômba iba, 14 bon ba mintômba ba nwii wada; nuga to yada i nlama bé bana lem+ yo ki yo; 30 ni ga ti hiki nlôm nyaga, hiki nlôm ntômba, ni hiki man ntômba lôñni likébla li bijek, ni likébla jé li wai kiki mbén i nkal, 31 yak ni nlôm kembee wada, nu a yé sesema inyu béba, ibabé i hôya sesema i ntul i hié hiki kel, likébla jé li bijek, ni likébla jé li wai.+

32 “‘I hilo hi nyônôs isaambok, balôm ba nyaga 7, balôm ba mintômba iba, 14 bon ba mintômba ba nwii wada; nuga to yada i nlama bé bana lem+ yo ki yo; 33 ni ga ti hiki nlôm nyaga, hiki nlôm ntômba, ni hiki man ntômba lôñni likébla li bijek, ni likébla jé li wai kiki mbén i nkal, 34 yak ni nlôm kembee wada, nu a yé sesema inyu béba, ibabé i hôya sesema i ntul i hié hiki kel, likébla jé li bijek, ni likébla jé li wai.+

35 “‘I hilo hi nyônôs juem, n’a bana likoda li tôbôtôbô. Ni nlama bé sal bôlô ngui+ yo ki yo. 36 Ni ga ti ki Yéhôva sesema i ntul i hié, hala a yé sesema i hié inyu boñ le a nok loñge njiñ:* nlôm nyaga wada, nlôm ntômba wada, bon ba mintômba ba ba gwé nwii wada basaambok; nuga to yada ngi lem+ yo ki yo; 37 ni ga ti nlôm nyaga, nlôm ntômba, ni hiki man ntômba lôñni likébla jé li bijek, ni likébla jé li wai kiki mbén i nkal, 38 yak ni nlôm kembee wada, nu a yé sesema inyu béba, ibabé i hôya sesema i ntul i hié hiki kel lôñni likébla jé li bijek, ni likébla jé li wai.+

39 “‘I gwom bini gwon n’a ti Yéhôva i ngéda mangand+ manan, ibabé i hôya makébla ni nti i ngéda ni mbôn+ ngim jam yak ni makébla miñem minan mi ntinde bé i ti,+ to ibale bi yé bisesema bi ntul i hié,+ to makébla ma bijek,+ to makébla ma wai,+ to bisesema inyu kôp nsañ.’”+ 40 Môsi a bi añle bon ba Israel i mam momasôna Yéhôva a bi kal nye.

30 I mbus, Môsi a pôdôs baane+ ba matén ma Israel, a kal bo le: “Haana nyen Yéhôva a nkal: 2 Ibale munlôm a mbôn+ Yéhôva le a ga boñ ngim jam, tole a nkum soñ+ le a ga boñ bé ngim jam, a nlama bé bôk mbônga+ wé. Ndi a nlama boñ mam momasôna a nkal le a ga boñ.+

3 “Ibale mañge muda a ngi yii i ndap isañ, ndi a bôn Yéhôva le a ga boñ ngim jam, tole a bôn le a ga boñ bé ngim jam, 4 ndi isañ a yi mbônga wé le a ga boñ ngim jam tole a ga boñ bé ngim jam; ibale isañ a mpééna bé nye, mañge muda a nlama yônôs mimbônga nwé nwominsôna, yak hiki jam a mbôn le a ga boñ bé, a nlama yônôs jo. 5 Ndi ibale isañ a nsôña nye i kel a nyi le a bi bôn le a ga boñ ngim jam tole a bi bôn le a ga boñ bé ngim jam, wee a ga yônôs bé mbônga u. Yéhôva a ga nwéhél nye inyule isañ nyen a nsôña+ nye.

6 “Ibale a nke libii a ma mal ti likak tole a ma bôn jam nye ngi hek pék, 7 ndi nlôm a yi hala, ibale nlôm a mpééna bé nye i kel a nyi hala, muda a nlama yônôs makak mé tole mimbônga nwé a bi ti le a ga boñ bé ngim jam. 8 Ndi ibale nlôm a nsôña nye i kel a nyi hala, a yé le a tiñil likak tole mbônga nwaa a bi boñ nye ngi hek pék,+ Yéhôva a ga nwéhél i muda nu.

9 “Ndi ibale yik muda tole muda nu a mbos a mbôn le a mboñ ngim jam, a yé nyégsaga i yônôs hiki jam a nkal.

10 “Ibale muda a nti mbônga le a ga boñ ngim jam tole a ga boñ bé ngim jam a ma mal ke libii, 11 ndi nlôm a yi hala, ibale nlôm a mpééna bé nye, hala a bébél bé to nye, wee muda a nlama yônôs makak mé momasôna tole mimbônga a bi ti le a ga boñ bé ngim jam. 12 Ndi i kel a nyi hala, ibale nlôm a ntiñil makak tole mimbônga nwaa a bi ti le a ga boñ bé ngim jam, wee muda a ga yônôs bé mo.+ Yéhôva a ga nwéhél muda inyule nlôm nyen a ntiñil mo. 13 To limbe likak tole to imbe soñ muda a nkum le a ga boñ bé ngim jam, inyu noñ ngim bikila,* nlôm nyen a nlama neebe mo, tole a nlama tiñil mo. 14 Ibale nlôm a mpééna bé nye, dilo di tagbege ndigi, wee a neebe le nwaa a yônôs makak mé momasôna ni mimbônga nwominsôna a nti le a ga boñ bé ngim jam. Kiki a bi pééna bé nwaa i kel a bi yi mo, wee a neebe mo. 15 Ndi ibale a ntiñil mo i mbus ngéda, kel a bi yi hala i ma tagbe, nyen a ga kôhna bikuu inyu hihôha+ hi nwaa.

16 “I biniigana bini gwon Yéhôva a bi ti Môsi, gwon bi mbéñge nlôm bo nwaa, isañ bo ngond yé i i nyééne i ndap isañ.”

31 I mbus ngéda, Yéhôva a kal Môsi le: 2 “Pun+ bon ba Israel inyu jam Lôk Madian+ i bi boñ bo. Ha nyen u ga juba ni basôgôlsôgôl+ boñ.”

3 Ha nyen Môsi a bi kal bôt ba litén le: “Pohlana bôlôm ikété nan, tina bo bijôl bi gwét i ke jôs Lôk Madian, i lona mapuna ma Yéhôva inyu yom Lôk Madian i bi boñ. 4 N’a pohol 1 000 hi bôt ikété hiki litén mu matén momasôna ma Israel, ni om bo i ntôñ gwét.” 5 Hala nyen ikété loñ Israel,*+ ba bi pohol 1 000 hi bôt ikété hiki litén, hala a ti 12 000 bôt nkôôbaga i ke gwét.

6 Môsi a yoñ 1 000 hi bôt ikété hiki litén, a om bo i gwét, Finéhas+ man prisi Éléazar a bi kiha ni ntôñ gwét, a ban-ga bisélél bipubhaga ni sép*+ i gwét i woo. 7 Kiki Yéhôva a bi kal Môsi, ba jôs Lôk Madian gwét, ba nol bôlôm bobasôna. 8 Mu nsoñgi bôt u, ba bi nol bikiñe bi Madian, hala wee Évi, Rékem, Zur, Hur ni Réba, bikiñe bitan bi Madian. Ba bi nol yak Balam+ man Béor ni pansoñ. 9 Ndi bon ba Israel ba bi gwel bôda ba Madian ni bon bap, ba kena bo i minkôm. Ba yoñ ki bilém gwap gwobisôna, bémba yap yosôna ni gwom gwobisôna ba bééna. 10 Ba ligis ki bitison gwap gwobisôna, yak ni bahoma* bobasôna ba bé yééne. 11 Ba kadal nkus wonsôna, ba yoñ ki gwom gwobisôna, bôt ba binam ni bilém. 12 I mbus, ba kena i bôt ba bi gwel i minkôm, gwom ba bi yoñ, ni nkus ba bi kadal i bisu bi Môsi bo prisi Éléazar, ni i bisu bi litén li Israel jolisôna, i homa ba bé yééne i ñoñ u Môab,+ bebee ni Yordan, i mbombom Yérikô.

13 Ha nyen Môsi bo prisi Éléazar ni baane bobasôna ba litén ba bi nyodi i homa ba bé yééne, ba ke i boma bo. 14 Ndi Môsi a bi unbene bakena ntôñ gwét, baane ba dikôô ni baane ba mbôgôl, ba ba bi lôl i gwét. 15 Môsi a bat bo le: “Baa ni nliga le ni ntééda bôda i niñ? 16 Baa ni nhôya le ba bi noñ maéba ma Balam, ba tinde bon ba Israel i ndogbene+ Yéhôva mu hop u Péôr,+ kayéle himala hi kwél litén li Yéhôva?+ 17 Hanano, nola boñge bôlôm bobasôna, nola ki hiki muda nu a ma lal ni munlôm. 18 Ndi bon bôda bobasôna ba ba yé ngi lal ni munlôm,+ nwaha bo i niñ. 19 Ni nlama nyodi i homa ni nyééne, ni kee haa inyu dilo disaambok. Hiki mut ikété nan nu a nol mut ni hiki mut nu a ntihba mim+ u mut, a nlama pubus nyemede+ i hilo hi nyônôs aa, ni i hilo hi nyônôs isaambok; ni nlama boñ hala, bé ni bôt ni ngwel minkôm. 20 Ni nlama pubus hiki mbot, hiki yom i yé mbañak ni kôp nuga, hiki yom i yé ni mahuu ma kembee, ni hiki yom i yé ni kék.”

21 I mbus, prisi Éléazar a kal bôt ba ntôñ gwét, ba ba bi ke i jo gwét le: “I mbén ini yon Yéhôva a bi ti Môsi: 22 ‘Gôl, silba, mamuna, kei,* kwémbé* ni lipidô, 23 hiki yom i nla lôô i hié, ni lôôs yo i hié le ndi i ba ipubhaga. Ndi i mbus, ni pubus ki yo ni malép ma ma nyilha mpubhaga.+ Ndi i yom i nla bé lôô i hié, ni nlama pubus yo ni malép. 24 I hilo hi nyônôs isaambok ni nlama jôwa mambot manan, ni yila bapubhaga, ha ni nyen ni nla témb i homa ni nyééne.’”+

25 I mbus, Yéhôva a kal Môsi le: 26 “Soñgol gwom gwobisôna ni bi yoñ, soñgol yak bôt ba binam ni bilém ni bi gwel i minkôm; sal i bôlô ini lôñni prisi Éléazar yak ni baéga ba mandap ma bikôkôa ma litén. 27 Kap i gwom ni bi yoñ môga ima, jôga jada inyu bôt ba bi ke i gwét, jôga lipe inyu bana bôt bape ba litén.+ 28 W’a yoñ tas inyu Yéhôva i moo ma bisônda bi bi bi ke i gwét, mut wada ikété 500 bôt, nuga yada ikété 500 nyaga, i magas ni i mintômba ni i kembee. 29 U nlama yoñ tas mu jôga bôt ba gwét ba ga kôhna, u ti yo prisi Éléazar, hala a yé likébla+ inyu Yéhôva. 30 Mu jôga bon ba Israel ba ga kôhna, u nlama yoñ mut wada ikété 50, nuga yada ikété 50 ma nyaga, ma magas, ma mintômba ni ma mintén mi bilém nwominsôna, u ti gwo Lôk Lévi+ i i ngwel minson mi lap+ i Yéhôva.”

31 Ha nyen Môsi bo prisi Éléazar ba bi boñ mam momasôna Yéhôva a bi kal Môsi. 32 I nkus bôt ba bi kadal i ngéda ba bé i gwét, u bé: 675 000 mintômba, 33 nyaga i bé: 72 000, 34 magas ma bak 61 000. 35 I bôda ba bé ngi lal ni munlôm+ ba bé: 32 000. 36 Kiki ba bi kap gwom, i jôga li bé inyu bôt ba bé i gwét li bé 337 500 mintômba. 37 Tas inyu Yéhôva i bi pam 675 mintômba. 38 Ba kôhna 36 000 nyaga, tas inyu Yéhôva mukété i pam 72 nyaga. 39 Ba kôhna 30 500 magas, tas inyu Yéhôva mukété i pam 61 magas. 40 Ba kôhna 16 000 bôt, tas inyu Yéhôva mukété i pam 32 bôt. 41 I mbus, kiki Yéhôva a bi kal Môsi, Môsi a ti prisi Éléazar i tas i,+ hala a yé likébla inyu Yéhôva.

42 I jôga bon ba Israel ba bi kôhna, i Môsi a bi bagal ni ngaba bôt ba bi ke i gwét, 43 i bé 337 500 mintômba, 44 nyaga i bé 36 000, 45 magas ma bé 30 500, 46 bôt ba bé 16 000. 47 Mu jôga bon ba Israel ba bi kôhna, Môsi a yoñ mut wada ikété 50, ni nuga yada ikété 50, a ti Lôk Lévi+ i i bé gwel minson mi lap+ i Yéhôva, kiki Yéhôva a bi kal Môsi.

48 I mbus, bakena ntôñ gwét,+ hala wee baane ba dikôô ni baane ba mbôgôl, ba lo yak Môsi. 49 Ba kal nye le: “Bés bagwélél boñ di nsoñgol bôt ba gwét ba ba yé isi énél yés, mut to wada a nhañ bé.+ 50 Nwas le hiki wada wés a ti Yéhôva likébla mu gwom a nyoñ, gwom bi gôl, minsañ mi kokoa, minkôm, dilonde di sitamp, dimbuñga* ni bieñg bi nyañga bipe, inyu boñ le Yéhôva a nwéhél bés bibéba gwés.”

51 Môsi bo prisi Éléazar ba bi neebe gwom bi gôl, bieñg bi nyañga gwobisôna. 52 Gôl yosôna baane ba dikôô ni baane ba mbôgôl ba bi ti Yéhôva i bi pam 16 750 sékel.* 53 Hiki mut mu ntôñ gwét a bi yoñ gwé gwom. 54 Kiki Môsi bo prisi Éléazar ba nleege gôl i baane ba dikôô ni baane ba mbôgôl, ba jôbna yo i ndap libadô i likoda i bisu bi Yéhôva, le hala a ba mbigda inyu bon ba Israel.

32 Bon ba Ruben+ ni bon ba Gad+ ba bééna ngandak bilém kiyaga, ba tehe le minkoñ mi Yazer+ ni mi Giléad mi bé loñge inyu bilém. 2 Inyu hala nyen bon ba Gad ni bon ba Ruben ba bi tiige Môsi bo prisi Éléazar ni baane ba litén bebee, ba kal le: 3 “Atarôt, Dibôn, Yazer, Nimra, Hesbôn,+ Éléalé, Sébam, Nébô+ ni Béôn,+ 4 minkoñ Yéhôva a bi kadal inyu ti bon ba Israel,+ mi yé loñge inyu bilém, i bak ki le bés bagwélél boñ, di gwé ngandak bilém.”+ 5 Ba kônde le: “Ibale hala a nene loñge i mis moñ, ti bés nkoñ unu le u ba ngababum yés. U boñ bañ le di yap Yordan.”

6 Môsi a timbhe bon ba Gad ni bon ba Ruben le: “Baa ni nsômbôl le lôkisoñ nan i kee i gwét, ndi bé ni yégle hana? 7 Inyuki ni nyéñ tômbôs miñem mi bon ba Israel, le ba jôp bañ i loñ Yéhôva a ga ti bo ibabé set? 8 Hala nyen basañ banan ba bi boñ i ngéda me om bo i béñge loñ,+ di bak i Kades-Barnéa. 9 I ngéda ba bi bet, ba pam i nsôsôgô* u Eskol,+ ba tehe loñ, ba tômbôs miñem mi bon ba Israel, litén li bana ha bé ngôñ i jôp mu loñ Yéhôva a bé sômbôl ti+ bo. 10 Hiun hi Yéhôva hi bi kala yokel, a kum soñ le:+ 11 ‘I bôt ba bi pam i Égiptô, ba ba gwé 20 ma nwii tole iloo ha, ba ga tehe bé loñ+ me bi bôn le me nti Abraham, Isak ni Yakôb;+ inyule ba nôgôl bé me ni ñem wap wonsôna. 12 Handugi Kaleb+ man Yéfuné, man Lôk Kénis, bona Yôsua+ man Nun, inyule ba bi nôgôl Yéhôva ni ñem wap wonsôna.’+ 13 Hala nyen hiun hi Yéhôva hi bi kalna bon ba Israel, a boñ bo le ba kiiña i ñoñ 40 ma nwii+ letee i hiai hi bé boñ mam mabe i mis ma Yéhôva hi lém.+ 14 Nano yak bé bibéba bi bôt bini, ni yé i boñ nlélém jam basañ banan ba bi boñ le ndi Yéhôva a kônde unbene litén li Israel. 15 Ibale ni nkôm nye mbus, ni tjél ki nôgôl nye, a ga témb a yék litén lini i ñoñ, bé bon n’a bana njom ibale litén lini li ntjiba.”

16 I mbus ngéda, ba témb yak Môsi, ba kal nye le: “Nwas bés di oñ mapénd ma ngok inyu bilém gwés, yak ni bitison inyu bon bés. 17 Ndi bés d’a ke ni bisu i kôôba gwét,+ d’a bôk ki i bisu bi bon ba Israel letee ba jôp i homa wap; ha ngéda i, bon bés ba mba ba nyééne i bitison bi gwé mapénd, ibabé le bôt ba loñ ba boñ bo béba. 18 D’a témb bé i mandap més letee hiki man Israel a kôhna ngaba+ yé i hisi. 19 D’a kôhna bé ngababum lôñni bo uu nwii u Yordan,+ inyule di mba di ma mal kôhna ngababum hana, unu nwii u Yordan, i pes likôl.”

20 Môsi a timbhe bo le: “Ibale ni nyoñ bijôl bi gwét+ i bisu bi Yéhôva; 21 ibale hiki wada nan a nyoñ bijôl bi gwét, a yap Yordan i bisu bi Yéhôva i ngéda a* mba a luhul baoo bé i bisu gwé+ 22 letee Yéhôva a bémbe loñ, ha ni nyen ni ga bana kunde i témb; to Yéhôva,+ to bon ba Israel ba ga ôm bé bé nsohi. Ha ngéda i nyen minkoñ+ mini mi ga yila minan i bisu bi Yéhôva.+ 23 Ndi ibale ni mboñ bé hala, wee ni mboñ béba i bisu bi Yéhôva, béba nan y’a timbil ki bé. 24 Jon ni nla oñ bitison inyu bon banan ni mapénd inyu bilém+ binan, ndi ni nlama yônôs mbônga nan.”

25 Bon ba Gad ni bon ba Ruben ba timbhe Môsi le: “Bagwélél boñ ba ga boñ kiki nwet wés a nkal. 26 Bon bés, baa bés, bémba yés ni bilém gwés bi ga yégle hana i bitison bi Giléad,+ 27 ndi bagwélél boñ ba ga yap lom, hiki mut a ban-ga jôl yé gwét inyu jo gwét i bisu bi Yéhôva,+ kiki nwet wés a mpot.”

28 Ha nyen Môsi a bi ti prisi Éléazar, Yôsua man Nun ni baéga ba mandap ma bikôkôa ma matén ma Israel oda. 29 Môsi a kal bo le: “Ibale bon ba Gad ni bon ba Ruben ba nyap Yordan ni bé, hiki mut a ban-ga jôl gwét inyu jo i bisu bi Yéhôva, ndi ni mal bémbe loñ, ha nyen ni ga ti bo loñ Giléad le i ba ngababum+ yap. 30 Ndi ibale ba nyoñ bé bijôl bi gwét, ba yap bé to ni bé, wee ba ga yén lôñni bé i loñ Kanaan.”

31 Bon ba Gad ni bon ba Ruben ba timbhe le: “I jam Yéhôva a nkal bagwélél boñ jon d’a boñ. 32 Di ga yoñ bijôl bi gwét, di yap lom Yordan i bisu bi Yéhôva, di jôp i loñ Kanaan,+ ndi i ngababum di ga kôhna i yé munu, unu nwii u Yordan.” 33 Jon Môsi a bi ti bon ba Gad, bon ba Ruben+ ni pes litén i Manasé,+ man Yôsep, ane i Sihôn,+ kiñe Lôk Amôr ni ane i Og,+ kiñe Basan, hala wee disi di bitison di yé mu minkoñ mi, yak ni bitison bi loñ.

34 Bon ba Gad ba oñ* Dibôn,+ Atarôt,+ Arôer,+ 35 Atrôt-Sôfan, Yazer,+ Yôkbéha,+ 36 Bét-Nimra+ ni Bét-Haran,+ bitison bi gwé mapénd; ba oñ ki mapénd ma ngok inyu bilém gwap. 37 Bon ba Ruben ba oñ Hesbôn,+ Éléalé,+ Kiriataim,+ 38 Nébô,+ Baal-Méôn,+ ba bi o bitison bini môl mape, yak ni Sibma; bitison ba bi tiimba oñ ba bi bôdôl o gwo môl mape.

39 Bon ba Makir,+ man Manasé, ba bi ke i jôs Giléad gwét, ba yoñ nkoñ u, ba luhul Lôk Amôr i i bé yééne mu. 40 Jon bon ba Makir, man Manasé, Môsi a bi ti bo Giléad, ba bôdôl yééne+ mu. 41 Yak Yair, man Manasé, a jôs Lôk Amôr gwét, a yoñ mambai* map, a o mo jôl le Havôt-Yair.*+ 42 Yak Nôba a bi ke i gwét, a yoñ Kénat ni minkoñ nwé,* a o gwo jôl jé le Nôba.

33 Munu bahoma bana nyen bon ba Israel ba bi yééne i ngéda ba bi nyodi i loñ Égiptô+ inoñnaga ni mintôñ+ nwap;* Môsi bo Arôn+ bon ba bé éga bo. 2 Môsi a bé tila môl ma bahoma ba bé nyodne mu liké jap kiki Yéhôva a bi kal nye; munu bahoma bana nyen ba bé nyodne, ba kenek bahoma+ bape: 3 Ba bi nyodi i Ramses+ i sôñ bisu, i hilo hi nyônôs 15 hi sôñ.+ I hilo hi bé noñ kel Pasa,+ bon ba Israel ba bi nyodi ni makénd* i bisu bi bon ba Égiptô bobasôna. 4 I nlélém ngéda, bon ba Égiptô ba bé jô babôkgwéé bap+ bobasôna Yéhôva a bi nol, inyule Yéhôva a bi kogse banyambe+ bap.

5 Bon ba Israel ba bi nyodi i Ramses, ba ke ba yén i Sukôt.+ 6 I mbus, ba nyodi i Sukôt, ba ke i yééne i Étam,+ bebee ni ñoñ. 7 I mbus, ba nyodi i Étam, ba témb ni mbus i Pihahirôt nu a yé bebee ni Baal-Zéfôn,+ ba yén i bisu bi Migdol.+ 8 I mbus hala, ba nyodi i Pihahirôt, ba tagbe i ñemkété tuye,+ ba jôp i ñoñ, ba ke liké li dilo daa i ñoñ+ Étam,+ ba yééne i Mara.+

9 I mbus, ba nyodi i Mara, ba ke i Élim. Kiki Élim a bééna 12 mangen ma malép ni 70 ma maén, ba yééne ha.+ 10 I mbus, ba nyodi i Élim, ba yééne bebee ni tuye Nkôibaga. 11 I mbus hala, ba nyodi i tuye Nkôibaga, ba yééne i ñoñ Sin.+ 12 I mbus, ba nyodi i ñoñ Sin, ba yééne i Dôfka. 13 I mbus, ba nyodi i Dôfka, ba yééne i Alus. 14 I mbus hala, ba nyodi i Alus, ba yééne i Réfidim,+ i het malép ma nyo ma bé bé inyu litén. 15 I mbus ha, ba nyodi i Réfidim, ba yééne i ñoñ Sinai.+

16 Ba bi nyodi i ñoñ Sinai, ba yééne i Kibrôt-Hatava.+ 17 I mbus, ba nyodi i Kibrôt-Hatava, ba yééne i Hazérôt.+ 18 I mbus, ba nyodi i Hazérôt, ba yééne i Ritma. 19 I mbus, ba nyodi i Ritma, ba yééne i Rimôn-Péres. 20 I mbus, ba nyodi i Rimôn-Péres, ba yééne i Libna. 21 Ba bi nyodi i Libna, ba yééne i Risa. 22 I mbus, ba nyodi i Risa, ba yééne i Kéhélata. 23 I mbus, ba nyodi i Kéhélata, ba yééne i hikôa Séfer.

24 I mbus, ba nyodi i hikôa Séfer, ba yéne i Harada. 25 I mbus, ba nyodi i Harada, ba yééne i Makélôt. 26 I mbus, ba nyodi+ i Makélôt, ba yééne i Tahat. 27 I mbus hala, ba nyodi i Tahat, ba yééne i Téra. 28 I mbus, ba nyodi i Téra, ba yééne i Mitka. 29 I mbus ngéda, ba nyodi i Mitka, ba yééne i Hasmôna. 30 I mbus, ba nyodi i Hasmôna, ba yééne i Môséra. 31 I mbus, ba nyodi i Môséra, ba yééne i Béné-Yakan.+ 32 I mbus, ba nyodi i Béné-Yakan, ba yééne i Hôr-Hagidad. 33 I mbus, ba nyodi i Hôr-Hagidad, ba yééne i Yôtbata.+ 34 I mbus ngéda, ba nyodi i Yôtbata, ba yééne i Abrôna. 35 I mbus, ba nyodi i Abrôna, ba yééne i Éziôn-Géber.+ 36 I mbus, ba nyodi i Éziôn-Géber, ba yééne i ñoñ Zin,+ hala wee i Kades.

37 I mbus ngéda, ba nyodi i Kades, ba yééne i hikôa Hôr,+ bebee ni nwaa nkoñ u loñ Édôm. 38 Ha nyen prisi Arôn a bi bet i hikôa Hôr kiki Yéhôva a bi kal, a wél ki ha, i nwii mi nyônôs 40 i mbus manyodi ma Israel i loñ Égiptô, i sôñ i nyônôs itan, i hilo bisu hi sôñ.+ 39 Arôn a bééna 123 nwii i ngéda a bi wo i hikôa Hôr.

40 Ndi man Lôk Kanaan, kiñe Arad,+ nu a bé yééne i Négeb, i loñ Kanaan, a nok le bon ba Israel ba yé i njel.

41 I mbus ha, ba nyodi i hikôa Hôr,+ ba yééne i Zalmôna. 42 I mbus hala, ba nyodi i Zalmôna, ba yééne i Punôn. 43 I mbus, ba nyodi i Punôn, ba yééne i Obôt.+ 44 I mbus, ba nyodi i Obôt, ba yééne i Iyé-Abarim, i nwaa nkoñ u loñ Môab.+ 45 I mbus ngéda, ba nyodi i Iyim,* ba yééne i Dibôn-Gad.+ 46 I mbus, ba nyodi i Dibôn-Gad, ba yééne i Almôn-Diblataim. 47 I mbus ha, ba nyodi i Almôn-Diblataim, ba yééne i dikôa di Abarim,+ i bisu bi Nébô.+ 48 Sôk i nsôk, ba nyodi i dikôa di Abarim, ba yééne i ñoñ u Môab, bebee ni Yordan, i mbombom Yérikô.+ 49 Ba bi kônde yééne mu mapañ ma Yordan, i ñoñ u Môab, ibôdôl i Bét-Yésimôt letee ni Abel-Sitim.+

50 Yéhôva a bi pôdôs Môsi i ñoñ u Môab, bebee ni Yordan, i mbombom Yérikô, a kal nye le: 51 “Kal bon ba Israel le: ‘Bé ba ni yé i yap Yordan inyu jôp i loñ Kanaan.+ 52 Ni nlama luhul bôt ba loñ bobasôna, ni tjé bisat gwap bi ngok+ gwobisôna lôñni bisat gwap bi kei*+ gwobisôna, ni bôk ki bahoma bap bapubhaga+ bobasôna ba ba nyôgi. 53 N’a yoñ loñ yosôna, ni yééne ki mu; ibabé set, m’a ti+ bé i loñ i. 54 Ni nlama leñ mbam+ inyu kébha mahaa mana disi. Ibale bôt ba yé ngandak, ngababum yap y’a ba ikeñi; ibale bôt ba yé ndék, ngababum+ yap y’a ba ititigi. I homa mbam y’a kwél inyu ngim mut, ha nyen ngababum yé y’a ba. N’a kôhna disi ikété ngababum i matén ma basôgôlsôgôl+ banan.

55 “‘Ndi ibale ni nluhul bé bôt ba loñ,+ ba ba nyégle ba ga yilna bé wengoñle nan i i yé mut i jis, wengoñle biloo bi bi ñôm bé i mbai, ba ga tééñga bé i loñ n’a yééne.+ 56 I jam me bi bôn le m’a boñ bo, bé bon m’a boñ+ jo.’”

34 Yéhôva a témb a kal Môsi le: 2 “Ti bon ba Israel biniigana bini: ‘I ngéda ni ga jôp i loñ Kanaan,+ i loñ ini yon me ga ti bé le i ba ngababum nan; minwaa+ mi loñ Kanaan mini:

3 “‘Nwaa nkoñ nan i nwelmbok u mbôdôl i ñoñ Zin, u kenek munu mbaa Édôm; i pes likôl, nwaa nkoñ u nwelmbok u mbôdle i tuye Bas.*+ 4 Nwaa nkoñ u nkot, u tagbe i nwelmbok u hikôa Akrabim,+ u kee i ñoñ Zin, u sôs i nwelmbok u Kades-Barnéa.+ U témb u bet i Hazar-Adar,+ u kee i Azmôn. 5 I Azmôn, nwaa nkoñ u ntémb u kot, u ke i nsôsôgô* u Égiptô, nwaa nkoñ u nsôk i Tuye.*+

6 “‘Nwaa nan nkoñ i pes hiôñg w’a ba Tuye Nkeñi* ni ngwañ wé. Hala a ga ba nwaa nan nkoñ i pes hiôñg.+

7 “‘Nwaa nan nkoñ i pes ñombok unu: Ni ga téé nwaa nkoñ ibôdôl i Tuye Nkeñi letee ni hikôa Hôr.+ 8 Nwaa nkoñ u nyodi i hikôa Hôr, u yoñ njel i nke i Lébô-Hamat,*+ nwaa nkoñ u nsôk i Zédad.+ 9 Nwaa nkoñ w’a ke letee ni Zifrôn, u sôk i Hazar-Énan.+ Hala a ga ba nwaa nan nkoñ i pes ñombok.

10 “‘Nwaa nkoñ nan i pes likôl u mbôdôl i Hazar-Énan, letee ni Séfam. 11 Nwaa nkoñ u nyodi i Séfam, u kee i Ribla nu a yé i pes likôl i Ain, u sôs, u lel ngwañ u tuye Kinéret.*+ 12 Nwaa nkoñ w’a sôs i Yordan, u sôk i Tuye Bas.+ Minwaa mi nkoñ mi loñ+ nan mi.’”

13 Môsi a ti ki bon ba Israel biniigana bini: “Ni ga leñ mbam+ inyu kabna i loñ ini, kiki Yéhôva a bi kal le ni boñ inyu matén bôô ni pes. 14 Inyule litén li Ruben inoñnaga ni mandap map ma bikôkôa, litén li Gad inoñnaga ni mandap map ma bikôkôa, ni pes litén i Manasé ba mal kôhna ngababum+ yap. 15 Matén ima ni pes ma bi kôhna ngababum yap i pes likôl i Yordan, ibôdôl Yérikô ikepam i pes hiañgaa hi mpémél.”+

16 Yéhôva a bi kônde kal Môsi le: 17 “I bôt ba ga kébha bé loñ, môl map mana: Prisi Éléazar+ bo Yôsua+ man Nun. 18 N’a yoñ ñane+ wada ikété hiki litén inyu kébha bé loñ. 19 I bôt ba, môl map mana: Inyu litén li Yuda,+ Kaleb man Yéfuné.+ 20 Inyu litén li bon ba Siméôn,+ Sémuel man Amihud; 21 inyu litén li Benyamin,+ Élidad man Kislôn; 22 inyu litén li bon ba Dan,+ ñane wada, Buki man Yokli; 23 inyu bon ba Yôsep,+ litén li bon ba Manasé,+ ñane wada, Haniel man Éfôd;* 24 litén li bon ba Éfraim,+ ñane wada, Kémuel man Siftan; 25 inyu litén li bon ba Zébulôn,+ ñane wada, Élizafan man Parnak; 26 inyu litén li bon ba Isakar,+ ñane wada, Paltiel man Azan; 27 inyu litén li bon ba Aser,+ ñane wada, Ahihud man Sélômi; 28 inyu litén li bon ba Naftali,+ ñane wada, Pédahel man Amihud.” 29 I bôt bana bon Yéhôva a bi ti oda le ba kébha bon ba Israel loñ Kanaan.+

35 Yéhôva a bi kônde pôdôs Môsi i ñoñ u Môab, bebee ni Yordan,+ i mbombom Yérikô, a kal le: 2 “Kal bon ba Israel le ba pohol bitison mu ngababum+ yap, ba ti gwo bon ba Lôk Lévi, ba nlama ki ti bon ba Lôk Lévi disi di di nkéña bitison+ bi, inyu jés bilém gwap. 3 Ba ga yééne i bitison, ndi disi di di nkéña bitison d’a ba inyu bémba yap, inyu nkus wap ni inyu binuga gwap gwobisôna. 4 N’a hek disi di di nkéña bitison bi n’a ti Lôk Lévi, 1 000 hi dikéñéé di moo* bipes gwobisôna ibôdôl i libap li lipénd li tison. 5 Ni nlama hek i mbus lipénd li tison 2 000 di dikéñéé di moo i pes likôl, 2 000 di dikéñéé di moo i pes nwelmbok, 2 000 di dikéñéé di moo i pes hiôñg, ni 2 000 di dikéñéé di moo i pes ñombok, tison i bak ñemkété. Disi dini tjon di ga kéña bitison gwap i het ba nla jéhne bilém.

6 “N’a ti Lôk Lévi bitison bi lisolbene+ bisamal, ibale mut a nol mut, nyoo nyen a nke ngwéé,+ n’a kônde ki bo 42 ma bitison. 7 Bitison gwobisôna n’a ti Lôk Lévi bi yé 48, lôñni disi+ di di nkéña gwo. 8 N’a ti bo bitison bi bi nlôl i ngababum i bon ba Israel.+ I litén li gwé ngandak bôt, n’a yoñ ngandak bitison; i litén li gwé ndék+ bôt, n’a yoñ ndék bitison. Hiki litén li ga ti bon ba Lôk Lévi bitison inoñnaga ni ngababum li ga kôhna.”

9 Yéhôva a kônde pôdôs Môsi, a kal le: 10 “Kal bon ba Israel le: ‘Ni yé i yap Yordan inyu jôp i loñ Kanaan.+ 11 Ni nlama pohol bitison bi bi yé i loñge homa le bi ba bitison bi lisolbene inyu nan, i het mut nu a nol mut ngi kôôba a nla ke ngwéé.+ 12 Mu bitison bi nyen n’a solop mpun matjél,+ le ndi i mut a nol mut a wo bañ nye ngi telep i minkaa i bisu bi likoda.+ 13 Inyu hala nyen n’a pohol bitison bi lisolbene bisamal. 14 N’a pohol bitison baa munu ini pes Yordan,+ ni bitison baa i loñ Kanaan+ le bi ba bitison bi lisolbene. 15 I bitison bisamal bini bi ga ba lisolbene inyu bon ba Israel, bakén+ ba bôt ni biyoyo, inyu boñ le tonjee a nol mut+ ngi kôôba a kee ngwéé nyoo.

16 “‘Ndi ibale mut a mbép mut ni kei* ndi a wo, wee a yé mut manola. I mut manola nu a nlama nôla ibabé set.+ 17 Ibale a mbép nye ni ngok i i nla nol mut ndi a wo, wee a yé mut manola. I mut manola nu a nlama nôla ibabé set. 18 Ibale a mbép nye kék i i nla nol mut ndi a wo, wee a yé mut manola. I mut manola nu a nlama nôla ibabé set.

19 “‘Mpun matjél nyemede nyen a nlama nol mut manola. Ibale a mboma nye, nyemede nyen a nlama nol nye. 20 Ibale mut a nyuge mut inyule a ñoo nye tole a leñ nye yom ni mahoñol mabe,*+ ndi i mut nu a wo; 21 tole ibale a mbép nye ni woo inyule a ñoo nye, ndi a wo, i mut nu a nlama nôla ibabé set. A yé mut manola. Mpun matjél a nlama nol nye i ngéda a mboma nye.

22 “‘Ndi ibale a nyuge nye tole a leñ nye yom ibabé le a kôôba, ibabé le a oo nye, ibabé le a bana mahoñol mabe,*+ 23 tole ibale a mboñ le ngok i kwél nye ki le a tehge bé nye, a ook bé to nye, a yéñék bé to boñ nye béba, ndi mut nu a wo; 24 i matiñ+ mana mon likoda li nlama noñ i ngéda li mbagal nkaa ipôla i mut a nol mut ni mpun matjél. 25 Likoda li nlama tohol i mut a nol mut i moo ma mpun matjél, likoda li timbis ki nye i tison lisolbene i het a bi ke ngwéé; a ga yén nyoo letee prisi keñi i ba bi hoo môô mapubhaga+ i wo.

26 “‘Ndi ibale i mut a nol mut a nlela nwaa u tison lisolbene i het a bi ke ngwéé, 27 ndi mpun matjél a boma nye le a ta bé ikété minwaa mi tison lisolbene, a nol nye, mpun matjél a ga bana bé nsohi wo ki wo. 28 Inyule i mut a nol mut a nlama yééne i tison lisolbene letee prisi keñi i wo. I mbus nyemb i prisi keñi, a nla témb i nkoñ+ wé. 29 Biniigana bini bi ga hôla bé inyu bikééhene tjai ndi tjai mu bahoma bobasôna n’a ba ni nyééne.

30 “‘Tonjee a nol+ mut a nlama nôla, ibale bôt iba ba mbok mbôgi*+ le a nol toi mut, wee a yé mut manola; ndi mut nye ki nye a nlama bé nôla ibale mut wada ndik nyen a mbok mbôgi. 31 Ni nlama bé neebe binoñ inyu kobol mut manola nu a kôli ni nyemb, inyule a nlama nôla ibabé set.+ 32 Ni nlama bé to neebe binoñ inyu boñ le mut nu a nke ngwéé i tison lisolbene, a témb i mbai yé ibale prisi keñi i yé ngi wo.

33 “‘I loñ ni nyééne, ni nlama bé yilha yo nyega, inyule matjél mon ma nyilha loñ nyega; ni nla bé to yilha loñ+ nan pubhaga ibale matjél ma nkuba mu, handugi le ni kôp matjél ma mut a nkôp+ matjél. 34 I loñ ni nyééne, ni nlama bé yilha yo nyega, i het yak me me nyééne; inyule me Yéhôva, me nyééne ipôla bon ba Israel.’”+

36 Basañ ba mahaa ba mbôda Giléad, man Makir,+ man Manasé, mu litén li Yôsep, ba bi lo i pôdôs Môsi lôñni baane ni basañ ba mahaa ma Israel. 2 Ba kal le: “Yéhôva a bi ti nwet wés oda le a leñ mbam+ inyu kébha bon ba Israel loñ; Yéhôva a bi ti ki nwet wés oda le a yoñ ngababum i mankéé wés Zélôféhad, a ti yo bingond+ gwé. 3 Ndi ibale ba mbiiba ni bôlôm ba litén li Israel lipe, disi di bôda bana di ga ba ha bé ikété ngababum i basôgôlsôgôl bés, di ga kôndba ikété ngababum i litén i het ba ga ke libii, kayéle di ga nimis disi ikété ngababum yés. 4 I ngéda nwii u Kunde+ u nkola inyu bon ba Israel, disi di bôda bana di ga kôndba ikété ngababum i litén i het ba ga ke libii, kayéle disi tjap di ga ba ha bé ikété ngababum i litén li basôgôlsôgôl bés.”

5 Môsi a ti bon ba Israel biniigana bi bi nlôl yak Yéhôva le: “Litén li bon ba Yôsep li mpot maliga. 6 I biniigana bini gwon Yéhôva a nti inyu bingond bi Zélôféhad: ‘Ba nla biiba ni tonjee a nlémél bo. Ndi ba nlama ndik biiba ni mut nu a nlôl i litén li isañ wap. 7 Ngababum i bon ba Israel yo ki yo i nlama bé nyodi litén jada inyu ke litén lipe, inyule bon ba Israel ba nlama tééda ngababum i litén li basôgôlsôgôl bap. 8 Hiki ngond muda i i gwé ngababum ikété matén ma Israel, i nlama biiba ni mut nu a nlôl i litén li isañ,+ inyu boñ le bon ba Israel ba tééda ngababum i basôgôlsôgôl bap. 9 Ngababum yo ki yo i nlama bé nyodi litén jada inyu ke litén lipe, inyule matén ma Israel ma nlama tééda ngababum yap.’”

10 Bingond bi Zélôféhad bi bi boñ kiki Yéhôva a bi kal Môsi.+ 11 Bingond bi Zélôféhad+ le Mala, Tirsa, Hôgla, Milka ni Nôa bi bi biiba ni bon ba lôkisañ isañ wap. 12 Ba bi biiba ni bôt ba ba nlôl mu mahaa ma Manasé man Yôsep, inyu boñ le ngababum yap i yégle ikété litén li isañ wap.

13 Mambén ni matéak mana mon Yéhôva a bi ti bon ba Israel ni njel Môsi i ñoñ u Môab, bebee ni Yordan, i mbombom Yérikô.+