Kudhugudheye Yehova Oli na Weyo

1. Adhari enjene ororomeleya a Yehova anwanana dhubuwelo gani?

ENOPANGARHAZA oziwa mazu a Masalmo 149:​4, “Nabuya [Yehova] onokwela nlogo naye.” Abali ena dila dhina anokukumuwa venjene, baroma ovivuza, ‘Koddi Yehova onoddonana ttima?’ Adhari enjene ororomeleya a Yehova otaganyiha na abale akalilewo nsaka na wale, mudhidhi mwina anwanana dhubuwelo ninga esi.—1 Sam. 1:​6-10; Job 29:​2, 4; Masal. 51:11.

2. Bani onfwanyela orumeliwa na Yehova?

² Bibilia onologa wi enowodheya attu ohiligana omwagalaliha Yehova vina orumeliwa na iyene. Enwodheya dhavi? Nigamuroromela Yezu Kristu vina nibatiziwa. (Jo. 3:16) Dhahene panwodhihu olagiha wi nihitxinuwa dhottega dhehu vina nihimpikirhela Yehova wi ninelege okosa efunelo yaye. (Mer. 2:38; 3:19) Nigattukula ttarho esi wi nimususele, ninomwagalaliha venjene Yehova. Mudhidhi ondowihu nivilibihedhaga wi nakwanihe ejile epikirhelihu, Yehova onele onirumela vina onakela ninga amarho aye ofiyedheya.—Masal. 25:14.

3. Txini enasunzehu mwari mwa nsunzo ntti?

³ Sabwaya jani ena agobuwela wi Yehova kanziveliwa na awene? Txini enkosa Yehova enlagiha wi ononirumela? Mukristu onwodha dhavi wunuwiha okuluvela wi onorumeliwa na Mulugu?

TXINI ENATTUKULELA ENA WUBUWELA WI KANRUMELIWA NA YEHOVA

4-5. Masiki akala kunivyonana ttima, nikuluvelo gani ninfwanyeliwe okana?

⁴ Enjene mwa iyo, oromana muhimani anowanana dhubuwelo dhohivyonana ttima. (Masal. 88:15) Mbali onkuweliwa Adrián ohiloga dhahi: “Oromana muhimani, ddobuwela wi kaddana ttima. Ddinowubuwela wi baddili mwana ddankosa malobelo wi amudhaga avolowe mParaizu, masiki ddubuwelaga wi kaddali elobwene wi ddikale na awene mParaizu.” Tony, mbali ohileliwe mwibaribarini ohiloga dhahi: “Amambali aga txipo kaddaddela wi anddikwela vina anziveliwa na miyo. Eji eddittukulela wubuwela wi kiyatanala guru yakosa miyo kaddigawodhile wawagalaliha.”

⁵ Akala dila dhina kunivyonana ttima, kudduwale wi ddi mwinyene Yehova wukukusele mwibaribarini wi osunze mwaha wa iyene. (Jo. 6:44) Iyene onowodha wona mikalelo dhehu dhapama dhihinwodhihu wona nanya vina onoziwa dhili mmirimani mwehu. (1 Sam. 16:7; 2 Map. 6:30) Nona kakuluvela, eji enloga Yehova wi ohikana ttima, ebaribari.—1 Jo. 3:​19, 20.

6. Murumiwi Paulo waviwamo dhavi agatanalela dhottega dhawale?

⁶ Nihinatti osunza ebaribari, txino ena wa iyo nankosa dhilobo dhinnittukulela ovipwatteliha muladdu napanovi. (1 Ped. 4:3) Oku ena anda amulabelaga Yehova na ororomeleya mwa vyaka dhinjene anowanana vina dhubuwelo dhohifwanyelela. Ki weyo txino dila dhina onowubuwelaga wi Yehova koleveleli? Akala pumwenemo, japama wubuwela wi adhari a Yehova a nsaka na wale ankana dhubuwelo ninga esene. Motagiha, murumiwi Paulo mudhidhi watanaleliye ohiligana waye waviwona ninga muttu ogweliwe ntowa. (Rom. 7:24) Enoziweya wi, Paulo wahitxinuwa dhottega dhaye nomala babatiziwa. Masiki dhawene, Paulo ohiloga wi “mwa arumiwi ddilí mimayámo” vina “muthegi wothabwayámo”.—1 Kor. 15:9; 1 Tim. 1:15.

7. Txini ehinfwanyelihu odduwala?

⁷ Yehova ononipikirhela wi nigatxinuwa dhottega dhehu iyene onele onilevelela. (Masal. 86:5) Nigatxinuwa na murima wehu wotene, nikuluvele wi ejile enloga Yehova ebaribari—iyene ononilevelela.—Kol. 2:13.

8-9. Ninawodhe dhavi owanana dhubuwelo dhawi kaninwodha okosa venjene wi nimwagalalihe Yehova?

⁸ Iyo notene nihikana efunelo ya omulabela venjene Yehova. Masiki dhawene ninodhaga wubuwela wi dhinkosihu kadhinakwana wi Yehova anirumele. Murogora onkuweliwa Amanda ohiloga: “Miyo ddinona ninga onvaha Yehova ejile eli yamakamaka entapulela okwaranyiha vangomela guru dhaga. Sabwa ya ejuwene ddinolaba venjene mpaka okwaranyiha guru dhaga. Ddigahakwanihe dhogana dhaga, ddinonyimuwa vina ddinowubuwela wi Yehova ohinyimuwa.”

⁹ Ninawodhe dhavi owanana mubuwelo wawi kaninwodha okosa venjene wi nimwagalalihe Yehova? Kudduwale wi Yehova kannikumbirha okosa dhilobo dhihinwodhihu. Yehova Mulugu wa pama vina wofewa murima. Iyene onovaha ttima elobo-elobovi enkosihu, bari nigakosa na guru dhehu dhotedhene. Ottiya ejo, katanalela dhotagiha dha mBibiliani dha attu amulabele Yehova na murima wotene. Motagiha, katanalela nipadduwo na Paulo. Mwa vyaka dhinjene iyene olaba vaddiddi akosaga oleddo makilometru menjene, vina ohikamihedha wita milogo dhinjidhene. Mbwenyi dha mwigumini mwaye dhahitxinja bahiwodhaga olaleya ninga mwakoseliye wale, koddi Yehova wahittiya ovaha ttima esile dhakosiye? Kahiyo mwenemo. Paulo ohidhowavi akosaga mpaka vawodhiliye vina Yehova wanruriha mabasa aye. (Mer. 28:​30, 31) Na mukalelo wakene, mabasa animukoselihu Yehova na labona anodhaga otxinja. Mbwenyi elitxi yamakamaka jijile eli mmirimani mwehu. Ovano ninfuna none dhinkosa Yehova dhinoniha wi ononirumela.

YEHOVA ONONIHA DHAVI WI ONONIRUMELA?

10. Ninawodhe dhavi wiwa lizu na Yehova anirumelaga? (Joau 16:27)

¹⁰ Modhela Bibilia. Dila dhinjene Yehova onotamela marhe awoniha wi onowakwela alabeli aye vina onowagalala venjene na mabasa ankosani. Bibilia onologa dila bili dhilogile Yehova na Mwanaye wi wanimukwela, vina wannimurumela. (Mt. 3:17; 17:5) Weyo ogahiziveliwa Yehova kowulogela mazu akakene? Masaka abano Yehova kanloga na attu kove-na-kove, onloga na iyo alabihedhaga Nzu naye, Bibilia. Ninowodha wiwa mazu a Yehova anlagiha onirumela waye nigengesaga mazu a Yezu anfanyeya mMittakani. (Kengesa Joau 16:27.) Yezu otagiha mowakwana-mwene ekalelo eli Babe. Nona nigengesaga mazu okwela alogele Yezu attu ohiligana, ninowodha omutanalela Yehova anilogelaga iyo mazu aba.—Jo. 15:​9, 15.

11. Sabwaya jani nigapattiwa makattamiho kaninfwanyela wubuwela wi Yehova oninyanyala? (Tiago 1:12)

¹¹ Esile Dhinnikoseliye. Yehova oli womala-nawale wi anikamihedhe, motagiha, iyene ononivaha dhilobo dhomaningoni. Masaka mena, Yehova kannibarela mwa dhilobo dhabure dhinnipadduwela, dhahene ninga epadduwile na Job. (Job 1:​8-11) Nigapattiwa makattamiho kintapulela wi Yehova oninyanyala. Ottiya ejo, eji enele onivaha gari ya woniha wi ninomukwela Yehova vina ninomukuluvela. (Kengesa Tiago 1:12.) Nigoona nikamihedho ninivahiliye wi niwodhe ovilela ninele ozinddiyela wi iyene ononikwela vina ononizuzumela.

12. Txini ensunzihu na yotagiha ya Dmitrii?

¹² Koona epadduwile na mbali onkuweliwa Dmitrii onkala o Ásia. Iyene wahiyelela ganyo yaye vina vahivira myeri dhinjidhene atamelaga ganyo se ofwanya. Nona iyene wahigana ozuzumela mabasa a olaleya, dhahene alagihaga wi onomukuluvela Yehova. Myeri dhivira, iyene kawodhile ofwanya ganyo. Vasogorhova wahidha opattiwa oredda mpaka ohiwodhaga wedda. Wahiroma wubuwela wi kawodha wakwaniha mabasa aye ninga mamuni vina babi, wanvivuza akala Yehova wahisilidhiwa na iyene. Labo dhahi na mattiyu, mwanaye wa mwana muyana wahidhowa o kwartu waye na papeli mmadani vali mazu a Izaiya 30:15: Guru dhenyu dhinda mugafwasa vina mugaddiroromela. Mwanaya wahimwaddela, “Babani, ogahiviwemo pama kobuwela nlebo ntti.” Dmitrii wahizinddiyela wi, na nikamihedho na Yehova, amudhaye ahikana dhoja, dhowabala vina mburho wokala. Iyene ohiloga: “Yafwanyelimi okosa yali ya ofwasa vina odhowagavi ddimukuluvelaga Mulugu waga.” Akala weyo onogumanana makattamiho oladdana, kakuluvela wi Yehova onele wukamihedha ovilela makattamihoya.

13. Yehova onalabihedha ani wi onihe wila ononirumela, vina sabwaya jani?

¹³ Abalihu. Yehova onodhaga walabihedha abalihu na arogora wi onihe onirumela waye. Motagiha, iyene onodhaga omulabihedha muttu wi aloge mazu ananipangarhaze mudhidhi wofwanyelela. Jijuwene epadduwile na murogora dhahi onkala o Ásia mudhidhi wagumaniyena makattamiho amuttiya odhugudheyene. Iyene wahiyelela ganyo yaye vina bapattiwa eredda yawopiha. Vasogorhova mamunaye wahikosa yottega enddimuwa battiya okala munddimuwa wa mulogo. Iyene ohiloga: “Miyo kaddaziwa sabwaya yapadduwela dhilobo esi dhotene. Ddahiroma wubuwela wi txino ddahikosa elobo yabure vina Yehova wahisilidhiwa na miyo.” Murogora oddu ohikosa nlobelo amukumbirhaga Yehova wi iyene alagihe akala txibarene onomukwela. Txini ekosile Yehova? Iyene onologa, “Anddimuwa a mmulogoni ahiloga na miyo vina ahiddikuluveliha wi Yehova onoddikwela venjene.” Mudhidhi mung’onovi vasogorhova iyene ohimukumbirha wili Yehova nikamihedho. “Labo nakene nimukumbirhelimi Yehova nikamihedho ddahakela karta ya abali a mmulogoni mwaga. Mudhidhi wengesimi karta nttile ddahizinddiyela wi Yehova wahivuruwana nlobelo naga.” Ndde, dila dhinji Yehova onolagiha wi ononirumela alabihedhaga mazu apama a attu ena.—Masal. 10:17.

14. Mukalelo gani mwina ononiha Yehova wi ononirumela?

¹⁴ Yehova onolagiha wi ononirumela mwa walabihedha abali wi anivahe malago egakala yofuneya. Motagiha, Yehova ohimulabihedha murumiwi Paulo olebela milogo makarta 14 ankosa mpaddi ya Bibilia. Mmakartani abo Paulo ohilogamo malago ovadda mbwenyi okwela. Txini emuttukuleli Yehova omuruma Paulo oleba malago abo? Iyene Mulugu wokwela onasaddeya anaye anakweliye. (Gano 3:​11, 12) Nona nigakela malago anfwanyeya mBibiliani eji kintapulela wi Yehova kannirumela, eji yolagiha entonyihedha wi iyene ononikwela. (Aheb. 12:6) Mikalelo gani dhina dhinoniha wi Yehova ononirumela?

MIKALELO DHINA DHINLAGIHA WI YEHOVA ONONIRUMELA

15. Yehova onavaha ani muya waye wokoddela, vina nikuluvelo gani ninfwanyelihu okana?

¹⁵ Yehova onowavaha muya waye wokoddela abale anarumeliye. (Mt. 12:18) Kavivuze, ‘Koddi ddinolagiha mikalelo dhimbala muya?’ Ovanene weyo onowavilela attu ena mottiyana na nsaka nali weyo ohinatti okala Munamoona wa Yehova? Venevo vandowiwe wunuwihaga mikalelo dhimbala muya wokoddela, pavenevo vankaniwe nikuluvelo wi onorumeliwa na Yehova!—Koona kasha “Dhinbala Muya Sisi . . . ”

16. Yehova onalabihedha ani wi alaleye miselu dhapama, weyo onviwamo dhavi sabwa ya oziwa ejuwene? (1 Tesalónika 2:4)

¹⁶ Wi eddihe mabasa amakamaka a olaleya miselu dhapama Yehova onakuluvelana attu anarumeliye. (Kengesa 1 Tesalónika 2:4.) Koona makalelo akamihedheyile murogora dhahi onkuweliwa Jocelyn sabwa ya odhowa mmabasani a olaleya. Labo nimodha, Jocelyn muvenyiliye wali okumuwene. Iyene ohiloga dhahi: “Miyo ddavenyile se guru vina kaddavyonana ttima, mbwenyi ddalaba ninga pionera, vina nttile nali labo nafunimi odhowa mmabasani a olaleya. Ddahikosa nlobelo vina ddahidhowa olaleya.” Labona nttile ddahimuziwa muyana wa deretu vaddiddi wakuweliwa Mary, iyene wahirumela omusunza Bibilia. Iyene wahiddaddela wi labo nifiyelimi vatakulu vaye, baddivada musuwo, iyene wela omulobelela Mulugu amukumbirhaga nikamihedho. Txini esunzile Jocelyn na nipadduwo ntti? Iyene ohiloga dhahi: “Enkala ninga Yehova waddaddela dhahi, ‘miyo ddinowurumela.’” Enoziweya wi kahiye attu otene anakela pama miselu dhinlaleyihu. Masiki dhawene nikane nikuluvelo wi Yehova onowagalala venjene na guru enkosihu dha wawaddela attu ena miselu dhapama.

17. Txini esunziliwe na elogile Vicky sabwa ya yobolo? (Masalmo 5:12)

¹⁷ Yehova ohinivaha yobolo wi yakamihedhe abale anàrumeliye. (1 Tim. 2:​5, 6) Kito akala mmurimani mwawo onubuwela wi Yehova kanurumela, masiki okuluvelaga yobolo vina bumalile obatiziwa? Karoma wubuwela, kilitxi yofuneya mudhidhi wotene okuluvela dhubuwelo dhehu, iyo nimukuluvele Yehova. Yehova onawona abale animukuluvela ninga aligani vina onopikirhela waruriha. (Kengesa Masalmo 5:12; Rom. 3:26) Murogora mmodha onkuweliwa Vicky ohizinddiyela wi jaderetu vaddiddi otanalela venjene ttima ena yobolo. Iyene onologa dhahi: “Saddu ddihiwodha ozinddiyela wi Yehova ohiddivilela mwa mudhidhi mwinjene. . . . Mudhidhi obu wetene ddakala ninga ddaloga dhahi na Yehova: ‘Nyuwo kamunwodha omukwela muttu ninga miyo. Vina mukutto wa yobolo kunwodha otximiha dhottega dhaga.’” Mutanalele Vicky ttima enna yobolo, wahiroma ozinddiyela okwela wa Yehova. Nigatanalela ttima ena yobolo ninele ozinddiyela okwela wa Yehova vina onirumela waye.

18. Nikuluvelo gani ninfwanyelihu okana nigadhowagavi nimukwelaga Babi wehu wa wirimu?

¹⁸ Masiki ovilibihedhaga ovirihamo esile dhisunzilihu mu nsunzoni ntti, txino masaka mena onodhaga okala odhugudheyene vina waganyedha akala Yehova onowurumela. Ejo egapadduwa, kobuwela wi Yehova onowarumela “abale animukwela.” (Tia. 1:12) Nona kavilibihedhege odhowagavi onfiyedhaga Yehova vina katamela ozinddiyela mikalelo dhinoniha wi iyene onowurumela. Txipo kudduwale wi Yehova “kalapelane na muthu-muthu wa iyo.”—Mer. 17:27.