Vulici na Brochure Yadra Tiko!
Ena vulici tiko ena Vulivola ni ivavakoso kece e vuravura na brochure Yadra Tiko!, ena macawa ni 23 Me ina 20 June, 2005. E kerei vua ena taura na vuli me vakayagataka ga na taro era koto oqo, se, ena noda dui vakavakarau sara mada ga o keda yadua. Me wiliki na parakaravu ena gauna ni vuli, ke levu na gauna me qai wiliki tale ga na tikinivolatabu e sega ni lavetaki.
Macawa ni 23 Me
◼ Tabana 3-4: Na leqa cava era volai koto oqori e tara na nomu bula? Eda kila vakacava ni leqa oqo e sega ni yaco vakavudua, se me yaco ena dua ga na vanua?
◼ Tabana 5: Eda vakadeitaka vakacava ni kauai dina na Kalou? Na cava e rawa ni vakaraitaka nida kauaitaka dina na Kalou kei na ka e cakava tiko?
◼ Tabana 6-8: Na cava e kaya na Maciu 24:1-8, 14 (NW), me ibalebale ni ituvaki sa sotavi tu nikua e vuravura? Me vaka e kaya na 2 Timoci 3:1-5, na gauna cava eda sa bula donuya tu oqo? Na iotioti ni veisiga ni cava? Eda vakadeitaka vakacava ni vosa dina ni Kalou na iVolatabu? Na cava na Matanitu ni Kalou eda vunautaka tiko?
◼ Tabana 9-10: Na cava meda vakadeuca matua tale mada kina na ka eda vakatulewataka e veisiga kei na ka eda vakaliuca? (Roma 2:6; Kala. 6:7) Nida vakasamataka na taro era koto ena tabana 10, na tikinivolatabu cava soti o nanuma rawa ena vukei iko mo lewa kina vakavinaka na ka mo cakava?
Macawa ni 30 Me
◼ Tabana 11: Na cava meda dui dikevi keda kina kei na veitaro e koto ena tabana oqo? (1 Kor. 10:12; Efeso 6:10-18) E laurai vakacava ena noda isaunitaro noda taura tiko vakabibi, se sega, na ivakasala i Jisu ena Maciu 24:44?
◼ Tabana 12-14: Na ‘gauna ni veilewai’ cava e tukuni tiko ena Vakatakila 14:6, 7, (VV)? Na cava na ibalebale ni “rerevaka na Kalou ka vakalagilagia”? O cei o Papiloni na Ka Levu, na cava ena yacovi koya? Na cava e dodonu meda cakava nikua me baleti Papiloni na Ka Levu? Na cava tale e okati ena parofisai me baleta na gauna ni veilewai? Eda sega ni kila “na siga se na . . . aua” ena vakatauca kina na Kalou na nona lewa, me tara vakacava oya na noda bula? (Maciu 25:13, VV)
◼ Tabana 15: Na cava na ibalebale ni vakalewai ni veiliutaki? E tarai keda yadudua vakacava na vakalelewa oqo?
◼ Tabana 16-19: Na cava e vakaibalebaletaki ena “lomalagi vou kei na vuravura vou”? (2 Pita 3:13) O cei e yalataka na veika oqo? Na veisau cava ena kauta mai na lomalagi vou kei na vuravura vou? Eda na tauca beka na kena yaga?
Macawa ni 6 June
◼ Tabana 20-1: Na cava a vakasalataki ratou kina o Jisu me ratou dro na nona imuri ena imatai ni senitiuri? (Luke 21:20, 21, VV) Gauna cava mera na dro kina? Na cava e bibi kina mera kua ni lokuyara, mera sa dro tani sara ga? (Maciu 24:16-18, 21, VV) Na cava era sega ni dau taura kina vakabibi na ivakasala e lewe levu? E yaga vakacava vei ira na vica na udolu na tamata e Jaina, vaka kina ena yatu Filipaini na nodra rogoca na ivakasala yaga? Na cava e sa qai bibi ga kina noda muria na ivakasala ena iVolatabu me baleta na kena sa voleka na ivakataotioti ni ituvaki kei vuravura? Ni sa lekaleka sara na gauna oqo, na cava e noda itavi? (Vkai. 24:11, 12)
◼ Tabana 22-3: Na cava era taura kina vakamamada na ivakasala ni cava o ira e Ositerelia ena 1974, vaka kina e Colombia ena 1985 ena kena vakarau kacabote na ulunivanua? Na cava a qai yaco? Na cava o nanuma ni o na cakava ke a donui iko na soli ni ivakasala oqori, na cava ena vaka kina oya na ka o cakava? Na cava e rawa ni vakaraitaka ena noda bula nikua, nida na muria na ivakasala ke da a bula ena siga i Noa? Na cava era via bula kina ena koro makawa o Sotoma se na vanua volekata o ira na bula ena gauna oya? Ena yaga vakacava vei keda na noda vakasamataka vakabibi na ka a yaco mai Sotoma?
Macawa ni 13 June
◼ Tabana 24-7: Yalovinaka, me vakayagataki na “Taro ni Vuli” e koto ena kato ena tabana 27.
Macawa ni 20 June
◼ Tabana 28-31: Yalovinaka, ena vakayagataki tale ga e ke na “Taro ni Vuli” e koto ena kato ena tabana 31.
Noda veivosakitaka na brochure oqo ena uqeti keda meda “yadra tiko” da qai tu vakarau. Me laurai mada ga ena noda cakacaka vakavunau na noda taura tiko vakabibi na itukutuku e kacivaka na agilosi: “Mo ni rerevaka na Kalou ka vakalagilagia, ni sa yaco mai na gauna ni nona veilewai.”—Maciu 24:42, 44, VV; Vkta. 14:7, VV.