Ye Obua Gbekɛbii ni Amɛsɔmɔ Yehowa Kɛjɛ Tsui Mli
1 Solomo jaje akɛ “Yehowa gboshinii ni ehaa ji bii.” (Lala 127:3-5) Amɛji gboshinii diɛŋtsɛ ni sɛɛnamɔ ni yɔɔ amɛhe lɛ da waa. Gbɛnaa nii ni jɛ Nyɔŋmɔ ŋɔɔ ka fɔlɔi anɔ akɛ amɛtsɔɔ, amɛtsɔse ni amɛkã amɛbii lɛ. Nɔ ni fata enɛ he ji tsɔsemɔ yɛ sɔɔmɔ nitsumɔ lɛ mli, ni amɛwo gbekɛbii lɛ hewalɛ ni amɛjɛ amɛtsui mli amɛwie Yehowa kɛ Maŋtsɛyeli lɛ he.—Efe. 6:4.
2 Mɛɛ afi mli esa akɛ fɔlɔi aje tsɔsemɔ ni tamɔ nɛkɛ shishi? Biblia hetoo lɛ yɛ faŋŋ: Esa akɛ afee kɛjɛ gbekɛbiiashi. (2 Tim. 3:14,15) Kɛ tsɔsemɔ lɛ je shishi mra lɛ, eeeha gbekɛbii lɛ ana shishitoo ni yɔɔ shiŋŋ yɛ anɔkwale lɛ mli ni amɛkɛ sɔɔmɔ lɛ afee amɛ daa gbi nitsumɔ. Mra tsɔsemɔ ni tamɔ nɛkɛ lɛ hu baabu amɛhe kɛjɛ je lɛ susumɔi kɛ subaŋi ahe.
3 Gbekɛbii ni amɛjeko skulyaa shishi lɛ ejie jwɛŋmɔŋ nyɛmɔ ni amɛyɔɔ ni amɛkɛkaseɔ nibii ni kasemɔ wa lɛ kpo. Esa akɛ akudɔ nyɛmɔ ni akɛkaseɔ nii yɛ mra mli nɛɛ aha nibii ni baaha amɛhe asa ni kɛ Yehowa nɔkpɛlɛmɔ baaba amɛnɔ. (w88 8/1 bf.15; w89 12/1 bf. 31) Mɛi ni darako nɛɛ ateŋ mɛi pii etee amɛhiɛ kɛbashɛ he ni amɛtsɔmɔ shiɛlɔi ni abaptisiko amɛ. Gbekɛbii nɛɛ ekomɛi jɔɔ amɛhe nɔ ni abaptisiɔ amɛ dani amɛyeɔ kɛjɛɔ ani nyɔŋma kɛyaa. Enɛ egbele gbɛ kɛha amɛ koni amɛsɔmɔ akɛ gbɛgbalɔi awalɔi kɛ daa gbɛgbalɔi po dani amɛgbɛɔ amɛ skulyaa naa. Bɔni afee ni amɛnine ashɛ otii nɛɛ anɔ lɛ ehe miihia ni atsɔɔ amɛ ni amɛkɛ gbɔmɛi agba Biblia mli saji sɔrɔtoi ahe sane.
4 Onukpai komɛi ni fɔɔ ŋmɛnɛŋmɛnɛ obalaŋtai lɛ ahe wiemɔi akɛ amɛfeɔ onukpaianii ni amɛbuuu mɔ lɛ nyaŋ obalaŋta ko ni aaaba eshinaa naa akɛ ekɛlɛ baagba sane lɛ he. Mɛni shiɛlɔ ni ji gbekɛ lɛ baanyɛ awie yɛ mɔ ko shinaa naa koni ekɛye gbɛtsii nii ni tamɔ nɛkɛ nɔ kunim koni eha shiatsɛ lɛ abo lɛ toi? Shiɛlɔ ko ni edako kɛ nɔ ko ni tamɔ nɛkɛ tsu nii: “Ojekoo, (Ataa/Awo) atsɛɔ mi___. Miisara wɔ akutseiaŋbii lɛ ŋmɛnɛ ejaakɛ mɛi pii susuɔ amɛ wɔsɛɛ be he. Akɛni onukpa ji bo hewɔ lɛ, ŋwanejee ko bɛ he akɛ oyɛ niiashikpamɔi babaoo yɛ shihilɛ mli fe mi. Shi naa ŋmalɛ ko ni shɛjeɔ wɔ fɛɛ wɔmii.” Yɛ be mli ni okane Kpojiemɔ 21:3. 4 sɛɛ lɛ, obaanyɛ ogbala sanegbaa lɛ kɛya dɛhiɛmɔ wolo Shihilɛ yɛ Toiŋjɔlɛ Jeŋ Hee Ko Mli lɛ nɔ.
5 Ŋaawoo kroko hu nɛ: “Ofainɛ, atsɛɔ mi___.Mikɛ be fioo miisara wɔ akutseiaŋbii lɛ ejaakɛ mile akɛ onukpai pii susuɔ jeŋba ni obalaŋtai pii ekɔ ŋmɛnɛ lɛ he. Yɛ bei komɛi amli lɛ gbekɛbii jieɔ bulɛ ni amɛbɛ kɛ atuatsemɔ su kpo. Shi makane ŋmalɛ ko ni tsɔɔ bɔ ni gbi ko lɛ mɔ fɛɛ mɔ baakase bɔ ni ekɛ enaanyo aaahi shi yɛ toiŋjɔlɛ mli lɛ matsɔɔ bo.” Agbɛnɛ kanemɔ Lala 37:11 koni otsɔɔ mli fɛfɛo. Kɛ shiatsɛmɛi ni ji onukpai lɛ nu wɔ shiɛlɔi bibii lɛ odaseyeli ni jɛ tsuiŋ nɛkɛ lɛ, ŋwanejee ko bɛ he akɛ amɛteŋ mɛi pii ahiɛ baasɔ.—Lala 8:3.
6 Gbekɛbii shiɛlɔi akpei abɔ yaa nɔ amɛyeɔ amɛbuaa Maŋtsɛyeli-shiɛmɔ kɛ kaselɔ-feemɔ nitsumɔ lɛ babaoo diɛŋtsɛ. Amɛsa yijiemɔ babaoo. Obalaŋtai ni fɔlɔi ni sheɔ Nyɔŋmɔ gbeyei etsɔse amɛ kɛjɛ amɛgbekɛbiiashi lɛ kpɛlɛɔ hewalɛwoo diɛŋtsɛ akɛ amɛbɔ mɔdɛŋ ni amɛkɛ amɛhe awo sɔɔmɔ nitsumɔ lɛ fai lɛ fɛɛ eko mli lɛ nɔ oya. Mɛi ni yaa skul lolo lɛ hu ena hegbɛ ni ekaaa akɛ amɛaaye amɛnanemɛi skulbii kɛ tsɔɔlɔi fɛɛ odase. Mɛi pii ena niiashikpamɔi ni haa mɔ tsui nyɔɔ emli yɛ shikpɔŋkuku krɛdɛɛ ni tamɔ nɛkɛ mli.
7 No hewɔ lɛ nyɛyea nyɛbuaa shiɛlɔi ni ji gbekɛbii ni yɔɔ nyɛ asafo lɛ mli lɛ koni amɛkɛ amɛ obalaŋtaiaŋ hewalɛ lɛ asɔmɔ Yehowa, ni amɛjɛ amɛtsuiŋ amɛjie eyi.—Jaj. 12:1.