ARTIK POU ÉTIDYÉ 46
Jéova ka bay nou prèv pou nou sir ki i ké fè so promès fèt
« Nenpòrt kimoun ki ké chaché gen roun bénédiksyon asou latè-a, Bondjé lavérité-a ké béni l’ » (IS. 65:16).
KANTIK 3 Jéova, mo fòrs ké mo èspérans
KOUTWÉY ASOU SA NOU KÉ WÈa
1. Ki mésaj profèt Izayi bay Israyélit-ya ?
PROFÈT Izayi ka di ki Jéova sa « Bondjé lavérité-a ». Isi-a, annan lang ébré-a, lò yé ka di « lavérité », sa lé di « anmèn » (Is. 65:16 ; nòt). « Anmèn » lé di « a sa ki pou fèt » ouben « asiré pa pitèt ». Lò yé ka sèrvi « anmèn » annan Labib-a parapòrta Jéova ouben Jézi, sa ka montré ki sa yé ka di, vré. Donk, mésaj Izayi bay Israyélit-ya klè : Nou toujou pouvé krè sa Jéova ka anonsé. É a sa i montré lò i réyalizé chak promès i fè.
2. Poukisa nou pouvé vréman krè ki promès Jéova fè nou pou dimen ké fèt, é ki késyon nou ké wè ?
2 Ès nou pouvé vréman krè ki promès Jéova fè nou pou dimen ké fèt ? Près 800 lannen apré lépòk Izayi, apot Pòl èspliké poukisa nou pouvé sir ki lò Jéova ka promèt roun bagaj, i toujou ka fè l’. I di : « Bondjé pa pouvé manti » (Héb. 6:18). Menm fason to pa ké jwenn dlo salé koté to ka pran dlo sours, Jéova, ki sa Sours lavérité-a, pa pouvé manti. Donk, nou pouvé krè tousa i ka di. Nou pouvé krè chak promès i ka fè nou pou dimen. Annan sa artik-a, nou ké wè sa késyon-yan : Kisa Jéova promèt i ké bay nou dimen ? É kouman Jéova ka pèrmèt nou sir ki sa promès-a ké réyalizé ?
KISA JÉOVA PROMÈT ?
3. a) Ki promès sèrvitèr Bondjé-ya kontan toubonnman ? (Révélation 21:3, 4). b) Kouman roun ran moun ka réyaji lò yé ka tandé sa promès-a ?
3 Aprézan, nou ké palé di roun promès sèrvitèr Bondjé-ya asou tout latè-a kontan toubonnman (li Révélation 21:3, 4). Jéova ka promèt ki roun jou, « i pa ké gen lanmò ankò » é ki « i pa ké gen ni dèy, ni rélé, ni doulèr ankò ». Lò nou ka préché, nou kontan sèrvi sa vèrsé-ya ki ka palé di lavi annan paradi-a é ki ka konsolé nou. Mé kouman roun ran moun ka réyaji lò yé ka tandé sa promès-a ? Yé ka di : « Sa pa ké janmen fèt ! ».
4. a) Lò Jéova promèt ki i té ké fè latè-a divini roun paradi, kisa i té savé ki té ké rivé ? b) Anplis di fè nou roun promès, kisa Jéova bay nou ?
4 Lò Jéova fè Jan ékri sa promès-a, i té savé ki, lò nou té ké préché mésaj Rwayonm-an, nou té ké palé di sa èspwar-a. Mé i té savé osi ki sa té ké rèd pou roun ran krè ki « sa bagaj-ya » té ké fèt (Is. 42:9 ; 60:2 ; 2 Cor. 4:3, 4). Alòr, kouman nou pouvé idé sa-ya ki ka kouté nou pou yé sir ki bèl bagaj nou ka li annan Révélation 21:3, 4 ké fèt ? É kouman nou menm nou pouvé gen plis konfyans annan Jéova ké annan so promès ? Nou savé ki Jéova fè sa bèl promès-a. Enben, anplis di sa, a pou nou savé ki i bay nou plizyèr rézon pou nou krè sa promès-a. Ki rézon i bay nou ?
JÉOVA KA BAY NOU PRÈV POU NOU SIR KI I KÉ RÉYALIZÉ SO PROMÈS
5. Ki vèrsé ka pèrmèt nou krè promès Bondjé fè, é kisa sa vèrsé-ya ka di ?
5 Annan Révélation 21:5, 6a, nou ka jwenn plizyèr rézon pou nou krè promès Jéova asou paradi-a. Nou ka li : « Sa-la ki asiz asou tronn-an di : “Gadé ! Mo ka fè tout bagaj vin nòv.” Épi i di osi : “Ékri sa, paské to pouvé krè sa paròl-ya é yé vré.” Épi i di mo : “Yé fèt ! Mo sa Alfa-a ké Oméga-a, koumansman-an ké lafen-an.” »
6. Poukisa sa nou ka li annan Révélation 21:5, 6 ka pèrmèt nou gen plis konfyans annan promès Bondjé fè ?
6 Poukisa sa vèrsé-ya ka fè nou gen plis konfyans annan promès Bondjé fè ? Liv Révélation. Dénouement ka èspliké : « Annan sa vèrsé-ya, nou pouvé di ki a kousidiré Jéova té ka signé roun papyé pou di nou ki nou pouvé sir ki i ké tchenbé so promèsb. » Nou ka trapé sa promès-a annan Révélation 21:3, 4. Mé apré sa, annan vèrsé 5 ké 6, a kousidiré Jéova té signé sa promès-a, é sa ka pèrmèt nou sir ki i ké fèt. Annou wè kisa Jéova ka di pou fè nou sir ki nou pouvé fè li konfyans.
7. Kimoun ki ka koumansé palé annan vèrsé 5-a, é poukisa sa paròl-ya èspésyal ?
7 Vèrsé 5-a ka koumansé konsa : « Sa-la ki asiz asou tronn-an di » (Rév. 21:5a). Sa paròl-ya èspésyal paské yé ka montré ki a Jéova li menm ki ké palé, é annan liv Révélation-an, a sèlman trwa fwa Jéova ka fè sa. Donk, a pa roun zanj ki pwisan, ni Jézi ki résisité ki ka fè nou sir ki sa promès-a ké fèt, a Jéova li menm ki ka fè l’ ! Sa ka montré nou ki nou pouvé vréman krè sa i ka di apré. Poukisa ? Paské Jéova « pa pouvé manti » (Tite 1:2). Donk, sa ki marké annan Révélation 21:5, 6 ké fèt, asiré pa pitèt.
« GADÉ ! MO KA FÈ TOUT BAGAJ VIN NÒV »
8. Kisa Jéova ka fè pou fè nou sir ki so promès ké fèt ? (Isaïe 46:10).
8 Aprézan, annou palé di sa mo-a : « Gadé ! » (Rév. 21:5). An grèk, sa mo-a ka parèt souvan annan liv Révélation-an. Dapré roun liv, a « roun fason pou di moun-an ki ka li-a, byen gadé sa i ké li apréc ». Mé kisa yé ka di apré ? Bondjé ka di : « Mo ka fè tout bagaj vin nòv. » Isi-a, Jéova ka palé di chanjman ki pou fèt pita, mé i tèlman sir ki sa promès-ya ké fèt ki i ka palé kousidiré yé té ja fèt (li Isaïe 46:10).
9. a) Lò Jéova ka di « Fè tout bagaj vin nòv », a pou palé di dé bagaj i ka fè, kilès ? b) Kisa ki ké rivé syèl-a ké latè-a nou konnèt jòdla ?
9 Annou palé di dézyèm parti Révélation 21:5 : « Fè tout bagaj vin nòv. » Annan sa chapit-a, lò Jéova ka di sa, a pou palé di dé bagaj i ka fè : i ka ranplasé épi i ka roumété. Pou koumansé, kisa i ké ranplasé ? Annan Révélation 21:1 nou ka li : « Ansyen syèl-a ké ansyen latè-a té disparèt. » « Ansyen syèl-a », a gouvèrnman-yan asou latè-a ki ka aji anba pouvwar Satan ké so démon (Mat. 4:8, 9 ; 1 Jean 5:19). Annan Labib-a, lò yé ka palé di « latè-a », détan, a pou palé di moun asou latè-a (Gen. 11:1, nòt ; Deut. 32:1). Donk, « ansyen latè-a », a moun méchan ki ka viv asou latè-a jòdla. Jéova pa ké yenki ranjé « syèl-a » ké « latè-a » nou konnèt jòdla. Non, i ké tiré yé nèt é i ké mété « roun nouvo syèl ké roun nouvo latè » pou ranplasé yé, sa lé di ki roun nouvo gouvèrnman ké dirijé dé moun ki jis.
10. Kisa Jéova ké « fè vin nòv » ?
10 Di ki ròt fason Jéova ké « fè tout bagaj vin nòv » ? (Rév. 21:5). Jéova ké ranjé latè-a é i ké fè tout moun vin parfè. Kou Izayi di l’, tout latè-a ké divini roun paradi ki bèl toubonnman, kousidiré a té jarden Édèn-an asou tout latè-a ! Chak moun ké « vin nòv », Bondjé ké géri yé chak konplètman. Moun ka bwété, moun ki sourdo, moun ki pa ka wè ké géri é moun mouri-ya ké rouviv (Is. 25:8 ; 35:1-7).
« TO POUVÉ KRÈ SA PARÒL-YA É YÉ VRÉ, YÉ FÈT ! »
11. Ki lòrd Jéova bay Jan, é poukisa ?
11 Kisa Bondjé fè ankò pou pèrmèt nou sir ki nou pouvé fè li konfyans ? Jéova di Jan : « Ékri sa, paské to pouvé krè sa paròl-ya é yé vré » (Rév. 21:5). Jéova pa sèlman bay Jan lòrd « ékri ». I bay li roun rézon pou i fè l’. I di : « Paské to pouvé krè sa paròl-ya é yé vré. » Donk, nou pouvé fè Bondjé konfyans lò i ka di roun bagaj, é sa i ka di vré. Nou byen kontan Jan kouté Bondjé lò i di li « ékri » ! Gras a sa, nou pouvé li ki Bondjé ka promèt nou fè latè-a divini roun paradi, é nou pouvé pran tan réfléchi asou tout bèl bagaj nou ké gen.
12. Poukisa a Jéova rounso ki pouvé di : « Yé fèt ! » ?
12 Kisa Jéova ka di apré sa ? « Yé fèt ! » (Rév. 21:6). Aprézan, i ka palé kousidiré tousa i té promèt asou paradi-a té ja fèt. A li rounso ki pouvé palé konsa, paské anyen pa pouvé anpéché li fè so projè fèt. Apré sa, Jéova ka di rounòt bagaj ki ka pèrmèt nou sir ki i ké fè so promès fèt, asiré pa pitèt. Kisa i ka di ?
« MO SA ALFA-A KÉ OMÉGA-A »
13. Kisa Jéova lé montré nou lò i ka di ki i sa « Alfa-a ké Oméga-a » ?
13 Kou nou ja di l’, annan vizyon Jéova bay Jan, a Jéova li menm ka palé trwa fwa (Rév. 1:8 ; 21:5, 6 ; 22:13). É chak fwa, i ka di menm bagaj-a : « Mo sa Alfa-a ké Oméga-a. » « Alfa », a prémyé lèt annan lalfabé grèk-a, é « oméga », a dèrnyé lèt-a. Lò i ka di ki i sa « Alfa-a ké Oméga-a », Jéova ka montré ki lò i ka koumansé roun bagaj i toujou ka fini l’.
Lò Jéova ka koumansé roun bagaj, i toujou ka fini l’ (gadé paragraf 14, 17).
14. a) Bay roun èkzanp koté a kousidiré Jéova ka di : « Alfa », épi koté i ké di : « Oméga ». b) Di kisa Genèse 2:1-3 ka pèrmèt nou sir ?
14 Lò Jéova fè Adan ké Èv, i di ki projè i té gen pou moun-yan é pou latè-a. Annan Labib-a, nou ka li : « Bondjé béni yé é i di yé : “Fè pitit é divini bokou ; plen latè-a é okipé di li” » (Gen. 1:28). A sa moman-an, a kousidiré Jéova té di « Alfa ». So projè té klè : roun jou, tout pitit Adan ké Èv, ki té ké parfè é ki té ké obéyi Bondjé, té ké plen latè-a é yé té ké fè l’ divini roun paradi. Lò sa ké fèt, a kousidiré Jéova ké di « Oméga ». Lò i fini fè « syèl-a, latè-a ké tousa ki annan yé », Jéova di roun bagaj ki ka pèrmèt nou sir ki so projè ké fèt. Nou ka trouvé sa i di annan Genèse 2:1-3 (li). Annan sa vèrsé-ya, Bondjé ka désidé ki sétyèm jou-a sakré. Kisa sa lé di ? A roun fason pou montré nou ki so projè pou moun-yan ké latè-a ké fèt. Lò sétyèm jou-a ké fini, sa projè-a ké fèt konplètman.
15. Kisa ki pitèt fè Satan krè ki i té rivé anpéché Jéova fè so projè pou moun-yan fèt ?
15 Lò Adan ké Èv tounen yé do bay Jéova, yé divini péchèr é donk yé bay tout yé pitit péché-a ké lanmò-a (Rom. 5:12). Bondjé té lé latè-a plen ké moun parfè é ki té ka obéyi. Donk, a kousidiré Satan té rivé anpéché Bondjé fè so projè fèt. Yé té ké di ki Satan té anpéché Jéova di roun jou : « Oméga ». Annan so lidé, pitèt i té ka pansé ki Jéova té pri. Kisa i té pouvé fè ? Tchwé Adan ké Èv épi roufè rounòt mouché ké rounòt madanm pou fè sa i té lé fè o koumansman ? Mé si Bondjé té fè sa, Djab-a té ké di ki i ka manti. Poukisa ? Paské kou nou ka wè l’ annan Genèse 1:28, Jéova té di Adan ké Èv ki a té ké yé pitit ki té ké plen latè-a.
16. Poukisa Satan pitèt krè ki i té ké pouvé di ki Jéova pa té rivé fè so projè fèt ?
16 Ki ròt désizyon Satan pitèt pansé Jéova té ké pran ? Pitèt i di an so tchò ki Jéova té ké lésé Adan ké Èv fè pitit ki pa té ké parfè é ki pa té ké janmen rivé vin parfè (Eccl. 7:20 ; Rom. 3:23). Si Jéova té fè sa, Djab-a té ké di ki i pa té rivé fè so projè fèt. Poukisa ? Paské latè-a pa té ké plen ké moun ki parfè.
17. Kisa Jéova fè pou réglé problèm ki lévé lò Adan ké Èv tounen yé do bay li, é finalman kisa sa ké bay ? (gadé zimaj-a osi).
17 Donk, lò Satan wè kouman Jéova réglé problèm i lévé lò li ké Adan ké Èv tounen yé do bay li, i dèt rété èstébékwé (Ps. 92:5). Jéova pèrmèt Adan ké Èv fè pitit, konsa i montré ki i pa té ka manti, i té ka di lavérité. É i byen montré ki anyen ni pyès moun pa pouvé anpéché li fè sa i désidé fè. I kontinyé fè projè i té gen o koumansman-an fèt. I bay roun « désandans » ki té ké sové pitit Adan ké Èv ki té ké obéyi Bondjé (Gen. 3:15 ; 22:18). Ranson-an : men roun bagaj Satan pa té ké janmen imajiné ! Poukisa ? Paské ranson-an ka apiyé asou roun lanmou ki pa ka gadé pou sopa entérè (Mat. 20:28 ; Jean 3:16). A roun kalité i pa gen menm. A pou so kò rounso i ka gadé ! Mé kisa ki ké posib gras a ranson-an ? Lò mil lannen-yan ké fini, tout latè-a ké sa roun paradi é a yenki pitit Adan ké Èv ki ké parfè é i ké obéyi Bondjé ki ké viv asou l’ — kou Jéova té lé o koumansman. Sa jou-a, a kousidiré Jéova ké di : « Oméga ».
KOUMAN NOU POUVÉ GEN PLIS KONFYANS ANNAN PROMÈS PARADI-A
18. Jéova ka di nou trwa bagaj pou nou sir ki so promès ké fèt. Kilès ? (gadé karé-a osi « Trwa rézon ki ka pèrmèt nou sir ki promès Jéova ké fèt »).
18 Dapré sa nou fin wè, kisa nou pouvé di moun-yan ki pa ka rivé krè promès paradi-a ? Prémyèrman, a Jéova li menm ki ka fè nou sa promès-a. Liv Révélation-an ka di : « É sa-la ki asiz asou tronn-an di : “Gadé ! Mo ka fè tout bagaj vin nòv.” » Jéova gen sajès, i pwisan é i lé fè so promès fèt. Dézyèmman, Jéova tèlman sir ki sa promès-a ké fèt, ki pou li, i ja fèt. A sa menm, paské i ka di : « To pouvé krè sa paròl-ya é yé vré. […] Yé fèt ! ». Trwazyèmman, lò Jéova ka koumansé roun bagaj, i toujou ka fini l’. A sa nou ka wè lò i ka di : « Mo sa Alfa-a ké Oméga-a. » Jéova ké byen montré ki sa-la ki manti é ki pa rivé fè anyen, a Satan.
19. Lò to ka palé ké roun moun ki pa ka rivé krè annan promès paradi-a, kisa to pouvé fè ?
19 Pa bliyé ki, chak fwa to ka palé pou roun moun di sa Bondjé ka di nou pou pèrmèt nou sir ki so promès ké fèt, to ka vin plis sir ki sa promès-ya ké fèt. Donk, prochen kou to ké li Révélation 21:4 pou roun moun épi i ka di to : « Awa sa pa ké janmen fèt », kisa to pouvé fè ? To pouvé li vèrsé 5 ké 6-a pou li épi èspliké l’ sa sa lé di. Montré li ki Jéova ka bay nou prèv ki i ké réyalizé so promès, kousidiré i té signé sa promès-a ké so pròp lanmen (Is. 65:16).
KANTIK 145 Dieu nous promet le Paradis
a Annan sa artik-a, nou ké wè ki prèv Jéova ka bay nou pou nou sir ki i ké fè latè-a divini roun paradi. Chak fwa nou ka palé di sa ké roun moun, nou ankò plis sir ki Jéova ké fè so promès fèt.
c R. Bratcher et H. Hatton, A Handbook on the Revelation to John, United Bible Societies, 1993.