ARTIK POU ÉTIDYÉ 12
KANTIK 77 La lumière dans un monde enténébré
Pa rété annan soukou, rété annan limyèr-a
« Anvan, zòt té annan soukou, mé aprézan zòt annan limyèr-a » (ÉPH. 5:8).
SA NOU KÉ ANPRANN
Annan Éphésiens chapit 5, Pòl ka palé di soukou ké limyèr. Nou ké wè sa sa pouvé anprann nou.
1-2. a) Annan ki sitiasyon Pòl té fika lò i ékri so lèt pou Éfézyen-yan ? b) Ki késyon nou ké réponn ?
LÒ PÒL té Ròm, fronmen annan roun kaz ké roun gardyen ki té ka véyé l’, i té lé ankourajé so frè ké sò-ya. Kou i pa té pouvé alé wè yé li menm, i ékri plizyèr lèt bay yé. I ékri lèt pou Éfézyen-yan bò d’ lannen 60 ouben 61 di nou lépòk (Éph. 1:1 ; 4:1).
2 Près dis lannen anvan sa, Pòl té pasé roun patché tan Éfèz pou préché ké ansényé bon nouvèl-a (Actes 19:1, 8-10 ; 20:20, 21). I té kontan so frè ké sò-ya bokou, é i té lé ankourajé yé rété fidèl ké Jéova. Mé poukisa i palé krétyen wen-yan di soukou ké limyèr ? É kisa sa i di yé pouvé anprann tout krétyen-yan ? Annou réponn sa késyon-yan.
YÉ SOTI ANNAN SOUKOU POU VINI ANNAN LIMYÈR-A
3. Di kisa Pòl palé annan so lèt pou Éfézyen-yan ?
3 Pòl di krétyen-yan ki té Éfèz : « Anvan, zòt té annan soukou, mé aprézan zòt annan limyèr-a » (Éph. 5:8). Isi-a, Pòl ka palé di soukou ké limyèr pou montré kouman Éfézyen-yan té chanjé nèt. Mé pou koumansé, annou wè poukisa i té pouvé di ki anvan, Éfézyen-yan « té annan soukou ».
4. Poukisa nou pouvé di ki Éfézyen-yan té annan soukou akoz di fo rélijyon-an ?
4 Annan soukou akoz di fo rélijyon-an. Anvan yé té anprann lavérité-a, krétyen-yan ki té Éfèz té èsklav roun patché fo krwayans ké roun patché sipèrstisyon. Annan vil Éfèz, i té gen tanp Artémis. É a sa lépòk-a, moun-yan té ka di ki a té roun annan pi bèl bagaj moun pa té janmen fè. A yenki zidòl yé té ka adoré annan sa tanp-a. Moun té ka fè zidòl ki té ka réprézanté tanp-a ké Artémis. Yé té ka fè patché soumaké ké sa (Actes 19:23-27). É roun patché moun Éfèz té ka fè lamaji osi (Actes 19:19).
5. Poukisa nou pouvé di ki Éfézyen-yan té annan soukou annan zafè konnèt sa ki byen ké sa ki mal ?
5 Annan soukou pas yé pa té konnèt ni sa ki byen ni sa ki mal. Sa-ya ki té ka rété Éfèz té ka fè roun patché mové bagaj sèksyèl dégoutan, épi san ronté. Annan yé téyat é menm annan lafèt yé té ka fè pou yé rélijyon, yé té abitchwé palé di vyé bagaj sèksyèl malpròp (Éph. 5:3). Roun patché Éfézyen pa té « konnèt ni sa ki byen ni sa ki mal ankò ». Annan lang grèk-a, sa lé di ki yé pa té ka « santi pyès doulò ankò » (Éph. 4:17-19). Anvan Éfézyen-yan anprann sa ki té byen ouben sa ki té mal, yé konsyans pa té ka bat yé, é yé té ka krè ki yé pa té gen pyès kont pou randé Bondjé. Donk, Pòl té gen byen rézon di ki yé té « annan soukou é […] lwen di lavi ki ka vini di Bondjé ».
6. Poukisa Pòl té pouvé ékri Éfézyen-yan ki ‘aprézan yé té annan limyèr-a’ ?
6 Mé, roun ran Éfézyen pa rété annan soukou. Pòl ékri ki ‘aprézan yé té annan limyèr-a kanta sényèr-a’ (Éph. 5:8). Yé té ka viv soulon Paròl Bondjé-a ki té kou roun limyèr ki té ka gidé yé (Ps. 119:105). Yé té lésé yé fo rélijyon ké vyé bagaj sèksyèl malpròp yé té ka fè. Yé té divini dé moun ki té ka « imité Bondjé » (Éph. 5:1). É yé té ka fè tousa yé té pouvé pou adoré Jéova épi pou fè l’ plézi.
7. Poukisa nou pouvé di ki nou sitiasyon ka sanblé sitiasyon krétyen-yan ki té Éfèz annan lépòk Pòl ?
7 Menm fason-an, anvan nou anprann lavérité-a, nou té annan soukou akoz di fo rélijyon-an é paské nou pa té konnèt ni sa ki byen ni sa ki mal. Roun ran annan nou té ka fété lafèt payen ouben té ka mennen roun vyé lavi. Mé lò nou anprann sa Jéova ka di asou sa ki bon ké sa ki pa bon, nou koumansé chanjé sa nou té divèt chanjé annan nou lavi. Nou koumansé viv kou i lé nou viv, é nou trapé roun patché bénédiksyon (Is. 48:17). Mé ké tout problèm nou ka jwenn jòdla, nou divèt briga pou nou pa viré annan soukou koté nou soti-a épi « kontinyé maché kou sa-ya ki ka maché annan limyèr-a ». Kouman nou pouvé fè sa ?
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
Annan lèt Pòl ékri pou Éfézyen-yan, i gen roun patché konsèy plen ké lanmou nou pouvé swiv jòdlab (gadé paragraf 7).
PA RÉTÉ ANNAN SOUKOU
8. Dapré Éphésiens 5:3-5, kisa krétyen-yan ki té Éfèz té divèt kontinyé rijété ?
8 (Li Éphésiens 5:3-5.) Pou yé pa té rété annan soukou, krétyen-yan ki té Éfèz té divèt kontinyé rijété tout bagaj ki pa té ka fè Jéova plézi. Parèkzanp, vyé kondwit sèksyèl mé osi kozé malpròp. Pòl fè Éfézyen-yan sonjé ki yé té divèt rijété sa kalité bagaj-ya si yé té lé rousouvwè roun « éritaj annan rwayonm Kris ké Bondjé ».
9. Poukisa nou divèt rijété tousa ki pouvé fè nou fè vyé bagaj sèksyèl malpròp ?
9 Nou menm osi, nou divèt kontinyé briga pou nou pa koumansé bay annan « bagaj ki pa vo anyen ki ka fèt annan soukou » (Éph. 5:11). Pi roun moun ka gadé bagaj ki malpròp, ka kouté ouben ka palé di sa bagaj-ya, pi i ka riské fè roun péché (Gen. 3:6 ; Jacq. 1:14, 15). Annan roun péyi, roun patché frè divini « zanmi » annan roun group pou kozé asou Entèrnèt. O koumansman, roun patché annan yé té ka palé di bagaj èspirityèl, mé piti piti, yé vin gen vyé kozé. Yé koumansé palé di sèks. Pita, plizyèr frè rékonnèt ki sa vyé kozé-ya fè yé fè vyé bagaj sèksyèl malpròp.
10. Kouman Satan ka éséyé bloublou nou ? (Éphésiens 5:6).
10 Monn Satan-an ka éséyé bloublou nou ! I ka éséyé fè nou krè ki lò Jéova ka di ki roun bagaj pa bon, a pa vré (2 Pierre 2:19). Sa pa ka étoné nou ! Satan ka fè sa dipi lontan. I lé moun-yan pa rivé savé sa ki bon ké sa ki mové (Is. 5:20 ; 2 Cor. 4:4) Donk, sa pa ka étoné nou non plis lò nou ka wè ki i gen roun patché fim, émisyon latélé ké sit Entèrnèt ki ka montré bagaj ki pa k’alé ké prensip Jéova-ya ki jis. Satan ka éséyé fè nou krè ki nou pouvé fè vyé bagaj sèksyèl malpròp é mennen roun vyé lavi san anyen pa rivé nou é ki anplis di sa, nou tchò ké kontan (li Éphésiens 5:6).
11. Kouman sa Angela viv ka montré ki sa enpòrtan di apliké bon konsèy nou ka jwenn annan Éphésiens 5:7 ? (gadé zimaj-a osi).
11 Satan lé nou pasé tan ké moun ki pa ka ankourajé nou swiv prensip Jéova-ya. A pou sa Pòl di Éfézyen-yan panga. I di yé : « Donk, a pa pou zòt gen anyen ka wè ké yé ». Sa lé di ké sa-ya ki té ka fè bagaj Bondjé pa kontan (Éph. 5:7). Mé jòdla, nou divèt fè ankò pi atansyon, paské a pa pou nou bliyé ki « moun nou ka frékanté », a pa sèlman moun nou ka pasé tan ké yé annan nou lavi touléjou. A moun nou ka palé ké yé asou rézo sosyal-ya osi. Angelaa, ki ka rété an Azi, wè kouman sa rézo sosyal-ya pouvé danjéré. I ka di : « Yé danjéré menm ! Piti piti, yé pouvé anpéché to byen réfléchi. Lò to lé konprann, sa pa té ka jennen mo gen “zanmi” ki pa té ka rèspèkté prensip-ya ki annan Labib. Finalman, mo koumansé krè ki mo té pouvé mennen roun lavi Jéova pa kontan é ki i pa té gen anyen annan sa. » Érèzman, ké bokou lanmou, ansyen-yan idé Angéla chanjé sa i té divèt chanjé. Pou fini i ka di : « Aprézan, pasé mo plen mo lèspri ké sa moun ka mété asou rézo sosyal-ya, a bagaj èspirityèl mo ka mété annan mo tèt ».
Si nou ka maché ké bon moun sa ké pi fasil pou nou rèspèkté prensip Jéova-ya (gadé paragraf 11).
12. Kisa ki ké idé nou rèspèkté sa Jéova ka di asou sa ki bon ké sa ki mové ?
12 Annou pa lésé sa-ya ki ka pansé ki nou pouvé gen roun vyé kondwit sèksyèl détenn asou nou. Nou menm, nou konnèt lavérité asou sa (Éph. 4:19, 20). Donk, annou doumandé nou kò : « Ès mo ka fè atansyon pou mo pa frékanté mo kolèg travay, mo kanmarad lékòl ouben ròt moun ki pa ka rèspèkté prensip Jéova-ya ki jis, lò mo pa oblijé fè l’ ? Ès mo ka pran kouraj é mo ka soutni so prensip menm lò yé ka di ki mo rèd ? » Kou nou ka wè l’ annan 2 Timothée 2:20-22, menm annan asanblé-a nou divèt byen chwazi nou zanmi. Annou pa bliyé ki pitèt roun ran pa ké ankourajé nou rété fidèl épi kontinyé sèrvi Jéova.
« MACHÉ KOU SA-YA KI KA MACHÉ ANNAN LIMYÈR-A »
13. Kisa sa lé di « kontinyé maché kou sa-ya ki ka maché annan limyèr-a » ? (Éphésiens 5:7-9).
13 Pòl ankourajé krétyen-yan ki té Éfèz kontinyé rété lwen di soukou-a, mé osi « kontinyé maché kou sa-ya ki ka maché annan limyèr-a » (li Éphésiens 5:7-9). Kisa sa lé di ? Kontinyé maché kou sa-ya ki ka maché annan limyèr-a, sa lé di toujou aji kou roun vré krétyen. Pou nou rivé fè sa, a pou nou pran tan li ké étidyé Labib ké nou piblikasyon-yan. É lò nou ka étidyé, nou divèt vréman byen gadé èkzanp ké ansèyman Jézi Kris ki sa « limyèr monn-an » (Jean 8:12 ; Prov. 6:23).
14. Kouman lèspri sen pouvé idé nou ?
14 Pou nou kontinyé maché kou « sa-ya ki ka maché annan limyèr-a », nou bézwen lèspri sen Bondjé idé nou osi. Poukisa ? Paské sa rèd toubonnman di rété pròp annan sa monn-an ki pa pròp (1 Thess. 4:3-5, 7, 8). Lèspri sen pouvé idé nou briga pou nou pa réfléchi kou moun-yan annan sa monn-an ka réfléchi. Yé pa ka wè bagaj-ya kou Jéova ka wè yé. Lèspri sen pouvé idé nou osi fè « tout kalité bagaj ki bon é ki jis » (Éph. 5:9).
15. Kisa pou nou fè pou nou gen lèspri sen ? (Éphésiens 5:19, 20).
15 Roun fason nou pouvé gen lèspri sen, a lò nou ka priyè. Jézi di ki Jéova ka « bay sa-ya ki ka doumandé l’, lèspri sen » (Luc 11:13). Nou pouvé gen lèspri sen osi lò nou ka louwé Jéova pannan nou réinyon (li Éphésiens 5:19, 20). Kou lèspri sen ké aji asou nou, sa ké idé nou viv roun fason ki ka fè l’ plézi.
16. Kisa ki ké idé nou pran bon désizyon ? (Éphésiens 5:10, 17).
16 Lò nou gen roun désizyon enpòrtan pou nou pran, nou divèt « konprann kisa Jéova lé », épi tchenbé kont di sa (li Éphésiens 5:10, 17). Lò nou ka chaché ki prensip annan Labib ka alé ké nou sitiasyon, anfèt sa nou ka chaché, a sa Jéova ka pansé di sa. Apré sa, si nou ka swiv sa prensip-ya, nou ké gen plis chans pran bon désizyon.
17. Kouman nou pouvé itilizé nou tan pi bon fason-an ? (Éphésiens 5:15, 16 ; gadé zimaj-a osi).
17 Pòl konséyé krétyen-yan ki té Éfèz byen sèrvi yé tan osi (li Éphésiens 5:15, 16). « Méchan »-an, nou lèlmi Satan, té ké lé nou tèlman okipé ka kouri dèyè bagaj sa monn-an ki nou pa gen tan pou sèrvi Bondjé ankò (1 Jean 5:19). Si i pa panga, roun krétyen pouvé mété soumaké, zafè fè gran lékòl ouben so travay, anvan tousa i pouvé fè pou adoré Jéova. A vré, sa bagaj-ya pa mové, mé a pa sa ki divèt pi enpòrtan pou nou. Si roun krétyen té ka mété sa bagaj-ya an prémyé annan so lavi, sa té ké montré ki i ka lésé fason moun-yan ka réfléchi détenn asou li. Pou nou maché kou « sa-ya ki ka maché annan limyèr-a », nou divèt ‘fè tousa nou pouvé pou nou itilizé nou tan pi bon fason-an’, sa lé di mété sa ki pi enpòrtan douvan.
Pòl ankourajé krétyen-yan ki té ka rété Éfèz sèrvi yé tan pi bon fason-an (gadé paragraf 17).
18. Kisa Donald fè pou i rivé sèrvi so tan pi byen ?
18 Donk, chaché wè kouman to pouvé fè plis pou Jéova. A sa Donald, roun frè ki ka rété Afrik di Sid, fè. I ka di : « Mo réfléchi asou mo sitiasyon é mo sipliyé Jéova pou i idé mo fè plis annan prédikasyon-an. Mo doumandé l’ osi idé mo trapé roun travay ki té ké pèrmèt mo préché plis. É i fè mo trapé roun travay konsa. A konsa, mo ké mo madanm, nou koumansé sèrvi Jéova a plen tan. »
19. Kouman nou pouvé kontinyé maché « kou sa-ya ki ka maché annan limyèr-a » ?
19 Lèt Pòl ékri Éfézyen-yan dèt ankourajé yé kontinyé yé lakours krétyen-an. É konsèy i bay yé pouvé bay nou fòrs osi. Kou nou wè l’, yé pouvé bay nou sajès nou bézwen pou nou byen chwazi ké kisa nou ka anmizé épi pou nou byen chwazi nou zanmi osi. I pouvé bay nou anvi kontinyé étidyé Labib souvan pou nou lésé limyèr lavérité-a kléré nou chimen. É yé pouvé idé nou chanjé, paské yé ka montré nou ki lèspri sen-an enpòrtan é i ka pèrmèt nou gen bèl kalité. Si nou ka apliké konsèy Pòl bay nou, nou ké pran bon désizyon. Sa désizyon-yan ké alé ké fason Jéova ka pansé. Konsa, nou pa ké rété annan soukou sa monn-an, nou ké rété annan limyèr-a !
KISA TO TÉ KÉ RÉPONN ?
A kisa ki « soukou » ké « limyèr » annan Éphésiens 5:8 ?
Kisa nou pouvé fè pou nou pa rété annan « soukou » ?
Kouman nou pouvé « kontinyé maché kou sa-ya ki ka maché annan limyèr-a » ?
KANTIK 95 Limyèr-a ka kléré fò
a Yé chanjé déztrwa non.
b MEN SA NOU KA WÈ ASOU ZIMAJ-A: Asou sa zimaj-a, nou ka wè roun kopi di lèt Pòl ékri Éfézyen-yan.