Rari ari Pemetang —Diau dalam Penampak

1-2. (a) Nama situasi ke ditapi Paul lebuh iya nulis ngagai bala menyadi ba Epesus, lalu nama kebuah iya ngereja nya? (b) Nama tanya ti deka dikerandauka kitai?

TAJA PAN Rasul Paul dijil ba siti rumah di Rome, tang iya deka meransang bala menyadi Kristian ke bukai. Iya enda ulih ngabas sida betunga mua. Nya alai, iya nulis surat ngagai sida. Siti ari surat nya ditujuka ngagai bala menyadi ba Epesus. Iya nulis surat nya kira-kira ba taun 60 tauka 61 M.—Eps. 1:1; 4:1.

² Kira-kira sepuluh taun sebedau nya, Paul bisi diau ba Epesus. Iya nginjil sereta ngajar Berita Manah ba dia. (SKR. 19:​1, 8-10; 20:​20, 21) Iya amat rinduka bala menyadi ba dia, lalu deka nulung sida mengkang tetap ati ngagai Jehovah. Tang, nama kebuah iya nulis ngagai bala menyadi Kristian ke dipilih ngagai serega pasal pemetang enggau penampak? Lalu, nama ulih dipelajarka semua kitai ari utai ke ditulis Rasul Paul? Aram kitai beratika saut ngagai dua iti tanya tu.

ARI PEMETANG NGAGAI PENAMPAK

3. Nama leka jaku ke dikena Paul dalam surat iya ke nuju ngagai bala menyadi ba Epesus?

³ Paul nulis ngagai bala menyadi Kristian ba Epesus: “Suba, kita idup dalam pemetang. Tang diatu, kita idup dalam penampak.” (Eps. 5:8) Ditu, Paul ngena leka jaku “pemetang” enggau “penampak” kena ngambarka pemesai ubah ke udah digaga bala menyadi ba Epesus. Aram kitai beratika kebuah Paul madahka orang Kristian ba Epesus suba “idup dalam pemetang.”

4. Nama kebuah Rasul Paul madahka, bala menyadi Kristian ba Epesus kala dalam pemetang?

⁴ Pemetang ketegal pengarap pelesu. Sebedau belajarka pemendar sereta nyadi orang Kristian, bala menyadi ba Epesus nitihka pengarap pelesu sereta pechayaka pengawa magik. Ba Epesus, bisi rumah sembiang petara indu Gerika ke dikumbai Artemis. Orang ba maya nya ngumbai rumah sembiang nya siti ari tujuh iti utai ti pemadu ngalitka ati ke kala digaga mensia. Orang ngagai rumah sembiang nya kena nyembah engkeramba. Orang ke betukang bulih mayuh duit ari pengawa ngaga sereta nyual patung rumah sembiang enggau petara indu Artemis. (SKR. 19:​23-27) Kelimpah ari nya, mayuh orang ba Epesus mega ngereja pengawa magik.​—SKR. 19:19.

5. Nama kebuah Rasul Paul madahka, bala menyadi Kristian ba Epesus kala dalam pemetang ketegal ulah seks ti kamah?

⁵ Pemetang ketegal ulah seks ti kamah. Orang ba Epesus udu ngereja ulah seks ti kamah, lalu sida mega enda malu ngereja utai ti jai. Utai ke dipandangka ba teater sereta ba pengerami ke diintu sida, kesuah iya bekaul enggau seks. (Eps. 5:3) Mayuh ari sida “enda bedulika ni bagi utai ti manah tauka jai.” Dalam jaku Gerika asal, rambai jaku tu mai reti “enda agi ulih berasai pedis.” (Eps. 4:​17-19) Sebedau belajar pasal standard Jehovah bekaul enggau utai ti betul sereta utai ti jai, asai ati sida enda berasai besalah, taja pan sida ngereja utai ti jai. Sida mega enda bedulika asai ati Jehovah pasal ulah sida. Nya kebuah Paul ulih madahka, “runding sida petang, lalu sida diseraraka ari pengidup ke datai ari Petara.”

6. Nama kebuah Paul madahka orang Epesus diatu “idup dalam penampak”?

⁶ Tang sekeda orang Epesus udah ninggalka pemetang. Paul madahka: “Diatu, kita idup dalam penampak, laban kita enggi Tuan.” (Eps. 5:8) Sida idup nitihka jaku Jehovah, ke baka penampak ti ngiring sida. (Mas. 119:105) Sida udah ninggalka pengawa pengarap pelesu sereta ulah seks ti kamah. Lalu sida mega ‘nunda teladan Petara’ enggau bebendar nyembah Jehovah sereta ngelantangka ati Iya.—Eps. 5:1.

7. Nama utai ti sama entara situasi orang Kristian ba Epesus enggau situasi kitai?

⁷ Baka nya mega, sebedau kitai belajarka pemendar, kitai ba pemetang ari segi pengarap enggau moral. Sekeda ari kitai ngintu pengerami pengarap pelesu, lalu ke bukai ngembuan pengidup ti enda bemoral. Tang pengudah kitai belajarka standard Jehovah bekaul enggau utai ti manah enggau utai ti jai, kitai ngaga ubah. Kitai idup nitihka standard pengelurus Jehovah. Asil iya, kitai bulih mayuh penguntung. (Isa. 48:17) Taja pia, enda senang deka seruran rari ari pemetang ke udah ditinggalka kitai, lalu ‘terus idup nyadi anak penampak.’ Nyadi, nama ulih nulung kitai terus ngereja nya?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

RARI ARI PEMETANG

8. Nitihka Epesus 5:​3-5, nama utai ti patut diseliahka bala menyadi Kristian ba Epesus?

⁸ Bacha Epesus 5:​3-5. Kena rari ari pemetang ba moral, bala menyadi Kristian ba Epesus patut terus nulak pengawa ti enda dikerinduka Jehovah. Tu ukai semina nyengkaum ulah seks ti kamah, tang mega jaku ke enda senunuh. Paul ngingatka bala menyadi Kristian ba Epesus, sida patut nyeliahka utai ke baka nya enti sida deka nerima “pesaka ba Perintah Kristus enggau Petara.”

9. Nama kebuah kitai patut bejimat ngambika enda ngereja utai ti ulih ngujungka kitai ngereja ulah seks ti kamah?

⁹ Kitai mega mesti seruran bejimat ngambika enda ngereja utai ke bisi kaul enggau “pengawa ti nadai reti ke bekaul enggau pemetang.” (Eps. 5:11) Mayuh pengalaman nunjukka, lebuh sesiku orang meda, ninga, tauka bejaku pasal utai ti enda bemoral, tu deka ngujungka iya senang agi ngereja utai ti salah. (P-kal. 3:6; Jas. 1:​14, 15) Ba siti menua, seraban bala menyadi Kristian bisi group chat ba media sosial. Terubah iya, mayuh ari sida berandau pasal utai rohani. Tang nyau kelama, sida berengkah berandau pasal utai ti enda dikerinduka Jehovah. Randau sida kesuah iya bekaul enggau ulah seks. Udah nya, mayuh ari sida ngaku, randau ti kamah tu udah ngujungka sida ngereja ulah seks ti kamah.

10. Baka ni Sitan nguji deka nipu kitai? (Epesus 5:6)

¹⁰ Dunya Sitan nguji deka nipu kitai. Sida dekaka kitai pechaya, utai ke dikumbai Jehovah kamah sereta enda bemoral, kebendar iya enda salah. (2 Pet. 2:19) Kitai enda tekenyit lebuh ninga tu. Sitan seruran nguji deka nyarutka orang ngambika sida enda nemu ni bagi utai ti betul enggau ni bagi utai ti salah. (Isa. 5:20; 2 Kor. 4:4) Nya meh kebuah mayuh wayang, cherita ba TV, sereta laman web ngerembaika penemu ti ngelanggar standard pengelurus Jehovah. Sitan dekaka kitai ngumbai pengawa ti kamah sereta enda bemoral ba dunya tu enda salah, tang ngagaka ati sereta enda ngemediska kitai.​—Bacha Epesus 5:6.

11. Baka ni pengalaman Angela nunjukka kebuah kitai mesti nitihka jaku lalau ba Epesus 5:7? (Peda mega gambar.)

¹¹ Sitan dekaka kitai begulai enggau orang ke ngasuh kitai tusah ngasika standard Jehovah. Nya kebuah Paul ngelalau orang Kristian ba Epesus: “Anang bisi nama-nama kaul enggau sida,” iya nya sida ke ngereja utai ti salah ba mata Petara. (Eps. 5:7) Taja pia, kitai patut lebih agi bejimat enti dibandingka enggau orang Kristian ba Epesus, laban kemayaharitu kitai ukai aja begulai enggau orang betunga mua tang mega ba media sosial. Nya meh utai ti nyadi ngagai Angela,a ke diau ba Asia. Iya ngaku: “Media sosial ulih nyadi siti panjuk.” Ku iya: “Belubah-lubah runding aku berubah. Nyau kelama, aku bisi ‘bala kaban’ ke enda bebasaka prinsip Bup Kudus, lalu nya enda ngachau ati aku. Aku berengkah berunding, ‘Enda salah enti ngembuan pengidup ti enda dikerinduka Jehovah.’ Tang, baik ga bisi bala tuai gempuru ti bepengerindu ke nulung aku ngaga ubah. Diatu aku befokus ngagai Jehovah sereta runding Iya, ari ke befokus ngagai media sosial.”

12. Nama deka nulung kitai terus nitihka standard Jehovah pasal utai ti betul enggau utai ti salah?

¹² Kitai mesti ngelaban runding dunya ke madahka ulah seks ti kamah nya enda salah. Kitai nemu utai tu enda betul. (Eps. 4:​19, 20) Taja pia, kitai agi patut nanya diri empu: ‘Kati aku bebendar nyeliah ari kaul ti enda patut enggau orang ke sama gawa, sida ke sama kelas, tauka orang bukai ke enda bebasaka standard pengelurus Jehovah? Kati aku enggau berani nitihka standard Jehovah taja pan orang bukai engka ngumbai aku kelalu terit?’ Baka ke dipadah ba 2 Timoti 2:​20-22, kitai mega patut bejimat lebuh milih bala kaban dalam raban gempuru Kristian. Kitai mesti ingat, sekeda ari sida engka enda ulih nulung kitai mengkang tetap ati ngagai Jehovah.

“IDUP NYADI ANAK PENAMPAK”

13. Nama reti ‘terus idup nyadi anak penampak’? (Epesus 5:​7-9)

¹³ Paul meransang orang Kristian ba Epesus ngambika enda semina nulak pemetang, tang mega ‘terus idup nyadi anak penampak.’ (Bacha Epesus 5:​7-9.) Nama reti tu? Reti iya, ulah kitai mesti seruran nunjukka kitai orang Kristian ti bendar. Siti chara kitai ulih ngereja nya, iya nya enggau bebendar macha sereta belajarka Bup Kudus sereta litaricha kitai. Lalu kitai patut kelebih agi beratika teladan sereta ajar Jesus Kristus, “penampak dunya.”​—Jhn. 8:12; J-lam. 6:23.

14. Baka ni kuasa kudus ulih nulung kitai?

¹⁴ Kitai mega begunaka tulung ari kuasa kudus Petara ngambika ulih terus “nyadi anak penampak.” Nama kebuah? Laban enda senang deka mengkang tuchi ba dunya ti balat kamah tu. (1 Tes. 4:​3-5, 7, 8) Kuasa kudus ulih nulung kitai ngelaban runding orang ba dunya tu, ke enda sejalai enggau runding Jehovah. Kuasa kudus mega ulih nulung kitai ngereja ‘semua utai ti manah sereta lurus.’—Eps. 5:9.

15. Baka ni kitai ulih nerima kuasa kudus? (Epesus 5:​19, 20)

¹⁵ Siti chara kitai ulih nerima kuasa kudus iya nya, nengah sampi. Jesus madahka, Jehovah “deka meri kuasa kudus ngagai orang ke minta ari Iya.” (Luk. 11:13) Lalu, lebuh kitai begulai muji Jehovah ba gempuru Kristian, kitai mega deka nerima kuasa kudus. (Bacha Epesus 5:​19, 20.) Kesan ti manah ari kuasa kudus Petara deka nulung kitai idup enggau chara ti ngelantangka ati Petara.

16. Nama deka nulung kitai ngaga pemutus ti manah? (Epesus 5:​10, 17)

¹⁶ Lebuh kitai patut ngaga pemutus ti penting, kitai patut “meretika peneka Jehovah” lalu ngereja utai sejalai enggau nya. (Bacha Epesus 5:​10, 17.) Lebuh kitai ngiga prinsip Bup Kudus ti ngena enggau situasi kitai, kitai kebendar iya benung ngiga runding Petara pasal pekara nya. Udah nya, seraya kitai nitihka prinsip Iya, kitai ulih ngaga pemutus ti manah.

17. Baka ni kitai ulih ngena awak kitai enggau manah? (Epesus 5:​15, 16) (Peda mega gambar.)

¹⁷ Paul mega ngelalau orang Kristian ba Epesus ngambika ngena awak sida enggau manah. (Bacha Epesus 5:​15, 16.) Munsuh kitai, Sitan, dekaka kitai kisuk enggau utai ba dunya tu nyentukka kitai nadai awak nyembah Petara. (1 Jhn. 5:19) Siku orang Kristian engka berengkah ngenuluka duit, pelajar, tauka kereja sekular, ari ke befokus ba peluang gawa ke Jehovah. Lalu enti iya ngereja nya, tu nunjukka iya berengkah berunding baka orang ba dunya tu. Endang amat, duit, pelajar, tauka kereja sekular nya enda salah, tang kitai enda patut nejuka utai tu nyadi utai ti pemadu penting ba pengidup kitai. Ngambika ulih ‘terus idup nyadi anak penampak,’ kitai patut ‘ngena awak kitai enggau manah,’ lalu betumpu ba utai ti amat-amat penting.

18. Nama utai ke digaga Donald ngambika iya ulih ngena awak iya enggau manah?

¹⁸ Giga meh chara alai nuan ulih ngereja mayuh agi ke Jehovah. Tu meh utai ke dikereja Donald, ke diau ba Afrika Selatan. Ku iya: “Aku berunding pasal pengidup aku lalu bebendar besampi ngagai Jehovah. Aku minta Iya nulung aku ngereja mayuh agi ba pengawa nginjil. Aku mega besampi ngambika bulih kereja ti deka ngasuh aku bisi mayuh agi awak kena nginjil. Enggau tulung ari Jehovah, aku tetemuka kereja ti sesuai. Kami duai bini aku pan berengkah gawa penuh jam ke Jehovah.”

19. Baka ni kitai ulih terus “nyadi anak penampak”?

¹⁹ Surat Paul ngagai orang Kristian ba Epesus tentu udah nulung sida mengkang tetap ati ngagai Jehovah. Lalu pesan ari Jehovah nya mega ulih nulung kitai. Baka ke udah dipelajarka kitai, utai ti ditulis Paul ulih nulung kitai milih pemerindang sereta bala kaban kitai enggau manah. Iya mega ulih meransang kitai belajarka Bup Kudus enggau tetap ngambika penampak pemendar ulih ngiring kitai dalam semua utai. Lalu, iya mega madahka pemesai reti kuasa kudus ke ulih ngasilka sifat ti manah dalam kitai. Lebuh kitai nitihka utai ti ditulis Paul, tu deka nulung kitai ngaga pemutus ti manah ke sejalai enggau runding Jehovah. Enggau nya, kitai ulih rari ari pemetang dunya tu, lalu diau dalam penampak!