Maysa nga Apocalipsis ken Juan

21 Nakakitaak iti baro a langit ken baro a daga;+ ta naglabasen ti immuna a langit ken ti immuna a daga,+ ken awanen ti baybay.+ 2 Nakitak met ti nasantuan a siudad, ti Baro a Jerusalem, a bumabbaba manipud iti Dios+ nga adda idiay langit ken naisagana kas maysa a nobia a nakabado iti pangkasar a mangsabat iti agbalin nga asawana.+ 3 Kalpasanna, adda nangngegko a napigsa a timek iti trono a mangibagbaga: “Kitaem! Adda iti sangatauan ti tolda ti Dios, ket makipagnaedto kadakuada, ken isudanto ti tattaona. Addanto a mismo ti Dios kadakuada.+ 4 Ket punasennanto ti amin a lua kadagiti matada,+ ken awanton ni patay.+ Awanto metten ti panagladingit wenno panagsangit wenno ut-ot.+ Dagiti dati a bambanag ket limmabasen.”

5 Imbaga Daydiay nakatugaw iti trono:+ “Kitaem! Pabpabaruek ti amin a bambanag.”+ Kunana pay: “Isuratmo, ta mapagtalkan* ken pudno dagitoy a sasao.” 6 Imbagana kaniak: “Natungpal dagitan! Siak ti Alfa ken ti Omega,* ti pangrugian ken ti pagpatinggaan.+ Ikkakto ti asinoman a mawaw iti libre* a danum manipud iti ubbog* ti danum ti biag.+ 7 Dagitoy a banag ti tawidento ti asinoman nga agballigi, ket siakto ti Diosna ken isunto ti anakko. 8 Ngem dagiti takrot, awanan pammati,+ nakaar-ariek ti kinarugitda, manangpapatay,+ agar-aramid iti seksual nga immoralidad*+ ken espiritismo, agdaydayaw iti idolo, ken amin a naulbod+ ket maitapuakto iti danaw ti gumilgil-ayab nga apuy ken asupre.+ Kaipapanan daytoy ti maikadua nga ipapatay.”+

9 Immasideg ti maysa kadagiti pito nga anghel a nakaiggem iti pito a malukong a napno iti pito a maudi a didigra,+ ket imbagana kaniak: “Umayka, ket ipakitak kenka ti nobia nga agbalinto nga asawa ti Kordero.”+ 10 Babaen ti pannakabalin ti espiritu, impannak iti maysa a dakkel ken nangato a bantay, ket impakitana kaniak ti nasantuan a siudad ti Jerusalem a bumabbaba manipud iti Dios nga adda idiay langit+ 11 ken addaan iti dayag ti Dios.+ Ti raniagna ket kas iti kanginaan a bato, kas iti bato a jaspe a nakalawlawag a kas iti kalitnaw ti kristal.+ 12 Dakkel ken nangato ti pader ti siudad, 12 ti ruanganna, ken 12 nga anghel ti adda kadagiti ruanganna. Naikitikit kadagiti ruangan ti nagan ti 12 a tribu ti annak ti Israel. 13 Tallo ti ruanganna iti daya, tallo iti amianan, tallo iti abagatan, ken tallo iti laud.+ 14 Addaan met ti pader ti siudad iti 12 a pundasion a bato. Naisurat kadagita ti 12 a nagan ti 12 nga apostol+ ti Kordero.

15 Ti makisarsarita idi kaniak ket nakaiggem iti balitok a runo a pagrukod tapno rukodenna ti siudad agraman dagiti ruangan ken ti paderna.+ 16 Kuadrado ti siudad. Agpada ti kaatiddog ken kaakabana. Rinukodna ti siudad babaen ti runo, agarup 2,220 a kilometro;* agpapada ti kaatiddog, kaakaba, ken kangatona. 17 Rinukodna met dagiti pader, 144 a kasiko* sigun iti pagrukod ti tao, ken iti pagrukod ti anghel. 18 Jaspe ti pader,+ ken puro a balitok ti siudad a kas iti kalitnaw ti sarming. 19 Dagiti pundasion ti pader ti siudad ket naaramid iti amin a kita ti nangina a bato: jaspe ti umuna a pundasion, safiro ti maikadua, kalsedonia ti maikatlo, esmeralda ti maikapat, 20 sardonika ti maikalima, sardio ti maikanem, krisolito ti maikapito, berilo ti maikawalo, topasio ti maikasiam, krisoprasio ti maika-10, jacinto ti maika-11, ken amatista ti maika-12. 21 Kasta met a 12 a perlas ti 12 a ruangan; maysa a perlas ti tunggal ruangan. Ti kadakkelan a kalsada ket puro a balitok a kas iti nalitnaw a sarming.

22 Awan ti nakitak a templo iti unegna, ta ti templona ket ni Jehova* a Dios a Mannakabalin-amin,+ ken kasta met ti Kordero. 23 Saanen a kasapulan ti init wenno bulan a manglawag iti siudad, ta ti dayag ti Dios ti nanglawag iti dayta,+ ket ti Kordero ti silawna.+ 24 Magnanto dagiti nasion babaen ti lawagna,+ ket dagiti ari ti daga ipandanto ti dayagda iti unegna. 25 Saanto a pulos a maiserra dagiti ruanganna iti intero nga aldaw, ta awanton ti rabii sadiay.+ 26 Ket ipandanto ti dayag ken ti dayaw dagiti nasion iti unegna.+ 27 Ngem dinto pulos makastrek iti dayta+ ti aniaman a banag a narugit ken asinoman nga agar-aramid iti makarimon ken makaallilaw; dagiti laeng makastrek ket dagidiay naisurat iti lukot ti biag a kukua ti Kordero.+