არ უნდა შევწყვიტოთ მიკითხება
1 დადებითად გამოეხმაურე, როდესაც პირველად გესაუბრნენ კეთილი ცნობის შესახებ? თუ არა, ალბათ მადლიერი ხარ, რომ იეჰოვას მოწმეები განუწყვეტლივ გაკითხავდნენ, სანამ, საბოლოოდ, არ დაიწყე ბიბლიის შესწავლა. სასურველია გახსოვდეს ამის შესახებ, როდესაც განმეორებით ამუშავებ უბანს.
2 ადამიანების ცხოვრება გამუდმებით იცვლება. ისინი ახალ პრობლემებსა თუ სიტუაციებს ხვდებიან, ესმით მსოფლიოში თუ მათ მოსახლეობაში მომხდარი შემაძრწუნებელი ამბები, განიცდიან ეკონომიკურ სირთულეებს, ავადდებიან ან ვიღაც უკვდებათ ოჯახში. ასეთმა შემთხვევებმა შეიძლება დააინტერესოს ისინი, გაიგონ თუ რა იწვევს ამ უბედურებებს. ჩვენ უნდა დავინახოთ, თუ რა აწუხებთ ადამიანებს, და შემდეგ გადავცეთ მანუგეშებელი ცნობა.
3 ეს არის გადამრჩენი საქმე. წარმოიდგინე პიროვნებები, რომლებიც უბედურებისას ადამიანებს ეხმარებიან გადარჩენაში. თუმცა ზოგი შეიძლება ისეთ ადგილებში ეძებდეს, სადაც ცოტა გადაურჩა სიკვდილს, ისინი არ ეშვებიან და არც წყვეტენ თავიანთ საქმეს იმის გამო, რომ მათი თანამშრომლები უფრო მეტს პოულობენ სხვაგან. ჩვენი გადამრჩენი საქმე ჯერ არ დასრულებულა. ყოველწლიურად ასობით ათასი პიროვნება იძებნება, რომლებსაც სურთ, რომ გადაურჩნენ ‘დიდ გასაჭირს’ (გამოცხ. 7:9, 14).
4 „ყოველი, ვინც უფლის სახელს მოუხმობს, გადარჩება“ (რომ. 10:13–15). ამ სიტყვებმა უნდა აღგვძრას, რომ დაჟინებით ვიქადაგოთ. მას შემდეგ, რაც ჩვენი ტერიტორია პირველად დამუშავდა, იქ ბავშვები უკვე გაიზარდნენ და ახლა საკმაოდ მოზრდილები არიან, რომ სერიოზულად იფიქრონ თავიანთ მომავალსა და სიცოცხლის აზრზე. ჩვენ არ ვიცით, თუ ვინ მოგვისმენს (ეკლ. 11:6). მრავალმა ყოფილმა მოწინააღმდეგემ მიიღო ჭეშმარიტება. ჩვენი დავალება ის კი არ არის, რომ განვსაჯოთ ადამიანები, არამედ საშუალება მივცეთ, მოისმინონ და გადარჩნენ ამ ძველი წუთისოფლიდან. იესოს პირველი მოწაფეების მსგავსად, ჩვენც გამუდმებით უნდა ‘მივაკითხოთ’ ადამიანებს და შევეცადოთ აღვძრათ მათი ინტერესი სამეფოს ცნობისადმი (მათ. 10:6, 7).
5 ის ფაქტი, რომ გზა ჯერ კიდევ ხსნილია ქადაგებისთვის, მიუთითებს იეჰოვას მოწყალებაზე (2 პეტ. 3:9). რადგან სხვებს გამუდმებით ვაძლევთ კეთილი ცნობის მოსმენის საშუალებას, ამით ხაზს ვუსვამთ ღვთის სიყვარულს და, ამგვარად, ვადიდებთ მას.