တၢ်မၤလိ ၄၉
မ့ၢ်ယဟိဝၤယွၤ ကစံးဆၢယတၢ်ထုကဖၣ်ဧါ
“သုကကိးထီၣ်ယၤ ဒီးဟဲဃ့ထုကဖၣ် လၢယအိၣ် ဒီးယကဒိကနၣ်သု.”—ယံး ၂၉:၁၂.
တၢ်သးဝံၣ် ၄၁ ဒိကနၣ်ယတၢ်ထုကဖၣ်
တၢ်မၤလိအံၤ အတၢ်တိာ်ပာ်a
၁-၂. ဖဲယဟိဝၤယွၤ တစံးဆၢ ပတၢ်ထုကဖၣ် တဘျီဃီဒံးဘၣ်အခါ ပကဆိကမိၣ်ဘၣ်မနုၤလဲၣ်.
“သးခုဖးဒိၣ်လၢ ယဟိဝၤယွၤအပူၤတက့ၢ်. ဒီးအဝဲကမၤလၢပှဲၤန့ၢ်နၤ တၢ်လၢနလီကီတဖၣ်လီၤ.” (စံး ၃၇:၄) ယဟိဝၤယွၤ အတၢ်အၢၣ်လီၤတခါအံၤ ဂ့ၤဒိၣ်မး. ဘၣ်ဆၣ် မ့ၢ်ပကြၢး ဆိကမိၣ်လၢ ယဟိဝၤယွၤ ကဘၣ်ဟ့ၣ်ပှၤ တၢ်လၢပဃ့အီၤကိးမံၤဒဲး တဘျီဃီဧါ. ဘၣ်မနုၤအဃိ တၢ်သံကွၢ်တဖျၢၣ်အံၤ အရ့ဒိၣ်ဒိၣ်မးလဲၣ်. အခဲအံၤ ပကတဲသကိး တၢ်အိၣ်သးတနီၤ. ဒီပုၢ်ဝဲၢ်မုၣ်လၢ အအိၣ်သဘျ့တဂၤ ဃ့ထုကဖၣ်လၢ ကလဲၤထီၣ်ဘၣ် ပှၤစိာ်ဘီမုၢ်တၢ်သးခုကစီၣ်ဖိအကၠိ. အအိၣ်ခိးဝဲ တဘျုးနံၣ်လံ ဘၣ်ဆၣ်ပှၤတကွဲမုာ်အီၤဒံးဘၣ်. ဒီပုၢ်ဝဲၢ်ခွါသးစၢ်တဂၤ ဃ့ထုကဖၣ်လၢ ယဟိဝၤယွၤအအိၣ် ဒ်သိးအတၢ်ဆါလၢ အတူၢ်ဘၣ်ဝဲနးမးတခါ ကဘျါက့ၤ ဒီးအဘၣ်သး မၤစၢၤအါထီၣ်တၢ်လၢ တၢ်အိၣ်ဖှိၣ်ပူၤ. ဘၣ်ဆၣ် အတၢ်ဆါန့ၣ် တကိညၢ်ထီၣ်ဘၣ်. ဒီးခရံာ်ဖိမိပါအါဂၤန့ၣ် ဃ့ထုကဖၣ်လၢ အဖိကဆဲးအိၣ်လၢ တၢ်မ့ၢ်တၢ်တီအပူၤ. ဘၣ်ဆၣ် အဖိပာ်လီၤသးလၢ တဘူၣ်ထီၣ်ဘါထီၣ် ယဟိဝၤယွၤလၢၤဘၣ်.
၂ ဘၣ်သ့ၣ်သ့ၣ် နဃ့ထုကဖၣ်လၢ ယဟိဝၤယွၤ ကဟ့ၣ်လီၤနၤ တၢ်တမံၤမံၤ ဘၣ်ဆၣ် နတဒိးန့ၢ်ဘၣ်ဘၣ်. အဃိ နကဆိကမိၣ်ဘၣ်လၢ ယဟိဝၤယွၤ စံးဆၢပှၤဂၤအတၢ်ထုကဖၣ် ဘၣ်ဆၣ် အတစံးဆၢနၤဘၣ်. မ့တမ့ၢ် နကဆိကမိၣ်ဘၣ်လၢ နမၤကမၣ်ဘၣ် တၢ်တမံၤမံၤ. ဒီပုၢ်ဝဲၢ်မုၣ်ကၠဲနံၣ်b တူၢ်ဘၣ်ဝဲဒ်န့ၣ်. ဒီပုၢ်ဝဲၢ်မုၣ်အံၤ ဒီးအဝၤဃ့ထုကဖၣ်လၢ ကလဲၤမၤစၢၤတၢ်လၢ ဘ့ၤသ့လး. အတဲဝဲလၢ “ယနာ်သပှၢ်တၢၢ်လၢ တယံာ်ဘၣ်န့ၣ် ပကလဲၤဘၣ်လၢ ဘ့ၤသ့လး.” ဘၣ်ဆၣ် အဝဲသ့ၣ်အိၣ်ခိးဝဲ တဘျုးနံၣ်လံ သနာ်က့ ပှၤတကိးအဝဲသ့ၣ်ဒံးဘၣ်. ဒီပုၢ်ဝဲၢ်မုၣ်ကၠဲနံၣ် ဆဲးတဲဝဲလၢ “ယသးဟးဂီၤ ဒီးယသးဒ့ဒီညါ. ယဆိကမိၣ်လၢ မ့ၢ်ယမၤကမၣ်ဘၣ် ယဟိဝၤယွၤ တမံၤမံၤလံဧါသၢၤ. ဒ်သိးယကလဲၤဘၣ်လၢ ဘ့ၤသ့လးအဂီၢ် ယဃ့ထုကဖၣ်လၢ ယဟိဝၤယွၤ အအိၣ်ဆူၣ်ဆူၣ်. သနာ်က့ ယဟိဝၤယွၤတစံးဆၢ ယတၢ်ထုကဖၣ်ဘၣ်. ဘၣ်မနုၤအဃိ အတစံးဆၢ ယတၢ်ထုကဖၣ်ဘၣ်လဲၣ်.”
၃. လၢတၢ်မၤလိအံၤ ပကတဲသကိး တၢ်သံကွၢ်မနုၤလဲၣ်.
၃ တဘျီတခီၣ် ပကဆိကမိၣ်ဘၣ်လၢ မ့ၢ်ယဟိဝၤယွၤ နၢ်ဟူပတၢ်ထုကဖၣ် စ့ၢ်ကီးဧါ. ပှၤသးတီလၢညါတနီၤန့ၣ် အဝဲသ့ၣ်ဆိကမိၣ်ဘၣ်ဝဲ ဒ်အံၤစ့ၢ်ကီး. (ဘး ၃၀:၂၀; စံး ၂၂:၂; ဃဘး ၁:၂) ယဟိဝၤယွၤ ဒိကနၣ် နတၢ်ထုကဖၣ်န့ၣ် နကသ့ၣ်ညါဘၣ်ဒ်လဲၣ်. (စံး ၆၅:၂) ဒ်သိးနကသ့ၣ်ညါ တၢ်သံကွၢ်အံၤ အတၢ်စံးဆၢအဂီၢ် ပကတဲသကိး တၢ်ဂ့ၢ်သၢထံၣ်. (၁) ပအဲၣ်ဒိးလၢ ယဟိဝၤယွၤ ကမၤမနုၤလဲၣ်. (၂) ယဟိဝၤယွၤ အဲၣ်ဒိးလၢ ပကမၤမနုၤလဲၣ်. (၃) ဘၣ်မနုၤအဃိ ပကြၢးဆီတလဲ တၢ်လၢပဃ့တနီၤလဲၣ်.
ပအဲၣ်ဒိးလၢ ယဟိဝၤယွၤ ကမၤမနုၤလဲၣ်
၄. ဖဲ ယံးရမံယၤ ၂၉:၁၂ န့ၣ်ယဟိဝၤယွၤ အၢၣ်လီၤဝဲလၢ အကမၤမနုၤလဲၣ်.
၄ ယဟိဝၤယွၤ အၢၣ်လီၤဝဲလၢ အကဒိကနၣ် ပတၢ်ထုကဖၣ်. (ဖး ယံးရမံယၤ ၂၉:၁၂.) ခီဖျိလၢ ပဘူၣ်ထီၣ်ဘါထီၣ် ယဟိဝၤယွၤ ဒီးပတီဒီးအီၤအဃိ အကဒိကနၣ် ပတၢ်ထုကဖၣ်ထီဘိ. (စံး ၁၀:၁၇; ၃၇:၂၈) သနာ်က့ ယဟိဝၤယွၤ တဟ့ၣ်ပှၤ တၢ်လၢပဃ့အီၤ ကိးမံၤဒဲးဘၣ်. ဒီးတၢ်လၢပဃ့အီၤ တနီၤန့ၣ် ဒ်သိးပကဒိးန့ၢ်ဘၣ်အဂီၢ် ဘၣ်သ့ၣ်သ့ၣ် ပကဘၣ်အိၣ်ခိးအီၤတုၤလၢ ဟီၣ်ခိၣ်သီညါ.
၅. ဖဲယဟိဝၤယွၤ ဒိကနၣ်ပတၢ်ထုကဖၣ်အခါ အဆိကမိၣ်ဃုာ်ဝဲ မနုၤလဲၣ်.
၅ ယဟိဝၤယွၤ ဆိကမိၣ်ဃုာ်ဝဲလၢ တၢ်လၢပဃ့န့ၣ် အဘၣ်ထွဲလိာ်သးဒီး အတၢ်တိာ်ပာ်ဒ်လဲၣ်. (ၡါ ၅၅:၈, ၉) ယဟိဝၤယွၤ အတၢ်တိာ်ပာ်အိၣ်ဝဲလၢ ပှၤဟီၣ်ခိၣ်ဖိခဲလၢာ် ကဒိကနၣ်အီၤ ဒီးကအိၣ်လၢအတၢ်ပၢဖီလာ် ဃူဃူဖိးဖိး. ဘၣ်ဆၣ် မုၣ်ကီၤလံၢ် တဲဝဲလၢ ပှၤဟီၣ်ခိၣ်ဖိ မ့ၢ်ပၢလီၤအသးန့ၣ် ကဂ့ၤလၢအဝဲသ့ၣ်အဂီၢ် ဒိၣ်တစဲး. (၁ မိၤ ၃:၁-၅) ဒ်သိးယဟိဝၤယွၤ ကပာ်ဖျါထီၣ် မုၣ်ကီၤလံၢ် အတၢ်လံၣ်တၢ်လီအဂီၢ် အပျဲဝဲလၢ ပှၤဟီၣ်ခိၣ်ဖိ ကပၢလီၤအသး. ဒီးဆၢကတီၢ်ခဲအံၤ ပထံၣ်ဘၣ်လၢ ပှၤဟီၣ်ခိၣ်ဖိပၢတၢ်န့ၣ် အဒုးအိၣ်ထီၣ်ထဲ တၢ်ကီတၢ်ခဲလဲလဲ. (စံၣ် ၈:၉) သနာ်က့ တၢ်ကီတၢ်ခဲ ကိးမံၤဒဲးလၢ ပထံၣ်ဘၣ်ခဲအံၤန့ၣ် ပသ့ၣ်ညါလၢ ယဟိဝၤယွၤ တမၤလီၤမၢ်န့ၢ်ပှၤဒံးဘၣ်. ယဟိဝၤယွၤ မ့ၢ်မၤလီၤမၢ်ဝဲခဲအံၤန့ၣ် ပှၤတနီၤ ကဆိကမိၣ်ဝဲလၢ ပှၤဟီၣ်ခိၣ်ဖိ ပၢလီၤအသးသ့ ဒီးမၤဘၣ်ဂီၢ်ထီၣ်က့ၤ တၢ်ကီတၢ်ခဲသ့.
၆. ဘၣ်မနုၤအဃိ ပကဘၣ်နာ်လၢ ယဟိဝၤယွၤ မၤတၢ်လၢ တၢ်အဲၣ်တၢ်ကွံ ဒီးတၢ်တီတၢ်လိၤအပူၤ ထီဘိလဲၣ်.
၆ ဘၣ်သ့ၣ်သ့ၣ် ယဟိဝၤယွၤ တစံးဆၢပှၤဒ်ပဃ့အီၤအသိးဘၣ်. အဒိ ဖဲစီၤပၤဃံးစကံယၤ ဆိးက့ဘူးထီၣ်လၢ ကသံအခါ အဃ့ကညး ယဟိဝၤယွၤလၢ ကမၤဘျါက့ၤအီၤ. ပထံၣ်ဘၣ်လၢ ယဟိဝၤယွၤ ဒိကနၣ်အတၢ်ဃ့ ဒီးမၤဘျါက့ၤအီၤ. (၂ စီၤပၤ ၂၀:၁-၆) တၢ်မၢဖိပီလူးစ့ၢ်ကီး လီၤဂာ်လၢ အတၢ်အိၣ်ဆူၣ်အိၣ်ချ့ တဂ့ၤဘၣ်. အဃိ အဃ့ကညး ယဟိဝၤယွၤလၢ ကမၤလီၤမၢ်န့ၢ်အ ‘တၢ်ကီတၢ်ခဲတခါ လၢအလီၤဂာ်ဒ်သိးဒီး တၤဆှုၣ်တၤမဲလၢ အဖံးအညၣ်အကျါ’ ဘၣ်ဆၣ် ယဟိဝၤယွၤ တမၤန့ၢ်အီၤဘၣ်. (၂ ကရံၣ် ၁၂:၇-၉) ဆိကမိၣ်ကွၢ် တၢ်မၢဖိယၤကိာ် ဒီးစီၤပ့းတရူး အဂ့ၢ်စ့ၢ်ကီး. စီၤပၤဟ့ၤရိာ် ဘၣ်သးမၤသံ အဝဲသ့ၣ်ခံဂၤလၢာ်အဃိ တၢ်အိၣ်ဖှိၣ်ဖိတဖၣ် ဃ့ထုကဖၣ်န့ၢ်တၢ်လၢ စီၤပ့းတရူးအဂီၢ်. ဒီးဘၣ်သ့ၣ်သ့ၣ် အဝဲသ့ၣ် ကဃ့ထုကဖၣ်န့ၢ်တၢ်လၢ စီၤယၤကိာ်အဂီၢ်စ့ၢ်ကီး. ဘၣ်ဆၣ် စီၤယၤကိာ်န့ၣ် ပှၤမၤသံကွံာ်အီၤ ဒီးမ့မ့ၢ် စီၤပ့းတရူးန့ၣ် မူခိၣ်ကလူး မၤပူၤဖျဲးအီၤ. (မၤတၢ် ၁၂:၁-၁၁) ဘၣ်သ့ၣ်သ့ၣ် ပကဆိကမိၣ်လၢ ‘ဘၣ်မနုၤအဃိ ယဟိဝၤယွၤ မၤပူၤဖျဲးထဲ စီၤပ့းတရူး ဒီးတမၤပူၤဖျဲး စီၤယၤကိာ်ဘၣ်လဲၣ်.’ ဘၣ်မနုၤအဃိလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်.c ဘၣ်ဆၣ် ပနာ်သ့သပှၢ်တၢၢ်လၢ ယဟိဝၤယွၤန့ၣ် “အတစံၣ်ညီၣ်တၢ် တတီတလိၤ နီတဘျီဘၣ်.” (၅ မိၤ ၃၂:၄) ဒီးပသ့ၣ်ညါလၢ ယဟိဝၤယွၤ အဲၣ်အဝဲသ့ၣ်ခံဂၤလၢာ်. (လီၣ် ၂၁:၁၄) ပဝဲစ့ၢ်ကီး ဘၣ်သ့ၣ်သ့ၣ် တဘျီတခီၣ်န့ၣ် ယဟိဝၤယွၤ တစံးဆၢ ပတၢ်ထုကဖၣ် ဒ်ပဃ့အီၤအသိးဘၣ်. ဘၣ်ဆၣ် ပနာ်သ့သပှၢ်တၢၢ်လၢ ယဟိဝၤယွၤ ကစံးဆၢပတၢ်ထုကဖၣ် လၢတၢ်အဲၣ်တၢ်ကွံ ဒီးကျဲလၢအဂ့ၤကတၢၢ်ထီဘိ. အဃိ ယဟိဝၤယွၤ မ့ၢ်စံးဆၢ ပတၢ်ထုကဖၣ် လၢကျဲဒ်လဲၣ်ဂ့ၤဒ်လဲၣ်ဂ့ၤ ပတကဒူးကဒ့ၣ်အီၤဘၣ်.—ဘး ၃၃:၁၃.
၇. ဘၣ်မနုၤအဃိ ပတဘၣ်ထိၣ်သတြီၤ ပတၢ်အိၣ်သးဒီး ပှၤဂၤဘၣ်လဲၣ်.
၇ ပတဘၣ်ထိၣ်သတြီၤ ပတၢ်အိၣ်သး ဒီးပှၤဂၤအတၢ်အိၣ်သးဘၣ်. အဒိ ဘၣ်သ့ၣ်သ့ၣ် ပဃ့ထုကဖၣ်လၢ ယဟိဝၤယွၤအအိၣ် လီၤလီၤဆီဆီ ဒ်သိးအကမၤစၢၤပှၤအဂီၢ်. ဘၣ်ဆၣ် ပတဒိးန့ၢ်ဘၣ် တၢ်စံးဆၢ ဒ်ပဃ့အသိးဘၣ်. လၢခံန့ၣ် ဘၣ်သ့ၣ်သ့ၣ် ပနၢ်ဟူလၢ ပှၤအဂၤတဂၤ ဃ့ဝဲဒ်သိးဒီးပှၤ ဒီးလီၤဂာ်လၢ ယဟိဝၤယွၤ စံးဆၢအတၢ်ဃ့. ဒီပုၢ်ဝဲၢ်မုၣ်အဲနၤ လဲၤခီဖျိဘၣ်ဝဲဒ်န့ၣ်. ဒီပုၢ်ဝဲၢ်မုၣ်န့ၣ် အဃ့ထုကဖၣ်လၢ အဝၤမဲၣ်သယူ အခဲစၢၢ်တၢ်ဆါ ကဘျါက့ၤအဂီၢ်. ဒီးဖဲန့ၣ်အဆၢကတီၢ် ဒီပုၢ်ဝဲၢ်မုၣ်သးပှၢ်ခံဂၤ ဘၣ်ဝဲခဲစၢၢ်တၢ်ဆါစ့ၢ်ကီး. အဃိ ဒီပုၢ်ဝဲၢ်မုၣ်အဲနၤ ဃ့ထုကဖၣ်ဆူၣ်ဆူၣ်လၢ အဝၤဒီးဒီပုၢ်ဝဲၢ်မုၣ်ခံဂၤအံၤအဂီၢ်. ဒီပုၢ်ဝဲၢ်မုၣ်ခံဂၤအံၤ အတၢ်ဆါဘျါက့ၤဝဲ ဘၣ်ဆၣ် မ့မ့ၢ်လၢဒီပုၢ်ဝဲၢ်မုၣ်အဲနၤ အဝၤန့ၣ် သံသဒၣ်အီၤ. အဃိ ဒီပုၢ်ဝဲၢ်မုၣ်အဲနၤ ဆိကမိၣ်ဝဲလၢ ယဟိဝၤယွၤ မ့ၢ်စံးဆၢအတၢ်ထုကဖၣ် ဒီးမၤဘျါက့ၤ ဒီပုၢ်ဝဲၢ်မုၣ်ခံဂၤအံၤန့ၣ် ဘၣ်မနုၤအဃိ အတမၤဘျါန့ၢ်က့ၤ အဝၤဘၣ်လဲၣ်. ဒီပုၢ်ဝဲၢ်မုၣ်သးပှၢ်ခံဂၤအံၤ ဘျါက့ၤဒ်လဲၣ်န့ၣ် ပတသ့ၣ်ညါဘၣ်. ဘၣ်ဆၣ် ပသ့ၣ်ညါလၢ ယဟိဝၤယွၤ ကမၤလီၤမၢ်ကွံာ် တၢ်နးတၢ်ဖှီၣ်ခဲလၢာ် ဒီးအကမၤသမူထီၣ်က့ၤ ပှၤလၢအအဲၣ်ဝဲတဖၣ်.—ဘး ၁၄:၁၅.
၈. (က) ဒ် ယၡါယၤ ၄၃:၂ ပာ်ဖျါထီၣ်ဝဲအသိး ယဟိဝၤယွၤ ကမၤစၢၤပှၤဒ်လဲၣ်. (ခ) ဖဲပထံၣ်ဘၣ် တၢ်ကီတၢ်ခဲအခါ တၢ်ထုကဖၣ် မၤစၢၤပှၤသ့ဒ်လဲၣ်. (ကွၢ်တၢ်ဂီၤမူ လၢအမ့ၢ် တၢ်ထုကဖၣ် မၤစၢၤပှၤလၢ ပတူၢ်တၢ်ကကဲ.)
၈ ယဟိဝၤယွၤ ကမၤစၢၤပှၤထီဘိ. ယဟိဝၤယွၤန့ၣ် အမ့ၢ်ပါလၢ အအိၣ်ဒီး တၢ်အဲၣ်တၢ်ကွံ အဃိ အတဘၣ်သးလၢ ပကထံၣ်ဘၣ် တၢ်နးတၢ်ဖှီၣ်ဘၣ်. (ၡါ ၆၃:၉) ဘၣ်ဆၣ် ဒ်သိးပတထံၣ်ဘၣ်ဒီး တၢ်ကီတၢ်ခဲ လၢအလီၤဂာ်ဒ်သိးဒီး ထံကျိ ဒီးမ့ၣ်အူတဂ့ၤအဂီၢ် အတဒီသဒၢန့ၢ်ပှၤ ခဲလၢာ်ဘၣ်. (ဖး ယၡါယၤ ၄၃:၂.) သနာ်က့ ယဟိဝၤယွၤ အၢၣ်လီၤပှၤလၢ ပ “လဲၤခီဂာ်” တၢ်ကီတၢ်ခဲ ကန့ၢ်အဂီၢ် အကမၤစၢၤပှၤ. ဒီးဆၢကတီၢ်ခဲအံၤ ပမ့ၢ်အိၣ်ဒီး တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ သနာ်က့ ယဟိဝၤယွၤ ကမၤစၢၤပှၤ ဒ်သိး ပတၢ်ရ့လိာ်သးဒီးအီၤ ကဆဲးဂၢၢ်ကျၢၤဝဲထီဘိ. တကးဒံးဘၣ် ဒ်သိးပလဲၤခီဖျိ တၢ်ကီတၢ်ခဲကန့ၢ်အဂီၢ် ယဟိဝၤယွၤ ကဟ့ၣ်ပှၤအသးစီဆှံ ဒီးအတၢ်စိတၢ်ကမီၤစ့ၢ်ကီး. (လူၤ ၁၁:၁၃; ဖံလံး ၄:၁၃) အဃိ ဒ်သိးပလဲၤခီဖျိ တၢ်ကီတၢ်ခဲကန့ၢ် ဒီးပကဆဲးတီဒီး ယဟိဝၤယွၤအဂီၢ် ပနာ်သ့သပှၢ်တၢၢ်လၢ ယဟိဝၤယွၤ ကဟ့ၣ်ပှၤ တၢ်လၢပလိၣ်ဘၣ်ထီဘိ.d
ယဟိဝၤယွၤ အဲၣ်ဒိးလၢ ပကမၤမနုၤလဲၣ်
၉. ဒ် ယၤကိာ် ၁:၆, ၇ ပာ်ဖျါထီၣ်ဝဲအသိး ဘၣ်မနုၤအဃိ ပကဘၣ်နာ်လၢ ယဟိဝၤယွၤ ကမၤစၢၤပှၤလဲၣ်.
၉ ယဟိဝၤယွၤ အဲၣ်ဒိးလၢ ပကနာ်န့ၢ်အီၤ. (ဧ့ၤ ၁၁:၆) တဘျီတခီၣ် ပကတူၢ်ဘၣ်လၢ ပလဲၤခီဖျိ ပတၢ်ကီတၢ်ခဲတန့ၢ်ဘၣ်. ဘၣ်သ့ၣ်သ့ၣ် ပကဆိကမိၣ်လၢ မ့ၢ်ယဟိဝၤယွၤ ကမၤစၢၤပှၤဧါ. ဘၣ်ဆၣ် လံာ်စီဆှံအၢၣ်လီၤပှၤလၢ ခီဖျိကစၢ်ယွၤ အတၢ်စိတၢ်ကမီၤအဃိ ပမ့ၢ်ထံၣ်ဘၣ် တၢ်ကီတၢ်ခဲ လၢအလီၤဂာ်ဒ်သိးဒီး တၢ်ဒူၣ်သနာ်က့ပ “ဖုကပာ်” အီၤသ့. (စံး ၁၈:၂၉) အဃိ ပတဘၣ်သးဒ့ဒီ နီတစဲးဘၣ်. ဒီးပကဘၣ်ဆဲးဃ့ ယဟိဝၤယွၤ ဒီးနာ်သပှၢ်တၢၢ်လၢ အကစံးဆၢ ပတၢ်ထုကဖၣ်.—ဖး ယၤကိာ် ၁:၆, ၇.
၁၀. ပမၤထွဲ ဒ်ပတၢ်ဃ့ထုကဖၣ်အသိး ကသ့ဒ်လဲၣ်. ဟ့ၣ်တၢ်အဒိ.
၁၀ ယဟိဝၤယွၤ အဲၣ်ဒိးလၢ ပကမၤထွဲ ဒ်ပတၢ်ဃ့ထုကဖၣ်အသိး. အဒိ ဒ်သိး ဒီပုၢ်ဝဲၢ်ခွါတဂၤ ကလဲၤထီၣ်ဘၣ် တၢ်အိၣ်ဖှိၣ်ဖးဒိၣ် ဒီးအဃ့ခွဲးလၢ အတၢ်မၤလီၢ်ကန့ၢ်အဂီၢ် အဃ့ထုကဖၣ်လၢ ယဟိဝၤယွၤအအိၣ်. ယဟိဝၤယွၤ ကစံးဆၢ အတၢ်ထုကဖၣ်ဒ်လဲၣ်. ဘၣ်သ့ၣ်သ့ၣ် ယဟိဝၤယွၤ ကဟ့ၣ်အီၤတၢ်သးဒူ လၢအကလဲၤတဲတၢ်ဒီး အတၢ်မၤခိၣ်. ဘၣ်ဆၣ် ဒီပုၢ်ဝဲၢ်ခွါန့ၣ် အကဘၣ်လဲၤလၢ အတၢ်မၤခိၣ်အအိၣ် ဒီးဃ့ခွဲးဒံး. ဒီးဘၣ်သ့ၣ်သ့ၣ် အကဘၣ်လဲၤဃ့ဝဲ တဘျုးဘျီညါ. မ့တမ့ၢ်ဘၣ်န့ၣ် အကလဲၤဃ့ ဆီတလဲ အတၢ်မၤမုၢ်နံၤဒီး ပှၤမၤတၢ်ဖိအဂၤတဂၤ. ဒီးဘၣ်သ့ၣ်သ့ၣ် အကတဲ အတၢ်မၤခိၣ်လၢ မုၢ်နံၤလၢ အတမၤတၢ်ဘၣ်န့ၣ် အတဟံစ့ဘၣ်.
၁၁. ဘၣ်မနုၤအဃိ ပကဘၣ်ဃ့ထုကဖၣ် ဘၣ်ဃးဒီး ပတၢ်သူၣ်ကိၢ်သးဂီၤ ခဲအံၤခဲအံၤလဲၣ်.
၁၁ ယဟိဝၤယွၤ အဲၣ်ဒိးလၢ ပကဃ့ထုကဖၣ် ဘၣ်ဃးဒီး ပတၢ်သူၣ်ကိၢ်သးဂီၤ ခဲအံၤခဲအံၤ. (၁ သ့း ၅:၁၇) ဒ်ယ့ၣ်ၡူးတဲဝဲအသိး ပတၢ်ဃ့ထုကဖၣ် တနီၤန့ၣ် ပတဒိးန့ၢ်ဘၣ်အဆၢ တဘျီဃီဘၣ်. (လူၤ ၁၁:၉) အဃိ ပကဘၣ် ဆဲးဃ့ထုကဖၣ်တၢ်ဆူၣ်ဆူၣ် လၢပသးဒီဖျၢၣ် ဒီးပတဘၣ်ဟ့ၣ်အၡူဘၣ်. (လူၤ ၁၈:၁-၇) ဖဲပဃ့ထုကဖၣ် ဘၣ်ဃးဒီး ပတၢ်သူၣ်ကိၢ်သးဂီၤ ခဲအံၤခဲအံၤအခါ ပပာ်ဖျါထီၣ်န့ၢ် ယဟိဝၤယွၤလၢ ပတၢ်ဃ့တခါအံၤန့ၣ် အရ့ဒိၣ်ဒိၣ်မး. ပပာ်ဖျါထီၣ်စ့ၢ်ကီးလၢ ပနာ်န့ၢ်ယဟိဝၤယွၤ လၢလၢပှဲၤပှဲၤ လၢအကမၤစၢၤပှၤ.
ဘၣ်မနုၤအဃိ ပကြၢးဆီတလဲ တၢ်လၢပဃ့တနီၤလဲၣ်
၁၂. (က) တၢ်သံကွၢ်အဆိကတၢၢ်တဖျၢၣ်လၢ ပကဘၣ်သံကွၢ်လီၤပသး ဘၣ်ဃးဒီးပတၢ်ဃ့န့ၣ် မ့ၢ်မနုၤလဲၣ် ဒီးဘၣ်မနုၤအဃိလဲၣ်. (ခ) တၢ်လၢပဃ့တဖၣ်န့ၣ် ပပာ်ဖျါထီၣ်လၢ ပပာ်ကဲယဟိဝၤယွၤ ကသ့ဒ်လဲၣ်. (ကွၢ်တၢ်လွံၢ်နၢၣ် လၢအမ့ၢ် “တၢ်လၢယဃ့တဖၣ်န့ၣ် မ့ၢ်အပာ်ဖျါထီၣ်လၢ ယပာ်ကဲ ယဟိဝၤယွၤဧါ.”)
၁၂ တၢ်လၢပဃ့တဖၣ် ပမ့ၢ်တဒိးန့ၢ်ဘၣ် အတၢ်စံးဆၢဘၣ်န့ၣ် ပကဘၣ် သံကွၢ်လီၤပသးလၢ တၢ်သံကွၢ်သၢဖျၢၣ်အံၤ. တၢ်သံကွၢ် အဆိကတၢၢ်တဖျၢၣ် မ့ၢ်ဝဲ ‘တၢ်လၢယဃ့န့ၣ် အကြၢးအဘၣ်စ့ၢ်ကီးဧါ.’ ညီနုၢ်န့ၣ် ပဆိကမိၣ်လၢ ပသ့ၣ်ညါတၢ်အဂ့ၤကတၢၢ် လၢပနီၢ်ကစၢ်အဂီၢ်လံ. ဘၣ်ဆၣ် တၢ်လၢပဃ့တဖၣ်န့ၣ် ဘၣ်သ့ၣ်သ့ၣ် အတကဲဘျုးလၢပဂီၢ် ယံာ်ယံာ်ဘၣ်. ဘၣ်သ့ၣ်သ့ၣ် ပကဃ့ယဟိဝၤယွၤလၢ အကမၤဘၣ်ဂီၢ်ထီၣ်က့ၤ ပတၢ်ကီတၢ်ခဲဒ်အံၤဒ်န့ၣ် ဘၣ်ဆၣ် အကမၤဘၣ်ဂီၢ်ထီၣ် ပတၢ်ကီတၢ်ခဲဒ်လဲၣ်န့ၣ် အသ့ၣ်ညါဝဲ ဂ့ၤဒိၣ်န့ၢ်ဒံးပှၤဒံး. ဒီးပတၢ်ဃ့တနီၤန့ၣ် ဘၣ်သ့ၣ်သ့ၣ် အတဘၣ်လိာ်သးဒီး ယဟိဝၤယွၤ အတၢ်ဘၣ်သးဘၣ်. (၁ ယိၤ ၅:၁၄) ဆိကမိၣ်ကဒါက့ၤ မိပါလၢပတဲဖျါထီၣ်အဂ့ၢ် လၢအခီၣ်ထံး. အဝဲသ့ၣ် ဃ့ယဟိဝၤယွၤဒ်သိး အဖိတဖၣ် ကဆဲးအိၣ်လၢ တၢ်မ့ၢ်တၢ်တီအပူၤ. ဘၣ်သ့ၣ်သ့ၣ် အဝဲသ့ၣ်ဃ့ဝဲဒ်အံၤန့ၣ် အဝဲသ့ၣ် ဆိကမိၣ်ဝဲလၢ အတကမၣ်ဘၣ်. ဘၣ်ဆၣ် ယဟိဝၤယွၤ တမၢဆူၣ်ပှၤလၢ ပကဘူၣ်ထီၣ်ဘါထီၣ်အီၤဘၣ်. ယဟိဝၤယွၤ အဲၣ်ဒိးလၢ ပဝဲကိးဂၤဒဲး ဒီးပဖိစ့ၢ်ကီး ကဃုထၢလၢ ကဘူၣ်ထီၣ်ဘါထီၣ်အီၤ လၢပနီၢ်ကစၢ်. (၅ မိၤ ၁၀:၁၂, ၁၃; ၃၀:၁၉, ၂၀) အဃိ မိပါတဖၣ် ဃ့ယဟိဝၤယွၤလၢ ကမၤစၢၤအဝဲသ့ၣ် ဒ်သိးအဝဲသ့ၣ် ကမၤစၢၤက့ၤအဖိလၢ ကသ့ၣ်ညါထီၣ် တၢ်မ့ၢ်တၢ်တီ, ကအဲၣ်ယဟိဝၤယွၤ ဒီးကကဲထီၣ် ယဟိဝၤယွၤ အတံၤသကိး.—ကတိၤ ၂၂:၆; အ့း ၆:၄.
၁၃. ဒ် ဧ့ၤဘြံၤ ၄:၁၆ ပာ်ဖျါထီၣ်ဝဲအသိး ယဟိဝၤယွၤ ကမၤစၢၤပှၤလၢ အဆၢကတီၢ်ဖဲလဲၣ်.
၁၃ တၢ်သံကွၢ် ခံဖျၢၣ်တဖျၢၣ်န့ၣ် မ့ၢ်ဝဲ ‘တၢ်လၢယဃ့န့ၣ် မ့ၢ်အဆၢကတီၢ်ဘၣ်လၢ ယဟိဝၤယွၤ ကမၤလၢပှဲၤဝဲလံဧါ.’ ဖဲပဃ့ထုကဖၣ်အခါ ဘၣ်သ့ၣ်သ့ၣ် ပအဲၣ်ဒိးန့ၢ်ဘၣ် တၢ်စံးဆၢတဘျီဃီ. ဘၣ်ဆၣ် ယဟိဝၤယွၤ ကမၤစၢၤပှၤ အဆၢကတီၢ်ဖဲလဲၣ်န့ၣ် အသ့ၣ်ညါဝဲဂ့ၤကတၢၢ်. (ဖး ဧ့ၤဘြံၤ ၄:၁၆.) ဖဲပဃ့ထုကဖၣ်အခါ ပမ့ၢ်တဒိးန့ၢ်ဘၣ် တၢ်စံးဆၢတဘျီဃီဘၣ်န့ၣ် ပတဘၣ်ဆိကမိၣ်လၢ ယဟိဝၤယွၤ ‘တဟ့ၣ်ပှၤဘၣ်’ န့ၣ်ဘၣ်. ဘၣ်သ့ၣ်သ့ၣ် တၢ်လၢပဃ့န့ၣ်အ ‘တဟ့ၣ်ပှၤဒံးဘၣ်.’ အဒိ က့ၤဆိကမိၣ်ကွၢ် ဒီပုၢ်ဝဲၢ်ခွါသးစၢ်တဂၤလၢ အဃ့ထုကဖၣ်လၢ အတၢ်ဆါကဘျါက့ၤအဂီၢ်. ဒီပုၢ်ဝဲၢ်ခွါတဂၤအံၤ ယဟိဝၤယွၤ မ့ၢ်မၤဘျါက့ၤအတၢ်ဆါ လၢတၢ်လီၤလးအပူၤန့ၣ် မုၣ်ကီၤလံၢ်ကတဲဆါအီၤလၢ အဆဲးဘူၣ်ထီၣ်ဘါထီၣ်ဝဲ ယဟိဝၤယွၤန့ၣ် ခီဖျိလၢ ယဟိဝၤယွၤ မၤဘျါန့ၢ်က့ၤ အတၢ်ဆါအဃိ. (ဘး ၁:၉-၁၁; ၂:၄) ယဟိဝၤယွၤန့ၣ် အပာ်ပနီၣ်ဃာ်ဝဲ တၢ်ဆၢကတီၢ်လၢ အကမၤလီၤမၢ်ကွံာ် တၢ်ဆူးတၢ်ဆါခဲလၢာ် ဝံၤလံ. (ၡါ ၃၃:၂၄; လီၣ် ၂၁:၃, ၄) သနာ်က့ တၢ်ဆၢကတီၢ်လၢ ယဟိဝၤယွၤ ပာ်ပနီၣ်ဃာ်ဝဲ မ့ၢ်တတုၤဒံးဘၣ်န့ၣ် ပတဘၣ်ဆိကမိၣ်လၢ အကမၤလီၤမၢ်ကွံာ် တၢ်ဆူးတၢ်ဆါတဖၣ်အံၤ လၢတၢ်လီၤလးအပူၤဘၣ်. အဃိ ဒီပုၢ်ဝဲၢ်ခွါတဂၤအံၤ ကဃ့ယဟိဝၤယွၤလၢ ကဟ့ၣ်အီၤ တၢ်ဂံၢ်တၢ်ဘါ, လဲၤခီဖျိ အတၢ်ဆူးတၢ်ဆါကန့ၢ် ဒီးအကဆဲး ဘူၣ်ထီၣ်ဘါထီၣ်ဘၣ် ယဟိဝၤယွၤလၢ တၢ်သးတီအပူၤ.—စံး ၂၉:၁၁.
၁၄. လၢဒီပုၢ်ဝဲၢ်မုၣ်ကၠဲနံၣ် အတၢ်လဲၤခီဖျိန့ၣ် ပန့ၢ်ဘၣ်တၢ်မၤလိဒ်လဲၣ်.
၁၄ ဆိကမိၣ်ကွၢ်စ့ၢ်ကီး ဒီပုၢ်ဝဲၢ်မုၣ်ကၠဲနံၣ် အတၢ်လဲၤခီဖျိ. အဃ့ထုကဖၣ်လၢ အဘၣ်သးလဲၤမၤတၢ်လၢ ဘ့ၤသ့လး. ယဲၢ်နံၣ်ဝံၤအလီၢ်ခံမၣ် အသ့ၣ်ညါထီၣ်လၢ ယဟိဝၤယွၤစံးဆၢဝဲ အတၢ်ထုကဖၣ်လၢ ကျဲလၢအတဆိမိၣ်ဘၣ်ဝဲဘၣ်. အတဲဝဲလၢ “ဖဲယဘၣ်အိၣ်ခိးတၢ်အခါ ယဟိဝၤယွၤ သိၣ်လိယၤတၢ်အါမး ဒီးအမၤစၢၤဒ်သိး ယကဆဲးကဲ ခရံာ်ဖိလၢအဂ့ၤတဂၤ. အဃိ ယကဘၣ် သန့ၤယသးလၢ ယဟိဝၤယွၤအါထီၣ် ဒီးယကဘၣ် ဃုသ့ၣ်ညါအါထီၣ် လံာ်စီဆှံအဂ့ၢ် လီၤတံၢ်လီၤဆဲး. ဒီးယမ့ၢ်မၤဘၣ် ကစၢ်ယွၤ အတၢ်မၤ လၢတၢ်လီၢ်ဖဲလဲၣ်ဂ့ၤဖဲလဲၣ်ဂ့ၤ သနာ်က့ ယကဘၣ်အိၣ်ဒီးတၢ်သးခု.” လၢခံ ဒီပုၢ်ဝဲၢ်မုၣ်ကၠဲနံၣ် ဒီးအဝၤန့ၣ် ပှၤကွဲမုာ်အဝဲသ့ၣ်လၢ ကမၤဝဲကဝီၤအပှၤကွၢ်တၢ်. ဒီပုၢ်ဝဲၢ်မုၣ်ကၠဲနံၣ် က့ၤဆိကမိၣ်ထံဝဲ ဒီးတဲဝဲလၢ “ယဟိဝၤယွၤ စံးဆၢယတၢ်ထုကဖၣ် ဘၣ်ဆၣ် တမ့ၢ်ဒ်ယဆိကမိၣ်ပာ်စၢၤ အသိးဘၣ်. ယဟိဝၤယွၤ စံးဆၢယၤ လၢအဂ့ၤကတၢၢ်န့ၣ် ဒ်သိးယကနၢ်ပၢၢ်ထီၣ်အဂီၢ် တၢ်ဆၢကတီၢ်ဒုယံာ်ဝဲ. ဘၣ်ဆၣ် ယသးခုဒိၣ်မးလၢ ယဒိးန့ၢ်ဘၣ် ယဟိဝၤယွၤ အတၢ်အဲၣ် ဒီးအတၢ်ကဟုကယာ်.”
နမ့ၢ်ဆိကမိၣ်လၢ ယဟိဝၤယွၤ တစံးဆၢနတၢ်ထုကဖၣ်ဘၣ်န့ၣ် ဆီတလဲနတၢ်ဃ့ထုကဖၣ် ဒီးဃ့တၢ်ဂ့ၢ်လၢ အဂၤတမံၤမံၤ (ကွၢ်လံာ်အဆၢ ၁၅)f
၁၅. ဖဲပဃ့ထုကဖၣ်အခါ ဘၣ်မနုၤအဃိ ပတဘၣ်ဃ့တၢ်ဂ့ၢ်လီၤတံၢ်ဒိၣ်တလၢဘၣ်လဲၣ်. (ကွၢ်စ့ၢ်ကီးတၢ်ဂီၤ.)
၁၅ တၢ်သံကွၢ် သၢဖျၢၣ်တဖျၢၣ်န့ၣ် မ့ၢ်ဝဲ ‘မ့ၢ်ယဃ့တၢ်ဂ့ၢ်လီၤတံၢ်ဒိၣ်တလၢဧါ.’ ဖဲပဃ့ထုကဖၣ်အခါ ပမ့ၢ်ဃ့တၢ်ဂ့ၢ် လီၤလီၤဆီဆီတခါန့ၣ် အဂ့ၤဝဲ. ဘၣ်ဆၣ် ဒ်သိးပကသ့ၣ်ညါဘၣ် ယဟိဝၤယွၤ အတၢ်ဘၣ်သးအိၣ်ဒ်လဲၣ်အဂီၢ် တဘျီတခီၣ် ပမ့ၢ်တဃ့ တၢ်ဂ့ၢ်လီၤတံၢ်ဒိၣ်တလၢဘၣ်န့ၣ် အကဂ့ၤဒိၣ်တစဲး. ဆိကမိၣ်ကွၢ်က့ၤ ဒီပုၢ်ဝဲၢ်မုၣ်လၢ အအိၣ်သဘျ့တဂၤလၢ အဃ့ထုကဖၣ်လၢ အကလဲၤထီၣ်ဘၣ် ပှၤစိာ်ဘီမုၢ်တၢ်သးခုကစီၣ်ဖိအကၠိ တဂၤန့ၣ်အဂ့ၢ်. ဒီပုၢ်ဝဲၢ်မုၣ်အံၤ အဘၣ်သး လဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိအဃိ အဘၣ်သးလဲၤထီၣ်ကၠိတခါအံၤ. အဃိ ဖဲအဆဲးဃ့ထုကဖၣ်လၢ ပှၤကကွဲမုာ်အီၤလၢ အကလဲၤထီၣ်ဘၣ်ကၠိအံၤအခါ အဃ့လၢ ယဟိဝၤယွၤ ကမၤစၢၤအီၤ ဒ်သိးအကထံၣ်န့ၢ်ဝဲ တၢ်ခွဲးတၢ်ယာ်လၢ အကမၤအါထီၣ် ယဟိဝၤယွၤအတၢ်မၤ လၢကျဲအဂၤသ့စ့ၢ်ကီး. (မၤတၢ် ၁၆:၉, ၁၀) ဝံၤဒီး အမၤထွဲဝဲ ဒ်အဃ့ထုကဖၣ်အသိး သ့ခီဖျိ အလဲၤသံကွၢ်ဝဲ အကဝီၤအပှၤကွၢ်တၢ်လၢ တၢ်အိၣ်ဖှိၣ်လၢ အအိၣ်ဘူးဒီးအီၤတဖၣ်န့ၣ် ပှၤလိၣ်ဘၣ်အါထီၣ် ပှၤလဲၤလၢညါအိၣ်ဧါ. မ့တမ့ၢ် အကွဲးလံာ်လၢ ဝဲၤတြၢ်အအိၣ် ဒ်သိး အကသ့ၣ်ညါဘၣ် တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိအဂီၢ် သ့စ့ၢ်ကီး.e
၁၆. ပနာ်န့ၢ် ယဟိဝၤယွၤ သ့ဒ်လဲၣ်.
၁၆ ဒ်ပမၤလိဘၣ်အသိး ပနာ်သ့ သပှၢ်တၢၢ်လၢ ယဟိဝၤယွၤ ကစံးဆၢပတၢ်ထုကဖၣ် လၢတၢ်အဲၣ်တၢ်ကွံ ဒီးကျဲလၢအဂ့ၤကတၢၢ်. (စံး ၄:၃; ၡါ ၃၀:၁၈) တဘျီတခီၣ်န့ၣ် ဘၣ်သ့ၣ်သ့ၣ် ပတဒိးန့ၢ်ဘၣ် တၢ်စံးဆၢ ဒ်ပဆိကမိၣ်ပာ်စၢၤအသိးဘၣ်. ဘၣ်ဆၣ် ယဟိဝၤယွၤန့ၣ် အဒိကနၣ် ပတၢ်ထုကဖၣ်ထီဘိ. ယဟိဝၤယွၤန့ၣ် အအဲၣ်ပှၤဒိၣ်မး ဒီးအတပာ်တ့ၢ်ပှၤ နီတဘျီဘၣ်. (စံး ၉:၁၀) အဃိ ပကဘၣ် ဆဲးဃ့ထုကဖၣ် လၢအအိၣ် လၢပသးဒီဖျၢၣ် ဒီးဆဲး “နာ်န့ၢ် ကစၢ်ယွၤ ထီဘိ.”—စံး ၆၂:၈.
တၢ်သးဝံၣ် ၄၃ တၢ်ထုကဖၣ်အိၣ်ဒီး တၢ်စံးဘျုး
a လၢတၢ်မၤလိအံၤန့ၣ် ပကသ့ၣ်ညါဘၣ်လၢ ယဟိဝၤယွၤ ကစံးဆၢပတၢ်ထုကဖၣ် လၢတၢ်အဲၣ်တၢ်ကွံ ဒီးကျဲလၢအဂ့ၤကတၢၢ်ထီဘိ.
b ပှၤမံၤတနီၤန့ၣ် ပှၤဆီတလဲဝဲ.
c ကွၢ်တၢ်ဂ့ၢ် လၢအမ့ၢ် “မ့ၢ်နနာ်လၢ ယဟိဝၤယွၤမၤတၢ်န့ၣ် အတီအလိၤထီဘိဧါ” လၢ တၢးထီခိးတၢ် လါဖ့ၤဘြူၤအါရံၤ ၂၀၂၂, လံာ်အဆၢ ၃-၆.
d ဒ်သိး နကသ့ၣ်ညါအါထီၣ် တၢ်ဂ့ၢ်ဘၣ်ဃးဒီး ယဟိဝၤယွၤ မၤစၢၤပှၤ ဒ်သိးပတူၢ်ပတၢ်ကီတၢ်ခဲ ကန့ၢ်အဂီၢ် ကွၢ်တၢ်ဂီၤမူ လၢအမ့ၢ် တၢ်ထုကဖၣ် မၤစၢၤပှၤလၢ ပတူၢ်တၢ်ကကဲ.
e နမ့ၢ်ဘၣ်သး သ့ၣ်ညါလၢ နကလဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ်တၢ်မၤစၢၤအဂီၢ် နကဘၣ်မၤဒ်လဲန့ၣ် ကွၢ်တၢ်ဟ့ၣ်ကူၣ် လၢအအိၣ်လၢ လံာ်လၢအမ့ၢ် Organized to Do Jehovah’s Will, chap. 10, pars. 6-9.
f တၢ်ဂီၤအခီပညီ – တချုးလၢ ဒီပုၢ်ဝဲၢ်မုၣ်ခံဂၤ ကတီၣ်ထီၣ်လံာ်လၢ ကလဲၤထီၣ်ဝဲ ပှၤစိာ်ဘီမုၢ်တၢ်သးခုကစီၣ်ဖိအကၠိ ဒံးဘၣ်န့ၣ် အဝဲသ့ၣ် ဃ့ထုကဖၣ်လၢ ယဟိဝၤယွၤအအိၣ်. လၢခံ ဒီပုၢ်ဝဲၢ်မုၣ်တဂၤန့ၣ် န့ၢ်ဘၣ်တၢ်စံးဆၢလၢ အကလဲၤထီၣ်ကၠိ ဘၣ်ဆၣ် လၢအဝဲတဂၤန့ၣ် တန့ၢ်ဘၣ်ဝဲ တၢ်စံးဆၢဘၣ်. သနာ်က့ ဒီပုၢ်ဝဲၢ်မုၣ်လၢ အတန့ၢ်ဘၣ် တၢ်စံးဆၢတဂၤန့ၣ် အသးတဟးဂီၤဘၣ်. အဆဲးဃ့ယဟိဝၤယွၤ အတၢ်မၤစၢၤ ဒ်သိး အကထံၣ်န့ၢ် တၢ်ခွဲးတၢ်ယာ်အဂၤ လၢအကမၤဘၣ် တၢ်စံၣ်တဲၤတဲလီၤတၢ်မၤ. ဒီးလၢခံန့ၣ် အဝဲကွဲးထီၣ်လံာ်လၢ ဝဲၤတြၢ်အအိၣ် ဒီးအန့ၢ်ဘၣ်တၢ်စံးဆၢလၢ အကလဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ်တၢ်မၤစၢၤ.