Gava siuyungwa mosiruwo esi vana ku pe

NAMPILI ngomu ndongeseso zoge za kara nomulyo po, wa hepa hena kudemenena kosiruwo sosiuyungwa soge. Mapongo getu kwa ga wapaika mokutameka nokupwa posiruwo esi va tura po. Mokuyisikisa mo eyi kwa hepa eruganenokumwe lyankenye gumwe ogu ana kara noruha melikwamo.

Mosiruwo soBibeli, mutaro govantu kosiruwo kwa lisigire nomu yina kara ntaantani moyirongo yoyinzi. Mevango lyokuvyukilira kutumbura vili ngava ruganesa nonkango ngwendi “koyiha” yovili zongandi. (Mat. 20:3-6; Joh. 1:39) Kapi va kere nosinka sosinene kuhamena siruwo moyirugana yankenye ezuva. Komaruha gamwe mouzuni naina, vantu kwa kara nomutaro gokulifana.

Nampili ngomu nompo domomukunda nadi vhura kuninkisa vantu va dire kukara nosinka kosiruwo, nye kuvhura tu gwanene mo uwa pokukara nosinka kosiruwo. Ava vana kara noyiuyungwa melikwamo va hepa kukara nosinka kosiruwo vana gava kwankenye ruha. Mpango “nayinye omu yi rugane monkedi zongwa zokuliza” kuvhura hena kuziruganesa kosiruwo esi atu ruganesa koyiuyungwa yetu yomomapongo.—1 Kol. 14:40.

Kusikisa mo siruwo esi vana ku pe. Eliwapaikiro mulyo. Vauyungi ava ava kara noudigu wosiruwo kapi ava liwapaikire nawa. Kuvhura va lihuguvare vene unene. Ndi awo kuliwapaikira komeho tupu zokugava siuyungwa. Mokuninka asi o ruganese nawa siruwo wa hepa kukara norupandu kosiuyungwa soge ntani neharo lyokusiliwapaikira nawa.

Siuyungwa soge kuna kara sereso ndi? Pomuhowo tarurura moSirongwa 4-7, omu mwa hamena kuuyunga wa hana kuhaka-haka nokupwizumuka nokunkondopeka nonkango douhunga nomagano gomulyo. Makura, ruganesa mapukururo ogo ngomu ono kuresa kuziguruka ereso lyoge. Tara siruwo soge. Ono hepa kuresa kugenderera yipo o sikise mo siruwo esi vana ku pe ndi? Resa kugenderera pomaruha gokudira mulyo unene, nye twikira kupwizumuka ntani nokuliwora mokunkondopeka magano gomulyo. Ruguruka kuliyomberesa. Ngomu ono kuwapukurura mbuuyungiso zoge, ayo ngayi kara ureru kuhagesa nosiruwo.

Siuyungwa soge to ka si gava pokuruganesa madidiliko ndi? Mokusikisa mo siruwo kapisi hepero kutjanga madidiliko gomare. Apa wa rugene Sirongwa 25, wa lirongere nkedi zongwa. Tura megano eyi yitwa yitano: (1) Liwapaikira mapukururo gomawa nye kapisi gomanzi. (2) Kara nomagano gomulyo monondunge, nye wa ha kwata momutwe nontanto nadinye. (3) Didilika posiuyungwa soge siruwo esi ono hara kuruganesa kwankenye ruha ndi siruwo esi sa hepa kuhupa ko apa no sika koyitwa yongandi. (4) Nsene kuna kuliwapaikira, gazadara komapukururo aga no vhura kusiga nsene siruwo nasi ka pwa ove wa hana kumana. (5) Liyomberesa omu no ka gava siuyungwa soge.

Eliyombereso mulyo unene. Ngomu ono kuliyomberesa, tara siruwo sankenye ruha rosiuyungwa soge. Ruguruka kuliyomberesa siuyungwa soge dogoro nasinye si gwaneke mosiruwo esi vana ku pe. Wa ha tura mo mauzera gomanzi mosiuyungwa soge. Ntani diworoka asi kugava siuyungwa komeho zombunga kuvhura kugusa siruwo sosire kupitakana pokusiliyomberesa pwanyamoge.

Kuhangura maruha gosiuyungwa soge. Kuruganesa nawa siruwo kwa kwatera mo kuhangura nawa maruha gosiuyungwa. Siruwo sosinzi sa hepa kusiruganesa mokugava ntjima-ntjima zosiuyungwa. Omu yimo amu kara magano gomulyo. Etwaromo lya hepa kukara lyere kanunu mokusikisa mo yitambo yitatu eyi va zogera moSirongwa 38. Ntjima-ntjima zosiuyungwa za ha kara zonde unene yipo o kare nosiruwo sokugwanena po mokugava ehageso lyewa, kuliza noSirongwa 39.

Kusikisa mo siruwo esi vana ku pe ngayi ninkisa siuyungwa soge si wape ntani ngayi likida efumadeko kwava wopeke ava vana kara nomaruha melikwamo ntani nokombungakriste nazinye.