Матай

12 Дем алыш күндөрдүн* биринде Иса эгин талааларын аралап баратты. Жанындагы шакирттери ачка болгондуктан буудайдын башын үзүп, жей башташты.+ 2 Муну көргөн фарисейлер Исага: «Карачы, шакирттериң дем алыш күнү кылганга болбой турган ишти кылып жатышат»,+— дешти. 3 Ошондо Иса: «Өзү да, жанындагы кишилери да ачка болгондо, Дөөтүнүн эмне кылганын окуган эмес белеңер?+ 4 Ал Кудайдын үйүнө кирип, кишилери менен ыйык нандардан*+ жегенин билбейсиңерби? Аларды дин кызматчылардан башка эч ким: Дөөтү да, жанындагылары да жебеши керек болчу.+ 5 Же дем алыш күндөрү ибадатканада жумуш кылышса да, дин кызматчылардын айыптуу болбой турганын Мусанын Мыйзамынан окуган эмес белеңер?+ 6 Силерге айтып коёюн, бул жерде ибадатканадан да улук бирөө бар.+ 7 Эгерде: „Мен курмандык чалышыңарды эмес,+ башкаларга кайрымдуу болушуңарды каалайм“,+— деген сөздөр эмнени билдирерин түшүнсөңөр, айыбы жокторду күнөөлөбөйт болчусуңар. 8 Анткени адам Уулу — дем алыш күндүн Кожоюну»,— деди.+

9 Иса ал жактан кеткенден кийин сыйынуу жайына барды. 10 Ал жерде колу сенек* бир киши бар эле.+ Исаны айыпка жыгыш үчүн: «Дем алыш күнү оорулууну айыктырса болобу?» — деп сурашты.+ 11 Ал: «Араңардан ким, жалгыз кою дем алыш күнү аңга түшүп кетсе, аны алып чыкпай коёт?+ 12 Койго караганда адам алда канча баалуу эмеспи! Демек, дем алыш күнү жакшылык кылса болот»,— деди. 13 Анан тиги кишиге: «Колуңду сун»,— деди. Ал сунганда, колу берки колундай сопсоо болуп калды. 14 Ошондо фарисейлер тышка чыгып, Исаны өлтүрүш үчүн кеңешишти. 15 Муну билип, Иса ал жерден кетип калды. Артынан бир топ киши ээрчип жөнөдү.+ Иса алардын баарын айыктырды. 16 Бирок өзү жөнүндө эч кимге айтпаш керектигин аларга катуу эскертти.+ 17 Ошентип, Ышая пайгамбар аркылуу айтылган төмөнкү сөздөр аткарылды:

18 «Мына, мен тандап алган, мага жаккан сүйүктүү+ кызматчым!+ Мен ага ыйык рухумду берем.+ Ал элдерге адилеттик эмне экенин түшүндүрөт. 19 Ал талашып-тартышпайт,+ кыйкырбайт, чоң көчөлөрдөн анын үнүн эч ким укпайт. 20 Адилеттикти бардык жерде орнотмоюн, чала сынган камышты сындырбайт, бүлбүлдөп күйгөн биликти өчүрбөйт.+ 21 Ага* элдер үмүт артат».+

22 Кийинчерээк Исага жин оорулуу сокур, дудук бир кишини алып келишти. Иса аны айыктырганда, ал сүйлөп да, көрүп да калды. 23 Элдин баары таң калып: «Дөөтүнүн Уулу ушул эмеспи?» — деп жатты. 24 Муну уккан фарисейлер: «Бул деген жиндерди жиндердин башчысы Шайтандын* жардамы менен кууп чыгарып жатат»,— дешти.+ 25 Алардын оюн билип, Иса мындай деди: «Ич ара бөлүнгөн ар бир падышалык, ар бир шаар кулайт, ич ара бөлүнгөн үй-бүлө да бузулат. 26 Ошо сыяктуу эле, эгер Шайтан Шайтанды кууп чыгарып жатса, анда ал өзүнө өзү каршы чыккан болот. Андай болсо, анын падышалыгы кантип кыйрабай бекем тура алат? 27 Ошондой эле мен жиндерди Шайтандын жардамы менен кууп чыгарып жатсам, анда силердин шакирттериңер кимдин жардамы менен кууп чыгарып жатат? Ошон үчүн айткандарыңардын туура эмес экенин ошолор ашкерелейт. 28 Эгер мен жиндерди Кудайдын ыйык руху менен кууп чыгарып жатсам, анда Кудайдын Падышалыгы келип калганы анык, бирок силер муну баамдаган жоксуңар*.+ 29 Күчтүү бирөөнүн үйүнө ууруга кирген киши анын өзүн байламайынча мүлкүн тоной алабы? Аны байлагандан кийин гана тонойт эмеспи. 30 Ким мен тарапта болбосо, ал мага каршы. Ким мени менен жыйнабаса, ал чачкан болот.+

31 Ошондуктан силерге айтып коёюн, адамдардын ар кандай күнөөлөрү менен акарат сөздөрү кечирилет, бирок Кудайдын ыйык рухуна каршы айткан акарат сөздөрү кечирилбейт.+ 32 Мисалы, ким адам Уулуна каршы сүйлөсө, кечирилет.+ Ал эми ким Кудайдын ыйык рухуна каршы сүйлөсө, азыркы заманда* да, келечектеги заманда* да кечирилбейт.+

33 Дарагыңар жакшы болсо, жемиши да жакшы болот, дарагыңар начар болсо, жемиши да начар болот, себеби дарактын кандай экени жемишинен билинет.+ 34 Уулуу жыландын* тукумдары,+ өзүңөр жаман болуп туруп, кантип жакшы нерсе айта аласыңар? Анткени адамдын жүрөгү эмнеге толсо, оозу ошону сүйлөйт.+ 35 Жакшы киши жүрөгүндөгү жакшы казынасынан жакшы нерселерди алып чыгат, ал эми жаман киши жаман казынасынан жаман нерселерди алып чыгат.+ 36 Силерге айтып коёюн, адамдар ар бир куру сөзү үчүн Сот күнүндө жооп беришет.+ 37 Анткени сөзүңө жараша же адил деп жарыяланасың, же айыпталасың».

38 Ошондо диний мыйзамдарды окуткандар менен фарисейлердин айрымдары: «Устат, бизге жышаан көрсөтчү»,— дешти.+ 39 Иса болсо мындай деди: «Кудайдан баш тартып кеткен* бул ыймансыз муун дайыма эле жышаан көрсөт деп талап кыла берет, бирок ага Жунус пайгамбардыкынан башка жышаан көрсөтүлбөйт.+ 40 Жунус чоң балыктын ичинде үч күн, үч түн болгондой эле,+ адам Уулу да жер койнунда үч күн, үч түн болот.+ 41 Нинебиликтер Сот күнүндө бул муун менен бирге тирилип, аны айыпташат. Анткени алар Жунустун кабарын угуп өкүнүшкөн.+ Ал эми бул жерде Жунустан да улук бирөө бар.+ 42 Сот күнүндө түштүк канышасы бул муун менен бирге тирилип, аны айыптайт. Анткени ал Сулаймандын даанышман сөздөрүн угуш үчүн жердин түбүнөн келген.+ Ал эми бул жерде Сулаймандан да улук бирөө бар.+

43 Адамдын ичинен чыккандан кийин жин өзүнө жай издеп, кургак жерлердин баарын кыдырат, бирок бир да жай таппайт.+ 44 Ошондо: „Чыккан үйүмө эле кайра барайын“,— дейт. Ал кайтып келип, анын бош экенин, шыпырылып, жасалгаланганын көрөт. 45 Анан барып, өзүнөн да каардуу жети жинди ээрчитип келет да, баары анын ичине кирип, жашап калышат. Ошондо тиги адамдын абалы мурункусунан да жаман болот.+ Бул ыймансыз муун да ушундай абалга туш болот».

46 Иса элге сүйлөп жатканда, энеси менен бир туугандары+ аны менен сүйлөшкөнү келип, сыртта күтүп турушту.+ 47 Ошондо бирөө ага: «Энең менен бир туугандарың сени менен сүйлөшүш үчүн сыртта күтүп турушат»,— деди. 48 Иса ага: «Менин энем ким? Бир туугандарым ким?» — деди да, 49 шакирттерин көрсөтүп: «Мына менин энем, мына бир туугандарым!+ 50 Анткени ким асмандагы Атамдын эркин аткарса, ошол — менин энем, ошолор — менин ага-инилерим, эже-карындаштарым»,— деп айтты.+