Жахабанын «тирүү Кудай» экенин эсиңерде бек сактагыла!

1. Кыйынчылыктарга карабай Жахабага кызмат кыла бергенге эмне жардам берет?

ЫЙЫК КИТЕПТЕ биздин күндөр «өзгөчө оор мезгил» деп сүрөттөлөт (2 Тим. 3:1). Биз башкалар туш болуп жаткан кыйынчылыктардан тышкары, Жахабага кызмат кылганыбыз үчүн каршылыкка жана куугунтукка кабылып келебиз. Ошол кыйынчылыктарга карабай Жахабага кызмат кыла бергенге эмне жардам берет? Эң маанилүү нерселердин бири Жахабанын «тирүү Кудай» экенин билгенибиз (Жер. 10:10; 2 Тим. 1:12).

2. Жахабанын «тирүү Кудай» экенин эсибизде бек сактаганыбыз бизге эмне кылганга жардам берет?

² Жахаба башыбыздан кандай кыйынчылыктарды кечирип жатканыбызды билет жана бизге колдоо көрсөтүүнүн жолдорун издейт (2 Жылн. 16:9; Заб. 23:4). Жахабанын «тирүү Кудай» экенин көкүрөктө бек сактаганыбыз, кандай сыноого кабылбайлы, ага тике караганга жардам берет. Чын эле ушундай экенине Дөөтүнүн жашоосу далил. Келгиле анда, ошого токтололу.

3. «Жахаба тирүү»,— деп айтканда Дөөтү эмне дегиси келген?

³ Дөөтү Жахабанын кандай Кудай экенин билген жана ага таянган. Шабул жана башка душмандары аны өлтүрмөкчү болуп, артынан сая түшкөндө, ал Жахабадан жардам сураган (Заб. 18:6). Кудай ага жооп берип, душмандарынан сактагандан кийин, Дөөтү: «Жахаба тирүү»,— деп айткан (Заб. 18:46). Бул сөздөрдү айтканда Дөөтү Кудайдын бар экенине ишенерин эле көрсөткөн эмес. Бир эмгекте Дөөтү Жахабанын «өз элине дайым жардам берген тирүү Кудай экенине» бекем ишенгени баса белгиленген. Ооба, Дөөтү башынан өткөндөрүнөн улам Жахабанын «тирүү Кудай» экенине көзү жеткен. Бул ага Жахабага андан ары да кызмат кылып, аны даңктай бергенге түрткү берген (Заб. 18:28, 29, 49).

4. Жахабанын «тирүү Кудай» экенине эмне үчүн бекем ишенишибиз керек?

⁴ Жахабанын «тирүү Кудай» экенине бекем ишенгенибиз бизге ага бүт ынтабыз менен кызмат кылганга жардам берет. Ошондой эле кыйынчылыктарды көтөргөнгө күч берип, андан ары да Жахабага жан-дилибиз менен кызмат кылганга түрткү берет. Жахаба менен ынак болгонго да чечкиндүү болуп калабыз.

«ТИРҮҮ КУДАЙЫБЫЗ» БИЗГЕ КҮЧ БЕРЕТ

5. Кыйынчылыктарга кабылганда эмне үчүн коркпошубуз керек? (Филипиликтер 4:13).

⁵ Жахабанын «тирүү Кудай» экенин жана бизге жардам бергенге дайым даяр экенин эсибизде бек сактасак, кандай кыйынчылык болбосун, мейли чоңбу же кичинеби, туруштук бере алабыз. Негизи эле, биз кабылган бир да кыйынчылык Жахаба үчүн кыйынчылык деле эмес. Анткени ал Кудурети Чексиз Кудай жана бизге сыноого сынбаганга күч бере алат. (Окугула: Филипиликтер 4:13.) Андыктан башыбызга кандай мүшкүл түшпөсүн, коркконго эч бир себеп жок. Томуктай сыноого кабылганда Жахабанын колдогонун көргөнүбүз, тоодой сыноого туш болгондо да колдоорунан шектенбегенге жардам берет.

6. Дөөтүгө Жахабанын колдоорунан шектенбегенге кайсы окуялар жардам берген?

⁶ Дөөтүнүн Жахабага болгон ишенимин бекемдеген эки окуяга токтололу. Ал бала кезинде атасынын койлорун кайтарчу. Анан оторго бир жолкусунда аюу, экинчисинде болсо арстан кол салып, коюн көтөрүп кеткен. Экөөндө тең Дөөтү алардын артынан коркпой кубалап барып, койлорун сактап калган. Ошентсе да ал муну өз күчүм менен кылдым деген эмес. Ал мунун артында Жахаба турганын билген (1 Шем. 17:34—37). Бул окуялар анын эсинде ташка тамга баскандай калган. Ушулар жөнүндө ой жүгүрткөнү Дөөтүгө «тирүү Кудайы» Жахабанын келечекте да күч-кубат берерине ынандырган.

7. Дөөтү эмнеге көңүл топтогон жана бул ага Голиат менен беттешкенге кандайча жардам берген?

⁷ Кийинчерээк, сыягы, өспүрүм кезинде Дөөтү ысрайылдык аскерлердин кошуунуна барган. Анан ал пелиштилик алп Голиаттын «ысрайылдык аскерлерди маскара кылыш» үчүн чыкканын жана жоокерлердин жүрөгү түшүп калганын көргөн (1 Шем. 17:10, 11). Алар Голиаттын алп болгонуна жана айткан сөздөрүнө көңүл топтоп алгандыктан коркушкан (1 Шем. 17:24, 25). Ал эми Дөөтү башка нерсеге көңүл топтогон. Ал Голиат Ысрайылдын аскерлерин эмес, «тирүү Кудайдын аскерлерин мазактап» жатканын көргөн (1 Шем. 17:26). Дөөтү биринчи кезекте Жахаба жөнүндө ойлонгон. Койчу кезинде ага жардам берген Кудай мунусунда да жардам берерине бекем ишенген. Ошентип, Голиат менен беттешип, аны сулаткан (1 Шем. 17:45—51).

8. Кыйынчылыкка кабылганда Жахабанын колдой турганынан күмөн санабаганга эмне жардам берет? (Сүрөттү да карагыла.)

⁸ «Тирүү Кудайыбыз» бизге жардам бергенге даяр экенин унутпасак, сыноого кабылганда чөгүп калбайбыз (Заб. 118:6). Жахабага бекем ишениш үчүн анын мурун эмнелерди кылганы жөнүндө ой жүгүртүшүбүз керек. Ан үчүн Ыйык Китептен Жахаба байыркы учурдагы кызматчыларын кантип коргогону жөнүндө окугула (Ыш. 37:17, 33—37). Ошондой эле азыркы учурда анын ишенимдештерибизди кантип колдоп жатканын билиш үчүн jw.org сайтынан видеолорду көргүлө же макалаларды окугула. Жахабанын силерге кантип жардам бергенин да эстегиле. Эгер аюу же арстан менен алышкан сыяктуу өзгөчө учурларды эстей албасаңар, эчтеке эмес. Анткени Жахаба силер үчүн көп нерселерди кылган. Мисалы, аны менен дос боло алышыңар үчүн силерди өзүнө жакындаткан (Жкн. 6:44). Атүгүл анын жардамы менен гана азыркыга чейин чындык жолунда жүрөбүз. Ошондуктан Кудайдан тилегиңерге жооп берген, так керектүү учурда колдоо көрсөткөн жана кыйын кезеңде жардам берген учурларын эстетишин сурангыла. Ушул нерселер жөнүндө ой жүгүртсөңөр, Жахабанын мындан ары да жардам бере береринен шектенбейсиңер.

9. Сыноого кабылганда эмнени эстен чыгарбашыбыз керек? (Накыл сөздөр 27:11).

⁹ Кыйынчылыкка туш болгондо баарынан да эмне маанилүү экенин эстен чыгарбаганыбыз зарыл. Ибилис бизди: «Башына мүшкүл түшкөндө Жахабаны таштап коёт»,— деп айыптайт. Ошондуктан кыйынчылыкка кабылганда кандай иш-аракет кыларыбыз Жахабага баары бир эмес. (Аюп 1:10, 11; окугула: Накыл сөздөр 27:11.) Эгер кыйынчылыктарга кабылганда ишенимибизден жазбасак, Жахабаны жакшы көрөрүбүздү жана Ибилистин калпычы экенин далилдейбиз. Балким, өкмөттүн кысымына, каржы каатчылыгына, аймактагылардын каршылыгына же дагы башка кыйынчылыктарга кабылып жаткандырсыңар. Эгер ошондой болсо, муну Жахабанын жүрөгүн кубантканга жакшы мүмкүнчүлүк катары көргүлө. Ошондой эле анын алыңар жеткис кыйынчылыкка жол бербей турганын унутпагыла (1 Кор. 10:13). Ал силерге аягына чейин чыдаганга күч берет.

«ТИРҮҮ КУДАЙЫБЫЗ» СЫЙЛЫКСЫЗ КАЛТЫРБАЙТ

10. Жахабанын эмне кыларынан шектенбесек болот?

¹⁰ Жахаба кызматчыларын сыйлыксыз калтырбайт (Евр. 11:6). Ал азыртадан эле жан дүйнөбүздү тынчтыкка бөлөп, жашообузду маңызга толтуруп жатат. Келечекте болсо бизге түбөлүк өмүр тартуулайт. Жахабанын сыйлык берерине толук ишенсек болот. Анткени анда күч да, каалоо да бар. Ошондуктан, Жахабанын байыркы учурдагы кызматчыларындай болуп, биз да ага кызмат кылыш үчүн колубуздан келгендин баарын кылышыбыз керек. 1-кылымда жашаган Тиметей да так ошондой кылган (Евр. 6:10—12).

11. Тиметей эмне үчүн бүт күчүн жумшай берген? (1 Тиметей 4:10).

¹¹ Окугула: 1 Тиметей 4:10. Тиметей «тирүү Кудайга» үмүт арткан. Ошол себептен ал Жахабага жана жыйналыштагыларга бүт күчүн жумшап кызмат кылган, эч нерсесин аяган эмес. Тиметей эмнелерди кылган? Элчи Пабыл аны жыйналышта да, кызматта да жакшы окутуучу болууга үндөгөн. Ошондой эле жыйналыштагы жаштарга да, карыларга да үлгү болгонго чакырган. Андан тышкары, ага дагы башка оор иштер тапшырылган. Мисалы, ал айрымдарга жылуу-жумшак, ошол эле учурда түз кеңеш бериши керек болчу (1 Тим. 4:11—16; 2 Тим. 4:1—5). Тиметейдин иштери кээде көз жаздымда калган же башкалар аларды такыр баалаган эмес. Ошентсе да ал Жахабанын сыйлык ыйгарарынан шектенген эмес (Рим. 2:6, 7).

12. Эмне үчүн аксакалдар жыйналыштагыларга жанын аябай кызмат кылышат? (Сүрөттү да карагыла.)

¹² Бүгүнкү күндө да аксакалдар Жахабанын алардын жакшы иштерин байкаарынан жана баалаарынан шектенбесе болот. Оторду кайтаргандан, окуткандан жана кабар айткандан тышкары, көптөгөн аксакалдар курулушка катышат. Табигый кырсыктан жабыр тарткандарга да жардам беришет. Башкалары болсо Бейтаптарга баруу топторунда же Ооруканалар менен байланышуу комитеттеринде кызмат кылышат. Ушундай иштерге катышкан аксакалдар жыйналыштын кимдир бирөөгө эмес, Жахабага таандык экенин унутпайт. Ошондуктан аларга тапшырылган ишти жан-дили менен аткарышат жана Жахабанын аларга сыйлык береринен түк да шектенишпейт (Кол. 3:23, 24).

13. Жахаба ал үчүн кылган аракетибизге кандай карайт?

¹³ Албетте, баары эле аксакал боло албайт. Бирок баарыбыз Жахабага бир нерсе бере алабыз. Кудайыбыз ага кызмат кылыш үчүн колубуздан келгендин баарын кылганыбызды жогору баалайт. Жахаба биздин Падышалыктын ишине берген тартуубуз, канчалык аз болбосун, байкайт. Ал уялчаак болгонубузга карабай жыйналыштан жооп бергенибизде сүйүнөт. Ошондой эле бизди таарынткан ишенимдешибизди кечиргенибизди көргөндө кубанат. Эгер силерге Жахабага оюңардагыдай кызмат кыла албай жаткандай сезилсе, анын колуңардан келгенин кылып жатканыңарды баалаарынан шектенбегиле. Ал силерди ошондой кичинекей нерсеңер үчүн да жакшы көрөт жана сыйлыксыз калтырбайт (Лк. 21:1—4).

«ТИРҮҮ КУДАЙЫБЫЗДАН» АЛЫСТАБАГЫЛА

14. Жахаба менен ынак болуу ага ишенимдүү бойдон калганга кандайча жардам берет? (Сүрөттү да карагыла.)

¹⁴ Эгер Жахаба менен ынак болсок, ага ишенимдүү бойдон калуу оңоюраак болот. Буга Жусупту мисал кылса болот. Жахаба ал үчүн «тирүү Кудай» болгондуктан жана аны капаланткысы келбегендиктен, бузуктук кылуудан баш тарткан (Башт. 39:9). Биз да Жахаба менен ынак болуш үчүн андан тиленгенге жана анын Сөзүн изилдегенге убакыт табышыбыз керек. Ошентсек, аны менен болгон достугубуз чыңдалат. Жахаба менен болгон мамилебиз Жусуптукундай бекем болсо, ага жакпаган иштерди кылуу оюбузга да келбейт (Жкп. 4:8).

15. Ысрайылдыктардан кандай сабак алсак болот? (Еврейлер 3:12).

¹⁵ Жахабанын тирүү Кудай экенин эсинде бек сактабагандар андан оңой эле алыстап кетишет. Ысрайылдыктар чөл кезип жүргөндө эмне болгонуна көңүл буралы. Алар Жахабанын бар экенине ишенишкен. Бирок аларга кам көрөрүнөн шектене башташкан. Атүгүл: «Арабызда Жахаба барбы же жокпу?» — деп сурашкан (Чыг. 17:2, 7). Ошентип, Жахабага каршы чыгышкан. Ооба, биз аларды туурагыбыз келбейт. (Окугула: Еврейлер 3:12.)

16. Ишенимибиз эмнеден улам сыналышы мүмкүн?

¹⁶ Бул дүйнөнүн айынан Жахаба менен болгон мамилени ынак сакташ кыйынга турат. Көптөр Кудайдын бар экенине ишенбейт. Кудайдын айткандарын аткарбагандардын жашоосу гүлдөп жаткандай сезилет. Муну көргөндө ишенимибиз сыналышы мүмкүн. Кудайдын бар экенине ишенсек да, анын бизге жардам береринен шектене башташыбыз ыктымал. 73-забурду жазган киши да так ушундай сезимде болгон. Ал башкалардын Кудайдын мыйзамдарын көз жаздымында калтырып жатканын, ошентсе да жыргап-куунап жашап жатканын көргөн. Ошонун айынан: «Кудайга кызмат кылуунун пайдасы барбы?» — деп ойлоно баштаган (Заб. 73:11—13).

17. Жахаба менен болгон мамилебизди бекем сактаганга эмне жардам берет?

¹⁷ Забурчуга кайрадан туура көз карашта болгонго эмне жардам берген? Ал Жахабаны унутуп койгондордун эмне болору жөнүндө ойлонгон (Заб. 73:18, 19, 27). Ошондой эле Кудайга кызмат кылуунун натыйжасы жөнүндө да ой калчаган (Заб. 73:24). Биз да Жахабанын бизге төккөн баталары жөнүндө ой жүгүртө алабыз. Ага кызмат кылбасак, жашообуздун кандай болмоктугун да элестетсек болот. Жахабага кызмат кылганыбыздын пайдасы жөнүндө ой жүгүрткөнүбүз ага ишенимдүү бойдон калууга жардам берет. Ошондо забурчудай болуп: «Мага болсо Кудайга жакындаган жакшы»,— деп айта алабыз (Заб. 73:28).

18. Эмне үчүн келечекти ойлоп коркпой эле койсок болот?

¹⁸ «Тирүү, чыныгы Кудайдын кулдары» болгондуктан, азыркы акыркы күндөрдө кандай кыйынчылыкка кабылбайлы, коркпойбуз (1 Тес 1:9). Биз жагдайыбызды жакшы билген, дайыма жардам берген «тирүү Кудайга» кызмат кылабыз. Ал байыркы учурдагы кызматчыларын таштаган эмес, бизди да таштабайт. Жакында жер бетинде эч качан болбогон алаамат болот. Бирок ал учурда биз жалгыз болбойбуз, Жахаба биз менен болот! (Ыш 41:10). Келгиле, баарыбыз тең: «Жахаба менин жардамчым, мен коркпойм»,— деп кайраттуулук менен айталы (Евр. 13:5, 6).