APENDIKS
Iesu Keriso—E Gwauhamatalaia Mesiana
MESIA baita dibaia totona, Iehova Dirava ese peroveta taudia e hasiahudia, Baibul ai Hahemauri Tauna ena vara, ena hesiai ḡaukara bona ena mase bae perovetalai. Unu peroveta herevadia iboudiai na Iesu Keriso enai e ḡuḡuru. Idia na e herevalai ḡoevaḡoeva bona herevadia na mamaoro. Una baita hamomokania totona, Mesia ena vara bona maraḡinai e vara ḡaudia e perovetalai herevadia haida mani aita lalodia.
Peroveta tauna Isaia na e gwa Mesia na Pavapava David tubuna ta. (Isaia 9:7) Momokani, Iesu na David ena bese amo e vara.—Mataio 1:1, 6-17.
Dirava ena peroveta tauna ma ta, Mika na e gwa ia na pavapava ta ai bainela bona “Betelehem Efrata” ai baine vara. (Mika 5:2) Iesu e vara negana ai, Israel ai taoni rua ladadia na Betelehem. Ta be Nasaret badinai, not kahanai, bona ma ta be Ierusalem badinai, Iuda ai. Ierusalem badina taonina Betelehem na guna e gwauraiava Efrata. Iesu na una taoni ai e vara, peroveta herevana heḡereḡerena!—Mataio 2:1.
Baibul ena peroveta herevana ma ta na e gwa, Dirava Natuna na “Aigupto amo” bae boiria lasi. Iesu maraḡinai na Aigupto e laohaia. Herod e mase murinai Aigupto amo e lou ela ena hanua korikori, unu amo peroveta herevana e ḡuḡuru.—Hosea 11:1; Mataio 2:15.
“Mesia E Perovetalaia Herevadia” listina ai, “Peroveta Herevana” henunai e hetore siridia na Mesia e herevalaia. Mani emu kara unu siri bona sinado ladana “E Ḡuḡuru” henunai e hetore siridia ba haheḡereḡeredia. Unu bo kara tomamu neganai, bo abia daemu Dirava ena Hereva na momokani.
Ini siri o duahidiamu neganai, ba helalotao e perovetalai herevadia na laḡani handred momo gunadiai, Iesu do se vara neganai, e tore. Iesu na e gwa: “Mose bona peroveta taudia edia buka ai bona salamo ai lau sivaraigu e tore herevadia iboudiai vada bae momokani.” (Luka 24:44) Emu Baibul ai o itaiamu heḡereḡerena, e perovetalai herevadia iboudiai na e ḡuḡuru vaitani!