Fandaharana Amin’ny Fivoriana Momba ny Fanompoana
FANAMARIHANA: Hisy fandaharana ho an’ny Fivoriana Momba ny Fanompoana isan-kerinandro ato amin’Ny Fanompoantsika Ilay Fanjakana volana Aogositra. Mety hanao fanitsiana ny kongregasiona, raha ilaina izany, mba hahafahana hanatrika ny Fivoriamben’ny Distrika “Mpankatò ny Tenin’Andriamanitra”. Raha mety, dia ampiasao ny 15 minitra amin’ny Fivoriana Momba ny Fanompoana farany, alohan’ny hanatrehana ny fivoriambe, mba hijerena indray torohevitra mivantana tsara avy ao amin’ny takelaka fanampiny amin’Ny Fanompoantsika Ilay Fanjakana volana May. Ampirisiho ny tsirairay haka minitra vitsivitsy mba hijerena ilay fandaharana vita pirinty, alohan’ny hanombohan’ny fandaharana amin’ny maraina sy ny tolakandro, ka hieritreritra mialoha izay mety horesahina. Izany dia hanamora ny fifantohana amin’ilay fandaharana, sy ny fandraisana an-tsoratra fohy, nefa misy heviny. Tapa-bolana na iray volana aorian’ny fivoriambe, dia tokony hisy famerenana ireo hevi-dehibe tamin’ny fandaharana, haharitra 30 minitra, amin’ny Fivoriana Momba ny Fanompoana. Amin’izay, dia ho vonona ny tsirairay mba hanome an-tsitrapo valin-teny fohy, rehefa hasain’ny rahalahy mahay telo, izay hanao io anjara io, hanao izany. Ny valin-teny toy izany dia mety hampiseho ny ifandraisan’izay nianarana tany amin’ny fivoriambe amin’ny fiainan’ny tena manokana sy eny amin’ny saha fanompoana. Mety hisy fitantarana fohy voafantina iray na roa horesahina. Ny fanomanana tsara avy amin’ny rehetra no fanalahidy mahatonga an’io Fivoriana Momba ny Fanompoana io hahaliana sy hahitana fianarana.
Herinandron’ny 14 Aogositra
12 min: Fampandrenesana eo an-toerana. Fampandrenesana nofantenana avy ato amin’Ny Fanompoantsika Ilay Fanjakana. Asio firesahana ny tatitra momba ny fanompoana tamin’ny Aprily teto amin’ny nosy sy tao amin’ny kongregasiona eo an-toerana. Faran’ny herinandro roa sisa tavela amin’ny volana Aogositra, ka ampirisiho ny rehetra handray anjara amin’ny fanompoana, alohan’ny hifaranan’ny volana. Diniho ny fandaharan’ny fivoriana ho amin’ny fanompoana eny amin’ny saha, hatao amin’ny faran’ny herinandro.
15 min: “Miadia ny Ady Tsaran’ny Finoana”. Fero tsy hihoatra ny iray minitra ny teny fampidirana, ary araho fiaraha-midinika amin’ny alalan’ny fanontaniana sy valiny. Asao ny mpanatrika hilaza fanazavana fanampiny avy ao amin’ny boky Ny Fanompoantsika, pejy 43-45, ny amin’ny fomba andaminan’ny mpitarika ny Fianarana ny Bokin’ny Kongregasiona ny asa fanompoana ho an’ireo miara-mianatra boky aminy, sy ny amin’ny fomba anehoany fiheverana an’izay rehetra mila fanampiana manokana mba handraisana anjara amin’ny fanompoana, ka hamerenany tatitra momba ny fanompoana tsy tapaka.
18 min: Ny Fomba Ahafahanao Mandray Soa Amin’ny Fandehanana any An-tsekoly. Ray iray miresaka amin’ny zanany mba hanampiana azy ireo hahatakatra fa mahasoa ny fianarana any an-tsekoly. (Jereo ny boky Manontany ny Tanora, pejy 133-139.) Tanora maro no mahatsapa fa tena sarotra ny mankany an-tsekoly, eto amin’ity tontolo tsy tan-dalàna ankehitriny ity. Mahatsiaro ho sorisorena koa izy ireo, ka manatsoaka hevitra fa izay ianarany dia tsy hahasoa firy. Resahin’ilay raim-pianakaviana ireo foto-pitsipika araka ny Soratra Masina sy ny antony marim-pototra maha fahendrena ny hanovozana fianarana ampy tsara. Mampirisika ny zanany mba hianatra tsara sy hihaino tsara any am-pianarana izy.
Herinandron’ny 21 Aogositra
12 min: Fampandrenesana eo an-toerana. Tatitra momba ny kaonty. Manaova fampisehoana nanaovana famerenana tsara, mba hampisehoana ny fomba hamaliana ilay fanontaniana hoe: “Nahoana moa ny Andriamanitra fitiavana iray no hamela ny fijaliana hitohy ela be toy izao?” (Boky Fanjohian-kevitra, pejy 231-232). Ampirisiho ny rehetra handray anjara amin’ny fanompoana amin’izao faran’ny herinandro izao.
8 min: “Fandaharana Vaovaon’ny Fivoriambe Manokana Iray Andro”. Lahateny. Lazao ny datin’ny fivoriambe manokana manaraka, raha fantatra, ary ampirisiho ny rehetra hanatrika amin’ny andro manontolo. Ampirisiho ny mpitory hanasa ireo olona liana vao haingana sy ny olona ampianariny Baiboly.
25 min: “Mandray Soa ve ny Tenanao?” Fanontaniana sy valiny.
Herinandron’ny 28 Aogositra
10 min: Fampandrenesana eo an-toerana. Ampahatsiahivo ny rehetra hamerina ny tatitra momba ny fanompoany tamin’ny Aogositra. Tokony hanontany ny tsirairay amin’ireo miara-mianatra boky aminy ny mpitarika ny Fianarana ny Bokin’ny Kongregasiona, mba ho voarakitra an-tsoratra amin’ny 6 Septambra, fara fahelany, ny tatitra rehetra.
15 min: Zavatra ilaina eo an-toerana.
20 min: “Mitondra Soa ho An’ny Tanora Ireo Fivoriana”. Fiaraha-midinika amin’ny alalan’ny fanontaniana sy valiny, tarihin’ny loholona iray. Rehefa mandinika ny fehintsoratra faha-8, dia jereo ny zavatra sasany azo ampiharina, izay ahafahana mifantoka sy mihaino tsara kokoa, mandritra ny fivoriana. (Jereo ny Mifohaza! 8 Oktobra 1998, pejy 11-13.) Ampirisiho ny ray aman-dreny mba ho hentitra ny amin’ny hanatrehan’ny zanany tsy tapaka ny fivoriana rehetra. — Jereo ny fitantarana ao amin’Ny Tilikambo Fiambenana 1 Septambra 1997, pejy 25.
Herinandron’ny 4 Septambra
15 min: Fampandrenesana eo an-toerana. Valin’ny Fanontanianareo. Manasà mpitory hitantara ny zavatra hitany, rehefa nanao fitoriana tsy ara-potoana, fony nankany amin’ny fivoriamben’ny distrika izy ireo, nandritra ny fivoriambe, na niverina avy tany.
10 min: Manokana ny Fotoana Iainantsika. Lahateny ataon’ny loholona iray, miorina amin’Ny Tilikambo Fiambenana 15 Novambra 1996, pejy 22-23.
20 min: “Miaritra ve Ianao?” Lahateny sy fiaraha-midinika amin’ny mpanatrika. Ampirisiho ny rehetra mba hisaintsaina ny amin’ny fahombiazan’ny tenany manokana eo amin’ny fanehoana fiaretana eo amin’ny fanompoana kristianina. Raha manjary misy fahalemena miseho, dia ilaina ny manatanja-tena ara-panahy. Mampidira fanazavana avy ao amin’Ny Tilikambo Fiambenana 1 Oktobra 1999, pejy 20-21, fehintsoratra 17-21. Manasà mpitory roa na telo, izay efa niaritra tamim-pahatokiana hatramin’ny taona maro, hitantara izay ataony mba haharetana.