Epesõs
6 Ajri ro, kom̦win pokake jememi im jinemi ekkar ñan ankilaan Irooj kõnke men in ejim̦we. 2 “Kwõn kautiej jem̦am̦ im jinõm̦.” Eñin ej kien eo jinointata me ear wõr juon kallim̦ur ear ekkejell̦o̦k ippãn. Eñin kallim̦ur eo: 3 “Im enaaj em̦m̦an am̦ mour,* im enaaj to am̦ mour ioon lal̦ in.” 4 Kom̦ ro jemãer, kom̦win jab kainepataik ro nejimi, ak kom̦win kõkkaajiririik er ilo kauwe im kõn naanin kakapilõk* ko an Jeova.*
5 Kom̦ ri-karejar* ro, kom̦win pokake irooj ro ami* kõn mijak im wũdiddid, im kom̦win kõm̦m̦ane men in kõn aolepen bũruomi, ãinwõt ami kõm̦m̦ane ñan Christ, 6 im en jab ilo iien ko wõt kom̦ij pãd im̦aan mejãer ñan kabuñbũruon armej, bõtab ãinwõt ri-karejar ro an Christ, kom̦win kõm̦anm̦an ankilaan Anij kõn aolepen bũruomi im ami kajoor. 7 Kom̦win karejar ilo m̦õn̦õn̦õ ãinwõt ñe kom̦ij kõm̦m̦ane ñan Jeova* im jab ñan armej, 8 bwe kom̦ jel̦ã bwe jabdewõt men eo em̦m̦an kajjojo armej ej kõm̦m̦ane, Jeova* enaaj n̦aon̦ããn, jekdo̦o̦n ñe ej juon ri-karejar ak juon ri-anemkwõj. 9 Bareinwõt, kom̦ irooj ran̦, kom̦win bar kõm̦m̦an ãindein ñan ri-karejar ro ami im jab kalõl̦ño̦ñ er, kõnke kom̦ jel̦ã bwe Irooj eo aer kab eo ami ej pãd ilañ, im ejjel̦o̦k kalijekl̦o̦k ippãn.
10 Ãliktata, kom̦win wõnm̦aanl̦o̦k wõt im bõk ami kajoor ilo ami juon wõt ippãn Irooj kõnke kajoor eo an ekanooj in l̦ap. 11 Kom̦win kõn̦ak aolep kein tarin̦ae ko jãn Anij bwe kom̦win maroñ jutak pen im jum̦ae jerbal ko retao* an Tepil̦ eo, 12 kõnke ewõr juon eotaak jej pãd ie, ejjab n̦ae bõtõktõk im kanniõk, bõtab jej eotaak n̦ae kien ko, n̦ae ro ewõr aer maroñ, n̦ae ri-tõl ro an lal̦ in emarok, aet, n̦ae jetõb ko rettoon* ijoko ilañ. 13 Eñin unin kom̦win kõn̦ak aolep kein tarin̦ae ko jãn Anij, kõnke ãlikin an dedel̦o̦k ami kõpooj men kein otemjej, kom̦win maroñ kajoor wõt ilo raan eo enana im jutak wõt pen.
14 Kõn men in, kom̦win jutak pen ilo ami kañũrñũr ipimi kõn kañũr in m̦ool, im kõn̦ak wãnõk ãinwõt juon penjãn ob, 15 im kõn̦ak juuj ko ami bwe kom̦win pojakin kwal̦o̦k kõn ennaan eo em̦m̦an kõn aenõm̦m̦an. 16 Im ippãn men kein aolep, kom̦win bareinwõt bõk tõmak ãinwõt juon kein tõrak eo el̦ap, eo enaaj kõm̦m̦an bwe kom̦win maroñ kune aolep m̦ade kijeek* ko an ri-nana eo. 17 Bareinwõt, kom̦win kõn̦ak lo̦mo̦o̦r ãinwõt juon el̦mõt, im bõk jãje eo kar lewaj ikijjeen jetõb kwõjarjar,* mel̦el̦ein naanin Anij. 18 Im kõn aolep wãween jar im kõn akwel̦ap, kom̦win wõnm̦aanl̦o̦k wõt im jar iien otemjej ikijjeen jetõb kwõjarjar.* Im ñan jem̦l̦o̦kin, kom̦win ekkõl wõt im kom̦win ekkeini ami jar kõn ro rekkwõjarjar. 19 Bareinwõt, jar kõn ña bwe en letok naan ko ñan ña ñe ij kõnono, bwe in maroñ kõnnaan ilo peran ñe ij kwal̦o̦k kõn men eo ettino im eokkwõjarjar kõn ennaan eo em̦m̦an, 20 eo ij kwal̦o̦k kake ãinwõt juon rũkkõnono an Anij meñe em̦õj lukwõj eõ kõn jeen, im bwe in maroñ kõnnaan kake ilo peran ilo wãween eo ekkar bwe in kõm̦m̦ane.
21 Kiiõ, bwe kom̦win jel̦ã kõn ña im ekõjkan aõ pãd, Tikikõs, eo ej juon jeid im jatid ejitõnbõro im ri-kwal̦o̦k etiljek ilo Irooj, enaaj kwal̦o̦k men otemjej ñan kom̦. 22 Unin aõ jilkinwaj e ñan ippemi ej bwe en kõnnaanek kom̦ kõn wãween ammim mour, im bwe en maroñ kaenõm̦m̦an bũruomi.
23 Aenõm̦m̦an im yokwe ekoba tõmak jãn Anij Jemãd im jãn Irooj Jesus Christ en pãd ippemi ro jeim im jatim. 24 Jouj eo ekanooj l̦ap en pãd ippãn ro yokwe eo aer ñan ad Irooj Jesus Christ ej ñan indeeo.