I la ogranization kamiliʼa, misi too boʼo ana ta toʼa gwauṉaʼi na keki kwaiadomi ura fulatoʼona lana usi la. E ʼuria laʼu boʼo asi maṉa na figuteʼe Kristin e thafali, toʼa na kera farana kera filida ura “thai leʼa la sulia figua tha God.” (Acts 20:28) Toʼa nanaʼo eki [elder] kera kwaimani leʼa bia tha Jehovah. Kera keka talaia figuteʼe Kristin ki bia keka thai leʼa sulia sifsif tha God ki. E aʼi kesi suʼuṉai kera ura ili lana si raa eri i naʼofana tha God mado keka thathamia ta usi la. Kera ili una eri sulaʼania kera kwaialami ura kwaiadomi la. (1 Peter 5:1-3) Kwaiadomia ʼufita ki na kera ilia i femiliʼa?

Kera thai leʼa bia keka fonotoʼi suʼusi kamiliʼa. Toʼa nanaʼo eki kera arutoʼona Baebol ura adomi lana figuteʼe Kristin ura kwaimani leʼa la bia tha Jehovah. Sulaʼania kera thaitoʼomana tha God e takwefale kera asi raa gwauṉaʼi eri, kera kesi inoto ana figua tha God, ma keka kwaiadomi ura faʼasukwai lana fitoʼoa kamiliʼa bia mika seʼethathala. (2 Corinth 1:24) Toʼa nanaʼo eki kera ili uria keki thaitoʼomana leʼa imole eki sui boʼo i la figuteʼe Kristin eri, malaʼana wane ne thai leʼa sulia sifsif ki.—Proverbs 27:23.

Kera toʼoa i semiliʼa ili lana thathami la tha God. I la uiki ni sui boʼo, toʼa nanaʼo eki na kera tatha i naʼo ana toʼodo la i la ofu la kamiliʼa ki ura faʼasukwai lana fitoʼoa kamiliʼa. (Acts 15:32) Toʼa eki na kera fale kera teʼefau ura ili lana si raa eri keka tatha laʼu boʼo i naʼo ana raa ura ṉata la sulia si faʼaroṉoa leʼa. Kera raa ofu bi kamiliʼa bia keka fatania ili leʼa la ana si raa eri.

Kera faʼasukwai kamiliʼa sui boʼo. Fasia keka adomi kamiliʼa ura faʼasukwai lana kwaimania kamiliʼa bia tha Jehovah, toʼa nanaʼo eki keki fula i semiliʼa i maʼafera kamiliʼa ki mado keka uʼunu bi kamiliʼa i la Kingdom Hall. Kera arutoʼona Baebol ura kwaiadomi la bia faʼainomaruki lamaliʼa la.—James 5:14, 15.

Doʼanita keka raa baita ura adomi lana figuteʼe Kristin, baita lana toʼa nanaʼo eki keka too laʼu boʼo ana si raa ki ura malefo bia ili lana raa i la toaa kera ki ne atoia laʼu boʼo fale lana si maṉa kera ki uria. Adelana boʼo ka talaʼana asia naʼa ura kuki farebaita ana doʼora eki na kera raa taliṉaʼi.—1 Thessalonica 5:12, 13.

• Ṉa taa ni boʼo na raa toʼa nanaʼo ki ana figuteʼe Kristin?

• Toʼa nanaʼo eki kera adomi ʼufita ani kamiliʼa?

Baebol e uʼunu sulia roo figuteʼe wane ni raa ki na kera too ura thai la sulia raa ki la i la figuteʼe Kristin ki. Roo figuteʼe wane eki na “ṉa toʼa nanaʼo ki [elder] bia ṉa wane ni raa ki [ministerial servant].” (Philippi 1:1) I la tei figuteʼe Kristin ki e too ana tei wane una eki. Raa ʼufita ki boʼo na wane ni raa ki kera ilia ura adomi lamaliʼa la?

Kera adomia toʼa nanaʼo ki. Wane ni raa eki kera kwaimani leʼa bia tha Jehovah. Ni kera wane ni manataṉado la anida bia keka raa taliṉaʼi. Tei wane iada keka biʼi baita ma tei wane keka araʼi naʼa. Kera thai sulia si raa oro gwauṉaʼi ki na kai adomia figuteʼe Kristin bia teisi raa ki laʼu ura beta la sulia Kingdom Hall. Kwaiadomia kera ki e falea si tatha la i fana toʼa nanaʼo eki ura manata gwauṉaʼi la sulia toʼodo la bia thai leʼa la sulia sifsif tha God ki.

Kera ilia si raa gwauṉaʼi ki. Kera takwefalea tei wane ni raa ki ura thathagoni lana imole ki na keki fula mai i la ofu la ki. Tei wane iada keka takwefale kera ura lio la sulia do ni arutoʼona lana ura ṉata la iei, buka ki, si malefo ne lae mai fasia kwaiadomia kera figuteʼe Kristin, bia keka kwaiadomi ura olotoʼona lana tafoloa na bare waidoʼorana i la figuteʼe Kristin keki uʼunu sulia si faʼaroṉoa leʼa iei. Keka kwaiadomi laʼu boʼo ura beta la sulia Kingdom Hall. Mado toʼa nanaʼo ki keki gani kera ura adomi lana waidoʼorana ki na araʼia e fulatoʼoda. Kwaialami la ana ili lana tesi raa bana na kera takwefaleda ania, e adea waidoʼorana ki i la figuteʼe Kristin keka farebaita ani kera.—1 Timothy 3:13.

Kera fatania si biraṉaa leʼa ki. Kera filia wane ni raa eki sulaʼania kera fatania kera kwaimani leʼa bia tha God. Ṉataa ki na kera faledaki i la ofu la kamiliʼa ki e faʼasukwaia fitoʼoa kamiliʼa. Asi maṉa na kera sukwai ura tatha la i naʼo ana ṉata la sulia si faʼaroṉoa leʼa, si do eri ka faʼasukwai kamiliʼa laʼu boʼo. Sulaʼania na kera raa ofu bia toʼa nanaʼo ki, si abula la eri e adomia bare waidoʼorana keka seʼethathala bia keka too ana teʼesi manataleʼedo. (Ephesus 4:16) Lalae ni kera keka farana laʼu boʼo ura keki tataʼe mai ura keki toʼa nanaʼo.

• Toʼa ʼufita ki na wane ni raa ki?

• I la figuteʼe Kristin, wane ni raa ki kera kwaiadomi leʼa ʼufita iei?

Si maṉa oro, Greek Skrifsa ki e uʼunu sulia tha Barnabas bia tha aposol Paul. Wane eki kera raa mala circuit overseer ki ura fulatoʼona lana figuteʼe Kristin baaki i naʼo. Uria taa na keka ilia si do eri? Sulaʼania kera manata baita ana toolana bare waidoʼorana ki na kera too ana teʼe faʼamamane la. Tha aposol Paul e soreʼa, ni nia e thathamiʼi “oli ura fulatoʼona lana waidoʼorana ki” bia kai rikia toolada. Nia ka kwaialami ura lae la sulia talaṉeʼe kilomita oro ura faʼasukwai lana doʼora eki. (Acts 15:36) I taraʼena circuit overseer ki mena kera abula una eri laʼu boʼo.

Kera lae mai ura faʼasukwai lamaliʼa la. Teʼe circuit overseer kai lae ura fulatoʼona lana figuteʼe Kristin ki. Ni nia kai raa bia figuteʼe Kristin eki roo si maṉa i la teʼefa ṉali. Nia kai raa bia teʼe figuteʼe Kristin sulia teʼe uiki. Kamiliʼa miki fulatoʼona kwaiadomia baita fasia doʼora eki bia kwaida masa keka foli kini. Kera ili uria keki thaitoʼomamaliʼa sui bana. Keka thathamia asia naʼa ura raa la bi kamiliʼa ura ṉata la sulia si faʼaroṉoa leʼa bia toʼo lana Baebol i sana imole ki. Keka lae bia toʼa nanaʼo ki ura thai la sulia sifsif tha God ki, bia keka falea ṉataa ki i la figuteʼe Kristin bia asi maṉa ana ofu la baita ki na kai faʼasukwai kamiliʼa.—Acts 15:35.

Kera onotoʼomaliʼa sui bana. Keka thathamia asia naʼa ura keki faʼasukwaia figuteʼe Kristin ki ura kwaimani leʼa la bia tha Jehovah. Keka ofu bia toʼa nanaʼo ki ma wane ni raa ki ura uʼunu la kalia raa ki na kera ilia i la figuteʼe Kristin bia fale lana si baʼea ni kwaiadomi la i fada ura ili leʼa la ana raa ki na kera takwefale kera ania. Keka adomia pioneer ki fasia keki sitatha ana ṉata la sulia si faʼaroṉoa leʼa. Keka thathamia ura keki thaitoʼomana leʼa ana imole ki na kera thafali kwairoʼomi bia figuteʼe Kristin ma kwaimania kera bia tha God. Circuit overseer eki sui boʼo kera kwaialami ura raa ofu la bi kamiliʼa ura adomi lamaliʼa la. (2 Corinth 8:23) Fuliṉana sa kuki lae sulia fitoʼoa na kera too ania i fana tha God.—Hebrew 13:7.

• Uria taa ni boʼo na circuit overseer ki keka lae ura fulatoʼona lana figuteʼe Kristin ki?

• Si taa na oki ilia fasia oko fulatoʼona kwaiadomia fasi kera?

Si maṉa na afetaʼia e toʼo, Jehovah’s Witness Ki kera eliʼeli keka abula bonaʼa ura adomi lana bare waidoʼorana na ṉa afetaʼia e toʼe kera. Si abula la eri e fatania liothaua mamana na kera too ania i fada kwailiu. (John 13:34, 35; 1 John 3:17, 18) Kwaiadomi la ʼufita ki na miki kwaiadomi ania?

Mili kwaiadomi bali ana malefo. Asi maṉa teʼe uniʼi thaofaa baita e tatha i Judea, Kristin baaki i naʼo i Antioch kera falea si malefo ura adomi lana Kristin eki i Judea. (Acts 11:27-30) Ni kamiliʼa mena, asi maṉa na mili roṉoa afetaʼia e toʼea waidoʼorana ki ana teisi kula ki i la fanua nei iano, mika falea kwaiadomia i la figuteʼe Kristin fasia keka falea i fana doʼora eki na kera atoʼia kwaiadomia.—2 Corinth 8:13-15.

Mili ilia teisi do ura kwaiadomi la. Toʼa nanaʼo ki na kera too i la tafoloa na afetaʼia e toʼo iei, keki fula i sana doʼora eki sui bana i la figuteʼe Kristin ki i la tafoloa eri masa keka too teʼefau bada bia tesi do e aʼi si labataʼi kera. Mado teʼe komiti kai ʼolosia kwaiadomia na keki falea mala faṉa, kafo ni kuʼu, maku, kula ni too la, bia meresina. Witness oro ki na kera maʼalutai leʼa ana raa ki kera kwaialami ura usi lana lae lada i talaʼada ura kwaiadomi la mado thauṉaʼi lana fera ki bia Kingdom Hall ki ne oge. Teʼesi manataleʼedo bia raa ofu la na mili too ania e adomi kamiliʼa ura miki abula eliʼeli ura ʼolosi lana kwaiadomia asi maṉa ana kwaiatoʼi la. Doanita mika fale aba mena i fana “imole ki na mili too ana teʼe faʼamamane la,” asi maṉa ne talaʼana miki adomia laʼu boʼo tei imole ki ana toʼodoa eʼeta ki.—Galatia 6:10.

Mili arutoʼona Baebol ura adomi lana imole ki. Imole ki na afetaʼia e toʼeda, kera atoʼia ura keki faʼainomaruki kera. Si maṉa una eki mika fulatoʼona sukwaia fasia tha Jehovah, God ana inomaruki la. (2 Corinth 1:3, 4) Mili seʼethathala ura uʼunu la sulia alaṉaʼia tha God ki i sana imole ki na kesi too bonaʼa ana manatatoʼoṉadoa, ma mika uʼunutania i sada e kwaikaraṉi naʼa ura Inotoa tha God kai faʼadaṉaa taʼa la ki sui bana ne falea fiila i fana imole ki.—Revelation 21:4.

• Uria taa na Jehovah’s Witness Ki keka thaitoʼomana abula eliʼeli la asi maṉa na afetaʼia e toʼo?

• Kwaiadomia ʼufita fasia Baebol na miki adomia ana imole ki na afetaʼia e toʼeda?

Si maṉa ne kwaikarafi naʼa ura tha Jesus kai mae, nia ka uʼunu bia fai aposol nia ki talifili kera. Tha Peter, James, John, bia tha Andrew. Si maṉa tha Jesus e faʼaroṉo kera ana baala si maṉa na kai too i la fa thato iʼisi ki, nia ka fusia teʼe soetoʼona la gwauṉaʼi: “Ni tei boʼo na wane ni raa eri ne mamana ma liona e toʼo, na wane inoto nia e filia ura kai liosulia tei wane ni raa ki laʼu bia kai falea si faṉa kera asi maṉa ne talaʼana?” (Matthew 24:3, 45; Mark 13:3, 4) Tha Jesus e faʼaroṉoa toʼa nia ne toleda, i la fa thato iʼisi ki, ni nia kai filia teʼe figuteʼe wane na keki falea si faṉa ura adomi lana maṉoedo i fana toʼa na kera lae i buriana. Toʼa ʼufita ki boʼo na kera too i la figuteʼe wane ni raa eri natha Jesus e filida?

Teʼe figuteʼe wane na kera lae i buriana tha Jesus natha God e gwaida. “Wane ni raa” eri na ṉa Figuteʼe Wane Nanaʼo Ana Organization [Governing Body] Jehovah’s Witness Ki. Kera falea si faṉa ana maṉoʼedo i fana imole ki na kera faʼabaitaa tha Jehovah asi maṉa na kera atoʼia. Mili lio bonaʼa ura figuteʼe wane eri na kera mamana fafia fale lana i femiliʼa ‘si faṉa i la si maṉa ne talaʼana.’—Luke 12:42.

Figuteʼe wane eri na kera thai sulia bareʼe wela tha God. (1 Timothy 3:15) Tha Jesus e takwefalea figuteʼe wane eri ura ʼolosi lana raa baita ki i la organization eri tha Jehovah i la baliʼi kula ne too i fanua nei iano. Keka liosulia si do ki sui bana na organization eri e too ania, talai lana raa ura ṉata la sulia si faʼaroṉoa leʼa, bia keka arutoʼona figuteʼe Kristin ura toʼodo la i semiliʼa. “Wane ni raa eri ne mamana ma liona e toʼo” e falea si faṉa ana maṉoʼedo na mili atoʼia asi maṉa ne talaʼana. Mili fulatoʼona si faṉa eki ne falea mai fasia buka ki ma teisi do ki laʼu ne thauṉania na miki arutoʼona asi maṉa na miki ṉata sulia si faʼaroṉoa leʼa, bia i la ofu la figuteʼe Kristin ki ma i la ofu la baita kamiliʼa ki.

Ṉa wane ni raa eri e mamana fafia toʼo lana mamana la i la Baebol bia ṉata la sulia si faʼaroṉoa leʼa. Ni nia liona e toʼo sulaʼania e maʼalutania thai leʼa la sulia si do ki sui bana natha Christ e takwefale nia ania i fanua nei iano. (Acts 10:42) Imole oro kera lae mai ura faʼabaita lana tha Jehovah bia si faṉa ana maṉoedo ka oro mamana boʼo i nunufana tha Jehovah e alua mamanaa fafia raa na e ilia.—Isaiah 60:22; 65:13.

• Ni tei natha Jesus e filia ura kai tharea toʼa na kera lae i buriana ana si faṉa ura adomi lana maṉoʼedo?

• Si taa ni boʼo ne fatania wane ni raa eri e mamana fafia raa nia ma liona e toʼo?

I naʼo mai, teʼe figuteʼe wane ana “aposol ki bia toʼa nanaʼo ki i Jerusalem,” kera ilia raa mala figuteʼe wane nanaʼo ana organization [governing body]. Ni kera na keki thauṉaʼi mantaa sulia si do gwauṉaʼi ki i fana Kristin ki sui bana na ṉa spirit abu e gwaida. (Acts 15:2) I nunufana kera uʼunu kakalia taa na ṉa Baebol e soreʼa bia keka alabatania spirit tha God ka talai kera, keka ala ni leʼa la fafia manateʼedo na kera thaunaṉia fasia uʼunua kera ki. (Acts 15:25) I taraʼena mena si abula la eri e totoʼo bana.

Tha God e arutoʼoda ura ili lana thathami la nia. Waidoʼora eki na ṉa spirit abu e gwaida na kera too i la Figuteʼe Wane Nanaʼo Ana Organization [Governing Body], kera manata fifii ana Baʼelana tha God bia keka maʼalutaʼi leʼa ana ʼolosi lana raa kamiliʼa ki bia luʼu lana soetoʼona la ki sula bali ana faʼabaita la. I la uiki ni sui bana keki ofu ura uʼunu la kakalia kwaiatoʼia bare waidoʼorana ki i la fanua nei iano rerebaʼa. ʼUria laʼu boʼo i la si maṉa aposol ki, mili todaa si baʼea ni kwaiadomia ki fasia Baebol i la leta ki, fasia circuit overseer ki, bia tei toʼa ni raa kamiliʼa ki. Si abula la eri e adomia figua tha God keka too ana teʼesi manataleʼedo ura raa ofu la. (Acts 16:4, 5) Figuteʼe Wane Nanaʼo Ana Organization kera liosulia raa ura kwaimaʼakwali la ana si faṉa ura adomi lana maṉoʼedo. Keka faʼasukwai kamiliʼa sui boʼo ura manata fifii la ana ṉata la sulia si faʼaroṉoa leʼa, bia keka liosulia raa ura fili lana tei doʼora ura ili lana teisi raa ki.

Kera bosuli ana spirit abu tha God ura kai talai kera. Figuteʼe Wane Nanaʼo Ana Organization kera lio bonaʼa uria tha Jehovah ne Inoto ka tatha bia tha Jesus na ṉa Gwauna figuteʼe Kristin ura keki talai kera. (1 Corinth 11:3; Ephesus 5:23) Wane i talaʼana ana wane eki na kera ni i la figuteʼe wane eri, e aʼi si liofaʼi nia boʼo mala wane ne talaia figua tha God. Ni kera bia Kristin ki sui boʼo natha God e gwaida, kera ‘lae i buriana tha Jesus ura i fei bana ne lae uria.’ (Revelation 14:4) Figuteʼe wane eri kera manata baita asia naʼa ana foʼa la kulu ki uri kera bia raa na kera ilia.

• Ni tei kera na kera ni i la figuteʼe wane nanaʼo ana organization i la si maṉa aposol ki?

• I taraʼena, Figuteʼe Wane Nanaʼo Ana Organization kera lae ʼufita sulia kwaitalai lana tha God?

Bethel, si thateʼedo ana ṉata la i Hebrew, ne toʼolaṉania “Biu tha God.” (Genesis 28:17, 19, footnote) Si thateʼedo eri e talaʼana asia naʼa biu eki na ṉa Jehovah’s Witness Ki kera arutoʼona i la fanua nei iano ura ʼolosi lana bia adomi lana raa ura ṉata la sulia si faʼaroṉoa leʼa. Ṉa Figuteʼe Wane Nanaʼo Ana Organization kera raa mai i la Bethel i New York State, U.S.A. Bethel eri na gwauṉaʼi lana raa i la taleʼe branch ofis ki sui boʼo e lae mai fasia. Imole na kera raa i la taleʼe branch ofis eki kera alaṉi kera ana bareʼe waidoʼora i la Bethel. Kera too ofu bonaʼa mala ta bareʼe wela sulaʼania kera raa ofu, faṉa ofu, bia keka too ana teʼesi manataleʼedo ura toʼo lana Baebol.—Psalm 133:1.

Biu eri e talimate sulaʼania waidoʼora eki na kera too iei kera kwaialami ura ili lana tesi raa bana. Kristin ki na kera raa i la Bethel eki sui boʼo, kera fale kera teʼefa ura ili lana thathami la tha God bia ili lana raa i fana Inotoa si maṉa ki sui bana. (Matthew 6:33) Kera sui boʼo kera fulatoʼona si kula ni too la, faṉa, bia kasi kwaiadomia ura usi lana si do na kera atoʼia. Kera sui boʼo kera too ana si raa ki. Tei imole ki keka raa i la ofis, kisina, mado kula ni faṉa ofu la. Tei imole ki iada keka raa i la si kula ni thauṉaʼi buka la, beta lana kula ni too la ki, beta la sulia biu eki bia si do ki sui boʼo na keki arutoʼona iei, bia teisi raa ki laʼu.

Biu ni raa la ura adomi lana raa ura ṉata la sulia Inotoa. Manateʼedo ne too i buira gwauṉaʼi lana raa i la Bethel ki sui bana, kera thathamia imole oʼoro ka oro keki todaa mamana la ne too i lana Baebol. Malaʼana buka naʼi no arutoʼona. Figuteʼe Wane Nanaʼo Ana Organization ne liosulia raa ura thauṉaʼi lana buka naʼi. Keka arutoʼona internet ura keki falea i fana talaṉeʼe translesin timi oro ki kakalia fanua nei iano, sui keka falea ura i la Bethel ki ne too ana printer baita ni thauṉaʼi lana buka ki. E talua 110,000 figuteʼe Kristin ki keka todaa buka eki na kera falea mai i fada. Bare waidoʼora eki sui boʼo i la Bethel na kera kwaisafui ura adomi lana raa eri ura ṉata la sulia si faʼaroṉoa leʼa.—Mark 13:10.

• Imole ʼufita ki na kera raa i la Bethel, ma keka thai ʼufita suli kera?

• Raa gwauṉaʼi ʼufita ni boʼo na raa ki na kera ilia i la Bethel e adomia?

Imole eki na kera too i la Bethel kera ilia raa eʼeta kwailiu ura adomi lana raa ura ṉata la sulia si faʼaroṉoa leʼa i la teʼe kokomua mado tei kokomua ki. Tei imole ki keka raa i la translesin timi ki, printim lana magasin ki ma buka ki, beta lana ma ukali lana buka ki, thauṉaʼi lana video mado record la, mado lio la sulia tei raa ki laʼu i la aʼuʼua eri.

Branch Komiti ne liosulia raa eki. Figuteʼe Wane Nanaʼo Ana Organization kera takwefalea raa ki i la teʼe branch ofis i fana Branch Komiti ana branch eri. Teʼe komiti kai too ana ulu noniʼi wane mado ka talua. Toʼa nanaʼo na kera farana na keki too ana komiti eri. Komiti eri na kai uʼunu bia Figuteʼe Toʼa Nanaʼo sulia raa eki ne liosulia bia afetaʼia ki ne tataʼe mai i la fanu eri. Si abula la eri e adomia Figuteʼe Wane Nanaʼo Ana Organization ura thauṉaʼi manataa la sulia uʼunua taa ki ne talaʼana keki kedaa i la buka ki na keki thauṉania mai, bia uʼunu taa ki ne talaʼana keki uʼunu kakalia i la ofu la kera figuteʼe Kristin ki bia ofu la baita ki na kai tataʼe mai. Figuteʼe Wane Nanaʼo Ana Organization kai falea tei wane ki ura fula la i la branch ofis ki ura fale lana kwaiadomia i fana Branch Komiti ki ura ili lana raa kera ki. (Proverbs 11:14) Asi maṉa na ta wane iada e fula i la ta branch ofis, keki ʼolosia teʼe ofu la ura roṉo lana teʼe ṉataa fasi nia ura faʼasukwai lana bare waidoʼorana ki na kera too i la kokomua ki na branch eri e liosulia.

Kwaiadomia na kera falea i fana figuteʼe Kristin ki. Tei doʼora ki na kera raa i la branch ofis na keki alafafia masa ta figuteʼe Kristin kai thafali. Tei wane iada keka ʼolosia laʼu boʼo raa kera pioneer ki, missionary ki, bia circuit overseer ki i la kokomua ki na ṉa branch eri e liosulia. Keka ʼolosia ofu la baita ki, lio la sulia thauṉaʼi lana Kingdom Hall faalu ki, bia keka falea i fana figuteʼe Kristin ki, buka ki ma magasin ki na kera atoʼia. Raa eki sui boʼo na kera ilia i la branch, kera ilia ura ʼolosi lana bia adomi lana raa ura ṉata la sulia si faʼaroṉoa leʼa.—1 Corinth 14:33, 40.

• Raa ʼufita na Branch Komiti e ilia ura adomi lana Figuteʼe Wane Nanaʼo Ana Organization?

• Raa taa ki na branch ofis e thai sulia?

Karaṉia 700 ṉata la eʼeta ki na mili kedaa ana buka kamiliʼa ki na mili thauṉaʼi daki. Si abula la eri e adomi kamiliʼa ura faʼaroṉo tatalo la ana “si faʼaroṉoa leʼa” i sana “imole ana fanua ni sui bana, kwalafa ni sui bana, bia kuleʼe toʼa ana ṉata la eʼeta ni sui bana.” (Revelation 14:6) E adeʼufita na mika sitatha fafia ili lana si raa eri ne aʼi si kwaiakori? Sulaʼania toʼa ni keda lana buka kamiliʼa ki kera too i la fanua oro bia ni kera toʼa fasia fanua eʼeta kwailiu ki. Ni kera bia karaṉia 3,300 transleita ki na kera kwaiadomi ura ili lana si raa eri. Ma ni kera teʼefau kera Jehovah’s Witness Ki.

I totolenaʼo kera kedaa uʼunua eki ana English. Figuteʼe Wane Nanaʼo Ana Organization ne liosulia raa eri ura kekeda la. Raa eri e too gwauṉaʼi mai i la Bethel i United States. Si kula eri na keki ʼolosia raa ki i fana toʼa ni kekeda ki na kera raa i la Bethel eri, bia tei toʼa iada na kera raa i la tei branch eʼeta ki. Sulaʼania toʼa eki ni kekeda la kera lae mai fasia fanua eʼeta kwailiu ki, mika too ana si tatha la ura keda lana uʼunua ki ne adomia imole ki ana bibiraṉa eʼeta kwailiu ki, ma ka adea imole ki fasia kokomua oro eʼeta ki keka thathamia buka eki.

Uʼunua ki na kera kedaa kera falea i fana transleita ki. I buriana kera kokotoa bia keka alafafia uʼunua ki na kera kedaa, keka arutoʼona internet ura fale lana uʼunua eki i fana transleita ki kakalia fanua nei iano, fasia keka bulasia ura ṉata lada. Keka raa taliṉaʼi ura talisi lana si baʼea ana ṉata la kera ki ne fula fafia manateʼedo na kera kedaa ana English.—Ecclesiastes 12:10.

Computer ne adomia raa eri ka eliʼeli. E afetaʼi ura computer kai ilia raa toʼa ni kekeda la bia transleita ki. Mena ana, computer program ki na kera arutoʼona ne adomia raa kera ki ka eliʼeli. Jehovah’s Witness Ki kera thauṉania teʼe computer program na kera alaṉia ana Multilanguage Electronic Publishing System (MEPS). Program eri e adea ka kwaiakori ura keki bulasia uʼunua ki ura talaṉeʼe ṉata la oro eʼeta ki bia ofu lana si baʼea ki bia pikisa ki fasia ka kwaimaʼakwali ura printim lana.

Uria taa ni boʼo na mika raa fifii ana si raa eri, doʼanita tei ṉata la ki aṉeʼe toʼoni imole ki bana na kera ṉata ania? Sulaʼania tha Jehovah e thathamia “imole ni sui bana keki fulatoʼona marukia ma keki todaa thaitoʼomeʼedoa ne kokoto sulia mamana la.”—1 Timothy 2:3, 4.

• Raa ʼufita ki na mili ilia ura keda lana buka kamiliʼa ki?

• Uria taa na buka kamiliʼa ki mika bulasia ana ṉata la eʼeta oro ki?

I la fa ṉali ki sui bana, organization kamiliʼa e thauṉania bia ka falea talaṉeʼe moleʼe Baebol bia buka oro ki ne aʼi kesi kwalia boʼo. Mili thauṉania Kingdom Hall ki bia branch ofis ki ma mika betasulia biu eki. Mika adomia toʼoni bethelite ki, pioneer ki, bia missionary ki, ma mika kwaiadomi laʼu boʼo asi maṉa na afetaʼia ki e toʼo. Mado oko too ana soetoʼona la, ‘Malefo i fei na kera adomia ana raa eki?’

E aʼi misi takwe buira imole ki ura fale lana taeri, ofariṉi, bia ofu malefo la. Doanita si do oro ne adomia raa eri ura ṉata la sulia si faʼaroṉoa leʼa liu lana ka baita mena, e aʼi misi gania boʼo tesi malefo ura kwaiadomi la fasi tesi kula. Teʼe Wastaoa magasin na kera kedaa talua talaṉeʼe fa ṉali ne sui naʼa, e uʼunu sulia mili bosuli ana tha Jehovah ura adomi lana raa kamiliʼa, adelana boʼo misi “gania boʼo ta imole ura ta kwaiadomia.” Ma misi ililia u boʼo si do eri!—Matthew 10:8.

Kwaiadomia na imole ki kera kwaialami ura fale lana ne adomia raa kamiliʼa ki. Imole oro na kera manatabaita ana raa na mili ilia ura toʼo lana Baebol, na kera falea kwaiadomia ura adomi lana raa eri. Witness ki i talaʼada, kera seʼethathala asia naʼa ura fale lana si maṉa kera ki, sukwaia kera ki, si malefo, bia teisi do ni arutoʼona lana ura ili lana thathami la tha God i la fanua nei iano rerebaʼa. (1 Chronicles 29:9) Masa ta imole ka thathami falea tesi kwaiadomia, i la Kingdom Hall, bia asi maṉa ana ofu la baita kamiliʼa ki, contribution box ki e too ura alu lana si kwaiadomia iei. Baita lana si maṉa, imole ki na e aʼi kesi rikiʼi do na kera falea si malefo ura kwaiadomi la. Kera ʼuria gwa ʼoru ba natha Jesus e uʼunu leʼa suli nia. Doʼanita ka aʼi si rikiʼi do mena, ni nia e falea si kwaiadomia ne lae mai fasia ruruʼuna. (Luke 21:1-4) Si abula la eri e fatania, imole i talaʼana naʼa na kai alua tesi malefo ura kwaiadomi la “malaʼana ne oltoʼona sui naʼa i ruruʼuna.”—1 Corinth 16:2; 2 Corinth 9:7.

Tei imole ki na kera thathamia ura keki ‘farebaita ana tha Jehovah kera falea si do leʼa ki na kera too ania i fana ura adomi lana raa ura ṉata la sulia Inotoa. Mili faʼamamanea tha Jehovah na kai baʼe i ruruʼuna imole ki ura adomi lana raa eri fasia ka fula fafia thathami la tha God.—Proverbs 3:9.

• Ṉa taa ne adea organization kamiliʼa ka eʼeta fasia toʼodoa ki?

• Organization kamiliʼa e arutoʼona ʼufita ana kwaiadomia ne fulatoʼona?

Si thateʼedo eri Kingdom Hall e lae bia Inotoa tha God na miki toʼodo gwauṉaʼi sulia i la biu eri. Ṉa Inotoa eri na ṉa gwauṉaʼi lana raa natha Jesus e ilia.—Luke 8:1.

Biu ni ofu la ki ura farebaita la ana tha God. Kingdom Hall ki na ṉa Jehovah’s Witness Ki keki ʼolosia raa kera ura ṉata la sulia Inotoa i la kade tafoloa na kera too iei. (Matthew 24:14) Kingdom Hall eki baita lada e aʼi si totoʼo ma thauṉaʼi eki ka eʼeta kwailiu. Biu eki sui boʼo mili thauṉaʼi marabibi ania, ma oro lana biu e talua teʼe figuteʼe Kristin na keki arutoʼona. I la fa ṉali ki ne biʼi tatha bokana, mili thauṉania toʼoni Kingdom Hall oro sulaʼania figuteʼe Kristin ki e tataʼe mai ka oro. Adeʼufita na raa eri ka kwaiakori?—Matthew 19:26.

Biu eki e takwe i nunufana kwaiadomia na kera fulatoʼona ura thauṉaʼi lana Kingdom Hall ki. Kera falea kwaiadomia eki ura i la branch ofis. Branch ofis ka kwaithathai asi malefo eri ura adomi lana ana ta figuteʼe Kristin ne atoʼia kasi lana ta Kingdom Hall mado thauṉaʼi seʼeleʼa la ana ta Kingdom Hall.

Toʼa na kera thauṉania Kingdom Hall eki kesi fulatoʼona boʼo ta usi la. I la fanua oro ki, kera too ana figuteʼe wane ki ni kasi lana Kingdom Hall. Figuteʼe wane eri bia tei imole ki na kera kwaialami ura kwaiadomi la, keki lae ura adomi lana figuteʼe Kristin ki i la fanua eri na kera too iei ura thauṉaʼi lana Kingdom Hall kera ki. Kera raa tesi kula sui keka lae ura tesi kula laʼu doʼanita teisi kula ki ka nidaa. I la tei fanua ki laʼu, kera filia tei Witness ki na kera farana, ura lio la sulia kasi lana bia thauṉaʼi seʼeleʼa la ana Kingdom Hall ki i la tafoloa na kera olotoʼona ura keki raa iei. Doʼanita toʼa na kera fadaa raa eri na kera thauṉania Kingdom Hall ki sui boʼo, oro lana imole ki na kera kwaiadomi, nia na ṉa bare waidoʼorana eki u boʼo na keki arutoʼona Kingdom Hall eri. Ṉa spirit abu tha Jehovah bia kwaiadomia ne lae mai fasia ruruʼi do leʼa na imole nia ki kera too ania ne adomia raa eri ka kwaiakori.—Psalm 127:1; Colossae 3:23.

• Uria taa na biu ni foʼa kamiliʼa ka too ana si thateʼedo eri Kingdom Hall?

• Si taa ni boʼo ne adea ka kwaiakori ura thauṉaʼi lana Kingdom Hall ki kakalia fanua nei iano?

Kera liofania thatana tha God ne abu bia Kingdom Hall kera Jehovah’s Witness Ki. Adelana boʼo, asi maṉa na mili kwaiadomi ura beta lana biu eki ura kai faalu bia riki lana kai talaʼana, mika manata uria mala si fale la bia ta bali gwauṉaʼi ana farebaita la kamiliʼa. Kamiliʼa sui boʼo na miki fale aba ura kwaiadomi la.

Kwaiadomi la ura beta lana biu eri i buriana ofu la. I buriana ofu la ki, bare waidoʼora ki kera seʼethathala ura ili lana si raa thalathalaʼa ki fasia Kingdom Hall ka faalu. Teʼesi maṉa i la uiki, miki betaa si kula ki sui boʼo i lana bia kakalia biu eri. Ta wane nanaʼo mado ta wane ni raa na kai liosulia raa eri. Oro lana si maṉa kera olotoʼona sui naʼa raa taa ki ura ili lana malaʼana, kakao la, wasi lana la biu eri, kokoto lana kula ni ono, beta lana biu ni lae amali la, kwaʼe karasi la kakalia biu eri bia lafu lolo la, ma u lolo la. To teʼefa thato i la fa ṉali, mili alua ka too ura raa la asi do ki sui boʼo kakalia ma i lana biu eri laulaʼu. Asi maṉa na wela kulu ki kera raa ofu bi kulu, kulu toʼoa i sada ura farebaita la ana si kula ni foʼa la.—Ecclesiastes 5:1.

Kwaiadomi la ura thauṉaʼi lana tesi do ne taʼa. Fa ṉali ki sui bana, keki lio lalaṉaniʼa i lana bia kakalia biu eri ura riki lana masa tesi do ka atoʼia thauṉaʼi faalu la ania. Si abula la eri e adomi kamiliʼa ura beta la sulia biu eri fasia ka leʼa ma ka suʼusia usi lana si do na fulinaṉa sa kesi usia bada. (2 Chronicles 24:13; 34:10) Kingdom Hall na kera beta leʼa sulia ma ka faalu ne talaʼana ura farebaita la ana tha God iei. Asi maṉa na mili kwaisafui i la raa eri, mili fatania liothaua na mili too ania i fana tha Jehovah bia mika manata baita ana si kula na miki foʼa iei. (Psalm 122:1) Si do eri e adea imole ki na kera too i la tafoloa eri keka manata baita ana raa kamiliʼa ki.—2 Corinth 6:3.

• Uria taa na mika beta leʼa sulia si kula ni farebaita la kamiliʼa ki?

• Si abula la ʼufita ne too ura beta lana Kingdom Hall fasia ka faalu?

O thathamiʼi rofe laʼu fasia thaitoʼomeʼedoa oe sulia Baebol kai sifo kukuruʼa? O thathamiʼi maʼalutania laʼu ta skrifsa mado ta wane, si kula mado tesi do na ṉa Baebol e uʼunusulia? Mado e ʼufita, o thathamiʼi thaitoʼomana masa Baebol e talaʼana kai adomi oe fafia si do no manata isifufuli sulia? Masa ka una eri, arutoʼona library ne too i la Kingdom Hall.

Nia e too ana buka ki ne kwaiadomi leʼa. Mado ʼosi too ana buka ki sui bana ne uʼunu sulia Baebol ne too ana ṉata la oe na ṉa Jehovah’s Witness Ki kera thaunaṉia. Library ne too i la Kingdom Hall e too ana buka ki na kera biʼi kedaa ki mai. Nia e too laʼu boʼo ana Baebol eʼeta kwailiu ki, dikisinari leʼa ki, bia tei buka ki laʼu na kai kwaiadomi leʼa. E laʼa bana i femu ura arutoʼona lana library eri sui feteʼi ofu la bia i buriana ofu la ki. Masa ta computer ka too, mado Watchtower Library kai too iei. Watchtower Library nia ṉa computer program ne too ana buka oʼoro ka oro ana buka na mili too ki ania. Program eri e too ana si kula ne kwaiakori ura rofe la ura ta uʼunua, tesi baʼea, mado ta skrifsa.

E kwaiadomi leʼa i fana student ki i la sukulu ne toʼoa toʼo lana Baebol. Masa ni oe ta student i la sukulu eri, oki arutoʼona bamua library eri ne too i la Kingdom Hall asi maṉa na oki kwaimaʼakwali ana ṉataa oe ki. Wane ne liosulia sukulu eri na kera takwefalea ura lio la sulia library eri. Nia na kai alua buka faalu ki bia ka ʼolosi leʼa ana buka eki. Ni nia mado imole ne toʼoa Baebol i semu na kai fatania ta na oki ilia fasia oko fulatoʼona uʼunua no atoʼia. Ka una eri mena, fuliṉana sa kesi ṉalia buka eki fasia Kingdom Hall. Kuki beta leʼa ana buka eki ma kusi kekeda iei.

Baebol e soreʼa fasia kuka fulatoʼona thaitoʼomeʼedoa tha God, kuki seʼemaabe ura rofe la uria, mala tesi do na liu lana e baita ne too thauʼufuni. (Proverbs 2:1-5) Library eri ne too i la Kingdom Hall kai adomi oe ura thafali lana rofe la oe.

• Library ne too i la Kingdom Hall e too ana buka taa ki ura arutoʼona lana?

• Ni tei na kai adomi oe fasia oko thaitoʼomana leʼa arutoʼona lana library eri?

Tha Jesus e soreʼa i sana toʼa nia ne toleda: “Masa muka alabatania imole ki keka rikia lalaʼaa na mulu too ania, kera keki rikia si raa leʼa na mulu ilidaki ma keki taṉoa Maka kamuluʼa ne ni i heven.” (Matthew 5:16) Adelana boʼo, mika arutoʼona internet. Oki fulatoʼona uʼunua ki sulia faʼamamane la bia raa Jehovah’s Witness Ki i la Web site kamiliʼa eri, jw.org. Si taa ki boʼo na oki rikia i la Web site eri?

Luʼu la ki na Baebol e falea i fana soe la ki na keki soetoʼona ṉado. Oki fulatoʼona luʼu la ki i fana soetoʼona la gwauṉaʼi ki na imole ki kera soetoʼona. Oki fulatoʼona luʼu lana ono fa soetoʼona la i la si pefa eri ne too ana gwauṉaʼia eri, Waswe, Iu Laek for Savve Long Tru Samting? E talua 400 ṉata la eʼeta kwailiu ki na kera kedaa ana si pefa eri ma keka alua i la Web site kamiliʼa eri. Oki rikia laʼu boʼo New World Translation na kera kedaa ka talua 100 ṉata la eʼeta kwailiu ki, bia buka ni toʼo lana ki, ka safua buka eri, Wanem Nao Really Samting wea Bible Teachim? bia Wastaoa ma Awake! magasin na kera biʼi kedaa ki. Buka oro ana buka eki oki teʼemania mado oki roṉoa recording nia ki i la Web site eri mado ka too ana audio, PDF mado EPUB ura daonlodim lana. Masa ta imole ka thathamia mamana la, oki printim teisi pefa fasia ta buka ne too ana ṉata lana i fana! Video ki e too laʼu boʼo ana ṉata la eʼeta oro ki i fana aeʼato ki. Oki daonlodim laʼu boʼo Baebol reading drama, Baebol drama ki, bia liṉeʼe ṉuu ki na roṉo lana e leʼa.

Uʼunua mamana ki sulia Jehovah’s Witness Ki. I la Web site eri, oki teʼemania uʼunua ki bia oki rikia video clip ki sulia raa na mili ilia i la fanua nei iano rerebaʼa, taa ne fulatoʼona Jehovah’s Witness Ki, bia kwaiadomi la asi maṉa na afetaʼia ki e toʼo. Oki rikia laʼu boʼo uʼunua ki sulia ofu la baita kamiliʼa ki na kai tatha, bia adares ana branch ofis kamiliʼa ki.

Si do eki e adomia imole ki keka rikia lalaʼaa sulia mamana la i la si kula daa ki i la fanua nei iano. Imole ki fasia kokomua ki sui bana kera fulatoʼona kwaiadomia fasia si do eki, doʼanita imole ki i la si kula gwagwarila na kera alaṉia ana i Antartica. Mili foʼa uria “baʼelana tha Jehovah kai fula eliʼeli” i la fanua nei iano laulaʼu, ura fareinoto la ana tha God.—2 Thessalonica 3:1.

• Website eri jw.org, e adomi ʼufita ana imole oro ura toʼo lana mamana la ne lae mai fasia Baebol?

• Si taa ni boʼo no thathamiʼi lio uria i la Web site kamiliʼa?