१ शमुवेल
१ एफ्राईमच्या+ डोंगराळ प्रदेशातल्या रामाथाईम-सोफीम या ठिकाणी एक माणूस* राहायचा.+ त्याचं नाव एलकाना+ होतं. हा एफ्राइमी माणूस यरोहामचा मुलगा होता; यरोहाम अलीहूचा, अलीहू तोहूचा आणि तोहू हा सूफचा मुलगा होता. २ एलकानाला दोन बायका होत्या. एकीचं नाव हन्‍ना, तर दुसरीचं नाव पनिन्‍ना. पनिन्‍नाला मुलंबाळं होती. पण हन्‍नाला मात्र एकही मूल नव्हतं. ३ तो माणूस दरवर्षी, सैन्यांचा देव यहोवा* याची उपासना* करण्यासाठी आपल्या शहरातून शिलो इथे जायचा.+ तिथे एलीची दोन मुलं, हफनी आणि फिनहास+ हे याजक म्हणून यहोवाची सेवा करायचे.+
४ एकदा जेव्हा एलकानाने देवाला बलिदान अर्पण केलं, तेव्हा त्याने आपली बायको पनिन्‍ना हिला आणि तिच्या सगळ्या मुलामुलींना त्या बलिदानातून वाटे दिले.+ ५ पण हन्‍नाला मात्र त्याने बलिदानातला खास वाटा दिला. कारण यहोवाने जरी तिला मूलबाळ दिलं नसलं,* तरी एलकानाचं तिच्यावर सगळ्यात जास्त प्रेम होतं. ६ यहोवाने हन्‍नाला मूलबाळ दिलं नव्हतं, म्हणून तिची सवत तिला दुखावण्यासाठी सतत टोमणे मारायची. ७ असं ती प्रत्येक वर्षी करायची. हन्‍ना जेव्हा-जेव्हा यहोवाच्या उपासना मंडपात* जायची+ तेव्हा-तेव्हा तिची सवत तिला खूप टोमणे मारायची; इतके की हन्‍ना फार रडायची आणि जेवायचीही नाही. ८ तिचा नवरा एलकाना तिला एकदा म्हणाला: “हन्‍ना, तू का रडतेस? तू जेवत का नाहीस? इतकं मनाला लावून घेऊ नकोस.* मी आहे ना. मी तुला दहा मुलांपेक्षा जास्त नाही का?”
९ मग, शिलोमध्ये त्या सगळ्यांचं खाणंपिणं आटोपल्यावर हन्‍ना उठली आणि यहोवाच्या मंदिराकडे*+ गेली. त्या वेळी एली मंदिराच्या दाराजवळ आपल्या आसनावर बसला होता. १० हन्‍नाचं मन अतिशय कटू झालं होतं. तिला दुःख अनावर होऊन ती तिथे घळाघळा रडू लागली आणि यहोवाला कळकळून प्रार्थना करू लागली.+ ११ तिने असा नवस केला: “हे सैन्यांच्या देवा यहोवा! पाहा मी किती दुःखी आहे. तू जर माझी आठवण ठेवलीस आणि तुझ्या या दासीला एक मुलगा दिलास,+ तर हे यहोवा, मी त्याला आयुष्यभर तुझी सेवा करायला देईन. त्याच्या डोक्याला कधीही वस्तरा लागणार नाही.”+
१२ हन्‍ना बराच वेळ यहोवाला प्रार्थना करत होती तेव्हा एलीचं लक्ष तिच्याकडे होतं. १३ ती मनातल्या मनात प्रार्थना करत होती. तिचे ओठ हलत होते, पण आवाज मात्र ऐकू येत नव्हता. म्हणून एलीला वाटलं, की ती नशेत आहे. १४ तो तिला म्हणाला: “अशी किती वेळ नशेत राहणार? जा, नशा उतरल्यावर ये.” १५ त्यावर हन्‍ना त्याला म्हणाली: “नाही माझ्या प्रभू! मी द्राक्षारस किंवा दारू प्यायले नाही. मी दुःखी स्त्री आहे, आणि यहोवापुढे आपलं मन मोकळं करत आहे.+ १६ तेव्हा आपल्या या दासीला वाईट स्त्री समजू नका. खरंतर मी अतिशय दुःखात आणि चिंतेत आहे, आणि म्हणून मी इतका वेळ प्रार्थना करत आहे.” १७ तेव्हा एली तिला म्हणाला: “शांत मनाने जा. तू इस्राएलच्या देवाकडे जी विनंती केली आहेस ती तो पूर्ण करो.”+ १८ त्यावर हन्‍ना म्हणाली: “आपल्या या दासीवर नेहमी आपली कृपा असो.” मग ती स्त्री तिथून निघून गेली आणि जाऊन तिने जेवण केलं. त्यानंतर मात्र तिचा चेहरा उदास राहिला नाही.
१९ मग ते सगळे पहाटेच उठले आणि त्यांनी यहोवाला दंडवत घातला. त्यानंतर ते रामा इथे आपल्या घरी परत गेले.+ पुढे एलकानाने आपली बायको हन्‍ना हिच्याशी संबंध ठेवले आणि यहोवाने हन्‍नाची आठवण केली.+ २० एका वर्षाच्या आत* हन्‍नाला दिवस गेले आणि तिला एक मुलगा झाला. तिने त्याचं नाव+ शमुवेल* ठेवलं. कारण ती म्हणाली: “मी त्याला यहोवाकडून मागून घेतलंय.”
२१ काही काळाने एलकाना आपल्या संपूर्ण कुटुंबासोबत, यहोवासाठी दरवर्षी केलं जाणारं बलिदान अर्पण करायला+ आणि आपलं नवस फेडण्याचं अर्पण द्यायला गेला. २२ पण हन्‍ना मात्र त्यांच्यासोबत गेली नाही.+ कारण ती आपल्या नवऱ्‍याला म्हणाली: “एकदा का बाळाचं दूध तुटलं, की मी त्याला यहोवापुढे घेऊन जाईन. मग तो कायम तिथेच राहील.”+ २३ तेव्हा एलकाना तिला म्हणाला: “तुला जसं ठीक वाटतं तसं कर. बाळाचं दूध तुटेपर्यंत घरीच थांब. तू जे म्हणालीस ते यहोवा पूर्ण करो.” म्हणून ती स्त्री घरीच राहिली आणि आपल्या मुलाचं दूध तुटेपर्यंत तिने त्याला अंगावर पाजलं.
२४ मग, बाळाचं दूध तुटलं तेव्हा ती लगेच त्याला शिलो इथे घेऊन गेली. तिने सोबत तीन वर्षांचा एक बैल, एक एफा माप पीठ* आणि एका मोठ्या मडक्यात द्राक्षारसही घेतला.+ या सगळ्या गोष्टी आणि आपल्या लहान मुलाला घेऊन ती शिलो+ इथे यहोवाच्या उपासना मंडपात* गेली. २५ तिथे त्यांनी त्या बैलाचा बळी दिला आणि मुलाला एलीकडे नेलं. २६ मग हन्‍ना एलीला म्हणाली: “माझ्या प्रभू, मी शपथ घेऊन सांगते, की ज्या स्त्रीने इथे तुमच्यासमोर उभं राहून यहोवाला प्रार्थना केली होती ती मीच आहे.+ २७ या मुलासाठीच मी प्रार्थना केली होती आणि यहोवाने माझी विनंती पूर्ण केली आहे.+ २८ आता त्या बदल्यात माझ्या या मुलाला मी यहोवाला देत आहे.* तो आयुष्यभरासाठी यहोवाचा होईल.”
मग त्याने* तिथे यहोवापुढे नमन केलं.