व्यवस्था
१० “त्यसबेला यहोवा परमेश्वरले मलाई भन्नुभयो, ‘पहिलाको जस्तै ढुङ्गाका दुई वटा पाटी बनाऊ+ अनि माथि डाँडामा मकहाँ आऊ। काठको एउटा सन्दुक* पनि बनाऊ। २ तिमीले फुटाएका ती पाटीहरूमा जे-जे लेखिएका थिए, त्यो म फेरि लेखिदिनेछु। अनि तिमीले त्यसलाई काठको सन्दुकमा राख्नू।’ ३ त्यसपछि मैले बबुल काठको एउटा सन्दुक बनाएँ र पहिलाको जस्तै ढुङ्गाका दुई वटा पाटी पनि बनाएँ र ती पाटीहरू लिएर डाँडामा उक्लेँ।+ ४ त्यसपछि यहोवा परमेश्वरले पहिला लेखेकै दस आज्ञा*+ ती पाटीहरूमा लेखिदिनुभयो+ र ती पाटीहरू मलाई दिनुभयो। तिमीहरू सबै जना भेला भएको बेला+ डाँडामा आगोको बीचबाट तिमीहरूसित कुरा गर्दा यहोवाले ती आज्ञाहरू दिनुभएको थियो।+ ५ त्यसपछि म डाँडाबाट तल ओर्लेँ+ र यहोवा परमेश्वरको आज्ञाबमोजिम नै ती पाटीहरूलाई मैले पहिला बनाइराखेको सन्दुकमा राखेँ। ती पाटीहरू अहिलेसम्म त्यहीँ छन्।
६ “त्यसपछि इस्राएलीहरू बेरोथ बेने-याकानबाट मोसेराहतिर लागे। त्यहाँ हारुनको मृत्यु भयो र तिनलाई त्यहीँ गाडियो।+ त्यसपछि तिनका छोरा एलियाजारले तिनको सट्टा पुजारीको रूपमा सेवा गर्न थाले।+ ७ अनि तिनीहरू त्यहाँबाट गुदगोदाहतिर लागे र गुदगोदाहबाट खोलानाला भएको ठाउँ योत्बाथाहतिर गए।+
८ “त्यतिखेर यहोवा परमेश्वरले लेविको कुललाई अलग्गै छुट्ट्याउनुभयो।+ अनि तिनीहरूलाई यहोवाको करारको सन्दुक बोक्ने,+ यहोवासामु उभिएर उहाँको सेवा गर्ने र मानिसहरूलाई उहाँको नाममा आशिष् दिने जिम्मा दिनुभयो।+ तिनीहरूले आजसम्म यही काम गरिरहेका छन्। ९ त्यसैले लेविको कुललाई तिनीहरूका दाजुभाइलाई जस्तो कुनै पैतृक सम्पत्ति वा अंश दिइएको छैन। यहोवा तिमीहरूका परमेश्वरले तिनीहरूलाई भन्नुभएझैँ यहोवा परमेश्वर नै तिनीहरूको अंश हुनुहुन्छ।+ १० म पहिलेझैँ फेरि एक पटक डाँडामा उक्लेँ अनि ४० दिन र ४० रातसम्म त्यहीँ बसेँ।+ त्यसबेला पनि यहोवा परमेश्वरले मेरो बिन्ती सुन्नुभयो+ र यहोवाले तिमीहरूलाई नाश नगर्ने निर्णय गर्नुभयो। ११ त्यसपछि यहोवा परमेश्वरले मलाई भन्नुभयो, ‘अब तिमी मानिसहरूकहाँ जाऊ र यात्राको तयारी गर। मैले तिमीहरूका पुर्खाहरूलाई दिन्छु भनेर कसम खाएको देशमाथि तिनीहरूले अधिकार गरून्।’+
१२ “हे इस्राएली हो! यहोवा परमेश्वरले तिमीहरूबाट के माग गर्नुभएको छ?+ यति मात्र होइन र: यहोवा तिमीहरूका परमेश्वरको डर मान्नू,+ उहाँले देखाउनुभएको बाटोमा हिँड्नू,+ उहाँलाई प्रेम गर्नू, आफ्नो सारा हृदयले र सारा ज्यानले यहोवा तिमीहरूका परमेश्वरको सेवा गर्नू+ १३ र मैले आज तिमीहरूलाई दिएका यहोवाका आज्ञाहरू र नियमहरू पालन गर्नू। यसो गऱ्यौ भने तिमीहरूकै भलाइ हुनेछ।+ १४ हेर, यहोवा तिमीहरूका परमेश्वर सारा आकाश र त्यसमा भएका सबै थोकका मालिक हुनुहुन्छ, सारा पृथ्वी र त्यसमा भएका सबै थोक उहाँकै हुन्।+ १५ तर यहोवा परमेश्वर तिमीहरूका पितापुर्खाको मात्र नजिक आउनुभयो र तिनीहरूप्रति मात्र आफ्नो प्रेम प्रकट गर्नुभयो। अनि उहाँले सारा जातिबाट तिनीहरूका सन्तान, हो तिमीहरूलाई छान्नुभयो+ र आज तिमीहरू उहाँका मानिसहरू हुन सकेका छौ। १६ अब तिमीहरू आफ्नो हृदय शुद्ध पार*+ र अटेरी हुन छोड।+ १७ यहोवा तिमीहरूका परमेश्वर सबै ईश्वरका पनि ईश्वर हुनुहुन्छ,+ प्रभुहरूका पनि प्रभु हुनुहुन्छ। उहाँ महान्, शक्तिशाली र भययोग्य परमेश्वर हुनुहुन्छ। उहाँ कसैलाई पक्षपात गर्नुहुन्न+ र कसैबाट घुस लिनुहुन्न। १८ उहाँ विधवा र अनाथहरूको* पक्षमा न्याय गर्नुहुन्छ;+ तिमीहरूमाझ भएका विदेशीहरूलाई पनि उहाँ माया गर्नुहुन्छ+ र खाने-लाउने कुरा जुटाइदिनुहुन्छ। १९ तिमीहरूले पनि विदेशीहरूलाई माया गर्नू किनभने मिश्रमा तिमीहरू पनि विदेशी थियौ।+
२० “तिमीहरूले यहोवा आफ्ना परमेश्वरको डर मान्नू, उहाँकै सेवा गर्नू,+ उहाँसँगै नजिक भइरहनू र उहाँकै नाममा कसम खानू। २१ तिमीहरूले उहाँको मात्र प्रशंसा गर्नू।+ उहाँ नै तिमीहरूका परमेश्वर हुनुहुन्छ। उहाँले तिमीहरूका लागि कत्ति ठूला र आश्चर्यलाग्दा कामहरू गर्नुभयो, त्यो तिमीहरू आफैले देख्यौ।+ २२ तिमीहरूका पुर्खाहरू मिश्रमा जाँदा ७० जना मात्र थिए।+ तर अहिले यहोवा तिमीहरूका परमेश्वरले तिमीहरूलाई आकाशका ताराजत्तिकै असङ्ख्य बनाउनुभएको छ।+