व्यवस्था
१७ “तिमीहरूले खोट भएको वा चोटपटक लागेको बहर वा भेडा यहोवा परमेश्वरलाई नचढाउनू किनभने यस्ता भेटीलाई यहोवा तिमीहरूका परमेश्वर घृणा गर्नुहुन्छ।+
२ “यहोवा परमेश्वरले तिमीहरूलाई दिनुहुने देशको कुनै एउटा सहरमा कुनै पुरुष वा स्त्रीले यहोवा परमेश्वरको नजरमा खराब काम गरेर उहाँको करार भङ्ग गऱ्यो+ ३ अनि सही बाटोमा हिँड्न छोडेर अरू देवीदेवतालाई पुज्यो वा घाम, जून र आकाशका सारा सेनालाई* ढोग्यो भने+ उसले मैले निषेध गरेको कुरा गरिरहेको हुनेछ।+ ४ अनि यसबारे तिमीलाई कसैले खबर गऱ्यो वा तिमीले यसबारे सुन्यौ भने यस मामिलालाई राम्ररी छानबिन गर्नू। यदि इस्राएलमा यस्तो घृणित कुरा साँच्चै भएको प्रमाणित भयो भने+ ५ यस्तो दुष्ट काम गर्ने पुरुष वा स्त्रीलाई सहरको मूलढोकामा ल्याउनू र ढुङ्गाले हानेर मार्नू।+ ६ दुई वा तीन जना साक्षीले दिएको बयानको आधारमा+ उसलाई मृत्युदण्ड दिनू। तर एक जना मात्र साक्षीले दिएको बयानको आधारमा उसलाई मृत्युदण्ड नदिनू।+ ७ उसको विरुद्धमा साक्षी दिनेहरूले नै सबैभन्दा पहिला उसलाई ढुङ्गाले हानून्। त्यसपछि अरू मानिसहरूले ढुङ्गाले हानून्। तिमीहरूले आफ्नो माझबाट जे खराब छ, त्यो हटाउनै पर्छ।+
८ “तिमीहरू बस्ने कुनै सहरमा हत्या, कानुनी मुद्दामामिला, कुनै किसिमको हिंसा वा जटिल मतभेदको मामिला उठ्यो र तिमीहरूलाई त्यसको छिनोफानो गर्न गाह्रो भयो भने+ यहोवा तिमीहरूका परमेश्वरले रोज्नुभएको ठाउँमा त्यो मामिला लिएर जाओ।+ ९ अनि लेवी पुजारीहरू र त्यतिबेला सेवा गरिरहेका न्यायकर्ताकहाँ गएर तिनीहरूलाई सोध।+ अनि तिनीहरूले त्यस मामिलाको फैसला सुनाउनेछन्।+ १० यहोवा परमेश्वरले रोज्नुभएको ठाउँमा जाँदा तिनीहरूले जे फैसला सुनाउँछन्, त्यसैअनुसार कदम चाल। तिनीहरूले जे-जे निर्देशन दिन्छन्, तिमीहरूले ठीक त्यसै गर। ११ तिनीहरूले जुन नियम देखाउँछन् र जस्तो फैसला सुनाउँछन्, त्यसैअनुसार कदम चाल।+ तिनीहरूले सुनाउने फैसलाबाट दायाँबायाँ नलाग, तिनीहरूले भनेअनुसारै गर।+ १२ यहोवा परमेश्वरको सेवा गरिरहेका पुजारी वा न्यायकर्ताको कुरा मान्न इन्कार गर्ने अहङ्कारी मानिस मारिनै पर्छ।+ तिमीहरूले इस्राएलबाट जे खराब छ, त्यो हटाउनै पर्छ।+ १३ यस्तो कुरा सुनेर सबै जना डराउनेछन् र त्यसपछि तिनीहरू कोही पनि अहङ्कारी हुनेछैनन्।+
१४ “जब तिमीहरू यहोवा परमेश्वरले दिनुहुने देश कब्जा गरेर त्यहाँ बसोबास गर्न थाल्छौ, तब तिमीहरूले यसो भनौला, ‘वरपरका जातिहरूले जस्तै हामी पनि आफ्नो लागि राजा नियुक्त गरौँ।’+ १५ त्यसो हो भने यहोवा परमेश्वरले जसलाई रोज्नुहुन्छ, उसैलाई राजा नियुक्त गर्नू।+ तिमीहरूले आफ्नै इस्राएली भाइबन्धुमध्ये एक जनालाई रोजेर राजा नियुक्त गर्नू। तिमीहरूले कोही विदेशी अर्थात् गैर-इस्राएलीलाई आफ्नो राजा नियुक्त नगर्नू। १६ राजा नियुक्त हुने त्यस व्यक्तिले आफ्नो लागि धेरै घोडा नथुपारोस् वा अझ धेरै घोडा ल्याउन आफ्ना मानिसहरूलाई मिश्रमा नपठाओस्+ किनभने यहोवा परमेश्वरले तिमीहरूलाई यसो भन्नुभएको छ, ‘तिमीहरू कहिल्यै मिश्र नफर्कनू।’ १७ तिनले धेरै पत्नी नल्याऊन् नत्र त तिनको मन बरालिनेछ।+ अनि तिनले आफ्नो लागि तीनथुप्रो सुनचाँदी पनि जम्मा नगरून्।+ १८ जब तिनले सिंहासनमा बसेर शासन गर्न थाल्छन्, तब तिनले लेवी पुजारीहरूसित भएको व्यवस्थाको पुस्तकमा लेखिएका कुरा सारून् र आफ्नो लागि एउटा पुस्तक* बनाऊन्।+
१९ “तिनले त्यो पुस्तक सधैँ आफूसित राखून् र जीवनभर त्यो पढून्।+ यसो गरेमा तिनले यहोवा आफ्ना परमेश्वरको डर राख्न, उहाँले व्यवस्थामा दिनुभएका सबै आज्ञा मान्न र सबै नीतिनियमअनुसार चल्न सिक्नेछन्।+ २० अनि घमन्डले फुलेर तिनले आफूलाई अरू इस्राएलीहरूभन्दा ठूलो ठान्नेछैनन्; तिनी परमेश्वरको मार्गबाट तर्केर दायाँबायाँ लाग्नेछैनन्। यसरी तिनी र तिनका सन्तानले इस्राएलमा लामो समयसम्म शासन गर्नेछन्।