अय्युब
१ उज भन्ने देशमा अय्युब*+ नाम गरेका मानिस बस्थे। तिनी निर्दोष र सत्यनिष्ठ थिए।*+ तिनी परमेश्वरको डर मान्थे र खराब कुराहरूबाट टाढै बस्थे।+ २ तिनका सात छोरा र तीन छोरी थिए। ३ तिनका ७ हजार भेडा, ३ हजार उँट, १ हजार गाईवस्तु* र ५०० गधैनी थिए। अनि धेरै नोकरचाकर पनि थिए। त्यसैले तिनी पूर्वतिरका* मानिसहरूमध्ये सबैभन्दा धनी थिए।
४ तिनका छोराहरूले पालैपालो* आफ्नो घरमा भोज दिने गर्थे। उनीहरू आफ्ना तीन जना दिदीबहिनीलाई पनि सँगै खानपिन गर्न बोलाउँथे। ५ आफ्ना सबै छोराको भोज दिने पालो सिद्धिएपछि अय्युब आफ्ना छोराछोरीलाई बोलाउँथे र उनीहरूलाई चोख्याउँथे। तिनी बिहान सबेरै उठ्थे र प्रत्येक छोराछोरीको लागि अग्निभेटी* चढाउँथे।+ किनभने अय्युब यस्तो सोच्ने गर्थे: “कतै मेरा छोराछोरीले पाप गरे कि वा मनमनै परमेश्वरको अपमान पो गरे कि?” तिनी सधैँ यसै गर्थे।+
६ एकदिन साँचो परमेश्वरका छोराहरू*+ उहाँसामु भेला भए।+ सैतान+ पनि तिनीहरूसँगै यहोवासामु उपस्थित भयो।+
७ यहोवाले सैतानलाई सोध्नुभयो: “तँ कहाँ पुगेर आइस्?” सैतानले यहोवालाई जवाफ दियो: “पृथ्वीको चारैतिर घुमफिर गरेर आएँ।”+ ८ अनि यहोवाले सैतानलाई भन्नुभयो: “तैँले मेरो दास अय्युबलाई याद गरिस्? पृथ्वीमा ऊजस्तो अरू कोही छैन। ऊ निर्दोष र सत्यनिष्ठ छ;+ मेरो डर मान्छ र खराब कुराहरूबाट टाढै बस्छ।” ९ तब सैतानले यहोवालाई जवाफ दियो: “अय्युबले विनास्वार्थ तपाईँको डर मानेको हो र?+ १० तपाईँले उसलाई, उसको घरपरिवारलाई र ऊसँग भएका सबै कुरालाई चारैतिरबाट रक्षा गर्नुभएको छैन र?+ तपाईँले उसको फलिफाप गराउनुभएको छ+ र उसको वस्तुभाउ बढेर अनगिन्ती भएका छन्। ११ तर एक चोटि आफ्नो हात पसारेर ऊसँग भएको सबै कुरा खोसेर त हेर्नुहोस्। उसले तपाईँकै मुखको सामुन्ने तपाईँलाई सराप्नेछ।” १२ अनि यहोवाले सैतानलाई भन्नुभयो: “हुन्छ, त्यसोभए अय्युबसँग भएको सबै कुरा तेरै हातमा दिन्छु। केवल उसको शरीरलाई चाहिँ केही हानि नगर्।” तब सैतान यहोवाको सामनेबाट गयो।+
१३ एकदिन अय्युबका छोराछोरी आफ्नो जेठो दाइको घरमा भेला भएका थिए। तिनीहरू खाँदै र रक्सी पिउँदै थिए।+ १४ त्यसै दिन एक जना मानिस यस्तो सन्देश लिएर अय्युबकहाँ आयो: “गोरुहरू जोतिरहेका थिए र नजिकै गधाहरू पनि चरिरहेका थिए। १५ अचानक सबाका मानिसहरूले आक्रमण गरे र ती सबै लिएर गए। तिनीहरूले तपाईँका नोकरचाकरलाई तरबारले मारे। म मात्र उम्केँ र तपाईँलाई यो सन्देश दिन आएँ।”
१६ ऊ बोल्दाबोल्दै अर्को एक जना अय्युबकहाँ आयो र यसो भन्यो: “आकाशबाट परमेश्वरको आगो बर्सियो* अनि त्यसले भेडाको बथान र गोठालाहरूलाई भस्म पाऱ्यो। म मात्र उम्केँ र तपाईँलाई यो सन्देश दिन आएँ।”
१७ ऊ बोल्दाबोल्दै अर्को एक जना पनि अय्युबकहाँ आयो र यसो भन्यो: “कल्दियालीहरू+ तीन दल बनाएर आक्रमण गर्न आए। तिनीहरूले उँटहरू लगे र तपाईँका नोकरचाकरलाई तरबारले मारे। म मात्र उम्केँ र तपाईँलाई यो सन्देश दिन आएँ।”
१८ ऊ बोल्दाबोल्दै फेरि अर्को एक जना अय्युबकहाँ आयो र यसो भन्यो: “तपाईँका छोराछोरी आफ्नो जेठो दाइको घरमा खाँदै र पिउँदै थिए। १९ एक्कासि मरुभूमिबाट ठूलो हुरी आयो र त्यसले घरलाई गर्ल्यामगुर्लुम ढाल्यो अनि तपाईँका सबै छोराछोरी मारिए। म मात्र उम्केँ र तपाईँलाई यो सन्देश दिन आएँ।”
२० यो सुनेर अय्युब उठे। तिनले आफ्नो लुगा च्याते र कपाल खौरे। त्यसपछि भुईँमा घोप्टो परेर २१ यसो भने:
“आमाको गर्भबाट म नाङ्गै आएँ
र नाङ्गै फर्केर जानेछु।+
यहोवाले दिनुभयो+ र यहोवाले नै लानुभयो।
यहोवाको नामको सधैँ प्रशंसा होस्।”
२२ यी सबै भोगेर पनि अय्युबले परमेश्वरविरुद्ध पाप गरेनन् वा आफूले भोगेको अन्यायको दोष परमेश्वरलाई लगाएनन्।