इजकिएल
३ त्यसपछि उहाँले मलाई भन्नुभयो: “हे मानिसको छोरा, तिमीसामु जे छ, त्यो खाऊ। यो मुठा खाऊ र गएर इस्राएलको घरानासँग कुरा गर।”+
२ त्यसैले मैले मुख खोलेँ र उहाँले मलाई त्यो मुठा खान लगाउनुभयो। ३ उहाँले अझै यसो भन्नुभयो: “हे मानिसको छोरा, मैले दिएको यो मुठा खाऊ र आफ्नो पेट भर।” तब मैले त्यो मुठा खाएँ; त्यो मेरो मुखमा महजत्तिकै गुलियो भयो।+
४ उहाँले मलाई भन्नुभयो: “हे मानिसको छोरा, इस्राएलको घरानाकहाँ जाऊ र मैले भनेको कुरा तिनीहरूलाई सुनाऊ। ५ मैले तिमीलाई यस्तो जातिकहाँ पठाउन लागेको होइनँ, जसको भाषा तिमीले जान्दै जान्दैनौ अथवा जसको कुरा तिमी पटक्कै बुझ्दैनौ बरु म तिमीलाई इस्राएलको घरानाकहाँ पठाउँदै छु। ६ तिमीले जान्दै नजान्ने वा तिमीले पटक्कै नबुझ्ने भाषा बोल्ने जातिजातिकहाँ मैले तिमीलाई पठाएको भए बरु तिनीहरूले तिम्रो कुरा सुन्ने थिए।+ ७ तर इस्राएलको घरानाले तिम्रो कुरा पटक्कै सुन्नेछैन किनकि तिनीहरू मेरो कुरा सुन्नै चाहँदैनन्।+ सबै इस्राएलीको मन र दिमाग दुवै कठोर छ।+ ८ हेर! मैले तिम्रो अनुहार र तिम्रो निधार तिनीहरूको जस्तै कडा बनाइदिएको छु।+ ९ तिम्रो निधारलाई चकमक ढुङ्गाभन्दा पनि साह्रो, हिरासरह कडा तुल्याइदिएको छु।+ तिनीहरूसित नडराऊ; तिनीहरूको अनुहार देखेर नआत्तिऊ।+ किनकि तिनीहरू विद्रोही घराना हुन्।”
१० उहाँले मलाई अझै यसो भन्नुभयो: “हे मानिसको छोरा, मैले भनेको सबै कुरा ध्यान दिएर सुन र मनमा गुन। ११ निर्वासनमा लगिएका तिम्रा मानिसहरूकहाँ जाऊ+ र तिनीहरूसित कुरा गर। तिनीहरूले चाहे सुनून् या नसुनून्,+ तिनीहरूलाई ‘ब्रह्माण्डका मालिक यहोवा यसो भन्नुहुन्छ’ भन।”
१२ तब एउटा शक्तिले* मलाई माथि उचाल्यो+ र मेरो पछाडिबाट कसैले ठूलो स्वरमा यसो भनिरहेको आवाज मैले सुनेँ: “यहोवाको निवासस्थानमा उहाँको महिमा उच्च पारियोस्।” १३ मैले अर्को आवाज पनि सुनेँ। चार वटा जीवले पखेटा फटफटाउँदा एउटा पखेटाले अर्को पखेटालाई छोएको आवाज+ अनि तिनीहरूको छेवैमा भएका पाङ्ग्राहरूको आवाज+ सुनेँ। अनि चर्को गडगडाहट पनि सुनेँ। १४ त्यतिकैमा त्यो शक्तिले* मलाई माथि उचालेर लग्यो। मेरो मन भरङ्ग भएको थियो र म रिसले रन्किरहेको थिएँ अनि यहोवाको हात ममाथि बलियोगरि रहेको थियो। १५ त्यसैले म तेल-अबिबमा निर्वासनमा लगिएका मानिसहरूकहाँ गएँ। तिनीहरू केबार नदीको किनारमा+ बसोबास गरिरहेका थिए। म अक्क न बक्क भएर+ सात दिनसम्म तिनीहरूसितै बसेँ।
१६ सातौँ दिनको अन्तमा यहोवाको यो वचन मकहाँ आयो:
१७ “हे मानिसको छोरा, मैले तिमीलाई इस्राएलको घरानाको पहरेदार नियुक्त गरेको छु।+ मेरो मुखबाट निस्केको वचन सुनेपछि तिमीले तिनीहरूलाई मेरो चेतावनी सुनाउनू।+ १८ मैले कुनै दुष्ट मानिसलाई ‘तँ पक्कै मर्नेछस्’ भनेँ तर तिमीले त्यसलाई चेतावनी दिएनौ र त्यसलाई ‘आफ्नो ज्यान जोगाउन कुकर्म छोड’ भनेनौ भने+ त्यो आफ्नै कुकर्मले गर्दा मर्नेछ+ तर म तिमीसित त्यसको रगतको साटो फेर्नेछु।*+ १९ तर यदि तिमीले कुनै दुष्ट मानिसलाई चेतावनी दियौ तैपनि त्यसले आफ्नो कुकर्म त्यागेन भने त्यो आफ्नै कुकर्मले गर्दा मर्नेछ तर तिमीले भने आफ्नो ज्यान जोगाउनेछौ।+ २० तर कुनै धर्मी मानिसले असल काम* त्यागेर खराब काम* गऱ्यो भने म उसको अगाडि ठेस लाग्ने ढुङ्गो राखिदिनेछु र ऊ मर्नेछ।+ तिमीले उसलाई चेतावनी दिएनौ भने ऊ आफ्नो खराब कामले गर्दा मर्नेछ र उसको असल काम पनि याद गरिनेछैन तर म तिमीसित उसको रगतको साटो फेर्नेछु।*+ २१ तर तिमीले धर्मी मानिसलाई ‘खराब काम नगर्नू’ भनेर चेतावनी दियौ र उसले तिम्रो कुरा मान्यो भने ऊ पक्कै जीवित रहनेछ किनकि उसले चेतावनी सुन्यो।+ अनि तिमीले पनि आफ्नो ज्यान जोगाउनेछौ।”
२२ त्यहाँ यहोवाको हात ममाथि आयो र उहाँले मलाई यसो भन्नुभयो: “उठ, बेँसीमा जाऊ र म तिमीसित त्यहाँ कुरा गर्छु।” २३ त्यसैले म उठेँ र बेँसीतिर लागेँ। हेर! त्यहाँ यहोवा परमेश्वरको महिमा रहेछ!+ मैले केबार नदीको किनारमा+ देखेको जस्तै महिमा त्यहाँ पनि देखेँ। अनि म भुईँसम्मै घोप्टो परेँ। २४ तब पवित्र शक्ति ममा आयो र त्यसले मलाई उभिन बल दियो।+ त्यसपछि उहाँ मसित बोल्न थाल्नुभयो र यसो भन्नुभयो:
“जाऊ, घर गएर ढोका थुनेर बस। २५ हे मानिसको छोरा, तिमी तिनीहरूबीच जान नसक भनेर तिनीहरूले तिमीलाई डोरीले बाँध्नेछन्। २६ अनि म तिम्रो जिब्रोलाई तालुमै टाँसिदिनेछु अनि तिमी गुँगो हुनेछौ र तिनीहरूलाई हप्काउन सक्नेछैनौ। किनकि तिनीहरू विद्रोही घराना हुन्। २७ तर जब म तिमीसित बोल्छु, म तिम्रो मुख खोलिदिनेछु। तब तिमीले ‘ब्रह्माण्डका मालिक यहोवा यसो भन्नुहुन्छ’ भनेर तिनीहरूलाई मेरो कुरा सुनाऊ।+ सुन्न चाहनेले सुनोस्+ अनि सुन्न नचाहनेले नसुनोस् किनकि तिनीहरू विद्रोही घराना हुन्।+