यहोवाको आदर गर्न के तपाईं अझ बढी केही गर्न सक्नुहुन्छ?
१ हामी सबैले नै विचार गर्नुपर्ने यो एउटा अति महत्त्वपूर्ण प्रश्न हो। हाम्रो मालिक येशू ख्रीष्टको विश्वासी अनुकर्ताको हैसियतमा परमेश्वरको नाउँको आम घोषणा गरेर आज हामी हाम्रो परमेश्वरको आदर गर्छौं। यदि हामी परमेश्वरको अनुग्रह पाउन चाहर्न्छौं भने यो जिम्मेवारी हामीले वहन गर्नैपर्छ। (मर्कूस १३:१०; लूका ४:१८; प्रे० ४:२०; हिब्रू १३:१५) यहोवाको विश्वाव्यापी गोठको सदस्य हुन सक्ने सम्भावना भएका ती बाँकि छरिएका “भेडाहरू”-कहाँ यो समाचार पुऱ्याउनु कस्तो अवर्णनिय सौभाग्य हो—हो, एउटा गौरवको कुरा!—यूह० १०:१६.
२ सेवकाईमा आफ्नो कार्यकलापहरूलाई बढाएर के तपाईं र तपाईंका छोरा-छोरीले यहोवाको आदर गर्नमा अझ बढी केही गर्न सक्नु हुन्छ? संसारभरि बढ्दो संख्यामा तपाईंको भाइहरू र बहिनीहरू अग्रगामी सेवामा भर्ती भइरहेका छन्। अप्रिल १९९२-को दौडान भारतमा विशेष, नियमित र सहायक अग्रगामी सेवामा लागेका व्यक्तिहरूको अधिकतम संख्या २,१०६ थियो। अर्थात त्यस महिनामा रिपोर्ट दिने कुल प्रकाशक संख्याको लगभग अठारह प्रतिशत! अग्रगामी सेवालाई के तपाईंले व्यक्तिगत तवरमा गम्भिरतापूर्वक विचार गर्नुभएको छ? पूर्ण-समय सेवकाईलाई आफ्नो पेशा बनाउन के तपाईं आफ्नो छोरा-छोरीलाई प्रोत्साहन दिनुहुन्छ?
३ अग्रगामी सेवाप्रति तपाईंको व्यक्तिगत भावनाहरूलाई किन केलाउनु हुन्न? अग्रगामी सेवाबारे कुनै कुरा चल्दा के तपाईं आफूसँग अग्रगामी सेवकको रूपमा सेवा गर्न मिल्ने परिस्थिति छैन भन्दै तुरुन्त आफ्नो निर्णय दिनुहुन्छ? यो कुरा सही हो कि सबैलाई अग्रगामीको काम गर्न सम्भव हुँदैन। शास्त्रीय जिम्मेवारीहरू र अन्य प्रतिबन्धहरूले गर्दा धेरैजना पूर्ण-समय सेवा गर्न सक्दैनन्। (१ ति० ५:८) तर यस विषयलाई के तपाईंले हालसालै प्राथर्नापूर्वक विचार गर्नुभएको छ? परिवारको एकजना सदस्य मात्र भएपनि नियमित अग्रगामीको काम गर्न सक्छ कि भनेर के तपाईंले पूरै परिवार बसेर छलफल गर्नुभएको छ? नोभेम्बर १५, १९८२-को द वाचटावर-ले पृष्ठ २३-मा यो विचारोद्दीपक कुरा दिएको थियो: “अग्रगामीको काम गर्न सकिन्छ कि सकिन्दैन भनेर प्रत्येक मसीही सेवकले प्रार्थनापूर्वक विचार गर्नुपर्छ। पन्ध्र वर्षसम्म अग्रगामीको काम गरेका एकजना अफ्रिकी दम्पतीले यसो भने: ‘हामी किन अग्रगामीको काम गर्दैछौं? नगरेको भए के यहोवालाई हामीले यसको स्पष्टिकरण दिनसक्ने थियौं?’ अग्रगामी नभएका थुप्रै व्यक्तिहरूले यस्तै सम्बन्धित प्रश्न सोध्न सक्छन्: ‘म अग्रगामी होइन भन्ने कुराको के म यहोवाको सामने साँच्चै नै सफाइ पेश गर्न सक्छु?’”
४ यसै विषयमा अर्को वाचटावर-को लेखले यो टिप्पणी गरेको थियो: “हामी प्रत्येक आफैसँग इमान्दार हुनुपर्छ। के तपाईं ‘आत्मा त इच्छुक छ तर शरीर कमजोर छ’ भन्नुहुन्छ? तर के आत्मा साँच्चै नै इच्छुक छ? आउनुहोस् शरीरको कमजोरीलाई आत्माको अनिच्छुक भावनाको बहाना बनाउनदेखि हामी टाढा बसौं।”—w78 8/15 पृष्ठ २३.
५ आफ्नो छोरा-छोरी सफल भएको देख्न चाहने आमा-बाबु: हितोपदेश १५:२०-ले हामीलाई यो आश्वासन दिन्छ: “बुद्धिमान छोराले बाबुलाई खुशी पार्छ।” आफ्ना छोराहरू र छोरीहरूले यहोवाप्रति समर्पित सेवाको जीवनलाई पछ्याउँदा निस्सन्देह ईश्वरभक्त आमा-बाबुहरू आनन्दित हुन्छन्। तथापि, तपाईंको छोरा-छोरीले यस बुद्धिमतापूर्ण बाटोलाई त्यसै छान्ने छैन। यो संसारको प्रलोभन अति नै शक्तिशाली छ। त्यसैकारण आमा-बाबु हो, तपाईंका छोरा-छोरी कस्ता हुने हुन् भन्ने कुरा तपाईं के गर्नुहुन्छ भन्ने कुरामा धेरै भर पर्दछ। यदि तपाईं सधैं अग्रगामी कामको फाइदाहरूबारे सकारात्मक कुरा गर्नुहुन्छ, आफ्नो जवान छोरा-छोरीलाई समर्पित अग्रगामीहरूको सङ्गत गर्न प्रोत्साहित गर्नुहुन्छ र तपाईंका छोरा-छोरीका निम्ति पूर्ण-समय सेवकाई सबैभन्दा आदरयोग्य पेशा हो भनेर यदि तपाईं विश्वस्त हुनुहुन्छ भने यस सकारात्मक मनोवृत्तिको निस्सन्देह तपाईंको छोरा-छोरीमाथि ठूलो प्रभाव पर्नेछ। मानिसहरूसँग भन्दा यहोवासँग एउटा असल नाम कायम राख्ने कामको महत्त्वलाई बुझ्न तिनीहरूलाई मदत गर्नुहोस्।
६ जवान मानिसहरू हो, तपाईंहरूले गर्नुपर्ने छनौटमाथि हितोपदेश २२:१-ले यसप्रकार प्रकाश पार्दछ: “धेरै धन-सम्पत्ति भन्दा असल नाउँको इच्छा गर्नु धेरै उत्तम हो, सुन अथवा चाँदीभन्दा मान-इज्जत अझ असल हो।” आफ्नो लागि तपाईं कस्तो नाउँ कमाउनुहुन्छ? समर्पित सेवाद्वारा यहोवासँग राम्रो नाउँ कायम गरेका ती पुरुषहरू र स्त्रीहरूबारे सोच्नुहोस् जसको विषयमा हामी बाइबलमा पढ्छौं। प्रिय चिकित्सक लूका र साँचो परमेश्वर सँग-सँगै हिड्ने हनोक। कलिलै उमेरमा यहोवाको मन्दिरमा आफ्नो सेवा सुरु गरेर शमूएलले पाउन सक्ने सबैभन्दा असल शिक्षा पाए। के यी विश्वासी सेवकहरूले आफूले गरेको निणर्यहरूप्रति कहिल्यै पछुताउ गरे होलान् जस्तो तपाईंलाई लाग्छ? तिनीहरूले त्यसो किन गर्थे र? तिनीहरू सबैले खुशी, फलदायी र सक्रिय जीवन बिताए। र तिनीहरूले यहोवाको अनन्त अनुग्रह पाए!—भजन ११०:३; १४८:१२, १३; हितो० २०:२९क; १ ति० ४:८ख.
७ छोरा-छोरीले जीवनमा सफलता प्राप्त गर्दा तिनीहरूका आमा-बाबु गर्व महसुस गर्छन्। यसप्रकार “परमप्रभुले दिनुभएको हक”-लाई प्रशिक्षण दिन, अनुशासनमा राख्न र शिक्षा दिन तिनीहरूले गरेको लगानीको धेरैगुना भुक्तान हुन्छ। (भजन १२७:३) यहोवालाई आदर गर्न आफूले गर्न सक्ने जति सबै गर्ने छोरा वा छोरीले भन्दा अरु कुन कुराले आमा-बाबुलाई अझ गर्व महसुस गराउँछ र? आधुनिक समयका धेरैजना जवानहरूले लूका, हनोक र शमूएलको पदचिन्हलाई पछ्याइरहेका छन्। यसको उदाहरण यस चिट्ठिले देखाउँछ: “मेरो उमेर १६ वर्ष हो। मैले बप्तिस्मा लिएको नौ महिनापछि . . . मैले नियमित अग्रगामीको काम सुरु गरें र त्यहाँदेखि मेलै यहोवाको आशिष पाइरहेको छु। . . . अग्रगामीको कामले तपाईंलाई स्कूलमा पनि मदत गर्छ। एकजना साक्षी भएको हुनाले सुरु सुरुमा मेरा सहपाठीहरू मलाई जिस्काउने गर्थे। तर अहिले थुप्रै व्यक्तिगत अध्ययन गर्नुपरेको हुँदा ‘मेरो आलोचना गर्नेहरूलाई म मुखभरिको जवाफ’ दिन सक्ने भएको छु।”
८ सेवकाईमा सुसज्जित हुनका लागि शिक्षा: यहाँ हामी सांसारिक शिक्षाबारे विचार गर्न सक्छौं। यो एउटा यस्तो क्षेत्र हो जहाँ एउटा सन्तुलित विचारधारा विशेषगरी आवश्यक छ। फेब्रुअरी १, १९९३-को प्रहरीधरहरा-मा “उद्देश्य सहितको शिक्षा” भन्ने लेख प्रस्तुत गरिएको थियो। त्यस लेखको “पर्याप्त शिक्षा” नामक उपशीर्षक अन्तर्गत यो प्रसङ्ग उल्लेख गरिएको थियो: “मसीहीहरू आफ्नो जीविका आफै चलाउन सक्ने हुनुपर्छ, र तिनीहरू पूर्ण-समय अग्रगामी सेवकहरू हुन् भनेपनि यही कुरा लागू हुन्छ। (२ थिस्सलोनिकी ३:१०-१२) . . . आफ्नो मसीही दायित्वहरूलाई पूरा गर्न एकजना जवान मसीहीलाई कति शिक्षा चाहिन्छ? . . . सुसमाचारका अग्रगामी सेवक हुन चाहनेहरूले कुन तलबलाई ‘पर्याप्त’ भन्नु मिल्छ? साधरणतया आफ्ना भाइहरूमाथि वा परिवारमाथि ‘बोझ’ नबन्न यस्ता व्यक्तिहरूलाई दिनको केही समयसम्म गर्ने कामको जरूरत पर्दछ।—१ थिस्सलोनिकी २:९.”
९ एकजना सम्भावित नियमित अग्रगामीका निम्ति पूर्ण-सेवा सेवकाईमा लागिरहन यदि अतिरिक्त शिक्षाको आवश्यक देखिएमा नोभेम्बर १, १९९२-को वाचटावर-ले यो सिफारिश गर्छ: “अतिरिक्त शिक्षा लिने नै हो भने, जवान साक्षीले सम्भवतः घरमा बसिरहेको बेलामा त्यो लिनु बेस हुनेछ। यसो गरेमा तिनी सदा जस्तै आफ्नो मसीही बाइबल अध्ययन, सभाहरूमा उपस्थिति र प्रचार कार्यमा लाग्न सक्तछन्।”
१० अग्रगामीको काम गर्ने इच्छा हुँदा हुँदै पनि व्यवसाय स्कूलमा जानु पर्ने वाध्यता भएका अफ्रिकाको २२ वर्षीय एकजना केटोको यस्तो अनुभव छ। व्यवसाय स्कूलमै छँदा उसले सहायक अग्रगामीका लागि आफ्नो नाउँ लेखायो। तर उसको साथीहरूले ऊ पक्कै पनि जाँचमा फेल हुनेछ भन्दै उसको ठट्टा उडायो। तिनीहरूले यसरी जिस्काउँदा ऊ सधैं यस्तो जवाफ दिन्थ्यो: “पहिले उहाँको राज्य र उहाँको धार्मिकता खोजी गर।” आत्म-अनुशासनका साथ ऊ हरेक बिहान सवेरै उठ्थ्यो र दुई घण्टा जति स्कूलको पढाइको तयार गर्थ्यो र स्कूल सिद्धिए पछि दिउँसो क्षेत्र सेवकाईमा भाग लिन्थ्यो। पछि एउटा विशेष आयोजक पुरस्कारका लागि तीनजना उत्तम विद्यार्थीहरू छान्न लिएको विशेष परीक्षामा यो जवान केटो तेस्रो स्थानमा आउँदा सारा स्कूल छक्क परेको थियो। यस परीक्षामा दोस्रो स्थानमा आउने विद्यार्थी एकजना चासो देखाउने व्यक्ति थियो जससँग हाम्रो यी अग्रगामी भाइले स्कूलमा बाइबल अध्ययन गरेको थियो। प्रथम हुने चाहिं त्यसै स्कूलको अर्को एकजना जोसिलो साक्षी थियो।
११ प्राचीनहरू आफूले गर्नुपर्ने काम पूरा गर्छन्: अग्रगामीले गरेको कामप्रति गर्व महसुस गर्ने प्राचीनहरू यी जोसिला सेवकहरूलाई ठूलो प्रोत्साहन दिन्छन्। प्राचीनहरू यसो गर्न कुनै झिझो मान्दैनन् किनभने मेहनती, फलदायी अग्रगामीहरू कुनै पनि मण्डलीका लागि एउटा आशिष हुन् भनेर तिनीहरूलाई थाहा छ। नियमित अग्रगामीको काम एक-दुई वर्षजति गरी सकेपछि त्यस्ता व्यक्तिहरू अग्रगामी सेवा पाठशालाले दिने अतिरिक्त प्रशिक्षणका लागि योग्य हुन्छन्। अग्रगामीहरूको प्रभावकारितालाई उन्नति गराउनमा यो तालिम मूल्यवान साधन साबित भइसकेको छ। अग्रगामीहरू प्रचार गर्ने कामको अग्रिम-पङ्कितमा भए तापनि तिनीहरूलाई पनि मायालु प्रोत्साहनको जरुरत पर्दछ र यो आवश्यकतालाई पूरा गर्न प्राचीनहरू जागरूक हुनुपर्छ।—१ पत्रु० ५:१-३.
१२ नियमित अग्रगामीको कामलाई प्राचीनहरूले कसरी प्रेरणा दिन सक्छ? नियमित अग्रगामीको काम गर्न उत्सुकता देखाउने व्यक्ति योग्य छ कि छैन भनी समय-समयमा मूल्याङ्कन गर्नु यो काम सुरु गर्ने एउटा राम्रो तरिका हुनेछ। नियमित रूपमा काम गरिरहेका सहायक अग्रगामीहरू, अवकास प्राप्त व्यक्तिहरू, गृहणीहरू र विद्यार्थीहरू लगायत अरू जो-जो व्यक्तिहरू यो अग्रगामीको काम गर्न सक्ने अवस्थामा छन् प्राचीनहरूले व्यक्तिगत रूपमा तिनीहरूलाई भेट्न सक्नुपर्छ। हुनत आफ्नो नाउँ जबरदस्ती लेखाउनै पर्छ भनेर कसैलाई पनि अनुभव गर्न दिनु हुँदैन। तापनि अग्रगामीको काम गर्ने इच्छा भएका तर त्यसो गर्न हिचकिचाइरहेका व्यक्तिहरूलाई अलिकति व्यावहारिक प्रोत्साहन दिंदा यो काम आफूले गर्न सकिने रहेछ भनेर तिनीहरूले महसुस गर्न सक्छन्।
१३ प्राचीनहरूले आवेदन दिन चाहनेहरूलाई सल्लाह दिंदा, नियमित अग्रगामीको कामका लागि आफ्नो नाउँ लेखाउन आवेदकले केही महिना सहायक अग्रगामीको काममा बिताउनु पर्ने आवश्यकता छैन भन्ने कुरालाई याद राख्नुपर्छ। (km10/86 अनु० २४-२५) तर चाहिए जति घण्टा आवेदकले बुझाउन सक्छ कि सक्दैन भनेर प्राचीनहरू अवश्य पनि उचित रूपमा निश्चित हुन चाहनेछन्।
१४ मण्डलीको सेवा समितिले आवेदनलाई पुनरावलोकन गरी सकेपछि र सबै प्रश्नहरूको उत्तर दिएको छ कि छैन भनेर निश्चित गर्न सेक्रेटरीले त्यसलाई ध्यानपूर्वक जाँची सकेपछि त्यस आवदेनलाई तुरून्त सोसाइटीमा पठाउनु पर्छ।
१५ नियमित अग्रगामीहरूले भोगिरहेको कुनैपनि समस्याहरूबारे सेक्रेटरीले प्राचीनहरूलाई अवगत गराइराख्नुपर्छ। विशेषगरि धेरै अग्रगामीहरू भएका मण्डलीहरूमा यो आवश्यक छ। कंग्रीगेसन एनालाइसिस रिपोर्ट (S-10)-मा अनुरोध गरेझैं हरेक सेवा वर्षको अन्तमा नियमित अग्रगामीहरूका कार्यकलापहरूलाई पुनरावलोकन गर्नुपर्छ। यसबाहेक चाहिएको जति घण्टा बुझाउन नसकिरहेका वा व्यक्तिगत ध्यान दिनुपर्ने आवश्यकता परेकाहरूलाई भेट्न सेक्रेटरीले मार्चको सुरुवातमै आफूलाई भेट्न सेवा निरीक्षकलाई आमन्त्रित गर्नुपर्छ। (फेब्रुअरी १९९३-को हाम्रो राज्य सेवकाई-मा दिएका घोषणाहरूलाई हेर्नुहोस्) यसप्रकार चाँडै समयमै मदत दिएमा अग्रगामीले आफ्नो सेवा वर्षलाई सफलतापूर्वक पूरा गर्न सक्नेछ।
१६ धेरैजस्ता नयाँ नियमित अग्रगामीहरू कम उमेरका छन् र सच्चाइमा पनि अरूको दाँजोमा नयाँ नै छन्। तिनीहरूले देखाएको इच्छुक प्रवृत्तिले अवश्य हामीलाई आनन्दित तुल्याउँछ! तर घर-घरको प्रचार कार्यमा, प्रभावकारी पुनभेटहरू गर्न र बाइबल अध्ययनहरूमा सिकाउने कुरामा निपुणता हासिल गर्न यी नयाँ व्यक्तिहरूलाई अझै पनि प्रशिक्षणको खाँचो छ। यस्तो प्रशिक्षण नपाएमा नयाँ व्यक्तिहरू एक-दुई वर्षपछि निरूत्साहित हुन सक्छन् र आखिरमा गएर सेवकाईमा राम्रो फलहरू नपाएका कारण अग्रगामी सेवालाई समेत छाडिदिन सक्छन्। सतर्क प्राचीनहरूले यस्ता साना-साना समस्याहरूलाई वा क्रियाकलापमा सुस्तिपना आउँदै गरेको चाल पाउन सक्छन्। तुरून्त ध्यान दिएमा र अग्रगामीलाई आफ्नो समस्या समाधान गर्न मदत दिएमा तिनले धेरै वर्षसम्म फलदायी सेवाको आनन्द उठाउन सक्नेछन्।
१७ के तपाईं टाढा-टाढाका पानीहरूमा माछा मार्न सक्नुहुन्छ?: येशूका केही चेलाहरू जलारीहरू थिए। कहिलेकाहीं रातभरि माछा मार्दा पनि तिनीहरूको जाल रित्तै रहन्थ्यो। (यूहन्ना २१:३) कैयौं वर्षदेखि ‘मानिसहरूलाई माछा झैं समात्ने’ काम भइरहेको यस देशको केही शहरहरूमा ठूल-ठूला मण्डलीहरू छन् र यी मण्डलीका जोसिला साक्षीहरूले ‘माछा मार्ने काम’-को हेरविचार गरिरहेका छन्। आफ्नो मण्डलीको “पानी”-मा कम “माछा” मात्र बाँकी छ भनेर कसै-कसैले विचार गर्न पनि सक्छन्। (मत्ती ४:१९) तर यसको तुलनामा अरू शहरहरूबाट त्यहाँका प्रकाशकहरू र अग्रगामीहरूले थुप्रै बाइबल अध्ययनहरू सञ्चालन गरेको रिपोर्टहरू सुन्न पाउँदा के हामी खुशीले रोमाञ्चित हुँदैनौं र? यी शहरहरूमा अग्रगामीहरूले अनुभव गरेको प्रसन्नता एकदम प्रत्यक्ष छ। (w92 9/1 पृ० २० अनु० १५) अतः बढ्ता आवश्यक परेका शहरहरूमा यदि केही मेहनती नियमित अग्रगामीहरू स्वेच्छापूर्वक जान सक्ने अवस्थामा छन् र त्यसो गर्ने विचार पनि गरिरहेका छन् भने तिनीहरूले त्यस्तो कुनै कदम चाल्नु अघि शाखा दफ्तरसँग सम्पर्क राख्नुपर्छ।
१८ सुरु-सुरूमा, यो एउटा गर्नुपर्ने ठीक काम हो भनेर कसै-कसैले अग्रगामीको काम सुरु गरेको हुन सक्छ तर पछि भने आफूले यसमा सफलता हासिल गर्न नसकिने पो हो कि भनेर सोचमा परेको हुन सक्छ। शायद केही शंकाहरू वा शर्तहरू राखेर तिनीहरूले आवेदन दिएको पनि हुन सक्छ। सुरु-सुरुमा तिनीहरूले क्षेत्र सेवकाईमा पाएको फल पनि निकै कम भएको हुन सक्छ। तथापि, समय बित्दै जाँदा तिनीहरूको कौशलतामा वृद्धि हुँदै गयो र तिनीहरूको काममा यहोवाको आशिष भएको प्रमाण पनि देखियो। त्यसले गर्दा तिनीहरूको आनन्द र हौसला पनि बढ्यो। कसै-कसैका लागि बेथेल सेवा र परिभ्रमण कार्यका लागि अग्रगामीको काम एउटा खुड्किलो सरह हुनगएको छ।
१९ शायद टाढा-टाढाको शहरमा एकजना नियमित अग्रगामी भएर बसाइँ सर्न तपाईंको निम्ति सम्भव नहोला, तर तपाईंले हाल काम गर्नु भइरहेको क्षेत्र त्यति फलदायी छैन भने अरू पानीहरूमा, हुनसक्छ शायद तपाईंको आफ्नै क्षेत्रमा तपाईंका निम्ति माछा मार्ने मौकाहरू भएको हुनसक्छ। यस्तो कदम चल्न तपाईंले आफ्नो जीवन-शैलीमा छाँटकाँट गर्नुपर्ने जरुरी हुन सक्छ तर आध्यात्मिक इनामहरू भने निस्सन्देह प्रशस्तै हुनेछन्।—मत्ती ६:१९-२१.
२० अथवा तपाईंका परिस्थितिहरूले दिन्छन् भने तपाईंको आफ्नै क्षेत्रभित्र पर्ने नजिकैको मण्डलीलाई पनि तपाईं मदत गर्न सक्नुहुन्छ। तपाईं योग्य ठहरिनुभएमा तपाईंलाई त्यस क्षेत्रका मण्डलीहरूको जानकारी दिन तपाईंको क्षेत्र निरीक्षक खुशी हुनेछ जुन मण्डलीहरूले एकजना अग्रगामीबाट फाइदा उठाउनेछ।
२१ केही अग्रगामीहरू र प्रकाशकहरू आफ्नो घरमै बसेर आफ्नो क्षेत्रको आवश्यकतालाई पूरा गर्न सकिरहेका छन्। तिनीहरूले अर्को भाषा जानेको हुन सक्छ। के तपाईंको प्रचार गर्ने क्षेत्रमा मानिसहरूको एउटा निकै ठूलो जमातले अर्कै भाषा बोल्ने गर्छन्? के तिनीहरूकै भाषामा कसैले राज्यको समाचार प्रस्तुत गरिदिएको रुचाउने मानिसहरू छन्? सब प्रकारका मानिसहरूकहाँ राज्य समाचारलाई पुऱ्याउन अर्को भाषाको ज्ञान भएकाहरू ठूलो मदत हुन सक्छन्। यो एउटा चुनौतिपूर्ण काम भए तापनि यो अति नै फलदायी साबित पनि हुन सक्छ।—१ ति० २:४; ती० २:११.
२२ यहोवाको आदर गर्न यदि तपाईंले गर्नसक्नु हुनेजति सबै गरी रहनुभएको छ भने तपाईंले अहिले सेवा गर्न पाउनु भएको सुअवसरहरूमा आनन्द मनाउनुहोस्। तपाईंका परिस्थितिहरूले तपाईंलाई के के परिवर्तनहरू गर्न अनुमति दिन सक्छ भनेर व्यावहारिक ढङ्गमा केलाउनुहोस्। अग्रगामीको प्रवृत्ति भएको एकजना प्राचीन वा क्षेत्र निरीक्षकलाई आफ्नो योजनाहरू बताउनुहोस्। प्रार्थनापूर्वक व्यावहारिक निर्णय गरी सक्नुभएपछि त्यसलाई तुरुन्त काममा ल्याइहाल्नुहोस् र उहाँको आदर गर्नेहरूलाई उहाँले पनि आदर गर्नुहुन्छ भनेर यहोवाले गर्नुभएको प्रतिज्ञामा आश्वस्त हुनुहोस्।—हिब्रू १३:५, ६; १ शमू० २:३०.