अप्रिल महिनाको दौडान के तपाईं यहोवाको अझ बढी प्रशंसा गर्न सक्नुहुन्छ?
१ यहोवालाई ग्रहणयोग्य प्रशंसा चढाउने हृद्गत इच्छा भजनरचयिता दाऊदको थियो। त्यसैकारण उनले यो उद्गार गरे: “म मेरो मुखले परमप्रभुमा पूरा धन्यवाद चढाउनेछु, धेरै भीडको बीचमा म उहाँको प्रशंसा गर्नेछु।” (भजन १०९:३०) क्षेत्र सेवकाईमा अझ ठूलो भाग लिंदै यहोवाको ‘ज्यादा से ज्यादा प्रशंसा’ गर्ने खास मौका हामीलाई पनि अप्रिल महिनामा उपलब्ध छ। (भजन ७१:१४) तसर्थ यस मौकाको फायदा उठाउने अरू थुप्रै भाइ-बहिनीहरूसित सामेल हुन के तपाईं पनि सहायक अग्रगामी हुने सुरसार गर्नु हुँदैछ?
२ अहिलेदेखि नै योजना मिलाउनु होस्: हितोपदेश २१:५-मा हामीलाई यस सिद्धान्तको सम्झना गराइएको छ: “पूर्व-सोच र परिश्रमले अवश्य लाभ ल्याउँछ।” पूर्व-सोच र परिश्रम गर्नुको अर्थ सर्वप्रथम प्रार्थनाद्वारा यहोवामा मामिला जाहेर गराइ दिनु हो। आफूले बनाएका योजनाहरूमा उहाँलाई प्रथम स्थान दिनु हो। (हितो० ३:५, ६) अनि प्रति दिन सेवकाईमा करीब दुई घण्टा बिताउनका लागि आफ्नो दैनिक कार्यक्रममा के कति छाँटकाँट गर्नु आवश्यक छ, सो राम्ररी विचार गर्नु हो। तपाईंले अन्य कामधन्दाबाट फुर्सत “किन्नु, [न्यु व०]” भयो भने प्रचार कार्यमा अझ बढी समय बिताउन सक्नु हुनेछ।—एफि० ५:१६.
३ आपस्तमा सरसल्लाह र सहयोग गर्नु होस्: आफ्नो सेवकाई पूरा गर्दा प्रेरित पावलले कसै कसैबाट “सान्त्वना” पाएको विषयमा चर्चा गरे। (कल० ४:११) तपाईं पनि अप्रिल महिनामा सहायक अग्रगामी हुन चाहनेहरूसित आफ्नो योजनाबारे छलफल गर्नु होस्। तिनीहरूको साथ र समर्थन, तपाईं र तिनीहरू दुवैका लागि आत्मिक तवरमा लाभप्रद हुनेछ। सेवकाई प्रबन्धहरू अथवा प्रचार क्षेत्रबारे तपाईंका केही प्रश्नहरू छन् भने सेवा निरीक्षकले तपाईंलाई मदत दिन सक्ने छन्।
४ पारिवारिक सहयोग र समर्थनद्वारा परिवारका विभिन्न सदस्यहरूले सहायक अग्रगामी हुने मदत पाउन सक्छन्। घरको कामकाजलाई पनि अस्थायी रूपमा पुनर्विभाजित गर्न आवश्यक पर्न सक्छ। ती कामकाज गर्ने समय र क्रममा पनि अदलबदल गर्ने खाँचो पर्न सक्छ। सपरिवार बसेर यी जम्मै कुराहरूको चाँजो मिलाउनु तपाईंको लक्ष्य-प्राप्तिका लागि फायदाजनक हुन सक्छ। किनकि आपस्तमा राम्रो कुराकानी र सहयोग नै सफलताको कुँजी हो।
५ सकारात्मक दृष्टिकोण कायम राख्नु होस्: अनुकूल परिस्थिति छैन भन्दैमा सहायक अग्रगामी हुने सम्भावनालाई तुरुन्तै नपन्छाउनु होस्। स्कूल पढ्ने जवान मानिसहरू, अवकाश लिएका पाकाहरू, छोराछोरी भएका गृहणीहरू, दिनभरि काम गर्ने पति वा पिताहरू—सबैले नै अप्रिल महिनामा सहायक अग्रगामी सेवा गर्नका लागि कतिपय कुरा खुशीसित त्यागेका छन्। “सोझा मनकाहरूले स्तुति गर्न सुहाउँछ” भन्ने भजनरचयिताको कुरासित तिनीहरू सहमत छन्। सेवकाईमा ६० घण्टा बिताउनका लागि तिनीहरू हर कठिन प्रयास वा त्याग गर्न तयार भएका छन्। (भजन ३३:१) तर अग्रगामी सेवामा भाग लिन तपाईं असमर्थ नै हुनु हुन्छ भने पनि त्यसको आनन्दमा चाहिं सामेल हुनु होस्। कम से कम प्रकाशकको हैसियतमा आफ्नो सेवकाई सम्बन्धी गतिविधि बढाउनु होस्।
६ नियमित अग्रगामी सेवा तर्फ बढ्दा अक्सर अप्रिल महिनाको सहायक अग्रगामी सेवा धेरैका लागि टेक्ने प्राथमिक पाइलो साबित भएको छ। सहायक अग्रगामी सेवाद्वारा तिनीहरूले क्षेत्र सेवकाईमा बढी समय बिताउने बानी बसाल्न सके। यसले गर्दा तिनीहरूलाई नियमित अग्रगामी सेवा गर्न थाल्नु धेरै नै सजिलो भयो।
७ हो, आफ्नो ईश्वरतान्त्रिक गतिविधि बढाउनका लागि अप्रिल महिनाको मौसम पनि सुहाउँदो छ। दिनहरू लामो भएको हुनाले बिहानीपख र बेलुकी अबेरसम्म साक्षी दिने काममा बढी समय बिताउन सकिन्छ। हाम्रो परमेश्वर यहोवाको प्रशंसा गाउन हामी यथासक्दो गर्न चाहन्छौं। उहाँले हामीप्रति दर्शाउनु भएको अपार करुणाको मूल्याङ्कन गर्ने एउटा राम्रो तरिका अप्रिल महिनामा सहायक अग्रगामी सेवा गर्नु हो।