Yehova anakulighire?

1. Abaghombe bataleghula ba Yehova banganayowa bati?

KIKASUBAYA mutima eriminya ngoko Yehova alighire abandu biwe bosi! EBiblia ikabugha yiti: “[Yehova] akatsemera abandu buwe.” (Esy. 149:4) Oko ndambi silebe, abandu balebe banganabunika mutima neryo ibatsuka eriyibulya bati: “Naghe, Yehova ananilighire kwe?” Abangyi b’oko baghombe biwe bataleghula abakanibweko omo Biblia, nabo muhanabya omughulu bamayowa batya.​—1 Sam. 1:6-10; Yobu 29:2, 4; Esy. 51:11.

2. Yehova akaligha abandu abali bati?

² EBiblia ikakanganaya ndeke-ndeke ngoko nibya n’abandu abatahika-hikene banganaliwa na Yehova. Bati? Tutolere itwikirirya Yesu n’eribatisibwa. (Yoh. 3:16) Omo nzira eyo, tukakanganaya ngoko twabiriyisubako oko malolo wetu n’erilagha oMungu ngoko tukendikola erisonda liwe. (Emib. 2:38; 3:19) Yehova akatsema kutsibu omughulu tukakola emyatsi eyo, tukasonda eribya bira biwe. Twamalola embere eriyikasa erisikya eriyilagha lyetu, Yehova inyakendituligha n’eritulangira mo bira biwe kundu.​—Esy. 25:14.

3. Tukendisubirya oko mabulyo wahi asatu?

³ Neryo busanaki hakanabya endambi abandu balebe ibayowa oMungu nga syalighirebo? Yehova akakanganaya ati ngoko atulighire? Kandi Omukristo angaminya ati ngoko Mungu amulighire?

BUSANAKI ABANDU BALEBE BANGANALENGEKANIA BATI ALINGA YEHOVA SYALIGHIREBO?

4-5. Nomo twanganayowa nga situli b’omughaso, litolere itwikiriryaki?

⁴ Abangyi b’omw’itwe, eritsuka omo bwana bwabo, bakayowa nga si bandu b’omughaso n’ahake. (Esy. 88:15) Mughala wetu oyukahulawa mo Adrián akabugha ati: “Eritsuka kera ngayowa mo mundu bule. Namibuka omughulu nabya mwana, ingasaba niti ngambe ekihanda kyetu ikingira omo Paradiso, nomo nabya ngalengekania niti ingye sinitolere eribya omo Paradiso.” Tony, oyowakulira omo kihanda ekite ky’Abimiri ba Yehova akabugha ati: “Ababuti baghe isibalibatanibwira n’ekiro n’ekighuma bati banyanzire kutse bati bakanitsemera.” Ekyo mukyaleka inatsuka erilengekania niti sinangatoka erikola omwatsi owangabatsemesya.

⁵ Hamabya endambi itwayowa nga situli b’omughaso, ngambe itwibuka ngoko Yehova iyuwene-wene yowatuleta okw’iye. (Yoh. 6:44) Yehova akalangira emibere yetu eyuwene kandi atwasi ndeke kulenga ngoko tuyasi. (1 Sam. 16:7; 2 Emy. 6:30) Neryo amabitubwira ati atwanzire, ngambe itwaligha.​—1 Yoh. 3:19, 20.

6. Paulo inyakayowa ati busana n’amalolo wiwe wa kera?

⁶ Embere w’erigha ekwenene, abandu balebe b’omw’itwe mubakola emyatsi eyikaleka erihika munabwire ibayowa nga bakineko musango. (1 Pet. 4:3) Nibya n’Abakristo bataleghula ababirikolera Yehova omo myaka mingyi banganabya ibakinalwa n’obulema bulebe. Naghu biri biti okw’iwe? Hakanabya endambi iwayowa Yehova nga syangakughanyira? Kyamabya kitya okw’iwe, kyanganakusikya mutima eriminya ngoko n’abaghombe balebe bataleghula ba Yehova mubayowa batya. Ng’eky’erileberyako, omukwenda Paulo inakayowa mo mundu bule akalengekania oko makosa wiwe. (Rom. 7:24) Aliwe, Paulo mwalekana n’amalolo wiwe neryo amabatisibwa. Nomo byanabya bitya, inyakayilangira mo “mulere omo bakwenda bosi” kandi “w’erimbere” omo bakola nabi.​—1 Kor. 15:9; 1 Tim. 1:15.

7. Litolere itwaminyaki oko malolo agho twakola kera?

⁷ Tata wetu w’elubula akatulagha obughanyiri twamabiyisubako. (Esy. 86:5) Neryo twamabya itwabirimusaba obughanyiri erilua oko mutima busana n’amalolo agho twakola, twanganikirirya ngoko ebyo atulagha ni kwenene kandi abiritughanyira.​—Kol. 2:13.

8-9. Twangayihighula tuti okwibya tukalengekania nga sitwangatoka eritsemesya Yehova n’ahake?

⁸ Itwe bosi twanzire erikolera Yehova ngoko twangatoka. Aliwe, abandi bakalangira nga sibatolere eriliwa na Yehova. Mwali wetu Amanda akabugha ati: “Ingalengekanaya niti eriha Yehova ekyuwene ry’eribya ngamuha bingyi kulenga ebyo nibeghere erimuha. Neryo kwesi, ingayikasa erikola bingyi kulenga obutoki bwaghe. Neryo, ingabya nataluka erihikira ebyo niryayihiriraho erikola, ingalengekanaya niti Yehova abirinipona ngoko naye nabiriyipona.”

⁹ Twangakola tuti erikinda amalengekania aw’eribugha tuti sitwangatoka n’ahake eritsemesya Yehova? Wibuke ngoko Yehova syalitusaba ebyo tutetwangatoka. Syalitulindirirako emyatsi eyilengire obutoki bwetu. Akatsemera ekyosi-kyosi ekyo tukamukolera ngoko twangatoka. Kandi, ulengekanaye n’oko by’erileberyako eby’abandu ab’omo Biblia abakolera Yehova n’omutima wabo wosi. Twimaye eky’erileberyako kya Paulo. Paulo mwakola bingyi oko myaka mingyi. Mwabalama amaelfu w’ebilometre n’eritsukisya esyondeko nyingyi. Aliwe, emyatsi yabere yabinduka omo ngebe yiwe, neryo isyangatasyatulira ndeke ngoko abya akakola embere, ekyo mukyanasonda eribugha kiti Yehova syakimulighire? Iyehe. Paulo mwalola embere erikola ngoko angatoka, na Yehova mwamutsumula. (Emib. 28:30, 31) Netu kutya, ebyo tukaha Yehova byanganabinduka. Aliwe ebyo Yehova akatsemera okw’itwe, si by’ebyo tukamuha, aliwe akatsemera ekikatukuna erimukolera. Kwesi, muleke tulangire esyonzira silebe esikakanganaya ngoko Yehova atulighire.

YEHOVA AKAKANGANAYA ATI NGOKO ATULIGHIRE?

10. Twanganowa tuti Yehova akatubwira ngoko atulighire? (Yohana 16:27)

¹⁰ Erilabira eBiblia. Yehova akasondekanaya ehyanya ehy’erikangania abandu biwe ngoko anzirebo kandi ngoko akatsemerabo. Amasako akakanaya oko esyongendo ibiri esyo Yehova abwira Yesu ngoko ni Mughala wiwe mwanzwa kandi ngoko amulighire. (Mat. 3:17; 17:5) Naghu unanzire eryowa Yehova akabugha ati akulighire? Munabwire situlyowa omulenge wa Yehova akalua elububa, aliwe akakanaya netu erilabira eBiblia. Omughulu tukasoma ebinywa ebyo lwanzo ebyo Yesu abya akabwira abigha biwe, tukabya nga tunemwowa ebinywa by’olwanzo ebyo Yehova akatubwira. (Soma Yohana 16:27.) Yesu mwakangania ndeke-ndeke emibere ya Tata wiwe. Neryo, omughulu tukasoma ngoko Yesu abya akabwira abakwenda biwe bataleghula ngoko alighirebo, nomo babya isibahika-hikene, twanganayihira omo mwanya wabo n’erilangira nga n’itwe Yehova akabwira ebinywa ebyo.​—Yoh. 15:9, 15.

11. Busanaki amaligho amabituhikira ekyo sikisondire eribugha kiti Yehova syakitulighire? (Yakobo 1:12)

¹¹ Erilabira emikolere yiwe. Yehova anzire kutsibu erituwatikya, ng’erituha ebyo tulaghireko kinya-mubiri. Aliwe, ndambi silebe, Yehova anganaleka itwahikirwa n’amaghali ngoko anakola oko mutaleghula Yobu. (Yobu 1:8-11) Twamahikirwa n’amaligho, ekyo sikisondire eribugha kiti oMungu syakitulighire. Aliwe, ako kakabya kanya ak’erikangania Yehova ngoko tumwanzire kutsibu kandi ngoko tuyiketere iye. (Soma Yakobo 1:12.) Kandi omughulu tunemulaba omo maligho tukayilangirira ngoko Yehova atwanzire kutsibu kandi ngoko akatuwatikaya eriyiyinia.

12. Eky’erileberyako kya Dmitrii kyamakwighisyaki?

¹² Tulebaye eky’erileberyako eky’omughala wetu Dmitrii ow’omo Asia. Mwaherya omubiiri wiwe, neryo mwabugha emisi mingyi isyalyabana oghundi mubiiri. Erikangania ngoko ayiketere Yehova, mwayisogha eritsuka erikola bingyi omo mubiiri w’eritulira. Emisi mingyi muyalaba isyalyabana omubiiri. Neryo mwalwala kandi isyangalua omo ngyingo. Neryo mwatsuka eritika-tika akayibulya ng’akine mwira oyuwene kandi baba oyuwene; nibya mwayibulya Yehova ng’akinamulighire. Aliwe kiro kighuma omwigholo, akasika kiwe mukahandika oko karatasi ebinywa bino ebikabanika omo Isaya 30:15 ebikabugha biti: ‘Amaka wenyu asyabya omwiyibombeka n’eriyiketera.’ Neryo akambesa ako mukaletera tata wako y’akaratasi ako n’erimubwira kati: “Baba, omughulu ukendibya ukayowa muhanda, ubye ukibuka erisako rino.” Dmitrii mwayilangirira ngoko, omo buwatikya bwa Yehova, ekihanda kiwe ikikabana akalyo k’erirya, esyongyimba esy’eryambala n’ah’erighotsera. Dmitrii akabugha ati: “Ekyo nabya nitolere erikola ry’eriyibombeka n’erilola embere eriyiketera oMungu waghe.” Wamabya ighunemulaba omo maligho, wanganayiketera ngoko Yehova akutsomene kandi akendikuwatikya eriyiyinia.

13. Yehova anganakolesya bahi eritukangania ngoko akinatulighire, kandi akakola ekyo ky’ati?

¹³ Erilabira Abakristo balikyetu. Yehova akakolesaya abaghala n’abali betu eritukangania ngoko atulighire. Ng’eky’erileberyako, anganakuna abandi eritubwira ebinywa ebikatusubaya mutima omughulu tulaghire kubyo. Mwali wetu oywikere omo Asia mwayilangirira ekyo akalaba omo mighulu eyikalire. Omubiiri wiwe mwahwa naye amalwala kutsibu. Kandi omwira wiwe mwakola erilolo erikalire, neryo obusyakulu bwiwe bwamahwa. Akabugha ati: “Munayibulya ebyosi ebyo nga bikanihikira busanaki. Munalengekania niti alinga nabirikola erilolo kutse Yehova syakinilighire.” Neryo mwali wetu oyo mwalilira Yehova akamusaba ati amukanganaye ngoko akinamulighire. Yehova mwakangania ati ngoko akinamulighire? Mwali wetu akabugha ati, “abasyakulu b’endeko mubakania naghe n’eriniwatikya erilangira ngoko Yehova akinanyanzire.” Kandi ebiro byabere byalaba mwali wetu oyo mwasaba Yehova atasyamukangania ngoko akinamulighire. Akabugha ati: “Ekiro kighumerera ekyo, munabana ebaruha erilua oko baghala n’abali betu b’omo ndeko yetu. Neryo omughulu nabya ngasoma ebinywa byabo eby’erinisikya mutima munaminya ngoko Yehova mwanihulikirira.” Kwenene, Yehova akakolesaya ebinywa eby’erisubya mutima erilua oko bandi akatukangania ngoko akinatulighire.​—Esy. 10:17.

14. Ni yindi nzira yahi eyo Yehova akakanganayamo ngoko atulighire?

¹⁴ Kandi Yehova anganatukangania ngoko atulighire omwikolesya Abakristo balikyetu batuhe amahano agho tulaghireko. Ng’eky’erileberyako, oko mughulu w’Abakwenda, Yehova mwakolesya omukwenda Paulo erihandikira Abakristo balikyabo esyobaruha 14 esyasondolawa n’ekirimu kiwe. Esyobaruha esyo syabyamo amahano awakalire aliwe awalimo olwanzo. Busanaki Yehova mwasondola Paulo ahandike amahano ayo? Ni kundi Yehova ni Tata oyuwene kandi akakunga abana biwe abo “akatsemera.” (Misyo 3:11, 12) Neryo, omughulu omundu mulebe akatuha erihano erilua omo Biblia, ekyo sikisondire eribugha kiti Yehova abiritupona. Aliwe, kisondire eribugha kiti Yehova atwanzire. (Ebr. 12:6) Ni yindi mwatsi yahi eyikakanganaya ngoko Yehova anatulighire?

EYINDI MYATSI EYIKAKANGANAYA NGOKO YEHOVA ANATULIGHIRE

15. Yehova akaha ekirimu kiwe kibuyirire oko bahi, n’ekyo kikaleka itwikiriryaki?

¹⁵ Yehova akaha ekirimu kibuyirire oko bandu abo alighire. (Mat. 12:18) Twanganayibulya tuti: ‘Ninemukangania emibere milebe eyikalua oko kirimu kibuyirire?’ Munabwire ukanahanda omutima oko baghala n’abali betu kwilaba ngoko wabya ukakola omughulu watsuka erigha eBiblia? Wamabilola embere erikangania emibere eyikalua oko kirimu kibuyirire, ekyo ikikendikuwatikya erikirirya ndeke-ndeke ngoko Yehova anakulighire!​—Ulebaye akasanduku “Emibere y’ekirimu yeno . . .”

16. Yehova abiriha abandu bahi omubiiri w’eritulira engulu mbuya, n’ekyo kikaleka iwayowa uti? (1 Abanya Tesalonika 2:4)

¹⁶ Yehova akanza eriha omubiiri w’eritula engulu mbuya oko bandu abo alighire. (Soma 1 Abanya Tesalonika 2:4.) Tulebaye ngoko mwali wetu oyukahulawa mo Jocelyn mwabana endundi akatulira engulu mbuya oko bandi. Kiro kighuma, Jocelyn mwabuka inyabiriyowa muhanda. Akabugha ati: “Munayowa nga nabiriluha kandi nga sinangatoka erikola mwatsi. Aliwe nabya mupainia kandi ekiro ekyo ini kiro kyaghe eky’eriyatulira. Neryo munasaba, namaya omo mahubiri.” Omo tututu eyo, mwali wetu Jocelyn mwahindana na Mary, omukali oyukabugha ndeke, kandi amaligha erigha eBiblia. Emisi milebe enyuma, Mary mwabwira Jocelyn ngoko abya akasaba obuwatikya omughulu Jocelyn asyakongota oko mulango wiwe. Akalengekania oko mwatsi oyo, Jocelyn akabugha ati: “Munayowa Yehova ng’akanibwira ati, ‘ninakulighire Jocelyn.’” Oko kwenene, si b’abosi bo bakahulikirira engulu mbuya eyo tukabatwalira. Aliwe, litolere itwikirirya ngoko Yehova akatsema kutsibu omughulu tukayikasa eritulira engulu mbuya oko bandi.

17. Ebyo mwali wetu Vicky abugha oko mbanulo byamakwighisyaki? (Esyonyimbo 5:11)

¹⁷ Yehova mwakolesya obughuli bw’embanulo oko bandu abo alighire. (1 Tim. 2:5, 6) Aliwe, tubughe tutiki twamabya itunikirirye embanulo kandi itwabiribatisibwa, aliwe itukinayowa Yehova nga syatulighire? Twibuke ngoko, biro byosi sitwangabya tukayiketera eriyowa lyetu, aliwe Yehova yo twangayiketera. Yehova akalangira abosi abali n’obwikirirya omo mbanulo mo batunganene, kandi abirilagha erisyatsumulabo. (Soma Esyonyimbo 5:11; Rom. 3:26) Eribya akalengekania oko mbanulo mukyawatikya mwali wetu Vicky. Kiro kighuma, akalengekania kutsibu oko mbanulo, mwafumbula kino, mwabugha ati: “Yehova abirinikangania oko biro bingyi ngoko anyanzire. . . . Aliwe, n’ingye nabya nga ngabwira Yehova niti: ‘Siwanganza omundu oyuli nga ngye. Embanulo y’Omwana waghu siyangatoka eriswika amalolo waghe wosi.’” Eribya akalengekania kutsibu oko kihembo ky’embanulo mukyaleka inyayilangirira ngoko Yehova amwanzire. Netu kutya, tukayilangirira ngoko Yehova atwanzire kandi atulighire omwibya tukalengekania oko mbanulo.

18. Twamabilola embere eryanza Tata wetu w’elubula twanganikiryaki?

¹⁸ Nomo twanganayikasa kutsibu erikolesya emyatsi eyo twamabigha omo mwatsi ono, hanganabya endambi itwabunika mutima n’eritsuka eritika-tika tukayibulya Yehova ng’anatulighire. Ekyo kyamabituhikira, ngambe itwibuka ngoko Yehova alighire “abateleka erimwanza.” (Yak. 1:12) Kwesi, ulole embere eriyitunda hakuhi na Yehova kandi uyikase erilangira emyatsi yosi eyikakanganaya ngoko Yehova akulighire. Kandi isiwasyabirirawa n’ekiro ne kighuma ngoko Yehova “syali hali oko buli mughuma w’okw’itwe.”​—Emib. 17:27.