Bo Por Mehorá Bo Orashonnan

1. Kiko Yehova ta pidi nos hasi? (Wak e plachi.)

ORA nos mester di konsuelo i guia, nos sa ku nos por aserká Yehova Dios den orashon. E mes ta pidi nos pa hasi esei. Beibel ta bisa nos pa “hasi orashon konstantemente.” Pues, nos tin sigur ku e ke pa nos papia kuné tur ora bai. (1 Tes. 5:17) Nos por pidié guia nos den tur aspekto di nos bida. (Pro. 3:5, 6) Yehova ta un Dios generoso ku ke pa nos hasi orashon na dje kuantu biaha ku nos ke.

2. Kiko nos ta bai trata den e artíkulo akí?

² Nos ta masha gradisidu na Yehova pasobra e ta permití nos hasi orashon na dje. Pero, kisas nos bida ta asina drùk ku tin biaha ta difísil pa traha tempu pa hasi orashon. Kisas nos sa ku nos tin ku mehorá nos orashonnan. P’esei, ta un gran alivio ku den Beibel nos por haña tantu animashon komo guia pa hasi eseinan. Den e artíkulo akí nos ta bai mira kon Hesus a traha tempu pa hasi orashon i kiko nos por siña for di dje. Tambe nos lo mira ku nos orashonnan lo mehorá si nos inkluí sinku kos importante den nan.

HESUS A TRAHA TEMPU PA HASI ORASHON

3. Kiko Hesus ta komprondé tokante orashon?

³ Hesus ta komprondé ku nos orashonnan ta masha importante pa Yehova. Hopi tempu promé ku el a bini na tera, el a mira su Tata kontestá orashon di Su fiel sirbidónan. Por ehèmpel, e tabata t’ei ora Yehova a kontestá orashon di Ana, David, Elías i hopi otro sirbidó fiel mas. (1 Sám. 1:10, 11, 20; 1 Rei. 19:4-6; Sal. 32:5) Ta p’esei Hesus a siña su disipelnan pa hasi orashon tur ora bai i ku konfiansa.—Mat. 7:7-11.

4. Ki ehèmpel Hesus a pone pa loke ta trata orashon?

⁴ Ora Hesus tabata riba tera, tur ora bai e tabata resa na Yehova. El a pone un bon ehèmpel pa su disipelnan. E mester a ègt traha tempu pa resa pasobra mayoria di biaha e tabata drùk i kasi tur ora tabatin hende rònt di dje. (Mar. 6:31, 45, 46) E tabata lanta mainta trempan ya asina ei e tabatin tempu pa ta su so pa hasi orashon. (Mar. 1:35) I na por lo ménos ún okashon, el a hasi orashon henter anochi promé ku el a tuma un desishon importante. (Luk. 6:12, 13) Anto bes tras bes el a hasi orashon e anochi promé ku el a muri, djis promé ku el a kumpli ku e parti mas difísil di su asignashon aki riba tera.—Mat. 26:39, 42, 44.

5. Kon nos por sigui Hesus su ehèmpel ora di hasi orashon?

⁵ Loke nos ta siña for di Hesus ta ku sin importá kon drùk nos por ta, nos tin ku traha tempu pa hasi orashon. Kisas meskos ku Hesus, pa nos apartá tempu pa hasi orashon nos tin ku lanta mainta un tiki mas trempan òf keda lantá un tiki mas lat. Ora nos hasi esei, nos ta mustra Yehova ku nos ta balorá e regalo di hasi orashon. Un ruman ku yama Lynne ta kòrda kon kontentu el a bira ora ku pa promé biaha el a haña sa tokante e privilegio di hasi orashon. El a bisa: “Ora m’a siña ku mi por a papia tur ora ku Yehova, esei a yuda mi mir’é komo mi bon Amigu i mi kier a mehorá mi orashonnan.” Sin duda bo tambe ke hasi meskos. P’esei, laga nos wak sinku kos importante ku nos por inkluí den nos orashonnan.

SINKU KOS IMPORTANTE PA INKLUÍ DEN ORASHON

6. Segun Revelashon 4:10 i 11, kiko Yehova ta digno di risibí?

⁶ Alabá Yehova. Den un vishon, Apòstel Huan a mira 24 ansiano den shelu ta adorá Yehova. Nan tabata alabá Dios i bisa ku e ta digno di risibí alabansa pa su “gloria, onor i poder.” (Lesa Revelashon 4:10, 11.) Angelnan fiel tambe tin hopi motibu pa alabá Yehova. Nan ta den shelu huntu kuné i a siña konos’é bon. Nan ta mira su kualidatnan den tur loke e ta hasi. I segun ku nan ta mira kon Yehova ta hasi kosnan, nan ta haña mas gana di alab’é.—Yòb 38:4-7.

7. Kiko ta algun kos ku nos por alabá Yehova p’e?

⁷ Nos tambe ke alabá Yehova. Den nos orashonnan nos por bis’é dikon nos ta stim’é i kiko nos gusta di dje. Segun ku bo ta lesa Beibel, purba di mira e kualidatnan ku bo gusta mas di Yehova. (Yòb 37:23; Rom. 11:33) I despues, bis’é kiko bo ta pensa tokante e kualidatnan ei. Nos por alabá Yehova tambe pa e yudansa ku e ta duna nos i nos rumannan rònt mundu. Semper lo e kuida i protehá nos.—1 Sám. 1:27; 2:1, 2.

8. Menshoná algun kos ku nos por yama Yehova danki p’e. (1 Tesalonisensenan 5:18)

⁸ Yama Yehova danki. Tin hopi kos ku nos por yama Yehova danki p’e. (Lesa 1 Tesalonisensenan 5:18.) Nos por yama Yehova danki pa tur e bon kosnan ku nos tin. Kon ku bai bin, tur bon regalo ta bini di dje. (Sant. 1:17) Por ehèmpel, nos por yam’é danki pa e bunita planeta ku nos ta biba riba dje i e kosnan maravioso ku el a krea. Nos por yam’é danki tambe pa nos bida, nos famia, nos amigunan i nos speransa. I klaru, nos por yam’é danki ku el a permití nos bira su amigu.

9. Dikon nos no tin ku lubidá di yama Yehova danki?

⁹ Nos tin ku hasi esfuerso pa pensa riba e motibunan ku nos tin pa yama Yehova danki. Dikon? Pasobra nos ta biba den un mundu malagradesí. Hopi biaha hende ta mas preokupá ku loke nan por haña ku mustra apresio pa loke ya nan tin. Si nos bira meskos ku nan, e úniko kos ku nos lo hasi den nos orashonnan ta keda pidi-pidi so. Pa evitá ku esei ta sosodé, semper nos tin ku sigui mustra apresio pa tur loke Yehova ta hasi pa nos i ekspresá esei.—Luk. 6:45.

10. Kon gratitut a yuda un ruman muhé pasa den un prueba difísil? (Wak e plachi.)

¹⁰ Ora nos ta gradisidu, esei lo yuda nos wanta prueba. Wak e ehèmpel di un ruman muhé ku yama Kyung-sook den E Toren di Vigilansia di 15 di yanüari 2015. El a haña sa ku e tabatin kanser di pulmon den un estado avansá. El a bisa: “E malesa akí a dal mi duru! M’a sinti ku m’a pèrdè tur kos, i mi tabata morto spantá.” Kiko a yud’é trata ku e situashon? El a konta ku tur anochi promé ku e bai drumi, e tabata bai sinta den e balkon riba dak i hasi orashon. E tabata menshoná na bos haltu sinku kos ku a pasa e dia ei ku e tabata gradisidu p’e. Esei a trankilis’é i a motiv’é pa ekspresá su amor pa Yehova. El a bin realisá ku Yehova ta sostené su fiel sirbidónan durante momentonan difísil i ku den bida nos tin hopi mas tantu bendishon ku nos tin problema. Meskos ku Kyung-sook, asta ora nos ta meimei di un prueba, nos tin hopi motibu pa yama Yehova danki. Ora nos ta gradisí Yehova den orashon, esei lo yuda nos wanta nos pruebanan i keda trankil.

11. Dikon Hesus su disipelnan tabatin mester di kurashi ora Hesus a bai bèk shelu?

¹¹ Pidi Yehova kurashi pa prediká. Nèt promé ku Hesus a bai bèk shelu, el a kòrda su disipelnan ku nan mester a duna testimonio tokante dje “na Herúsalèm, den henter Hudea i Samaria, i te na e parti mas leu di tera.” (Echo. 1:8; Luk. 24:46-48) Un poko tempu despues, e lidernan hudiu a arestá Pedro i Huan i a trese nan dilanti di Sanedrin. Ei nan a duna nan òrdu pa stòp di prediká i a asta menasá nan. (Echo. 4:18, 21) Kiko Pedro i Huan a hasi?

12. Segun Echonan 4:29 i 31, kiko e disipelnan a hasi?

¹² Ora Pedro i Huan a tende e menasa di e lidernan religioso, nan a kontestá nan: “Husga pa boso mes si den bista di Dios ta korekto pa skucha boso en bes di skucha Dios. Ma pa loke ta nos, nos no por stòp di papia tokante e kosnan ku nos a mira i tende.” (Echo. 4:19, 20) Ora nan a laga Pedro i Huan liber, e disipelnan a hasi orashon na bos haltu i a pidi Yehova pa yuda nan hasi su boluntat. Nan a resa: “Laga bo esklabonan sigui deklará bo palabra ku kurashi.” I Yehova a kontestá nan orashon.—Lesa Echonan 4:29, 31.

13. Kiko nos ta siña for di Jin-hyuk?

¹³ Meskos ku e disipelnan, nos lo sigui prediká asta ora outoridatnan eksigí pa nos stòp. Esei ta loke un ruman ku yama Jin-hyuk a hasi. E tabata den prizòn pa motibu ku e no kier a bira sòldá. Den prizòn e tabatin ku perkurá pa algun prezu ku tabata den kashòt. E tabatin mag di papia ku nan solamente tokante e kosnan ku nan tabatin mester pero no di Beibel. P’esei, el a pidi Yehova dun’é kurashi pa prediká tur chèns ku e haña i sin hala atenshon. (Echo. 5:29) El a bisa: “Yehova a kontestá mi orashon dor di duna mi kurashi i sabiduria pa dirigí estudio di Beibel di sinku minüt na porta di e sèlnan. Anto anochi mi tabata skirbi e kartanan ku mi tabata duna e prezunan e siguiente dia.” Nos tambe por tin sigur ku Yehova lo yuda nos kumpli ku nos sirbishi. Meskos ku Jin-hyuk, nos por resa pa kurashi i sabiduria.

14. Kiko nos por hasi pa trata ku problema? (Salmo 37:3, 5)

¹⁴ Pidi Yehova yudansa pa trata ku problema. Hopi di nos ta sufri debí na kosnan manera pèrdida di un ser kerí, persekushon, problema di salú, problema emoshonal òf problema den famia. I e pandemia- i gueranan a hasi e situashonnan akí mas pió. Kiko nos por hasi? Konta Yehova tur loke tin riba bo kurason. Papia kuné meskos ku lo bo a papia ku un bon amigu. Bo por tin sigur ku Yehova lo yuda bo.—Lesa Salmo 37:3, 5.

15. Kon orashon por yuda nos “wanta bou di tribulashon?” Duna un ehèmpel.

¹⁵ Pa nos por “wanta bou di tribulashon” nos tin ku perseverá den orashon. (Rom. 12:12) Yehova “ta tende [nos] gritu pa yudansa” i sa presis kiko nos ta pasando aden. (Sal. 145:18, 19) Kristie, un pionero di 29 aña, a eksperensiá esei. Ònferwagt, el a hañ’é ku problema grave di salú. Esei a pone ku el a bira masha deprimí. Mas despues, el a haña sa ku su mama tin un malesa terminal. Kristie a bisa: “M’a roga Yehova pa duna mi forsa pa kada dia. Mi tabata bai tur mi reunionnan i hasi mi estudio personal. Asina m’a purba di keda ku un bon rutina spiritual.” El a agregá: “Ora kosnan tabata pinta skur, orashon a yuda mi. Mi tabata sa ku Yehova semper t’ei pa mi i esei a trankilisá mi. Aunke mi problemanan di salú no a kita mesora, Yehova a duna mi pas i un kurason trankil.” Nunka lubidá ku “Yehova sa kon pa libra hende deboto na dje for di prueba.”—2 Ped. 2:9.

16. Dikon nos tin mester di Yehova su yudansa pa lucha kontra tentashon?

¹⁶ Pidi Yehova yudansa pa lucha kontra tentashon. Imperfekshon ta pone ku nos tin e tendensia di hasi loke ta robes i konstantemente nos tin ku lucha kontra esei. Anto Satanas ta hasi tur loke e por pa hasi e lucha ei mas difísil posibel. Un manera ku e ta purba esei ta di usa entretenimentu inmoral. Tipo di entretenimentu asina ta yena nos mente ku pensamentunan robes i sushi. Anto, e pensamentunan ei por laga nos kometé piká serio i pèrdè Yehova su aprobashon.—Mar. 7:21-23; Sant. 1:14, 15.

17. Despues ku nos pidi Yehova yudansa, kiko nos mes tin ku hasi? (Wak e plachi.)

¹⁷ Si nos ke lucha kontra tentashon pa hasi kosnan robes, nos mester di Yehova su yudansa. Hesus a inkluí lo siguiente den e orashon di Nos Tata: “No laga nos kai den tentashon, ma libra nos di e Malbado.” (Mat. 6:13) Yehova tin masha gana di yuda nos, pero nos tin ku pidié yudansa. Despues ku nos pidié yudansa, nos tin ku hasi nos bèst tambe pa evitá e kosnan ku por hinka nos den tentashon. Nos mester hasi tur loke ta na nos alkanse pa keda leu for di tur idea i pensamentu robes ku tin den e mundu di Satanas. (Sal. 97:10) Ora nos ta lesa i studia Beibel, nos ta yena nos mente ku kosnan puru i bon. Anto nos ta protehá nos mente tambe ora nos bai reunion i partisipá den sirbishi. Anto djei, Yehova lo kumpli ku su promesa di no laga nos pasa den un tentashon ku nos no por soportá.—1 Kor. 10:12, 13.

18. Kiko nos tur tin ku sigui hasi?

¹⁸ Awor mas ku nunka, kada un di nos tin ku pidi Yehova yuda nos keda fiel na dje, foral durante e último dianan difísil akí. P’esei, traha tempu tur dia pa hasi orashon di kurason. Yehova ke pa nos ‘deshogá nos kurason serka dje’ den orashon. (Sal. 62:8) Alabá Yehova i yam’é danki pa tur loke e ta hasi. Pidié yuda bo haña kurashi den sirbishi. Rog’é pa yuda bo por trata ku kualke problema i pa lucha kontra kualke tentashon ku por presentá. No laga nada ni niun hende stroba bo di hasi orashon tur ora bai na Yehova. Pero kon Yehova ta kontestá nos orashonnan? E siguiente artíkulo lo kontestá e pregunta importante ei.