Trustim Hao Hope blo Iu for Future Bae Kamap Tru

1. Why nao Abraham gohed hope dat bae hem garem wanfala son?

JEHOVAH promisim fren blo hem Abraham dat bae hem garem wanfala pikinini and evri nation lo earth bae kasem blessing bikos lo hem. (Gen. 15:5; 22:18) From Abraham garem strong faith lo God, hem trustim hao datfala promis bae kamap tru. Bat, taem Abraham hem100 years old and waef blo hem 90 years, datfala faithful couple no garem yet eni son. (Gen. 21:​1-7) Bat Bible sei: “Abraham garem faith and barava bilivim hem bae kamap dadi bilong pipol long plande kantri, nomata luk olsem diswan hem hard tumas. Diswan hem bikos hem bilivim disfala toktok.” (Rome 4:18) Gogo, wat Abraham hope for hem kamap tru. Hem kamap dadi blo Isaac, son wea hem hope for hem. Why nao Abraham trustim Jehovah bae fulfillim promis blo hem?

2. Why nao Abraham trustim dat promis blo Jehovah bae kamap tru?

² Bikos Abraham fren klos witim Jehovah, hem “barava bilivim God savve duim samting wea hem promisim.” (Rome 4:21) Jehovah hapi lo Abraham and ting lo Abraham olsem hem raeteous bikos lo faith blo hem. (Jas. 2:23) Olsem Rome 4:18 storyim, Abraham garem faith and hope. Distaem bae iumi storyim wat aposol Paul talem abaotem hope lo Rome chapter 5.

3. Wat nao Paul explainim abaotem hope?

³ Paul explainim why iumi savve sure hao “hope wea iumi garem, iumi savve barava trustim.” (Rome 5:5) Hem helpem iumi tu for minim hao hope wea iumi garem savve kamap strong. So taem iumi discussim Rome 5:​1-5, tingim hao hope blo iumi savve gohed for kamap strong. Lo disfala article, bae iumi storyim wat iumi savve duim for gohed strongim go moa hope blo iumi. Distaem bae iumi discussim nambawan hope wea Paul storyim wea iumi savve barava trustim.

NAMBAWAN HOPE BLO IUMI

4. Wat nao Rome 5:​1, 2 storyim?

⁴ Readim Rome 5:​1, 2. Paul raetem olketa toktok hia for olketa Christian lo Rome. Olketa brata and sista lo there lane abaotem Jehovah and Jesus, showimaot faith, and olketa kamap Christian. Lo “tingting bilong God, faith bilong [olketa] nao hem mekem [olketa] raeteous” and hem anointim olketa witim holy spirit. Olketa luk forward for datfala nambawan reward and barava sure bae olketa kasem.

5. Wat nao hope wea olketa anointed Christian garem?

⁵ Then bihaen, Paul raet lo olketa anointed Christian lo Ephesus abaotem hope wea God givim lo olketa. Diswan includim tu datfala “reward [for] olketa holy wan.” (Eph. 1:18) And Paul story tu lo olketa Christian lo Colossae abaotem reward wea olketa bae kasem. Hem sei: “Iufala garem hope for kasem samting wea God markem for iufala long heven.” (Col. 1:​4, 5) Olketa anointed Christian garem hope for resurrect and kasem laef olowe lo heven and rul witim Christ.—1 Thess. 4:​13-17; Rev. 20:6.

6. Wat nao wanfala anointed brata talem abaotem hope blo hem?

⁶ Olketa anointed Christian barava appreciatim hope wea olketa garem. Wanfala lo olketa, hem Brata Frederick Franz wea faithful for worshipim God for staka year. Lo 1991 hem sei: “Mifala barava sure lo hope wea mifala garem, and evriwan lo mifala blo 144,000 bae receivem wat God promisim. And bae mifala kasem reward wea barava gud witim eni samting. . . . Mifala barava tinghae lo hope wea mifala garem. . . . Taem mifala gohed for weit, datwan helpem mifala for appreciatim go moa datfala hope. Mifala willing for weitim, nomata if mifala bae weit for million years. Mi barava appreciatim datfala hope winim enitaem bifor.”

7-8. Wanem hope nao staka wea worshipim Jehovah distaem garem? (Rome 8:​20, 21)

⁷ Staka wea worshipim Jehovah distaem garem difren hope. Olketa garem sem hope wea Abraham garem, hem nao for laef olowe lo earth anda lo Kingdom blo God. (Heb. 11:​8-10, 13) Paul raet abaotem gud samting wea olketa hia hope for kasem. (Readim Rome 8:​20, 21.) Firstaem iu lane abaotem wanem Bible promisim for future, wat nao iu luk forward for hem? Hao, iu luk forward lo taem wea iu bae no sik, olo or dae? Or hao, iu hapi for savve dat olketa loved wan blo iu bae laef bak moa lo paradaes earth? Bikos lo hope wea God givim, iumi garem staka samting for luk forward for hem.

⁸ Nomata bae iumi enjoyim laef olowe lo heven or lo earth, iumi garem nambawan hope wea mekem iumi hapi. And iumi savve barava sure go moa lo hope blo iumi. Next samting wea Paul raetem hem explainim wat iumi savve duim. Distaem bae iumi storyim wat hem raetem abaotem hope blo iumi. Datwan bae helpem iumi for barava sure hao hope blo iumi savve gohed for kamap strong and bae kamap tru.

HAO HOPE BLO IUMI SAVVE KAMAP STRONG

9-10. Olsem example blo Paul showim, wat nao evri Christian expectim? (Rome 5:3) (Lukim tu olketa piksa.)

⁹ Readim Rome 5:3. Paul storyim hao taem iumi kasem hard taem, hope blo iumi bae kamap moa strong. Maet datwan no mek sense. Bat tru samting nao, evri follower blo Christ bae kasem hard taem. Tingim example blo Paul. Hem talem olketa lo Thessalonica: “Taem mifala stap witim iufala, mifala storyim finis long iufala bae iumi kasem olketa hard taem, wea hem nao wanem hem happen.” (1 Thess. 3:4) Hem raet tu lo olketa lo Corinth, hem sei: “Olketa brata, mifala laekem iufala for savve abaotem hard taem wea mifala kasem . . . Mifala no sure bae mifala laef or nomoa.”—2 Cor. 1:8; 11:​23-27.

¹⁰ Olketa Christian distaem tu, expectim for kasem olketa hard taem. (2 Tim. 3:12) Waswe, iu bin kasem persecution bikos iu garem faith lo Jesus and start for followim hem? Maet olketa frens and relative tok spoelem iu. Maet olketa barava treatim iu nogud. Or maet boss or olketa workmate persecutim iu bikos iu honest. (Heb. 13:18) Waswe, gavman againstim iu bikos iu storyim hope blo iu lo narawan? Nomata wanem kaen hard taem nao iumi kasem, Paul sei iumi mas evritaem hapi. Why nao olsem?

11. Why nao iumi mas disaed strong for no givap nomata iumi kasem hard taem?

¹¹ Iumi savve hapi nomata iumi kasem olketa hard taem bikos datwan savve helpem iumi for garem wanfala gud wei. Rome 5:3 storyim hao “hard taem” savve trainim iumi for “no givap.” Iumi evri Christian bae kasem hard taem, so iumi mas disaed strong for no givap. Taem iumi duim datwan, iumi bae kasem reward wea iumi hope for hem. Iumi no laek for olsem pipol wea Jesus tingim taem hem storyim olketa seed wea foldaon lo graon wea stap antap lo bigfala ston. Firstaem, olketa hapi for acceptim kingdom message, bat taem pipol “spoelem” olketa or “kasem hard taem,” olketa givap nao. (Matt. 13:​5, 6, 20, 21) Hem tru, taem pipol againstim iumi or iumi kasem hard taem, hem no isi. Bat taem iumi no givap, bae iumi kasem gud samting. Lo wanem wei?

12. Wanem gud samting nao iumi kasem taem iumi no givap?

¹² Disaepol James storyim olketa gud samting wea iumi savve kasem taem iumi no givap. Hem sei: “Letem disfala wei for no givap hem barava trainim iufala, mekem iufala barava fit nao.” (Jas. 1:​2-4) James describem hao wei for no givap hem savve barava helpem iumi. Hao nao hem savve helpem iumi? Hem savve helpem iumi for mekem grow olketa nara important wei olsem for patient, garem faith, and for depend lo Jehovah. Taem iumi no givap, iumi bae kasem nara gud samting.

13-14. Wat nao happen taem iumi no givap, and hao nao datwan connect witim hope blo iumi? (Rome 5:4)

¹³ Readim Rome 5:4. Paul storyim hao taem iumi no givap “God hapi long iumi.” So taem iu no givap, iu mekem Jehovah hapi. Diswan no minim Jehovah hapi taem iu kasem olketa hard taem or problem. Bat hem hapi bikos iu no givap and gohed faithful. Hem barava encouraging for savve hao taem iumi no givap, iumi mekem Jehovah hapi.—Ps. 5:12.

¹⁴ Tingim hao Abraham tu kasem olketa test bat taem hem no givap, Jehovah hapi lo hem. Jehovah ting lo Abraham olsem fren blo hem and sei Abraham hem raeteous. (Gen. 15:6; Rome 4:​13, 22) God savve ting olsem lo iumi tu. Jehovah hapi no bikos lo staka waka wea iumi duim lo service blo hem or privilege wea iumi garem, bat hem hapi from iumi faithful and no givap lo olketa hard taem. And nomata wat nao age blo iumi, living, or ability wea iumi garem, iumi evriwan savve faithful lo God. Hao, iu deal witim wanfala hard taem distaem and iu gohed loyal lo Jehovah? If olsem, tingim hao iu mekem Jehovah hapi. Taem iumi luksavve hao God hapi lo iumi, datwan strongim go moa hope wea iumi garem lo olketa promis blo hem.

IUMI GAREM STRONG HOPE

15. Wat nao Paul talem lo Rome 5:​4, 5, and wanem kwestin nao maet kamap?

¹⁵ Olsem Paul explainim, Jehovah hapi taem iumi gohed faithful and no givap. Tingim wat Paul gohed for storyim, hem sei: “Taem God hapi long iumi, iumi garem hope. Datfala hope wea iumi garem, iumi savve barava trustim.” (Rome 5:​4, 5) Olsem iumi storyim finis lo Rome 5:​2, Paul talem hao olketa Christian lo Rome garem hope, wea hem nao “hope for kasem hae position wea God bae givim.” So maet samwan ask olsem, ‘if olketa Christian hia garem hope finis, why nao Paul storyim moa hope lo olketa?’

16. Hao nao samwan savve start for garem hope? (Lukim tu olketa piksa.)

¹⁶ Iumi savve minim wat Paul storyim taem iumi evritaem tingim hao hope blo iumi hem savve gohed for kamap strong. Tingim diswan: Waswe, iu tingim yet firstaem wea iu herem message abaotem disfala nambawan hope wea Bible storyim? Lo datfala taem, maet iu tingse for laef olowe lo paradaes earth hem here naes bat no sure if hem bae really happen. Bat, bihaen iu start for lanem moa samting abaotem Jehovah and olketa promis wea stap lo Bible, datwan mekem iu barava sure hao disfala hope hem tru.

17. Hao nao hope blo iu gohed for kamap strong bihaen iu dedicate and baptaes?

¹⁷ Nomata bihaen iu dedicate and baptaes, hope blo iu bae gohed for kamap strong taem iu lanem staka samting abaotem Jehovah and bae iu lovem hem go moa. (Heb. 5:13–6:1) And iu bilivim wat Rome 5:​2-4 talem hem barava tru. Iu kasem staka hard taem, bat iu no givap and iu luksavve God hapi lo iu. From iu savve God lovem and hapi lo iu, iu barava sure bae iu kasem samting wea hem promisim. And hope blo iu hem strong moa winim bifor. Hem real lo iu and barava affectim iu. Hem influencim evri samting lo laef blo iu and changem hao iu treatim famili blo iu, hao iu mekem olketa disison, and hao iu iusim taem blo iu.

18. Hao nao Jehovah mekem iumi sure hope blo iumi bae kamap tru?

¹⁸ Aposol Paul talem nara important point abaotem hope wea iu garem afta God appruvim iu. Hem assurem iu hao hope wea iu garem bae kamap tru. Why nao iu savve sure lo diswan? Paul storyim samting wea God duim wea mekem olketa Christian for sure lo datwan. Hem sei: “Datfala hope wea iumi garem, iumi savve barava trustim, bikos God hem iusim holy spirit wea hem givim long iumi for showimaot hem lovem iumi.” (Rome 5:5) Iu garem evri reason for barava sure lo datfala hope wea Jehovah promisim for iu.

19. Wat nao mekem iu barava sure lo hope blo iu?

¹⁹ Ting abaotem promis wea Jehovah talem lo Abraham and hao God hapi lo hem and kolem Abraham fren blo hem. Samting wea Abraham hope for hem kamap tru. Bible sei: “Bihaen Abraham patient for plande year, hem kasem samting wea God promisim.” (Heb. 6:15; 11:​9, 18; Rome 4:​20-22) Hem barava sure lo wat hem hope for hem. Iu tu savve trustim Jehovah olsem Abraham, if iu gohed faithful iu bae kasem wat iu hope for hem. Hope wea iu garem hem real samting, hem savve mekem iu hapi, and iu savve barava trustim! (Rome 12:12) Paul sei: “Mi prea for God wea givim hope long iufala mas mekem iufala barava hapi and helpem iufala for garem peace from iufala trust long hem. Then bae iufala garem strongfala hope bikos long paoa bilong holy spirit.”—Rome 15:13.