Impruvim Quality blo Olketa Prea blo Iumi

1. Wat nao Jehovah laekem olketa wea worshipim hem for duim? (Lukim tu piksa.)

TAEM iumi needim comfort and help, hu nao bae iumi askem? Iumi savve finis lo ansa. Iumi savve prea lo Jehovah God. Jehovah barava laekem iumi for duim datwan. Hem laekem iumi for “mas prea evritaem.” (1 Thess. 5:17) Iumi savve prea and askem hem for helpem iumi lo evri part lo laef blo iumi. (Prov. 3:5, 6) From Jehovah hem God wea kaen tumas, hem no putim limit lo haomas taem iumi savve prea lo hem.

2. Wat nao bae iumi storyim lo disfala article?

² Iumi thankiu lo Jehovah for disfala present for prea. Nomata olsem, from iumi savve busy tumas, maet iumi stragol for faendem taem for prea. And tu, maet iumi feel olsem iumi need for impruvim quality blo olketa prea blo iumi. Bat Bible encouragem and helpem iumi for duim tufala samting hia. Lo disfala article, bae iumi storyim wanem iumi savve lanem from example blo Jesus lo hao for markem taem for prea. Bae iumi storyim tu faevfala samting wea iumi savve prea abaotem for impruvim quality blo olketa prea blo iumi.

JESUS MARKEM TAEM FOR PREA

3. Wat nao Jesus luksavve lo hem abaotem prea?

³ Jesus luksavve prea hem barava important lo Jehovah. Bifor Jesus kam lo earth, hem lukim Dadi blo hem ansarem prea blo olketa faithful man and woman. For example, Jesus lukim taem Jehovah ansarem olketa prea wea Hannah, David, Elijah, and samfala moa talem from heart. (1 Sam. 1:10, 11, 20; 1  Ki. 19:4-6; Ps. 32:5) Dastawe, Jesus teachim olketa disaepol for prea evritaem and for no hol bak for duim datwan!​—Matt. 7:7-11.

4. Wat nao iumi lanem from olketa prea blo Jesus?

⁴ Olketa prea blo Jesus hem gudfala example for olketa disaepol followim. Taem Jesus duim ministry blo hem, hem prea staka taem. From hem busy tumas and staka pipol interest for kam lo hem, Jesus mas markem taem for prea. (Mark 6:31, 45, 46) Hem getap early morning mekem hem garem taem for prea seleva. (Mark 1:35) Wantaem, bifor hem mekem wanfala important disison hem prea full naet. (Luke 6:12, 13) And lo naet bifor Jesus dae, hem prea staka taem for helpem hem deal witim last part lo assignment blo hem lo earth wea hem barava no isi.​—Matt. 26:39, 42, 44.

5. Hao nao iumi savve followim example blo Jesus taem iumi prea?

⁵ Iumi lanem from example blo Jesus hao nomata iumi barava busy, iumi need for markem taem for prea. Olsem Jesus, maet iumi tu need for markem taem lo early morning or leit lo evening for prea. Taem iumi duim datwan, iumi showim lo Jehovah hao iumi tinghae lo disfala present for prea. Lynne, wanfala sista, hem tingim hao hem hapi tumas taem hem lane abaotem wei for prea. Hem sei: “Taem mi lanem hao mi savve story lo Jehovah enitaem, datwan helpem mi for ting lo Jehovah olsem klos Fren blo mi and mi laek for impruvim olketa prea blo mi.” Staka lo iumi tu feel olsem. So bae iumi storyim faevfala important samting wea iumi savve prea abaotem.

FAEVFALA IMPORTANT SAMTING FOR STORYIM INSAED PREA

6. Olsem Revelation 4:10, 11 storyim, wat nao Jehovah fit for kasem?

⁶ Praisem Jehovah. Aposol John lukim lo wanfala vision hao 24 elder lo heven gohed for worshipim Jehovah. Olketa praisem God and sei hem garem “bigfala paoa” and fit for kasem “glory and for evriwan mekhae” lo hem. (Readim Revelation 4:10, 11.) Olketa faithful angel tu garem staka reason for praisem Jehovah. Olketa stap witim hem lo heven and savve gud lo hem. Olketa luksavve lo olketa wei blo Jehovah taem olketa lukim wanem hem duim. Taem olketa lukim datwan, hem mekem olketa laek for praisem hem.​—Job 38:4-7.

7. Wat nao iumi savve praisem Jehovah for hem?

⁷ Iumi tu laek for praisem Jehovah insaed prea blo iumi taem iumi talem hem why iumi lovem and tinghae lo hem. Taem iumi readim and studyim Bible, trae for luksavve lo olketa wei blo Jehovah wea iumi barava tinghae lo hem. (Job 37:23; Rome 11:33) Then talem Jehovah feeling blo iumi abaotem datwan. Iumi savve praisem Jehovah tu from hem helpem iumi and helpem evri brata and sista. Hem evritaem lukaftarem and protectim iumi.​—1 Sam. 1:27; 2:1, 2.

8. Wat nao samfala reason for iumi savve thankiu lo Jehovah? (1 Thessalonica 5:18)

⁸ Thankiu lo Jehovah. Iumi garem staka reason for prea and thankiu lo Jehovah. (Readim 1 Thessalonica 5:18.) Iumi savve thankiu lo hem for eni gud samting iumi garem, bikos evri gud present kam from hem. (Jas. 1:17) For example, iumi savve thankiu lo Jehovah for earth wea luk naes and nambawan creation blo hem. Iumi savve thankiu tu for laef blo iumi, famili, olketa fren, and hope blo iumi. And iumi laek thankiu lo Jehovah for letem iumi for fren witim hem, wea datwan hem barava spesol.

9. Why nao maet iumi need gohed garem wei for tinghae lo olketa samting wea Jehovah duim for iumi?

⁹ Maet each wan lo iumi need for barava ting abaotem samfala reason why iumi laek thankiu lo Jehovah. Staka pipol distaem no savve sei thankiu. Staka taem pipol ting abaotem nomoa wat olketa seleva laekem, and no duim samting for showimaot olketa tinghae lo wanem olketa garem finis. If iumi start for garem tingting olsem, maet evritaem iumi prea ask nomoa bae staka tumas. For prea blo iumi no olsem, iumi need for gohed garem wei for tinghae and talem thankiu for evri samting wea Jehovah duim for iumi.​—Luke 6:45.

10. Hao nao wei for tinghae helpem wanfala sista for deal witim hard taem wea hem feisim? (Lukim tu piksa.)

¹⁰ Wei for tinghae savve helpem iumi for deal witim hard taem wea iumi feisim. Tingim experience blo Sista Kyung-sook wea stap lo Wastaoa blo January 15, 2015. Hem garem lung cancer. Hem sei: “Taem mi faendaot mi garem disfala sik, mi barava wari. Mi sorre fogud and mi fraet tu.” Wat nao helpem hem for deal witim datfala hard samting? Hem sei evri naet bifor hem sleep, hem go ap lo ruf lo haos blo hem and prea big and storyim faevfala samting wea hem kasem lo datfala day wea hem tinghae lo hem. Datwan comfortim hem and muvim hem for talemaot love blo hem for Jehovah. Kyung-sook experiencem hao Jehovah savve strongim olketa faithful servant blo hem taem olketa deal witim hard taem, and hem luksavve hao olketa blessing wea iumi kasem hem staka winim olketa hard samting wea kasem iumi. Olsem Kyung-sook, iumi tu garem staka reason for thankiu lo Jehovah, nomata iumi deal witim hard taem. Taem iumi prea and thankiu lo Jehovah, datwan savve helpem iumi for deal witim hard taem wea iumi feisim and garem peace.

11. Why nao olketa disaepol needim wei for no fraet bihaen Jesus go bak lo heven?

¹¹ Askem Jehovah for helpem iumi for no fraet for duim ministry. Just bifor Jesus go ap lo heven, hem remindim olketa disaepol abaotem assignment blo olketa for witness abaotem hem lo ‘Jerusalem, lo evri ples lo Judea and lo Samaria, and lo evri farawe ples lo earth.’ (Acts 1:8; Luke 24:46-48) No longtaem bihaen, olketa bigman blo Jew religion arrestim aposol Peter and John and tekem tufala front lo Sanhedrin. Olketa tok strong lo olketa faithful man hia and demandim olketa for stop for preach. (Acts 4:18, 21) Wat nao Peter and John duim?

12. Olsem Acts 4:29, 31 storyim, wat nao olketa disaepol duim?

¹² Peter and John sei lo olketa bigman blo Jew religion: “Hem saed bilong iufala sapos iufala tingse hem stret long tingting bilong God for mifala obeyim iufala and no obeyim God. Bat hard tumas for mifala no storyim olketa samting wea mifala lukim and herem.” (Acts 4:19, 20) Taem Peter and John release, olketa disaepol prea abaotem will blo Jehovah and askem hem for helpem olketa for duim datwan. Olketa prea olsem: “Mekem olketa wakaman bilong iu no fraet for talemaot message bilong iu.” Jehovah ansarem prea hia wea olketa talem from heart.​—Readim Acts 4:29, 31.

13. Wat nao iumi savve lanem from example blo Jin-hyuk?

¹³ Iumi savve followim example blo olketa disaepol taem iumi gohed for preach nomata gavman stopem. Tingim example blo Jin-hyuk, wanfala brata wea olketa putim lo prison from hem no laek joinim army. Lo prison olketa assignim hem for lukaftarem samfala prisoner wea stap lo cell wea olketa stopem narawan for go lo hem, and olketa no letem hem for storyim eni nara samting moa lo olketa, nomata Bible tu. Hem prea for wisdom and for no fraet for preach taem hem garem chance for duim datwan. (Acts 5:29) Hem sei: “Jehovah ansarem prea blo mi taem hem givim mi wisdom and helpem mi for no fraet for startim staka faev-minute Bible study front lo door blo olketa cell. Lo naet, mi raetem olketa leta for givim lo olketa prisoner lo next day.” Iumi tu savve sure Jehovah bae helpem iumi for duim gud ministry blo iumi. Olsem Jin-hyuk, iumi savve prea lo Jehovah for wisdom and for hem helpem iumi for no fraet.

14. Wat nao savve helpem iumi taem iumi deal witim olketa hard taem? (Sams 37:3, 5, SIPB)

¹⁴ Askem Jehovah for helpem iumi deal witim olketa hard taem. Staka lo iumi deal witim sik or samfala samting wea affectim feeling blo iumi. Maet samwan iumi lovem hem dae, kasem famili problem, persecution, or olketa nara hard taem. And olketa pandemic and war wea kamap just mekem hem hard go moa for deal witim olketa challenge hia. Storyim evri feeling blo iu lo Jehovah. Storyim situation blo iu lo hem olsem iu story lo wanfala klos fren. Then trustim hao Jehovah ‘bae helpem iu.’​—Readim Sams 37:3, 5, SIPB.

15. Hao nao prea savve helpem iumi for “gohed strong taem [iumi] kasem hard taem”? Storyim example.

¹⁵ Prea savve helpem iumi for “gohed strong taem [iumi] kasem hard taem.” (Rome 12:12) Jehovah savve lo olketa hard samting wea kasem olketa wea worshipim hem and ‘hemi herem krae blong olketa.’ (Sams 145:18, 19, SIPB) Datwan nao samting wea 29 year old pioneer, Kristie, experiencem. Seknomoa hem kasem samfala serious health problem. Datwan mekem hem depress tumas. Bihaen, hem faendaot mami blo hem bae dae from hem garem wanfala big sik. Kristie sei: “Mi prea strong lo Jehovah for strongim mi each day. Mi trae for followim gud spiritual schedule for attendim olketa meeting and duim personal study.” Hem sei tu: “Prea helpem mi for deal witim olketa hard taem hia. Mi luksavve Jehovah evritaem stap witim mi, and datwan barava comfortim mi. Nomata health problem blo mi no finis stretawe, Jehovah ansarem olketa prea blo mi taem hem helpem mi for garem peace and for no wari.” Hem gud for tingim hao “Jehovah hem savve hao for sevem pipol wea faithful long hem.”​—2 Pet. 2:9.

16. Why nao iumi needim Jehovah for helpem iumi for winim temptation?

¹⁶ Askem Jehovah for helpem iumi winim temptation. From iumi no perfect, iumi stragol evritaem for againstim temptation for duim samting wea no stret. Satan waka hard for mekem wei wea iumi stragol hem hard go moa. Wanfala samting wea hem iusim for trae spoelem tingting blo iumi, hem nogud entertainment. Nogud entertainment savve fulimap mind blo iumi witim olketa rabis tingting wea mekem iumi for no klin front lo Jehovah, and mekem iumi for duim bigfala sin.​—Mark 7:21-23; Jas. 1:14, 15.

17. Bihaen iumi prea lo Jehovah for helpem iumi, wat nao iumi mas duim? (Lukim tu piksa.)

¹⁷ If iumi laek winim temptation for duim wanem hem no stret, iumi needim Jehovah for helpem iumi. Jesus storyim datwan tu lo datfala Lord’s Prea. Hem sei: “Helpem mifala for no foldaon long eni samting wea switim mifala for duim wanem hem no stret.” (Matt. 6:13) Jehovah laek for helpem iumi, bat iumi mas askem hem for datwan. Iumi mas duim best tu for followim olketa prea blo iumi. Iumi savve traem best for no readim or lisin lo olketa rong idea blo staka pipol lo world blo Satan. (Ps. 97:10) Iumi savve fulimap mind blo iumi witim olketa gudfala tingting taem iumi readim and studyim Bible. For attendim olketa meeting and tekpart lo ministry bae protectim tu tingting blo iumi. And Jehovah promisim hao hem bae no letem eni temptation wea iumi no fit for winim for kasem iumi.​—1 Cor. 10:12, 13.

18. Saed lo prea, wat nao each wan lo iumi need for duim?

¹⁸ Winim enitaem bifor each wan lo iumi need for gohed prea, mekem iumi gohed faithful lo olketa last day distaem wea hard tumas. Markem taem evriday for prea from heart lo Jehovah. Jehovah laekem iumi for prea and ‘storyim evriting lo heart blo iumi lo hem.’ (Ps. 62:8) Praisem and thankiu lo Jehovah for evri samting wea hem duim. Askem hem for helpem iumi for no fraet lo ministry. Prea strong lo hem for helpem iumi for deal witim eni hard taem and for winim eni temptation wea maet iumi kasem. No letem eni samting or eniwan for stopem iumi for prea evritaem lo Jehovah. Bat hao nao Jehovah savve ansarem prea blo iumi? Bae iumi storyim datfala important kwestin lo next article.