Jehovä dirigimashqa cäsukushun

1. ¿Imanirtan Jehovä dirigimashqa cäsukushwan? Juk igualatsikuywan willakaramuy.

ALLÄPA mantsëpaq montikuna rurinchö oqrakashqa këkanqëkiman pensari. Tsë montikunachöqa chukaru animalkuna, wanutsikoq plantakuna, tukuyläya kurukuna y mantsëpaq jatusaq uchkukuna y zanjakunam kan, y ishkirqa tsëmanmi jeqakurkunkiman. Tsëchö mantsakashqa këkaptiki, tsë sitiuta alli reqeq nuna alli nänipa pusharishunkiman. ¿Tsëqa manatsuraq alläpa kushikunkiman? Tsë mantsëpaq montikunanömi kë mundupis alläpa peligrösu, y Jehovä Diosnintsikpitam rakimënintsikta munan. ¡Peru manam mantsakunantsiktsu! Noqantsiktaqa alli nänipa pushamaqnintsik cuentam Jehovä dirigikämantsik. Pëmi yanapamäshun Shumaq Patsaman chänapaq, y imëyaqpis mana wanuypa kawakunapaq.

2. ¿Imanötan Jehoväqa dirigimantsik?

² ¿Peru imanötan Jehoväqa dirigimantsik? Palabran Bibliawan, y pë churanqan nunakunawanmi. ‘Alli juiciuyoq y confiakuypaq sirwipakoqmi’ imatapis Diosnintsik munanqannö decidinapaq yanapamantsik (Mat. 24:45). Tsënöllam Jehoväqa congregacionkunata watukaqkunata y anciänukunatapis utilizan yanapamänapaq. Pëkunam consejamantsik mana allikunapa pasanqantsik hörakuna alli tsarakunapaq. Tsënöpam Jehoväpa amïgun këta puëdintsik y Shumaq Patsaman chänapaqmi yanapamantsik. Kë ushanan tiempukunachö Jehovä Diosnintsik tsënö dirigimanqantsikpitaqa, ¡alläpam agradecikuntsik!

3. ¿Imatataq këchö yachakushun?

³ Tsënö kaptimpis, Jehovä dirigimashqa cäsukunanqa höraqa manam fäciltsu, y masqa jutsasapa nunakuna dirigimashqam. Capaz tsë nunakunaqa mana gustanqantsikkunata consejamäshun. O tsë consejamanqantsik mana yanapamänapaq kaqta pensashun. Tsënö pensarqa, manam Jehoväpa consëjuntanötsu valorashun. Tsë hörakunachömi yarpänantsik sirweqninkunata Jehovä dirigikanqanta y cäsukunantsik mas alli kanqanta. Dirigimanqantsikman confiakunapaq këchö kimallata yachakurishun: 1) unë witsanchö sirweqninkunata Jehovä imanö diriginqanta, 2) kanan witsan imanö dirigikanqanta y 3) dirigimanqantsikta cäsukunqantsik imanir alli kanqanta.

¿IMANÖTAN ISRAELÏTAKUNATA JEHOVÄ DIRIGIRQAN?

4, 5. ¿Imanötan Jehoväqa israelïtakunata rikätsirqan diriginampaq Moisesta churashqa kanqanta? (Rikäri jana qaranchö këkaq dibüjuta).

⁴ Israelïtakunata Egiptupita pushamunampaqmi Jehoväqa Moisesta churarqan. Y diriginampaq juk nunata churashqa kanqanta israelïtakuna musyayänampaqmi, Jehoväqa utilizarqan diapa shëkaq o ichirëkaq pukutëta y paqaspana shëkaq ninata (Ex. 13:21). Moisesqa tsë pukutë o tsë nina ëwanqampam israelïtakunata pusharqan, tsëmi Puka lamarman chätsirqan. Peru israelïtakunaqa Puka lamarman chärir më lädupapis ëwëta mana puëdir y egipciu soldädukuna qatipayaptinmi, alläpa mantsakäyarqan y mana alli nänipa Moises pushashqa kanqantam pensayarqan. Peru kikin Jehovämi Moisesta dirigikarqan israelïtakunata tsë sitiuman pushanampaq (Ex. 14:2). Tsëpitanam Jehoväqa milagruta rurar israelïtakunata salvarqan (Ex. 14:26-28).

⁵ Moisesqa 40 watapam tsë pukutëta qatirnin israelïtakunata dirigirqan.a Höraqa Jehovämi permiteq Moisespa carpa wayin jananman tsë pukutë churakänanta, y tsëtaqa llapan israelïtakunam rikäyaq (Ex. 33:7, 9, 10). Tsë pukutëpitam Jehoväqa Moisesta parlapaq, y Moisesnam Jehovä ninqanta israelïtakunata willaq (Sal. 99:7). Tsëwanmi israelïtakunaqa cläru rikäyarqan diriginampaq Moisesta Jehovä churashqa kanqanta.

6. ¿Wakin israelïtakunaqa diriginampaq Moisesta Jehovä churanqanta cäsukuyarqanku? (Nümerus 14:2, 10, 11).

⁶ Peru wakin israelïtakunaqa diriginampaq Moisesta Jehovä churashqa këkaptimpis, manam cäsukuyarqantsu (leyi Nümerus 14:2, 10, 11). Israelïtakunaqa mëtsika kutim Moisesta cäsuyarqantsu, tsëmi Jehoväqa Änikunqan Patsaman yëkuyänanta permitirqantsu (Nüm. 14:30).

7. ¿Pikunatan Jehovä diriginqanta cäsukuyarqan? (Nümerus 14:24; rikäri dibüjuta).

⁷ Peru wakin israelïtakunaqa Jehovä diriginqanta cäsukuyarqanmi. Këllaman pensarishun: Calebpaqmi Jehovä kënö nirqan: “Calebqa [...] llapan shonqunwanmi ninqäkunata cäsukushqa” (leyi Nümerus 14:24). Tsënö cäsukunqampitam Calebtaqa Jehovä bendicirqan y hasta Canaan markaman chärir mëchö täkunampaq kaqta akrakunantapis permitirqanmi (Jos. 14:12-14). Calebnöllam qepa yurikoq kaq israelïtakunapis Jehovä diriginqanta cäsukuyarqan. Y Moisespa rantin israelïtakunata diriginampaq Josuëta Jehovä churashqa kanqanta musyarmi, Josuëtaqa “wanukunqanyaq respetayarqan” (Jos. 4:14). Tsëmi Jehoväqa, tsë israelïtakunata bendicirqan y Änikunqan Patsaman yëkuyänanta permitirqan (Jos. 21:43, 44).

8. ¿Imanötan Jehoväqa gobernantikuna kayanqan tiempuchö sirweqninkunata dirigirqan? (Rikäri dibüjuta).

⁸ Tsëpita tiempuwannam, Jehoväqa israelïtakunata diriginampaq juezkunata churarqan. Y gobernantikuna kayanqan witsannam, willakoqninkunata churarqan. Jehoväta kuyaq gobernantikunaqa, Diospa willakoqninkuna consejayanqankunatam cäsukuyaq. Këllaman pensarishun: Davidqa humildi karmi Natan corregiptin cäsukurqan (2 Sam. 12:7, 13; 1 Crön. 17:3, 4). Gobernanti Jehosafatpis Diospa willakoqnin Jahaziel ninqantam cäsukurqan y Judächö nunakunatam animarqan Diospa willakoqninkunaman confiakuyänampaq (2 Crön. 20:14, 15, 20). Y mana allikunapa pasanqan hörakunam, Ezequïaspis yanapëkunampaq Isaïasta mañakurqan (Is. 37:1-6). Gobernantikuna Jehoväta cäsukuyaptinqa, Jehoväqa bendiceqmi y nacionninkunatapis cuidaqmi (2 Crön. 20:29, 30; 32:22). Clärum këkarqan sirweqninkunata diriginampaq willakoqninkunata Jehovä churanqanqa. Peru wakin gobernantikuna y israelïtakunaqa, manam Jehoväpa dirigeqninkunata cäsukuyarqantsu (Jer. 35:12-15).

¿IMANÖTAN JEHOVÄQA PUNTA CRISTIÄNUKUNAPA TIEMPUNCHÖ SIRWEQNINKUNATA DIRIGIRQAN?

9. ¿Imanötan Jehoväqa punta cristiänukunapa tiempunchö sirweqninkunata dirigirqan? (Rikäri dibüjuta).

⁹ Punta cristiänukunapa tiempunchömi Jehoväqa congregacionta patsätsirqan. Y tsëta diriginampaqmi Jesusta churarqan (Efes. 5:23). Peru Jesusqa manam cada cristiänuwantsu imata ruranampaq kaqta parlaq. Tsëpa rantinqa, Jerusalenchö këkaq apostolkunata y anciänukunatam utilizarqan cristiänukunata dirigiyänampaq (Hëch. 15:1, 2). Tsënöllam wawqi panikunata dirigiyänampaq cada congregacionchö anciänukunata churarqan (1 Tes. 5:12; Tïtu 1:5).

10. (1) ¿Punta cristiänukunaqa dirigeqkuna niyanqanta cäsukuyarqanku? (Hëchus 15:30, 31). (2) ¿Imanirtan Jehoväpa unë sirweqninkunaqa diriginampaq Jehovä churanqankunata cäsukuyarqantsu? (Leyiri “Cläru këkaptimpis manam cäsukuyantsu” neq recuadruta).

¹⁰ ¿Y punta cristiänukunaqa dirigeqkuna niyanqankunata cäsukuyarqanku? Cäsi llapanmi kushishqa cäsukuyarqan, y niyanqankunawan “kallpata tsarirmi alläpa kushikuyarqan” (leyi Hëchus 15:30, 31). Peru kanan witsanqa, ¿imanötan sirweqninkunata Jehovä dirigikan?

¿IMANÖTAN SIRWEQNINKUNATA KANAN WITSAN JEHOVÄ DIRIGIKAN?

11. ¿Imanötan Jehoväqa sirweqninkunata diriginampaq churanqan nunakunata kanan witsan yanapëkan? Entienditsikaramuy.

¹¹ Kanan witsampis, Jehoväqa sirweqninkunata dirigikan Palabran Bibliawan y Tsurin Jesuswanmi. ¿Imanötan musyantsik kanan witsampis sirweqninkunata diriginampaq nunakunata utilicëkanqanta? Këllaman pensarishun: 1800 watakuna ushananchömi, Charles Rüssell y yanapaqninkuna entiendiyarqan 1914 wataqa Diospa Gobiernumpaq juk precisaq wata kanampaq kaqta (Dan. 4:25, 26). Tsëtaqa entiendiyarqan Biblia ninqankunata alli estudiarnin y Jehovä yanapaptinmi. Y tsë entiendiyanqanqa, ¿rasumpaku pasakurqan? Awmi. 1914 watachömi Diospa Gobiernun gobernar qallëkurqan. Tsëmi Punta kaq Jatun Guërra karqan, muyakoq o shukukoq qeshyakuna y terremötukuna karqan, y mikuy mana kaptin nunakuna mallaqäyarqan (Lüc. 21:10, 11). Tsëwanmi cläru rikakurqan sirweqninkunata diriginampaqqa, nunakunata Diosnintsik utilicëkanqanta.

12, 13. Ishkë kaq Jatun Guërra witsanchö, ¿imatataq Jehoväpa sirweqninkuna rurayarqan maslla yachatsikuyänampaq?

¹² Kananqa Ishkë kaq Jatun Guërra kanqan witsanman pensarishun. Tsë witsanmi, Jehoväpa testïgunkunata dirigeqkuna trabajayanqan principal oficïnachö wawqikunaqa Apocalipsis 17:8 ninqanta alli estudiayarqan. Tsëmi entiendiyarqan Ishkë kaq Jatun Guërra pasariptin, Armagedon manaraq kanampaq kaqta. Tsëpa rantinqa, yamë kawakuy kanampaq kaqta y Diosnintsikpita yachatsikuyta puëdinapaq kaqta. Tsëmi wakin nunakuna mana shuyaräyanqanta decidiyarqan y Colegiu Superior Bíblico de la Watchtower neq escuëlatamb patsätsiyarqan. Tsëtaqa patsätsiyarqan wawqi panikunata alli yacharatsir juk nacionkunaman o juk markakunaman yachatsikoq mandayänampaqmi. Tsëmi hasta guërra kanqan nacionkunamampis misionërukunata mandayarqan. Tsënöllam Curso en el Ministerio Teocráticoc neq escuëlatapis patsätsiyarqan, tsëmi congregacionchö wawqi panikunata yanaparqan Jehoväpita mas alli yachatsikoq kayänampaq.

¹³ Tsëwanmi cläru rikantsik mana alli tiempukuna këkaptimpis, sirweqninkunataqa Jehovä dirigikanqanta. Ishkë kaq Jatun Guërra ushariptinqa, mëtsëchömi Jehoväpa sirweqninkunaqa libri yachatsikuyta puëdiyashqa. Tsënöpam mëtsikaq nunakuna Jehoväta reqiyashqa, y kananqa entëru Patsachömi yachatsikuykantsik.

14. ¿Imanirtan dirigimänantsikpaq Jehovä churamunqan nunakunata y anciänukunata cäsukushwan? (Apocalipsis 2:1; rikäri fötuta).

¹⁴ Kanan witsampis, Jehoväpa Testïgunkunata Pushaqkunaqa, dirigeqninkuna Jesus yanapanantam wanayan. Imatapis rurayänampaq wawqi panikunata niyanqankunaqa, kikin Jehovä Dios y Jesucristu munanqannö kanantam segurakuyan. Y tsë decidiyanqankunatanam congregacionkunata watukaqkunata y anciänukunata willayan congregacionchö wawqi panikunata willayänampaq.d Anciänukunaqa, ciëlupaq akrashqa kaqkuna y kë Patsachö quedaqpaq kaqkunapis Jesucristupa ‘derëcha makinchömi’ këkäyan (leyi Apocalipsis 2:1). Peru musyanqantsiknöpis anciänukunaqa jutsasapam kayan, tsëmi höra höraqa Moisesnö, Josuënö y apostolkunanöpis imallachöpis pantayan (Nüm. 20:12; Jos. 9:14, 15; Rom. 3:23). Tsënö kaptimpis, clärum musyantsik alli juiciuyoq y confiakuypaq sirwipakoqta y santu espïrituwan churanqan anciänukunataqa, kë ‘ushanan tiempupa ushananyaq’ Jesucristu yanaparnin sïguinampaq kaqta (Mat. 28:20). Tsënö këkaptinqa, dirigimänantsikpaq Diosnintsik churamunqan nunakunaman confiakushun y cäsukushun.

¿IMANÖTAN YANAPAMANTSIK JEHOVÄ DIRIGIMANQANTSIKTA CÄSUKUNQANTSIK?

15, 16. ¿Imatataq yachakuntsik Jehovä diriginqanta cäsukoqkunapita?

¹⁵ Jehovä dirigimanqantsikta cäsukunqantsikqa, kanampis yanapamantsikmi. Andywan warmin Rösae pasayanqanta rikärishun. Pëkunaqa Biblia ninqannö sencïllulla kawakuyänampaqmi decidiyarqan (rikäri Biblia de estudiuchö Mateu 6:22 textupa ishkë kaq nötanta). Tsënö kawakuyanqanmi permitirqan Diosta adoranantsik wayikunata rurëchö yanapakuyänampaq. Rösam kënö nin: “Höraqa kichki cuartukunachömi kayarqö, y manam cocinayänäpaqpis sitiu karqantsu. Y noqataqa fötu tomëmi gustamaq, peru cämaräta y wakin cösasnïkunatam rantikuykurqä. Alläpa llakikar rantikushqa karpis, Abrahanpa warmin Säranömi këta munarqä, y manam punta vïdäman kutita munarqätsu” (Heb. 11:15). Y kananqa, ¿imanötan sientikuyan? Rösam kënö nin: “Llapan puëdiyanqämannö Jehoväta sirwikäyanqäta musyarmi alläpa kushishqa sientikuyä. Jehoväpaq trabajayanqä hörakunaqa, Shumaq Patsachö trabajëkaqnönam sientikuyä”. Andynam kënö nin: “Gobernamaqnintsikpaq trabajënöqa manam imapis kantsu”.

¹⁶ ¿Imanö mastan Jehovä dirigimanqantsikta cäsukunqantsik yanapamantsik? Panintsik Marcia ruranqanta rikärishun. Pëqa colegiunta usharirllam precursöra karqan (Mat. 6:33; Rom. 12:11). Kënömi willakun: “Universidächömi äniyämarqan chusku watapa grätislla estudianäpaq. Peru noqaqa Jehoväpa kaqchömi maslla yanapakuyta munarqä, tsëmi precursöra kanäpaq yanapamaq kaqta estudiarqä. Tsëta decidinqäqa alläpa allim karqan. Kananqa precursöram kä, y trabäjüqa Betelchö höra höra yanapakunäpaqpis yanapamanmi y juk rurëkunachöpis yanapakümi”.

17. ¿Imakunachö mastan yanapamantsik Jehovä dirigimanqantsikta cäsukunqantsik? (Isaïas 48:17, 18).

¹⁷ Höraqa, Jehoväpa sirweqninkunata dirigeqkunaqa qellë asuntupita o juk asuntukunapita cuidakunapaqmi consejamantsik. Tsënöqa consejamantsik Diosnintsik mandakunqankunata cäsukunantsikta munarmi. Tsë cäsukunachöpis Jehovä dirigikämanqantsikta cäsukurqa, alli concienciayoqmi kashun y manam problëmakunamanqa chäshuntsu (1 Tim. 6:9, 10). Tsënöpam Jehovä Diosnintsikta llapan shonquntsikwan sirwirnin kushishqa y tranquïlu sientikushun (leyi Isaïas 48:17, 18).

18. ¿Imanirtan qamqa Jehovä dirigimanqantsikta cäsukuyta munanki?

¹⁸ Jehovä Diosnintsikqa alläpa sufrimientu witsanchö y Mil Watapa Jesus Gobernamunqan witsanchöpis, dirigimänapaqqa nunakunatam utilizanqa (Sal. 45:16). Tsë tiempukunachöqa, ¿munanqantsikkunata o gustamanqantsikkunata dejëkurpis Jehovä dirigimashqa cäsukushuntsuraq? Kananllapitana cäsukoq karqa, tsë tiempuchöqa fäcil-llanam cäsukushun. Tsëmi Jehovä dirigimanqantsiktaqa cäsukunantsik, y cuidamänantsikpaq churamunqan nunakunatapis cäsukunantsikmi (Is. 32:1, 2; Heb. 13:17). Këchömi yachakurquntsik sirweqninkunata Jehovä imanö diriginqanta, tsëmi Jehoväta cäsukunantsik. Pëllam yanapamäshun mana dejëpa sirwinapaq y Shumaq Patsachöpis mana wanuypa kawakunapaq.