¿Imatataq rurashwan Diosnintsikman mas alli mañakunapaq?

1. ¿Imata ruranapaqtan Jehovä nimantsik? (Rikäri fötukunata).

LLAKISHQA kanqantsik höra o imatapis rurëta munarqa, ¿pimantan mañakuntsik? Jehovä Diosnintsikmanmi. Kikinmi pëman mañakunantsikpaq nimantsik. Seguïdu mañakunantsiktam munan, tsëmi Palabranchö kënö nin: “Teyta Diosman imëpis mañakuyë” (1 Tes. 5:17). Imata rurëta munarpis o imapa pasarpis, mana mantsakushpam Diosnintsikmanqa mañakuyta puëdintsik (Prov. 3:5, 6). Y Jehoväqa alläpa alli karmi, imë höra y ëka kuti mañakushqapis wiyamantsik.

2. ¿Imatataq këchö yachakushun?

² Jehoväman mañakuyta puëdinqantsikqa juk shumaq qarë cuentam. Tsënö kaptimpis, ocupädu karmi Diosnintsikmanqa mañakuyta puëdishwantsu. O capaz pensashwan shumaq mañakuyta mana yachanqantsikta. Peru tsëpaqqa Bibliam yanapamäshun. Këchömi yachakushun, Diosnintsikman mañakunampaq tiemputa Jesus rakinqampita y Diosnintsikman mañakunqantsik höra imata ninapaq kaqtam pitsqata yachakurishun.

JESUSQA DIOSNINTSIKMAN MAÑAKUNAMPAQMI TIEMPUNTA RAKIRQAN

3. ¿Imatataq Jesusqa musyarqan?

³ Jesusqa musyarqanmi sirweqninkuna mañakuyanqanta Jehovä alläpa valoranqanta. Patsaman manaraq shamurmi rikarqan sirweqninkuna mañakuyaptin Jehovä imanö yanapanqanta. Lädunchö karmi rikarqan Äna, David, Elïas y wakin sirweqninkuna mañakuyaptin Jehovä imanö yanapanqanta (1 Sam. 1:10, 11, 20; 1 Rëy. 19:4-6; Sal. 32:5). Tsëchi Jesusqa qateqninkunata nirqan, Jehovä wiyanampaq kaqman confiakur seguïdu mañakuyänampaq (Mat. 7:7-11).

4. ¿Imatataq Jesuspita yachakuntsik?

⁴ Jesusqa kë Patsachö alläpa ocupädu këkar y mëtsikaq nunakunawan këkarpis, Teytanman mañakunampaqmi tiemputa rakirqan (Mar. 6:31, 45, 46). Patsapis manaraq waraptinmi, Teytanman mañakunampaq shärikoq (Mar. 1:35). Y juk kutinäqa, juk precisaqta ruranan kaptinmi entëru paqas mañakurqan (Lüc. 6:12, 13). Y alläpa sufrinampaq kaqta musyarmi, wanutsiyänampaq prësuyanqan paqasqa Jehoväman atska kuti mañakurqan (Mat. 26:39, 42, 44). Tsënömi Jesusqa qateqninkunata yachatsirqan Diosnintsikman mañakuyänampaq.

5. Diosnintsikman mañakunapaqqa, ¿imatataq Jesuspita yachakuntsik?

⁵ Jesuspitaqa yachakuntsik alläpa ocupädu këkarpis, Jehoväman mañakunantsikpaq tiemputa rakinapaqmi, y tsëpaqqa capazchi Jesusnöpis tiempuntsikta alli patsätsishwan. Diosnintsikman mañakunapaqqa, capazchi alli kanman tardikunapa paqasyaq quedakunqantsik o mas tempränulla shärikunqantsik. Tsëta rurarmi, Diosnintsikman mañakuyta puëdinqantsikpita agradecikuykantsik. Diosnintsikman imë hörapis mañakuyta puëdinqanta musyarirmi Lynne jutiyoq pani kënö nin: “Mañakunqäta imë hörapis Jehovä wiyamänampaq kaqta musyarmi amïgütanö rikar qallëkurqä y mas alli mañakunäpaqmi kallpachakurqä”. Capazchi wakinnintsikpis pënö sientikuntsik. Diosnintsikman mañakunqantsikchöqa, ¿imakunatataq mañakushwan? Pitsqallata rikärishun.

JEHOVÄMAN MAÑAKURQA KË PITSQANTAM YARPÄNANTSIK

6. Apocalipsis 4:10 y 11 ninqannö, ¿pillatataq alabanantsik?

⁶ Jehoväta alabashun. Apostol Juanmi suëñuchönö rikarqan 24 gobernaqkuna ciëluchö Jehoväta adorëkäyanqanta. Pëkunaqa Jehoväta alabarmi kënö niyarqan: “Tsëmi qamlla derëchuyoq kanki punta puntaman churayäshunëkipaq, respetayäshunëkipaq y poderyoq kanëkipaq” (leyi Apocalipsis 4:10, 11). Angelkunapis Jehovätaqa imëkapitam alabayan y respetayan. Angelkunaqa Diosnintsikwanmi ciëluchö kayan y allim reqiyan imanö kanqanta. Llapan ruranqankunata rikarmi imanö kanqanta musyayan, tsëmi alabayan (Job 38:4-7).

7. ¿Imanötan mañakunqantsikchö Jehoväta alabashwan?

⁷ Jehovä Diosnintsiktaqa mañakunqantsik höram alabashwan y poderösu kanqampitam parlapashwan. ¿Imanö kanqantan masqa gustamantsik? Tsëkunapitapis parlapashwanmi. Tsëmi Bibliata leyirqa entiendita procuranantsik Jehovä Diosnintsik imanö kanqanta (Job 37:23; Rom. 11:33). Tsëpitanam, tsë leyinqantsikkunaman pensarnin imanö sientikunqantsikta Jehoväta willanantsik. Tsënöllam Jehovätaqa alabashwan yanapamanqantsikpita y wawqi panintsikkunatapis yanapanqampita. Pëqa llapantsikpaqmi yarpachakun y cuidamantsikmi (1 Sam. 1:27; 2:1, 2).

8. ¿Imakunapitataq Jehoväta agradecikushwan? (1 Tesalonicensis 5:18).

⁸ Jehoväta agradecikushun. Jehovätaqa imëkapitam agradecikuyta puëdintsik (leyi 1 Tesalonicensis 5:18). Agradecikushun kapamanqantsikkunapita, ¿manaku imëkatapis tarintsik pë bendicimashqalla? (Sant. 1:17). Tsëmi agradecikushwan kë shumaq Patsachö kawanqantsikpita, llapan kamanqankunapita, kawatsimanqantsikpita, familiantsikpita, amïguntsikkunapita, shamoq tiempuchö ruramunampaq kaqkunata shuyaranqantsikpita y Pëwan amïgu kanqantsikpita.

9. ¿Imanirtan agradecikoq këqa fäciltsu?

⁹ Qamqa, ¿imakunapitataq Diosnintsikta agradecikunkiman? Mana alli nunakunawan juntu kawarmi, imapitapis agradecikuytaqa musyashwantsu. Kanan tiempu nunakunaqa masqa yarpachakuyan munayanqankunallamanmi y manam agradecikoq këtaqa yachayantsu. Pëkunanö pensarqa, Diosnintsikman mañakunqantsik höram imatapis munanqantsikllata mañashun y manam agradecikushuntsu. Tsë mana pasamänapaqmi agradecikoq këta yachakunantsik, y Jehoväman mañakunqantsik höram bendicimanqantsikpita agradecikunantsik (Lüc. 6:45).

10. ¿Imanötan juk panintsikta yanaparqan agradecikoq kanqan? (Rikäri fötuta).

¹⁰ Agradecikoq kanqantsikqa, mana allikunapa pasarnin alli tsarakunapaqmi yanapamantsik. Kyung-sook panintsik pasanqanllaman pensarishun, pëpaqqa 2015 wata 15 de enëruchö yarqamoq Täpakoq revistam willakurqan. Panintsik Kyung-sooktaqa doctorkunam willariyarqan pulmonninchö alläpa avanzashqana cancer qeshyayoq kanqanta. Panintsikmi kënö nin: “Wanunäpaq kanqanta musyarirqa, alläpam llakikurqä. Llapanta oqrarinqätam sientirirqä y alläpam mantsarqä”. Peru ¿imatan yanaparqan? Kikinmi willakurqan, cada paqas manaraq patsäkurnin Jehoväman mañakunqanta, tsë junaq pitsqa alli cösaskuna pasanqankunapitash agradecikoq. Tsëchi panintsiktaqa tranquïlu sientikunampaq y Jehoväta kuyanqanta ninampaq yanapaq. Tsëwanmi panintsikqa cuentata qokurqan, mana allikunapa pasëkaqkunata Jehovä yanapanqanta y problëmakunata pasanqampitapis bendicionkunata masqa chaskinqanta. Noqantsikpis panintsik Kyung-sooknömi imëka mana allikunapa pasëkarpis, Jehovätaqa agradecikuyta puëdintsik. Tsëmi yanapamantsik aguantanapaq y tranquïlu sientikunapaq.

11. ¿Imanirtan Jesuspa qateqninkunaqa yachatsikuyänampaq valorta necesitayarqan?

¹¹ Mana mantsakushpa yachatsikunantsikpaq Jehoväman mañakushun. Ciëluman kutikunampaqna këkarmi, Jesusqa qateqninkunata mandarqan “Jerusalenchö, entëru Judëa provinciachö, Samariachö, y patsapa mas karu” kuchunyaq yachatsikuyänampaq (Hëch. 1:8; Lüc. 24:46-48). Tsëpita ichik tiempullatanam, Pëdrutawan Juanta judïu religionchö mandakoqkuna prësuriyarqan y Judïukunapa Cortinmanmi apayarqan. Y tsëchönam amenazarnin mandayarqan manana yachatsikuyänampaq (Hëch. 4:18, 21). ¿Imatataq rurayarqan tsë ishkan apostolkuna?

12. Hëchus 4:29 y 31 ninqannö, ¿imatataq Jesuspa qateqninkuna rurayarqan?

¹² ¿Y imatataq apostol Pëdruwan Juan rurayarqan Diospita manana yachatsikuyänampaq mandayaptin? Kënömi niyarqan: “Teyta Diosta cäsukuyänäpa rantin qamkunata cäsukuyänä, Diospa rikëninchö alli kanqanta pensayaptikiqa, tsëqa qamkunapitanam. Peru noqakunaqa manam rikäyanqäpita ni wiyayanqäpita parlëta dejëta puëdiyätsu” (Hëch. 4:19, 20). Judïu religionchö mandakoqkuna libri dejariyaptinmi, apostol Pëdruwan Juanqa Jesuspa wakin qateqninkunawan juntakäyarqan. Y llapankuna juntum Teyta Diosman kënö nir mañakuyarqan: “Yanapëkayämë mana mantsakur qampa palabrëkipita parlar sïguiyänäpaq”. Tsënö mañakuyaptinmi, Teyta Jehoväqa yanaparqan (leyi Hëchus 4:29, 31).

13. ¿Imatataq yachakuntsik wawqi Jin-hyuk ruranqampita?

¹³ Diosnintsikpita yachatsikunantsikta autoridäkuna michämashqapis, Jesuspa qateqninkuna rurayanqantam rurashwan. Tsëtam Jin-hyuk jutiyoq wawqintsik rurarqan. Pëtaqa ejercituman ëwëta mana munaptinmi carcelayarqan. Carcelchönam churayarqan wakin prësukunata atiendinampaq y necesitäyanqankunallapaq parlapänantam permitiyarqan, peru Bibliapita yachatsikunantaqa manam munayarqantsu. Tsënam wawqintsikqa Jehoväman mañakurqan mana mantsakushpa y yachëllapa tsë nunakunata Bibliapita parlapänampaq (Hëch. 5:29). Wawqintsikmi kënö nin: “Tsënö mañakuptïmi Jehoväqa yanapamarqan mana mantsakuypa yachëllapa tsë nunakunata parlapänäpaq. Tsëmi carcel punkuchö cincu minütullapa atskaq prësukunata Bibliapita yachatsir qallëkurqä. Y tardikunapanam cartakunata qellqaq kä waränin entreganäpaq”. Wawqintsik Jin-hyuk ruranqannömi, llapan shonquntsikwan confiakuntsik yachatsikunantsikpaq Jehovä yanapamänapaq kaqta, y mana mantsakushpa y yachëllapa nunakunata yachatsinantsikpaqmi mañakuyta puëdintsik.

14. ¿Imaraq yanapamäshun problëmakunapa pasar alli tsarakunapaq? (Salmus 37:3, 5).

¹⁴ Problëmakunapa pasarninqa, yanapamänapaq Jehoväman mañakushun. Wakinnintsikqa alläpam sufrikantsik familiantsikkuna wanukushqa kaptin, nunakuna chikimashqa, qeshyapäkurnin o alläpa yarpachakurnin. Tsëkunapa pasëkashqa alläpa qeshya kaptin o guërrakuna kaptinnaqa masran sufrintsik. Tsëmi Jehovä Diosnintsikta llapan shonquntsikwan willanantsikqa alläpa precisan. Juk amïguntsikta waqarëkar willaqnö Jehoväta willashun, y pëqa yanapamäshunmi (leyi Salmus 37:3, 5).

15. ¿Imanötan Diosnintsikman mañakunqantsikqa yanapamantsik mana allikunapa pasanqantsik hörakuna? Willakaramuy.

¹⁵ Imëka mana allikunapa pasarnin alli tsarakunapaqqa, Diosnintsikman seguïdu mañakunqantsikmi yanapamantsik (Rom. 12:12). Jehoväqa musyanmi sirweqninkuna imakunapa pasëkäyanqanta y “yanapëkunampaq rogakuyaptimpis salvanmi” (Sal. 145:18, 19). 29 watayoq Kristie jutiyoq precursöra pasanqanta rikärishun. Pëqa illaqpitam grävi qeshyakurkurqan y alläpa yarpachakurmi depresion qeshyawan qeshyarirqan. Y tiempuwannam doctorkuna willariyarqan mamänimpis alläpa grävi qeshyawan këkanqanta. Pani Kristiemi kënö willakun: “Llapan shonqüwanmi Jehoväta mañakurqä cada junaq kallpayoqta tikrëkatsimänampaq. Y manam reunionkunaman ëwëta ni Diosnintsikpita japallä yachakuyta dejarqätsu”. Tsëpitanam kënö nin: “Tsë mana allikunapa pasanqä hörakunaqa Diosnintsikman mañakunqämi yanapamarqan. Lädüchö Jehovä këkanqanta musyanqämi alläpa yanapamarqan. Pöcu tiempullachö mana alliyarpis, Jehoväman mañakunqämi yanapamarqan kushishqa sientikunäpaq”. Tsëmi Diosnintsikpa Palabran kënö ninqanta qonqanantsiktsu: “Teyta Jehoväqa yachanmi llapan shonqunwan sirweq nunakunata pruëbakunapita salvëta” (2 Pëd. 2:9).

16. ¿Imanirtan mana allikunaman mana ishkinapaq Jehovä yanapamänata necesitantsik?

¹⁶ Mana alli rurëkunaman mana ishkinapaq Jehoväman mañakushun. Jutsasapam kantsik, tsëmi mana allikunata mana ruranantsikpaq alliraq kallpachakunantsik. Y Satanasqa imëkatam ruran mana allikunaman ishkitsimänapaq. Këllaman pensarishun: Satanasqa kushikunapaq rurëkuna llapampis allilla kanqantam pensatsimënintsikta munan. Kushikunantsikpaq mana allikunata rikar o mana allikunata wiyarqa, mana allikunatanam pensar qallëkushun y tsënö pensarqa manam Jehovä Diospa rikënimpaq limpiunatsu kashun y jutsa rurëmampis rasllam ishkirishun (Mar. 7:21-23; Sant. 1:14, 15).

17. Diosnintsikman mañakurpis, ¿ima mastataq rurashwan jutsa rurëman mana ishkinapaq? (Rikäri fötukunata).

¹⁷ Jehovä mana yanapamashqaqa, rasllam o sasllam jutsa rurëman ishkirishun. Tsëmi Jesusqa Diosnintsikman mañakunapaq yachatsimanqantsikchö kënö nirqan: “Jutsaman imapis mana ishkitsiyämänampaq yanapëkayämë, y Diablupita salvëkayämë” (Mat. 6:13). Jehoväqa yanapamënintsiktam munan, peru tsëpaqqa mañakunantsikmi. Y mañakurirqa, jutsa rurëkunaman ishkitsimaqnintsik cösaskunapitam witikunantsik, tsë rurëkunataqa Satanaspa makinchö këkaq nunakunam imëpis rurayan (Sal. 97:10). Y imëpis allillata y limpiullata pensanapaqqa Bibliatam leyinantsik y estudianantsik, reunionkunaman ëwanantsik y yachatsikoq yarqunantsik. Jehoväqa änimarquntsik aguantanqantsikpitapis mas tentacionkuna kaptinqa yanapamänantsikpaqmi (1 Cor. 10:12, 13).

18. ¿Imatataq llapantsikpis ruranantsik?

¹⁸ Kë mana alli tiempukunachö Jehovä Diosnintsikta mana dejëpa sirwinapaqqa, seguïdum mañakunantsik. Jehoväqa munan ‘llapan shonquntsikwan’ pëman mañakunatam (Sal. 62:8). Tsëmi shonqupita cada junaq mañakunantsikpaq tiemputa rakinantsik. Y mañakurninqa, alabanantsik y agradecikunantsikmi. Tsënöllam mañakunantsik mana mantsapakushpa yachatsikunapaq, problëmakunapa pasar y tentacionkunapa pasar alli tsarakunapaq. Ama permitishuntsu Diosnintsikman seguïdu mañakunantsikta imapis michämänata. Peru ¿imanötan Diosnintsikqa mañakunqantsikta contestamun? Tsëtam qateqninchö yachakurishun.