1 Korinetia

7 I TE au tuatua ta kotou i tata mai iaku nei, e mea meitaki ïa i te tangata nei eiaa e rave i te vaine.

2 Mari ra ei akakore i te kanga, ei vaine mou ta te tane, e ei tane mou ta te vaine.

3 E o atu te tane i te mea takinga-meitaki ki te vaine e tikaʼi: e pera katoa te vaine ki te tane.

4 Kare oki tei te vaine te tuatua i tona uaorai kopapa, tei te tane ra; mei te reira to te tane, kare tei iaia te tuatua i tona uaorai kopapa, tei te vaine ra.

5 Eiaa korua e akataka ia korua uaorai, mari ra ei ngai poto ake, kia tika ia korua; kia rauka ta korua akakoreanga kai e te pure: ka kapipiti akaou ei korua, kia kore a Satani e tapikipiki mai ia korua no tei kore e tika ia korua kia akakoromaki.

6 E ako ra teia naku, taku e tuatua nei, kare te mea i akaueia mai.

7 Te inangaro nei au e mei iaku nei te tu o te tangata ravarai. Ko ta te Atua ra i oronga mai ki te tangata katoa ra, ko tana ïa: e tu ke to tetai, e tu ke oki to tetai.

8 Teia taku tuatua ki te aronga takaua, te tane e te vaine: E mea meitaki ia ratou kia noo ua mei iaku katoa nei.

9 Kia kore ra e tika ia ratou ra, ka akaipoipo ratou: e mea meitaki te akaipoipo i te ka ua.

10 E i te aronga i akaipoipoia ra, teia taku tuatua, kare ra taku, na te Atu ra, Eiaa te vaine e akataka ke i tana tane.

11 (Kia akataka ke ra aia, e noo ua aia auraka e akaipoipo, e kia akaongiia aia e tana tane:) e eiaa te tane e tuku ke atu i tana vaine.

12 Kareka tetai papaki, ko au teia e tuatua nei, kare te Atu: E vaine akarongo kore ta tetai taeake, e i tika i taua vaine ra kia noo rai kiaia, auraka aia e tuku ke atu iaia.

13 E e tane akarongo kore ta tetai vaine ra, e i tika i taua tane ra kia noo rai kiaia, eiaa aia e tuku ke atu iaia.

14 Kua tapu oki taua tane akarongo kore ra i te vaine, e kua tapu te vaine akarongo kore i te tane: naringa kare ra, kua noa ta kotou tamariki; i teianei ra, kua tapu ïa. 15 Kia aere ke ra tei kore i akarongo ra, aere ua atu ïa: kare te taeake e te tuaine e ii i te reira. Kua akonoia ra tatou e te Atua, ei au ta tatou.

16 Eaa oki koe e kite ei, e maine e, kare taau tane e ora ia koe? e eaa oki koe e kite ei, e tama e, kare taau vaine e ora ia koe?

17 Ko ta te Atua ra i oronga ki te tangata ravarai, e to te tangata ravarai tu i te kapiki angaia e te Atu ra, e pera aia. Ko taku ïa tuatua i te au ekalesia katoa ra.

18 I kapikiia aina tetai tangata peritomeia ra? auraka aia e riro ei peritome kore. I kapikiia aina tetai tangata peritome koreia? auraka aia e peritomeia.

19 Kare o te peritome, kare oki o te peritome kore, tei te akono ra i te au akauenga a te Atua.

20 Kia noo rai te tangata ravarai ma te taoonga i kapikiiaʼi aia ra.

21 E tavini aina koe i kapikiia ra? auraka e akono i te reira: kia rauka ra ia koe te rangatira ra, ko te reira ra ïa.

22 Ko te tavini oki i kapikiia e te Atu ra, ko to te Atu ïa tangata rangatira i kapikiia ra, ko te tavini ïa no te Mesia.

23 Kua okoia kotou i te oko; auraka kotou e riro ei tavini no te tangata.

24 E te au taeake, kia vai rai te tangata katoa ki mua i te aroaro o te Atua, ma tona tu i kapikiiaʼi aia ra.

25 E teianei, to te tamaine paretenia ra kare aku tuatua no ko i te Atu ra: e tuku ra au i toku manako, i to te tangata i rauka te aroa i te Atu ra kia akono i te tuatua-mou.

26 Te manako nei au ko teia te mea meitaki i teianei tuatau tumatetenga; te tangata noo ua ra, kua oti ua atura aia i reira.

27 Kua topiriia koe ki te vaine? eiaa e kimi i te matara: kua matara koe i te vaine? eiaa e kimi i te vaine.

28 Kare ra koe e ara kia akaipoipo; e kia akaipoipo oki te tamaine paretenia ra, kare ana e ara. E pekapeka ra to te reira i te kopapa nei; e akaperepere ra au ia kotou.

29 Teia ra taku tuatua, e te au taeake, te poto nei te tuatau. E tau i te aronga e vaine ta ratou ra, kia riro mei te mea e kare;

30 E te aronga i aue ra, mei te mea kare i aue; e te aronga i rekareka ra, mei te mea e kare i rekareka; e te aronga i oko ra, mei te mea e kare a ratou;

31 E te aronga i rave i to teianei ao ra, mei te mea e kare i rave; te ngaro ke nei oki te tu o teianei ao.

32 Te inangaro nei ra au e, eiaa to kotou ei pekapeka anga. Te tangata kare i akaipoipoia ra, te akono ra ïa i ta te Atu, i te mea e marekaʼi te Atu:

33 Kareka tei akaipoipoia ra, te akono ra ïa i te au mea o teianei ao, i te mea e marekaʼi tana vaine.

34 E tu ke katoa to te vaine noo tane e te tamaine paretenia. Te vaine akaipoipo koreia ra, te akono ra ïa i ta te Atu, kia meitaki aia i te kopapa e te vaerua katoa: kareka te vaine i akaipoipoia ra, te akono ra ïa i te au mea o teianei ao, i te mea e marekaʼi tana tane.

35 Kia meitaki kotou i karanga atu ei au i teianei tuatua; kare ra mei te mea te titiri atu nei au i te nati ki rungao ia kotou, no te mea ra e tuatua tau, e kia akono kotou i ta te Atu ma te iroirongata kore.

36 Te manako ra tetai tangata e te apa ra tana tuatua i tana tamaine paretenia, kia pakari aia, e e akaipoipo e tikaʼi, ka rave aia i tona anoano, kare aia e ara; ka akaipoipo ïa.

37 Te tangata ra i maroiroi tona ngakau, e e tau iaia te kore, te tika ra iaia i te tāpu i tona inangaro, e kua manako marie ki roto i tona ngakau e, e tāpu aia i tana tamaine paretenia, e mea tika ïa.

38 E teianei, ko tei oronga kia akaipoipoia, e tuatua meitaki tana; ko tei kore ra i oronga kia akaipoipoia, e tuatua meitaki roa tana.

39 Kua tāpuia te vaine e te ture i te ora anga o te tane ra; kia mate ra tana tane, kua matara aia kia akaipoipo ki tana i anoano ra kia tau ra i te Atu.

40 E meitaki maata ra tona i toku nei manako kia noo ua aia: e te manako nei au e tei iaku rai te Vaerua o te Atua.