Kopae i te Poiri—Noo ki Roto i te Mārama

1-2. (a) Eaa to Paulo turanga i tona tata anga i tana reta ki to Ephesia? (e) Eaa te au uianga ka uriuri tatou?

I TONA tapekaia anga i Roma, kua inangaro te apotetoro ko Paulo i te akamaroiroi i tona au taeake. Kare ra i rauka iaia i te aravei ia ratou no reira kua tata aia i te au reta kia ratou. Tetai reta, kua tataia ki to Ephesia i te 60 me kore 61 T.N.—Ephe. 1:1; 4:1.

² E tai ngauru mataiti i mua atu, kua tutu aere e kua apii a Paulo i te nuti meitaki i Ephesia. (Anga. 19:​1, 8-10; 20:​20, 21) Kua akaperepere maata aia i tona au taeake e kua inangaro i te tauturu ia ratou kia vai tiratiratu kia Iehova. Inara eaa te tumu i tata ai aia ki te au Kerititiano akatainuia no runga i te poiri e te mārama? E eaa te au apiianga ka kite mai te au Kerititiano mei tana akoanga? Ka uriuri tatou i te pauanga ki teia nga uianga.

MEI TE POIRI KI TE MĀRAMA

3. Eaa te tuatua akataka anga ta Paulo i tata i roto i tana reta ki to Ephesia?

³ Kua tata a Paulo ki to Ephesia: “I poiri ana oki kotou i muatangana ra, i teianei ra, kua mārama kotou.” (Ephe. 5:8) Kua tata a Paulo i te tuatua poiri e te mārama kia akatutu i te turanga o te au Kerititiano i Ephesia. Ka uriuri tatou i te tumu i karanga ai a Paulo no ratou e “i poiri ana oki kotou i muatangana ra.”

4. Eaa te turanga o te au akonoanga pikikaa i Ephesia?

⁴ Akonoanga pikikaa. I mua ake ka apii ei i te tuatua mou e kia riro mai ei Kerititiano, kua irinaki to Ephesia i te au apiianga pikikaa e pera te au angaanga purepure. I roto i te oire o Ephesia, e iero mekameka to te atua vaine ko Diana, ko tetai ngai umere roa atu tei pātuia e te tangata i te tuatau taito. E akamori ana te tangata i te itoro i reira. Kua rauka te apinganui mei te maani anga e te oko anga i te au itoro no te atua vaine ko Diana. (Anga. 19:​23-27) E oire rongonui katoa a Ephesia no te au peu purepure.—Anga. 19:19.

5. Eaa te turanga o te iti tangata i Ephesia?

⁵ Peu ainga tau kore. E aronga rave ainga tau kore e te viivii te iti tangata o Ephesia. Ka akarongoia te au tuatua viivii i ko i te au ngai tamataora e i roto i ta ratou akamorianga. (Ephe. 5:3) Kare te iti tangata i akamā ana i ta ratou au peu viivii. (Ephe. 4:​17-19) I mua ake ka apii ei te au Kerititiano i Ephesia i ta Iehova kaveinga tuatua tika, kare to ratou akava ngakau i akakino ia ratou no te rave i te tarevake. E kua rave ratou i to ratou uaorai anoano, kare i to Iehova. No te reira tumu kua tata a Paulo no ratou e e “manako akapoiriia [to ratou], e te taka ke i te ora a te Atua ra.”

6. Eaa a Paulo i tuatua ai ki to Ephesia e “kua mārama kotou”?

⁶ Inara, kua akaruke tetai pae i te poiri i Ephesia. Kua tata a Paulo no ratou e “i teianei ra, kua mārama kotou i te Atu.” (Ephe. 5:8) Kua āriki ratou i te tuatua mou a Iehova mei te mārama tei arataki ia ratou. (Sala. 119:105) E kua akaruke ratou i te au akonoanga pikikaa e te peu ainga tau kore. Kua “aru [ratou] i te Atua” e kua tauta i te akamori ia Iehova e te akamareka iaia.—Ephe. 5:1.

7. Na teea tu i aite ei to tatou turanga ki te au Kerititiano i Ephesia?

⁷ I mua ake ka apii ei tatou i te tuatua mou, no roto ana tatou i te poiri. Tetai pae ia tatou, kua akamaara ana i te au peu akonoanga pikikaa e tetai ia tatou, kua rave ana i te au peu ainga tau kore. Inara i te apii anga tatou i ta Iehova kaveinga tuatua tika, kua rave tatou i te tauianga. Kua akamata tatou i te akarotai i to tatou oraanga kia tau ki ta Iehova kaveinga tuatua tika. E tei tupu, kua rauka mai te au akameitakianga. (Isa. 48:17) Inara, i teianei te vai nei rai te au timataanga. Ka anoanoia tatou kia kopae i te poiri e “kia tau oki to [tatou] aerenga i te tamariki o te mārama.” Akapeea tatou me rave i te reira?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

KOPAE I TE POIRI

8. Ia Ephesia 5:​3-5, eaa ta te au Kerititiano i Ephesia ka patoi?

⁸ E tatau ia Ephesia 5:​3-5. Kia akaruke i te poiri, kua anoanoia te au Kerititiano i Ephesia kia patoi i te au peu kare a Iehova e mareka ana. Ka kapiti mai i te peu ainga tau kore e pera katoa te au tuatua viivii. Kua tata a Paulo ki to Ephesia kia kopae ratou i te reira au peu kia rauka ia ratou tetai “tuanga i te basileia o te Mesia ra e te Atua.”

9. Eaa tatou ka patoi ei i te au tuatua viivii te ka taki atu ki te ainga tau kore?

⁹ Ka anoano katoaia tatou kia patoi i “te angaanga puapinga kore a te poiri.” (Ephe. 5:11) Te akapapu maira te tupuanga o te manganui e me akarakara, akarongo e me tuatua i te au mea viivii e te tau kore, ka māmā ua i tetai i te rave i te reira. (Gene. 3:6; Iako. 1:​14, 15) I tetai enua, kua akamata tetai pupu taeake i te karangaranga na runga i te social media. I te akamataanga, kua tuatua ratou no runga ia Iehova e te tuatua mou. Inara aere ua rai, kua akamata ratou i te tuatua i te au mea tau kore. Kua pukapuka ua ratou no runga i te ainga. Kua karanga te au taeake e kua taki atu ta ratou au tuatua viivii ia ratou kia rave i te ainga tau kore.

10. Akapeea a Satani i te akavare anga ia tatou? (Ephesia 5:6)

¹⁰ Ka tauta to Satani ao i te akavare ia tatou kia irinaki e ko ta Iehova i tuatua e mea viivii e te tau kore, kare ïa i te mea kino. (2 Pete. 2:19) Kare tatou e poitirere! No te mea ko tetai ravenga kikite a te Tiaporo koia oki kia akapoiri i te ngakau o te tangata kia kore ratou e kite i te mea tika e te tarevake. (Isa. 5:20; 2 Kori. 4:4) No reira i maata ai te au teata, te au porokaramu tivi e te website tei akaari i te au mea kare a Iehova e mareka ana! Te tauta nei a Satani i te akavare ia tatou kia irinaki e ko te au peu viivii e te oraanga tau kore, kare e kino ana mari ra, e mea mataora e te rekaia e te tangata.—E tatau ia Ephesia 5:6.

11. Akapeea to Angela akaraanga i te akaari mai i te puapinga o te ako ia Ephesia 5:7? (Akara katoa i te tutu.)

¹¹ Inangaro a Satani ia tatou kia piri ki te aronga kare e aru ana i ta Iehova kaveinga. Kua ako a Paulo i to Ephesia: “Auraka ra kotou ei rave katoa i ta ratou ra,” koia oki te au peu a te aronga rave kino. (Ephe. 5:7) E akamaara, kare i kotingaia to tatou pirianga oa ki te aronga ta tatou ka aravei. Mari ra, ka kapiti mai i te aronga ka karangaranga tatou ki runga i te social media, e turanga kare to Ephesia i taito i kite. Kua kite mai a Angela,a e noo ana aia i Asia i te kino me karangaranga na runga i te social media. Karanga aia: “E ereere te social media. Aere ua rai, kua taui toku aerenga manako e kua āriki ua au i te piri ki te au tu tangata kare e akono ana i te au kaveinga Pipiria. No reira kua manako au e meitaki ua te oraanga kare a Iehova i mareka ana.” Inara kua tauturu te aronga pakari ia Angela kia rave i te au tauianga. Karanga aia: “I teianei, kua akamou au i toku manako ki runga ia Iehova kare ki runga i te social media.”

12. Eaa te ka tauturu ia tatou kia akono i ta Iehova kaveinga tuatua tika?

¹² Ka anoanoia tatou kia patoi i te manako o teianei ao e e meitaki ua te oraanga tau kore. Kua kite ua tatou e kino te reira. (Ephe. 4:​19, 20) No reira e mea meitaki kia ui kia tatou uaorai: ‘Te kopae ra ainei au i te piri ki te au oa angaanga, oa apii me kore ki tetai ua atu kare e āriki ana i ta Iehova kaveinga tuatua tika? Te aru ra ainei au i ta Iehova kaveinga tuatua tika ma te ngakau toa noatu ka aviriia au?’ I roto ia 2 Timoteo 2:​20-22, ka anoano katoaia tatou kia matakite i to tatou pirianga oa i roto i te putuputuanga. E akamanako kare tetai pae e tauturu ia tatou kia vai tiratiratu kia Iehova.

“KIA TAU OKI TO KOTOU AERENGA I TE TAMARIKI O TE MĀRAMA”

13. Eaa te aiteanga o te tuatua “kia tau oki to kotou aerenga i te tamariki o te mārama”? (Ephesia 5:​7-9)

¹³ Kua akamaroiroi a Paulo i to Ephesia kia patoi i te poiri e pera katoa “kia tau oki to [ratou] aerenga i te tamariki o te mārama.” (E tatau ia Ephesia 5:​7-9.) Eaa te aiteanga o te reira? Koia oki, kia akono i te oraanga Kerititiano i te au taime ravarai. Ko tetai ravenga, na te tatau e te apii putuputu i te Pipiria e ta tatou au puka. E mea puapinga katoa kia akamanako meitaki i te akaraanga e te au apiianga a Iesu Mesia, koia “te mārama o teianei ao.”—Ioa. 8:12; Mase. 6:23.

14. Akapeea te vaerua tapu me tauturu ia tatou?

¹⁴ Ka anoano katoa tatou i te tauturu a te vaerua tapu o te Atua kia aaere ei ‘tamariki no te mārama.’ Eaa te tumu? No te mea kare i te mea māmā kia vai tiamā ua i roto i teia ao tau kore. (1 Tesa. 4:​3-5, 7, 8) Ka tauturu te vaerua tapu ia tatou kia patoi i te manako o teianei ao, kapiti mai ta ratou au apiianga e to ratou aerenga manako tei kore i rotai ki to te Atua. Ka tauturu katoa te vaerua tapu ia tatou kia akatupu i “te au mea meitaki ravarai, e te tuatua-tika.”—Ephe. 5:9.

15. Eaa te au ravenga e rauka ai ia tatou te vaerua tapu? (Ephesia 5:​19, 20)

¹⁵ Ko tetai ravenga e rauka ai ia tatou te vaerua tapu, na te pure anga no te reira. Karanga a Iesu e ka oronga mai a Iehova i “te vaerua tapu i te aronga e pati atu” Iaia. (Luka 11:13) E me akapaapaa kapiti tatou ia Iehova i ko i te au uipaanga, ka rauka katoa ia tatou te vaerua tapu. (E tatau ia Ephesia 5:​19, 20.) Ka akamaroiroi te vaerua tapu o te Atua ia tatou kia akono i te oraanga te ka akamareka i te Atua.

16. Eaa te ka tauturu ia tatou kia rave i te au ikianga meitaki? (Ephesia 5:​10, 17)

¹⁶ Me rave tatou i te au ikianga, ka anoanoia tatou kia kite “i to te Atu ra anoano” e oti akono i te reira. (E tatau ia Ephesia 5:​10, 17.) Me mārama tatou i te au kaveinga Pipiria tei tau ki to tatou turanga, te kimi ra tatou i to Iehova manako no runga i te reira. Me taangaanga tatou i tana kaveinga, ka meitaki atu ta tatou ikianga.

17. Akapeea tatou me akapou meitaki i to tatou tuatau? (Ephesia 5:​15, 16) (Akara katoa i te tutu.)

¹⁷ Kua ako katoa a Paulo i to Ephesia kia taporoporo marie i te tuatau. (E tatau ia Ephesia 5:​15, 16.) Ka inangaro te “vaerua kino ra,” ko Satani ia tatou kia akapou i te tuatau no te au mea o teianei ao e kare e tuatau no Iehova. (1 Ioa. 5:19) Penei ka māmā ua i tetai Kerititiano kia inangaro maata i te moni, te aere ki te apii teitei e kia angaanga pakari e kare e tuatau no te tavini ia Iehova. Me tupu te reira, te akaari maira aia e kua aru aia i te aerenga manako o teianei ao. E tika, kare teia i te mea kino inara, auraka te reira kia riro e ko te mea mua i to tatou oraanga. Kia aaere ei ‘tamariki no te mārama,’ ka anoanoia tatou kia taporoporo marie i to tatou tuatau na te akamou anga i to tatou manako ki te au mea puapinga.

18. Eaa ta Donald i rave kia akapou meitaki i tona tuatau?

¹⁸ E kimi i te au ravenga no te tavini pu ia Iehova. Kua rave a Donald i teia, e noo ana aia i Aperika Apatonga. Karanga aia: “Kua akamanako meitaki au i toku turanga e kua pure akatenga kia Iehova no tana tauturu kia rave maata atu i te angaanga tutu aere. Kua pure au no tetai angaanga te ka tauturu iaku kia akatupu i te reira. Ma te tauturu a Iehova, kua rauka te reira e kua akamata maua ko taku vaine i te tavini tamou ia Iehova.”

19. Akapeea tatou me aaere tamou ei ‘tamariki no te mārama’?

¹⁹ Kua tauturu ta Paulo reta i to Ephesia kia vai tiratiratu kia Iehova. Ka tauturu katoa tana akoanga ia tatou. Mei ta tatou i apii, ka tauturu te reira ia tatou me iki i ta tatou tamataora e to tatou pirianga oa. Ka akamaroiroi te reira ia tatou kia apii putuputu i te Pipiria kia rauka te mārama o te tuatua mou ei arataki ia tatou. Ka anoano katoa tatou i te vaerua tapu kia akatupu i te au tu manea. Na te taangaanga anga i ta Paulo i tata, ka rave tatou i te au ikianga meitaki tei rotai ki to Iehova manako. Me pera, ka tauturu te reira ia tatou kia kopae i te poiri e kia noo ki roto i te mārama!