Au Kite Kerititiano ma te Ngai i te Rangi

“Ko tatou nei, te vaira to tatou ngai i te au rangi ra.”​—PHILIPI 3:20, NW.

1. Eaa ta Iehova ra akakoro anga umere no tetai papaki o te au tangata nei?

TE ARONGA tataki tai tei anauia mai ei au tangata ka tutara ei ui ariki e ei kau taunga ki te rangi, i runga ake oki i te au angera katoa. (1 Korinetia 6:2, 3; Apokalupo 20:6) Mei teaa ra te umere o te reira tuatua mou! Inara, kua akakoro a Iehova i te reira, e kua akatupu aia i te reira na roto i tana Tamaiti anau tai, ia Iesu Karaiti. Eaa ra Tei Anga mai ia tatou i rave ei i te reira apinga? E akapeea te tupu anga tau ki tetai Kerititiano i teia tuatau nei no te kite anga i te reira? E akara tatou kia kite e akapeea ta te Puka Tapu pauanga i teia au uianga.

2. Eaa te apinga ou ta Ioane Papetito i akakite te ka raveia e Iesu, e te piri atura teia apinga ou ki teaa?

² I to Ioane Papetito ra teateamamaoanga i te mataara no Iesu, kua akakite aia e ka rave a Iesu i tetai apinga ou. Te tuatua ra te tataanga: “E tutu aere atura [a Ioane], na ko atura, Te aere mai nei tetai i muringao iaku, e maata tona mana i toku, kare oki au e tau kia tupou ki raro e tatara i te itiki tamaka nona ra. I bapetizo ana oki au ia kotou i te vai: kareka aia, e bapetizo aia ia kotou ki te Vaerua Tapu.” (Mareko 1:7, 8) I mua ake i te reira taime, kare tetai i papetitoia ana i te vaerua tapu. E akanoonoo anga ou teia te kapiti ra i te vaerua tapu, e ko te reira no te akakoro anga a Iehova te ka akakiteia mai kia teateamamao i te au tangata no te tutara anga ki te rangi.

“Anau Akaou”

3. Eaa nga apinga ou no runga i te Patireia o te rangi ta Iesu i akataka atu kia Nikodemo ra?

³ I tetai tuatuaanga muna ma tetai Pharisea rongonui ra, kua akakite atura Iesu i etai atu tumu no teia akakoro anga tu-Atua. Taua Pharisea ra, ko Nikodemo, kua aere mai kia Iesu i te po, e kua na ko atura Iesu kiaia: “Kia kore te tangata e anau akaou ra, kare aia e kite i te basileia o te Atua ra.” (Ioane 3:3) Ko Nikodemo, e Pharisea aia penei kua apii i te au Tuatua Tapu Epera, e kua kite i etai apinga no runga i te tuatua mou meitaki rava i te Patireia o te Atua. Kua totou mai te puka a Daniela e ka orongaia te Patireia ki “tetai mei te Tamaiti a te tangata ra” e ki “te au tangata ra ki te aronga tapu no Tei Teitei.” (Daniela 7:13, 14, 27) E riro na te Patireia e “akapueurikiriki e e akapou” i taua au patireia katoa ra, e ka vai rai te reira e tuatau ua atu. (Daniela 2:44) Penei, kua manako a Nikodemo e ka akatupuia teia au totou ki te iti tangata ngati Iuda ra; inara kua tuatua a Iesu e e kite ei i te Patireia, ka tau tetai kia anau akaouia. Kare ra a Nikodemo i marama, no reira kua tuatua akaou atura a Iesu: “Kia kore te tangata e anau ki te vai, e te Vaerua, kare aia e o i te basileia o te Atua.”​—Ioane 3:5.

4. No te aronga anauia i te vaerua tapu, ka akapeea te taui anga o to ratou piri anga ma Iehova ra?

⁴ I tuatua ana a Ioane Papetito i te papetito anga ma te vaerua tapu. I teianei, kua tuatua katoa atura Iesu e ka tau tetai tangata kia anauia ki te vaerua tapu e tikaʼi aia kia tomo ki roto i te Patireia o te Atua. Na teia anau anga taka ke, ka tomo atu te au tangata e te au vaine ki roto i tetai pirianga taka ke ma te Atua ko Iehova ra. Ka riro ratou ei tamariki nana. Ka tatau tatou: “Te aronga katoa ra i āriki atu iaia, i o maira aia i te tika ia ratou kia riro ei tamariki na te Atua, koia te aronga i akarongo i tona ingoa: Te aronga, kare to te toto i anau ei ra, kare oki to te anoano o te kopapa, kare oki to te anoano o te tangata, no te Atua ra.”​—Ioane 1:12, 13; Roma 8:15.

Tamariki na te Atua

5. I naea te au pipi tiratiratu ra i papetitoiaʼi ma te vaerua tapu, e eaa etai atu angaanga tei piri atura ki te vaerua tapu tei tupu i taua taime rai?

⁵ I to Iesu tuatua anga kia Nikodemo, kua to ke ana te vaerua tapu ki rungao ia Iesu, i te akatainuanga iaia no tona ariki anga i te tuatau ki mua i te Patireia o te Atua ra, e kua akatika maira te Atua ia Iesu ei Tamaiti Nana. (Mataio 3:16, 17) Kua anau katoaia mai e Iehova etai atu tamariki vaerua ia Penetekote 33 T.N. Te au pipi tiratiratu tei akaputu atura ki roto i te pia o runga i Ierusalema ra kua papetitoia ma te vaerua tapu. I taua taime rai, kua anau akaouia ratou ki te vaerua tapu kia riro ei tamariki vaerua na te Atua ra. (Angaanga 2:2-4, 38; Roma 8:15) Pera katoa, kua akatainuia ratou ma te vaerua tapu i te manako anga i tetai tuanga ki te rangi i te tuatau ki mua ra, e kua akairoia ratou i tetai akamata anga ma te vaerua tapu ei akairo anga i te papu o taua manakonako anga no te rangi ra.​—2 Korinetia 1:21, 22.

6. Eaa ta Iehova ra akakoro anga no te Patireia o te rangi, e eaa i tau ei kia rave te au tangata i tetai tuanga i roto i teia?

⁶ Ko teia te aronga mua o te au tangata apa ua ra tei ikiia e te Atua kia tomo ki roto i te Patireia. Koia oki, i muri ake i to ratou matenga e te tuakaouanga, ka riro mai ratou ei tuanga no te akaaerenga Patireia o te rangi te ka tutara ki rungao i te au tangata e te au angera. Te akakoro ra a Iehova na teia Patireia, ka akatapuia tona ingoa maata e ka akatikaia tona tu ngateitei ki mua i te au mea katoatoa tei angaia ra. (Mataio 6:9, 10; Ioane 12:28) Mei teaa ra te tau e kia rave te au tangata i tetai tuanga i te reira Patireia! Kua taangaanga a Satani i te au tangata i te akatuanga i tana akaaoanga mua i te tu ngateitei o Iehova i te kainga i Edene ra, e i teianei kua akakoro a Iehova e ka o atu te au tangata i te pauanga i taua akaaoanga ra. (Genese 3:1-6; Ioane 8:44) Kua tata te apotetoro ko Petero ki etai aronga tataki tai o tei ikiia ei tutara i taua Patireia ra: “Kia akameitakiia te Atua te Metua o to tatou Atu ra o Iesu Mesia, ko te akaanau akaou ia tatou no te maata o tona aroa, kia rauka te manako ora i te tuakaouanga o Iesu Mesia mei te mate maira, Kia rauka te tuanga kino kore, e te viivii kore, e te mae kore, ko tei vaioia ki runga i te rangi na kotou.”​—1 Petero 1:3, 4.

7. Eaa te piri anga taka ke ma Iesu katoa te rekarekaia ra e taua aronga papetitoia ma te vaerua tapu ra?

⁷ Ei aronga akatamarikiia e te Atua ra, kua riro teia au Kerititiano ikiia ei au taeake no Iesu Karaiti ra. (Roma 8:16, 17; 9:4, 26; Ebera 2:11) I te mea kua akapapuia a Iesu e ko te Uanga taputouia kia Aberahama, ko teia au Kerititiano tei akatainuia i te vaerua ra e kapiti anga, me kare e tauturu, e tuanga no taua Uanga ra, te ka oronga i tetai akameitakianga ki runga i te au tangata akarongo ra. (Genese 22:17, 18; Galatia 3:16, 26, 29) Eaa te akameitakianga? Ko te tika o te oko anga mei te ara maira e te akaongi anga ki te Atua ra e te tavinianga kiaia i teianei e no te tuatau mutu kore. (Mataio 4:23; 20:28; Ioane 3:16, 36; 1 Ioane 2:1, 2) Te arataki atura te au Kerititiano akatainuia i te enua nei i te aronga ngakau tika ki teia akameitakianga na te akakite anga i to ratou taeake vaerua koia a Iesu Karaiti e to ratou Metua akatuangaia, koia te Atua ko Iehova.​—Angaanga 1:8; Ebera 13:15.

8. Eaa te “akakite angaia mai” i te tamariki a te Atua tei anauia mai i te vaerua?

⁸ Te tuatua ra te Puka Tapu i te “akakite angaia mai” o teia tamariki a te Atua tei anauia mai i te vaerua. (Roma 8:19) Ko te tomoanga ki roto i te Patireia ei pupu ariki ma Iesu katoa, ka kapiti atu ratou i te akapouanga i to Satani akatereanga o te au mea i te ao nei. A muri iora, no tetai tauatini mataiti, ka tauturu ratou i te arataki anga mai i te au puapinga o te atinga oko ki te au tangata e ka taki mai i te uanga tangata katoa ki te tu apa kore ua tei ngaro ra ia Adamu. (2 Tesalonia 1:8-10; Apokalupo 2:26, 27; 20:6; 22:1, 2) Te kapiti ra to ratou akakite angaia mai i teia au tumu ravarai. Ko tetai apinga ia te tatari anoano maata nei te au tangata akarongo katoa ra.

9. Akapeea ta te Puka Tapu ra taiku anga i te kopapa o te au Kerititiano akatainuia ra i te ao katoa?

⁹ Te kopapa o te au Kerititiano akatainuia i te ao katoa nei ko “te uipa anga maata ra e te Ekalesia aronga tama mua ra, i tei tataia te ingoa i te ao ra.” (Ebera 12:23) Ko ratou te aronga mua i puapingaia i te atinga oko o Iesu. Ko ‘te kopapa katoa ratou no te Mesia’ oki ratou, te akaari maira i to ratou pirianga taokotai tetai ki tetai e kia Iesu katoa oki. (1 Korinetia 12:27) Kua tata a Paulo: “Mei te kopapa oki e okotai nei, e manganui tona melo, e te au melo katoa no taua kopapa okotai ra, maata ua rai ratou, okotai rai kopapa: koia katoa te Mesia. I bapetizoia oki tatou e te Vaerua okotai ki roto i te kopapa okotai ra, te ngati Iuda, e te Eleni, te tavini, e te rangatira; e kua akainumia tatou i ta te Vaerua okotai rai.”​—1 Korinetia 12:12, 13; Roma 12:5; Ephesia 1:22, 23; 3:6.

“Te Iseraela o te Atua”

10, 11. I te anere mataiti mua ra, eaa i umuumuiaʼi te Iseraela ou ra, e koai ma teia iti tangata ou?

¹⁰ No te tere atu i te 1,500 mataiti i mua ake i to Iesu ra aereanga mai ei Mesia taputouia ra, ko te iti tangata o Iseraela kopapa ra te iti tangata taka ke o Iehova. Noatu rai te akamaaraara anga tamouia, kua tiratiratu kore taua iti tangata katoa ra. I to Iesu ra mama anga mai, kua kopae keia aia e taua iti tangata ra. (Ioane 1:11) No reira, kua tuatua atura a Iesu ki te au arataki akonoanga ngati Iuda ra: “E apai keia te basileia o te Atua nei ia kotou, e tukuia atu ki te aronga e akaua mai i te ua ra.” (Mataio 21:43) Ko te kiteanga i taua “aronga e akaua mai i te ua [o te Patireia ra]” e puapinga maata ia no te ora.

¹¹ Te iti tangata ou ko te putuputuanga Kerititiano akatainuia, tei anauia ia Penetekote 33 T.N. Tona au mema mua ko te au pipi ngati Iuda a Iesu tei ariki ra iaia ei Ariki no ratou i te rangi. (Angaanga 2:5, 32-36) Inara, e au mema ratou no to te Atua ra iti tangata ou, kare no te tumu anga i to ratou kopu ngati Iuda, mari ra na runga i te tumuanga i te akarongo ia Iesu ra. No reira, ko teia Iseraela ou o te Atua e apinga taka ke ia​—e iti tangata vaerua. I te kore anga te maata anga o te ngati Iuda e ariki ia Iesu, kua akatotoaia atu te pati anga ei tuanga no te iti tangata ou ra ki to Samaria e ki to te au Kenitara i muri maira. Kua tapaia taua iti tangata ou ra ko “te Iseraela o te Atua.”​—Galatia 6:16.

12, 13. I akapeea i marama papu ei e kare te Iseraela ou ra i tetai akonoanga ngati Iuda ua?

¹² I Iseraela i taito ra, i te riro anga te aronga kare ra i te ngati Iuda ei au poroteraita (proselyte), kua umuumuia ratou kia kauraro i te Ture a Mose, e kia akatutu te au tane i te reira na te peritome anga. (Exodo 12:48, 49) Kua manako tetai papaki o te au Kerititiano ngati Iuda e ka tau katoa te reira ture no te aronga kare i te ngati Iuda i roto i te Iseraela o te Atua ra. Inara, e apinga ke ta Iehova i manako ana. Kua arataki atu te vaerua tapu i te apotetoro ko Petero ki te kainga o te Kenitara ko Korenelio ra. I te akarongo anga a Korenelio e tona ngutuare tangata i ta Petero ra tutuanga, kua rauka ia ratou te vaerua tapu​—noatu rai i mua ake ka papetitoiaʼi ratou i te vai. Na teia i akakite marama mai e kua ariki a Iehova i teia aronga Kenitara ei au mema no te Iseraela o te Atua ma te kore ua e akaueanga kia kauraro ratou i te Ture a Mose ra.​—Angaanga 10:21-48.

¹³ Kua kite tetai papaki o te aronga akarongo ra i te tu ngata kia ariki i te reira, e kare i roa kua uriuri manakoia taua tumu ra e te au apotetoro e te aronga pakari i Ierusalema. Kua akarongo atu taua kopapa aronga mana ra i te akakite anga te akatakaanga i akapeea te vaerua tapu i te angaanga anga ki runga i te aronga akarongo kare ra i te ngati Iuda. Kua akakite maira te kimikimi anga Puka Tapu e e akatupu anga teia i te totou akauruia ra. (Isaia 55:5; Amosa 9:11, 12) Kua rauka te iki anga tika e: Kare te au Kerititiano kare ra i te ngati Iuda i umuumuia kia kauraro i te Ture a Mose ra. (Angaanga 15:1, 6-29) No reira, e iti tangata ou tikai te Iseraela vaerua ra e kare i tetai akonoanga ngati Iuda ra.

14. Eaa te akatakaia maira e ta Iakobo tapaanga i te putuputuanga Kerititiano e ko “te au kopu tino ngauru ma rua i pueurikiriki ke ra”?

¹⁴ Kia rotai ki teia, i te tataanga ki te au Kerititiano akatainuia i te anere mataiti mua ra, kua tata atura te pipi ko Iakobo i tana reta ki “te au kopu tino ngauru ma rua i pueurikiriki ke ra.” (Iakobo 1:1; Apokalupo 7:3-8) Inara, ko te aronga o te Iseraela ou ra kare i akatakaia ki etai kopu ra. Kare e akataka anga ki roto i etai 12 kopu taka ke ra i roto i te Iseraela vaerua mei tei raveia i te Iseraela kopapa ra. Inara, te akakite maira ta Iakobo tuatua anga akauruia ra e i ta Iehova ra akara anga kua mono takiri te Iseraela o te Atua ra i te 12 kopu o te Iseraela kopapa ra. Me riro mai tetai ngati Iseraela anau kopapaia ei tuanga no te iti tangata ou ra, tona akapapa anga kopapa​—noatu me no te kopu o Iuda me kare no to Levi—​kare o te reira puapinga maata.​—Galatia 3:28; Philipi 3:5, 6.

E Koreromotu Ou

15, 16. (a) Eaa ta Iehova ra akara anga i te au mema kare i te ngati Iuda no te Iseraela o te Atua ra? (e) I akanooia ki runga i teea tumu anga tau i te ture te Iseraela ou ra?

¹⁵ I ta Iehova ra akara anga, te au mema kare i te ngati Iseraela o teia iti tangata ou nei e ngati Iuda vaerua tika tikai! Kua akataka maira te apotetoro ko Paulo: “Ko te ngati Iuda vao ra, kare ïa aia te ngati Iuda; e te peritome vao i te kopapa ra, kare ïa i te peritome: Ko te ngati Iuda roto ra, te ngati Iuda; e te peritome ngakau ra, te peritome, eiaa to vao ra, ko to te vaerua ra; ko tei kore i akameitakiia e te tangata, e te Atua ra.” (Roma 2:28, 29) E manganui te au Kenitara tei akarongo i te patianga kia riro ei tuanga no te Iseraela o te Atua, e ko teia e akatupu anga i te totou Puka Tapu. Ei akatauanga, kua tata te peroveta ko Hosea e: “E akaperepere oki au iaia i tei kore i akaperepereia ra: e karanga atu au ki te aronga kare te tangata noku ra, Ko toku ra ïa au tangata; e na ratou e tuatua mai Ko koe to matou Atua.”​—Hosea 2:23; Roma 11:25, 26.

¹⁶ Me kare te au Iseraela vaerua i raro ake i te Ture koreromotu a Mose ra, na runga i teea tumu anga ratou i riro ei ei tuanga no te iti tangata ou ra? Kua akono a Iehova i tetai koreromotu ou na roto ia Iesu ma teia iti tangata i te pae vaerua nei. (Ebera 9:15) I ta Iesu akono anga i te Akamaara anga o tona matenga, ia Nisana 14, 33 T.N., kua tuku atura aia i te varaoa e te uaina ki te 11 au apotetoro tiratiratu ra e kua tuatua atu e ko te uaina e akatutu anga i te “toto . . . no te koreromotu ou ra.” (Mataio 26:28; Ieremia 31:31-34) Mei tei akakiteia maira i ta Luka tataanga, kua karanga a Iesu e ko te kapu uaina te akatutu ra i “te koreromotu ou.” (Luka 22:20, NW) I te akatupu anga i ta Iesu au tuatua, i te riringi anga mai i te vaerua tapu ia Penetekote ra e te anau mai anga te Iseraela o te Atua ra, kua rave keia atu te Patireia mei te Iseraela kopapa ra e kua orongaia ki te iti tangata ou i te pae vaerua ra. Ei mono i te Iseraela kopapa ra, kua riro teia iti tangata ou i teianei ei tavini no Iehova, ko ratou tona au kite.​—Isaia 43:10, 11.

“Ierusalema Ou”

17, 18. Eaa te au akataka anga tei orongaia maira i te puka o Apokalupo no te kaka te tapapa maira i te au Kerititiano akatainuia ra?

¹⁷ Mei teaa ra te kaka te tapapa maira i taua aronga te ka o atu ki te kapikianga no te rangi ra! E mei teaa ra te mareka anga i te kite anga i te au mea umere te tapapa maira ia ratou! Te oronga maira te puka o Apokalupo kia tatou i etai akara anga i to ratou tuanga i te rangi. Ei akatauanga, ia Apokalupo 4:4, ka tatau tatou: “E au terono oki e rua ngauru ma a i te takako anga i taua terono [o Iehova] ra; e kite atura au i te aronga taito e rua ngauru ma a i te noo anga ki rungao i taua au terono ra, ma te kakau teatea i te kakau anga, e ma te korona auro ki runga i to ratou upoko.” Ko teia aronga pakari e 24 e au Kerititiano akatainuia ratou, tei akatuakaouia e i teianei te akono ra i te turanga i te rangi ta Iehova i taputou kia ratou ra. Te akamaara maira to ratou au korona e te au terono kia tatou i to ratou taoonga ei ariki. E manako katoa oki, i ta ratou angaanga teitei i te tavini anga takapini i te terono o Iehova ra!

¹⁸ Ia Apokalupo 14:1, ka kite atu tatou i tetai atu tu o ratou: “Akara atura au, e i na, te tu ua ra te Punua-mamoe ki runga i te maunga ra i Siona, ma te tangata katoa i vaitata iaia okotai anere e a ngauru ma a i te tausani, ma tona ingoa e te ingoa o tona Metua i te tata angaia ki rungao i to ratou rae.” I konei kua kite tatou i te numero kotingaia o teia aronga akatainuia e​—144,000. Te kiteia ra to ratou turanga ei ariki i te mea te tu ra ratou ma te Ariki akateronoia a Iehova ra, “te Punua-mamoe,” koia a Iesu. E tei runga ratou i te Maunga Siona i te rangi ra. Ko te Maunga Siona i te enua nei ko te ngai ia i Ierusalema, o te oire ariki o Iseraela ra. Ko te Maunga Siona i te rangi ra te akatutu maira i te turanga akateiteiia o Iesu e tona aronga akatuangaia, ko ratou ra te Ierusalema i te rangi.​—2 Paraleipomeno 5:2; Salamo 2:6.

19, 20. (a) Ka riro te au Kerititiano akatainuia ra ei tuanga no teea akaaerenga i te rangi? (e) Eaa te roa o te tuatau i rave ei a Iehova i te iki anga i te aronga ko te au rangi ra to ratou ngai?

¹⁹ Kia rotai ki teia, ko tei akatainuia i to ratou tu kaka i te rangi ra kua karanga katoaia e ko “Ierusalema ou.” (Apokalupo 21:2) Te Ierusalema i te enua nei ko “te oire ïa o te Ariki maata” e ko te ngai katoa oki o te iero ra. (Mataio 5:35) Te Ierusalema Ou i te rangi ko te akaaerenga Patireia ariki ia mei reira maira te Ngateitei maata, ko Iehova, e tana Ariki akataoongaia, ko Iesu, te tutara nei i teianei e te ngai e raveia ra te angaanga kau taunga i te tae anga mai te au akameitakianga apinganui mei te terono o Iehova no te rapakau anga i te au tangata. (Apokalupo 21:10, 11; 22:1-5) I tetai atu orama kua akarongo atura a Ioane i te aronga Kerititiano akatainuia ra tei tiratiratu, e tei akatuakaouia tei taikuia ra ko ‘te vaine a te Punua-mamoe.’ Mei teaa ra tetai tutu pumaana ta teia e peni maira i te piri anga taokotaiia ta ratou ka rekareka ma Iesu katoa e no to ratou kauraro anga puareinga kiaia! E tamanako ana i te rekareka i te rangi me rauka i to ratou openga tona tutaki i te rangi ra. Ei reira ra, e akonoiaʼi “te akaipoipo anga a te Punua-mamoe”! Ei reira taua akaaerenga ariki i te rangi ra e oti meitaki ei.​—Apokalupo 19:6-8.

²⁰ Ae, e au akameitakianga umere te vai maira no te aronga ta te apotetoro ko Paulo i tuatua ra: “Ko tatou nei, te vaira to tatou ngai i te au rangi ra.” (Philipi 3:20, NW) E vaitata i te rua tauatini mataiti, to Iehova ra ikianga i tana tamariki i te pae vaerua e te teateamamao anga ia ratou no tetai tuanga i te rangi. Kia tau ki te akapapu anga katoa, ko teia angaanga no te iki anga e te teateamamao anga te vaitata nei i te oti. Inara e maata atu te ka aru mai, mei tei akakiteia kia Ioane i tana orama i tataia ia Apokalupo pene 7 ra. No reira i teianei, te vaira tetai atu pupu Kerititiano te umuumuia ra tatou kia manako atu, e ka akamanako tatou i teia aronga i te atikara te aru mai nei.

Te Maara Nei Ainei Koe?

◻ Eaa te au angaanga tuke tuke a te vaerua ki rungao i te aronga e tuanga ra to ratou i te rangi?

◻ Eaa te pirianga taokotai te rekareka ra te aronga akatainuia ma Iehova? e ma Iesu?

◻ Akapeea te putuputuanga o te au Kerititiano akatainuia i te akataka angaia i roto i te Puka Tapu?

◻ I runga i teea tumu anga tau i te ture te akanoo anga i te Iseraela o te Atua ra?

◻ Eaa te au angaanga i te rangi te tapapa maira i te aronga Kerititiano akatainuia ra?

[Au Tutu i te kapi 10]

I te tuatau e vaitata i te rua tauatini mataiti, kua iki a Iehova i te aronga te ka tutara i te Patireia i te rangi ra