Kia Vai Rai Toou Akatere-Uaorai e Kia ki Maringiringi

“Kapiti katoa to kotou akarongo ki te . . . [akatere-uaorai, NW].”​—2 PETERO 1:5, 6.

1. Penei eaa te turanga tuke no te Kerititiano kia oronga i te akakite anga?

KUA tuatua maira Iesu: “E noku nei e taki naiaʼi kotou ki mua i te aroaro o te au tutara, e te ui ariki, ei kite no ratou, e no te au etene.” (Mataio 10:18) Me ko koe tetai tei kapikiia ki mua i te aroaro o tetai kavana, tetai akava, me kare tetai peretiteni, eaa taau apinga ka tuatua? Penei ko te mea mua e eaa koe i tae mai ei ki reira, e eaa te akaapa anga ia koe. Na te vaerua o te Atua e tauturu ia koe i te rave i te reira. (Luka 12:11, 12) Inara ka rauka ainei ia koe i te tamanako i te tuatuaanga no te akatere-uaorai? Te akamanako ra ainei koe i te reira e e tuanga puapinga maata no ta tatou tuatua ei Kerititiano?

2, 3. (a) Eaa tei tupu i raukai ia Paulo te tuatua akakite anga kia Feliki raua ko Derusila? (e) Eaa i riro ei te akatere-uaorai ei tumu tuatua tau na Paulo kia tuatua atu i taua turanga ra?

² E akamanako ana i tetai akaraanga ora-tikai. Kua tapekaia tetai kite no Iehova e kua apaiia mai ki te akavaanga. I te oronga atu anga tetai tuatau no te tuatua anga, kua anoano aia kia akakite i tona irinaki anga ei Kerititiano, ei kite. Ka rauka ia koe i te akara akavaanga “no te tuatua-tika, e te [akatere-uaorai, NW], e te akavaanga a muri ake.” Te taiku nei tatou i tetai tupuanga ki te apotetoro Paulo i Kaisarea. Kua akamataia na te uiui anga. “I etai ra i muri akera kua tae mai a Feliki raua ko Derusila koia tana vaine, e vaine ngati Iuda aia, e kua pati atura Feliki ia Paulo kia aere atu e kua akarongorongo atu kiaia i tana tuatua anga no te akarongo ia Iesu Karaiti ra.” (Angaanga 24:24) Te akakite maira te au ripoti tuatua enua e kua “rave a Feliki i te au tu takinga kino ravarai e te noinoi, i te akono anga i te mana ariki ma te au tu kite kore katoa mei te manu rai, no tetai tuikaa ra.” Kua akaipoipo aia e rua taime i mua akera i tana akavare anga ia Derusila kia kopae i tana tane (e kua aati i ta te Atua ture) e riro maira ei te toru o tana vaine. Penei ko taua vaine ra tei anoano kia akarongo atu i te reira akonoanga ou, koia te Kerititiano.

³ Kua rave ua atura Paulo i te tuatua “no te tuatua-tika, e te [akatere-uaorai, NW], e te akavaanga a muri ake.” (Angaanga 24:25) Ka riro na te reira e akataka i te tuke anga i rotopu i ta te Atua ra au turanga no te tu tika e te takinga kino e te tika kore e tuanga ra a Feliki raua ko Derusila no te reira. Penei kua manakonako a Paulo kia akakeu ia Feliki kia akaari mai i te tuatua tau i te akavaanga ra. Inara eaa i taikuiaʼi “te [akatere-uaorai, NW], e te akavaanga a muri ake”? Te uiui ra eia nga tokorua tu tau kore e eaa “te akarongo ia Iesu Karaiti ra.” E no reira te umuumuia ra raua kia kite e ko te aruanga iaia ka tau kia tapupu tetai i tona au manako, tana au tuatua, e tana au angaanga, ko te aite anga ia o te akatere-uaorai. Pouroa te au tangata e pauanga ta ratou ki te Atua no ta ratou manakoanga, te au tuatua, e te au angaanga. E no reira, e maata atu te puapinga o te akavaanga ta te kavana raua ko tana vaine e aro atura ki mua i te aroaro o te Atua, i tetai ua atu akavaanga mei ko mai ia Feliki ra i te akavaanga ia Paulo ra. (Angaanga 17:30, 31; Roma 14:10-12) E mea tau rai i te akarongo atu anga i ta Paulo tuatua ra, “kua tupu te mataku kia Feliki.”

E Puapinga Maata Ia Inara Kare i te Ngoie Ua

4. Eaa ra te akatere-uaorai i tau ei ei tuanga puapinga maata no te Kerititiano mou?

⁴ Kua kite te apotetoro ko Paulo i te tuanga puapinga a te akatere-uaorai no te akonoanga Kerititiano. Kua akapapu mai te apotetoro ko Petero i te reira, koia ra tetai o te au oa piri vaitata o Iesu. I te tata atu anga ki te aronga te ka ‘rauka te tu Atua’ i te rangi, kua raurau atura Petero i te akakiteanga i etai tu meitaki tei anoanoia ra, mei te akarongo, te aroa, e te akatere-uaorai oki. No reira kua o atu te akatere-uaorai ki te reira akapapu anga: “E tei ia kotou te reira au mea, e te maata ra, na te reira e akakite e, kare kotou i te akatau e te uua kore i te kite i to tatou Atu ia Iesu Mesia ra.”​—2 Petero 1:1, 4-8.

5. Eaa ra tatou i tau ei kia manako maata no te akatere-uaorai?

⁵ Inara, kua kite koe, e e mea ngoie ua te tuatua e ka tau tatou kia rave i te akatere-uaorai, i te rave anga tikai i te reira i to tatou oraanga i te au ra tataki tai ra. Ko tetai tumu koia oki e tu meangiti ua tei kitea te akatere-uaorai. Ia 2 Timoteo 3:1-5 kua akataka maira Paulo i te au tu te ka tupu i to tatou tuatau nei, koia oki “taua tuatau openga ra.” Ko tetai tu te ka akataka mai i to tatou tuatau nei, e manganui te aronga “kare e [akatere-uaorai, NW].” Te kite nei tatou i te reira te tupu anga takapini ia tatou, me kare ainei tatou?

6. Akapeea te akakite mai anga i te kore o te akatere-uaorai i teia tuatau?

⁶ E manganui te au tangata te irinaki ra e e erata kia “tuku ua i toou manako ngakau ma te kore e tapupuia” me kare “kia akakite i te au manako ketaketa me kare te riri ma te ririnui katoa.” Te akaketaketaia ra to ratou manako e te au tuanga akara anga i te ngai tangata te manako kore ra i te akatere-uaorai i tetai ua atu tu, te rave ua ra i ta ratou i anoano. Ei akatutu anga: E manganui tei rekareka ra i te au tarekareka anga mamaata kua matau i te au akakite anga i te au tu manako ngakau riri, e te riri ta ua. Kare ainei koe e maara ana, mei te nutipepa, i etai tuatau i tupu ei te au tamakianga ta ua me kare akaari anga au urupu i te ririanga i te ngai tarekarekaanga? Inara, kare ta tatou tumu i te akapou taime anga i te akamanako akaouanga i te akatauanga no te ngere i te akatere-uaorai. Ka rauka ia koe te akapapa i te au ngai e manganui te ka tau tatou kia akaari i te akatere-uaorai​—ta tatou kaikai anga e te inu anga, to tatou tu akatere i te pae o te tane e te vaine, te tuatau e te moni te akapouia ra no etai au angaanga rekaia. Inara eiaa e akara viviki i vao ua i te reira au ngai e manganui ra, e akara matatio tatou i tetai tuanga maata te ka tau tatou kia akakite i te akatere-uaorai.

Akatere-Uaorai i to Tatou Au Manako Ngakau

7. Eaa te tuanga o te akatere-uaorai te tau ra kia manako maataia?

⁷ E manganui i o tatou kua autu i tetai ngai i te akatikatikaanga me kare akatereanga i ta tatou au angaanga. Kare tatou e keia, e tuku ia ki te tu tau kore, me kare e ta ua; kua kite oki tatou i ta te Atua ture no te reira au tarevake. Inara, akapeea to tatou autuanga i te akatereanga i to tatou au manako ngakau? Kia topa e tuatau, ko te aronga kare i rauka ia ratou te tatanu i te akatere-uaorai i to ratou manako ngakau e putuputu te kore e akatere-uaorai i ta ratou au angaanga. E no reira e akara tatou i to tatou au manako ngakau.

8. Eaa ta Iehova e manakonako maira ia tatou no to tatou manako ngakau?

⁸ Kare te Atua ko Iehova e manako ana ia tatou kia riro ei apinga rave ua kare e manako, e kia kore o tatou manako ngakau e kia kore katoa oki e akakite i te reira. I te ngai tanumanga o Lazaro ra, kua “ngunguru iora [Iesu] i roto iaia, e taitaia atura.” I reira kua “aue iorā Iesu.” (Ioane 11:32-38) Kua akaari mai aia i tetai manako ngakau tuke, i te akatere apa kore anga i tana au angaanga, kua tuaru atura aia i te aronga okooko i te iero ra. (Mataio 21:12, 13; Ioane 2:14-17) Kua akaari katoa oki tana au pipi tiratiratu ra i te au manako ngakau oonu. (Luka 10:17; 24:41; Ioane 16:20-22; Angaanga 11:23; 12:12-14; 20:36-38; 3 Ioane 4) Inara, kua kite ratou e te anoanoia ra te akatere-uaorai kia kore ei to ratou manako ngakau e taki atu ia ratou kia ara. Kua akakite marama maira a Ephesia 4:26 i teia: “Kia riri kotou ra, auraka kia araia: auraka e topa te rā i to kotou riri anga.”

9. Eaa i puapingaʼi te akatereanga i to tatou manako ngakau?

⁹ Te vaira tetai tu kino e penei ka akara anga akatere-uaorai ua tetai Kerititiano inara, ko te tika, e rauka iaia te akatere i tona au manako ngakau. E akamanako ana i tei tupu i to te Atua ra mareka anga i te atinga a Abela ra: “Riri rava akerā Kaina, e akatumatuma atura tona mata. E kua tuatua mairā Iehova kia Kaina, Eaa koe i riri ei? e eaa oki i akatumatumaʼi toou mata na? Kia rave koe i te meitaki ra, kare ainei koe e kiteia mai? e kare i meitaki ra, kare ainei te vai ra te tarangaara i te ngutupa na? E kauraro ra aia ia koe, e ei runga ake koe iaia.” (Genese 4:5-7) Kare i rauka ia Kaina i te akatere i tona manako ngakau, e kua taki atu te reira iaia kia ta ia Abela. Kua taki atu te manako ngakau kare ra i rauka te akatere, ki te rave i tetai angaanga kare i rauka kia akatereia.

10. Eaa taau i kite mei ta Hamana akatauanga ra?

¹⁰ E akamanako katoa oki, i tetai akatauanga mei te tuatau mai o Moredekai raua ko Esetera. Kua riri te tangata mana taoonga ko Hamana no te kore a Moredekai e tupou atu ki aia. I muri akera kua manako tarevake a Hamana e ka akaperepereia aia. “Aere aturā Hamana i taua rā ra ma te rekareka, e te nanave anga o te ngakau; kia akara rā Hamana ia Moredekai i te ngutuare o te ariki ra, e kare aia i tu ki runga, e kare oki i keu ua ake iaia, ki rava akerā Hamana i te riri ia Moredekai. Akakoromito iora rā Hamana; e tae atura aia ki te ngutuare.” (Esetera 5:9, 10) E viviki ua aia i te manako ngakau rekareka. Inara e viviki katoa oki aia i te riri i te akara ua anga i tana i akamoupuku ra. Toou manako anga ainei e i ta te Puka Tapu tuatua anga e kua “akakoromito iora rā Hamana” e kua meitaki aia i te akatere-uaorai? Kare rava. No te reira tuatau ua, kua rauka ia Hamana te akatere i tana au angaanga e tetai ua atu akaari anga o te manako ngakau, inara kare i rauka iaia te akatere i tona riri vareae. Kua taki atu tona au manako ngakau kia akapapa aia i te ta.

11. Eaa te manamanata i tupu ana i te putuputuanga i Philipi, e penei na teaa i taki atu ki te reira?

¹¹ Mei te reira katoa oki, ka rauka kia tupu te kino maata ki te au Kerititiano no te ngere i te akatere i te manako ngakau. ‘A,’ penei ka manako tetai papaki, ‘kare te reira e riro ei manamanata i roto i te putuputuanga.’ Inara i tupu ana te reira. I tupu ana tetai manata kino ki nga Kerititiano akatainuia e rua, kare ra te Puka Tapu i akataka mai e eaa. E tamanako ana i teia ei tupu anga: Kua pati atu a Euodia i etai taeake e etai tuaine kia aere atu ki tetai kaikaianga me kare tetai putuputuanga marekaanga. Kare a Sunetuke i patiia, e kua mamae tona ngakau. Penei kua pera katoa aia na te kore anga e pati atu ia Euodia i tetai atianga i muri akera. I reira, kua kimi raua uaorai i te tarevake o tetai e tetai; i muri maira, kua ngata roa raua te tuatua atu tetai ki tetai. I tetai turanga mei te reira ra, ka riro ainei te pekapeka tumuanga e no te kore e patianga ki te kaikaianga? Kare. Ko te reira ua te mura akamataanga. I te kore anga eia nga tuaine akatainuia e rua i akatere i to raua manako ngakau, kua riro mai taua mura akamata anga ra ei ka anga ai maata i tetai vaorakau ra. Kua tupu ua atu taua pekapeka ra tae roa kia rave tetai apotetoro i te akaau anga.​—Philipi 4:2, 3.

Toou Manako Ngakau e Toou Au Taeake

12. Eaa te Atua i oronga mai ei i te ako tei kiteia ra ia Koheleta 7:9?

¹² E tika rai, kare i te mea ngoie ua kia akatere i te manako ngakau o tetai me ka kore e manakoia mai, ka mamae te ngakau, me kare ka akonoia mai ma te manako kino. Kua kite ra a Iehova i te reira, no te mea kua akara aia i te au pirianga tangata mei te akamataanga mairai. Kua ako maira te Atua ia tatou: “Auraka kia rapurapu ua to ngakau i te riri: tei te manava o te neneva ra te riri i te vai marie anga.” (Koheleta 7:9) E tamanako ana e kua akamanako te Atua i te manako ngakau na mua kare i te au angaanga ra. (Maseli 14:17; 16:32; Iakobo 1:19) E ui ia koe uaorai, ‘Ka tau ainei au kia akamanako i te akatereanga i toku manako ngakau?’

13, 14. (a) I te ao nei, eaa te apinga matauia te ka tupu no te kore e akatere i te manako ngakau? (e) Penei eaa te au apinga te ka taki atu i te au Kerititiano kia akamoupuku?

¹³ E manganui te au tangata i teianei ao tei kare e akatere i to ratou manako ngakau ka akamata i te tutaki i te kino​—ma te riri, e penei ka ta ua, e au maroanga no tetai tarevake tikai me kare i manako uaia ra e i raveia kia ratou uaorai me kare ki tetai o te kopu tangata. Me ka kore te au manako ngakau e rauka i te akatereia, ka rauka rai i te reira i te akatupu i te mana akakino no tetai tuatau roa. (Akaaite Genese 34:1-7, 25-27; 49:5-7; 2 Samuela 2:17-23; 3:23-30; Maseli 26:24-26.) E mea papu rai ko te au Kerititiano, noatu e no teea iti tangata me kare peu i akatupuia mai ei, ka tau ratou kia kite e ko te reira au tu riri kino e te au akamoupuku e tarevake ia, e kino oki, e mea tika kia kopae keia. (Levitiku 19:17) Te manako ra ainei koe i te kopae keanga i te akamoupuku ei tuanga no te akatere-uaorai ia koe i to manako ngakau?

¹⁴ Mei te tu rai ia Euodia raua ko Sunetuke ra, ka rauka i te kore e akatere-uaorai i te au manako ngakau i te taki atu ki te au pekapeka i teianei. Penei kua manako tetai tuaine e kare aia e manakoia ana no te kore aia i patiia ki te kaikai anga akaipoipo. Me kare penei ko tana tamaiti me kare ko tona katini tei kore i o atu ki te patianga. Me kare penei e taeake tetai tei oko i tetai motoka kua akaorooroia ana, mei tetai takake Kerititiano ra, e kare i roa kua kino te reira. Noatu e eaa te tumu, kua akatupu te reira i te au manako mamae, e kare i akatereia te au manako ngakau, e kua tupu te pekapeka ki te aronga tei o atura ki te reira. Eaa te ka tupu i reira?

15. (a) Eaa te au tu mii tei tupu mai no te akamoupuku i rotopu i te au Kerititiano ra? (e) Eaa te ako no te Puka Tapu te piri ra ki te tu akamoupuku?

¹⁵ Me kare tetai tangata tei tupu ra te pekapeka kiaia e tamata i te akatere i tona au manako ngakau e te akatupu anga i te au ma tona taeake, ka tupu rai te akamoupuku. I tupu ana i etai tuatau te au turanga e kua pati tetai Kite auraka aia e kapitiia atu ki tetai Apii Puka i te Putuputuanga no te mea “kare aia i rekareka ana” i etai Kerititiano me kare ngutuare tangata te aere ra ki reira. Mei teaa ra te mii! Te tuatua ra te Puka Tapu e e mea tau kore no te au Kerititiano kia apai tetai i tetai ki te au akavaanga o teianei ao, inara kare katoa ainei i te mea tau kore me ka kopae ke tatou i tetai taeake no tetai tu manako kore nona kua topa, kia tatou e me ki tetai kopu tangata no tatou? Te akakite maira ainei to tatou au manako ngakau e te tuku ra tatou i te pirianga toto ki mua atu i te tu au ma to tatou au taeake e te au tuaine? Te tuatua ra ainei tatou e ka rekareka ua tatou kia mate no to tatou tuaine, inara te akariro ra to tatou au manako ngakau kia ngata roa e vaitata kare tatou e tuatua atu kiaia i teianei? (Akaaite Ioane 15:13.) Te akakite pu maira te Atua kia tatou: “Auraka te kino e tutakiia atu ki te kino i te tangata ravarai nei. . . . Peneiake ko te tika, ko ta kotou ïa e aruaru e, kia noo au ua kotou i roto i te au tangata katoa nei. E taku au akaperepere e, auraka e akaoko, tuku ua atura i te riri.”​—Roma 12:17-19; 1 Korinetia 6:7.

16. Eaa te akaraanga meitaki ta Aberahama i akanoo mai i te akonoanga i te manako ngakau?

¹⁶ Ko tetai takainga e rauka akaou ei te akatere i to tatou au manako ngakau na te akatupu anga i te au me kare na te akakore anga i te tumu no te akaapa anga, i te mea e ka tuku ua i te tu pekapeka kia vai mai. E akamanako ana i te kore anga e rava i te enua te angai i ta Aberahama au puakatoro ma ta Lota katoa oki, e kua akamata ta raua aronga rave angaanga i te akatupu pekapeka. Kua tuku ua ainei a Aberahama kia riro na tona au manako ngakau e akatere iaia? Me kare kua akakite ainei aia i te akatere-uaorai? E meitaki tikai, kua akakite mai aia i tetai akaotianga au ua ki taua pekapeka pitiniti ra; kia kotingaia oki te enua oki. E kua tuku atu aia na Lota te ikianga mua. Akapapuanga e kare o Aberahama riri e kare ona akamoupuku, i muri akera kua aere atu aia i te tamaki kia ora a Lota.​—Genese 13:5-12; 14:13-16.

17. Akapeea a Paulo raua ko Banaba i te rave tau kore anga i tetai atianga, inara eaa te tu i aru mai i muri akera?

¹⁷ Ka rauka katoa oki kia kite tatou i te akatere-uaorai i tetai tupuanga kia Paulo raua ko Banaba. I muri ake i te rave kapiti anga ei tokorua raua no etai mataiti, kua kore e rotai to raua manako me ka rave raua ia Mareko no tetai terepu. “Tupu atura oki te taumāro maata ia raua uaorai, e taka ke atura raua: rave aturā Banaba ia Mareko, ano atura ki Kupero.” (Angaanga 15:39) I te kore anga e rauka i nga tangata pakari te akatere i to raua manako ngakau i taua atianga ra ka tau ia ei akamatakiteanga ia tatou nei. Me ka rauka te reira kia tupu kia raua, ka rauka katoa oki kia tupu kia tatou nei. Inara, kare raua i tuku kia tamouia te tupu anga te reira taka keanga me kare kia tupu te tutaki i te kino. Te akapapu maira te tataanga e kua rauka akaou i eia nga taeake te akatere i to raua au manako ngakau e kua angaanga kapiti akaou i muri akera ma te au.​—Kolosa 4:10; 2 Timoteo 4:11.

18. Me ka tupu te mamae ngakau, eaa ta te Kerititiano pakari te ka tau kia rave?

¹⁸ Ka tau ra ia tatou kia manako e penei e mamae ngakau etai, e ka akamoupuku oki, i roto i te au tangata o te Atua ra. I tupu ana te reira i te tuatau Epera ra e i te tuatau o te au apotetoro ra. Kua tupu katoa oki i roto i te au tavini o Iehova i to tatou tuatau, no te mea pouroa tatou ravarai e apa ua. (Iakobo 3:2) Kua raurau a Iesu i tana au pipi kia viviki i te akakore atu i te reira au tu pekapeka i rotopu i te au taeake ra. (Mataio 5:23-25) Inara e meitaki atu me ka araiia atu kia kore te reira e akamata te tupu mai na te akariroanga kia tau to tatou akatere-uaorai. Me kua manako koreia mai koe e me kua pekapeka koe no tetai apinga meangiti ua ta to taeake me kare tuaine i tuatua e i rave, eaa koe ka kore ei e akatere i toou au manako ngakau e ka akangaropoina ua atu i te reira? E mea tau tikai ainei e kia aravei atu i tetai ke ra, mei te mea rai e kare koe e akamerengoia kia tae roa kia tataraara aia kia koe no tana tarevake i rave? Eaa tikai te maata o taau akatere i toou au manako ngakau?

Ka Rauka Rai!

19. Eaa ra i tau ei e kia uriuri manako tatou no runga i te akatereanga i to tatou manako ngakau?

¹⁹ Kua uriuri manako maata tatou i tetai tuanga o te akatere-uaorai, koia te akatereanga i to tatou manako ngakau. E ko te reira tetai tuanga puapinga no te mea me ka kore tatou e akatere i to tatou manako ngakau ka taki atu ki te koreanga e akatere i to tatou arero, to tatou inangaro ainga, ta tatou au ravenga no te kaikai, e etai atu au tuanga o te oraanga e manganui te tau ra tatou kia akaari i te akatere-uaorai. (1 Korinetia 7:8, 9; Iakobo 3:5-10) Inara, e akamaroiroi, no te mea ka rauka ia koe i te akariro kia meitaki mai taau rave tamouanga i te akatere-uaorai.

20. Eaa ka papu ei ia tatou e ka rauka te akariro kia meitaki mai?

²⁰ Te inangaro ra a Iehova i te tauturu mai ia tatou. Akapeea e papu ei ia tatou? No te mea, ko te akatere-uaorai tetai o te au ua o tona vaerua. (Galatia 5:22, 23) E no reira, ko te maata ta tatou rave kia tau e kia rauka ia tatou te vaerua tapu mei ia Iehova mai e kia akakite katoa oki i tona au ua, mei te reira katoa te maata to tatou tau kia manakonako atu kia tere maata atu to tatou akatere-uaorai. Auraka e akangaropoina i ta Iesu akapapu mai anga: ‘Ka oronga te Metua i te rangi ra i te vaerua tapu i te aronga e pati atu iaia ra’!​—Luka 11:13; 1 Ioane 5:14, 15.

21. Eaa taau ka akatika kia rave a te tuatau ki mua no te akatere-uaorai ia koe e toou manako ngakau?

²¹ Auraka e manako e ka ngoie ua te reira. E penei ka rave anga ngata atu no te aronga tei tupu ake takapini i te au tangata tei tuku i te au akakite anga kare i akatereia to ratou manako ngakau, no tetai papaki e maata atura to ratou tu poitirere ua, me kare no te aronga kare ua ra i tamata kia akaari i te akatere-uaorai. No te reira tu Kerititiano, ko te raveanga kia vai mai te akatere-uaorai e kia ki maringiringi penei e akaaoanga tikai ia. Inara ka rauka ia. (1 Korinetia 9:24-27) Ia tatou e akavaitata atura e te vaitata ki te openga o teianei akatereanga o te au mea nei, ka tupu ua atu te au pekapeka e te au taomi anga. Ka anoanoia tatou kia maata atu te akatere-uaorai kare kia meangiti mai, kia maata roa atu! E akara matatio ia koe i toou akatere-uaorai. Me ka kite koe i etai ngai te tau ra kia akameitakiia mai e koe, e rave i te reira. (Salamo 139:23, 24) E pati i te Atua kia oronga mai kia maata atu tona vaerua. Ka akarongo mai aia ia koe e ka tauturu mai ia koe kia vai mai toou akatere-uaorai e kia ki maringiringi ia.​—2 Petero 1:5-8.

Au Tumu no te Manako Akaou

◻ Eaa i puapinga maataʼi te akatere i toou manako ngakau?

◻ Eaa taau i kite mei te au akatauanga a Hamana e Euodia raua ko Sunetuke?

◻ Eaa taau ka tauta tiratiratu tikai kia rave me ka tupu mai tetai tumu no te pekapeka?

◻ Akapeea e raukai te akatere-uaorai i te tauturu ia koe kia kopae ke i tetai ua atu akamoupuku anga?

[Tutu i te kapi 18]

I mua ia Feliki raua ko Derusila, kua tuatua a Paulo no runga i te tuatua tika e te akatere-uaorai