Дурён ла тэмнотатар — ашэнпэ андо свето

1, 2. а) Кай сас о Павло, кала пистросардя о письмо андо Ефесо, и васо во стердя када? б) Пэ савэ вопросоря амэ уӷанаса атвето?

КАЛА о Павло сас тала домашнё аресто андо Римо, во камэлас варисар тэ подритярэл пэстирэ ԥралэн и ԥэян. Во нэ моӷ тэ диқэлпэ лэнца, важ када пистрояс лэнди письморя. Ек андар лэндэ во пистросардя андо Ефесо варикай андо 60 или 61 бэрш н. э. (Еф. 1:1; 4:1).

² О Павло уӷангля лэ ԥралэн и лэ ԥэян анда Ефесо почти варикай 10 бэрш палпалэ. Андэ кодэва форо во проандярдя бут время. Котэ во росԥэнэнас и лащи новость и сытярэлас лэ учениконэн (Дила 19:1, 8—10; 20:20, 21). О Павло фартэ любияс лэ ԥралэн и лэ ԥэян и камэлас, кай вонэ тэ на парашэн тэ служын лэ Иеговасти. Во пистросардя лэнди пала тэмнота и свето. Но васо о Павло имено пала када пистросардя лэ христианонэнди, савэн о Дэл витидя свынтонэ зорэса? Сости амэн када сытярэл адес? Давайте уӷанаса атветоря пэ кадэла вопросоря.

АНДА ТЭМНОТА КАРИНГ О СВЕТО

3. Соса о Павло сыстосардя лэ христианонэн анда Ефесо?

³ О Павло ԥэндя лэ христианонэнди андо Ефесо: «Варикала тумэ сас андэ тэмнота, ай акана тумэ тала свето» (Еф. 5:8). Кадэлэса во сыкадя, сар вонэ дэ фартэ паруделэ. Погиндосарам, васо о Павло ԥэндя, кай и христианоря анда Ефесо «варикала... сас андэ тэмнота».

4. Васо можно тэ ԥэнас, кай и мануша андо Ефесо сас андэ тэмнота через и хохавнэ веры?

⁴ Тэмнота через и хохавнэ веры. Жы каринг кода сар тэ уӷанэн о чачимос и тэ ашэн христианоря, и мануша анда Ефесо сас андэ тэмнота. Васо? Вонэ патянас андэ суеверии и андэ кода, сости сытярэн и хохавнэ веры. О форо Ефесо сас ашунгло кодэлэса, кай котэ сас ла Артимидатири қандири. Андэ кодэя время и мануша диқэнас пэр латэ сар пэ ек анда 7 ла люматирэ чудеса. И мануша авэнас интя и тэлёнас лэ идалонэнди. Андо Ефесо и мануша терэнас и битинэнас цынёне ла Артимидатирэ қандиря и пэ када затерэнас барэ ловэ (Дила 19:23—27). Ай инке бут мануша андо Ефесо драбатярэнас (Дила 19:19).

5. Васо можно тэ ԥэнас, кай мануша анда Ефесо сас андэ тэмнота через о билажавардимос?

⁵ Тэмнота через о билажавардимос. И мануша андо Ефесо андярэнас пэс фартэ билажавардэс. Часто пала када дэнас дума пэ сцэна андо театро или кала справинас и празникоря (Еф. 5:3). Бутэ манушэн анда Ефесо на халас оди, (дословно када сыкавэл, кай лэндэ на сас дук андо ди) (Еф. 4:17—19). Вонэ на ӷанэнас, со важ о Иегова лашо, ай со най. Важ када лэндэ совсем на сас лажаимос и дар англа Дэл. Акэ васо о Павло пистросардя, кай «лэндири годи андэ тэмнота и вонэ отдилимэ ла жызнятар, сави камэл тэ дэл о Дэл».

6. Васо о Павло ԥэндя лэ манушэнди анда Ефесо: «Акана тумэ тала свето»?

⁶ Дэсавэ мануша анда Ефесо вижылэ анда тэмнота. О Павло пистросардя: «Акана тумэ тала свето, важ кода кай тумэ прижан лэ Барэ Хуласти» (Еф. 5:8). Вонэ закамлэ тэ жувэн кадя, сар пистромэ андэ лэ Дэвлэско алав, саво сас сар свето важ лэнго дром (Пс. 119:105). Кадэла мануша парашэлэ тэ тэлён лэ идалонэнди и тэ терэн билажавардимос. Вонэ линэ тэ сытён кай о Дэл и старыинаспэ тэ служын лэсти кадя, кай тэ радуин лэс (Еф. 5:1).

7. Васо можно тэ ԥэнас, кай амэ шаспэ пэ христианоря анда Ефесо?

⁷ Кода, со амэ диқас адес, шолпэ пэ кодэя время. Жы каринг кода сар тэ уӷанас о чачимос, амэ самас андэ тэмнота. Васо кадя можно тэ ԥэнас? Важ кода кай дэсавэ андар мэндэ справинас празникоря анда хохавнэ веры, ай варико андярэлас билажаварди жызня. Но кала амэ уӷанглям, со важ о Иегова лашымос, ай со най, амэ паруделям. Амэ закамлям тэ жувас па лэ Дэвлэско свынто законо, кай тэ радосарас лэско ди. Амари жызня ашэля пэ бутэстэ май лащи (Ис. 48:17). Но амэнди всаек трэбуй тэ фэрисавас кодэлэстар, кай упалэ тэ на попэрас андэ тэмнота. Трэбуй тэ ритярдювас латар май дур и тэ андярас пэс «сар лэ светостирэ бэяцэ». Сар када тэ терас?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

ДУРЁН ЛА ТЭМНОТАТАР

8. Сар ԥэнэнпэ андэ Ефесо 5:3—5, со трэбуй сас тэ на терэн и христианоря анда Ефесо?

⁸ Проадинон Ефесо 5:3—5. И христианоря анда Ефесо трэбуй сас тэ ритярдён май дур лэ билажавардимастар. Важ када лэнди трэбуй сас тэ на терэн и дила, сави на чалёл лэ Иеговасти. Када поможысардоп лэнди тэ дурён ла тэмнотатар. Андэ када ужалас най кати билажаварди дила, но и абисави дума. О Павло ԥэндя лэ ԥралэнди анда Ефесо, кай кодэлэнди, ко кадя терэн, «нисо на дорэсэлапэ андэ лэ Христоско и лэ Дэвлэско Царство».

9. Васо опасно тэ диқас, тэ ашунас или тэ дас дума пала варисо найвужо и билажавардо?

⁹ Амэнди трэбуй тэ авас осторожни, кай тэ на попэрас андэ «евутни дила, сави жал ла тэмнотатар» (Еф. 5:11). Сар амэ ужэ ӷанас, кала о мануш диқэл, ашунэл или дэл дума пала варисо найвужо и билажавардо, во ашэл май пашэ, кай тэ стерэл бэзэх (Быт. 3:6; Иак. 1:14, 15). Андэ ек страна дэсавэ лэ Иеговастирэ свидетеля стердэ ӷрупа андо интэрнэто и линэ тэ общяюца ек еқэса. Спэрва и дума жалас пала дэвликунэ вопросоря. Но ӷэт май интя и дума ля тэ зажал пала кода, со можэт тэ авэл кати машкар хулай и хулаи. Када сас темы, савэ на чалёнас лэ Иеговасти. Дэсавэн када андя каринг о бэзэх. Вонэ стердэ билажавардимос. Потом вонэ прижанделэ, кай пэр лэндэ фартэ повлияла и найвужи дума, сави сас андэ ӷрупа.

10. Сар о Сатана старыийпэ амэн тэ обхохавэл? (Ефесо 5:6).

¹⁰ И мануша андэ лэ Сатанастири люма камэн амэнди тэ доԥэнэн, кай тэ андярэс найвужи и билажаварди жызня — када нармально (2 Пёт. 2:19). И амэ кадэлэсти на удивисавас. О Сатана вся и время старыияспэ тэ задилярэл о шэро лэ манушэнди, кай вонэ тэ на полэн, со лашо, ай со най (Ис. 5:20; 2 Кр. 4:4). Акэ васо андэ бут киноря, передачи и сайторя ԥэрдо кода, со на сжалпэ лэ Иеговастирэ законоса. О Сатана старыийпэ тэ зашол амэнди андо шэро гиндо, кай если о мануш андярэл пэс найвужэс и билажавардэс — када лащи и вэсэло жызня и кадэлэстар нисо найлашо на авэла. (Проадинон Ефесо 5:6.)

11. О совето анда Ефесо 5:7 анэн лашымос и адес. Сар када дицол па кода, со сас ла Анжеласа? (Диқэн кадяжэ и картинка.)

¹¹ О Сатана авелоп бахтало, если амэ линоп общяца кодэлэнца, ко на любий лэ Иеговас. Тоди амэнди авелоп май ԥарэс тэ жувас па лэ Иеговаско законо. О Павло ӷанэнас пала кадэя опасность. Важ када во ԥэндя лэ христианонэнди андо Ефесо, кай лэн нисо тэ на сԥандэл кодэлэнца, ко терэл найлашымос андэ лэ Дэвлэстирэ яқа (Еф. 5:7). Но амэнди трэбуй тэ авас инке май осторожни, важ кода кай адес и мануша общяюца най кати, кала диқэнпэ, но и андо интэрнэто. И Анже́лаa анда Азия па пэстири жызня поля, кай и общения андо интэрнэто — када най иӷрушки. Вой росԥэнэн: «Када можэт тэ анэн каринг и бида. Мэ и екжэни на шутэм сама, сар линэ тэ парудён мэрнэ гиндоря. Спэрва мандэ появисайлэ друӷоря, савэ на стон патив пэ Библия. Прожыля время, и мэ лэм тэ гиндосарав, кай када нармально тэ жувэс кадя, сар тути камэлпэ, дажэ если када на чалёл лэ Иеговасти». Драго, кай и барэдэр ԥрала андэ собрания вовремя поможысардэ ла Анжелати тэ обгиндойпэ. Вой ԥэнэн: «Акана ӷлавно, пала со мэ гиндосарав, — када о Иегова, ай най кода, со исин андо интэрнэто».

12. Со поможыя амэнди тэ на парувас лэ Иеговаско законо пэ кадэя люма?

¹² И мануша андэ кадэя люма камэн, кай амэ тэ жувас кадя, сар вонэ. Но лэндэ на вижала амэн тэ змарэн (Еф. 4:19, 20). Кай тэ фэрисарас пэс, давайте погиндосараса пала кацавэ вопросоря: «Старысавав мэ май набут тэ общяюсь кодэлэнца, каса терав бути, лэ однокласниконэнца и аврэ манушэнца, савэ на жувэн кадя, сар чалёл лэ Иеговасти? Лава мэ тэ зашавпэ пала кода, андэр со патяв, дажэ если пэр мандэ ԥэнэна, кай мэ фанатико?» Амэнди трэбуй тэ авас осторожни, дажэ кала витидас лэ друӷонэн андэ христианско собрания. Пала када пистросардя о апостало Павло андэ 2 Тимафеё 2:20—22. Амэ камас тэ дружысарас кодэлэнца, ко поможыя амэнди тэ на парашас тэ служысарас лэ Иеговасти, ай най кодэлэнца, ко одмарэл амэн лэ Дэвлэстар.

АНДЯРЭН ПЭС «САР ЛЭ СВЕТОСТИРЭ БЭЯЦЭ»

13. Сар када, тэ андярас пэс «сар лэ светостирэ бэяцэ»? (Ефесо 5:7—9).

¹³ О Павло ԥэндя лэ христианонэнди най кати тэ дурён ла тэмнотатар, но и тэ андярэн пэс «сар лэ светостирэ бэяцэ». (Проадинон Ефесо 5:7—9.) Со када сыкавэл? Амэнди трэбуй о дес и рят тэ андярас пэс сар чачунэ христианоря. Со андэ када поможыя? Тэ адиносарас и Библия и май драго тэ уӷанас, со росԥэнэнпэ андэр латэ и андэ амарэ публикацыи. Ай инке важно май бут тэ уӷанас пала кода, сар жувэлас о Исус Христос и сости во сытярэлас. Важ кода кай во — «свето важ и люма» (Иоан. 8:12; Прит. 6:23).

14. Сар амэнди поможый о свынто зор?

¹⁴ Кай тэ авас «лэ светостирэ бэятонэнца», амэнди трэбуй о свынто зор. Васо? Важ кода кай би лэско амэ нэ сможэм тэ ашаспэ вужэ андэ кадэя фартэ найлащи люма (1 Фес. 4:3—5, 7, 8). О свынто зор фэрий, кай амэ тэ на гиндосарас кадя, сар и мануша андэ кадэя люма. Лэндирэ гиндоря жан против кода, сости сытярэл о Дэл. Ай инке о свынто зор поможый тэ терас лашымос и тэ ритярас лэ Дэвлэско законо (Еф. 5:9).

15. Сар тэ получисарас о свынто зор? (Ефесо 5:19, 20).

¹⁵ Сар тэ получисарас о свынто зор? Например, амэ можэм тэ мангаспэ пала лэстэ. О Исусо ԥэндя, кай о Иегова «дэла свынто зор кодэлэнди, ко мангэл лэстар» (Лука 11:13). Кадяжэ амэ можэм тэ получисарас о свынто зор, кала вмести хвалисарас лэ Иеговас пэ амарэ христиански собрании. (Проадинон Ефесо 5:19, 20.) Блаӷодаря кодэлэсти, кай пар мэндэ влияет о свынто зор, амэ можэм тэ жувас кадя, кай тэ радосарас лэ Дэвлэс.

16. Со поможыя амэнди тэ прилас годявэрнэ ришэнии? (Ефесо 5:10, 17).

¹⁶ Англа кода сар тэ прилас и ришэния, трэбуй спэрва тэ полас «со уӷодно лэ Иеговасти», ай тоди тэ терас кадя. (Проадинон Ефесо 5:10, 17.) Сар амэ можэм тэ полас, сар о Дэл диқэл пэ варисаво вопросо? Амэнди трэбуй тэ арақас, савэ принцыпоря анда Библия поджан каринг амари ситуацыя. И если амэ приласа кадэла принцыпоря андэ пэстири жызня, тоди амарэ ришэнии май часто лэна тэ анэн лашымос.

17. Сар тэ тратисарас и время годяса? (Ефесо 5:15, 16). (Диқэн кадяжэ и картинка.)

¹⁷ О Павло ԥэнэнас лэ христианонэнди анда Ефесо, кай вонэ годяса тэ тратин пэстири время. (Проадинон Ефесо 5:15, 16.) Амаро вороӷо, о Сатана, камэл тэ зашол амэн разнона диласа, кай амэндэ тэ на ашэлпэ время важ о Дэл (1 Иоан. 5:19). Дэсавэ христианоря моӷут тэ ришын, кай бут тэ сытён, тэ домардён варисо андэ жызня или тэ затерэн ловэ — када май важно, чем и служэния лэ Иеговасти. Кодэва, ко кадя гиндой, диқэл пэ када кадя, сар и мануша андэ кадэя люма. Канешно, вся када най вэрыто. Но нащи тэ домэкас, кай када тэ авэл по пэрво ҭан андэ жызня. Кай тэ терас «сар лэ светостирэ бэяцэ», амэнди трэбуй тэ тратисарас и время годяса, аврэ алавэнца, тэ терас кода, со па чачимастэ важно.

18. Со стердя о Доналдо, кай май драго тэ тратий пэстири время?

¹⁸ На умэкэн и возможность тэ служын лэ Иеговасти. На парашэн тэ гиндон пала кода, со тумэ инке можэте тэ стерэн. Имено кадя пэс андярэлас о До́налдо анда Южно Африка. Во росԥэнэн: «Мэ диқлэм пэ мэрни жызня авря ригатар и лэм тэ мангав лэ Иеговас тэ поможый манди тэ терав важ лэстэ май бут дила. Мэ мангаваспэ пала бути, сави на залиноп мандар бут время, кай через када мэ май часто тэ служысарав. Лэ Иеговастирэ зорэса мэ виарақлэм кацави бути. Акана амэ ла хулаяса вмести служысарас полновремено. Заляпэ нэви бахтали время андэ амари жызня».

19. Со поможыя амэнди тэ андярас пэс «сар лэ светостирэ бэяцэ»?

¹⁹ О письмо, саво о Павло пистросардя лэ христианонэнди андо Ефесо поможысардя лэнди тэ на парашэн тэ служын лэ Иеговасти. Кадэла гиндоря сас лэ Дэвлэстар, и вонэ анэн лашымос и амэнди. Амэнди тожэ трэбуй годяса тэ витидас, сар тэ отцыювас и каса тэ дружысарас. Инке важно тэ на промэкас май бут тэ уӷанас пала кода, со пистромэ андэ Библия. Тоди амэ домэкаса, кай лэ чачимаско свето тэ сыкавэл амэнди о дром андэ вся, со амэ терас. И, канешно, амэнди фартэ трэбуй о свынто зор, саво поможый тэ авэл характеро, саво чалёл лэ Дэвлэсти. Если амэ ласа тэ терас кадя, сар пистросардя о Павло андо Ефесо, амэндэ вижала тэ прилас годявэрнэ ришэнии, савэ сжанпэ лэ Иеговастиря времяса. Вся када фэрия амэн ла тэмнотатар, сави исин андэ кадэя люма, и поможыя тэ андярас пэс «сар лэ светостирэ бэяцэ»!