O le Tusi Muamua i le Faapotopotoga i Korinito

15 O lenei le ʻauuso e, ou te faamanatu atu iā te outou le tala lelei na ou folafola atu,+ lea foʻi na outou talia ma tutumau ai. 2 O lenei tala lelei na ou folafolaina atu iā te outou, e faaolaina ai outou pe afai e tou te taofimau i ai, auā a leai, ua lē aogā la le avea o outou ma ē e talitonu.

3 Ua ou faailoa atu iā te outou se tasi o mea muamua lea foʻi na ou mauaina e faapea, na maliu Keriso mo a tatou agasala e tusa ai ma Tusitusiga Paia;+ 4 ma na tanu o ia+ ma toe faatūina mai+ i le aso lona tolu+ e tusa ai ma Tusitusiga Paia;+ 5 ma na faaali atu o ia iā Kefa,*+ ona sosoo ai lea ma le toʻa 12.*+ 6 Ina ua mavae lenā, ona faaali atu lea o ia i le ʻauuso e sili atu ma le toʻa 500 o loo faapotopoto,+ o le toʻatele o i latou o loo faatasi pea ma i tatou, e ui o nisi ua maliliu.* 7 Ona faaali atu foʻi lea o ia iā Iakopo,+ ona sosoo ai lea ma le ʻauaposetolo uma.+ 8 Ae na mulimuli lava faaali mai o ia iā te aʻu,+ e peiseaʻī o se tama fanau lē au.

9 O aʻu o lē e aupito faatauvaa o le ʻauaposetolo, ma e lē tatau ona taʻua aʻu o se aposetolo, auā na ou sauā i le faapotopotoga a le Atua.+ 10 Ae ona o le agalelei faifua o le Atua, ua ou faapenei ai. E leʻi maʻimau lona agalelei faifua iā te aʻu, auā na sili atu ona ou galue malosi nai lo o i latou uma; peitaʻi e lē o aʻu, a o le agalelei faifua o le Atua o loo iā te aʻu. 11 O lea, e tusa po o aʻu po o i latou na talaʻi atu, ae e tutusa la matou feʻau ma na outou talitonu i ai.

12 Afai ua talaʻia Keriso ua toe faatūina mai i le oti,+ e faapefea la ona fai mai nisi o outou e leai se toetū o ē ua oti? 13 Afai e moni e leai se toetū o ē ua oti, e leʻi toe faatūina mai la Keriso. 14 Ae afai e leʻi toetū mai Keriso, ua iʻuvale la matou talaʻiga, ma ua iʻuvale foʻi lo outou faatuatua. 15 Ua fai foʻi i matou ma molimau pepelo i le Atua,+ auā ua matou molimau pepelo i le Atua e faapea, ua ia toe faatūina mai le Keriso,+ peitaʻi e na te leʻi faatūina o ia pe afai e moni e lē toe faatutūina mai o ē ua oti. 16 Auā afai e lē toe faatutūina mai o ē ua oti, e leʻi toe faatūina mai foʻi la Keriso. 17 Afai foʻi e leʻi toe faatūina mai Keriso, ua lē aogā la lo outou faatuatua; ma ua outou agasala pea.+ 18 Ua fano foʻi la i latou o ē ua oti* o autasi ma Keriso.+ 19 Afai e na o le olaga nei e tatou te faamoemoe ai iā Keriso, e sili la ona pagatia i tatou nai lo o tagata uma.

20 Peitaʻi, o lenei ua toe faatūina Keriso mai i ē ua oti, o lē na muamua* faatūina mai i ē ua oti.*+ 21 Auā ua oo mai le oti ona o le tagata,+ ua toe faatutūina foʻi o ē ua oti ona o le tagata.+ 22 Auā e pei ona oti uma lava iā Atamu,+ e faapena foʻi ona toe faaolaina uma lava e ala i le Keriso.+ 23 Ae e taʻitoʻatasi e tusa ai ma lenei faatulagaga: e muamua lava Keriso,*+ ona mulimuli ane lea o soo o Keriso i le taimi o lona faatasi mai.+ 24 Ona oo ai lea i le iʻuga, e tuuina atu ai e ia le Malo i le Atua lona Tamā, pe a uma ona ia faaumatia malo uma, ma pule, ma ē malolosi uma.+ 25 Auā e tatau ona pule o ia o se tupu seʻia tuuina e le Atua fili uma i lalo o ona vae.+ 26 Ona faaumatia lea o le fili mulimuli, o le oti lea.+ 27 Auā “ua tuuina e le Atua o mea uma i lalo o ona vae.”+ Ae ina ua fai mai o ia ‘ua tuuina i lalo o mea uma iā te ia,’+ ua faamaonia ai e lē o aofia ai Lē na ia tuuina i lalo o mea uma iā te ia.+ 28 Peitaʻi, pe a tuuina i lalo o mea uma iā te ia, ona tuuina foʻi lea i lalo e le Alo o ia lava i Lē na tuuina i lalo o mea uma iā te ia,+ ina ia pule aoao le Atua i le aoao o mea.+

29 Auā a leai, o le ā se mea e faataunuuina e i latou ua papatisoina ina ia avea ma tagata oti?+ Pe afai e lē toe faatutūina ē ua oti, aiseā la ua papatisoina ai i latou ina ia avea ma tagata oti? 30 Aiseā foʻi ua lamatia ai o matou ola i taimi uma?*+ 31 O aso uma ou te fesagaʻi ai ma le oti. Le ʻauuso e, ou te faamautinoa atu lenā mea, i le olioli lea ua iā te aʻu ona o outou iā Keriso Iesu lo tatou Alii. 32 Pe afai na ou tau ma manufeʻai i Efeso e pei ona faia e isi,*+ po o le ā se aogā iā te aʻu? Afai e lē toe faatutūina mai o ē ua oti, “seʻi o tatou aai la ma inu auā o a taeao e tatou te feoti ai.”+ 33 Aua neʻi faasesēina outou. O aumea leaga e faaleagaina ai masaniga lelei.*+ 34 Inā ala mai ia i le amiotonu, ma aua le faia pea le agasala, auā ua lē iloa e nisi le Atua. Ua ou fai atu nei mea ina ia outou māsiasi ai.

35 Ae a faapea mai se tasi: “E faapefea ona toe faatutūina mai o ē ua oti? Ioe, e faapeʻī tino latou te ō mai ai?”+ 36 O oe le tagata lē malamalama! O le mea e te lūlū e lē ola mai seʻi vaganā ua pala* muamua. 37 O le mea foʻi ua e lūlū, e te leʻi lūlūina le tino e ola mai, a o le fatu, atonu o le saito po o se isi ituaiga fatu; 38 ae e avane i ai e le Atua se tino e pei ona ia finagalo i ai, ma e tofu le fatu ma lona lava tino. 39 E lē o tino uma e tutusa, auā e ese le tino o tagata, e ese le tino o povi, e ese tino o manufelelei, ma e ese foʻi tino o iʻa. 40 E iai foʻi tino faalelagi+ ma tino faalelalolagi;+ ae e ese le mamalu o tino faalelagi, e ese foʻi le mamalu o tino faalelalolagi. 41 E ese le pupula o le lā, e ese le pupula o le masina,+ e ese foʻi le pupula o fetu; o le mea moni, e ese le pupula o le tasi fetu mai i le isi fetu.

42 E faapena foʻi le toetutū mai o ē ua oti. Ua lūlūina le tino e pala, ae ua toe faatūina mai i le tino e lē pala.+ 43 Ua lūlūina le tino e iʻuvale, ae ua toe faatūina mai i le tino e mamalu.+ Ua lūlūina le tino e vaivai, ae ua toe faatūina mai i le tino e malosi.+ 44 Ua lūlūina i le tino faaletino, ae ua toe faatūina mai i le tino faaleagaga. Afai e iai le tino faaletino, e iai foʻi le tino faaleagaga. 45 O lea, ua tusia e faapea: “Na avea le tagata muamua o Atamu, ma tagata ola.”+ Ae na avea le Atamu mulimuli ma agaga e foaʻi mai ai le ola.+ 46 Peitaʻi, e lē muamua le faaleagaga. E muamua le faaletino, ona mulimuli ai lea o le faaleagaga. 47 O le tagata muamua, e mai i le eleele ma na faia mai i le efuefu;+ o le tagata lona lua, e mai i le lagi.+ 48 E pei o lē na faia mai i le efuefu, e faapena foʻi i latou ua faia mai i le efuefu; ma e pei o lē e mai i le lagi, e faapena foʻi i latou e faalelagi.+ 49 E pei ona faia i tatou i foliga o lē na faia mai i le efuefu,+ e faapena foʻi ona foliga i tatou i lē e mai i le lagi.+

50 Ae ou te fai atu iā te outou uso e, e lē mafai ona fai le Malo o le Atua ma tofi o i latou ua iai tino aano ma toto, e lē mafai foʻi e mea ua pala ona maua le tofi o mea e lē pala. 51 Faauta! ou te taʻu atu iā te outou se mea lilo paia: E lē momoe i tatou uma i le oti, ae o le a suia i tatou uma,+ 52 e vave lava e pei o le emo o le mata, i le taimi e ili ai le pū mulimuli. Auā o le a ilia le pū,+ ona toetutū mai ai lea o ē ua oti ma tino e lē pala, ma o le a suia i tatou. 53 O le tino e pala, e suia lea i le tino e lē pala,+ ma o le tino e mafai ona oti, e suia foʻi i le tino e lē mafai ona oti.*+ 54 Ae pe a suia le tino e pala i le tino e lē pala, ma o le tino e mafai ona oti e suia foʻi i le tino e lē mafai ona oti, ona taunuu ai lea o le upu ua tusia: “E faaumatia le oti e faavavau.”+ 55 “Le oti e, o fea o iai lou manumalo? Le oti e, o fea o iai lou tui?”+ 56 O le tui e iʻu i le oti o le agasala lea,+ ma o le malosi o le agasala o le Tulafono lea.*+ 57 Ae e faafetai i le Atua, ona ua ia aumaia iā i tatou le manumalo e ala i lo tatou Alii o Iesu Keriso!+

58 O lea, oʻu uso pele e, ia outou tutumau,+ ia mausalī, ma ia tele pea mea e fai+ i le galuega a le Alii, ma le iloa e lē iʻuvale a outou galuega fitā+ i le Alii.