Magazini Edu Ane Nyaya Dzinofadza Vanhu Vakasiyana-siyana
1. Boka remuranda akatendeka, akangwara, rinotevedzera sei muapostora Pauro?
1 Muapostora Pauro aishandisa nzira dzakasiyana-siyana kuti aparidzire “vanhu vemarudzi ose” mashoko akanaka. Ndizvowo zviri kuitwa neboka remuranda akatendeka, akangwara, riri kushandisa magazini edu kuti ridzidzise vanhu vezvitendero zvakasiyana-siyana uye vanobva kwakasiyana-siyana. (1 VaK. 9:22, 23) Kuti tinyatsoshandisa magazini edu eNharireyomurindi uye Mukai! patinenge tichiparidzira tinofanira kugara tichiziva kuti akanyorerwa vanaani.
2. Mukai! yakagadzirirwa kuti ibatsire vanhu vakaita sei?
2 Mukai!: Magazini iyi yakagadzirirwa kuti ibatsire vanhu vakafanana nevaitaurwa nezvavo nemuapostora Pauro paaitaura ‘nevanhu vomuAtene.’ (Mab. 17:22) Vanhu ivavo vakanga vasina kukurira muchiKristu, uye ruzivo rwavo rweMagwaro rwainge rwuri rushoma. Zvakangofananawo nevaverengi vakagadzirirwa Mukai!, vanoziva zvishoma kana kuti havatozivi nezveBhaibheri. Vangadaro vasingazivi dzidziso dzechiKristu, vasingavimbi nechitendero kana kuti vangave vasingazivi kuti Bhaibheri rinobatsira. Chinangwa chikuru cheMukai! ndechokubatsira vaverengi kuti vaone uchapupu hwokuti Mwari wechokwadi ariko. Uyewo inovabatsira kuti vatende zvinhu zviri muBhaibheri uye vanzwisise kuti Zvapupu zvaJehovha zvakasiyana nezvimwe zvitendero.
3. Ndivanaani vakagadzirirwa Nharireyomurindi yevoruzhinji uye yokudzidza?
3 Nharireyomurindi: Vanhu vakagadzirirwa magazini yevoruzhinji ndevaya vanoti remekedzei Mwari uye Magwaro. Vane karuzivo keBhaibheri asi havanyatsonzwisisi zvarinodzidzisa. Vakafanana nevanhu vakanzi naPauro ‘vanotya Mwari.’ (Mab. 13:14-16) Nharireyomurindi yokudzidza yakanyanya kunyorerwa Zvapupu zvaJehovha. Pauro aiziva kuti vanhu vaiverenga tsamba dzake vaiziva Magwaro uye vaiva nezivo yakarurama yechokwadi. (1 VaK. 1:1, 2) Ndizvowo zvakaita nyaya dziri muNharireyomurindi yokudzidza, dzakanyorerwa vaya vanopinda misangano yedu uye vanoziva mashoko nedzidziso dzeZvapupu.
4. Nei tichifanira kuziva zviri mumagazini imwe neimwe yatinoshandisa pakuparidza?
4 Patinenge tichipa mharidzo yedu tinonyanya kutaura nezvemagazini imwe chete kunyange zvazvo tichizogovera ari maviri. Saka, iva nechokwadi chokuti uri kuziva zviri mumagazini imwe neimwe. Kana ukadaro uchakwanisa kutaura zvinofarirwa nevanhu vaunosangana navo.